جذبني فمك البني

البارت السابع والعشرون

انا ذاك الغريب التوجعه الناس

انا اليذكر هله على مرورت الكاس

انا الجبرته الغربه على المواويل

انا اللا ياخذه الله ولا يخليه

انا المايدري وين يسولف البيه

انا المايدري باجر عدمن يبات

انا الدكه الوكت والعوز بهداي

__________________

نرمان : لو بس اعرف ليش متقبل تنطيها المره صار اكثر من مره اجتي عليها..

ادهم : ما انطيها بكيفي ومحد اله يمي شي...

نرمان : يعني شنو تخليهن كبالك..

ادهم : هيه المن رايده ؟

نرمان : رادت سيلين وبعدين من عرفت ايفين هم موجوده اجتي وشافتها كالت اي وحده عادي..

ادهم : ثنينهن ما انطيهن..

نرمان : يعني ليش غير افهم..

ادهم : بكيفي مو لازم تفهمين..

نرمان : يعني شنو ؟

ادهم : ثنينهن صغار وعدهن دراسه على شنو اكسر ظهرهن بزواج واطفال ومسؤوليه ليش هنه شنو شافن بحياتهن اساسا انه كاعد اعيد تربيتهن وحده شخصيتها ضعيفه ومهزوزه والثانيه صلفه وتسوي اللي براسها ومتسمع كلام الكبير تردين ازوجهن ويرجعوهن عليه بعدين ...

نرمان : بس سيلين زينه العقل ومؤدبه وام بيت مو هيه شايله بيتك وبنتك اكيد ويه زوجها هيج راح تصير..

ادهم : وهاي بالذات ما انطيها..

نرمان : صدك تحجي.

ادهم : موضوع مو مال شقه ف اكيد صدك احجي..

نرمان : لعد شكوول للمره صار اكثر من مره تجي..

ادهم : كليلها محجوزات..

نرمان : هاي شلك بيها المن محجوزات..

ادهم : انتي وين تردين توصلين ومن يمته وجاي تلحين ويايه على شغلات انه ما مقتنع بيها..

نرامان : مو انت بهيج حاله راح تكسر بختهن اذا طششنه بالمنطقه هنه محجوزات ميكولون المن..

ادهم : كل وحده تجي قسمتهة بالوقت المناسب وانطيهن لتخافين بس بعد ما اشوف شهايهدن بيدهن علمود باجر عكبه التزوجه اذا طلع مو رجال تكدر تعتمد على نفسها ومتحتاجني بشي ..

نرمان : قابل راح تتخله عنهن اكيد لا..

ادهم : انتي تعرفين الرابطني بالعراق وباقي ومتحمل الوضعيه هنه البنات انه لو مو هنه جان مسافر ومستقر هناك عندي شقه وبس افتح حلكي يكيفون اتعين بأي مكان يعجبني واخلي مريم بأحسن المدارس واحسن تعليم ..

نرمان : اي زوجهن وروح وين المشكله..

ادهم : ازوجهن ماشي اجي وياج اذا رحت وعفتهن وعرفو ازواجهم بمشكله امهن وسوالف عمامهن وماعدهن اهل وسند شراح يسوون بيهن برأييج من تحجين شي فكري ب ابعاده يا دكتورة المستقبل..

نرمان : ماعرف شكلك..

ادهم : لتكولين شي سدي الموضوع وخليني اكمل محاضرتي ....

نرمان : ماشي اقره بس ارجع واكلك خوش قسمه.

ادهم : شلون عرفتي خوش قسمه عشتي وياهم عاشرتيهم..

نرمان : مبينين..

ادهم : كلنا بالمضاهر خوش وزينين بس اغلبنه يخفي مساوء ما تنعرف اله بالمعاشره

نرمان : هم صح قنعتني..

ادهم : روحي كملي دراستج وخليني اكمل البيدي وعوفج من البنات انه مخطط مستقبلهن واذا الله راد وخلاني عايش امشيهن على هذا المنهج..

نرمان : الله يطول بعمرك ويريح بالك مثل ما داير بالك على ذني اليتيمات..

ادهم : ممنون..

من خلصو الكلام رحت للمطبخ ركض خاف تفتح الباب وتشوفني اسمع ، كلش ما احب هاي الفقره بس لان شي يخصني وكفت سمعت وبعدين كلش تندمت المفروض ما اسوي هيج ...

ضليت حايره شسوي اخر شي رحت للغرفه كلت اقره طلعت ملازمي والدفاتر وفرشتهن بالكاع ..

سيلين : افونه نصي التلفزيون حبابه اريد اقره.

ايفين : روحي بمكتب عمو فد هدوء ويسوي واهس الكرسي مريح والمكتب شكبره تقرين براحتج.

سيلين : وانتي تقرين هناك ؟

ايفين : فتره الصبح اللي انتو بيها بالدوام اني اقره بغرفه المكتب ومن اكمل ارتبها واطلع.

سيلين: بس تره عيب ميصير تدخلين بغرفته وهو ميقبل.
ايفين : شمدريج ميقبل ؟

سيلين : وانتي سألتيه استأذنتي منه يلا كعدتي لو بكيفج.

ايفين : ها راح تسويها سالفه عليه ..

سيلين : مو قصه سالفه بس كلشي واله حدود تقبلين واحد غريب يدخل غرفتنه ويكعد بيها واحنه مندري..

