#وجودك_أمان 🤍
الحلقة تابع [34]
سكرت حطيت التليفون على الطاولة ،
بالقاسم طق بيده ع الطاولة ينبه و شير لي براسه طلع ، لغرفة الإستقبال .
أنا لحقته الدم جمد في عروقي خشيت عليه لقيته مقمعز .
بالقاسم : من هذا يا دكتورة .
أنا زمطت ريقي : موظف يبلغ فيا على إضافة مجموعة ثانية مش اللي نعطي فيهم و يبوني نستلم مكان دكتورة أخرى كم يوم لأني في رمضان نبي نوقف .
بالقاسم يضغط على سنونه : ما فيش سكريتيرة تبلغك و إلا كيف .
أنا : ما هي رنت ما رديتش .
بالقاسم قطع عليا عيط : شوي رن هو ،" تعصب يحكي من تحت سنونه " كيف يرن هو و هو لا سكرتير لا مدير لا دكتور يعطي كيفك كيفه لييش يرن .
أنا نرعش : عادي يعني أنا ما رديتش أول مرة .
بالقاسم متعصب لدرجة عروقه باينات : و كل مرة ما ترديش يرن عليك راجل إن شاء الله ، مش عارفين إنك متزوجة " يشير على بطني " شكلك توه مش شكل وحدة متزوجة ما يشوفش فيك هكي ، يحكي معاك عشان يبوا يعطوك راحة أخرى ، مش عارف أنك توه خارج أوقات الدوام يعني قاعدة في حوشك كيف يرن عليك .
أنا معش قدرت جسمي يرعش من شكله هو يحكي متعصب .
بالقاسم عيط بصوت عالي : مش مالي عينه أنا يرن عليك و عارف أنك توه معايا ، أصلا حتى لو في المستشفى أو الكلية كيييف يرن جاوبيني كيف يتجرأ و يرن .
أنا ماسكه دمعتي بالسيف و العاملة في المطبخ معش عرفت نهديه و لا نحكي حرف و لا نطّلع العاملة .
بالقاسم مسح جبهته : شن اسمه .
أنا : استنى نفهمك راه هو يبي يبلغني لأنه نبي نقعد مكان حد ثاني .
بالقاسم : فيه حاجة أسمها موظفة تبلغك ، ما رديتيش الموظفة تبعث لك رسالة " ضغط على سنونه " لكن ياخذ رقمك الخاص و يرن مش من رقم المكتب لااا من رقمه الخاص " عض فمه" هذه بروحها تنحسب عليا " فنص " شن اسمه .
أنا نرعش : شن تبي في الأسم هو موظف في قسم الدراسة و الإمتحانات .
بالقاسم عيط : عارف إنه موظف شن أسسسمه قولي .
أنا : شن تبي ادير بالقاسم .
بالقاسم صبى مفنص : عليش تسألي مش شورك أنت " زاد ارتفع صوته" قولي أسمه أنا ما نبيش ناخذ تليفونك و نطلع رقم #### هذا قوليلي أسمه أنا نتفاهم معاه .
أنا نبحت فيه حسيته الراجل تغير لشخص آخر و صبى صح ما قربش مني بس متعصب و يهزب خفت ، مع أني متأكدة مستحيل يمد يده بس خفت لدرجة حتى الكلام راح مني ،
و قعدت نرجف : طاهر الفلاني .
بالقاسم : أنا نتفاهم مع هالأشكال هي مش هيدقه يرن أمتى ما يبي .
أنا : خطأ و صار و توا انبه السكرتيرة أنه هي اللي تتصل بيا .
بالقاسم : كيف من قبل مش منبهتها .
أنا : لا قلت لها أي جديد بلغيني .
بالقاسم : و رنت ما حصلاتك عطت رقمك لراجل " و قعد يهزب وجه أحمر عيونه قريب يبلطن من اعصاب" أنا نشتغل مع مهندسات عمري ما رنيت على وحدة اللي نبي منها شغل يرن عليها المكتب و ترن عليها الموظفة ، مش راجل يكلم بنت و متزوجة أخرى .
