سلالة العنفوان ..(ذنب عيناك)

الذنب29ج2

ضلت تصيح وتفشر وتغلط كالت...فياض مو هنا والله لو اهنا الا اخلي يذبحكم على القبله
جاوبتها...دنجبي يذبحنه هو ابو صماخ دخل بس الزمه الا اسكطه تسكط
ذياب رد عليها...وينو العار مالتج وينو المطي بي خير خلي يواجهني مو ضام روحو مثل الجريذي
ضلت تصرخ...يا نااااس يا عالم شوفو ذول الحقراء شلون يتهددون عليه ويغلطون عليه والله اسويها عشاير والله الا اخليها تصير مذابح اليوم ما تنامون ببيوتكم اذا ما تخذون عطوه
رديت عليها...دمشي الططوه تريد عطوه هي ام ال...
كطعت كلامي عيب من الوادم كال ذياب...امشي فاروق هل عار طلع النسوان واحنه ما نريد عركتنه ويه النسوان امشي بسيطه وين يروح اكضبو اكضبو
خلينه ورحنه وهي بعدها تغلط وتهدد وتخرخش لابسه الذهب كله وتطك بعلجها جنها مهرج
حطيت ايدي علئ كتفه همست...ذياب اهدي كول يا الله
جر نفس كال..فاروق تعبت وتعبت قربئ وياي قربئ ما تستاهل الي صير وياها
بس تعرف شغله انه السبب بكل الي جاي يصير
عقدت حواجبي...ليش ؟
رد عليه..زواجي منها صعب رغم هي رفضت بس اني اصريت ودخلتها بدوامه الها اول ما الها تالي
بس والله فاروق رغم كل شئ انه احبببه ما اعتقد واحد يحبها بكدي ولا اعتقد واحد راح يداريها بكدي وسندها ويحترمها ويعشقها قربى سلبت مني عقلي خلتني من دون عقل
نسيت كل العواقب عرضت نفسي للخطر وعرضتها وياي بس في سبيل تكون قريبه مني تكون بجانبي ما ردت منها شئ بس ردتها تكون حبيبه صح جنت اناني بكل الي سويته بس ما اكدر اتخيلها تحب شخص غيري او تكون الشخص غيري
تدري اني مرات اتعجب علئ نفسي عليش احبهه كا هذا الحب شفت بنات جثير مرة عليع شخصيات جثيره وقربى لا فد يوم غرتني ولا جانت بحالة اغراء وهي سلبت عقلي،ودمرتني
ابتسمت الكلامه...هذا يسمو الحب من اول نظره هنيالها علئ حبك وبعدين هي انسانه نظيفه وشريفه الله قذف حبها بصدرك وخلاك عون وسند الها بيوم ما كطعوها من شجره وخلوها وحيده وتعيسه انت العوض الها من الله وانت الي تجبر بخاطرها
رد عليه بحسره...فاروق اذا صارلي شئ قربئ امانتك هي واطفالي
جاوبته بقلق...يمعود كول يا الله شنو هل كلام
جر نفس كال...فاروق مشاكلي ما تخلص ويه بيت عمها لو هم يكتلوني لو انه اكتلهم غير هل شئ ما يصير ...
رديت عليه بخوف...عوفهم خلي يولون
نفخ بضجر...عايفهم بس هم الي ما عايفينه وراسهم والف سيف يردون يتخلصون من قربئ وانه كل شئ ولا قربئ اسويها كاتل ومكتول
جاوبته ...بلكي الله وتنحل هل مشكله
رد عليه...الله كريم
خفت من كلامه حيل خوفني،ما حبيت الحديث الاخير الي دار بينه بس اتغاضيت عن هل امر واتعاذيت بله من الشيطان الرجيم ...
مرة الايام طبيعيه عشرة ايام وطلعنه علي من المستشفى رغم هو لحد الان صابين الحوض بس ذياب كال اخذه الدكتور اخصائي حتئ هم اخلص من شر بيت عمها وهم احسن اله واهتمام اكثر...
طلعناه بالشقه ويانه كعدو لان مراجعات وهم يخافون تصير عنده مضاعفات وما يكدرون يجيبونه من الغربية لحد هنا
الله كريم الله يشافي هو الحمد لله ضل يستجيب للعلاج بس ذياب ما يريده علئ عوق يريده يمشي بصورة طبيعية ويرجع مثل ما جان...
..............
قربئ...
جنت واكفه علئ شباك الغرفه مال الشقه واباوع للبعيد مكتفيه اديه والعقل مسلوب مني ...
