جذبني فمك البني

البارت الثامن والعشرون

رجـعنا منـين ما جابـتنه الايـآم

يگـولون تحلـم بـيّة رجعـت من جـديد !
______________

سيلين : خاله تعبت عفيه ماكدر بعد..

ام عبد : يا يمه ياخاله شسويتي بيه شنو من ضيم عايشين هاي امج لو عندي اسويها وصل وصل ومايبرد كلبي.

سيلين : خاله كل خطأ بحياتنه سببه امي كل ملامه وتعياره من الناس سببها امي تخيلي اسمع كلام واتمنى لو ميته ولا سامعته اضل ادعي الناس تنسه سالفتها خاله كل المصايب الصارت النه وكل تصرف غلط سويناه سببه امي..

ام عبد : امج مال حرك لتزعلين مني.

سيلين : ما ازعل اني حجيتلج علمود لتكولين ليش طردتي امج وليش عايشه وحدج..

ام عبد : لعد الدكتور الطيب وينه شعجب عافج وتخله عنج.

سيلين : متخله خاله متخله عوفي البلكلب بلكلب.

ام عبد : تحبيه..

جنت مدنكه وفزيت من سألتني كأنما فززت شكو جروح بيه غافيه..

سيلين : ماعرف..

ام عبد : شلون متعرفين وانتي من تحجين بيه ساعه تضحكين وساعه تدمع عينج.

سيلين : اخاف اعترف لنفسي اني احبه تخيلي..

ام عبد : الله يصبرج بس هو وينه هسه.

سيلين : ماعرف..

ام عبد : اختج ماتعرف..

سيلين : بلي تعرف بس متقبل متكلي اي شي عنه..

ام عبد : الله اكبر ليش هالظلم مو انتي اختهة.

سيلين : تبرت مني .

ام عبد : الله يعينج يمه على ما بلاج ويصبرج وعمامج ما سألو عنكم هذا عطاروز مادري شسمه ولا ينبلع وينه تزوج لا.

سيلين  : ماعرف اي شي عنهم ولا اريد اعرف..

ام عبد : احسن مابيهم حظ

سيلين: اي بالضبط..

ام عبد : حبيبه اروح اني الكعده وياج حلوه حييييل ساعه ١١ اليوم ابو عبد يبيتني باب العماره.

سيلين : اخذتنه السوالف هههه.

ام عبد : هسه يكلي من ساعه سته رحتي وينج...

سيلين : اي ههههههه يلا عمو فقير ميحجي..

ام عبد : شحده يحجي غير اكصكص اذاناته..

سيلين : كصكصي شوراج هههه.

ام عبد : رايحه اني وامانه اي شي تحتاجين بس دكيلي تلفون حتى لتتعنين للباب.

سيلين : خاله اني لو مو انتو اضيع اصلا ..

ام عبد : الله كريم حبيبه الله موجود ويتكفل بكل امورج..

سيلين : شكرا عيوني انتي.

ام عبد : عفوا.

طلعت وصلتها وسديت الباب فرفحت روحي من اتذكرته بيوم السمعت كلام امه شلون اجه كعد يمي ويقنع بيه اني احسن وحده واشرف من هواي بنات امهاتهم فوك راسهم وشلون عرفت احافظ على نفسي وعلى اختي وشلون فخور بيه ..

اشتاقيت هواي وحنيت بنفس الوكت ،،

لزمت موبايلي المن اخابر منو يفهمني منو يوصلني اله..

اخر شي قررت اتصل على ايفين اعرف راح تصدني وراح تأذيني بالكلام بس احاول ماعندي غيرها اتصلت يدك يدك ويفصل عفت الموبايل رحت للمطبخ فتحت الشباك اريد هوى الشقه خنكه ماعرف اني صار كلشي يخنكني ويضيق عليه النفس..

رحت سويت كهوة اعرف راح اصحصح وماكدر انام بعد بس اريد راسي يتعدل سويت واسمع صوت المكينه مال قهوه ورجعني ويييييييين اخ يالذكريات اخ ..

ادهم : سيلينتي ..

سيلين : نعم .

ادهم : تعاي شوفي شنو جبت..

رحت وراه لكيته جايب حوض سمج..

سيلين : هاي شنو؟ ههههه

ادهم : حوض سمج مو عجبج ذاك اليوم من رحنه للمطعم..

سيلين : اي عجبني..

اجه تقرب يمي لزم ايدي وباسها خلاها على وجهه وغمض..

يطبع قبله ويهمس احبج ويرجع يطبع الثانيه ويصيح احبج ..اخر شي باوعلي بنضره ذبلانه..

ادهم : شوكت ؟

فزيت من فارت الكهوه  من الجهاز جنت خاله كميه اكثر من اللازم وتبدت على الميز طفيت الجهاز ورحت جبت وصله مسحته الصار ردته حجه حتى ابجي كعدت بالكاع على ركباتي وشكو بجي بالدنيا بجيته ، سمعت صوت موبايلي يدك  كمت على كيفي امشي ابالي هاي نسرين او رشا وصلت للموبايل لكيتها ايفين بسرعه جاوبت..

سيلين: افونه شلونج حبيبتي.

_ من شوكت تتصلين عليها؟

سيلين: ليش تصيح؟

_ اريد افهم من شوكت عندج اتصال بيها.

سيلين : اول مره اتصل..

_ متأكده

سيلين : اي.

_ بعد لتتصلين مره ثانيه انسيها ..

سيلين : ماشي ..

سده بوجهي ، فركت وجهي قوي استغفرت ربي طفيت الضوايات ومددت لزمت موبايل لكيت جايتني رسائل كلش هواي على الواتسب فتحتهن كروب الشغل ونسرين ورشا ومن ضمنهم محمد دازلي رساله من قبل يومين ومشايفتها نازله ليجوه ويه الرسائل فتحتها كاتب.
✍
اهلا ست شلون الصحه

جربتي التخاطر عجبج لا

وشنو صار وياج
ارجو تكتبيلي..
لان عندي بحث بخصوص هذا الامر وكاعد اجمع حالات حقيقيه علمود اقدمها..

