بنات حجي عمران الفصول الاربعة

البارت 22

صعدت نور ركض و صعدنا اني و سما وراها فتحت الباب و دخلت لكت زهراء ع الجرباية و تبجي رادت تاخذها دخلو جليلة و حيدر

حيدر
" عوفي البنية لا اكسرلج ايدج "

سمر
" هي انت لا عبالك صاير زلمة براسي ترى نور وراها زلم تزين شاربك بقنادرهم "

حيدر
" ادري بيجن امهات زلم "

نور
" لا انت و لا اكبر راس بيكم يكدر يحرمني بنتي افتهمت و الله اخلي زلمي تذبحك و تشرب من دمك روح لبنت المجرم تخلفلك درزن "

حيدر
" لا تتحديني نور حتى ما يصير شي ما يعجبج ماشي و اخليج تبجين دم "

نور
" هههه والله وكت اغبر صرت زلمة و تهدد و انت تمشيك بنت كتال عمك "

سمر : كلشي صار بثواني كلام نور استفز حيدر و خلاه يثور دفع نور للكاع حيل و ركض ع الجرارة فتحها و طلع مسدس و عاط " هاي بنتج الي تردينها روحي تلكينها يم ابوج " و رمة طلقة على زهراء الطلقة سكتت بجي زهراء طلقة حارة سكتت دموع باردة دائما نسمع ان المي البارد يطفي النار الحارة لكن اليوم النار طفت حياتة زهراء الباردة مثل ورد الياسمين انقتلت و مثل الوردة سقوها بالدم حضينة و كماط زهراء الابيض صار  احمر

كلنا صافنين على زهراء و عبالك فصلنا من العالم صمت دام لثواني كسر حاجز الصمت بكل عنفوان صوت ام و هي تترجي ضناهة يكعد

نور
" زهراء ماما حبيبتي كومي زهورة ليش سكتي ابجي خلي اسمع صوتج يا روح امج و گلبها "

شالت نور بتها و حضنتها حيل و مشت نزلت ما كدرت احجي اي حرف تراجعت بخطوات ثكيلة لحكت نور دخلت للمطبخ لكيت نسرين واكفة و لكيت سجينة ع الميز جريت السجينة نسرين رجعت ليورة

نسرين
" شكو شسوين بالسجينه سمر اني معلية بفعايل حيدر "

سمر
" لا تخافين ما اسويلج شي بس اليوم افضح و اطشر شرف بيت صبري يالكواويد " ركضت على نسرين جريتها من شعرها للشارع ما لكيت ولا واحد منهم بالشارع ما اهتميت نسرين بالكاع و اسحل بيها طلعتها للشارع وكفت سيارة نزلو منها ورد و جوري و فؤاد

ورد
" يا يا يا سمر عوفي البنية "

سمر
" ورد وخري عني لا اسحلج وراها " وخرت ورد و اني سحلت نسرين و هي تصرخ لنص الشارع و بالسجينة شكيت طرف دشداشتها و شكيتها كلها و خليتها بس بملابس داخلية ركضن جوري و ورد يردن يوخرني عطت بيهن و كلتلهن

سمر
" لجن وخرن ولجن حيدر ضرب زهراء بنت نور طلقة ولجن طفلة عمرها يوم انضربت طلقة "
صفنن علية البنات مصدومات من كلامي

جوري
" صدك ضرب الطفلة طلقة "

سمر
" جوري روحي دكي هذني بيوت جوارين بيت صبري كلهن اليوم افضح شرف بيت صبري و اذا الفضايح حرام و الله يبينهة بية هم عادي خلي الله يفضحني المهم افضح شرف بيت صبري اليوم والعباس "