سمر بعد ما قالت كلامها دا مشت و خلتني محتار في أمري ، عقلي بقول لي صدق الكلام القالتو و قلبي بقول لي لا ، بس كل المؤشرات ضدها! لو بالجد هي ما عندها حاجه لـ سامر ، ليه بتكون متواجده في بيتهم 24 ساعه؟ ليه لمن عرفت انو ريان فهمتها غلط ما جات وضحت ليها سوء التفاهم؟ ليه لمن سامر قال ليها اتكلمي مع ريان و افهمي لي منها الحاصل ما جات لـ ريان و وصلت ليها الكلام القالو ليها سامر؟
ببساطه لأنها ما عايزا سوء التفاهم دا يوضح ، ما عايزا سامر يتقدم أي خطوه جاده اتجاه ريان ؟معقوله تكون بتحبو؟
ايوه أكيد أصلاً ماف تفسير غير دا بس ياريت ما استخدمت الطريقه دي لأنها ما بتليق بيها و أبداً ما كنت متوقع منها تصرف زي دا !
______________
من جانب آخر :
سمر رجعت بيتهم و مشت لـ سامر أخوها ، قال ليها اها بشري اتكلمتي مع ريان؟
قالت ليهو ايوه اتكلمت معاها و وضحت ليها سوء التفاهم الحصل بينكم ، بس يا سامر لازم تعرف انو مها هي السبب في دا كلو
_ ما فهمت كيف يعنى هي السبب ؟
= عديل كدا يا سامر هي من البدايه كانت عايزا تعمل مشاكل بيناتكم، يمكن غيره منها ما متأكده بس هي السبب في دا كلو قصداً دخلت الشك في ريان و هي قاصده تفهمها انو في شي بيناتكم عشان كدا ما حاولت تبرر لـ ريان و ما كانت عايزا سوء التفاهم دا يتلاشى ، انت مش طلبت منها تتكلم ليك مع ريان؟ و هي رفضت بحجة انهم متخاصمين بس في الحقيقه هي رفضت لأنها ما عايزا الإتخرب يتصلح
_ و انتي عرفتي من وين اني طلبت منها تتكلم لي مع ريان؟
= سمعتها بتتكلم مع ياسمين و تاني سمعتك بتتكلم معاها لمن كنتوا واقفين جنب الباب و كلامها القالتو ليك كذب لكن بطريقه صحيحه
_ بتقولي في شنو انتي يا سمر ، لا لا مها ما بتعمل كدا و بعدين حتستفيد شنو؟ عليك الله ما تقعدي تألفي لي قصص من راسك
= لكن يا سامر هي....
_ سمر! !....ما عايز اسمع حاجه بخصوص الموضوع دا، المهم عندي انو سوء التفاهم بيني و بين ريان يزول بس ما يكون قلتي ليها نفس الكلام القلتيهو لي؟
= اصلاً هي القالت لي ، شكلها ياداب كشفت مها، هي في البدايه كانت مفتكره انكم الإتنين خنتوها مع بعض لكن في الآخر اكتشفت انو الحصل كلو كان بسبب مها و انت ما ليك علاقه
_ ريان قالت كدا؟
= آيي والله
_ كويس بس والله يا سمر اكتشف انو ليك دخل في الكلام دا بأي شكل من الأشكال والله إلا اعلقك في المروحه دي!
______________________
من جانبي انا بقيت محتاره و ما عارفه اعمل شنو و ياسمين بقت ما بتتكلم معاي عشان ما لبيت ليها طلبها ، و ريان بقت كل ما تشوفني بتعاين لي بنظرة استحقار و شماته مع انها قبل كدا أصلاً ما كانت بتعاين لي ولا بتسلم علي طول فترة خصامنا! يوم انا طالعه ماشه المدرسه لاقيتها جايه من الدكان ، عاينت لي بإستحقار و قالت لي خلال اليوم دا حتسمعي خبر ما حيعجبك ، قلت ليها خبر شنو؟
قالت لي خليهو مفاجأه و مشت....فعلاً لمن رجعت من المدرسه شايفه ناس داخله و طالعه من بيت ناس ريان ، دخلت بيتنا و عرفت من أمي انو سامر خطب ريان ، أمي قالت لي بعد تفطوري امشي باركي ليها ....صحي انتي و ريان متشاكلات في شنو؟ قبيل إنصاف حكت لي الحصل لمن مشيتي بيتهم! و سألتني اذا عارفه سبب المشكله البيناتكم، قلت ليها والله ما عارفه و قدر ما اسألها بتقول لي موضوع بايخ و ما بترضى تقول لي ، تاني ح اسألك مالك مع ريان؟
قلت ليها ماف شي يا أمي و الموضوع ذاتو اتحلى ، قالت لي موضوع شنو؟
قلت ليها ياخ انا تعبانه يا أمي داخله ارتاح شويه ، المهم دخلت استحميت و صليت، بس اتذكرت كلام ريان قبيل معناها دي المفاجأه الكانت قاصداها ....ئهه شكلها لسه مفتكره انو في شي بيني و بين سامر عشان كدا قالت كلامها داك ، بس هي و سامر رجعوا لبعض كيف؟ لو سامر لقاها و اتكلم معاها أكيد حيقول ليها انو انا و هو ماف شي بيناتنا و الحصل كان سوء تفاهم بس حسب طريقة كلامها معاي و نظراتها لي القبيل هي لسه ما شالت فكرتها السيئه عني من بالها! ....عنها ما عندي بيها شغله....
بعد ما فطرت أمي قالت لي ماشه اشرب مع ناس إنصاف ديل الجبنه ، انتي ذاتك امشي معاي عشان تباري لـ ريان ، قلت ليها ما ماشه ياخ ، قالت لي مالك انتي؟ يومتا لمن قلت ليك امشي سماية رجاء قلتي ما ماشه و الليله اقول ليك امشي بارك لـ ريان تقولي ما ماشه؟
انتي الناس ديل مالك معاهم؟ عملوا ليك شنو؟ إنصاف دي كل يوم بتسألني منك ، قلت ليها و تسأل مني ليه! لو عايزاني خليها تجيني في البيت يعنى إلا امشي ليها في بيتهم؟
قالت لي حيرتيني معاك ، على كيفك ان شاء الله ذاتو تاني ما تطلعي من البيت دا…
________________________
