"ဆောင်းမျိုးရိုးပဲ ဖြစ်ရမှာပေါ့ ကျွန်တော့်သားက"
"ဘာစကားပြောတာလဲ ဆောင်းဟန်ဘင်း! သားကို မင်းတစ်ယောက်တည်း မွေးတာလား! ငါနဲ့လည်း ဆိုင်တာပဲ။ ငါ့သားက ကျန်းမျိုးရိုးပဲ ဖြစ်ရမယ်"
"ဟ ငါက အိမ်ထောင်ဦးစီးလေ! ငါ့မျိုးရိုးပဲ ဖြစ်ရမှာ"
"ဘာအိမ်ထောင်ဦးစီးလဲ! မင်းလည်း ငွေရှာတာ၊ ငါလည်း ငွေရှာတာချင်းအတူတူကို တစ်မူးပိုရှူချင်မနေနဲ့! မင်းကို အိမ်ထောင်ဦးစီးလို့ ဘယ်သူကမှ သတ်မှတ်မထားဘူး!"
"ဟေ့! မင်း မသတ်မှတ်ချင်လည်း အိပ်ယာ ..."
"ဟဲ့ တော်ကြစမ်း! ဘာတွေပြောနေတာလဲ!"
သားအတွက် နာမည်ရွေးရာမှ ထုံးစံအတိုင်း အငြင်းအခုန်ဖြစ်ကြပြီး လူကြီးမိဘများ မကြားအပ်သည့်ကိစ္စများပါ ပါလာတော့မည့်အခြေအနေကြောင့် ကျန်းမာမားက ဝင်ဟန့်လိုက်သည်။ သားကို ဟန်ဘင်းနှင့်ဟာအို နှစ်ယောက်စလုံး၏ မျိုးရိုးဗီဇများအား ပြုပြင်ပေါင်းစပ်၍ ဖန်ပြွန်သန္ဓေဖြင့် မွေးဖွားခဲ့ခြင်းဖြစ်ရာ မျိုးရိုးနာမည်အတွက် နှစ်ယောက်လုံးက အလျှော့ပေးမည့်ပုံမပေါ်သဖြင့် အဖိုးအဖွားလေးယောက် ခေါင်းချင်းဆိုင်ကာ တိုင်ပင်ရတော့သည်။
"ဒီလိုလုပ်ရင်ရော။ ဆောင်းမျိုးရိုးရော၊ ကျန်းမျိုးရိုးရော နှစ်ခုစလုံးကပေးလို့ အဆင်ပြေမှာ မဟုတ်လောက်ဘူး။ ဒါကြောင့် မြေးလေးကို အစ်မကြီးနဲ့ ကျွန်မရဲ့မျိုးရိုးအမည်ပဲ ပေးရအောင်။"
ဟာအို့အမေရော၊ ဟန်ဘင်းအမေပါ မျိုးရိုးနာမည်ချင်း တိုက်တိုက်ဆိုင်ဆိုင်တူနေသဖြင့် ကလေးအား အဖိုးနှစ်ယောက်၏မျိုးရိုးနာမည်များအစား အဖွားနှစ်ယောက်၏မျိုးရိုးနာမည်ကိုသာပေးရန် ဆုံးဖြတ်လိုက်ကြပြီး အဖေနှစ်ယောက်ကလည်း ထိုဆုံးဖြတ်ချက်ကို အင်တင်တင်နှင့် သဘောတူကြသည်။
___ ♡ ´・ᴗ・ '♡ ___
"ဆောင်းဟန်ဘင်း မြန်မြန်လာ! သား နိုးနေပြီ!"
စူးခနဲထွက်လာသည့်အော်သံကြောင့် ဟန်ဘင်း ဖျော်လက်စနို့ဘူးကို အမြန်ယူ၍ အပေါ်ထပ်သို့ ခပ်သွက်သွက်ပြေးတက်ရသည်။ တံခါးဖွင့်သံကြားသည်နှင့် သူ့ပါပါး၏ရင်ခွင်ထဲ၌ လက်မလေးစုပ်၍ ငြိမ်နေသော သားသားက ဟန်ဘင်းလက်ထဲရှိ နို့ဘူးအား မျက်လုံးရွဲကြီးများဖြင့် လှမ်းကြည့်လာသည်။