حواديت تاج ويوسف

3

_ يا بنتي العريس برا عيب كده اطلعي اقعدي معاه

= ماما أنا مش عايزه اتجوز اطلعي قوليله ما عندناش بنات للجواز

= يا بنتي حرام عليكي، أنا عايزه اشوف عيالك قبل ما أموت

قومت من على السرير بسرعه واخدتها في حضني : بعد الشر عنك يا ست الكل

اخدت نفس عميق وكملت كلامي : حاضر يا ماما هطلع اقعد معاه

* أنا بخاف!
بخاف من كل حاجة بخاف من المستقبل المجهول، بخاف من الوحده، بخاف من بكره، بخاف من الموت، بخاف من الجواز، بخاف من كل حاجة!

طلعت من اوضتي ودخلت الصالون لقيته قاعد وماسك بوكيه ورد لونه ازرق هوباااااا أنا نقطه ضعفي الأزرق

قعدت علي الكرسي اللي جمبه ومسكت علبه الجاتوه وفتحتها وبدأت أكل منها

=إحم، مش هنتكلم

بصتله بإستنكار : انتَ ليه قليل الذوق كده

بصلي بصدمه وشاور علي نفسه : أنا

كملت كلامي وأنا بأكل في الجاتوه : ايوه انتَ مش شايفني بأكل ليه الإنسان بيعمل في اخوه الإنسان كده أنا مش فاضيه طيب، بص اسكت عشان انتَ كده كده هتترفد

ضحك = قوليلي بقا عشان كده بتأكلي الجاتوه من دلوقتي

سيبت علبه الجاتوه = لأ بقا انتَ كمان بتبص في أكلي، الصراحه أنا مش ضامنه ما انتَ ممكن تطلع بخيل وتاخد علبه الجاتوه معاك وانتَ ماشي، تيجي عليا بخساره ها وبعدين الجاتوه تعويض  عن الوقت اللي ضيعته معاك في الكلام

وطيت صوتي وقربتله سيكا : اصل بعيد عنك أنا بس بس woman

ضحك بكل صوته : بس بس woman مخارج الحروف عندك في ذمه الله، انتِ اسمك اي

قومت وقفت واتكلمت بعصبيه : انتَ هتصاحبني ولا اي اتفضل ما عندناش بنات للجواز

بصلي وفضل يضحك

قعدت علي الكرسي بعصبيه : انتَ بتضحك على اي هو انا اراجوز

=لا والله بس

= برمي نكت يعني

= لا مش قصدي بس

ملامحي اتغيرت وابتسمت : يعم اضحك إحنا اخدنا اي من الزعل يعني، اضحك عشان مثلا ممكن ما تخرجش من البيت ده سليم

= ايوه فعلاً..... اي ده انتِ قولتي اي

وطيت صوتي : هشش ليسمعوك

بصلي بصدمه : هما مين

وطيت صوتي أكتر : اهل تحت الارض

اتخض وبلع ريقه : الجن

قومت جري من علي الكرسي وفضلت ادور في الصالون وأنا بمثل اني خايفه : اللهم احفظنا اللهم احفظنا غلبااااان ما يعرفش حاجة، والله يا اسيادنا ده غلبان