جذبني فمك البني

البارت السادس والعشرون

انت لو تسألني ماذا ينقصك؟

سأقول اقرأ اول كلمة ❤

________

دك المنبه وارجع اطفيه لو مو موبايل ايفين جان ركعته بالكاع هلكد ما نعسانه توني مطفيته يرجع يدك فتحت عيني كوه لغيت المنبه ورجعت نمت حسيت ايفين تكعد بيه..

ايفين : سيلين سيلين يمعوده كعدي عمو صارله ساعه يدك بالباب ..

سيلين : ياعمو وشعنده ساعه يدك جان كعدتي لعد اذا ساعه.

ايفين : حالي حالج نايمه وماعندي دوام ع شنو اكعد بس يكول هواي دكيت الباب وتأخرنه .

سيلين : استغفر الله ماريد اداوم نعسانه كليله متروح..

ايفين : لعد جان كتيله من البارحه ليش خليتيه ينتظرج ويتأخر..

سيلين : مادري مالي خلك راح انام ..

غطيت راسي وغمضت شويه وسمعت صوته يكللها..

ادهم : شوفيها لابسه داحاجيها .

ايفين : اي عمو مغطيه راسها هههههه..

ادهم: سيلين شنو هالنوم اليوم مو عندج امتحان لو انه غلطان..

جاوبته من جوه البطانه..

سيلين : عمو كلش نعسانه واحس روحي مالي خلك وتذكرت عندي محاضره لاستاذ غثيث ومقاريتله..

ادهم : عاشت ايدج هاي بوجهي تحجيها ورايه شتحجين..

سيلين : عمو انت شعليك قابل انت مدرسني..

ادهم : لعد الطلاب هم مثلج يحجون عليه من انطيهم محاضرات..

سيلين : اي عمو شعبالك وراك شكل وكدامك شكل ماكو واحد يحب استاذ ينطي واجبات.

ادهم : يلا نبطل ونفتح مدينه العاب شتكولين..

سيلين : عمو النومه طارت اريد انام.

ادهم : كومي تره ما اروح وأأجل امتحانج ..

سيلين : لتأجله عادي .

ادهم : منو ذاك اليوم غاب وخابرني عمو عندي امتحان فدوه حاجي الاستاذ كله مريضه وخليتيني اكذب وانتي كلشي مابيج..

سيلين : يعني مابيك امل تعوفني اغيب..

ادهم : ابدآ يلا منتضرج بالسياره استعجلي الج ربع ساعه ..

سيلين : عزه عمو شلحك..

ادهم : دطلعي راسج من جوه البطانيه وكومي بدلي عاد ..

طلع وايفين جرت البطانيه مني رجعت جريتها منها..

سيلين : خرب بيج بارده..

ايفين : كومي عيب صارله ساعه واكف فوك راسج ويقنع بيج تداومين.

سيلين: انتي كلشي عندج ساعه دك الباب مره كلتي ساعه وكف دقيقتين حجه كلتي ساعه .

اسفط بالبطانيه وادردم عليها هيه رجعت نامت رحت للحمام غسلت وفرشت اسناني ورجعت بدلت والهورن مال سيارته كل شويه داكه لو يدك جرس البيت بحيث الشال شمرته على شعري من العجله وطلعت سديت باب البيت باوعتله مغضب من وره المناظر ، صعدت وخليت كتبي والجنطه ليوره جريت المرايا الكدامي وكعدت البس الشال التفتلي وكال..

ادهم : هاي شنو؟

انداريت عليه وكتله.

سيلين : شكو؟

ادهم : يعني تلبسين هنا كدام العالم صدك تحجين..

باوعت ع الشارع وكتله.

سيلين : وين العالم ماكو احد فارغ الشارع..

ادهم : نزلي لبسيه بلبيت ضبطي امورج يلا تصعدين..

سيلين : غير انت خبصتني .

ادهم : من ساعه سته ونص انه اكعد بيج وانت مغلسه.

سيلين : ممغلسه بس نايمه محسيت اله ايفين تكعد بيه.

ادهم : تدرين هسه ساعه بيش.

سيلين : ثمانيه اله عشره .

ادهم : ويه الازدحامات طارت اول محاضره اليه..

سيلين : هسه يدعولي الطلاب خلصتهم من اول محاضره..

رفع حاجبه وباوعلي بثقه عاليه..

ادهم : شمدريج يفرحون ؟

سيلين : مبين كلنا هيج نفرح من يغيب الاستاذ.