صفنت بكتابته شنو بحث شنو هالخريط اصلا عبالي مجرد موضوع وجانو يتناقشون بيه ، لكيته متصل دزيتله..
✍
اهلا استاذ محمد العفو هسه يلا شفت الرساله ..
ماعرف انت مسوي بحث بخصوص التخاطر
عبالي مجرد موضوع وانطرح ونعم جربته..

طلعلي جاري الكتابه ✍ ويمسح وره شويه كتب.

محد سوه التجربه بس انتي من الكروب وكلهم راسلتهم كلت اسئلج انتي سويتيها او لا واسف اذا ضوجتج او ازعجتج بسؤالي.. ..

كتبت✍
لا بالعكس ماكو اي ازعاج اني سويتها التجربه ونجحت عندي بس عانيت ايام يلا رجعت طبيعيه..

✍

مممم جيد بلا زحمه ممكن تكتبيلي شنو الصار وياج بالضبط علمود ارفق كلامج ويه معلومات البحث..

كتبتله
✍
انت شنو نوع البحث مالتك عن شنو يحجي..

✍
التخاطر والاسقاط النجمي..

✍
مممم ليش انت شنو اختصاصك اللي اعرفه صيدله..

✍
اي نعم صيدله خلصت بس عندي بحوث اريد انشرها على النت وعندي بيج اذا تحبين اضيفج بيه وشوفي المواضيع اللي تنطرح..

✍
يعني بخصوص هذا الموضوع لو شنو ممكن توضحلي

✍
نعم بخصوص هذا الموضوع واكو مواضيع هواي اتصور راح تفيدج...

✍
تمام استاذ سؤال بلا زحمه عليك ياريت يكون بينه.

✍
تفضلي..

✍
اريد نوع علاج مهدئ للاعصاب او منوم كون انام ساعه تسعه وما اكعد اله الصبح..

✍
شتسوين بيه؟؟؟؟

✍
محتاجته مداكدر انام بسهوله عندي ارق ..

✍
راح اكتبلج منوم بس لاتاخذيه دائما وكت الحاجه..

✍
لا اريد اخذه يوميا..

✍
مممم براحتج بس لتنسين تكتبيلي شنو صار وياج علمود اكتب البحث..

✍
هسه اكتبه الك وانت هم لتنسه تدزلي اسم العلاج..

✍
صار..

دزلي اسم الحبوب اخذت سكرين للأسم حفظته بجهازي وكتبتله...

✍
شوف استاذ اني من بعد ما سويت سالفه التخاطر رحت بعالم ثاني والشخص اللي تخيلته حسيت بيه يمي وقريب كلش بحيث حتى عطره شميته..

طلع مرئي ومجاوبني كتبتله.

تصبح على خير..

دزلي سمايل اوك ...

شمرت موبايلي ردت انام مكدرت ضليت اتكلب عبالك الجو بده يصير دافي الصيف على الابواب الغرفه ضلمه والكهرباء الوطني طفت وابو المولد بس بالصيف يشغل بليل بالشتا ساعه ١٢ تنطفي ، حسيت بحراره روحي فاكت فتحت شباك غرفتي علود يطبلي هوى ورجعت مددت...

والله اخاف وحدي ظلمه و وحشه وهدوء ساكن يسلب الروح بس المشكله اني اختاريت هاي الوحده وجيت برجلي الها مو هيه اختارتني لهذا ما الي حق احجي ولا اتذمر من حياتي..   ...

نمت بصعوبه كلش كعدت على صوت المنبه كمت بملل وعيني على الباب وينك من توكفلي وتكلي باجر سته ونص لتأخريني....

هيج تركت فراغ بداخلي وروحي بحيث صرت ادورك دواره واخاف منك واريدك واحبك بس اكثر هاي الخيارات احبك ...

اعرف ردك راح يكون مو بالسهوله اللي متصورتها اعرف تريد تعلقني بيك بس بعدها شتسوي ماعرف...

تعلق كلبي بيك وصرت احبك بجنون شراح تسوي بيه. بس اني راح اخطي خطوه قبلك واعوف مكاني واروح لمكان متلكاني بيه ...

كعدت رحت للدوام كملت شغلي كله وصارت ب ١٢ رحت للكليه مكان مكان اتذكره بيه هنا كعدنه هنا حجينه هنا ضحكنه هنا بجيت وانت واسيتني هنا كعدنه نصنف على حركات الطلاب ونحلل شخصياتهم

بكل مكان الك ذكرى حلوه بكلبي بس انت خربتها ، مريت على البنايه الجان يدرس بيها وصعدت لغرفته لكيت اسمه مشيول مكتوب اسم استاذ ثاني مديت ايدي على المكان الجانت متعلكه القطعه بيه تلمسته بصابعي، ردت ابجي فتحت الباب على كيفي جان استاذ ثاني كاعد بمكانه ، رفع عينه وكال تفضلي ...

هزيت راسي لا يعني ماريد شي وعفت ونزلت ودموعي تتسابق ويه نزلتي..

رحت للقسم اخذت محاضراتي كملت رجعت للبيت بدربي مريت على الصيدليه شوفته الاسم كتله اريد هذا الكبسول .

_ بس هذا كلش قوي راح يسطرج مو بس ينيمج عندي نوعيه مفعولها اقل ..

سيلين : لالا اريد هاي النوعيه..

_ راح تضلين نايمه ساعات تره.

سيلين : اي اريده ..

_ براحتج.

نطاني العلاج ونطيته الفلوس ورجعت للشقه..

مر اليوم بس عليه ثكيل جان ، سويت اكل على السريع هو غده وهو عشا ...

رحت صليت الظهر والعصر وكعدت اقره ماكو اقل الساعه اذن المغرب كمت توضيت وصليت ورجعت اقره للتسعه دك موبايلي باوعت ايفين ضليت حايره اجاوب لا هيه مو هيه اخر شي  جاوبت.