أنا عظامي رقدن الموقف صح خطأ بس مش لدرجة التعصيبة هذه حسيت بيه قريب ينفجر و من الخوف زمطت و لا كلمة .
بالقاسم : ماه أنا مش ملبس أم الدبلة على الفاضي لكن و رب الكعبة اللي لمستها بيدي ما نتم إلا و أنا واخذ حقي .
طلع ،،،
أنا لحقته لقيته راكب للدار خشت درت له القهوة جديدة و رقيت تلاقيت معاه يبي يطلع من الدار : القهوة .
بالقاسم ما بش يبحت فيا : ما نبيش .
و طلع سمعت الباب اسكر بالقوة .
أنا عقلي يجيب و يشيل ازعما يمشي للموظف توه ازعما يخليها بكرة زعما يضربه و لا يتفاهم معاه الرعشة ما بت تحول مني خنقنني العبرة .
........
وفاء ماسكه السلسله اللي في رقبتها : حبيبي اذكرتها هذه .
محمد بحت فيها ضحك : هذه تنتسى ، نعليا منها .
وفاء ضحكت : بس تعرف فرحت بيها أكثر من باقي الحاجات شكلها وردة هك خيال حبيتها .
محمد زقب على السرير جنبها : تي والله ما في حاجة حلوة كيف حلاوتك يا كبيدتي إنت .
وفاء تضحك : بالك تهمد شويا .
محمد يبوس فيها : تؤ مش مهمد مش شابع توا و لا بعدين .
وفاء غمضت عيونها : حبيبي .
محمد ماردش ،،،
وفاء : احميده .
محمد رفع رأسه : عوينات احميده و قلبه احميده .
وفاء : قتلك أمتى مروحين
محمد : السبت كنك .
وفاء : باهي خلينا نطلعوا يوم كامل برا نعدوا لل### يهبل .
محمد حك راسه : يوم كامل برا .
وفاء ضحكت : بعد إذنك طبعا ، كان ماتبيش عادي راه .
محمد : لا نطلعوا غير نبوه تصبيرة "ضحك" .
وفاء بحتت فيه : تصبيرتك عارفتها بعدها معش نقدر نطلع .
محمد اطربق ضحك
وفاء تبحت فيه تضحك : أصلا عارفتك ح ديرها .
محمد مزال يضحك
وفاء مبتسمه تبحت فيه ،
محمد : صار معش تقدري ليش أنا مش فاطن للروحي و لا كيف هههههههههه .
وفاء : لا عارفتك فاطن غير ادير في طروح .
محمد غمزلي : كيف عارفتيني فاطن اه .
وفاء متحشمة : بعد نحكي معاك ترد عليا و تقولي حاضر .
محمد قرب من وذنها و يوشوش : نعليا نا من الفاطن ، نبيكش تبكي مني .
وفاء ساكتة ،،،
محمد نزل على وذنها و رقبتها : حاضر بكرا يوم كامل برا .
وفاء حضناته : نجك ليا احميدتي أنا .
محمد : شن احميدتي هذه خليها احميده ارحم .
وفاء ضحكت : من عيوني يا حبيبي هيا نطلعوا .
محمد : هي نسينا حجز العشاء بكل .
صبوا طلعوا ...
.......
أنا قعدت بروحي عقلي مع بالقاسم معش عرفت شن اندير خايفة نرن صليت العشاء قمعزت بعد ساعة خش عليا .
أنا نبحت فيه : متعشي .
بالقاسم ما يبحت فيا و يسلح هز راسه متاع أها ، بس واضح أنه يبي ينهي الكلام و خلاص .
أنا سكتت .
بالقاسم خش الحمام يدوش .
أنا نزلت جهزت سفرة فاكهة و حليب و كيكة و ركبت و حطيتهن على الطاولة .
بالقاسم طالع و راقد على ظهره .
