نيران غياهب الانتقام

البارت الاول

نزلت عالدرج واني بكامل اناقتي بلكي انطي انطباع حلو وما ينزعجون من وجودي لبست فستان مستور وطويل بس صيفي وحلو مليان الوان والحجاب مالتي طبعا ...
نار : ااا مساء الخير
الكل باوعولي وكأنو متفاجئين من وجودي الطاولة چانت جبيرة وبيها اكثر من عائلة
...تعالي ينار گعدي هنا
دلتني الحجية على مكاني رحت بهدوء وگعدت والنظرات بعدها متوجهة علية
...نار اسمچ
سألني بفضول شاب من الگاعدين مبين صغير مو كلش چبير اعتقد عمره بداية العشرينات
...اااي اسمي نار
... حلو اسمچ مثلچ واني اسمي مازن شتحتاجين اني حاضر ترا ما اقصر
گالها بابتسامة لعوبة مبين علي ابو بنات الاخ
الحجية : مازن اگعد ساكت
مازن : حاضر حجية
سكت مازن الامر الحجية مو گتلكم تخوف رعبته للرجال بكلمتين ..
الكل گام من مكانة فجأة استغربت تصرفهم بعدين انتبهت انو الشيخ اجه ومعاه چان زلم اثنين كبار مبين اولادة لان يشبهوه و عمار النذل ما حبيته من شفته گعدو عالمائدة ..
انتبه علية الشيخ بعد ما گعد ،
الشيخ : نار ارتحتي بالغرفة اللي انطوچ ياها
نار: اي اي اشكركم ما قصرتو .
الشيخ : زين
بدا الكل بالاكل بعد اشارة من الشيخ بنفس الوقت نزل واحد ومعاه مرة چبيرة اعتقد امه ومبين انه ضايج كلش ومجبور عالنزلة ضحكت بسخرية بداخلي اذا هذا ينجبر
لعد اني شسوي ، چان طويل وجسمه مرتب يعني مناسب الطولة ولحيته مرتبة وشواربه حلوين للصراحة شكله حلو بشكل عام و مبين من ملابسة وشكله ما يشبههم ومو منهم مدري ليش هيج حسيت .

... نعتذر عالتأخير شيخ بس غيث چان عندة شغل وبالگوة قبل ينزل
الشيخ : شنو غيث اني شگايل الكل يكون حاضر عالعشا مهما چان عندة شغل
حچاها الجد بحزم وبنبرة غير قابلة للنقاش ، باوعلة اللي اسمه غيث وحچه بغيض
غيث: اي شيخ قوانينك واجبه علينا كلنا بس دائما بيها استثناء مو؟ سأله باستنكار رجع كمل
ابنك الرابع وايدك اليمين وينه اشو ماكو وهو اول واحد كاسر القانون اللي گلتة لو الكلام بس يمشي علينا

الكل چان ديباوع وخايف من ردة فعل الشيخ على تمرد حفيدة الواضح والصريح ، المرة الچبيرة اللي يمكن امه چانت دتأشر الابنها وتحاول تسكته باي طريقة بس مبين انو ابنها ما هامه شي لا شيخ ولا الاكبر منه يگدر عليه
الشيخ : ما الك علاقة بيه اني دازه بشغلة يكملها ويرجع ، غيث بطل تمرد تره ما يفيدك ويضرك حفيدي
حچاهة بسخرية .
حاول يگوم غيث من مكانه بعد الكلام اللي سمعه بس نظرات الشيخ اله چانت صارمة وهو يحذره انو يگوم ومع توسلات امه ضل گاعد بس ما مد ايده عالاكل
سألني واحد من الگاعدين مغير الموضوع ،

...الشيخ گالي انچ صحفية
...اي صح اني صحفية ومصورة يعني شغلي اكثره يعتمد عالتصوير
...حلوة شغلتچ انتي من وين
... اني من بغداد ، جاوبتة بابتسامة بسيطة
...انتي من كل عقلچ عفتي العراق كله وجايه هنا تصورين
سألني غيث مستنكر وجودي بينهم وبهالمكان
نار: اا عفوا شنو قصدك
راد يحچي بس الحجية قاطعته وهي تگول
الحجية : خلص كافي بلا حچي الاكل  گدامكم احترمو وبعد ما نخلص كملو حجيكم
الكل رجع يكمل اكله بهدوء حتى غيث بالرغم من انه مجبور على گعدته بس گاعد بهدوء وديحاول يجبر نفسه يتعامل بشكل طبيعي
بعد ما خلصنا العشاء و الزلم والنسوان الكبار گامو من المائدة گمت اني مع البنات والخدم اساعدهم بالتنضيف لان عيب عليه اباوعلهم وما اسوي شي دا الم بالصحون وانتبهت البنية حچت معاي
...هلو شلونچ
نار:هلا بيچ زينة وانتي
...الحمد الله ااني سمر يصير نكون اصدقاء
سألتني بابتسامة متحمسة
جاوبتها بتأكيد وابتسامة هادئة
نار: اكيد يشرفني هذا الشي واني نار
سمر : عرفت اسمچ من حچيهم
... سمر بلا حچي زايد خفي ايدچ خل انخلص من وكت وحدة من الواكفين بالمطبخ حچت بحقد مدري ليش شفت طريقتها بالحچي هيچ ،شاورتني سمر بصوت ناصي
سمر: هاي رغد حية بسبع روس وتغار من خيالها لا تهتميلها تلگيها غارت من اناقتچ وجمالچ يطلع منها هالحية هاي
ضحكت بصوت عالي خله الموجودين ينتبهون علية باستغراب ، گرصتني سمر بقوة على ضحكتي واني مستمرة
سمر : لچ هش فضحتينا ما ينحچي وياج شي فضيحة
نار: يمة شگد قوية شهالگرصة لحم ايدي احسه انشلع بعدين اني مو بهالجمال اللي ديخليها تغار هيچ والصراحة وصفچ الها موتني ضحك
سمر: لچ بلى وين هي ووين انتي بعدين انتي متعرفيها ولهذا دتگولين هيچ
نار:والله مدري شگول بس ما دامها هيچ الله يبعدها عني ما اريد مشاكل اني جاية بشغل اكمله واروح بحال سبيلي ، عالعموم اني طالعة انام اليوم چان كلش متعب.
سمر: يااا يعني ما راح نسولف و نتعرف على بعض
نار:بلى اكيد اني هم متشوقة اتعرف عليچ وعالعائلة بس مو اليوم حبابة اليوم چان مليان مغامرات وتعب احس ما عندي القدرة بعد اوگف على حيلي
سمر : ماشي براحتچ حبي
نار: تصبحين على خير
حچيتها بابتسامة
سمر: وانتي من اهله يگلبي
طلعت من المطبخ رايحة الغرفتي بعد ما صعدت عالدرج ، ما مصدگه اوصل للتخت واحط راسي وانام اليوم فعلا چان متعب ، بس قبل ما اوصل الغرفتي شخص فتح باب وحده من الغرف المريت من يمها وسحبني الداخلها بقوة
وسد الباب....

يتبع ..

لا تنسون اللايك ❤️
ومتابعة للصفحة 🥰❤️❤️