ايفين : بس احنه مو غربه.

سيلين : لا غربه

ايفين : انتي ليش مصره تبقينه غريبات رغم القرب مال عمو وايمن من عدنه وحتى نرمان احسها قريبه ..

سيلين : من تبتعدين عن فكره همه مو غربه وصرنه منهم راح تشيلين هواي حواجز بعلاقتج بيهم واني ماريد هاي الحواجز تنشال..

ايفين : يعني شنو قصدج ؟

سيلين: قصدي واضح ايفين علاقتنه بيهم مثل ما جانت عمه معلمتنه عمو ادهم زوجها وايمن حماها ومثل اخونه غير شي طلعيه من راسج..

ايفين : الله يرحمها بس اني مكتلج نتقرب منهم بشي زايد عن حده..

سيلين : الميانه تولد هواي امور تشوفيني اني على كد السالفه ويه ايمن ما اتعمق زايد ..

ايفين : بس علاقتج بعمو ادهم قويه.

سيلين : قويه صح من باب عالجني هواي ونكعد سوه هواي ونقضي وقت طويل سوه بس ابد ما اتجاوز حدي لا بالشقه ولا بالميانه وهو هم نفس الشي..

ايفين : شنو اليمنع اتصرف مثلج ويه ايمن ..

سيلين : ايفين على شنو تقوين علاقتج بيه تره ايمن مخالج باله هسه صح حجه ويه عمو حجايه بس راحت انتهت بسالفتج الاخيره وحتى وان تصلحت الامور ورادج بيوم من الايام راح تضل هاي السالفه بينكم ومستحيل ينساها والثقه معدومه بينكم يكوم يشك بيج وحتى يعيرج لهذا استبعدي ايمن حتى لو جان اكو حب بكلبج اله.

ايفين : يعني انتي هذا رأييج.

سيلين: اي .

ايفين : ماشي ..

سيلين : هسه مابيج امل تطفين التلفزيون.

ايفين : لا انتي طلعي اقري بره حبابه اريد امدد اليوم كعدت قريت هواي وكلاتي كامت توجعني..

سيلين : يا حياله دومج مقشمرتني.

ايفين : دكومي الله عليج.

سيلين : كمت كمت..

ايفين : وياج طفي الضوه..

سيلين : ماشي..

لميت غراضي وطلعت رحت بالهول فرشت بالكاع وكعدت اقره وكل شويه يجي ابالي الموضوع وافكر يعني عمو لهدرجه يحبنه ويخاف علينه شكد كبر بعيني من سمعته هيج يحجي ويه نرمان بس القهرني من كال اني ضال هنا علمودهن وضلت هاي الحجايه تدك بكلبي.

ضليت اقره تقريبا ساعتين وشويه انفتح باب غرفته مال مكتب وكف بالباب ومطه جسمه شافني ابتسم.

ادهم : تكسرت تكسر.

سيلين : الله يساعدك اني هم كاعد اقره ..

ادهم : صعبه الماده ؟

سيلين : لا زينه نوعا ما بس المشكله قسمي ماحبه لهذا اقره بدون واهس.

ادهم : ماتصورت يطلعلج خليناه بالخانات الاخيره.

سيلين : موزين طلعتلي كليه كلت معهد ما احصل ..

ادهم : لو ادري بيج الج واهس اخليج تعيدين السادس وادخلج خصوصي واساعدج تطلعين معدل عالي..

سيلين : كافي دخلت ايفين خصوصي وان شاءالله هيه تعوض من توصل للسادس..

ادهم : وانتي هم كملي دراسات مثل ما كتلج.

سيلين : الله كريم منا لذاك الوكت..

ادهم : الله كريم ، مريومه وين مشفتها.

سيلين : جانت يم ايفين وبعدين راحت يم ايمن.

ادهم : روحها بعمها صايره تجي من الروضه كبل تروح يمهم..
سيلين : مو هو مدللها يشتري ويودي ويجيب..

ادهم : اي صح يلا كملي عطلتج ..

سيلين : لا عادي خلصت ما ضل شي.

ادهم : براحتج..

عافني وراح رجعت اقره ورة شويه سمعت صوت تكلاه سديت كتبي ورحت للمطبخ لكيته واكف يكلي..

سيلين : هاي شنو عمو ليش انت تسوي اكل جان صحتني.

جان لازم يده الطاوه بيد وايد الثانيه لازم الخاشوكه ،،، كاف ردن التراك ومبتعد عن النار حتى ليطفر عليه زيت باوعلي وكاش وجها من الحراره.

ادهم : سيلين شنو الفرق تره عادي اسوي اكل تدرين انه كضيت حياتي بالغربه تعرفين كم سنه عشت وحدي عشر سنوات لا يوم ولا ثنين جنت اطبخ واغسل مواعين وملابس وانظف..

سيلين : اي جان ماعندك احد هسه احنه موجودين.

ادهم : وانه عاجبني اسوي شلون.

سيلين : عمو ارتاح الله عليك انت هواي تتعب واكف على رجلك وتنطي محاضرات وتحجي هواي واليوم اكيد منمت..

ادهم : صح ما نمت بس منو كلج الراحه بالنوم؟

قبغ الطاوه وخله الخاشوكه بالماعون وكعد على الكرسي مال ميز الطعام.

سيلين : اكيد الراحه بالنوم لعد الواحد من يتعب غير ينام..

