『قٌصص ﺑٱرۅد』

⍅فكر بالنهايه⍆

تبچين بوجع لان راح اعوفچ بعد ما تتعلقين بيا .. بعد متحبيني و تصدگين كل كلامي عن المستقبل و الارتباط .. بعد متخيلتي انتي راح تصيرين زوجتي بس بالنهاية اني مراح اتزوجچ و راح اتزوج گرايبي .. و راح تدخلين بدوامة قهر .. و الثقة عندچ تنعدم بالكل .. و راح تفكرين تگصين شعرچ .. و تفكرين تسوين شي بنفسچ .. و راح تحاولين تتواصلين وياي بس اني راح اتهرب و بالبداية راح تحاولين يوميه مرات و مرات و مرات .. و بعدين مثل زخات المطر بالبدايه قوية و بعدين تبده تقل و تقل و تقل و تصير قطرات و القطرات تنتهي بالنهاية و الجفاف يوصل لگلبچ .. و راح تكرهين شكو شخص اسمه مثل اسمي .. و راح تقارنين شكو شخص يحاول يتعرف عليچ حتى لو چان صادق راح تقارني بيه .. و راح تصير بيچ خوفه لا يطلع مثلي ..

و احتمال بالاخير تقبلين بأي شخص يتقدملچ حتى بس تنسيني حتى لو هـ الشي مبني على تعاستچ .. بس المهم تنسيني .. و راح تدعين عليه بداخلچ .. و راح بكل اغنية هديتها الچ راح تنهزمين من كلماتها لان صورتي راح تنرسم بمخيلتچ.. و الشوارع الي راح نمشي بيها راح تصيرلچ مثل السجن و بس تفوتين بيها لوحدچ لو وي اهلچ لو وي صديق او قريب بس تفوتين بيها راح تحاولين تنهزمين بسرعة منها ...........

طبعا بنص حديثي اكيد راح تگطع كلامي و تگول دقيقه انته شدتحجي ليش اني اعرفك اصلا .. راح اجاوبها و اگلها بالضبط انتي متعرفيني بس اذا جيتچ بيوم و ردت اتعرف عليچ تره هيچ راح يصير مصيرچ لان مراح اتزوجچ و هـ الابتسامة الحلوة الي بوجهچ راح اخذها منچ و بعد مترجع ابد .. وحتى اذا ترجع هالابتسامه راح ترجع مكسورة و اذا ضحكتي راح تنزل دمعه وي الضحكه ..

و اكيد ورى ما اكول هيج لكل وحدة عرفتها راح تكرهني قبل متعرفني اصلا ... هاي امنيتي والله ..

امنيتي يرجع بيه الزمن و اروح احچي هـ الحچي بوجه كل وحدة عرفتها و مصارت من قسمتي .. لأن سنه وره سنه تمر و اني كل وجوه هـ البنات تطاردني بكل مكان .. مو لان حبيتهم و ما اگدر انساهم .. لان چذبت عليهم و وعدتهم وعود مو حقيقيه .. حتى من تزوجت هم ما بطلت .. و هم صادقت و انكشفت بمرور الوكت و جنت دائما اكول طز عادي شيصير خلي يصير .. صعب من اصفن بيني و بين نفسي واكول .. ليش اني بجيت انسانه مو من عائلتي .. لا اختي لا امي .. انسانه اني رحت دخلتها بحياتي وخليتها تتعلق بيا .. انسانه لو اني باقي بعيد عنها مچان بچت و لا انقهرت ..

المصيبه ليش سويت هيچ اني .. مو بس اني .. هواي اكو شباب دخلو بهيچ مواضيع و راح يدخلون .. بس ليش .. ليش انسانه تبقى بـ كل الطرق تحاول تتقربلها و من تتقربلها و تقبلك و تعيشها بحلم وردي الي هو الارتباط .. بعدين فجأة تعوفها ... ليش .. ليش تبچيها اصلا .. ليش و على يا مال من .. بنات طيبات و گلوبهم طيبة خليت ضحكتهم تنكسر بدمعة ليش ..

القاتل مو شرط يكون قاتل بشر ... قاتل ضحكة .. قاتل ابتسامه .. قاتل امل .. قاتل حلم .. واني قتلت ضحكة فلانه و حلم فلانه و ابتسامة فلانه .. و هسه خايف لا يجي واحد مثلي هم قاتل .. يقتل اشياء ببنتي .. تدرون .. اكو بنات عوائل مرات يصيرون مو زينات و السبب الي مثلنه ..

يعني مثال .. واحد يتقرب من وحدة بالكلية .. بالوظيفة .. بالعمل .. بأي مكان مو مهم و يوم وره يوم يحاول و يحاول لحد متصدگ هـ المسكينة بي و بنوايا .. و بعدين فجأة يعوفها .. هو راح يكون سبب من الاسباب الي يخليها تصير مو زينه وتصادق واحد وثنين و تلاثه .. لان هو چان البداية ..

ثقت بي و لو باقي وياها من صدگ چلن مصارت مو زينه و تعرفت على غيره .. لان هو چان اول واحد بحياتها و كسر حاجز خوفها من شي اسمه رجال ..

يعني لو متزوجها چان كعدت وياه و انسترت و الحلم الي حلمته صار حقيقه .. بس من تنعاف راح تحاول تلگه شخص زين .. واكو احتمال الرقم ٢ بحياتها هم راح يطلع نفس نوعية الاول .. و هاي ثنين مو زينين .. و يجوز رقم ٣ هم مو زين .. و البنيه بالمجتمعات العربية اذا تصادق واحد راح الناس تحچي عليها بالمو زين .. زين اذا صادقت ثنين و تلاثه .. و السبب هو الاول ..

اني هسه هاي امنيتي .. واعرف مراح تتحقق ..
و ياريت اذا واحد يريد يدخل بعلاقة و يعرف مراح يكمل لا يعيش الطرف الثاني حلم مراح ينتهي على خير .. و يتخيل المقابيله في حالة روحته شراح يصير بي .. يشوف ضحكة هـ البنية المقابيله راح تنگلب دمع و بچي .. و من البداية يسحب روحه و يخليها بحال سبيلها ..

لا تبچون غيركم و تقتلون احلامهم .. لا تقتلون فرحهم .. لان ببساطة .. راح يجي يوم مثل اليوم الي اني بي هسه و كاعد بنص اصدقائي و اكو خوفه بداخلي .. خوفه على قطعه مني .. خوفه جبيره .. صح اني غلطت و اعترف بغلطي .. بس ياريت قبل البداية .. نفكر بالنهاية .. ياريت ..
فكر بالنهاية
انتهى

اتمــنى عجبتكم قصة اليوم
تفاعلو گليباتي❤️