#المراهقه_و_الأربعيني

الحلقه18

المراهقة_و_الأربعيني
،،،،،،،، بقلم زينب ماجد ،،،،،،،،،
الحلقة_18

دخلت ابرنامج اسمو واتساب.. اول اسم دخلتلو.. حجي بس صوتيات .. فتحت صوتيه دا اريد اشوف بنيه لو رجال..
حطيتو على اذني.. واسمع الصوت اجه من وراي بعصبيه وهو يزكح وي منو جاي تحجين...
اندرت بساع ونزلت الموبايل.. ودست الدكمه البنص وكتلو ما عتكلم وي احد.. تقرب مني بعصبيه وجر الموبايل جر من ايدي..
اني ما اعرف للموبايلات.. امي وباجي عدهم هذا النوكيه اللي بس ادوس الدكمه الحمره تطلع من كلشي وبعد مترجع..
بس موبايلو كان حديث وما كنت اعرف ان اكو شي اسمو التطبيقات المشتغله يلي منها تضغط وطلع كل البرامج اللي طنت تستخدمها..
فهو بساع داس التطبيقات المشتغله.. طلع اخر برنامج هو الواتساب دخل.. وعقد حاجبو.. ودحكلي وهو يخزر بعيونو
-نقيب علاء منين تعرفينو و شعدج وياه
-ما اعرفو والله.. كضبني من ايدي حيل وهز بيه ويصك على اسنانو ويحجي
-لج لا تثوليها وياي ليليان انتي داخله بمحادثتو وكاعد تسمعين بصوتو ..
-هيج بس دخلت والله ما عندي شي اقسملك والرب ..
-صعدي جدامي فوك وانه اعرف شلون احاسبج..
-زت ايدي من ايدو حيل اجيت اوكع وامشي مثل الثوله حيل حتى اصعد..
دخلت للمطبخ ام سعد تكلي وين المواعين متانياتج ..
ما سمعتها صعدت فوك بسرعه على عمى زجهي دهلت واني اكل بشفتي واطكطك باصابيعي من الخوف واني افكر شنو اكلو
ردت اعرف منو جنت تحجي وياه.. لا يمه لو اموت.. جنت العب بموبايل.. لا هسه يكشفني بساع.. يربي شسوي وشكلو ...
دفر الباب ودخل وركع وراه. ويكلي
:- كعدي جدامي لشوف..
-كعدت واني احس گلبي راح يطلع من الخوف.. عمو بس اسمعني
-اششششش همى العماج وموت الخذاج وخلصني منج. هسه تفهميني .. نقيب علاء شتسوين داخله عليه..
-ما اعرفو والله ولا سامعه بأسمو صدكني والرب
-عجل شعدج جنتي تفتشين بموبايلي احجي..
-عمو...
-احجيييييييييييييي
-جنت ادور رقم امي .. كام على حيلو واجه لزمني من اذني ..
-وامج عدها واتساب ؟؟ مو كلتيلي ما عدها موبايل حديث.. تلعبين وياي انتي لو شنو .. ولج عبالج يعبر علييييييه..
-ضربني چف احس اذني صفرت.. دنكت راسي وكمت ابجي وما احجي ..
-رفعي عينج بعيني وكليلي شجنتي ناويه بموبايلي.. لافه وره البيت وخايفه واحد يدحكج ليييييش
-ماعندي شي والله.. حجيتها وخليت اديه على وجهي ودنكت ابجي..
-هو فرك وجهو وكام يستغفر ويردد .. استغفرك الهي واتوب اليك الصبر ربي الصبر.. ودحكلي وصاح طلعي بره..
طلعييييي برا ما اريد ادحكج جدامي بساااااع..
-طلعت بساع ونزلت.. صاحتني الحجيه.
- ليليااان.
-هااا شرايده.
-وجعااا يولي شبيج منو وياج...
-دا اريد احجي.. ما احس الا انلزمت من شعري حيل وزكح...