جريت نفس ..

سيلين : الوو ايفين.

ايفين : يعني عجبج الصار تعرفين كلش زين محد يريدج ليش تتصلين وتسويلي مشاكل..

سيلين : افونه حبيبتي كلشي ماريد منج غير بس اسمع اخباره زين لو لا ومريم شلونها لج كاعد اموت ويوم عن يوم يزيد اشتياقي اله فدوه لعينج بردي كلبي بكلمه وكليلي هو وين..

ايفين: انسهم انتي ميته بالنسبه النه كلنا وراح احضرج ولتحاولين تتصلين من رقم ثاني لان راح اغير الرقم بسببج.

سيلين : لا لا الله عليج لتسويها بداعه كل يوم حلو كضيناه سوه بداعه شكو شي سويته الج وتدرين شكد وكفتلج وتحملت علمودج.

ايفين : ادري مناكره اني بس السويتيه قهرني منج وشايله بكلبي عليج هواي .

سيلين : مو مهم حبيبتي يجي يوم وتفهميني وتقدرين ضرفي..

ايفين : هسه شنو تردين محتاجه فلوس.

دنكت راسي وضحكت بتعب نزلت دمعتين على بجامتي مسحت عيني وجاوبتها.

سيلين : ممقصر ويايه لج افونه اسحب فلوس بكيفي ومسواك مرات الكه بلبيت واعرف هو كاعد يجيب بس مادري شلون يفوت للشقه راح اتخبل ..

ايفين : بس عمو مو بغداد صار هواي ...

سيلين : وين لعد.

ايفين : مو مهم تعرفين المهم معليج بيه وانسيه كافي الصار.
سيلين : ماشي المهم انتو زينين هذا هو.

ايفين :اي زينين دام بعيده عنه مع السلامه اروح اني.

سيلين: الله وياج بس لتغيرين الرقم بعد ما اتصل.

ايفين : ماشي..

راحت ورجعت اكلب بالملزمه وفكري سارح بيه قهره تهد جبال واذيه بس الله يعلم بيها ،

كمت جبت الكبسول خليته يم راسي وكلاص مي تضاهرت بالنوم وكلي امل راح يجي اليوم واشوفه لان شكيت محمد اله علاقه ب ادهم لهذا طلبت منه يكتبلي حبوب منوم ..

خلص اليوم وماكو والثاني والثالث اسبوع شهر وادهم ماكو تخبلت وين راح معقوله صدك كلام ايفين ممجود بغداد لو شنو السالفه ليش مختفي شكد ما اخاف منه ضعف هذا الشعور اريده ....

كل يوم افرغ من الكبسول بالمغسله واتضاهر بالنوم وانتضره الظاهر اذكى مني وعرف اني اريد اخدعه او فعلا هو ماموجود او محمد ما اله علاقه ب ادهم مجرد صدفه صارت..

وبيوم رجعت من الدوام متأخره جانت ساعه سبعه ونص ازدحامات كلش وابو الشركه طلب مني ارجع للشركه من بعد ما ارجع من الكليه ولحد ساعه سته يلا سمحلي اطلع ليش هيج سوه ماعرف من دون الموظفين يعني الشفت المسائي بلشو وكملو شغل واني ناطيني شغل اضعاف منهم ...

تعبت واعصابي بدت تنهار وفعلا احتاجيت اخذ منوم وانام بعد ما اكعد لان ثاني يوم جمعه ، بالطريق اشتريت لفه وخليتها بالسياره رجعت للبيت سبحت وبدلت وكعدت اكل اكلت نصها وكمت صليت الظهر والعصر قضاء والبقيه بوقتهن ، مددت بالهول وضليت اكلب بالموبايل طلعت الصور...

وهزني الحنين هز علكت اغنيه لكاظم الساهر اسمها
الليلة احساسي غريب)

عاشك وأنا مالي حبيب

حبيت كل الناس لاموني

حبيت كل أحبابي باعوني

كلت أحب الحب أحسن

كلت أحب الحب أضمن

لا أحن ولا أتوب

ولا بعد في يوم أحزن

ويه كل كلمه اتذكر موقف مر عليه وبيه غص وقهر ...

بيومها اخذت حبايه وحده منوم بس  مأثرت بيه ابد بسبب ___________ بعدين تفهمون ليش متأثر بيه العقاقير الطبيه هلكد...

رحت نمت وخليت يم راسي الكبسول وكلاص المي شربت منه وغطيت بنومتي...

لهناك وسمعت باب غرفتي انفتح ماعرف ساعه بيش جانت بس العرفته اني شبعانه نوم يعني الي فتره هواي نايمه بحيث مفعول الدوه اذا اله تأثير لحك راح ....

حسيت بيه دخل للغرفه من عطره  اول شي سواه علك ضوه التيبلام القريب من راسي بعدها سمعت صوت الشريط مال حب المنوم خلاه على الميز اعتقد شافه ماخذه منه لو لا اني طلعت حبايتين وحده اخذتها والثانين ذبيتها بالزبل ....

كعد يم راسي على الجربايه مد ايده على وجهي تلمس بشرتي بظهر ايده ، سمعت صوت اهتزاز موبايله جاوب وهمس..
ادهم :I am in the south, no, I am not In Baghdad

انا بالجنوب لا لست ببغداد

Yes I understand you well

نعم انا افهمك جيدا
Good bye

جيد باي

تقرب مني وطبع قبله خفيفه على كصتي وهمس بصوت مليان قهر بكلمات اغنيه ويه كل كلمه يحجيها يمرر ايده بخفه على بشرتي..

الليلة غير شعوري غير
أشواقي غير حتى الأغاني غير

صدري سما وإحساسي طير
بس طيفك ما تركني

ظل ساكن وسط جفني
كان يذكر وإنت ناسي

كان طيب وإنت قاسي
إنت وينك، إنت وينك؟

كان هذا الفرق ما بيني وبينك
جيتني تشكي الزمن وجيتك أريد أدفى
لكيت في كلبي وطن ولكيت بيج منفى..

