رب جارة نافعة

الفصل الاول :: لو اني لو غسان !!

#مقدمة
هذه الرواية حقيقية بنسبة ٧٥% و الباقي من خيال الكاتب لأنه ارتأى نهاية مناسبة للرواية
من الجيد أن تكون هناك نهاية سعيدة لرواية
جيدة نوعا ما و لكن النهايات الكلاسيكية غالبا
ما تكون سعيدة و غالبا ما تكون بعيدة عن الواقع الحقيقي لأبطال الرواية ...
.
.
.
الفصل الأول ( لو اني لو غسان ! )
#اليوم_الاول
#بداية ...
.
احمد عمره ٢١ سنة عايش هو و امه الي محتاجة رعاية دائمة ب بيت تجاوز ب احد مناطق بغداد بس المشكلة أحمد ما كدر يحقق شي بحياته لحد عمر ال٢١ ابو احمد مات بحرب داعش بس هلشي مجان اكيد طبعا لان ابوه ما رجع من الحرب اصلا رغم الانتظار ست سنوات ابوه ما رجع ف صار حاله حال هواي من الجنود الي مارجعو ابد و اهلهم علنو استشهادهم بعد ما أيسو من الانتظار لان بطبيعة الحال لو جان عايش جان رجع قبل سنين و لو جان ميت جان جابو جثته و يجوز ما يلكوهه حتة يجيبوهه لأهله
احمد ماعنده اخوان ولا خوات جان يحب الدراسة كلش بس من وصل للسادس إعدادي اضطر يترك الدراسة لان امه تمرضت و صارت مقعدة بلبيت و مكدرت تشتغل و جان لازم يشتغل و يعتني بيهه حتة يعيش أحمد ابد ما جان شخص محظوظ بلشغل رغم هو جان انسان جيد و طبعه كتوم و ما يأذي بشر بس المشكلة هو جان يتعب هواي و ما عنده احد يشكيله ف يكتم بداخله كلشي حتة معاملة ابو الشغل السيئة اله جان مضطر يستمر حتة يكدر يعيش و جان يشتغل بمطعم قريب علبيت لان ميكدر يشتغل ببغداد و يعوف امه .
كل الايام جانت تتشابه عنده و ماكو شي جديد الا بذاك اليوم .
الصبح ساعه ٦ دك جهاز أحمد .
و صحى هو و سد المنبه كلعادة طبعا ليروح بالكم لغير شي منبه الشغل هذا هو يسده يومية و ما يكوم الا على صوت امه
.
أم أحمد : كوم ماما كوم تريك دتطلع للشغل يلله ابني كوم المن موقت الجهاز اذا متكوم علمنبه
.
احمد : كمت كمت يمه هو هذا شغل المنبه نوقته حتة نسده و نرجع ننام و تجي نبع الحنان تكعدنا هو احنة نكدرلهه؟ منكدرلهه.
.
أم أحمد: هههه كوم يلله غير علمودك عندك شغل شلون تبطل يعني .
احمد: لا منبطل شنبطل يمه هاي كمت والله .
كام الافندي و تريك و لبس ملابس الشغل و طلع و هو بلباب
:: امي لتسوين عشا اليوم لتتعبين روحج اني راح اجيب وياي عشا .
:: اوك ابني صار شتشتهي جيب الله وياك محروس.
احمد واكف بلباب ديسدهه و اذا بسيارة شايلة غراض هواي مال بيت طبت للفرع و ظل صافن عليهه لحد ما جتي علبيت البصفهم الفارغ و وراهه سيارة جيب بيهه عائلة نزلت العائلة و نزلت من السيارة بنية ما شاء الله عليهه آيه من الجمال لا اكوللكم ولا تكولولي أحمد انسطر بمكانه .
اجه صديقه غسان من وراه شافه صافن :: كله ها يمعود شبيك متمشي .
احمد:: هسة عوفك من المنطقة تجاوز و طابتلهه جيب ٢٠٢٠ . احجيلي على الي نزل من الجيب .
غسان :: يمعود دمشي راح نتأخر هاي صدك تحجي .
احمد :: يمعود امشي شجابك انت الله يحفظهه مو بنية ملاك عبالك . امشي امشي راح نتأخر .
و جان يروحون للشغل طبعا ما عرفتكم على غسان هذا صديق أحمد من المنطقة و يشتغلون سوة عمره ٢٠ و طالب جان مرحلة اولى كلية و كعد حتة يشتغل و يلم جم فلس هو تقريبا ما محتاج لو يعتمد على ابوه بس هو من النوع الي يريد يعتمد على نفسه لا أكثر .
.
و هناك جانو بيت ابو رفل واصلين للبيت الجديد مالتهم طبعا هو مو تجاوز بس ايجار بس اكو تقريبا ٧ بيوت يعتبرن قفلة الفرع ذني جانن تجاوز من ضمنهن بيت أحمد اما بيت ابو رفل همة عائلة مكونة من ٣ نفرات ابو رفل موظف متقاعد و عنده بنات ٢ رفل الجبيرة عمرهه ٢٥ و اختهه الزغيرة عمرهه ٢٠ و أم رفل ماتت قبل ١٥ سنة اما الحال الي خله هلعائلة تكعد بهيج منطقة هو الأزمة المادية الي جانو يمرون بيهه بسبب الديون المتراكمة على ابو رفل بذاك الوقت بعدين المنطقة مو بعيدة عن مركز بغداد أو بالأحرى هلعائلة جانت ترضي نفسهه بهلشي لان جانو كاعدين بلمنصور.. وصلو للبيت و نزلو الغراض و من كملو تنزيل ابو رفل سأل البنات عن الريوك و مجانن حاسبات حسابهن أو مالهن خلك يطبخن يعني نكول دلال بنات و كذا ف كاللهن هسة نوصي اكل من المطعم .
ابو رفل:: بابا وين خالج .
رفل:: برة طلع يجيب جهازه من سيارته .
ابو رفل صاح على نسيبه عصام و طلع وراه و سأله عن مطعم قريب حتة يوصون دليفري و عصام كله عليمن ابو رفل اني هسة اروح اجيب
ابو رفل:: لا خوية خابر اذا تكدر و تعال بين ما نسوي مجال للكعدة حتة نتريك و نكوم نطبب الغراض .
عصام:: اوك اوك تدلل..
عصام طلع تليفونه و خابر على المطعم و وصاهم بس لان ما لكه وجبات ريوك وصه غير شي ..