"ကိုကို ကားကို လမ်းထိပ်မှာပဲရပ်ပေးနော်။ ကျွန်တော်ဆင်းပြီး လမ်းလျှောက်လာခဲ့လိုက်မယ်"
"အတူတူပဲသွားရအောင်လေ။ မက်ချူးအစ်ကိုမေးရင် ကိုယ်တို့ရုံးကနေ အတူလာခဲ့တာလို့ ဖြေလို့ရတာပဲ၊ စိတ်မပူပါနဲ့"
"အဲဒါဆိုလည်းပြီးတာပဲ ကိုကို့သဘော။ ဒါနဲ့ ဂယူဘင်းနီးနဲ့ဂွန်းနုဂီကိုရော သွားမခေါ်တော့ဘူးလား"
"သူတို့ညီအစ်ကိုက မနက်အစောကြီးကတည်းက ယူဂျင်းနီးအဖော်ရအောင်ဆိုပြီး ဟာအိုတို့နဲ့အတူတူလိုက်သွားတာလေ။ ကျောင်းပိတ်ရက်ဆိုတော့ သူတို့အကြိုက်ပေါ့"
"သြော် .. ဒါကြောင့် ကိုကို အေးအေးဆေးဆေးဖြစ်နေတာကိုး"
ယူဂျင်းနီး တစ်နှစ်ကျော်ကျော် နှစ်နှစ်ပြည့်ခါနီးတွင် ဟန်ဘင်းဟျောင်းက ခွင့်ရက်စေ့၍ အလုပ်ပြန်ဝင်သည်၊ ဟာအိုဟျောင်းက အလုပ်မှအပြီးထွက်ထားသဖြင့် အစပိုင်း၌ အိမ်မှာပင် အေးအေးဆေးဆေးနေ၍ ကလေးထိန်းလိုက်၊ အလည်အပတ်သွားလိုက်နှင့် ဇိမ်ကျနေသော်လည်း ယူဂျင်းနီး မူကြိုစတက်သည့်အချိန်တွင်တော့ အိမ်၌ တစ်ယောက်တည်းပျင်းသည်ဟုဆိုကာ တရုတ်ပြည်ရောက် ဂင်မ်ထယ်ရယ်၏ တကူးတကအကြံပြုချက်အတိုင်း ဟော့ပေါ့ဆိုင်ဖွင့်ရန် စိုင်းပြင်းတော့သည်။
ပထမ၌ ဟန်ဘင်းဟျောင်းက ထိုကိစ္စကို အလုပ်ရှုပ်သည်ဟုဆိုကာ ကန့်ကွက်သေးသော်လည်း ဟာအိုဟျောင်းက မည်သို့နားချလိုက်မှန်းမသိ၊ နောက်ဆုံး အင်တင်တင်ဖြင့် သဘောတူလိုက်၍ ယနေ့က ဟာအိုဟျောင်း၏ ဟော့ပေါ့ဆိုင်ဖွင့်ပွဲနေ့ပင်။
HAOPOT Villie
နာမည်နှင့်လိုက်အောင်ပင် စိမ်းစိမ်းလန်းလန်းအပင်ကြီးများစွာရှိသည့် ခြံဝန်းကျယ်ထဲ၌ ဖွင့်လှစ်ထားသည့်ဟော့ပေါ့ဆိုင်က သီးသန့်နေရာငယ်လေးအလား။ ရေတံခွန်အတုလေးများနှင့် အလှဆင်ထားသည့်ခြံဝန်းထဲ၌ အေးအေးလူလူထိုင်နိုင်သည့်အပြင် ချယ်ရီပင်ပုလေးများနှင့် ဟာအိုဟျောင်းအကြိုက် ပန်းနုရောင်သမ်းနေသည့် ဆိုင်အတွင်းပိုင်းကလည်း နေရာထိုင်ခင်းကျယ်ဝန်းသည်။
