မိန်လိ သူ့ခြိမ်းခြောက်မှုက မသက်ရောက်ဘူးလားတွေးမိပြီး ခေတ္တရပ်လိုက်သေးသည်။ ထို့နောက် ဆက်ဖြည့်ပြောလိုက်သည်။
"ငါ မင်းကို မသတ်နိုင်ပေမဲ့ မင်းခြေလက်တွေကိုတော့ အသာလေး ဖြတ်လိုက်နိုင်တယ်။ မင်းက ဘာပဲပြောပြော ကျင့်ကြံမှုအဆင့်တက်ဖို့ အရိုက်ခံဖို့ လိုနေတာပဲ။ ငါက မင်းကိုတောင် ကူညီရာရောက်သေးတယ်။ ဟမ်း..တွေးကြည့်မှ တကယ် တစ်ခေါက်လောက် စမ်းကြည့်ချင်လာတယ်"
မိန်လိမျက်လုံးများ သူ့ခြေထောက်ထံ ရောက်လာသောကြောင့် ဇူအန် ကြောက်လန့်သွားရပြီး အမြန်ပြန်ဖြေသည်။
"အဲ့..အဲ့တာ စမ်းကြည့်ဖို့ မလိုပါဘူး။ ကျုပ် ခင်ဗျားစကားကို ယုံတယ်။ တကယ်ယုံပါတယ်။ အာ ဟုတ်သားပဲ။ ကျုပ်မေးခွန်းတစ်ခုရှိနေသေးတာ။ ယင်ကျန်းက ခင်ဗျားကို သတ်နိုင်မယ့်နည်းသိရင် ဘာလို့ အဲ့တုန်းက တစ်ခါတည်း မသန့်စင်ခဲ့ပဲ ချိတ်ပိတ်ထားရတာလဲ".
"အဲ့ဒီ ကမ္ဘာဦးမူလကျင့်စဉ်ရဲ့ သန့်စင်စွမ်းရည်က ဝိညာဉ်တွေအတွက်ပဲ အလုပ်ဖြစ်တာ။ ငါက ခန္ဓာကိုယ်ရဲ့ အကာအကွယ်ရှိတော့ ဘယ်လိုလုပ် အဲ့တာကို ကြောက်မှာလဲ"
"ဒါပေမဲ့ သူခင်ဗျားကိုသတ်ပြီး ဝိညာဉ်ကို သန့်စင်လိုက်လို့ရတာပဲ မဟုတ်ဘူးလား။ ကျုပ်ပွင့်ပွင့်လင်းလင်းပြောတာကို စိတ်မရှိနဲ့။ ခင်ဗျားက ယင်ကျန်းထက် ပိုအားနည်းတယ်မလား။ ခင်ဗျားကိုသတ်ဖို့ သူ့မှာ တစ်နည်းနည်းတော့ ရှိမှာပဲ ဟုတ်တယ်မလား"
မိန်လိ တစ်ချိန်လုံး ဒီကိစ္စကို သေချာမပြောပေ။ သို့သော် အခု ဇူအန်နှင့်သူက ချည်နှောင်ထား၍လားမသိ။ သေချာပြောပြရန် ဆုံးဖြတ်လိုက်သည်။
"သူက ခေါင်းမာတဲ့ လူတစ်ယောက်။ သူက ငါ့ကို အရှုံးပေးစေချင်တာ။ ဘယ်လိုလုပ် အဲ့တာက ဖြစ်နိုင်မှာလဲ။ ပြောရရင် ငါတို့ရဲ့ စုံတွဲသံယောဇဉ်ကြောင့် ငါ့ကို ညှာလိုက်တာတော့ အမှန်ပဲ။ ငါတို့ တိုက်ပွဲအပြီး မကြာခင် ယင်ကျန်းသေသွားလို့ ငါက စည်းထဲမှာ ချိတ်ပိတ်ပြီး ကျန်ရစ်ခဲ့တာ"
အတိတ်ကို ပြန်ပြောင်းသတိရနေသလို ထိုစကားများပြောရာတွင် မိန်လိ၏ ထူးဆန်းသော မျက်နှာထားကို ဇူအန် သတိထားမိလိုက်သည်။ သူကို တစ်ခုခု ဖုံးကွယ်ထားသလို ဇူအန် ခံစားလိုက်ရသည်။
ဒီထက်ပိုမေးလည်း မိန်လိ မသိစေချင်သောအကြောင်းကို ထုတ်ပြောမည်မဟုတ်သောကြောင့် ဇူအန် အခုတော့ ဘေးဖယ်လိုက်ကာ နောင်တစ်ချိန် ရင်းနှီးသွားမှ ထပ်မေးရန် ဆုံးဖြတ်လိုက်သည်။