صراع:- هاي ويامن ال هااا شرايده.. ولج بكد القندره نترين بأمي. خدامة الخلفووووج هي وتنترين بنت الكلب
-ما قصدي والله.. احجي ومخليه ايدي فوك ايدو على شعري ومدنكه راسي.. ودموعي بعيني .. كامت الحجيه بساع من مكانها.. واجتني تركض حيل وتصيح
-يا يمه على بختك لا هيج وياها خطيه..
صراع:- ادنكين تبوسين اجدامها بساع يلااااا..
-وك يمه لا هيج.. استغفر الله.
-ام سعد ادحك واخلاص من فوك عدها مسرحبه كدامها وهو يرزلني.. واني ابجي.. ما كلت خفت منو دنكت للحجيه.
بعدني هسه دنكت هي جرتني وخلتني وراها وكالتلو معليك بيها انه وياها هي بنيتي وانه اعلمها لا تدخل بيناتنا..
وهو يخزر.. تركنه وصعد.. و هي.اندارتلي .. شبيكم يولي شصاير كبل شوي شحلاتكم شجرالكم بهل نص ساعه.
-ما سويت شي والله هو عصب على موبايلو.. اخذتني لحظنها و ضلت ادطبطب على راسي وتكلي
-يلا يمه ساعة عصبيه تهون ان شاءالله تهون.. تحملي بنيتي هو اعصابو هليام متهستره بنتو وعمايلها واخو طلعلو صفح بزواجتو ..
ودماغو ما عاد يحمل والمره الزينه تحمل زلمتها بكل حالاتو لا بس من يصير حنين ويطلع من هلجيب وحبيتي وحياتي انحبو ومن يعصب وكامو شويه كرهنا لا يمه ما يصير
حدري لشوف يمي حدري.. اخذتني للمغسله واني ابجي غسلتلي وجهي ورفعت راسها لأخلاص.
ولج اخلاص يمه بدل ما واكفه ادحكين نزلي عاونيهن شويه انتي وحلا بس كارصات بهلغرفه..
ما غريبه انتي بيت عمج وخالتج ومثل بينج حطي اديج وياهن .. ما ادحكين نوال طالعه ونور جايبه
-اي حجيه تأمرين يا صدك جذب هسه الم البيت كلو حتى ليليان لا تشتغل هو الشغل يتعب احد والبيت بيتي انه ما مستحيه بس تعرفين حليوه عمت عيني حيل متأذيه وما اكدرت اعوفها وامشي..
-تحجي بصوت عالي وهي فرحانه .. اعرفها تتشمت لان زكح بيه ورزلني وكضبني من شعري كبالهم..
نزلت وام سعد تردها اي يخلوصه اشتغلي هيج واجيبج عروس لهلبيت ويصير صدك بيتج...
وهي تتمضحك وتردها وين يروح خاله مثل الطير يطير يطير ويحط على كاعو
-احسهم سمموني وهن يتمضحك ويتعازمن على صراع ويتشمتن بيه.. والحجيه تهمس ..
-مالج غرض بيهن صيري سباعيه والبسيهن و راضي رجلج..
غسلت وجهي ولميت شعري ودخلت المطبخ .. كمت اشتغل.. خلصتو وطلعت للكراج اغسل.. الحجي طلع والولد.. كلهم لصلاة الجمعه..
شوي ونزل صراع مبدل واني اغسل بالكراج.. وصل لسيارتو دحكني اشتغل.. رجع رفع راسو يدحك على بيوت الجيران ما شاف احد..
اني نزلت راسي منو وكعدت اغسل بالمكناسه.. واجر بهلوصخ.. صاح..
- يولي ..
-اني اشتغل ملتهيه منتبهت وراسي يوجعني منو . رجع صاح
-ول يابه مو احااااجيج طرشه
-رفعتلو راسي وياي..
-لا وي الحايط .. كم مره كايل الكراج ما تغسلي انتي
-احجي وي ام سعد مو وياي هي تكلي طلعي .. اني احتاريت بيناتكم الطلعت ترزلت الما طلعت هم ترزلت..
-بعد بعد بعد .. علي حسج خل الجيران يسمعون عدنا وحده سز ما تستحي تلعلع بحسها ..
يمشي و يحجي وهو يخزر ويتقرب عليه.