ردت ابجي كوه سيطرت على نفسي هاي شنو نفس الاغنيه السمعتها معقوله جان واكف باب الشقه وسمع لو شلون سمعها راح انجن عقلي تعب واني افكر ....

بين سطر وسطر يغنيه يتنهد واحس الكسره بصوته جان مخنوك احسه يريد يبجي سكت وساد الهدوء بس نفسه اسمعه بالغرفه تنهد وكال.

ادهم : ليش هيج سويتي بيه ليش هدمتيني تعرفين عايش بصراع بين عقلي وكلبي واحد يكلي اذيها متستاهلك واحد يكلي دير بالك عليها حبها وارجع احتويها من جديد وعلمها وفهمها.....

شسوي فهميني حرت بينهم ياهو اسمعه وثنينهم يهدموني ...

اذا مشيت وره عقلي راح أأذيج لان محضرلج كوارث ونهايتج موزينه وراح اتاذه اضعاف عليج..

واذا مشيت وره كلبي راح اتأذه قاطات ونهايتي انه موزينه ، ادري بيج نايمه ومتسمعيني وكاعد احجيلج براحتي..

بس ماعرف رده فعلي اذا باوعت بعينج شنو راح اسوي بيج خايف من رده فعلي خايف عليج مني ومن اذيتي..

احارب نفسي و كل يوم انطي لنفسي جلسه بضبط النفس ومتفيد تخيلي دكتورج النفسي مكاعد يكدر يضبط نفسه..

ولج وين هدوئي راح وين ارتكازي وين عقلي اخذتيهم كلهم وخسرتيني كلشي...

يمسد على راسي ودموعه تنزل بللت وجهي واني حابسه حتى النفس خاف يحس اني كاعده وكذبت عليه ويعوفني ويروح وبعد ميرجع تمنيت افتح عيني واشوفه اتمنيت امد ايدي وامسح دموعه بس اكتفيت بهذا القرب..

مسد على خدي وهمس..

ادهم: خسرتيني كلشي وبعدني صابر عليج ماعرف نهايتنه وين ..

دنك باسني بشفتي قلصت نفسي  حسيته حس عليه رفع راسه دمعتي نزلت علك لايت مال موبايل خلاه قريب عيني يريد يشوف اكرمش جفني لو لا اذا كرمشته يعني كاعده كل هاي الاشياء علمني عليها..

مد اصبعه مسح دمعتي بخفه ايده..

ماعرف شلون سيطرت على نفسي ومحضنته  بس خايفه من رده فعله وكلامه السمعته خوفني قاطات ....

طلع من الغرفه وسد الباب فتحت عيني لكيته ماكو كمت اعصر باللحاف وابجي دم على فراكه ...

وين رجعت بيه الذاكره رجعت للأيام اللي يدور بيها رضايه ويكلي لتخليني اصير عاق بسببج ورجعت بذاكرتي فلاش باك لبيت ادهم ......

لذاك الموقف اول بذره حب حسها تجاهي وجنت غافله عنها عبالي علمود عمه هيج ديحارب  مجنت اتصوره متعلق بيه او متعلم على وجودي وخايف يخسرني...

(فلاش باك الماضي )

اجه وكف يمي صافن بوجهي باهت همس بنبره مشحرجه مليانه غضب..

ادهم : معليج منهم المهم انه بظهرج..

مسحت دموعي وباوعتله ونزلت دموع من جديد ما اسطير عليهن ما اسيطر..

ادهم : هذا اليردوه ليش تحققين مبتغاهم انه شنو اتفقت وياج سيلين باعيلي مو كاعد احجي ..

سيلين : عمو امك حجيها صحيح احنه مو صحيح..

صفن بوجهن ورجف حلكه من الاعصاب ..

ادهم : تعاي وياي احاجيج..

فات واني ضليت بمكاني واكفه التفت عليه ونتر..

ادهم : تره وياج كاعد احجي ماكو غيرنه هنا..

دخلت للبيت فات لغرفه المكتب وكف بالباب ولزمها فتت قفل الباب اشرلي على الكرسي.

ادهم : كعدي هنا.

كعدت..

كعد وشبك ايد بيد وكال .

ادهم : هاي امي من قبل هيج يعني مو جديده عليها ومادام مره كبيره بالعمر نعذرها ومناخذ بكلامها اذا جان مؤذي ومو صحيح..

سيلين : شنو المو صحيح بكلامها فهمني شنو الموصحيح امي مو سحاره امي مو ..

فركت وجهي واستغفرت ربي ..

ادهم : اعرف بس انتو ما الكم ذنب انتي حافظتي على نفسج وعلى اختج وجنتي افضل من الف بنيه على راسها ام واب صالحين..

سيلين : لا النه ذنب وهذا الذنب راح يضل ملازمنه طول العمر واذكرك عود و نضل بنات تماره ..

ادهم : لا انتو بنات وضاح شمكتوب بجنسيتج سيلين وضاح لو سيلين تماره.

سيلين : لتنسه اسمها جوه اسمي بسطر..

ادهم : لا اله الا الله ، كتلج وارجع اعيدها للمره المليون معليج بأي حجي اعتبريه حجار وصعدي عليه المهم انه يابنت الناس انه مو بعينج ..

سيلين : عمو خصم الكلام اكو حل وانت مكاعد تقبل بيه ..

صفن بوجهي بعقجه حاحب..

ادهم : اي بله وشنو الحل ترجعين لعمامج لو لأمج وتضلون تفرفرون بين المحلات والصالونات علمود يشغلوكم ..

سيلين : لا مو هيج..

ادهم : لعد ؟

صافن بوجهي وبؤبؤ عينه يتحرك بطريقه عشوائيه مترقب اللي اريد اكوله ، دنكت راسي وبيدي جنطتي افتح واسد بالطباكه مالتها..