أنا بحتت فيه سكتت ، قبل لما يرقد يمد يده اليسار عند مخدتي عشان نرقد عليها و يلفني عليه .
بالقاسم يده اليسار جنبه و اليمين على عيونه ،
أنا خليت وناستي مفتوحة و خشيت للسرير و نشوف له و لا كأني خشيت جنبه .
بالقاسم ما تحركش لا بحت فيا و لا شي ،
أنا برمت طفيت وناستي و رديت لمخدتي ما رقدتش بكل .
و بالقاسم ما تحرك بكل .
أنا سمعت أذان الفجر صبيت توضيت و صليت و رديت على السرير
بالقاسم ناض توضى و صلى .
أنا قعدت نبحت فيه هو يطول في الصلاة عادة ، لكن ما فطنتش أمتى خش للسرير لأنه أنا غلبني النوم و رقدت .
.......
أميمة: أيوه .
إسماعيل : شن تبي .
أميمة : وينك لا رنيت و لا سألت عليا .
إسماعيل : أنا بكرا نبي نبدأ في إجراءات الطلاق لا عاد نبي نسمع صوتك و لا نشوف وجك .
أميمة مصدومه .
إسماعيل : معش ترني عليا بكل .
أميمة : إسماعيل تبي طلقني نحن بينا بنات و حب و عشرة سنين .
إسماعيل : زدتي على حدك صار أنا نخون فيك تي أقسم برب العزة أقسم برب العزة مانك قاعدة على ذمتي .
أميمة تهزب : تبي تاخذ السا## اللي تكلم فيها تبي تسيبني أنا و البنات عشان وحده امسخه خطافة الرجالة هذه حسبي الله ونعم الوكيل فيها .
إسماعيل : على من تحكي بس تي إنت كرهتي أمي في صنف الصبايا كلهن كرهتني في حياتي كلها كان باقي الصبايا كيفك راه الدنيا مقلوبة ضيق علم للراجل نكد ، وين الراحة وين الدلع وين الهيبة ، وين وين وين بس اللي نفسك ما شاء الله نكد و وقف ما عندكش غيره . بس أنا نربيك على الكذب و الكلام الفاضي اللي قلتيه لأمي .
أميمة عيطت : دابينك تبي طلق نبي حقوقي كاااملة حقي أنا و بناتي تجيبه ليا .
إسماعيل هز رأسه يمين و يسار : بناتي ما تزايدي عليهن لا إنت و لا هلك أوكالهن و شرابهن و دبشهن يجي لعندهن أما إنت مؤخرك يجيك كامل معش نبي نسمع صوتك بكل خلي الواحد يتريح .
سكر في وجها .
........
بالقاسم مقمعز بحت في التليفون لقاها الساعة تسعة : رحمه رحمه .
أنا نضت لقيته مقمعز ع السرير من عند جيهته و عاطيني بظهره : صباح الخير .
بالقاسم تنحنح : صباح الخير .
أنا فطنت من صوته واضح أنه مش راقد صبيت للحمام ، غسلت و نزلت نبي ندير الفطور و القهوة .
بالقاسم لحقني : ما نبي شي أفطري إنت و جهزي روحك .
" و رد يبي يركب للدار" .
أنا حاسة بتعب و الرعشة مازالت في عظامي : لا مش ماشية .
بالقاسم برم عليا و بتفنيصه : مش بمزاجك و لا مزاجه . يوم اللي قلت لخوتك تشتغل يعني ح تشتغلي مش أنا اللي نغير كلامي عشان واحد ### كيف هذا و ### أمه اليوم مش مسيبه ، و لا ح نمشيها له و نقعد بقروني ، تمشي لشغلك يعني تمشي و أنا اللي نصرف و ندير له حدود .
أنا خفت أخرى واضح أنه مزال متعصب ما هداش بكل : خلاص خليني أنا توا ندير حل .
بالقاسم : شنو مثلا الحل تمشي له تقوليله راجلي تعقد من مكالمتك لو سمحت معش ترن ، "عيط" لاااا أنا اللي نحكي و نصرف و إنت تمشي لشغلك و بس فاهمه .