تركت الصونده والمكناسه وكتلو راح ادخل بس كول لام سعد لا ترزلني
-يولي شو طولان السانج
-عمو ما طولان والله بس البيت بس اني بي حلا فوك محنايه ما تمد ايدها عشتو مكسورة خاطر وضاربها
واني متحمله فوك الدك على راسي الكراب بهلبيت .. ومحد يكول مكسور خاطرها لو حزنانه.. خدامه اشتغل هنا لا احد يحترم.. ولا احد يكول
.. هو واكف ومخصر اديه ورافع حواجبو بتلميح ما عاجبو الحجي.. وكال بعد طلعي هلساني طلعي دشوف
-عمو ما اطلع اشمرني بالشارع والرب ارحملي اشحد واكل خبزتي وانام لا احد يدك على راسي ولا احد يزلني اتركوني حرام عليكم والله تعبت..
حجيت ودخلت بساع.. واني ابجي.. طب وراي.. دفر الباب مال الهول وصاح هييييين هيييييييين.. طلعتلو الحجيه
-ها يمه شجاك شبيك
-ليليان لو طلعت للكراج بالقران الدنيا احركها فوك روسكم عسى ما الكراج يخيس ما تطلع تغسلو مفهوووووووم..
-تم يمه بس لا تصارخ ويصعد ضغطك وليدي
-تصعدين لذيج التسوي العمايل وتخوتل بغرفتها تكليلها تنزل تشتغل مثل الاوادم لا بالحرام مو للمستشفى ياخذوها للمكبره ادفنها بالقران..
حجاها ودفر الباب حيل وطلع.. واني رحت للحمام اغسل بيه.. نزلت حلا بساع .. وكالت
:- انتي شاكيه لبابا عليه
-ما شاكيه لاحد وحالي حالج اكلت الرزاله وسكتت بس فكو مني..
اخلاص:- انه مو نزلت اشتغل وياج ليش حيه انتي وتحركين بابو حرب على بنتو حرام عليج شكد مسمومه انتي
ليليان:-اكلج توخرين مني لا قسم بيسوع هنا ابتلي بيج .. لزكه
-هاي ويامن تحجين.. ومنو اللزكه انه.. خايب ام الوصخه الجايفه بت الارهاب .. جايه اطرطين بيه انه من بيت عمي وخالتي وبيت اختي المرحومه..
ولج هينا اكضبج امحيج والله احترمي نفسج احسنلج وانه الج يجي واعرف شلون يتصرف وياج ..
ام سعد:- اشكالت اشكالت.. شحجت وياج..
-تكلي ابتلي بيج اللزكه..
-انه اعلمها لهاي.. بالله وينها..
هي حجت واني وكفت اريد احجي وهيام دخلت وكالت هااا الله يساااعدجن.. وانصدمت بالصياح.
صاحت هاي شكو..
اني طلعت من الحمام ودموعي جرت وكتلها هيام الله جابج. جاي امشي ولزمتني ام سعد.. ولج بيمن اطردين انتي
هيام:- هوووب هوووب خاله شكو شبيج وياها
ام سعد-انتي مالج شغل سوالف بيت معليج بيها
ليليان:- اذا سوالف بيت اخلاص شهدها تدخل وتغلط وتصيح هاااا لو هين تحجين وصار ساعه اخلاص تحجي ضامه راسج..
اندارتلي هيام وتكول :- شصاير ليليان تره بعد بينا حيل مشاكل وان سكتنا البارحه على السترتلهم حلا اليوم ما نسكت كولي شصاير احجي هسه اخابرو لابو حرب والله
واكلو فوك الحكوك ننطرد وينغلط علينا.. والتايهات جايات ببيوتنا ويطلعلهن صوت..
-اني بقيت ابجي وحجيت .. والله ما حاجيه وي احد اخلاص تغلط عليه وتسب وعود اني محركه صراع على حلا
هيام:- يولي وانتي شبيج تبجين على الما يسون فلس البيت بيت رجلج واكبر حلك تشكي وشحدو اليحاجيج.. ويصراع يتجازه..