سيلين : اريد اتزوج انت ليش متقبل امك حقهة تحجي اني وايفين جايتنه قسم زينه واحنه مو صغار..

ادهم : اتحملي واذا حجت يعني وانه ما سكتت سمعتيني شنو كلت الها صبري كلها كم يوم وتمل وترجع لبيتهم.

عطت بعد متحملت..

سيلين:  بس اني مو ياسه التتحمل ، افصل بيني وبينها اني مو عمه ياسه اشبها صح بس مو ياسه اني سيلين.

خزرني ورجف حلكه ضل ساكت دنك راسه وضرب كف بكف ايده الثانيه وجانت بين رجليه وضل يضرب كف بالثاني اكثر من مره جر نفس قوي وكال..

ادهم : انتي ليش تخليني اصير عاق بسببج ؟

سيلين : هاي اني.

ادهم : اي انتي بسببج راح تخليني اتعارك وياهم واخذكم واطلع من البيت وبعمرهم ما راح يشوفوني...

سيلين : اريد افهم انت ليش متمسك بينه وكلها ضدك..

صفن بوجهي فرك وجها ومرر ايده على لحيته رفع عينه باوعلي وكال..

ادهم : انتو مسؤوليتي وانه تربيت وكبرت ما اتخلى عن مسؤولياتي ..

سيلين: كفيت وفيت ويانه وماقصرت كافي خلينه نشوف حياتنه وانت سافر وعيش مثل متحب.

ادهم : سيلين لاخر مره انبهج سدي الموضوع  وكومي نامي مو تعبانه انتي.

سيلين : وين اكدر انام بعد ..

ادهم : شكد تحبين الدراما لخاطر الله.

سيلين: ها السمعته كله دراما برأيك شويه بطل انانيه وخليك بمكاني ..

ادهم : انانيه لان اريد احافظ عليكم طلعت اناني لان اريد اوفر الكم حياة كريمه طلعت اناني ، بس ...

سيلين : شنو بس شنو كمل ليش سكتت بس صوجك انت لفيتنه بيتك وتالي هيج حجيت وكلت عليك اناني.

ادهم : ما كلت هيج لا بكيفج تكوليني سيلين.

لفظ اسمي بعصبيه..

سيلين : المهم اي واحد يتقدملي وزين اقبل.

ادهم: ومنو ينطيج؟

سيلين : بكيفك يعني .

ادهم: كيف منو لعد؟

سيلين : استغفر الله عمو لتداهرني جايتنه قسم زينه انطينه.

ادهم : تعاي انتي شمدريج جايتكم قسم زينه وانه ماراضي انطيكم جوز ماعندي علم منو جايي خاطبكم سولفيلي ...

ضيق عينه وباوعلي وحسيت على نفسي جفصت وياه لان هو محجالي وجانو وحدهم لهذا محجيت شنو اكله جنت اتسنط عليكم ...

ادهم : احجي الاناني يريد يسمع..

سيلين : عمو مو قصدي اكول عليك اناني هيج طلعت مني ..
ادهم : شمدريج جاييكم خطابه وانه رافض انطيكم.

سيلين : توقعت.

ادهم : شتوقعتي..

سيلين : توقعت انت رفضت لان اني ادري المريه اجتي خطبتنه اكثر من مره ومن راحت بعد ما اجتي شكيت انت السبب..

ادهم : بس انتي حجيتي بثقه مو بشك ولا توقع ..

سيلين : لا توقع.

ادهم : اذا توقع على اي اساس اتهمتيني انه اناني..

سيلين : عمو يعني راح تلوف السالفه عليه اني جنت عصبيه والسمعته مو قليل وجفصت بالكلام وياك وكتلك اسفه بعد ليش تعيد بالموضوع..

ادهم : سمعتينه مو ؟

سيلين : المن ؟

ادهم : بيوم حجينه انه ونرمان.

سيلين : لا مسمعت .

حجيتها ودنكت.

ادهم : خلي عينج بعيني واحجي عليمن تضحكين لو مو كدامج اليوم فصلت دكتور تفصل لان كذب ..

سيلين : سمعت من دون قصد لان اجه اسمي بالموضوع لهذا وكفت اسمع.

ادهم : وحلو هذا الطبع؟

سيلين : عمو عمو عمو الله يخليك تره نفسيتي تعبت ما اتحمل ملامه ابد.

ادهم : لعد غلسي كلشي تسمعيه غلسي بس انه اذا ضوجتج يستحق تضوجين الباقي لا لان عايشين يمنه فتره ويرجعون..

سيلين : رغم الكلام الحجيته اي قسمه تجي واحسها زينه اقبل..

ادهم : الله كريم عود كومي غسلي وجهج هسه وروحي نامي تعبتي اليوم ..

هزيت راسي مسحت دموعي وكمت رحت للغرفه بدلت وبعدها رحت للحمام سبحت دموعي تنزل ويه المي كرهت روحي ماكدر اضل هنا ولا اتحمل اي كلمه تنكال علينه سواء بحق او غير حق اوووف بس وين اروح وين ...

طلعت من الحمام ورحت لغرفتي لفيت شعري بالشال ونمت شكد حاولت ايفين  تحجي ويايه وتعرف شبيه مجاوبتها وكل ما تريد تحجي اسكتها اعرف بيها تريد تحجيلي لان اكيد هم سمعت متفوتها ...

سيلين : شيلي ميلي من يمي صوتها كاعد ينرفزني.

ايفين : ليش تصيحين هيه متعلمه تنام يم جربايتج خطيه وين اوديها..

سيلين : وديها يم مريم هم تحبها..

غطيت راسي حاولت انام مكدرت ابد ضليت بفراشي صارت ساعه سبعه اندك باب الغرفه صحت منو اجاني صوته..

ادهم : انه اكدر افوت ؟

كمت عدلت كعدتي ولبست شالي زين ..

سيلين : تعال عمو ..

فتح الباب مبتسم ورفع حاجبه بحركه يمازحني بيها رديتله الابتسامه.

ادهم : انتهت النوبه عندج...