أنا هزيت راسي ركبت لبست ع السريع و نزلت
بالقاسم ركب لبس و نزل ما بحتش فيا بكل لابس بنطلون قماش أسود و عليه قميص أسود و جاكة كشمير أسود و كندرته سوده طلع و أنا وراه نمشي و ندعي و قلبي يبي يطلع من مكانه ركبنا في السيارة . ساكتين لين وصلنا نزل معايا للكلية خشينا ،،،
بالقاسم : وين القسم متاعه
أنا : في الإدارة .
بالقاسم مشى لجناح الإدارة ،
أنا خشيت لمكتبي جتني موظفة عطتني أسماء المجموعة الجديدة من الطلبة و الجدول متاعهم قعدت نزلت محاضرة على الجهاز في مكتبي .
......
بالقاسم فارد ظهره : السلام عليكم .
3 موظفين : عليكم السلام تفضل .
بالقاسم : نبي واحد أسمه طاهر الفلاني .
بالقاسم بحت يمينه طول قرن حواجبه : نبيك في كلمتين برا المجمع الإداري .
طاهر صبى : تعرفني يا شاب .
بالقاسم : توا نعرفك بروحي غير تفضل مش مكان كلام .
طلع ،،،
طاهر أطمن من شكل بالقاسم و طلع وراه .
بالقاسم يمشي ما بحتش وراه صبى وراء المجمع وين ما يدرسوا الدكاترة سيارتهم صبى قدام سيارة طاهر برم ،
طاهر يمشي وراء بالقاسم ساكت قابل بالقاسم ،
بالقاسم : تعرف الدكتورة رحمة حمد .
طاهر ابتسم : أكيد نعرفها تبي منها حاجة ما عندكش مشكلة نحلها لك وقتي .
بالقاسم يضغط على يده و سنونه
طاهر : عندك أختك زوجك بنتك دكتورة عندها أي سوء تفا...
بالقاسم قص عليه بالبوني على عينه قرب منه خنقه : دكتورة رحمه اللي تبي توسطلي عندها زوجتي .
طاهر يعافر بعد نسمع كلمة زوجتي وقف ، يبحت منصدم .
بالقاسم : تعرف مرة أخرى ترن عليها و لا تحكي معاها شن اندير فيك .
طاهر يلكلك : أصبر يا أستاذ أفهم بس ، أنا رنيت
بالقاسم كره رقده على خشم سيارته عيط : معشش ترررن و أقسم برب الجلالة ترن و لا تحكي معاها إن شاء الله حتى في الجامعة ، تخطم بس تخطيم أعرف إن هذا آخر يوم في عمرك .
طاهر : أستاذ مش هكي المفروض نتفاهموا بعدين أنا موظف هذه خدمتي .
بالقاسم رفعه و خبطه على السيارة : أخدم بعيييييد من مراتي تفهم و إلا نصرف .
طاهر خاف : خلاص خلاص فهمت معش جاي شورها .
بالقاسم يبحت فيه متعقد يضغط على سنونه رفعه . عزقه على جنب : لقد أعذر من أنذر كلمتي ما نحبش نعاودها ، اسأل عليا في بنغازي بالقاسم الفلاني .
طاهر صبى ينفض في دبشه بحت في بالقاسم .
بالقاسم قارن حواجبه رفع صبعه السبابة : أنذرتك و شوف روحك .
عدا و سيبه.
طاهر : أمشي يا ### عنجد أمه جهده عليك غل ازح دهش أمي .
قعد ينفض في دبشه ركب في سيارته نظف روحه .
طاهر : يا ### أمه عيني زرقه .
خذا شيشة أمية من السيارة مناديل يكر يضمد على عينه تريح شويا نزل مقوص ظهره طربقه عدل دبشه . و تنحنح لبس نظاراته رد للمجمع الإداري .
.......
بالقاسم : أيوه .