اخلاص:- اطردين بينه هويمه .. عمت عين الكاع الدفنت المرحوم اخوي وخلت الفيران يطلع حسها
ام سعد:- انه ما الي حجي وياها لهلمسمومه يجي الحجي وهو يعرف شيحاجيها
هيام:- تعاي خيه تعلي .. وعوفج منهن .. ترك السفيه بلا جواب اشد عليه من السباب.. خلينا نرتاح يم مرت المرحون ندحك الصغار شلونهم
ومعليج بيهن غصب عنهن هن يخلصن الشغل.. عود يجي صراع ونكلو بالصار ونخلي يشك حلك حلا ونعرف منو السوس بهلبيت وهو يتصرف..
-خلسن بس حجت هيج. طبعا ما اكول عن الحجيه شي بس تمشيي بين هاي وذيج وتهدي وتكول استهدو بالرحمن اخر شي تمل وتروح لغرفتها ..
هم زين اهل نور راحو جان صدك فرجه.. مشيت وي هيام.. كالت طلعيلج اهدوم وطبي سبحي اليوم جمعه خابرني صراع راح يجيب قوزي على روح المرحوم..
خل ناكل ونشبع ونشمر بالفصم على هلملسونات... ضحكت ودخلت وياها لغرفة الحجيه ومرت المرحوم متمدده.. وهيام صاحت يمه فدوه لجهال اخوي يمه..
وراحت تبوس بالاطفال وكعدت يم مرت المرحوم.. اني اخذت ملابس .. وردت ادخل للحمام لكيت اخلاص تصيح بنائل يوصلها للبيت وتبجي عود هانوها..
-واني ادخل للحمام بصوت مسموع سمعتها وصحت.. اييييه گلعه
-گلعه التگلع ركبتج بس اصبريلي
- ادخل اسبح احسلي زوجي حيجي من الصلاة عصبي لازم اراضي .. ما بيه حيل انش ذبان.. خلي يزنزن..
-مصدكه الفگر يدورها.. انه الج..
نتشامر بالحجي وهي لازمه الدرج ورافع راسها واني واكفه اباب الحمام.. عفتها ودخلت للحمام.
حلا كملت الكراج واخلاص منظفه البيت فخلصان الشغل.. كملت طلعت.. وكعدت يم هيام
شوي وطبو الولد من صلاة الجمعه.. واخلاص بعدها ما رايحه عود ما لكت واحد ياخذها .. نائل جانت تصيحو وهو ماكو
فكعدت تبجي بس طبو الولد حظنت الحجي وگامت تبجي وما شكت على هيام ابد بس عليه..
صراع واكف و نائل وسعد.. وتكلو تقبل هاي عمي تطردني من البيت وتغلط عليه وتكلي لزكه.. وعانس وشامره روحج علينه..
فتحت عيني شلون كلبتها.. صرخ الحجي عليه.. كتلو والرب مكايله هيج جذابه
صراع:- ليلياااان صعدي فوك بسرعه
-عمو والله مكلت هيج اجت تتعارك ويايه لان انت صحت على حلا تنزل تشتغل وكعدت ترزلني وتكلي حيه تحركين بصراع على بنتو ..
الله عليك اني حركتك لو حجيت
صراع:- اخلاص شعليج بهلامور وتدخلين.. رادت تحجي .. رفع صوتو الف مره كلت بيتي ما اقبل احد يدخل بيه مفهووووم..
تركي حلا وليليان بحالهم اخلاااص .. رادت تحجي وتكلو ابو حرب مو هيج والله بس... وهم قاطعها
السالم الله ومحمد عليج اطلعي منهن لا تزرعين الفتنه بيناتهم.. ما خلاها تحجي ابد وصاح بيه وانتي صعدي فووووك بسرعه...
ما رديتو بساع صعدت.. عدلت فراشو ولملمت غراضو.. ورشيت معطر.. دخل واني لازمه وصله ومنظف اخشاب وامسح بالميز..
دحك.. اخذ نفس وما حجه.. فتح الكنتور نزع الدشداشه ولبس تراك اسود ونزل..
