ارجوحة الحياة 🌪( باللهجة الجزائرية 🇩🇿)

بارت 12

كانو خايفين عليها بزاااف باسكو الطبيب لحد الآن مقالهم والو
سهى كانت برك تبكي ومعرفاش وش تقول لفاتن ولا كيفاش تقولهالها
سهى وهيا تبكي : دروك كيفاش نقولها لفاتن
ريان : متقوليلها والو بلاك برك حاجة صغيرة
سهى : وي عندك الحق
وطرطڨت تبكي حتى عنقها ريان وبقا يهدي فيها باسكو شمس كيما يماها
ريان : خلاص متبكيش نشالله مكان والو
سهى : منيش حابة نخسرها منيش قادرة مامبا نتخيل
ريان : اششش متقوليش هاكا
حتى خرج الطبيب سهى راحتله تجري
الطبيب : نتوما اهل المريضة ؟
سهى : وي حنا وش صرالها
الطبيب : متخافوش نحب نطمنكم بلي برك غابت على لوعي وتقدرو تخرجوها دروك مي لازم ديرولها عملية بلخف باسكو الورم راه ينتاشر على مستوى الرئة وادا بقا هاكا مغاديش نقدرو نتحكمو فيه
ريان : اوكي دكتور نقدرو نشوفها
الطبيب : وي تقدرو خليه يكمل السيروم ودوا نتاعها وتقدرو تخرجوها
سهى : ماغسي دكتور
دخلو عندها يجرو كانت فايقة وتشوف فسقف
سهى شافتها حطت يدها على فمها باش تكتم شهقتها والبكا نتاعها لي كان لا اراديا
قرب عندها ريان هو لول باسكو فهاد المدة تعرف عليها ورجع يحبها ويحتارمها وولات عزيزة عليه
ريان : خالتي راكي مليحة
شمس : ههه يا ولدي علاه خفتو ما صرا والو موالف يصرا معايا هاكا متخافوش
ريان : هههه كان علبالي بلي نتي قوية وتقدري تقاومي
شمس : سهى بنتي بلا هاد الدراما سيرتوبلي ما صرا والو
سهى راحت تجري عنقتها وبدات تبكي
شمس : خلاص متبكيش ما صرا والو
سهى : متزيديش تخلعينا عليك
شمس : هههه صاحا متخافوش مقلتوش لفاتن ياك
سهى : نن مقلنالهاش
شمس : ومتقولولهاش لوكان تقوللها غادي تخاف وغادي تبدا تفورصي على روحها
سهى هزت راسها ب ايه
وبداو يهدرو معاها ويسو يخفو عليها بينما كمل الدوا باش يخرجوها