إسماعيل : أنا قدام مكتب المحامي اللي قتلي عليه .
بالقاسم : يفتح 9 أركب تلقاه .
إسماعيل : قالولي صارله ظرف طارئ مزال ما جش . مش عارف يبي يجي و إلا لا .
بالقاسم : توا نرن عليه و نرد عليك .
إسماعيل : تمام .
بالقاسم سكر رن على صاحبه مرتين مقفل ، قعد شوي و رن أخرى رن .
بالقاسم : السلام عليكم .
صهيب : عليكم السلام يا باشا .
بالقاسم : وينك إسماعيل جاء قالوله عندك ظرف طارئ إن شاء الله خير .
صهيب : لا خير إن شاء الله غير عندي قضية كيف طلعت من المحكمة قايلهم كان ما عطيتكم عذر معناها عندي ظرف ما جيتش في الصبح للمكتب قاعد في المحكمة من ال7 المفروض 9 نبقى في المكتب الإجراءات تأخرن أهو ال10 مزالت في زحمه .
بالقاسم : كسبت القضية .
صهيب ضحك : عندك فيها شك .
بالقاسم : لا و الله عارفك ربي يحفظك .
صهيب : تسلم توا جاي للمكتب قوله تفضل فوق توا نرن عليهم يستقبلوه .
بالقاسم : منور يا هيبة بجوده بيك .
صهيب : مش بينا يا غالي ياما مصبي معايا أنت .
بالقاسم : تسلم يا خيي توا نقوله يركب تبي خدمه أنت .
صهيب : لا و الله أنت كان تبي حاجة رن بس ما يهمك شي .
بالقاسم : غالي و الله هي السلام عليكم .
صهيب : عليكم السلام .
سكر بالقاسم رن على إسماعيل ركب لقي السكرتير . يحكي بالتليفون الأرضي سكر رحب ب إسماعيل ...
.....
أنا كملت شغلي طلعت من المحاضرة ماشية للمجمع الإداري بالصدفة خطم من جنبي أستاذ طاهر لابس نظرات جوا المجمع عطاني بالظهر طول عقلي مع بالقاسم ، في الكلية ما سمعتش بأي مشكلة أو هرجة و لا جاني حد حكى معايا ما بيتش نعدل على أستاذ طاهر خشيت للدكتورات سلمت عليهن طلعت شوي نرن على بالقاسم .
أنا : ألو .
بالقاسم : كملتي .
أنا : أها قريب أنت .
بالقاسم : ربع ساعة نبقى عندك أوكي .
أنا سكرت قمعزت عقلي معاه لين رن عليا طلعت ركبت ، ما قدرتش نسأله الطريق كلها ساكتين خشينا من باب حوشنا الرئيسي عرفته ما يبيش يجي من جهة حوش عمي و يشوفوه متعقد ، خشيت لحوشنا عميمة تحسب فينا في الغداء دزوا الغداء مع الشغالة خذيته منها و روحت .
بالقاسم نزل لقي الغداء على الطاولة قمعز يتغدى بدون كلام ركب للدار رقد .
أنا مش عارفة ما قدرتش نلحقه حسيته يتهرب مني ما يبيش يحكي معايا ، خفت نحكي يقولي كلمة تزعلني و أنا ما صدقت وصلت للمرحلة هذي معاه ، رفعت السفرة غسلتها طلعت قعدت في الصالة غفيت على الصالون
بعد ساعتين ،،،
بالقاسم نزل بحت في الصالون لقاني راقدة ركب جاب فوطة نزل غطاني بشويش طلع .
.......
وفاء : يوم يهبل بكل ما تخيلتش هكي و اللي محلي اليوم أنت جنبي مفاجآتك يا قلبي .
محمد يمسح في رأسه : نذكر أي حاجة قلتي خاطرك تعيشيها معايا ، إن شاء الله نعيشوها ، نعيشك معايا كيف ما تبي .
وفاء : أنا ما نبي منك شي غير تبقى تحبني عمري كله و تهتم بيا حياتك كلها تبقى حب و رومانسية .