ادهم : هههههه لا اكبر كذبه بالدنيا الراحه ..

سيلين : ليش ؟

ادهم : لان ماكو راحه بالدنيا..

سيلين : عجيب شلون يعني..

ادهم : مره قريت مقوله وكلش عجبتني وشفتها صح..

سيلين : شنو مكتوب بيها ؟

ادهم : ملخص الكلام ، التعب هو الطريق للنجاح وللراحه وضروري تؤمن ان الراحة هيه مضره للصحه ، بالاخير هيه قناعه وانه جربتها وشفتها صح مو لان انه اريد اشتغل او ادرس او اطور روحي مجبور لا بس انه من اسوي هيج احس براحه عميقه لان كاعد اشتغل على نفسي اطور عملي الخاص بيه اشتغل بيتي اخدم نفسي اشوف احتياجات بنتي الشغل راحه نفسيه وصحه ..

سيلين : زين عمو غير ترتاح انت هواي تتعب يعني بالدوام ومن غير مسؤوليات البيت مسواك وغيرها ...

ادهم : راح الخص كلامي بجمله وحده...

سيلين : تمام..

ادهم : القلب يضخ دم اربع وعشرين ساعه علمود نعيش اذا توقف ثانيه وحده ويرتاح يموت الانسان مو صح.

سيلين : صح الصح.

ادهم : اذن الجسم والعقل والقلب كله مخلوق للتعب مو للراحه الراحه مو للأنسان ابدا الراحه عباره عن كذبه كبيره نسمع بيها ومنشوفها جانت امي قبل تحجيلنه شوكت تكبرون حتى ارتاح واتفرغ لنفسي من اشوفكم معتمدين على نفسكم هههه كبرنه وزاد همنه ومسؤوليتنه صارت اضعاف ماعدنه نقنع بلفات بسيطه تسويها النه ولا ملابس تصغرها ولا مصروف قليل كمنه نريد اكثر لان صرنه شباب ،

صح الوالد متمكن بس ما ينطي فلوس اله شي ضروي مثلا دراستي صرف دم كلبه عليه بس خلي فهد يطلب فلوس علمود سياره حديثه لو يموت ما ينطي اله صار شغله الخاص وراتبه كام بكيفه يصرف..

سيلين : حلو الله يحفظكم عجبني الكلام ..

ادهم : عجبج وحد وتطبيقه وحد..

سيلين : اكيد اطبقه ولو ههههه..

رحت للطاوه شفته شمسوي ضحكت..

سيلين : هاي فطر وشنو خال وياه..

ادهم : بصل وفلفل اسود وكركم وملح.

سيلين : اسوي شي وياه ..

ادهم : ماعرف شنو عاجبكم انه سويت هواي منه انتو اذا متحبوه سوي غير شي هاا اوكفي انتي ممنوع عليج نسيت ..

سيلين : عمو ريحته دكت بخشمي .

ادهم : سيلين ابد كوه صرتي زينه عندج دوام.

سيلين : مابيك امل تغلس عني شويه.

ادهم : يعني مصره تاكلين ؟

حجاها وميل راسه بحنيه..

اني هم ميلت راسي وغمضت عيني ..

سيلين: اي كلش ضروي ههه مبين كلش طيب..

مجاوبني فتحت عيني لكيته خال ايده على شواربه ومنتجي على الميز بعكس ايده ومضيق عينه ويباوعلي.

سيلين : شهالنضره التحليليه هاي عمو هههههه.

ادهم : جاي تبالغين .

سيلين : عزه بشنو.

ادهم : بالمديح .

سيلين : لا ما ابالغ مبين طيب..

ادهم : اكو فرق بين مبين وبين اكلتيه وشفتي طيب لو لا..
سيلين : عمو شكد تدقق.

ادهم : ماحب التملق.

سيلين : يعني من كتلك الاكل مبين طيب تملق هذا.

صدك ضجت وعقجت وجهي..

ادهم : كايلج من صفاتي اكره المجاملات بكل انواعها خصوصا اللي ترضي الناس ، لهذا يا سيلين مره ثانيه اذا سويت شي ضوكيه يلا انطيني رأييج.

سيلين : قهرتني تدري بعد ما اتعشه.

ادهم : تردين اجاملج انه ما اجامل.

سيلين : ياالله شكد صعب انت.

ادهم : مو صعب وانما واقعي وبعيد كل البعد عن التملق ماحبه ..

سيلين : مممممممممم اسكت احسن.

ادهم : شوفي استوى..

سيلين : ماشوفه ولا اكل منه.

ادهم : براحتج اساسا انه من الاول ما راضي تاكلين منه عشاج خفايف.

باوعتله ورحت للثلاجه طلعت لبن زبادي وكعدت اكل التفت عليه باوعلي وضحك.

سيلين : عبالك تبجيني تعودت على سوالفك واستفزازك .

ادهم : هيج الانسان من يكون صريح يضوجون منه.

سيلين : شلون صراحه تنطيها بالوجه.

ادهم : وجه واحد افضل من يوميه مبدل وجه علمود ارضي المقابل وهذا اعتبريه درس بسيط لتجاملين احد بشي اذا ما متأكده منه صدك يستاهل..

سيلين : صار منا وجاي كله انطياك بالوجه.

ادهم : وهذا المطلوب..