خلصت ونزلت.. وهم خلوص مرايحه الحجي ما مخليها تروح مراضيها وكايللها لان باجر عدنا ذبيحه لولد المرحوم ويريدها تشاركنا
على اساس هي الشيخ المقدس الا تحط ايدها يله نتبارك. العمى بعينها خليصان ام الدود..
رحت للمطبخ ام سعد.طابخه تمن وباميه عدهم مجمده.. وهم جابو سمج وياهم ابو ثرب مشتهي ما رايد.قوزي ..
صبينا السفره.. وزلايط وطرشي وهلسوالف وحلا واخلاص ما يتفاركنا وحده وي اللخ..
دحكت الحجيه.. لزمتها واني انكل.. دا احجي وكفت هيام حطت اذنها ضحكنا... حجت الحجيه..
-يولي احجي شكو شرايده
-حجيه عليج الله اتركيلي مكان بصف عمو صراع بس احرك گلب خليصان..
ضحكت هيام.. وهزت راسها بخباثه وتكول هلله هلله الميدان يحميدان غير تدللين. يمه كعدي يم صراع وكعدي حرب بيناتكم
ومن تخلص نكل ليليان انه اصيح حرب يكعد يمي اوكله وهي تكعد يم رجله..
الحجيه:- والله سوالفجن ما بيها خير
-هسه دمشي يا يمه شكايليلج حرري فلسطين هو مجان هلكده كلنالك حجزي دروحي..
-ضليت اضحك.. ورحت اكمل نكل.. وصدك الحجي صاحت حرب كعدتو يم ابوه.. وهي كعدت يمو..
كملت نكل كلهم كاعدين ماكو مكان ابد.. جان تصيح هيام على حرب.. :-عمه تعال يمي خلي ليليان تكعد خطيه ماكو مكان.. وتعبت من الشغل والنكال
اني رحت كعدت يم صراع.. صدك ما طايقتو ولا اريدو لان مضوجني ومطلع روحي بس اريد احرك كلبهن..
هو مدنك ما شال راسو ولا اهتز.. ياكل بهدوء.. ردت اوصل للسمج بنص السفرخده سندت نفسي وردت امد روحي..
كص ربع السمجه وحطها كبالي وشال خبز حط فوكو.. نعم هو هذا الاريدو وخليصان ادحك ومحترك گلبها..
بس ما حجه وياي ابد.. عود.هو هم زعلان ما يريد.يحجي وياي.. مو مهم .. المهم خليصان ام الدود
كملنا ونكلنا الاكل وكلعاده بنكلاديشيه ابلاش شغل وتنظيف.. وخلوصه سوت الجاي واستكان صراع وراحت تقدم وتكلو ابن عمي هءا استكانك اعرفك ما تشرب بغيرو وتتمضحك..
وهو ما قصر اخذ ويكول رحم الله والديج.. لو اني منطيتو جان كال اشتعل شيب الخلفج..
كملت تنظيف ورحت كعدت وي هيام والحجيه يم جهال المرحوم وادحك بيهم والعب وياهم وبحظني انوم حيل حبيتهم
ونور بنيه طيبه ما تحجي ولا تغث.. فكعدت اداريها الزملها ايدها من تكعد لان عمليه.. اكومها للحمام..
وخلص اليوم وحتى ما صعدت نمت فوك.. بقيت يم الحجيه نمت بصفها .. الحجيه حست اني و صراع واحد ميحجي وي اللاخ
لان ابد ما صاحني على ملابس ولا اني صعدت لغرفتو ابد.. فالصبح من نزل يتريك ويحجون على الذبح والعمام والعزيمه..
كالت صعدي فوك نظفي غرفتو واذا طب سألي شمحتاج واكسري الشر بينكم ..
كتلها ما اريد خليني هيج.. ما قبلت ضلت تلح.. الا اصعد.. عاد تركت البيدي من شغل.. وصعدت
هو بيه حاله الصبح من يطلع من الغرفه يطفي المكيف ويفتح الشبابيك حتى الهوى مال الغرفه يتغير ومتضل ريحة نوم شوي شمس اطب للغرفه
ف من اصعد اسد الشبابيك.. وانظف الغرفه وادفيها .. دخل هو واني اشتغل.. عزت عليه اكلو شتريد ما سئلت ولا هو طلب ابدا..