محمد ضحك : هذه بس ساهلة .
وفاء ضحكت : تعال نلعبوا .
محمد قمعزت جنبها : شن اللعبة .
وفاء : نلعبوا لعبة سمحه نغني أغنية آخر حرف تبدأ أغنية بنفس الحرف .
محمد رفع حاجبه : مش قلتي حياتنا رومانسية وين الرومانسية في الموضوع ، بعدين صوتي شين .
وفاء : حتي أنا صوتي شين بس سمحه اللعبة .
محمد : باه اللي يخسر شن يصيرله .
وفاء : لآخر يطلب منه أي حاجة لازم اتنفذ .
محمد فرح أبتسم : لازم لازم يعني إنت قد كلامك آه .
وفاء بفخر : قدها هي ابدأ .
محمد : تمام أغاني أقدم شوي بس مشي حالك .
وفاء : عادي .
محمد : حبيبي يا حبيبي ، إنت فين حبيبي يا ، يا حلم أنا عشت عمري بستناه و أتمناه الفرقة عليا صعبة و إزاي يداري شوقي و أنا أعمل أيه لو أغمض عيني و أصحى ألاقيك هنا للبعد نهاية و إنت بقالك سنة يلا و تعالى أنا قلبي حيتعب كده إنت فين .
وفاء ضحكت : صوتك بشع .
محمد ضحك : قتلك مش شوري .
وفاء : مش مشكلة حرف النون أصبر آه أصبر
محمد : لا وين واحد أثنين ثلاثة .
وفاء تنط : نوسو نوسو بابا..أنت يا أحلى بابا.. وديني المرجيحة..و لا السيما يا بابا .. نوسو نوسو بابا..أنت يا أحلى بابا.. وديني المرجيحة.. ولا السيما يا بابا يا باااابااااا ...
محمد يضحك : يا عليك عجاج .
وفاء : هيا حرف الألف .
محمد : لأنك حبيبي ، لأنك حبيبي لأنك حبيبي وعوّدت عيني عودت عيني بيك لأنك حبيبي لأنك حبيبي لأنك حبيبي و حلّيت عيني و حلّيت فيك لا أنّبدّلك لا هِنّت لا تنّهان .
وفاء : هذه مش بالألف
محمد : لا ألف لأنك حبيبي .
وفاء : لا أنت تغش .
محمد يضحك : بلاش طروح إنت تبي تخسريني بالسيف هيا أغنية بالنون .
وفاء تنرفزت عشان محويتك جابت الأغنية الأولي : باهي كمل أغنية سمحه .
محمد اتكي بالجنب : عاجبني حرف النون هيا واحد أثنين .
وفاء تفكر تهز .
محمد : ثلاثة أربعة خمسسسسة قققف خسرتي هههههه .
وفاء بزعل : أصلا غشاش .
محمد قمعز : توا نطلب آه .
وفاء : ما تطلب مني اني نصبي و لا نط تعبانه حاجة خفيفة .
محمد أبتسم : لا حاجة خفيفة بكل مافيهاش تعب لك . قربي مني بس نقولها لك .
وفاء قرب حطت وذنها على فهمه : شنو هي .
محمد وشوشلها مبتسم .
وفاء انصدمت وخرت تبحت فيه .
محمد : ها تبي تنفذي هذينا قواعد اللعبة .
وفاء : بس مش هك الطلبات .
محمد : تلعبي فيها مع راجلك مش بنات عمك راه " غمزلها" هي .
وفاء زمطت ريقها .
محمد صبى طفى الضوايا كلهن خلى وناسة وحدة رد للسرير قعد يبوس فيها بشويش رقدها على ظهرها قرب عند وذن وفاء .
محمد : أتفقنا لازم تنفذي صح .
وفاء هزت رأسها بشويش بمعنى أها .
محمد ابتسم رقد على ظهره هو رافعها حطها على بطنه : هي حبيبي .
