نيران غياهب الانتقام

البارت السابع عشر

غيث : مراح اعوفچ يلا يا نطلع اني وياچ سوا يا نموت سوا
باوع بانحاء المكان انتبه على الكرسي
غيث : نار حاولي تضلين واگفة بس ابعد هاي الخشبة من طريقنا
حركت راسي ببطء بصعوبة ضليت واگفة وساندة نفسي انتبهت علي جاب المرسة وگام يدفع بيها الخشبه الكرسي احترگ هم دفعها عالارض بقوة وگام يصيح بعصبية
حچيت بصعوبة وصوت مخنوگ  : غغيث الچاكيت مالتك اانزعها وحاوول تبعد الننار ببيها

نزعها مباشرة وحاول يطفي النار بيها قلت شوية سندني وطلعنا بصعوبة من المكان قبل ما ينهار كله باخر لحظة نجينا بس مچان اكو وكت للاستراحة
لزمني هالمرة بقوة
غيث : لازم نطلع من هنا لان راح يجون و هالمرة اذا لگونا ما راح يعوفونا الا دمنا يجري گدامهم

مرديت عليه چنت مختنگة هواي وكاتمة سعلتي حتى لا يسمعونا سندني ومشينا بس  بسبب انو تأخرنا هواي على ما گدرنا نطلع من المخزن سمعنا اصواتهم مقتربين من عدنا
باوع علية بخوف و قلق اني حاسة انو راح يغمة عليه بأي لحظة عيوني مدا اگدر افتحهم حتى ومبين انو انتبه على هذا الشي خلة ايدة على خصري وجذبني ناحيتة بقوة

باوعلي وحچة بنظرة كلها حنية : راح اسوي كلشي بايدي حتى انقذچ لا تخافين مراح اعوفچ للموت

ابتسمت بضعف على كلامة بهاللحظة حسيت ولاول مرة بعد فقداني الاخوية انو عندي سند اگدر أعتمد علي
بالبداية مچنت واثقة بي بس بعد ما چان مستعد يضحي بحياتة حتى ينقذني اتغيرت نظرتي تجاهة

بدينا نمشي بسرعة داخل الغابة هو المكان كله عبارة عن غابة ظلمة ومليانة شجر او الاصح هو ديمشي واني شبه شايلني ساندني بايدي الاثنين وحدة لازمة خصري واللخ لازمة ايدي القريبة منه

غيث : ان شاء الله ميحسون علينا لان صعب نطلع من هنا اذا لاحگونا

نار بتعب وخنگة: ااني كلش تتعبانة
غيث : اتحملي مظل شي صاحبي منتظرني عالشارع العام
نار : شگد المسافة
غيث : هي شوية بعيدة خصوصا احنا دنمشي بطيء مگدرت اخلي اقرب من هيچ لانهم متسلحين بالجبال واي سيارة قريبة يلگطوها
باوعلية بحنية وحچى حتى يطمني : لا تخافين نصل ان شاء الله ونطلع من هذا الجحيم
نار : ششكرا
غيث : خل اوصلچ الاهلچ بأمان وبعدين اشكريني

ضلينا نمشي تقريبا اقل من ساعة ابتعدنا عن الكوخ اللي چانو حابسيني بي ،
صحيح احنا بالصيف بس الهوا بالليل يصير كلش بارد حاسة انو عظامي دطگ من البرد و ريتي تارسها الدخان بصعوبة دا اتنفس
ما اعرف شگد راح اگدر اتحمل واستمر بس كل اللي اعرفة لازم اقاوم مو النفسي
بس الخاطر امي المسكينة ما اريد اعوفها وحدها

فجأة انتبهت على ضو غريب قطع افكاري باوعت الغيث شفته وگف وصفن مبين مو بس اني اللي انتبهت علي چان جاي من بعيد خففت صوت انفاسي العالي بسبب التعب حتى اسمع
فتحت عيوني على وسعهم لمن ركزت و سمعت صوت خطوات مو عادية كأنو اشخاص ديركضون مبين هاي الليلة مراح تعدي بهالسهولة ....