حجاها وفات وكف قريب من السرير..

جريت نفس قوي وكتله..

سيلين : راح اتخبل تعبت وكرهت نفسي..

ادهم : مممممم راح نرجع نهتز من جديد..

سيلين : عمو ميفيد مادام الناس تأذيني ما اصير زينه.

ادهم : اسألج سؤال..

سيلين: جواب..

ادهم : من اجيتي للدنيا وياج هموم..

سيلين : اكيد لا.

ادهم : اذا انتهى عمرج راح تاخذين هموهج وياج ؟

سيلين : اكيد لا..

ادهم : اذن ماكو داعي نهتم لاشياء زائله ..

سيلين : عمو انت تفهمني تحس داخلي شنو داخلي متحطم اني خسرت كلشي ماعندي شي اعيش علموده تعبت من حياتي صدكني تعبت..

ادهم : اعرف بيج تعبتي ، بس اكلج شغله شنو اقوه من الموت واصعب ..

سيلين : ماكو شي.

ادهم : المفروض انه ميت بعد ياسة بس الحياه تستمر ولازم نعيشها صح،،،
اذا بجيت واذا ضحكت واذا تكأبت ونعزلت واذا صادقت وعشت حياه جديده راح ترجعلي ياسه راح اكدر اعيش وياها مره ثانيه سواء جنت حزين او سعيد..

سيلين : لا مترجع بكل الاحوال.

ادهم : زين انه متت وراها ؟

سيلين : لا..

ادهم : خلص حياتج القديمه اعتبريها انسان مات والحجي اللي تسمعيه اعتبريه تعزيه لحياتج القديمه وعيشي صح عيشي مثل ما تحبين انتي مو مثل ما يحبون الناس لتخلين الناس ترسم طريقج لان كل انسان عنده عقده فشل بداخله عقده ذنب عقده نقص يجي يمليها بالمقابل من خلال بث السم البداخله يفرغ طاقته السلبيه بيج ويروح..

سيلين : عمو الكلام سهل وحلو بس التطبيق جدا صعب..

ادهم : سيلين انه هواي تحملت كلام وانتي متدرين ، مادام انتي ناضجه وعندج وعي راح اسرج بسر ..

سيلين : سر.

ادهم : اي سر .

سيلين : تمام اسمع.

ادهم : تعرفين اقاربي شنو مطلعين عليه كلام ؟

سيلين : شنو؟

ادهم : كايلين ادهم مبقي البنات يمه علمود يريد وحده منهن ومو بعيده عنده علاقه غراميه لهذا متمسك بيهن واحتمال جبير متزوج وحده بالسر ،،،

وكلام ثاني شلون كدر ينسى ياسه ويطلع ويداوم ويلبس ويضحك لعد وين حبه الها وين البجي مالته ، وهمه ذوله نفسهم من مريت بفتره كأبه بعد ياسه اجوي التمو يمي يلا قوي نفسك وهذا قضاء وقدر وكلنا على هذا الطريق ميصير تموت نفسك عيش لبنتك عشت محد رضى عليه موتت نفسي لاموني  المغزى من هذا الكلام الناس ما ترضى عليج لو صرتي احسن وحده ،

جان رضو عن النبي محمد ص انبياء ما خلصو من الناس ، لحد الان اكو اشخاص تحجي على النبي وتكرها وهو نبي اي خطأ ماعنده غير يفيد البشريه وينقذهم من الضلال تردين يرضون علينه احنه البشر ..

سيلين : صح ..

ادهم : مو بس صح هاي الدنيا اعتبريها دائره سوء وهاي الدائره كلها اشواك وانتي نقطه بنصها ضلي بالمركز لتميلين منا ومنا علمود لتتأذين وتنجرحين ضلي مثل ما انتي ابقي قويه واتحدي نفسج والناس.

بعدين هو كلام صح يجرح بس يضل كلام خرط ما اله اي فائده او نفع امج موزينه وينحجي عليها ما انقهر عادي هاي حقيقه ليش تضوجين منهة انتي نقيه وانه اعرف بيج انتي نقيه وانتي تعرفين نفسج زينه شعليج بالناس لا تهتمين ابد.

سيلين: ها هيه وعد ما اهتم .

ادهم : ممم مادام هلكد تعبت وصرفت حجي اريد منج شغله وممنوع ترفضين.

سيلين : وهي ..

ادهم : اريدج تجين ويانه .

سيلين: وين وياكم ؟ انت ومنو.

ادهم : انه وايفين ومريم وايمن.

سيلين : وين رايحين.

ادهم : جماعتي عزموني على فلم جديد نازل وانه عجبني اطلع وياكم حاجيت ايمن كال ضايج ويريد يغير جو مريم وايفين رحبو بالفكره ضليتي انتي ..

سيلين : عمو راسي صاير طبل يا فلم ياطلعه.

ادهم : بيها زعل يصير.

سيلين : يعني انت تزعل لو منو..

ادهم : انه طبعا..

سيلين : عمو ما الي واهس فدوه لعينك اعفيني.

ادهم : لخاطري مالي خاطر يمج ابد.

سيلين : اذا لخاطرك اروح...

ادهم : يلا راح ابدل وانتضرج لتتأخرين.

سيلين : اصلي المغرب وابدل.

ادهم : براحتج.

كام وصل للباب صحته.

سيلين : عمو .

التفت وكال

ادهم : نعم.

سيلين : شكرا.

هز راسه مبتسم وطلع ..

رحت توضيت وصليت بدلت وطلعت لكيتهم كاعدين بالهول بس اكو توتر على وجوهم ايمن وادهم شافوني كالو هااا خلصتي..

سيلين : اي خلصت ايفين ومريم وين؟

ايمن : بره بالطرمه يم ميلي.

سيلين : ها زين نطلع لو بعد.

ادهم : لا لا نطلع يلا.

كامو وطلعنه صعدنه اني وايفين ومريم  ليورة وهمه ليكدام خليت ميلي بحضني وضليت امسد الها ..