سارحه للماضي اني اليوم ام واكفه هنا مثل درع الحمايه لابني حبيبي ضاله بهاي الغرفه منتظرة الفرج ان ارجع البيتي من جديد بعيدا عن شد الاعصاب والتفكير الزايد
لحد الان علي يصبون الحوض ويرجعون يصبونه من غير الفطر الي بالجمجمه
ذياب ما جان هنا طالع وسوزان وفاروق بغرفتهم
دمعت عيني بحيرة علئ،حالي ...لو ما ذياب بحياتي اني شنو الاسوي لو ذياب يختفي من حياتي اني شنو يصير بيه
ما عندي غيرك يا ربي اني ام لثنين مو الواحد زادت عليه المسؤؤليه وما اعرف شنو الي اسوي مرات والله العظيم اتمنئ لو ضالين علي وغدير ببطني وما طالعين لهاي الدنيا الحقيره
وجع ساكن باعماق روحي تعبانه جسديا ونفسيا علي اخذ من طاقتي هوايه والقلق سكن روحي واستوطنها...
جنت لافه نفسي بوشاح قديم جوزي من صوف انطته اليه بيبي من جنت بالبصره حييل احبه محتفظه بيه احس بي ريحة بيبي وريحة امي الفاقدتها...
حسيت بي حضني وقربني الصدره ضهري صار علئ ضهره ابتسمت بحزن بي ما جانت الي اي ردة فعل
باس جتفي بهدوء ورجع باس عنقي كال...ول عليش ما نايمه لهل ساعه
جاوبته بدون ما ادير وجهي عليه وبعدني متكتفه واديه لفهن علئ اديه همست...جنت أنتظرك
عصرني حيييل وضمني الصدره ...جم مره كتلج اذا تاخرت نامي لا تنتظريني 
ضحكت باستهزاء...هههه لا ما مقبوله منك اذا ما اتطمن عليك عيني ما تكدر تغفه وتنام مستحيل
جر نفس عميق رد عليه...عجل شلون اذا ما اجيت للابد  !
درت وجهي عليه وهمست...راح اكووون بانتظار الموت لان انت اذا ما اجيت اني اموووت
حط اصابعه علئ شفايفي همس....اششش لا تحجين هيج ما احب اسمعج تحجين بالموت
همست بعبره...وانت لا تحجي بالابتعاد لان اموووت انت الي محلي دنيتي انت الي خله عندي امل بالحياه انت كل شئ حلو ومستحيل
باس شفايفي بحب كال...وانه لو اكتب عشقي الج بمي البحر واتخذه حبر ما راح اوفي وبحياتي ما حبيت وحده غيرج ولا غرتني انسانه غيرج انتي الوحيده الي تتربعتي علئ عرش كلبي وتوجتج ملكه
گولــٕولـهٰا ㋡
لو تمطـْر ورد غيـٰرچ فـلا يحـّٖلاليٓ ⇣℡
- شڪو نجمة بـ توالي الليل ، لمعتها من خـٖـ๋͜͡‏ﮩـډۈٰ୭ٰ۪۫ډچ "̯
حتضنته بكل حب وبرغبة بكاء فضيعه اجتاجت كل احساسي
شالني،بين اديه مثل طفله ما بالغه خلاني علئ السرير وامتد بجانبي وهو يسولفلي عن عشقه وحبه الي،وأول يوم شافني،بي وسلبت عقله واحتليت قلبه
واني رغم فرحتي بكلامه وهيامي بي بس صدري مخنوك ورجفه معتليتني ومازمه وضعي...
..................
وئام..
من بعد ما الشامخ انطاني السندات ضليت بقلق كلت العمر عمر كال...والله وئام بكيفج انتي اني ما اريد اجبرج علئ شئ ولا اريد انطي رايي الي يعجبج انتي سوي
حيرني اكثر فبعد ما طلع ابن ذياب من المستشفى خابرت عليهم كلتلهم لا تسوون غدا اني راح اسوي واجيكم
طبخت تمن برياني،ودجاج شوي وزلاطه مال لهانه وروبه ورحت عليهم...
رحت عليهم وتغدينه هناك بعد ما كملنه غدا غسلنه المواعين اني وقربئ وسوينه جاي شربنه
وفاتحت وياهم الموضوع
ذياب كال...شكو بيها وئام هذا الورث الي يملكو جدنا هو من تعبنا وتعب،ابونا ما بيها شئ هذا حقج اخذي واستفادي منه عندج جهال وباجر تكبر مسؤؤليتهم
رديت علية واني ادحك لفاروق...اريد اسمع رأي فاروق لانو يهمني
جاوبني فاروق بصدق...مثل ما كال ذياب هذا حقج مثل ما غيرج متنعم بي انتي هم من حقج اصلا انتي تعبتي اكثر من بنات الشامخ كلهن
جريت نفس...اي والله صدك يا فاروق بس يعز عليه اخذ منه
رد عليه فاروق...يمعوده شعره من جلد خنزير صدك جذب دخذيهن يبا حلالج
سكتت واقتنعت بفكرتهم وبعدها رحت ومشينه بالاجراءات وحول الأملاك باسمي...