سكتت كملنه العشا اني سويت بس زلاطه لان هواي مسوي رحت صحت ايفين وطلعت بره صحت على مريم ونرمان نزلو الدرج واني جنت واكفه نهايته باوعت لنرمان وكتلها..

سيلين : ايمن ميتعشى ويانه.

نرمان : يكول ماكل .

سيلين : براحته يلا تعالو عمو منتضركم ...

دخلنه للبيت همه راحو للمطبخ واني كعدت كملت دراسه رحت للحمام غسلت وباوعتلهم من باب المطبخ ..

سيلين : راح انام محتاجين شي..

كالو لا ...

سيلين : ماشي تصبحون على خير..

انداريت اريد اروح سمعته كال.

ادهم :باجر سته ونص ..

التفتت عليه ضحكت وهزيت راسي ب اي هو هم ابتسم بس جان مدنك على الاكل ، رحت نمت وثاني يوم كعدت من وكت طلعت من الغرفه ردت افوت للحمام جان مشغول رحت كعدت بالمطبخ انتضرت طلع عمو وياه مريم كافه ردنها وجها مبلل واكف يمسح وجها بالخاولي كمت رحت يمهم .

سيلين : صباح الخير.

رفع راسه مبتسم ..

ادهم : صباح النشاط يابه ..

سيلين : ليش انت تبدل الها جان انتضرتني.

ادهم : سيلين يوميه مريم تروح يلا انتي تكعدين.

سيلين : غير معتمده عليك انت لو تخليها عليه..

قاطعني ..

ادهم : يوميه اخليها تغيب.

سيلين : يا ههه اني وين كلت هيج قصدي اني ابدل الها واريكها..

ادهم: خلي الجاي على النار بين منجي..

سيلين : اخلي الجاي واجي ابدل الها انتضرني..

راحو كدامي واني رحت للمطبخ خليت الجاي على النار ورحت لغرفتهم دكيت الباب جان شويه مفتوح سمعت صوته كال..

ادهم : تعالي ..

دخلت جان ديلبسها القميص..

سيلين : انطيني اكمل الها ..

كام وفسحلي المجال كعدت بدلت الها ومشطتلها ورحنه للمطبخ طلعت اجبان وسويت بيض كعدنه نتريك ،
دك هورن الخط مال مريم كامو ثنينهم شال جنطتها من على الكرسي ولزم ايد بنته وطلعو يمشون بهدوء ،،،ورة شويه رجع وكف يم الميز اخذ كوب الجاي شربه وخلاه على الميز وفات للحمام وراها راح للغرفه يبدل واني غسلت المواعين على السريع ورحت للحمام طلعت ورحت للغرفه باوعت ساعه سبعه ضبط بدلت على السريع سبعه وثلث كملت ماعندي شي لا مكياج ولا تأخير بس البس اخذت جنطتي والملازم وطلعت انتضرته بالهول طلع باوعتله ضحكت..

ادهم : هااا شنو شفتي وضحكج....

سيلين : قاط جديد اليوم ورباط وكذا..

ابتسم وسد الباب مال غرفته كال.

ادهم : اليوم معزوم على غده واريدج تجين ويايه.

حجاها ومشى لغرفه المكتب فتت وراه جان يلم بالاوراق مال طلاب وخلاهن بالجنطه وكفت يمه كتله..

سيلين : بس اني استحي بصفتي شنو جايه وياك..

ادهم : وانه اريدج تجين علمود امحي صفه الخجل منج..

سيلين : استاذ الله عليك لتسويها بيه.

ادهم : استاذ هههه بالدوام يوميه اعيد عليج لتكولين عمو كدام احد وانتي حتى من اجي اخذكم محاضره توعويه واكعتلي دك عمو ماعمو بلبيت كمتي تصيحين استاذ..

سيلين : خو انت متفوت شي واحد يغلط شلون..

ادهم: المهم اريدج ويايه ويلا تأخرنه..

طلع كدامي واني وراه طلعنه من البيت صعد بالسيارة واني هم صعدت مشينه والتفتت عليه كتله.

سيلين : حباب لتحرجني..

ادهم : زين فرضي عفتج بالجامعه منو يرجعج وانه اتأخر يعني اطلع قبل المحاضره الاخيره وماعرف وكتي شوكت ارجعلج .

سيلين : انتضرك حتى لو ل ٣..

ادهم : لا تجين وياي ماريد اتقيد ويضل بالي..

سيلين : ماشي هذا هو براحتك..

رحنه للدوام هو راح لبنايتهم واني رحت لقسمي ساعه عشره ونص رحت صعدت فوك لكيته توه كاعد يرتب بسوالف الريوك..

سيلين : تأخرت عليك اليوم الاستاذ اخذ الريست مالتنه .
بدون ميباوع كال

ادهم : انه هم التهيت مصار شي يلا تعاي نتريك..

رحت كعدت كتله..

سيلين : بس هاي خيانه يعني ناوي تتريك وحدك اليوم.

رفع عينه باوعلي ورجع دنك يرتب .

ادهم : اتصلت على القسم كالو خلصتو محاضرات..

سيلين : هههههه هاي شنو .

ادهم : لعد شسوي قابل اجيج للقسم شيجيبني..

سيلين : اني لو احب سوالف الموبايلات جان اشتريت وخلصتك من هم الانتضار بس مشكلتي ماحبهن هههه.

ادهم : ولا انه عاجبني تشترين ، لان يأثر عليج.

