رواية بلا ميعاد / أديم الراشد

رواية بلا ميعاد للكاتبة أديم الراشد الفصل الثالث

دانه اللي ابتعدت وهي تبكي ولكن انقطع صوتها لما شافت جوال سطام يدق باسم ( عنود )
سطام اخذ نفس ورد بهدوء : هلا عنود
عنود : سطام وش صار معكم قلقنا مره
سطام : لا الحمدلله  مجرد التهاب بسيط وهذا احنا راجعين
عنود : اكيد مافيه شي خطير
سططام : لا ارتاحي وطمني البنات احنا مسافة الطريق
عنود : زين
سطام: احد حس من الكبار
عنود : لا
سطام: زين يلا
سكر وهو يشوف دانه اللي تبكي بحرقه واضحه وارتفع صوتها وهي تدعي على اللي سوا فيها كذا
ماكان بيد سطام يسوي شي الا انه يسكت ويخليها تطلع اللي بقلبها قبل يوصلون
٠
٠
وفي طرف ثاني كان صقر شاهد على كل اللي صار مع سطام بس اللي مستغربه ليش طلع كذا من المستشفى وليه طلعوا الامن والدكتوره يدورون وراه اشياء كثيره استغربها بس حس انها مصيبه كبيره كان يتبعهم بهدوء وهو يفكر وش ممكن يكون صاير
وقف لما شافهم وقفوا عند المزرعه ونزل سطام وهو يتكلم مع البنت وهي منهاره وتبكي وطولوا لي دخلوا
اخذ نفس صقر وهو يقول : وش يصير يا صقر وش الموضوع
٠
٠
اما  سطام اللي كان يحاول انه يهدي دانه اللي ما وقفت بكى وهي تترجاه يتصرف وبعد عناء سكتت دانه ودخلوا وهم يشوفون مازن ونايف والبنات ينتظرونهم في الجلسات الخارجيه
لفت دانه لسطام ببكى : سطام وش اسوي
سطام رجع لورى قبل يشوفونهم : دانه قولي لا حول ولا قوة الا بالله اذكري الله ان شاء الله محلوله اول شي امسحي دموعك وعلى طول روحي لغرفتك واذا اسألوك قولي إلتهاب وانتهى واتركي الباقي علي
دانه : سطام تكفى لا ينتبهون
سطام : لا تخافين انا معك
مشوا متجهين لهم والكل وقف ركضت ساره وعنود لدانه: دانه كيفك
سطام بسرعه: مجرد إلتهاب في الجروح وهي سكتت لما زاد الوضع لكن خلوها ترتاح لانها اخذت دواء بينومها
ساره: زين تعالي اوصلك
دانه : انا اروح لحالي لا تعبين نفسك
عنود: اي تعب تعالي نوصلك بس
راحوا البنات وتقدم سطام وهو يعطي مازن هويته: هذ ما استخدمتها
مازن : شلون عالجوها طيب
سطام : مثل ما تعالجت انا من سنين
راح وتركهم وهو ماله خلق يجادل كفايه المصيبه اللي بين يدينه
نايف : ياخي فعلياً انا ماني فاهم شي احس الكل يركض لكن محد يدري وين بيروح
مازن تنهد وهو يتجه لفراشه : يا رجل من متى فهمت ذا العايله اصلا
نايف : وش تسوي ؟
مازن : بنام !
نايف : تكفى لا
مازن: شتبي ياخي بطني يوجعني بنام يمكن يخف
نايف: اجلس لحالي يعني
مازن: محمد قالك نام قبل
نايف: تكفى يا مازن
مازن لف له وهو يهدده: اسمعني انا بحط راسي وانام ليش لاني تعبان واذا حاولت انك تخرب نومي بخليك ثالث واحد تروح المستشفى تسمع وبإصابات خطيره
نايف رجع لورا وهو مكشر: يا شين النفس ياخي
مازن ما رد وهو يتلحف
دخل سطام بلحافه وناظره نايف ببتسامه
سطام قطع الكلام بسرعه وهو ينسدح ويتلحف : نايف لا تحاول ولا تزعجني
ميل نايف فمه طفش وانسدح يلعب ..
٠
٠
ومن بكره صحى سطام وهو يناظر حوالينه كان هدوء والكل نايم ناظر بساعته وكانت 9:30 استغرب ان محد صحاهم وقف بسرعه لما تذكر دانه لبس بسرعه وطلع شافهم جالسين بالديوانيه واتجه للمطبخ دخل وهو يتمنى محد يصادفه بس شاف جوري ابتسم وهو يقول : صباح الخير
جوري : هلا هلا صباح النور
سطام : وين البنات
جوري : كلهم نوم ما عدا ساره عند جدي والعنود قافله معها ومطنشه الكل وجالسه برا
سطام: ليش ليش !
جوري : متطاقه مع مازن وانت عاد تعرف عنادها
سطام: شبلاها ذا البنت متحامله على مازن
جوري : والله اخوها يقهر
ضحك سطام وهو يقول : مو مشكله وين دانه
جوري : بغرفتها
سطام: زين شوفي لي الطريق بشوف كيفها
جوري :ابشر
ابتسم سطام وهو يقول بنفسه ( يا زينك ياجوري على نياتك والله لو اني قايل لعنود والا وحده من البنات لتطلع عيوني )
رجعت وهي تقول :خلاص تعال
راح سطام ودخل الغرفه وهو يناظر دانه اللي كان واضح له انهيارها
جوري : دانه قلبي خلاص وقفي بكى الموضوع كله إلتهاب
سطام : جوري جيبي مويه خليها تهدي
راحت جوري ووقف سطام وهو يقول : دانه اسمعيني انا الحين رايح اشوف لنا حل لكن ابيك تهدين لا تشككينهم فيك
دانه : كيف بنتصرف
سطام: بنتصرف بس انتي اهدي وانتظريني
جوري جات وهي تعطيها المويه: خلاص هدي
دانه اخذت المويه وهي تراقب سطام اللي قال :انتي لا تفكرين وشوفي كيف يخف كل شي
جوري بحسن نيه : صادق
سطام:انا رايح
طلع وراح لديوانيه دخل ويدور جده وابتسم ابتسامه عريضه : صبحه بالخير يالله وش ذا الرضا اللي يخلينا نصبح على وجهك الطيب
ابتسم له الجد اللي كان واضح حزنه: هلا يا ولدي انت بعدك هنا ما رحت للاسطبل ..