မှိုင်း(Complete)

part 23

ဝှီးခနဲ Dလေး နားရွက်ဘေးကို ပွတ်ကာ သီးကာ ဖြတ်သွားသော မီးရှူးကြောင့် Dလေး အသက်ရှူပါ အောင့်လိုက်မိသည်အထိ။Dလေးပုံစံကို ကြည့်ကာ မင်းမြတ် တဟားဟားရယ်ရင်း Dလေးဝတ်ထားသော မိုးကာသား အနွေးအင်္ကျီအထူ အစကို ဆွဲခေါ်ကာ ပြေးတော့၏။

တရွှီရွှီ အ‌သံပေးကာ လျှောက်ပြေးနေသော မီးရှူး များကြောင့် လူအုပ်တစ်ခုလုံး ပြေးကြသည်မှာ ဝရုန်းသုန်းကား။တဖြည်းဖြည်း မြင့်တက်သွားသော မီးပုံးပျံကြောင့် မီးရှူးများ ရန်က လွတ်ပြီဖြစ်၍ မီးပုံးပျံကွင်း ဘေးပတ်ပတ်လည်တွင် လူများက ပြန်အုံသွားကြသည်။

ရေမုန့်ဆိုင် ထောင့်တစ်ခုတွင် မှိုင်းတို့ လူပြန်စုံမှ တယောက်မျက်နှာ တစ်ယောက်ကြည့်ပြီး ခွက်ထိုးခွက်လန် ရယ်ကြ၏။

"ငါ့မှာတော့ ကလေးတွေ လွတ်ပါ့မလားစိတ်ပူသွားတာ။ဒင်းတို့က ပြေးတာမှ ဝှစ်ခနဲ အရိပ်တောင်မမြင်ရတော့ဘူး"

မင်းမြတ် စကားကြောင့် တခွိခွိရယ်ကြရင်း

"မှိုင်း ထိပ်ဆုံးကနော် ထားဆို ဝက်သားတုတ်ထိုးဆိုင်က စားပွဲခုံအောက် ဝင်ပြေးတာ တန်းနေတာပဲ"

သီဟ စကားကြောင့် ထားက မျက်စောင်းထိုးလိုက်ပြီး

"နင်ကော ဘာထူးလဲ ကြောင်တောင်တောင် ရပ်နေလို့ ညီမဖြစ်တဲ့ ယိင်းက နင့်ကို ဆွဲပြေးရတာလေ"

Dလေးကတော့ မင်းမြတ်ဘေးတွင် တောင့်တောင့်ကြီးရပ်ကာ စကားတစ်ခွန်းမှမဟ။အစောနက သူတကယ်ကြီး လန့်သွားသည်လေ။

တစ်ယောက်ကို တစ်ယောက် ဝအောင် ဖဲ့ပြီးမှ အနဲငယ် ချောင်လာသော ဗိုက်ကို ဖြည့်ရန် မုန့်ဈေးတန်းဘက် ထွက်လာကြသည်။ပွဲဈေးတန်းရှိ ခေါက်ဆွဲကြော် ထမင်းကြော် အကင် မျိုးစုံနေအောင် ဝယ်ပြီးသကာလ ဖျော်ရည် coffee ဆိုဂျူး Full moon ရသမျှဆွဲကာ တောင်ကြီး တန်ဆောင်တိုင် ဆိုင်းဘုတ်ရှိရာ တောင်ပေါ် သို့ တက်လာခဲ့ကြ၏။

ဆာလာအိတ်ရောင်းသော မိုးအိုထံမှ ဆာလာအိတ် တစ်လိပ်လုံး ဝယ်လိုက်ကာ ကားရပ်နားရာ နေရာသို့ တက်လာပြီး မီးပုံးပျံကွင်းကို အပေါ်စီးက မြင်နေရသော ဆိုင်းဘုတ်နဲ့ မလှမ်းမကမ်း တောင်စောင်းလေးတွင် မှိုင်းတို့ နေရာယူလိုက်ကြသည်။