سيلين : ليش مو صرت زينه

ادهم: صرتي زينه لان تركتي كل الالكترونيات اذا ترجعيلهن احتمال ترجع عندج الحاله ومابينه حيل.

سيلين : اي فعلا تعبت وتعبتك ويايه.

ادهم : رجعنه لنفس السالفه يلا اكلي .

سيلين : اليوم ماكو جاي..

ادهم : شربت قبل لا تجين وهسه وصيت شويه ويوصل...

تونه بلشنه ناكل اجه الجاي تريكنه كملت وكفت حتى اروح كال.

ادهم : سيلين اخر محاضره ضربيها.

سيلين: هلوو خوش استاذ تشجع على الغيابات.

ادهم : تره متفقين من الصبح انتضرج لتغلسين ..

سيلين : ماشي هههه.

طلعت رحت للقسم خلصت محاضراتي ضلت اخر محاضره توني اريد اطلع اجه الاستاذ دخل ، يبوو على الحظ شلون راح اروح ،،،

كعدت واهز برجلي بلشت المحاضره كل شويه اكول راح يخلص هسه يخلص كملها يلا طلع ،

اخذت غراضي على السريع وطلعت رحت لغرفته ملكيته توني اريد انزل هو صعد صار كبالي باوعلي جان ضايج كلش بس من شافني مابين هو ضايج حجه بنبره هادئه.

ادهم : يلا نروح لو عندج شي بعد.

سيلين : لا ماعندي..

نزل ونزلت اني هم مشينه وصلنه للسياره نزع سترته خلاها على الكشن ليوره واني خليت كتبي صعدنه اول ماكعد التفتت عليه .

سيلين : مو قصدي اتأخر اعتذر .

ادهم : ماكو داعي تعتذرين.

سيلين: حسيتك ضجت.

شغل السياره وكال.

ادهم : لتمشين وره احاسيسج لان اغلبهة راح تخدعج.

سيلين : يعني انت مضايج.

ادهم : ليش الموضوع يسوه اضوج نفسي عليه.

سيلين : بس مبين على وجهك ضايج.

التفتلي ورجع التفت يسوق كال

ادهم : لازم مكتوب على وجهي ضايج.

سيلين : مو بس انت تعرف المقابل اني هم كمت اعرف.

ادهم: جيد مبروك.

سيلين : هههه على شنو مبروك تره عادي اذا عاتبت شي طبيعي تكلي سيلين ليش هيج سويتي ليش هيج خليتني انتظرج واحنه متفقين واني اجي ابرر..

ادهم : لان اكره التبريرات لهذا اتجنب العتب..

سيلين : صدك يعني متحب التبريرات..

ادهم : كلشي يدخل بيه الكذب ما احبه.

سيلين : زين شمدريك اكذب جوز صح اني تأخرت بسبب ظرف صار.

ادهم : كتلج ماحب العتب بكل انواعه ولا احب المبررات..

سيلين : ماشي فهمت ..

ساق السياره وضل ساكت فكرت شنو معنى سكوته اذا جان مضايج فعلا،،،
هو كل يوم عادي يسولف على موقف صار وياه او على شغله ضايج منها واني هم اسولف بس اليوم ضل ساكت اني هم سكتت وصلنه للمطعم دخلنه كلي انتضري هنا وكفت وهو راح حجه ويه الولد صاحب المطعم جان خال النضاره على شعره وسترته شايلها بيده وتك ايده بجيب البنطرون..

اشرله الولد التفت ضيق عينه وباوع على مكان اللي اشرله عليه ابتسم للولد وتشكر منه رجعلي كال ..

ادهم: يلا هناك منتضرينه.

باوعت هوواي عالم ومطعم جبير مشيت وراه وصلنه يمهم جانو ماخذين زاويه من المطعم بعيده عن الناس ، وطابكين ميوزه ثنين جانو مجموعه من الاساتذه وحتى استاذات توترت كلش ، هو سلم وسحب كرسي اليه كعدت عليه وهو هم كعد ...

_ تأخرت يا استاذ ادهم.

ادهم : صارت شغله اخرتني.

_ يلا نوصي لان متنه جوع ..

ادهم : عبالي متغدين وكلت بس انه ضليت ..

_ لا شلون اكيد ننتضرك.

ادهم: تسلم استاذ جعفر..

طلبو اكل التفت عليه وقرب راسه مني وبيده المنيو ،، وكال..

ادهم : شنو اطلبلج كله دسم ولحوم ..

همست بصوت ناصي..

سيلين : مو مشكله اكل بلبيت ..

ادهم: لا راح اطلب تكه دجاج وشوربه شتكولين.

سيلين : تدري مليت منهن ..

ادهم : بالمقابل صرتي زينه..

سيلين : صح.

ادهم : هسه شنو هاهيه.

سيلين : هاهيه ..

عدل كعدته وطلب اكل النه ثنينه .

ضل يحجي ويايه على الاكل والنظام الغذائي رفعت راسي لكيت ثنين اساتذه عينهم علينه دنكت وهمستله..

سيلين : عمو اجل النقاش بعدين لان العين علينه.

باوعلي ورفع عينه عليهم..

سيلين : لتباوع شبيك هسه يعرفون اني كتلك..

ادهم: ويعرفون شنو يعني ..

سيلين : عيب عفيه.

