اغصان تتحرى البليل

١٩

بدلت وطلعت يم امي..كاعدة تسبح ع سجادتها...
حجت بتعب..بشريني شلونج يمه شلون الناس
خو ما موذين لو تعبتج البنية؟
لا بالعكس محترمين كلش وخوش ناس..ابوي وين؟
راح وي جماعته كال يتاخر..طلعيلج بيضة كليها
وي طماطة ووكلي همام وياج..
ايي جوعانة كلش..راح اسوي تاكلين ويانا؟

لا يمه توني اجيت من يم ام دعاء وصبتلي شلغم
كليت شبعت بعد ماكدر اكل..
بالعافية شلونها ام دعاء..
زوينة يمه بس كلبها فاير على وليدها ملتحق ..
الله يبرد كلبها ..يلا خلي همام يمج بس اسوي
الاكل..

رحت للمطبخ بسرعة كليت الطماطة وطكيت فوكها
البيضة ..الجاي ردت احمي شفته كالب وردي
عفته..
احنا الجاي نسوي مرتين بالاسبوع..يعني كل
يومين ..اول يوم زين ثاني يوم نشبعه ماي ثالث يوم
نشبعه ماي لليل بعد مايتحمل نسوي جديد الصبح ..
ومرات تصدف نسوي ثلث مرات..

عفته واخذت الصينية جوا ..كعدت اكلت وهمام
جاي يلعب..جابتله مرت عمي من ابن بتها ملابس
بيت مستخدمة واكو كم قطعة جديدة..وكارتون بي
العاب كم سيارة وكم قطعة حيوان..بس فرحته بيها
نستني كل همي..من لبس ملابسه وتدفى حسيت
كلبي الدفى..

ومرت عمي ماقصرت هم مشتريه قمصلة اله وبوت..
كملت اكلي بسرعة خفت كلشي يصير
ويجي ابوي..كمت وكلت همام وهم يلعب كم
لكمة واخذت الصينية غسلتها ورجعت تمددت يم امي..
بقت تسولف ع بيت ام دعاء تالي ع بيت عمي..
سجى بت عمي جاييها ناس وهالايام احتمال
خطوبتها ..لحت عليه امي كالت تروحين وتغيرين
جو كتلها لوكتها عود نشوف..

للساعة ب٨ اخذت همام ورحت للغرفة..
نيمته ونمت بصفه..صفنة تجر صفنة ..مثل
كل يوم ختمتها ببجي وشوق لهالة..
هناك وحلمت ..انا كاعدة ببيت صفوان وجاي
ادرس ريم..سمعت صوت همام بجه..ذبيت
القلم وركضت بهمة..طلعت واركض برعبة
ادور عليه مالكيته بس اسمع صوته..

كمت افتح بالغرف واصيح..هماااام ماما هماام...
فتحت باب غرفة..لكيته بحضن باسل ..بس
العجيبة من فتحت الباب لكيته يضحك مايبجي..
ركضت واريد اخذه من حضن باسل..لزم ايدي
ودفعها..خلي عندي اريده..جريت همام منه
وهو متيقبل يجيني..كمت ابجي ..هماام ولك
ماما انا امك تعال..وهو مجلب بباسل وباسل يكلي
ماانطي..

واسمع صوت هالة حجت من وراي..التفتت وانا
اباوعلها مامصدكة..
جانت وجهها يضوي يضوي ابيييض حاجتني
بضحكة..لهفة انطي اله احسن..
تقربت منها ودموعي تصب..ليش انطي ليش
همام انا اربي محد اله حق بي..
لا مو الج اله ..وباوعت لباسل وحجت..اخذه
ولا تسمعلها..هو اصلا اخوك..!

تقربت عليها اريد الزم ايدها ماكدر الزمها..
احاجيها اصيح..ولج هااااالة...ولج هذا ابني...
هي اختفت وباسل اخذ همام..انت بقيت بالكاع
كاعدة وبجيت بجي اختنكت..
فزيت بفزع ودموعي تصب..همام نايم بصفي
حضنته وبسته...بس ماكدر الزم دموعي..
عبالك صدك ماخذينه مني..