『قٌصص ﺑٱرۅد』

⍅نُفَيتُ و استوطَنّ الاغراب في بلدّي⍆

قصه قصيره راح تعجبكم ❤

أسم القصه #نفيتُ_و_أستوطنَ_الأغرب_في_بلدي

تابعوا حسابي حتى يوصللكم كل جديد

نفيت و استوطن الاغراب في وطني ...
هاي اكثر جملة تستفزني بـ الاغنية و تخليني اتذكر الي صار و ارجع بـ التاريخ لـ ورى ليوم زواجي و كتب كتابي عليه ...

وهموني بي و بـ شهادته و بخلقه و گالوا ملتزم و راح يخاف الله بيچ رغم فرق العمر بيني و بينه ..

چنت صغيرة و طفلة و حالي حال أي بنية بهل الدنيا متريد غير الزواج و الاستقرار و تكوين اسرة صغيرة ...

رحت يمه مثل اليتيمة الي ما عدها لا اب ولا حتى ام .. ارتميت بحضنة حالي حال الطفل من يوگع بالگاع و يركض على امه ..

گلت هو راح يصيرلي وطن و ملاذ و علاج لكل وجع الي بالمستقبل و يعوضني فرق السنين الي بيني و بينه بحبه و حنانه اليه..

بس كل الي حلمت بي و كل الي تخيلته طلع چذب ...

صح هو عنده شهادة بس طلع مثقف بس گدام الناس .. و حتى خوف الله الي يحچي بي و اخلاقه چان ماخذهم قناع يلبسه برى البيت و قبل ميوصل لباب بيتي ينزعه و يفوتلي بوجها الحقيقي ..
ضرب .. غلط .. مسبات ..

حملت من عنده و گلت راح يتغير وره الطفل و راح يصير اب و اكيد مراح يضربني بعد .. و جبت اول بنية ..

الي يخاف الله گدام الناس يگلي بالحرف
(هو هذا الي الله گدرج عليه جبتيلي بنية !)
ليش هو بيدي لو بيد رب العالمين ؟

وينك ياصاحب الدراسة وينك يا صاحب العلم يلي يجوك الناس يگعدون يمك حتى بس يستفادون من خبرتك الدراسية !

وين الكتب الي مسطرهم بالمكتبة الخشب الي متقبل حتى تنظيف انظفها و دائما ترزلني اذا تشوفني اتقرب منها ..

وينك من الدين الي وين متگعد تسولف بي وتسوي نفسك مؤمن؟ على اقل شغلة تضربني و اقل شغلة تغلط و تسب حتى اهلي!

كلشي مشيتله و كلشي جنت اضمة على اهلي و لهذا اليوم مراح انسى بيوم الي ضربني على ايدي قوي و صارت زرگة و رحت لبيت اهلي بعز الصيف و الدنيا جهنم و اني كاعدة بنص اخوتي لابسه تيشرت ردن ..

واني يعرفوني و حالي حال أي بنية بهل الدنيا بس تفوت بيت اهلها و بنص اخوتها و امها وابوها ترتاح و تاخذ راحتها باللبس ..
بقيت لابسة ردن وكل شوية اجره ..

ليش !
ليش هالتمثيل گدام الناس و مسوي نفسك حمل وديع و فوگاها الكل يحلف بأسمه و بكل عركة يدزون عليه يتدخل و الغريب يحلها للعركة حتى لو واصله للقتل ..

بس ببيته شخص ثاني ..
على مرته وحش ..
و اخيرا .. بعد تحمل سنين و بعد معاناة طالت اكثر من اللازم و بعد اخر ضرب حصلته منه قررت افضح كلشي گدام الناس و گدام اهلي لان خلص ..

وصلت مرحلة بديت بيها افكر بالانتحار .. و صدگ چنت ناويه اسوي هالشي ..

ضربني ضرب مو طبيعي .. لزمني من راسي و دگ بالحايط و ليش !
علمود شنو !
لان جتي جوارينا هو يكرهها بسبب رجلها .. لان رجلها ميحچي وياه ..
گلتله هي جتي للبيت و فاتت گبل بس فتحت باب الحوش ..
و ابوس بيده والله العظيم و هو ولا عبالك ..

بقى يضرب بيه يضرب يضرب لحد موگعت بالگاع و وراها تخبلت ..
محسيت نفسي الا واني بالشارع و بالدشداشة اركض بلا وعي والله العظيم .. الناس والجوارين التمو واني گعدت بالگاع ادگ على راسي ..

نفس المرية الي من وراها صارت العركة فوتتني لبيتها و لبستني عباية و اخذتني هي وزوجها لبيت اهلي ..

و تطلگت و طبعا كل الصوچ براسي بالمناسبة ..
حتى اهلي لاموني .. ليش و شلون تطلعين بره البيت بـ الدشداشة .. وهاي اول مرة يضربچ ..
يگولولي هاي اول مرة !

لزمت السچينة وردت افوتها بـ گلبي وگلتلهم مو اول مرة يا بشر مو اول مرة .. سنين يدگ بيه و يضربني واني جنت اضم بـ گكلبي علمود حلم الاستقرار والعائلة و الاطفال ..

سنين واني اضم عليكم حتى لا اوصل لهل المرحلة الي اوگف گبالكم و تستجوبوني ..

سنين واني بالعة المر علمود ما اصير مطلگة ..
وهسة خلص ..
اصير مطلگة ولا اعيش مذلولة و البس قناع گدام الناس اسمة السعادة ..

و تطلكت .. بس امانة الله اهلي ابد ممقصرين وياي و لا گرايبي .. و الحمدلله رجعت ادرس و كل امنيتي هسة اطور شهادتي حتى احصل وظيفة واعيش اني وبنتي بخير .. لان هو ميريد البنية و بقاها يمي ..

و بالنسبة لمقطع اغنية كاظم الساهر ... گلت يستفزني .. لان السافل (مكرم القارئ) ما عبر سنة على طلاقي وتزوج عليه ..

اني مو قصدي احبه لا والله .. بس قصدي غيري اخذ مكاني وجنت اتمنى يطلع انسان طيب و ما سوه وياي الي سواه ..

ع العموم بالخير عليه حياته الجديدة ..
والله يحفظلي بنتي و يوفقني بدراستي ..
(نفيت واستوطن الاغراب في بلدي)
انتهى و نشوفكم بالبارت الثاني

و الله يحفظكم ...