IDENTICAL HEARTS

" A pair of identical hearts "

စ​တွေ့တဲ့​နေ့က သူဟာ တီရှပ်အဖြူကို အစိမ်းရင့်ရင့်ပုဆိုး အကွက်စိပ်က​လေးနှင့် တွဲဝတ်ထားသည်ကို ကျွန်မ မှတ်မိသည်။

လူတိုင်း အဖြူအစိမ်းနဲ့ချည်းဆို​ပေမယ့် သူက​တော့ ကျွန်မအမြင်မှာတမျိုး​လေး ထူးခြား​နေ​ခဲ့သည်။

သူ့အသားက နည်းနည်းညိုသည်။ ခပ်တည်တည်မျက်နှာ​လေးနဲ့အတူ သိပ်လှတဲ့ မျက်လုံးလေး​တွေကိုလည်းပိုင်ဆိုင်ထား​သေးသည်။ ထိုမျက်ဝန်း​လေး​တွေအ​ပေါ်မှာမှ ​ဖြောင့်တန်း​နေတဲ့ မျက်ခုံးထူထူ​တွေ...။

ဒီ​နေ့ ​အတန်းပြီးလို့ကျောင်းကန်တင်းမှာ မုန့်လာစားရင်း သူ့ကို ထပ်မံ​တွေ့ ခွင့်ရခဲ့သည်​လေ..။

မျက်နှာချင်းဆိုင်ဝိုင်းမှာ ထိုင်​နေတဲ့ သူ့ကို နွယ်သတိထားကာ ကြည့်​လိုက်မိသည်။

ပြောမပြတတ်တဲ့ ဖမ်းစားမှု​​လေး​တွေကြောင့် နွယ့်မျက်လုံး​​တွေ ထိုလူသားအ​ပေါ် အချိန်အ​​တော်ကြာ ကျက်စားသွား​ခဲ့သည်။

အချိန်​တွေဘယ်လောက်ကြာသွားသလဲ နွယ် မသိ။

သူ နွယ့်ဘက် လှည့်အကြည့်မှာ နွယ့်အကြည့်နဲ့ သူ့အကြည့်ပက်ပင်းတိုးလေသည်။

နွယ့်မှာရှက်မိသွားကာက​ယောင်ကတမ်းဖြင့် အကြည့်​တွေကို သူ့ဆီမှ ​အမြန်ရှောင်ဖယ်လိုက်မိသည်။

ဒါက​​တော့ ​နွေးသက်နွယ်ဆိုတဲ့ကျွန်မရဲ့ ပထမဆုံး ရင်ခုန်သံမြန်ခဲ့တဲ့ ​နေ့​​လေးတစ်​နေ့...။

အကြည့်ချင်းပက်ပင်းတိုး​ပြန်တော့ နွယ့်သူငယ်ချင်း နုနု​ဝေ ​ပြော​နေကြစကား​ကို ပြေးသတိရမိသည်။

"အကြည့်ချင်းဆုံ ​ရွှေရင်​ခုန်​တော့
မလုံသူက ပြုံးစတမ်း" တဲ့လေ။

ရုတ်တရက် မ​နက်ကမှ တီချယ်​ပြောပြသော 'ဆရာ ဆရာမ​တွေက သိပ်ကို အကဲခတ်တတ်တယ်။ မင်းတို့လည်း ဆရာ ဆရာမ​တွေဖြစ်လာရင် လူတိုင်းကို အကဲခတ်တတ်သွားလိမ့်မယ်' ဆိုတဲ့စကားကို တွေးမိပြီး နွယ့်မျက်နှာ ပူခနဲ ဖြစ်ရပြန်သည်။

သူက​ကော နွယ်နှင့် Batch တူသလား။
နွယ့်ထက် Batch ​စောသလား။ နွယ် မသိ..။
နွယ်ကြည့်​နေတာ သူ ရိပ်မိသွား​လေသလား။​