وفاء متحشمه ساكتة
محمد قرب و راحوا في خبر كان ....
..........
بالقاسم روح الليل متأخر .
أنا راقدة حسيت بيه ما تحركتش قعدت نراجي هو يقدم يشوف لي حتى يطبس يشم ريحتي .
بالقاسم خش دوش لبس صلى ركعتين قيام الليل جاء على السرير و رقد .
أنا انصدمت كأنه بروحه في الدار قعدت نفكر لين رقدت من التعب حتى للصلاة ما نضت و لا فطنت بيه لما تحرك .
نضت ما لقيتش قاعد ما عنديش عمل و لا عرفت شن صار معاه أمس ، طقت العاملة تشوف الحوش أنا شغلت الغسالة و كملت طلعت لعميمة عقلي شارد لا عرفته شاف الراجل ما شافه و لا عرفت حاجة .
عميمة : رني على بالقاسم خلي يجي للغداء
أنا : تليفوني في الحوش .
عميمة : توا نرن أنا .
خشت للمطبخ جابت تليفونها جت قمعزت جنبي فتحت التليفون رنت عليه .
عميمة : عليكم السلام وينك يا قسومه نرجوا فيك على الغداء ، ربي يعاونك توصل طيب ، دير بالك من الطريق ، ربي يرعاك ، بالسلامة بالسلامة .
عميمة : قالي تغدوا قاعد برا بنغازي .
أنا هزيت راسي سكتت ،،،
تغدينا العشية مع الساعة 4 جت رندا عميمة فرحت قعدت تهدرز معانا نوعا ما غيرت لي جوي جت زهور عصدت لرندا روحت قبل المغرب زهور قعدت تعشينا روحت ...
أنا خلاص كنت تعبانة و مشغولة على بالقاسم دوشت و خشيت السرير بس مش راقدة .
بالقاسم روح متأخر دوش و خش للسرير رقد على ظهره
أنا قعدت أشوى و تحركت شوره كانت حركتي بالشوية و فيها ثقلة قربت منه .
بالقاسم طول خذا راسي و حطه على صدره ضمني بحنية بس بدون كلام .
أنا تعودت عليه أنه ضروري يحكي معاي و ضروري يرقدني في حضنه أضعف الإيمان على يده لكن الليلة اللي قبلها و اللي قبلها و لا كأني جنبه كنت عارفة لو ما قدمت عليه هو ما كان يقدم ...
رقدت أنا في حضنه يده عليا ...
......
وفاء تحكي مع هلها في التليفون
محمد راقد ،
وفاء كملت برمت لقيت محمد مازال راقد خشت معاه . في السرير تبحت فيه مبتسمه قربت منه
محمد حس بيها فتح عيونه حضنها : صباح العسل على حبيبي .
وفاء ابتسمت : صباح النور
محمد كح : الساعة كم
وفاء : واحد و نص .
محمد : فطرتي .
وفاء : تؤ نرجى فيك تنوض .
محمد يبوس في رقبتها .
وفاء تضحك : لحيتك تدغدغ فيا .
محمد بحت فيها : نعليا من اللي يدلع عليا .
وفاء بدلع : أنا جعانه راه .
محمد : ندير حمام و نطلعوا .
وفاء : نعدوا لل### اللي يومها مشيناله .
محمد : حاضر ألبسي لين نكمل حمامي .
وفاء توشوش مبتسمه : حبيبي عادي نمكيج شويا .
محمد بحت فيها رفع حاجبه .
وفاء بزعل : نبصر نبصر .
محمد : أيوه خليها بصارة هي نصبوا .
وفاء صبت كملوا حاجتهم و طلعوا روحوا على المغرب تريحوا شوي و طلعوا أخرى روحوا في الليل .
.......
بالقاسم كالعادة يطلع من الصبح يروح في الليل متأخر لا يحكي معايا و لا يأكل معايا ...