ادهم : عيب اذا باوعت بس مو عيب اذا همه خلو بالهم يمنه وكعدو يفسرون بكيفهم شوفي انه اخر همي واهتماماتي الناس ..

سيلين : ذوله اساتذه مو اي ناس وخاف تطلع علينه حجايه.

خزرني دنكت..

همس من بين اسنانه.

ادهم : ضلي خاف وخاف وكلشي احجيه وياج بالحايط.

سكتت اجه الاكل كتله.

سيلين : راح اغسل واجي .

ادهم : انتضري اجي وياج.

سيلين : وين ويايه..

رفع حاجبه ثنينهن.

ادهم : شلون ما اغسل ..

سكتت ومشيت كدامه دخلت للحمامات طلعت لكته كاعد على كرسي من الميوزه الفارغه شافني كام واجه يمي..

ادهم : كملتي.

سيلين : اي.

ادهم : تعاي ارجعج واروح اغسل.

رجعني كعدت وراح غسل ورجع كعد...

بلشنه ناكل والاساتذه يسولفون بينهم يسألوه يجاوب ب اي او لا اعرفه ميحب يحجي هواي من ياكل من شافوه يجاوب مختصر بطلو يوجهوله اسئله..

كملنه اكل و رحنه غسلنه ورجعنه كعدنه وصو على جاي شربنه وبلشو يحجون بشغلات هواي وبسوالف الاقسام عده مواضيع انطرحت وعمو ساكت يستمع اخر شي استاذ بيهم يطلع عمرة ٤٥ سنه حجه قصه حياته كلها بس بيها هواي احداث مميزه وشغلات تدل على مدى ثقافته ومبين من عائله راقيه ، سولف هواي اخر سالفه حجاها،،، عمو ميل جسمه وصار قريب عليه همس بصوت ناصي وعينه على الاستاذ ....

ادهم : سيلين شوفي شلون يكذب.

ابتسمت والتفتت عليه ردلي الابتسامه وكال..

ادهم : ديري وجهج لينتبه...

سيلين : شلون عرفته يكذب واني الفضول عندي يقره الف..

راد يضحك بس خنكها كال بصوت ناصي.

ادهم : شوفي وجها صار احمر .

سيلين : ليش؟

ادهم : لان متوتر وخايف تنكشف كذبته كصته عركت جسمه متصلب ومكاعد يسيطر على حركه ايده رجفه بيده عبالك بردان ..

سيلين : مو شرط جوز صدفه..

ادهم : راح ارجع اسئله بس اكلب الموضوع وانتبهي على حركاته ...

سيلين : شيسوي يعني ؟

ادهم : راح يرتبك ويمسح كصته بالكلينس وتتغير الاحداث عنده ..

سيلين : مثل شنو ؟

ادهم : هو ذكر هواي احداث وهواي سنوات راح اكله على الحدث الصار ب ٢٠٠٨ ..

سيلين : ماشي ..

ابتسمت بخبث هههه صرت خبيثه واحس ثنينه خبثاء..

سأله عمو على نفس الحادثه الصارت ب ٢٠٠٨ وفعلا نسى الحدث وكام يحجي باحداث ثانيه ابتسم عمو ادهم وكتف ايده التفتلي كال..

ادهم : شفتي اليكذب ينسى جذباته هاي صار ساعه نسى شنو حجه لو نسأله باجر شيسوي...

سيلين : ههههههه بس جوز الباقي صحيح وبس بهاي كذب..

ادهم : لا لا حتى الحجاه قبل شويه كذب .

سيلين : معقوله استاذ بعمره يكذب هههه..

ادهم : هسه راح أأكدلج كلامي هو يكذب..

سيلين : لا عوفه عيب الله عليك لتلح وياه..

ادهم: معليج سمعي راح اسأله على المكان الي اشتره منه السيارة راح يباوع بمكان فارغ مابيه احد ويتجنب يباوع بعيني ....

سيلين: زين ليش هيج يباوع جوز حركه لا اراديه..

ادهم : لا اليكذب يتجنب يباوع بعين المتلقي وراح يبحث عن مسافه من الفراغ علمود ينتج صوره خياليه ويصدكها ويجبرنه نصدك وياه.

سيلين : دعوفه يمعود هههه..

ادهم : استاذ من وين اشتريت هاي السياره واريد تذكرلي مواصفاتها بالمضبوط عجبني ابدل سيارتي سويلتي واهس..

ضحك الاستاذ ودنك على المائده وبلش يحجي وعينه ابد محطها بعيون ادهم واني كوه صبرت روحي ما اضحك..

رجع همس ..

ادهم : باعي راح اسأله عن اسم المعرض الجاب سيارته منه وشوفي شلون راح يضيق عينه ..

سيلين : زين ليش يضيق عينه هههه.

ادهم : عود يتذكر وكذا ...

سيلين : عمو انت مو مال واحد يكعد ويسولف كدامك تفصله تفصيل..

ادهم : خطيه وذوله مصدكين...

سيلين : تره كاعد يشرحلك جاوبه خطيه..

ادهم : ما سمعت راح اخليه يعيد..

سيلين : عمو خطيه صدك تحجي عوفه.

مجاوبني وجه السؤال للدكتور ..

ادهم : دكتور انه ماسمعتك من البدايه صار عندي شرود شويه ممكن تعيد..

ضاج وجها راد يطك رجع يسولف من جديد وعمو كل شويه ينبهني على شي..

