ရဲရင့်က သူတစ်ပါး၏ကိစ္စများကို စိတ်ဝင်စားတတ်သူလည်း မဟုတ်သောကြောင့် မသိချင်ယောင်ဆောင်၍ ထွက်သွားမည့်အခိုက်မှာပင် ထိုလူအုပ်ကြားမှ မသဲမကွဲညည်းညူသံလေးကို ကြားလိုက်ရလေရာ အမှုမဲ့အမှတ်မဲ့လှည့်ကြည့်ဖြစ်လိုက်သည်။
ချင်းချင်းနီသောသွေးစက်တို့နှင့် အပြည့်ဖုံးလွှမ်းထားပါသော လက်ကောက်ဝတ်တစ်ဖက်သည် အမှောင်ထဲကတစ်ဆင့် ခပ်ဖျော့ဖျော့ဖြာကျနေသောအလင်းမှုန်မှုန်အောက်သို့ ဆန့်တန်းကာထွက်ပေါ်လာသည်။
ဖြူလျလေသော ထိုလက်ကောက်ဝတ်လေးကိုငေးကြည့်ရင်း ရဲရင့်နားလည်လိုက်သည်မှာ လူငယ်များအုပ်စုဖွဲ့၍ ရန်ဖြစ်နေကြခြင်းမဟုတ်ပါဘဲ အားနည်းသူကို အုပ်စုလိုက်အနိုင်ကျင့်နေကြခြင်းဆိုသည်ကိုပင်။ ရန်ပွဲကို သူဂရုမစိုက်သော်ငြား အနိုင်ကျင့်နေခြင်းကတော့ မတူညီသောကိစ္စရပ်တစ်ခုဖြစ်သွားလေပြီ။ သွေးထွက်သံယိုဖြစ်သည်အထိ အုပ်စုလိုက်ပေါင်း၍ အနိုင်ကျင့်နေသည်ကို ရဲရင့်အနေနှင့် လက်ပိုက်ပြီးကြည့်မနေနိုင်တော့ချေ။
ထို့ကြောင့်လည်း ထိုလူငယ်တစ်စုကို အေးအေးလူလူနားချခဲ့သေးသည်။ သူ့ကိုပင် ခနဲ့တဲ့တဲ့ပြောဆိုလာသဖြင့် မရင့်ကျက်နိုင်သေးသောလူတစ်စုကို သူ၏ခွန်အားကိုလှစ်ဟပြရန်မှလွဲ၍ ရွေးချယ်စရာမရှိခဲ့ချေ။
လူငယ်တစ်သိုက်ကိုဆုံးမနေချိန်မှာ မှောင်ရိပ်ထဲ၌ မောဟိုက်စွာအသက်ရှူနေရင်း မြေပြင်ပေါ်တွင်လဲလျောင်းနေဆဲဖြစ်သောလူငယ်လေးက သူ၏လှုပ်ရှားမှုမှန်သမျှကို မမှိတ်မသုန်ငေးကြည့်နေခဲ့သည်ကို သူသတိထားမိသည်။
ထိုတွေ့ဆုံမှုကိုအကြောင်းပြု၍ ဤမျှရှုပ်ထွေးသောအနေအထားဆီကို ဦးတည်လာမည်မှန်းသာ ကြိုသိခဲ့လျှင်.....။
မနေ့က သူ သံစဥ်လှိုင်းနှင့်သီးသန့်တွေ့ဆုံကာ လင်းရိပ်မာန်နှင့်ပတ်သက်သည့်ကိစ္စများကို သေချာမေးမြန်းခဲ့သေးသည်။ ဖြစ်စဥ်မှာ လင်းရိပ်မာန်ပြောသည့်အတိုင်း ကွက်တိပင်။
သံစဥ်လှိုင်းကိုယ်တိုင်ဝန်ခံလိုက်သည့်အခါမှာတော့ ခံစားရသည့်ခံစားချက်က သူမတူစွာထူးကဲသည်။ ထိုကလေးမသည် ဘာကြောင့်များ မိုက်မဲနိုင်ရသလဲ။ ရဲရင့်မှာ အတော်ကြာသည်အထိ သူ(မ)ကို ဆူပူမိပါသည်။
YOU ARE READING
I Found My Prince Charming (Season-3) [Completed]
Romanceသားရိုင်းကောင်လို အဆိုးအတေလေးတစ်ယောက်ကို ထိန်းကျောင်းနိုင်ဖို့အတွက်ဆိုရင် ကိုယ်တိုင်ကလည်း သူ့ထက်နှစ်ဆဆိုးသွမ်းနိုင်ရတယ်။ ရာဇဝင်တွင်လောက်တဲ့လူဆိုးနှစ်ယောက်ဖူးစာဆုံကြတဲ့အခါမှာတော့ အချစ်ကြမ်းကြမ်း၊ အနမ်းရိုင်းရိုင်းတွေသာ ဖြစ်တည်ပါသတဲ့။
Part-20
Start from the beginning