ငပြူးငလူး

Part 22

(Uni)

ယနေ့မှာတော့ သပြေညိုရပ်ကွက်ကြီးထဲတွင် ဟိုးလေးတကျော်ကျော် သတင်းဦးသတင်းထူးဖြင့် လူတော်တော်များများကို ဆွံ့အသွားစေနိုင်သူလေးတစ်ယောက် ပေါ်ထွက်လာခဲ့ပါသည်။ တစ်ရပ်ကွက်လုံးရဲ့ အပယ်ခံဖြစ်သလို လူတကာရဲ့ နှာခေါင်းရှုံ့ခံရသူလေးက စက္ကန့်မလပ်ပွင့်ချင်နေတဲ့ ပါးစပ်ပေါက်တိုင်းကို ပိတ်ပစ်လိုက်နိုင်သည်ဆိုလည်း မမှားချေ။

" အစ်မရေ! ကြားပြီးပြီလား..။ အဲ့ကလေးလေးက တစ်နိုင်ငံလုံးမှာ သင်္ချာအမှတ်အများဆုံး ရတာတဲ့ "

" အေး ကောင်မရေ.. စောနကတင် သတင်းစာထဲကနေတွေ့လိုက်ပါ့‌အေ။ ငါ့မှာမယုံလို့ နှစ်ခေါက်ပြန်ကြည့်ယူရတယ်။ မှန်တာပြောရရင် အဲ့လောက်တော်မယ်လို့တောင် မထင်ထားဘူး "

" ဟုတ်ပါ့..။ ဒီလိုကျတော့လည်း ကလေးလေးက အရည်အချင်းတော့ ရှိသားပဲနော် "

" အွန်.. ညည်းကလဲ။ အရည်အချင်းရှိဆို အသက်ကိုလည်း ကြည့်ဦးလေအေ။ သူများတွေ ၁၅.. ၁၆နဲ့ ဆယ်တန်းဝင်ဖြေနေချိန်မှာ သူ့အသက်က ၁၈နှစ်ရှိနေပြီဟဲ့ "

" အို! ဒီလိုသာ ပြောရကြေးဆို.. ကျူရှင်တောင်မတက်နိုင်တဲ့ ကလေးတစ်ယောက်က အမှတ်အများဆုံးရအောင် ဖြေနိုင်ခဲ့တာလေ အစ်မရဲ့..။ အဲ့ဒါကလည်း သင်္ချာတဲ့နော်.. သင်လေချာလေ သင်္ချာ "

" ဟမ့်! နင့်ဘာနင် သင်္ချာမကလို့ ဘာဂျာဖြစ်ဦးတော့..။ ဒေါ်စည်တို့က အထင်မကြီးတာ ပလာတာပဲ.. ထွီ! "

မဲ့ကာရွဲ့ကာပြောဆိုရင်းက ကွမ်းတံတွေးလှမ်းထွေးနေတဲ့ ဒေါ်စည်ကိုကြည့်ပြီး ဒေါ်မြတစ်ယောက် ပြောမနိုင်စွာဖြင့် နှုတ်ခမ်းခိုးမဲ့နေရပါတော့သည်။

ကွမ်းယာဆိုင်ပိုင်ရှင် ဒေါ်စည်အနေနဲ့ မနာလိုမရှုဆိတ် ဖြစ်နေတာလည်း မပြောလေနှင့်..။ တော်လှပါချည်ရဲ့ဆိုပြီး ရပ်တကာ ပတ်ကြွားမိထားတဲ့ သားဖြစ်သူကိုယ်တိုင်ကျ ဂုဏ်ထူးတစ်ခုတောင်မှ ပါမလာခဲ့ဘူးကိုး။

ပြောပြီးကာမှပဲ ကျိန်းသေပေါက်ကျမယ် ထင်ထားကြသူလေးက နောက်ဆုံးပိတ် အိတ်နဲ့လွယ်ပြသွားလေတော့..၊ တစ်ရပ်ကွက်လုံးရှိ ကလေးအမေတိုင်းမှာ မျက်နှာတစ်ပတ် ဖြတ်ရိုက်ခံလိုက်ရသလိုနှယ် စပ်ဖျဥ်းဖျဥ်းတွေ ဖြစ်ကုန်ကြရလေသည်။