خابرت علئ جدتي وعلئ امي سولفت الهن جدتي كالت...خوش سويني جااا شني بس بسطال محسوبه علئ الشامخ اخذي من ورث الشامخ ولا تسكتين عن حقج
بس امي ما جانت راضيه هاجست رغم هي ما حاجتني ولا تدخل وكالت...ان شاء اللة يمه الف مبروك
بس اني اهجس امي ما راضيه وهل شئ شويه ضوجني ...كلت لفاروق خابرته كال ...مالج شغل انه اخابرها وافهمها واكيد تقتنع
وفعلا فاروق ما قصر خابرها وكلبها مية وثمانين درجه بحيث صار كلامها مطابق لابو الفوارق...
..................
قربى
مرة الاشهر وعلي ضال شويه يتحرك مو مثل قبل سووله سحب لرجله
قررنه نرجع لان فاتت علينه اشهر هوايه بس هو يتحسن ومرات تصير عنده مضاعفات خطيه غدير صايره توكف وتوكع وتزحف سريع واخاف عليها من تصعد علئ شئ وتوكع هل شئ حيل مخوفني واخذت حذر من علي وضليت عبالك مثل الي مخليهم بشيشه لو بيدي اخليهم بگلبي واقفل علية
سوزان طلعت للجامعه وذياب جان نايم كلت خلي اريك علي وغدير سويت الهم بيض سلك وكلتهم اكلو وتريكنه سوه ...
كعد ذياب كال...صدك جذب قربئ غير تكعديني عندي دوام
فتحت عيوني مصدومه...ياااا عزا صدك عود ليش ما كلت
رد عليه...ترا كلت بس انتء عقلج مدري وين
حطيت ايدي علئ بطني بدلع كتله...اسباب الحمل هذا
رد عليه...شنووووو ؟
جاوبته بخوووف...والعباااااس حامل
رفع حاجب...لا تتشاقين مو وكتج
نزلت راسي بحزن...والعباس اني شدخلني غير انت السبب
هز ايده هو كل مره انه السبب وانتي ابد مو مذنبه
جاوبته ببراءة...عجل ذياب انه شدخلني ما اعرف شو كبل صرت حامل قابل بيدي اني عود ماخذه احتياط
هز ايده..هو انتي من البوسه تحبلين
جاوبته بمرح...هسه ماكو مبروك
رد ...لا مبروك عمي مبروك طحتيلي بيهم ركع انتظري خلي نربي البقيه
رديت عليه...والعباس مو قصدي والحسين هو الوحده صار
ضحك...كافي حلفان يله هذا هو نعمه راد نزيد نفر كتكوت جديد مثل عيون امو
ابتسمت...يعني راضي علية
جر نفس...هو اكيد راضي لان انه السبب اعرفج مو امان عليش ما اخذ احتياط انتي مو كلتي تشربين مانع
جاوبته...هاااا لا مو دكيته وخبطته بالشامبو يكولون زين للشعر
عض شفايفه وهو يكتم غضبه...شريط مانع جايبو تشربي ترحين تخلي،بالشامبو تا يثخن شعرج يا ام عطوب انتي شايفه كفشتج من تنامين جنه شجره بايام الخريف
تعصبت من كلامه وضلت رجلي بالارض سويت اهتزاز بجسمي...تحجي علئ شعري ترا عيب عليك وانت اصلا جذاب دكول انتي حلوه وانتي تجننين واحبج واموت عليج وتالي،شعري جنه شجره بأيام الخريف يله تمام اعزل فراشك عن فراشي وكافي كل يوم حامل من وراك
ضحك وتقرب مني حضني وقربني اله دفعته بانزعاج...وخر ذياب وخررر والله العظيم زعلت هيج شعري ما عاجبك
ضحك...والله عاجبني رغم مرات يزعجني من انام ولكاه متكوم علئ وجهي مثل سعف النخل بس اضل احبووو واموت بي
رفعت حاجب...لا والله انت شبيك اشو تغلط عليه وتتغزل بنفس الوقت شنو هاي هرموناتك شبيها
جر نفس ...تخربطت من عرفت بيج حامل ناويه تسوين فريق انتي
عطت بي...اني شدخلني غير انت
رد عليه بنص عين...اي صح مو انه الدكيت حبوب المانع وخليتو بالشامبو
درت وجهي بارتباك...اني شدخلني غير وحده هناك ممرضه بالمسنشفئ علمتني عليها واني طبقتها
كال باستهزاء...عجل ما طبقتيها وشربتي ورفعتي التهمه عني
نزلت عيوني...غلطت ومنك السماح
هز ايده بعدم رضا
بعدها تقرب مني كال...والله يا قربئ انه مو ما اريد منج اطفال بالعكس احقق امنيتج واخليج تخلفين عشرين طفل بس اهاجس مو وقته حاليا وانه اجاهد بس تا اطلع من هل شغله و وعد عليه اخليج بالسنه تخلفين مرتين
جاوبته بضحكه...هااا هااا علئ كيفك ابو الشباب شنو بزون بالسنه مرتين هههههه
ضحك...اي غير احقق احلامج المتواضعه
ابتسمت...يله تمام مشكور علئ تحقيق أحلامي
كال...يله حضري الريوك بين ما ابدل
رحت دا اسوي ريوك وهماتين فاروق كعد تريكو سوه
صار ب11 تقريبا
من طلعو وراحو سديت الباب باحكام وضليت افتر بالبيت وانضف بي...