ادهم : باعي راح اسئله سؤال وبما انو كلامه هواي وكذب راح يكلي ما اتذكر ويكوم يتأتأ بالكلام..

وفعلا سأله وجاوبه..

_ ماعرف صار هواي قابل اتذكر كلشي..

ادهم :شفتي لان عباله صدك ممركز عاد الكذبه بهمبله هههه...

سيلين : كارثه انت حتخبلني زين شلون عرفته يكذب..

ادهم : اول شي ميباوع بعيون الكاعدين يشتت نضره منا ومنا كل شويه يخلي اصبعه يم حلكه لو يلعب بشاربه لو يحك منطقه القريبه من حلكه مرات يحك لحيته او يضل لازمها ..

سيلين : جوز لزم حلكه بحركه لا اراديه مو شرط يكذب..

ادهم : مو الحركات اساسا تظهر بصوره لا اراديه يعني مو هو يفتعلها والكذب يسبب قلق وتوتر داخل الانسان لمس الفم او جزء منه ولمس الفم عباره عن حاجز يحدث بلا وعي لان سبق وكتلج الفم هو مصدر الكلمات الكاذبه وغالبا يرفع عينه ليفوك يباوع للسكف ولازم اسفل الذقن هاي هم حركه تدل بأن الرجل يكذب..

سيلين : زين متخاف من تعلمني.

التفت عليه وباوعلي مضيق عينه.

ادهم : وليش اخاف ؟

سيلين : خاف اكشفك يعني.

ادهم : وليش اكذب عليج ميحتاج انه صريح..

سيلين : مرات الدنيا تجبرنه نكذب..

ادهم : ساعتها اكون مفتح وياج وماخليج تحزريني..

سيلين : نشوف هههه..

ادهم : عجبتج اللعبه.

سيلين : قصدك تفشل الناس ههههه.

ادهم : احنه صغار ويكذب علينه بس شهادتنه بكد راسه مو عيب بس من اخليه يكررر الكلام عيب اساسا انه ما بينت الهم هو يكذب لهذا تشوفيهم مندمجين وياه ويجاوبوه بنفس الحماس يعني ما فشلته.

سيلين : زين هسه هذا الثاني يحجي صدك لو يكذب..

ادهم : ممم لا ميكذب وانما يخفي اشياء ...

سيلين : شنو الفرق يعني.

ادهم : ميريد يعرفون بهذا الشي الكاعد يسألوه عنه همه كاعد يحرجوه لهذا مضطر يغير بالحقيقه ..

سيلين : شلون عرفت..

ادهم : شوفي من يسألوه يكول لا وياها ابتسامه خفيفه او ابتسامه قويه مو مهم المهم يبتسم ويه كلمه لا.

سيلين : وهاي شعليها ؟

ادهم : شلون شعليها هاي يعني كاعد يخفي جزء من الحقيقه وميريد يشارك احد بيها...

سيلين : جوز يكذب بس يضحك..

ادهم : لا انتبهي كفوف ايده ثنينهن مفتوحات من يحجي يعني صريح وماعنده شي يخفيه غير هاي الشغله اللي يريد يخفيها عنهم واليكذب غالبه يحرك ايده هواي او يسدها لو يلعب بشعره يحك ركبته يعني ابد متثبت هيج على الطاوله...

سيلين : تدري مرات اكول لو داخله علم نفس بس من اتذكر انت موجود اتعلم منك احسن .

ادهم: بدعي ب اختصاصج وانه اعلمج كل دروب علم النفس.

سيلين : هههه صارت دروب.

ادهم : تفرعات يابه ، شتكولين نستأذن نرجع صارت اربعه ونص.

سيلين : انت شتعرف بيه ؟

ادهم : ادري كاعده على اعصابج.

سيلين : اذن اختصر الجلسه وخل نكوم تكسرت..

ادهم : جان عاجبني اشوفج هواي امور خلال هاي الكعده بس اعرف بيج تملين ..

سيلين : غير مره هوو اصلا اني مكابلتك بلبيت وبالدوام وبالطريق ومرات من نتسوك هم وياك يعني اتعلم اتعلم.

ابتسم ابتسامه عميقه حسيت صدك بيها ترابط روحي ..

كام اخذ سترته من يده الكرسي واستأذن منهم وطلعنه.
مشينه للسياره صعدت ومطيت جسمي هو هم صعد..

سيلين : تكسرت من الصبح لحد الان على كعده وحده ..

ادهم : انه راسي انتفخ من الكذب..

سيلين : هههههه يابه من اتذكر شكله شلون انعصر وجها غير انقهر عليه.

ادهم : هو ما مسويها قبل جان دائما يتجنب الكلام من انه موجود لان سامع بصيتي اي طالب يكذب اكشفه بس اليوم تصور انه ملتهي وبالي مو يمه لهذا انطلق..

سيلين : منا وجاي راح يفكر الف مره يلا يحجي كدامك.

ادهم : هاي اذا طلع وياي اساسا .

سيلين : هههههه ..

سكتنه و التهه يسوق واني غمضت عيني رجلي وجعتني من الحذاء ردت انزعه واستحيت بعدين كتله.

سيلين : ما مرتاحه الحذاء اذاني انزعه عادي لو عيب منك..

ادهم : كم مره تسأليني هذا السؤال واكلج نزعيه عادي..