وصلنه للمكان الي قرر ياخذنه اله صف السياره بالكراج ونزلنه مريم وايمن يمشون ليكدام واني وايفين ويه عمو ادهم ، همست لايفين.

سيلين : تحاجيتو انتي وايمن.

ايفين : لا سلمت مجاوبني.

سيلين : هاا

سكتت وهيه هم سكتت ماعرف بيها تعرف ايمن يريدها وحاجي بيها لو لا محجيت  ، وصلنه للصاله مال عرض الفلم اشترينه شاميا قدملي وحده ضحكت.

سيلين : شعجب كسرت النظام الغذائي.

ادهم : اليوم مسموح حتى عشا راح اخليج تتعشين.

سيلين : ههههه بعد يوميه ابجي وازعل علمود اتدلل هيج.
ادهم : انتي بس لتبجين وشوفي الدلال على اصوله..

حجه ايمن.
ايمن : اي عمي الله يثخن لبنكم.

ادهم : انت اسكت يلا دخلو كعدو بمكان زين مو بنص الناس..

ايمن : قصدك بالنهايه مكان العشاق..

ادهم : انت تعرف هاي الاماكن انه رجال فقير.

ايمن : اي ياعيني عليك قطه مغمضه

ادهم : لا يانذل فوت فوت لا افرج الصاله عليك..

ايمن : هههه لا كلشي ولا تعصب سكتت.

دخلنه وكعدنه بالسره القبل الاخير ، شويه وبلش عرض الفلم جان لتامر حسني...
بلش الفلم كل شويه بالي يسرح على الصار اليوم واتنهد ، وره شويه همس يسألني على احداث الفلم  ..

ادهم : شفتي هذا المشهد جان التمثيل مو مقنع شنو رأييج انتي ؟

التفتت عليه .

سيلين : هاا مادري منتبهت..

ادهم : هاا انتبهي تره حلو.

سيلين : اي اي ...

رجعنه نتابع حسيته حس بيه ضايجه وبالي شارد لهذا كل شويه يسألني شي اخر شي كال  ...

ادهم : سيلين هذوله الممثلين متابعتهم  على السوشل ميديا ..

سيلين : لا بس اشوف افلامهم بالتلفزيون مو تدري ماعندي موبايل بس اسأل ايفين تعرف اكيد..

ايفين جانت كاعده بصفه من الجهة الثانيه وبصفها مريم واخر شي كاعد ايمن ، التفت سأل ايفين ورجعلي.

ادهم : تكول بينهم علاقه حب.

ايفين : يعني بالحقيقه لو بالفلم.

ادهم : لا بالحقيقه

سيلين : هااا وانت ليش تريد تعرف.

ادهم : لا بس شكيت من تمثيلهم واندماجهم سوه بينهم علاقه عاطفيه...

ضحكت وسديت حلكي خجلت الناس تسمع هو هم ضحك ...
انداريت عليه عيونه مدمعه مال ضحك..

ادهم : ها شبيج .

سيلين : عمو عفت الناس انداريت على الممثلين.

ادهم : ههههه عرفتج راح تحجين هيج ..

سيلين : بله شلون عرفت ..

ادهم : ممممم بس منا وجاي اخذ فلوس على كل شي اعلمج عليه.

سيلين : يلا فلوسك ترجعلك ههههه.

ادهم : لا هاي فلوسج وفلوس عمتج ما الي دخل بيها.

سيلين : الله يرحمها..

ادهم : امين.

سيلين : هسه كلي شلون عرفت بينهم علاقه حب؟

ميل راسه تقرب مني وحجه بصوت اشبه للهمس علمود منأثر على الكاعدين ونزعجهم.

ادهم : شوفي هذا المشهد بين الممثل والممثله من خلال الكلام والنضرات تحسين بينهم صداقه قويه او علاقه لان نضراتهم كاعد تعبر عن مدى قوه العلاقه البينهم حتى بطريقه المحاكاة تحسين اكو تناغم وانسجام بسبب الكيمياء بينهم كأنما همه كاعد يعيشون هاي الحياه مو تمثيل..

سيلين : حلوو راح انتبه بعد من اتابع.

ادهم : شوفي اكو افلام نندمج وياها واكو منكدر نكمل ربعها ونعوفها صايره وياج..

سيلين : اي صح ليش عود .

ادهم : لان اكو علاقه بين الممثل والمشاهد وتأثير دور الممثل في محاكاة المشاهدين لحالاته المزاجيه الها صدى كلش قوي بنفوس المتلقي.. ..

سيلين : شلون يعني مفهمت.

ادهم : ابسطها الج ، اذا ضحك راح ترتسم على وجوهنه البسمه واذا علت صوت ضحكته لا اراديا نضحك ومرات تنزل دموع من عيونه ، اذا بجه نبجي وياه هذا الممثل يكون ناجح مادام اثر بيج لهذا راح تابعين كل افلامه..

سيلين : زين اذا فاشل شلون نعرفه اكيد من تمثيله مو صح..

ادهم : الممثل اللي يعتمد على قوه عرض الازياء والجمال والاغراء وماكو محتوى بتمثيله هذا راح يفشل واللي يتبعه قله من المراهقين اللي يحكمون على المقابل من سعر حذائه مو على عقله وثقافته.

سيلين : اووووف شكد اكو هيج نماذج عدنه بالدوام.

ادهم : شوفي هذا المشهد وراها احجيلج عنه ولو خلص الفلم وكلشي ما فاهمين منه بس شفتج بالج مو وياه كلت احجيلج.

سيلين : انت اساسا طالع علمودي لا اصدقاءك ولا ابد..

ضحك ..

سيلين : عبالك من اجيت وكتلي على الطلعه باوعت على الزوليه مباوعت بعيني.

ادهم : لا صدك انه هيج سويت.

سيلين : اي عرفتك تكذب يا عمو المحتال.