اخذ منشفه وراح للحمام.. اني بدون حجي طلعتلو ملابسو وحطيتهم كبالو ع السرير ونزلت..
وشغل شغل يهد الحيل من صلاة الصبح كعدو وذبحو لان الصلاة بالشتا جانو يصلون تقريبا ب ال6 الصبح..
فهم صلو نص ساعه وراحو جابو كصاب متفقين وياه وذبحو.. وبعد الريوك اشتغلنا تنضيف و روح وتعال..
لحد.ما خلصنا غدا.. احس رجليه صارت خيوط.. وانوبه مو بس هاي اول مره ادحك بنات ام سعد ما ينحملن هن وجهالهن..
السانهن اطول من السان امهن وجهالهن ما ينجرعون انوبه هاي الحجيه الجبيره ام الحجي ابو ثرب مسمومه.. ابد ما حبتني مدري ليش رغم ممسويتلها شي..
انوبه تكلهم شسمها كالولها ليليان هزت بيدها وتكلهم ها طليان مو ليليان وكلهن ضلن يتضاحكن وام سعد.تكلها صدك طليان.. ويقلدن
الولد جانو بالاستقبال لان ولد عمهم جايين ف انعزلت النسوان عن الرياجيل ميقبلون باختلاطهم لان هواي ولد عمهم..
فكاعدات ويضحكن عليه. هيام ما جانت موجوده كاعده يم مرت المرحوم بالغرفه و الحجيه ما ترد بس تكلي مالج غرض بيهن.
خلصو غدا.. وكلهم يغسلون .. الشباك مال المطبخ مفتوح.. دحكت صراع من بعيد.كاف اردانه ورافع اديه يريد يغسل..
لابس دشداشه وادحك لطولو .. وحدي ابتسمت. ما جنت احب اليلبس دشداشه ابد احسو عربي .. بس مدري ليش احب من يلبسها ..
جسمو يصير يجنن بيها وهو تارس.. كتافو تنفرد بالدشداشه وتعرض ويبين طولو..
بقيت ادحك عليه زعلانه صح.. بس ما اعرف مو بيدي .. اريد واحبو.. اتمنى اخلص من هلوضع بس ابد ما اتمنى اخلص منو..
رغم حيل شالع كلبي بس وياه احس روحي مثل بزون احب خناگي..
سديت الشباك وصوت الضحك مالته واصل منطلق يحجي وي الرياجيل..
تركتهم ووكفت على السنك اغسل التل اللي اسمو مواعين ..بديت بالغسل وفكري سرح بعالم ثاني..
عالم ما بيه غير ذاك الأربعيني.. يلي شاغل بالي طول الوقت..
عدغسل وقطع سلسلة افكاري على صوتو وهو يضحك ويدخل للمطبخ.. اقترب مني ووكف يم السنك يريد يغسل لان بره هوايه ناس..
تقرب اكثر وهو يكول :- بس شويه بنتي... ملت عنه. وهو مد اديه يغسل فوك المواعين.. كل البيني وبينه شبر او شبرين.
..عطرو بجسمو وبملابسو يدوخني وبسحرني رغم العطر سرقتو من غرفتو وبقيتو عندي اشم بي..
بس ما احس بيه الا لما يتقرب واشمو.. احس الو عطر ثاني وهو بجسمو.. قلبي ما اعرف دگاته شلون صارت
النفس يضيق عندي من يصير قريب مني وحدنا وادحكلو.. رغم الدنيا بارده.. بس احس العرك كام يصب من كصتي وهو ناسي الزعل ومتقرب مني..
ما اعرف ليش عركت وتوترت بقربو وهو يغسل
.. احساس ما اعرف اوصفو بس يثولني..
غسل فمو.. ومد ايدو يوخرني لحتى يتفل الماي بالزباله.. مو لمسه.. احس كهربني.. بقيت ادحك بوجهو ونسيت نفسي.. اديه كلها تايت..
خلص وحجه... بس جيبيلي منشفه..
