أنتقام للعشق

البارت الحادي و الاربعون

وخرت منه ظلت تباوعله و تبجي ابتسم و مسح دموعه بأثنين اديه و باسه من راسه كال بحنية  : يلا يعمري روحي وي البنات على امج هدن بيه خطية هسه تلكينه روحه لايبه عليه ..

حجه هيج و عافنه وراح و هاي خطية زينب ظلت مصدومة منه حقه اذا اني انصدمت اخر شي اخذنه زينب و رحنه لبيت عمي ابو فاارس شفنه امه كاعدة بلكااع بصالة و تبجي و تصيح : ولك يمه فاارس وينك يعمري لا تشلع كلبي ..

صدك خطية روحه مفرفحة و تكطع بنفسه خايفة عليه عيوني دمعت من شفته هيج ..

زينب ركضت على امه تبجي و تهدي بيه لزمت ايد امه و كالت : يمه على بختج لا تسوين بروحج هيج ترى ما يصلح الولد مابيه شي ان شاءالله هسه تلكينه موجود بس انتي بهاي سوالفج كاعد تفاولين عليه ..

حجت مرة عمي و هيا تبجي : ولج يمه ماكدر كلبي والله ما مطمن احس اكوو شي ابني قطعه من روحي احسه بيه شي و متأذي ..

خفنه من كلامه همست رسيل كالت بخوف :
جوري ولج لا فاارس صدك بيه شي لا سامح الله ..

باوعتله : ولج تفائلي بلخير شجااج..

باوعتلي : ان شاءالله خير بس من شفت امه و كلب الوالده يحس بأبنه و خفت شووو ..

: والله اني هم ما اظم عليج خفت من الكلام بس حتى لو مابيه شي على كلامنه هيج يصير بيه شي ..

وره دقايق اجت امي و مرة عمي ام غسان و زهراء و جمارة خايفين.

اجت عليه جمارة  بخوف : هاا ولج بشري لكوو ..

دمعة عيوني : ولج لحد هسه ماكو اي خبر ..

باوعت على زينب الي كاعدة على الدرج حاطه ايده على خده و على مرة عمي تبجي بدون صووت و امي يمه و مرة عمي يواسنه ..

جمارة بقهر : دخيلك ربي رجعه سالم لأمه و اخته ..

كتله : ولج خايفة عليه كلش لا بيه شي لا سامح الله لان كلش طول حتى الولد ماكو ..

صااار الاذاان كومنه مرة عمي تصلي و اني و البنات جهزنه بلعشى و رسيل بقت يم زينب تهدي بيه بس ماكو اي فايدة كلوبنه ممروده ..

صارت الساعه ب٩ بليل و كلشي ماكو لا احد اجه من الولد بشرنه و لا هو اجه مرة عمي ما تحملت ..

صاحت: ولكم خابرووو عليهم  وين صاارو ابني هاهيه راح من اديه ولكم وينه دخيلك ربي ابني بأمانتك ..

ام غسان : ولج كولي يالله مايصير هيج تفاولين على الولد خطية..

ضربت على صدره بقووه : ولج ام غسان كلبي يحس ابني بيه شي و هذا الحلم الي حلمته كعدني من النوم مخروعه و ردت اتلاحك عليه مايطلع بس طالع من وكت اليوم..

ماتحملت اني طلعت بره اتصلت على شاهر ماكو مايرد على ليث جهازة مغلق هنا كلبي لعب كلت بيه شي و مايقبلون يحجون ..