شلت اغراض ذياب ضميتهن وحضرت اغراضنه لان هل ايام احنه ان شاء اللة راجعين للغربيه
حسيت اكو طكطكه بالشقه برا الغرفه كلت يمكن ذياب او فاروق او سوزي اجوي ماكو غيرهم
فتحت باب الغرفه وشفته كاعد علئ القنفه وهو لازم سجين بيده ويباوع الها بتمعن ماتت رجليه من الخوف احس الموت دخل بيهن
باوعلي بنظره مستهزئه وخبيثه وكلها قرف وهو يرسم علئ،شفايفه ابتسامه تنكط سم...
صرخت بصوت عالي وانهيار....اطلللللع اطللللع براااا انت شجابك هنااااا اطلع والله الم عليك الدنيا كلها والله يا نااااس يا عالم
ركض عليه بسرعه ركضت سديت الباب بقوه بس هو دفر الباب بكل قوته ارتطمت بي بقوه و وكعت علئ الارض احس ظهري انكسر نصين
صرخت بعلو صوتي واني ادعي ربي ينقذني منه شلون استفرد بيه شلون حقير
صرخت ...شرهاااااااان شرهااااان اطلع عوووفني الله يوفقك ابوس ايدك عوفني
سحبني وحط ايده علئ خصري واحتضني وهو يحجي بخدر...احبببج ولج احببج ولو اكتلج لو ما تصيرين الغيري مفهوم ما تصيرين الغيري
ضربته بعشوائيه واني ابجي وصاكهه علئ اسناني صرخت ...اكرررهك اكرهك عوفوني عايشه بسلام
ضحك باستهزاء...ههههه ليلة وحده وبعدها انقلج العالم الاموات واكلهم هي انتحرت ضابط الشغله عدل
لزم ثووبي راد يشكه دفعته وانهزمت منه هو سحبني من ضهري انشك الثوب بيده
ودفعني علئ السرير علئ وجهي وبعدها دارني علئ ظهري
ضليت اهمش مثل المخبله واصرخ بصوت عالي خرمشته بوجهه وملخته تملخ وارفس بي
دفن وجهه بعنقي،وهو يحاول يعتدي عليه لزمت راسه ابعده عني بكل قوووه حسيت شرايين اديه راح تطك من كثر ما شديت اعصابي
وعيوني جحضت احسها راح تطلع وعلي يصررخ هو وغدير وهذا مقيد مقاومتي بكل قوووه
للحظه حسيت كل شئ راح يضيع واذا ضاع اموووت والله اموت مستحيل اعيش بعار
تمنيت لو اي قوووه تنقذني من هل دمار الي راح يصير اليه
همست...يارب الكون خلصني يا منجي يونس من بطن الحوت نجيني يارب بردا وسلاما يا الله
ما حسيت غير بصوت طلقه وهي تخترق جمجمته والدم طفر علئ وجهي وعلئ الحايط و وكع راسه علئ صدري بقوه حسيته هشم القفص الصدري
جنت بحالة صمت وبعدها صرخت برعب من شفت الدم سبحني وغركت بي وهو انتهت انفاسه ومات بالحضتها...
نهاية البارت...يتبع
لا تنسوا التصويت و المشاركه بكم نكتمل...🌷