جلالتك

♕ The End ♕

آزر: " تفضلوا ترتاحوا سبقهم للقاعة و هوما تبعوه..

دخلوا كامل ما عدا جوانا وقفت برة ما قدرتش تدخل..

لداخل كان آزر يهدر مع أوس و التوأم الحربي (آسر و مااهر) على أمور المملكة و الجيش...
و أشرف ساكت و متوتر إيرينا كانت قاعدة قدامو روماركاتو حطت يدها على يدو و قالت: " إهدء كلش راح يجوز بخير...

غزر فيها و تبسم: " أعلم.. برك متوتر شوية..

شاف فيها مليح امبعد قال باستغراب: " شعرك واش درتيلو؟؟

حطت يدها على شعرها و قالت: " ااه.. قطعتو...

استغرب كانت تقدس شعرها كيفاه تخلات عليه...

أشرف: " علاه؟

تبسمت وقالت: " الجو بارد هنا و نعاني باه نشفو قطعتو باه ما نمرضش...

هز راسو بإيييه... امبعد انتبه لأوس لدخل في الموضوع قبالة...

أوس: " نظن جلالتك تعلم سبب زيارتنا..

آزر شاف جهة أشرف و قال: " أعلم...

أشرف قلبو بدا يخبط فور من نظراتو...

أوس: " كلفني الملك نتقدم كوني الاخ الاكبر و ولي العرش و نطلب موافقتك و رضاك.. حتى يتقدم الامير أشرف لطلب يد الاميرة جوانا...

أزر بقى ساكت و يغزر في أوس... إيرينا لتم توترت بزاف.. و ما نحكوش على أشرف...

آزر: " الاميرة جوانا ه‍ي الوحيدة لي بقات من دمي و لحمي.. مكانتها خاصة في قلبي... و حابها تكون سعيدة في حياتها...

غزر في أشرف و قال بهدوء: " راح تحقق السعادة لاختي؟

أشرف دار كوراج باه يجاوبو قال : " جلالتك أحبها.... راح نعمل على سعادتها ما حييت...

تبسم آزر و غزر في إيرينا... تبسمت معاه...

آزر: " رغم كل الشيء يبقى قرارها.. و أعلم أنها تحبك تان بصح خليها تمد رايها..

فرح أشرف قريب نااض عنقوو بصح شد روحو..

أشرف: " يعني راضي على زواجنا..؟؟

آزر: " نعم...

ضحكت إيرينا و عنقت أشرف لي كان ميت بالسعادة... ناضو خاوتو يعنقو فيه بالواحد.. و شكروا آزر ...

أوس: " بعد إذن جلالتك.. لازم نرجعوا للمملكة بسرعة نتمنى تحددنا يوم لاتمام الخطوبة رسمياا..