-هااا
صراع:-شبيج مثوله بويه اريد منشفه روحي بسرعه.
-هاا ااا اي اي.. غسلت بسرعه اديه وركضت اجيبلو منشفه.. ما اعرف ليش فرحانه لان حجه ويايه وكسر الزعل..
جبت واجيت...اخذ مني واني العرك ذبحني مدري شبيه هيج توترت وخجلت كبالو.. رغم ما حجه غير شي .. ولا سمعني اي كلام..
بس احس سامحتو على كلشي ورايده قربو.. ما اريد من الدنيا غير بس يفتح اديه وياخذني..
بس اللي سواه.. نشف وطلع .. بس المهم ان هو كسر الزعل بهل كلمتين..
بقيت اغسل وسرحانه بيه.. انتبهت اغسل اغسل والمواعين متخلص كلها تركبت براسي..
وكعدن يتمضحكن.. بس اجت اخلاص صبت جاي وما حجت مدري شعجب بس تتبسم وهي تتسمع على حجيهن وكل شوي تترك وتروح تحجي وياهن وتجي
خلصت الجاي وراحت... دخل علي ابن هيام.. كال جاي للرياجيل.. اني محظره الصينيه مالتهم بس غير وحده تصب..
عاد غسلت اديه.. ورحت اصب.. واكفه وواحد يابه الجاي وين صار.. دحكتلو يغمز لعلي ويكلو منو هاي..
طبت ام سعد بساع جاوبتو .. هاي طليان.. وتضحك اخذت خواشيك وطلعت تكمل ثرثره.. اني مدنكه اصب
-لا صدك والله منو هاي
علي:- هاي ليليان مرت خالو
ياسر:- يا خالو هذا ولك..
-هههه خالو صراع
-لاااااااا صدك تحجي .. هاي البنيه مرت ابو حرب دكول غيرها يمعود..
اندارلي عود صدك انتي مرته..
اندرتلو واني ابتسم.. اي ليش ..
-لج يابه وينج وين صراع .. فختايه هلكدج شجابج عليه ...
علي:- شبيك ياسر هاي اللي اخوها كتل عمو عابد وزوجها لخالو صراع
-اخذتو فصليه على موتت عابد شو ما ادري بهسالفه
-لا مو فصليه بس عمو عابد جان متعارك وياهم ما اعرف شلون المهم رادو عمو صراع يستر عليها..
-هااا ها ها تذكرت كالولي على اساس عابد متعرض لوحده بالموصل وشاهرها.. هي نفسها ..
اهلا وسهلا تشرفنا.. بس ليش ام سعد.تكلج طليان..
ليليان:-بعد اخلاقها.. شسويلها
ضحك وكال والله رد.. يلا يابه انطينه الجاي وطلعي الجدوره الكبار بالكراج اني والولد نغسلهم اذا ما تكدرين..
-ياريت انكسر ضهري..
-والله خطيه انوب شامرين الحمل كله عليها.. هسه اودي الجاي واحزم الولد يكعدون هنا يغسلون..
-ابتسمت وراح.. شلون ولد حباب انوب مرتب يجنن بنطرونو وقميصو والتسريحه مال شعرو تجنن
كأنو ذوله اليطلعون بالافلام.. وبشرتو حنطيه وعندو لحيه خفيفه عمرو 20 او 25 بهلحدود مبين.. ودو الجاي واجه وجايب علي و محمد ابن سعد واثنين ولد من ولد عمهم..
وكاللهم مدو الصونده شباب يلا خل نغسلهن.. واندارلي يغمز ويكلي وربج حتى المواعين هسه اخليهم يغسلوها بمكانج.
ويصيح يلا يلا سباع.. دحكت شو هذا بساع يشمر ميانه بس وجهو وكلامو حيل محبوب
ردت اشيل المواعين .. اتقرب وكال اني اشيل عنج اكعدي هلكدج لا يطك ضهرج والله عمي مبخت صراع بهلفختايه....
ضحكتلوو وهو واكف يمي ويشيل.........يتبع

☆☆☆☆☆☆☆
#زينب_ماجد