أنا قعدت نجي نرقد في حضنه و بالقاسم يلف إيديه عليا بدون كلام ، كانت صعبة عليا ، كنت في فترة حساسة صح كيف سكرت السادس توا في السابع و وضع البيبي تمام ، بس كان تفكيري لو هو أستمر هكي أنا كيف نقدر نكمل بعد تعودت على إهتمامه و بصراحه ما عندي الشجاعة نسأله و نعرف شن اللي صار بينه و بين طاهر ، و مش عارفة إحساسي صح أو لا بس حسيته هو ما يبي يحكي معايا هل ثقة فيا أو ما يبي يزعلني ، أو فهم أني انحطيت في الموقف غصبن عني .
بالقاسم راقد على ظهره رافع روحه على مخدتين حط راسي على صدره .
أنا نجيه ما نبي شي غير نحط راسي و نحس بيه قريب مني و يحضني .
يوم الخميس في الليل روح متأخر دوش و صلى و جاء على السرير .
بالقاسم رقد على جنبه و وجه ليا .
أنا لصقت فيه بجسمي .
بالقاسم حطني جوه حضنه غمض عيونه .
أنا حاسة بتعب أشوى رقدت حسيت بحركة البيبي لين نوضتني .
بالقاسم مغمض عيونه .
أنا ما تحركت حطيت أيدي على بطني و حسست عليها . كنت فرحانه بالحركة و كثرة النشاط حتى لو مرات يبقى بقوة ، البيبي يتحرك شوي و حسيت بالقاسم نفسه تغير قبل كان هادي أشوى و كنت نحسابه راقد .
بالقاسم يتنفس بالقوة زاد لصقني فيه و ضغط على بطني إيديه محوطاتني كل مرة نفسه يعلا و تنهد و حط وجه في رقبتي .
بالقاسم : حبيبى يا أغلى عطايا ربي ليا .
"حضني بالقوة قعد يبوس فيا بوساته مليانات لهفة و نزل يبوس في بطني "
أنا قلبي قريب يطير من كلمته .
بالقاسم حس بحركة البيبي : حبيب بابا كنك مع ماما . كنك نوضتها "رفع وجه فيا " حبيبى وليدي تعبك .
أنا ماسكة بكيتي بسنوني ، كنت مرايفة على صوته و على كلامه معايا حتى على نفسه في رقبتي مرايفة عليه .
بالقاسم نزل على بطني يحرك في يده بشويش : تعبت حبيبتي يا بابا راه كله إلا رحمتي أنا ، هذه ميمي حبيبتي أنا بس .
هذا نصيبي الحلو من ربي .
أنا لفيت إيديا على رقبته و قعدت حاطه وجي في رقبته و لحيته و نحرك في وجي عليها نفسي تغير علاه : مرااااايفه .
بالقاسم يبوس فيا : لو تشوفيني أنا يا عيوني كان تشوفي اريافي عليك يا نور عيوني إنت .
أنا شعوري مخلط نبي نبكي و نعاتبه كيف قدر يبقى ما يحكي معاي ، و نبي نبكي فرحانه لأنه حاسس بيا حتى و هو زعلان و اللي خلاني نطير إحساسه بالبيبي و كيف تحرك و كيف فرحاته حركته بعد قال كله إلا رحمتي هذا نصيبي الحلو من ربي حسيت بحبه ليا و كيف يبان في عيونه و لمسته كوم بروحها فيها حنية ما نحس فيها إلا معاه .
بالقاسم يسلح في التيشرت عزقه على الوطى نزل عليا .
يبوس : نحبك أنا إنت ليا أنا بس حبيبي أنا
رحنا في خبر كان ....
........
إسماعيل خش : صباح الخير .
عميمة : صباح النور كنك رديت .
إسماعيل : كنت في المحكمة طلقت أميمة .
عميمة شهقت ..
....
#يتبع...
مزال حلقة وحده وفيها تقريبا يا جزئين أو ثلاثة خلوه على مهل عشان نكتب كل حاجة جتني خاص ما نتلخبط من الإستعجال ...
#Fafy_faa
