Scroll down for Zawgyi 🎻
"ဒေါက်...ဒေါက်"
တံခါးခေါက်သံဟာ ညင်သာလွန်းလှသည်။ယဉ်မင်းသက်သာ မနက်ခင်းရေထသောက်ချိန်နှင့်မကြုံလျှင် ထိုကဲ့သို့တံခါးခေါက်ပုံမျိုးနှင့် တံခါးခေါက်သူသာတံခါးရှေ့တွင် ငုတ်တုတ်ထိုင်စောင့်နေရမည်။အိပ်ယာထဲမှ ယဉ်မင်းသက်ကတော့ နိုးမည်မဟုတ်။ကံကောင်း၍ ရေထသောက်သောယဉ်မင်းသက်သည် တံခါးရှေ့နားတွင် ရေခွက်ကိုင်၍ရောက်နေခဲ့လို့သာ ကြားခြင်းဖြစ်သည်။
"ဟင်...မြတ်ထင်"
ညင်ညင်သာသာခေါက်သောလက်ပိုင်ရှင်သည် လင်းမြတ်ထင်ဖြစ်နေခဲ့၏။တံခါးဖွင့်ဖွင့်ချင်းတွေ့ရသည့် ယဉ်မင်းသက်အား အထုပ်တွေနှင့်လင်းမြတ်ထင်သည် ခြောက်လွှာကိုတက်ခဲ့ရ၍အနည်းငယ်မောဟိုက်နေသော်လည်း သခင်အားတွေ့လိုက်ရသည့် ခွေးပေါက်လေးလိုဆီးကြိုပြုံးပြရှာသည်။
"Good morning ယဉ်ယဉ်"
ယဉ်မင်းသက် နောက်ပြန်လှည့်လိုက်ပြီး အိမ်အဝင်ဝတွင်ချိတ်ထားသော နာရီကိုကြည့်လိုက်တော့ အချိန်ကား ရှစ်နာရီအတိ။ဒါဟာ ယဉ်မင်းသက်အတွက်တော့ အလွန်စောလွန်းသည့်အချိန်ပင်။
"အစောကြီးပါလား မြတ်ထင် ဘာကိစ္စရှိလို့လဲဟင်"
"ပထမဆုံးရုံးတက်ရက်မှာ ယဉ်ယဉ်နဲ့အတူမနက်စာလာစားတာ"
လင်းမြတ်ထင်၏လက်ထဲမှ မနက်စာအထုပ်များကသက်သေပင်။တကယ်တော့ ရေသောက်ပြီးလျှင်ပြန်ဝင်အိပ်မည်ဆိုသည့် ယဉ်မင်းသက်၏အစီအစဉ်သည် ယခုတော့ကြက်ပျောက်ငှက်ပျောက် ပျောက်ချေပြီ။သူဘယ်လိုများငြင်းရက်ပါ့မလဲ။နွေးနွေးထွေးထွေးပြုံးလျက် ခြောက်လွှာကိုမမောမပန်းတက်လာသည့် သူေဋ္ဌးသားကောင်ငယ်လေးအား။
"လာလာ မြတ်ထင် မင်းလည်းပင်ပန်းမယ့်အလုပ်တွေသိပ်လုပ်တာပဲ"
ကိုယ်ကိုရို့လျက် အိမ်ထဲဝင်ရန်လမ်းဖယ်ပေးလိုက်ပြီး အနည်းငယ်ဂရုဏာဇောဖြင့်ပြောသော်လည်း ထိုကောင်လေးမှာမဖြုံ။သူ့အားထပ်၍ပင်ပြုံးပြလာပြန်သည်။ငယ်ငယ်တုန်းကလိုပဲ။နေကြာပန်းတွေနှင့်တူသည့်အပြုံးမျိုး ပိုင်ဆိုင်ထားတုန်းပါပဲ။
YOU ARE READING
Short Story About Htin Htin,Yin Yin,La Yaung and DeDe
RomanceMy Lover is a Violinist(Htin Htin and Yin Yin) Two Lifetimes and I'd still choose you(La Yaung and DeDe)