ادهم : هههههه يله بله ،
المهم هذا المشهد يعتمدون بيه على لغه الجسد يعني الممثل يمثل المشهد بتعبيرات وجها ولازم يكشف عن حالاته الشعوريه ضمن سياق الاحداث اذا ضبطها بشكل متكامل فهذا المشهد راح يفوق المشاهد الكلاميه ويعتبروه المخرجين اعظم من المشاهد الحواريه يسموه مشهد الصمت  ...

سيلين : يعني الممثل هم اله علاقه بلغه الجسد...

ادهم : اكيد لازم يدرس يلا يدخل هذا المجال من يوكف على المسرح يشكل نبره صوت تكون واضحه ويستعمل الراس والعين وايده ورجله بالتعبير عن المشهد ولازم تكون كل حركاته عفويه مو مصطنعه هيج يلا ينجح وياخذوه للتمثيل .

سيلين : هذا هم دراسه انت.

ادهم : اي طبعا كله ضمن دراستي اساسا اطروحتي موضوعها جان حول لغه الجسد.

سيلين : عمو انت بحر من العلم من اسولف وياك ابد ميعجبني تسكت مرات اتمناك تحجيلي للصبح بس استحي واسكت.

ادهم : كلشي احجيلج وكلشي اعلمج بس اريدج قويه وللعلم ايفين هم بلشت وياها صارلي شهر .

سيلين: هاي شنو من شوكت عيني من ورايه...

ادهم : مصار النه هواي واكتشفت ايفين شخصيتها اقوه منج بس عدها كم ثغره وكاعد اشتغل عليها وتستجيب اسرع منج..

سيلين: وهاي اني وين عنكم.

ادهم : مرات انتي نايمه لو تدرسين وتجيني.

سيلين : حلو عاشت ايدك

ادهم : وايدج تره خلص الفلم.

سيلين : هههه فهمت شي منه..

ادهم : لا هاي شبيج انه مو صلح ويه الافلام العربيه.

سيلين : ولا اني ههههه

ادهم : يلا امشي نطلع نتعشى ونرجع ورانه دوام.

سيلين : تمام..

طلعنه ورحنه تعشينه ورجعنه للبيت..

مرت الايام واجتي امتحانات اخر السنه وامتحنت الحمد لله وكلش زينة اخر يوم الامتحانات كملت من وكت وطلعت بره الكلية حبيت اشتري كم شغلة اليه ولأيفين اجتي بنيه كالت اكو بنات يريدوج بره من طلعت مالكيت احد سألتها وينهم كالت راحوا ، و دكتور ادهم يريد يحجي وياج استغربت ادهم شيريد مني بهذا الوقت والادري بيه عنده محاضرة وشنو البنات يريدوج ومن اطلع تكولي ماكو دخت ، طلعت اشرتلي على السايد الثاني البيه كراج مال سيارات عبرت ورحت للكراج..

ايفين..

كاعده اقره فيزياء ومندمجه دك موبايلي باوعت عمو ادهم جاوبته..

ايفين : الو هلو عمو.

ادهم : سيلين رجعت للبيت ؟؟

ايفين: لا غير وياك ترجعون سوه كل يوم.

ادهم : لا ياالله كلبت الجامعه عليها ماكو.

ايفين: خاف بعدها تمتحن.

ادهم : يا امتحان يضل ساعه وحده وهيه يوميه تجيني قبل ال ١١.

ايفين: عمو خاف ويه صديقاتها..

ادهم: منيلها صديقات وهيه مكابلتني وكاعده روحي خل ادورها بس اذا اجتي خابريني.

ايفين : ماشي..

اول شي عادي كلت شو وين راحت وهسه تجي مرت اول ساعه اتصل عمو اعصاب سأل ها اجتي كتله لا ..
صارت ساعه ٣ ونص طب يفور من الاعصاب متوتر وقلق رحت يمه سألته

ايفين: ها عمو بشر.

ادهم : شبشر فص ملح وذاب.

حجاها وضرب ايد بيد

ايفين : عزززه بعيني يعني شنو اختي وين؟

طبت امه وكفت تباوع على عمو ادهم وكلش ضايجه طبعا هاي الفتره العدت تروح وترجع يعني تضل يمنه ٣ ايام وترجع ويه ايمن لو ويه نرمان بس معليها بينه ابد ولا توصل لبيت عمو ادهم كله فوك حتى هو اذا راد يروح يم امه يصعد يمها ..

وره ساعه اندك الباب طلع عمو فتحها سمعت صوت مو غريب عليه باوعت من الشباك فهد لابس زي عكسري وبسطال وبصفه عمو ادهم يشرحله وشكله كلش تعبان وايده ترجف وفهد عينه بالكاع ومخنزر يستمع للكلام ويهز راسه متفهم ، بعدين فاتو للهول واني رحت وكفت بالممر اليم غرفتنه اسمع.

فهد : خابرتها

ادهم : ماعدها موبايل

فهد : ليش

ادهم : متحبه.

فهد : متحبه لو انت متسمحلها.

ادهم : انه اشتريتلها واحد واختها هم عدها بس بعدين تمرضت وسحبته منها

مكال اله هيه كسرته اعتقد محد يدري بحاله سيلين معقوله نرمان وايمن محاجين لاهلهم..

فهد : غير تشتريلها واحد هسه شلون نعرف هيه وين

ادهم : ما اشتريلها.

فهد : انت بيا عصر عايش متكلي اكو بنيه جامعيه مابديهة موبايل.

ادهم: اختصر الكلام وشوفلي حل عمم صورها على السيطرات شغلتك هاي ما اكعد اعلمك انه.

فهد : ليش عصبي وتصيح عليه قابل انه خطفتها.

نتر بيه..

ادهم : لتداهرني فهد .

فهد : خلص نروح للكليه ونراجع الكامرات ونشوف الكامرات القريبه من كليتكم بلكت نلكه خيط يدلينه بيها..

ادهم : يلا امشي..

راحو واني ضليت ابجي وافرفح على اختي يعني بيها شي الموضوع مو سهل يارب سترك..

يتبع.