HYDRANGEA (Completed)

Part-44(Zawgyi+Unicode)

"ပြန်လာချင်တယ် ဂိုဂိုး ငါတို့အစကနေပြန်စရအောင်လေ "

တစ်ကိုယ်ကောင်းဆန်စွာပြောလာသောရှိုင်းထက်သော်စကားကြောင့်ဂိုဂိုးရင်ထဲ ထိုးအောင့်သွားမတတ်ခံစားရ၏။ သို့သော်လည်း ရှိုင်းထက်သော်ဟာ သူ့ခံစားချက်တွေကိုဘယ်တုန်းကများဦးစားပေးခဲ့လို့လဲ။ ဂိုဂိုးဟန်မဆောင်နိုင်စွာပင် ဟက်ခနဲတစ်ချက်ရယ်လိုက်၍ မိမိအရှေ့မှသူ့မျက်နှာကိုတည့်တည့်ကြည့်ပြီး

" လှည့်စားရတာမဝသေးလို့လား ရှိုင်းထက်သော် ငါတော့ဒီလောက်နဲ့တင် တော်တော်ခံနိုင်ရည်ရှိသွားပြီမို့ နောက်ထပ်ငါ့ဘဝထဲကို ဝင်မလာပါနဲ့ "

"မင်းဘက်ကအချစ်ကိုဘယ်လိုသတ်မှတ်ထားလဲ မသိပေမယ့် ငါ့ဘက်ကတော့ မင်းကိုထပ်ပြီးမဆုံးရှုံးချင်တော့ဘူး ငါမင်းကိုဘယ်တုန်းကမှ အချစ်မပျက်ခဲ့ဘူး ယုံပေးပါဂိုဂိုးရယ်"

စားပွဲပေါ်တွင်တင်ထားသော လက်တစ်ဖက်ကို ဆုပ်ကိုင်ကာပြောလာသောရှိုင်းထက်သော်ကို ဂိုဂိုးမကြားသလိုဖြင့် လက်ကိုရုန်းဖယ်မိလိုက်၏။
အတိတ်ကအကြောင်းအရာတွေတွေးမိရင် မခံမရပ်နိုင်ဖြစ်ရသူမှာ သူတစ်ယောက်တည်းပဲမဟုတ်လား ။
အကြောင်းပြချက်မရှိလမ်းခွဲပြီးမှ ပြန်လာချင်နေတဲ့သူကို ဂိုဂိုးဘက်ကဘယ်လိုလက်ခံရပါ့မလဲ။ မဟုတ်ဘူး မယုံကြည်ရဲတော့တာ။

" ငါ့ဘက်က အချစ်ကို တကူးတကသတ်မှတ်ထားတာမရှိဘူး။ အချစ်ဟာဒီလိုပါလားဆိုပြီး ခံစားခဲ့ရတာတွေလည်း မရှိဘူးလေ မင်းသိမှာပါ "

ဂိုဂိုး၏စကားကြောင့်ရှိုင်းထက်သော်မျက်နှာမဖော်ရဲစွာဖြင့်ခေါင်းငြိမ့်ထားမိသည်။ ချစ်သူတွေဖြစ်ခဲ့ကြသည့်အချိန်အတွင်း ဂိုဂိုးဟာသူ့အပိုင်ဟုမဏ္ဍတိုင်တပ်၍ သူဖြစ်စေချင်သလိုသာ ဂိုဂိုးအား နေခိုင်းခဲ့၏။ အရာအားလုံးဟာသူ့သဘောအတိုင်းသာဖြစ်စေခဲ့၏။
သူငယ်ချင်းများနှင့်သောက်စားပျော်ပါးနေချိန်တွင် အခန်းထဲတွင် သူပြန်အလာကိုထိုင်စောင့်နေရသော ဂိုဂိုးကိုသူမငဲ့ခဲ့သလို ညလုံးပေါက်ဂိမ်းဆော့နေသောကြောင့် ဖုန်းပြောရန်တစ်ညလုံးစောင့်နေသောဂိုဂိုးကို သူထည့်မတွက်ခဲ့ပေ။ ဒါတွေဟာ ဂိုဂိုးနှင့်ဝေးတော့မှ နားလည်တတ်ခဲ့တာဖြစ်ပေသည်။
မည်သို့ပင်ဖြစ်စေကာမူ ဂိုဂိုးကို အရာရာထက်သူပိုချစ်ခဲ့ပါသည်။ အတားအဆီးတွေမရှိခင်အချိန်ထိပေါ့။