عند فاتن :
........: برافو يعطيك الصحة مخليا الشغل لداخل وقاعدة برا تلعبيها تسقي الحشيش
دارت صابته ادهم وشكون من غيره هو ونعيمة لي يظلو جايبينها موراها
دخلت لداخل بلا ما تزيد معاه الهدرة وراحت للكوزينة تشوف الفطور وهو راح خرج بلوطوته
دخلت للكوزينة ولقات نعيمة مع العساس لي عطاها ساشي وراح يجري فاتن توسوست باسكو كانت فيه حاجة كحلة لداخل
بدات تبع فنعيمة لي خرجت لجنينة وبدات تحفر فتراب استغربت فاتن مي قررت تكمل تراقبها وتشوف وش راها دير
خرجت نعيمة هديك الحاجة الكحلة لي كانت تبان كتانة ولا قماش مقطع وبدات تمتم بكلمات مفهمتهمش فاتن وحطت هديك القماشة فتراب وردمتها ( نورمامو فهمتو وش دارت نعيمة )
فاتن خبطت صدرها بصدمة وراحت تجري لشمبرتها وقفلت لباب بلمفتاح باسكو فهمت وش هداك لي دارته نعيمة بدات ترجف ومعرفتش وش دير مي تشجعت وخرجت عندها كيشغل ما كان والو باسكو راها تتعامل مع سحارة ايه نعيمة رمات السحور نتما
راحت للكوزينة ولعبتها ماشافتهاش
نعيمة : هههه دوك تشوفو شكون نعيمة
فاتن ضرب قلبها بلفور مي مداتهاش فيها وخلات يقينها فمولانا
المهم وجد لفطور وجا لوقت باش تحطه لحق قيس هو لول حالته مكانتش تعجب
شافته فاتن داخل للكوزينة تبسم معاها
قيس : نهاد كيراكي
هزت براسها معنا بخير
قيس شد فراسه لي كان يوجعه راحت فاتن تجري عنده باسكو كان قريب يطيح شداته وحطاته فوق الكرسي وراحت تجري تجيب الما
قيس : نهاد جيبيلي كاشي نتاع الراس الله يخليك وبقا شاد فراسه لي كان قريب يطرطق
راحت تجري جابت كاشي نتاع الراس شربتهاله وعطاته لما باش يشرب
قيس : خلاص نهاد متتقلقيش راني مليح برك شوية دوخة ما كليت والو هادا ماكان
حطت يدها على جبهته تقيس لحما لقاتها طالعة شوية
راحت جابت ورقا وستيلو وكتبت بلي حمته راها طالعة
قيس : راني مليح والله
ووقف باش يبنلها بلي راه مليح
قيس : هاه شفتي راني مليح دوك نفطر نولي مليح نتي غير رتاحي
هزت براسها ايه وهو راح ريح فوق طابل مونجي يستناخوته يجو باش يفطرو
وفاتن كملت التوجاد وحطت الماكلة فوق الطابلة والعايلة كاملة كانت نتم
بداو ياكلو
مجيد : غير لخير قيس علاش مراكش تاكل وش صرالك
قيس : لا ما صرالي والو برك راني عيان شوية من لقرايا باسكو غادي يبداو ليڨزاما
نسرين : ههههه مسكين راه حاب يتزوج
ضربها قيس فرجلها
مصعب شاف ففاتن كيفاش حمارت فهم نسرين علامن كانت
مصعب: انا ومزال ما تزوجت باغين تزوجوه هو
مجيد : علاش لالا نديرلكم عرسكم مع بعض ونفرح بيكم
مصعب : لالا انا حبيت عرسي وحدي
خديجة : نتا بعدا غير قرا قرايتك وكبر فعقلك نتم ساهل الحال
ادهم : هههه شفت حتى يما وقالتلك بلي خصك لعقل
مصعب : نتا لي خصك لعقل 30 عام ومزال باير وليت sugar daddy ههههه
ادهم : حشاك مازلت 29 عام
نسرين : ههههههه sugar daddy
هوما هاكاك يضحكو حتى ناض قيس من الطابلة لي مشي من عادته انو ميشاركش فالتمسخير ولا الضحك كاملين تشوكاو وتوسوسو وفاتن كانت برك تراقب ما فهمت والو
خديجة : هادا ماله
مجيد : ضغوطات الجامعة هادا ماكان
خديجة : وي عندك الحق
مجيد : حقا صديق العايلة ادريس راه داير عرس لولده لازم نحضرو غدوة فليل لازم نروحو ڨاع
خديجة : وي لحقتني برية نتاع الدعوة
نسرين : معناه فيها عرس
ادهم : لالا عزا ها باينة عرس مالك
مصعب : حبت تتأكد مسكينة انا بعدا منديكش تشري لقش
نسرين : لحمدلله عندي لوطوتي نروح انا ولبنات
ادهم : اممم نتي ولبنات باش تلقاي لاليبارتي انا نديكم مكانش لخروج وحدكم ( هادا هو الاخ الجزائري للاسف مالڨري طبيب معقد فمخه السيد )
نسرين : زعما نتا لڨارد كور نتاعي ولا شاه
مصعب : هو حارس مرمى ههخه
هنا فاتن تبسمت ومصعب نتبهلها وبقا يضحك هو تاني والسيد نسا روحه ومشى للعالم نتاعه لي فيه برك هو وفاتن وحدهم مي دايما فاتن تقاطعه وراحت هزت الماعين لي كملو بيهم هو فاق لروحه وناض خرج ريح فجنينة وبقا يشوف فسما ويخمم ففاتن حتى جا وليد
وليد : اوووو ولد العم راك هنا
مصعب : اهلا عاش من شافك
وليد : يا لكذاب غير لبارح شفتني
مصعب : وي حقا نسيت ڨاع
وليد : فاش راك تخمم متقوليش نفس الموضوع
مصعب : مكان ما دخلك فاش راني نخمم
وليد : انا راني قتلك واش دير مي نتا متسمعش الهدرة وراها عندك فرصة متتعوضش غدوة فليل باسكو غادي نروحو للعرس من 8 نتاع لعشية حتى 1 ولا 2 نتاع ليل
مصعب : انا قتلك لالا
وليد : دبر راسك باسكو نتا مامتزوجهاش غير ڨلعها من بالك

عند فاتن :
لحق الليل وجا لوقت باش تروح فاتن عند يماها صونات لبدرو لي كان ديجا يستنا فيها عند الباب كانت الساعة 2 نتاع الليل
خرجت بشوي وهيا تتستل حتى لحقت للوطو نتاع بدرو ركبت
بدرو : على السلامة
فاتن : يسلمك
بدرو : علاش طولتي ڨاع هاد المدة
فاتن : كان لازم نتأكد بلي رقدو واونبلوس نسيمة هي لي كانت تجيبلي لخبر اسكو رقدو راها كونجي وش حبيتني ندير
بدرو : اوكي معليش كاش جديد
فاتن : مكانش مي حالة قيس مراهاش تعجب وليوم شفت نعيمة تدفن وحد لحاجة علبالك راني شاكة بلي سحور
بدرو : لالا مشكيتش جامي نعيمة ديرها وسحور لمن بلاك كاش حاجة نتاعها ولا هادا مكان
فاتن : وي عندك لحق بلاك غير انا راني نكبرها
بدرو : نتي متشقايش تقربيلها ولا تسقسيها وش هداك ودوك كلشي يبان
فاتن : وي حقا بغيت نحكي معاك فواحد السوجي لي صدمني ليوم كي رحت نرتب شمبرا نتاع عمو مجيد
بدرو : غير لخير وش كاين .....

❤❤❤❤❤❤❤❤❤❤❤❤❤❤❤❤❤❤❤❤❤❤❤❤❤
وستوووووووووووووووووووووووووووووووب كملنا
ايا واش رايكم زعما لي دارته نعيمة صح سحور ولا برك فاتن تهيألها وواش غادي يصرا مع اسيل واسلام وبين مصعب وفاتن اسكو مصعب غادي يغلبه شيطانه ولا يمسح هدوك الافكار من باله واهم حااااجة لي تركزو عليها وش هو لموضوع لي غادي تحكي فيه فاتن مع بدرو واش لقات باسكو هدي هيا النقطة لي غادي تغير مجرى القصة ايا جمجمو وتفاعلو وبارطاجو ايا سيرتوبلي جمجمو 😍😍😍🍯