سيلين : مو غير استأذن

ادهم : ميحتاج سوي الي يريحج..

نزعت حذائي والتفتت عليه لا اراديا لكيته عينه على اصابع رجلي..

سيلين : ها عمو سالمين ..

باوعلي ضحك ودار وجها.

سيلين : اعرف اصابعي صغار ويضحكن بس انت شكو تباوع .

ادهم : منتبه عليج اكثر من مره تنزعين الحذاء وترجعين اصابعج ليورة وبقوه..

سيلين : وشكو بيها ؟ غير يأذني.

ادهم : لا لو تأذيج تفردين الاصابع او تخلين اصبع فوك الثاني بس حركتج مو مال تعب.

سيلين: مال شنو لعد؟

ادهم : حركه موحلوه تدل على الاحساس الشديد بالفشل والخيبه ..

سيلين : مممممم

ادهم : والاصابع الها دور اساسي بالمحافظه على توازن الجسم وهذا يعني عندج دوار خفيف..

سيلين : اعترفلك بشي.

ادهم : وهو..

سيلين : اول شي حسيت بدوخه واختل توازني لان جان يوم متعب والتعبني اكثر كعدتي وياكم حسيت نفسي اقل منكم بالمستوى وحسيت نفسي فاشله وهسه من كعدت اتذكر شلون نقاشكم بصوت واضح وثقه عاليه حسيت بيني وبين نفسي بشعور الخيبه..

ادهم : وانه لاحضت هذا الشي وتأكدت من حركات الاصابع ههههه...

سيلين: بعد البس جواريب سود شتكول..

ادهم : ههههه لبسي افضل ...

بعدها سكتنه وره نص ساعه وصلنه للبيت نزلت وهو صف السياره انتضرته يم الباب علمود يفتحها نزل واجه فتح الباب اول ما دخلنه سمعنه صوت مره تعيط بصوت عالي بيت ايمن باوعتله عكد حاجبه وسأل مستغرب.

ادهم : هاي مو امي..

سيلين: ماعرف..

حجيتها ورفعت كتفي.

هو عافني وصعد الدرج بايتين بايتين سوه وفات للبيت اني ضليت يم الدرج ضل بالي اريد اشوف شكو سمعته كللها.

ادهم : شلونج حجيه خير شصاير صوتكم واصل للشارع وشوكت اجيتو ؟

فردوس : وشنو يمه متريدني اجي.

ادهم : لا العفو بس ما عندي علم بجيتكم ..

فرودس : والله جيت داشوف ولدي وسوالفهم..

ادهم : منو قصدج ؟

فرودس : انت وايمن ..

ادهم : شبينه

فردوس : كل عقلكم اخليكم تاخذون بنات تماره السحاره الكح****.

حجه بصوت مال واحد عصبي ونتر بالكلام.

ادهم : يمه صوتج البنات يسمعن عيب.

فرودس : وليش عيب هاي حقيقه مو هنه امهن هيج لو غلطانه.

ادهم : وانتي ليش تاخذيهن بذنب امهن هنه شعليهن بيها..

فردوس : العرك دساس يمه وانت ايمن حجي البارحه الحجيته ويه ابوك ما اريده ينعاد زين ..

ادهم : هو شنو الينعاد غير افهم..

فردوس : اخوك واكع بحب بت تماره وخابر ابوك يريدها.

ادهم : وين المشكله ؟

فردوس : انت متجوز من هاي العائله اللي كلها مشاكل بس عينك معميه لان من طرف ياسه ...

ادهم : يووووم عوفج من ام مريم الله يرحمها وخلينه باليوم...

فردوس :يلا اليوم اليوم اجي وياك شوف سوالفك واهتماك لذني البنات ما مريح كلبي واخوك يحجي وطيور الفرح تزقزق بعيونه من يجيب سيرتها اذا صار البالي بالله الكريم اسوي شي ميسر خاطركم.

ادهم : عود شنو خايف اذا عجبتني وحده من البنات يعني تمنعيني اتزوجها هههه انتي تعرفيني كلش زين الوحيد ب اخوتي ما اتهدد لا فلوسي منكم ولا خايف انحرم من ورث ولا عايش وياكم بس انه مو بالي الزواج اساسا اللي دا اسويه تعويض لياسه عن تقصيري اتجاها على الاقل اكدر اسوي شي لبنات اخوها واردلها الجميل..

فردوس : لك انه ربيتك على ايدي واعرفك كلش زين شنو تريد ، بس والله اذا صارت صدك وانمست عائلتي بكلام مو زين بسبب ذني البنات لو تنزلون من شأنه انه وابوك بين الكرايب اسوي شي ميعجبكم.

ادهم : انتي ليش تخليهة السالفه ابالي واسويها عناد حتى لو ما راغب بيهن ،،، شلون احبهم لكرابتج وعناد بيهم ازوج ايمن لايفين حتى وان جنت ماريدها اله..

فردوس : انه كاعده هنا وما ارجع لبيتي اله يتزوجن..

ادهم : لعد اجازتج مطوله خلي ايمن يجيبلج ملابسج وغراضج والعلاج لان تمر سنين وما زوجهن..

سمعت نزلته من الدرج ردت امشي وافوت للبيت بس مكدرت رجلي مشالتني ضليت واكفه و خاله ايدي على حلكي ودموعي تنزل ، هو نزل شافني ضل صافن بوجهي وبهت ....

يتبع..