Langhap ko ang maruming hangin ng lungsod kasabay ng matulin na pagbulusok ng kinasasakyan kong dyip. Mula sa malamlam na liwanag na dulot ng patay-sinding ilaw ng dyip aninag ko ang pagod sa muka ng iba't-ibang pasaherong kasabay ko. Pagod sa maghapong pagkakatayo at pagbebenta ng kung ano-anong produkto, sa paghahalo ng semento sa katirikan ng araw at sa pagpilit na pag-intindi sa lektura ng boring na propesor. Pero sa kabila ng pagod sa isang buong araw ng pakikibaka ay di mawawala ang pagnanasang muling makapiling ang kanya-kanyang pamilya. Nasa ganun akong pag-iisip ng walang ano-ano'y sumampal sa pagmumuka ko ang daan-daang hibla ng buhok ng babaeng katabi ko. "Aray naman ate! 'Yung buhok mo! Nakakasakit na."