ادهم :  اله طلابي لعلمج بيوم الما اخذهم يضوجون..

سيلين : اي استاذ عن استاذ يفرق..

ضحك وكال..

ادهم : كملتي .

سيلين : اي..

ادهم : لتعيديها مره ثانيه تلبسين شالج بالسياره..

سيلين : صار .

مشينه وصدك ازدحامات بس الحلو ابد لا يلوم ولا ينك لان تأخرت واخرته ضل ساكت وصلنه للكليه ساعه تسعه وربع..

سيلين : شعجب محجيت كلت هسه تضل تلوم بيه الطريق كله..

ادهم : وهذا زين موزين.

سيلين : لا طبعا زين بس تعجبت.

ادهم : بالحالتين نوصل متأخرين اذا حركت دمي راح اوصل من وقت يعني ههههه.

سيلين : يا برودك ههههه.

ادهم : هو الزين شبيج ..

حجاها وابتسم نص ابتسامه ودار وجها جنه نمشي ونسولف وصلنه للبنايات كلمن راح بجهة..

صعدت فوك عدنه ثاني محاضره امتحان طلع اول استاذ لان راحت عليه المحاظره الاولى ،،،

ثاني محاضره دخلت كعدت اجتي بنيه كعدت يمي اسمها سرى..

سرى : هلوو شلونج..

سيلين : هلو بيج انتي شلونج..

سرى : الحمدلله قاريه..

سيلين : قاريه بس نسيت كلشي..

سرى : ليش .

سيلين : ماده صعبه ومحبيتها.

سرى : همم يلا عود اساعدج..

سيلين : لا يمعوده اكتب اي شي ممعقوله كلشي ما اتذكر.

سرى : براحتج..

سكتنه اجه الاستاذ امتحنت وطلعت رحت لبنايه عمو ادهم دكيت باب غرفته فارغه مابيها احد طبيت كعدت ورة عشر دقايق اجه شافني ضحك.

ادهم : هااا لازم ممجاوبه..

سيلين : ليش مكتوب بوجهي ممجاوبه؟

ادهم : لا بس جايه من وقت.

سيلين : حليت سؤالين من ضمن ٣ وسلمت الورقه وطلعت.

نزع الستره خلاها وره الكرسي وكعد خله عكوس ايده على الميز وبرزت ساعته من القميص باوع على نضراتي وين و كال.

ادهم : حلوة عحبتني..

سيلين : بالعافيه جايه فيت ويه الوان القاط.

ادهم : صح..

سيلين : تدري كلشي متذكرت..

ادهم : لازم مقاريه زين.

سيلين : لا قريت بس ماده جافه.

ادهم  : شلون جاوبتي لعد ؟

سيلين : بنيه اليوم تعرفت عليها اسمها سرى فتحت ورقتها كتبت منها سؤالين فتحت الورقه على سؤال الثالث عفت وكمت سلمت الورقه.

ادهم : ليش جان كملتي غش..

سيلين : ههههه اني جان كملت بس بيه طبع ماحب واحد يسوي عليه فضل ويضل بركبتي لان مالي خلك اكعد اسدده بعدين..

صفن بوجهي ورفع حواجبه الاثنين بعلامه دهشه وسوه حركه بحلكه تدل على الدهشه هم ..

ادهم : اي احد يعني ؟

سيلين : اي احد حتى انت خاف تكول تقصدني او متقصدني اي اقصدك انت هم..

كتف ايده ورجع ضهره ليوره وكال.

ادهم : عود ليش ؟

سيلين : عزه النفس ياعمو لا تنباع ولا تنشره تمشي بالدم.

سكت يباوعلي متفاجئ..

بعدين كال..

ادهم : صادقيها ..

سيلين : المن ؟

ادهم : سرى

سيلين : ليش عود لان نطتني غش هههه .

ادهم : لا بس هاي راح تكون وفيه وياج وما تتركج..

سيلين : هههههه هاي شنو ..

ادهم : صدكي شبيج دراسه امريكيه بينت الطلاب اللي يساعدون اصدقائهم داخل قاعه الامتحان يكونون اكثر وفاء واخلاص من الطالب اللي ما ينطي غش ، رغم الغش  مرفوض اكاديميا ومبدئيا واخلاقيا بس داكلج على الصداقات ...

سيلين : هههههه والله راح تخبلني..

ابتسم وكال..

ادهم : نتريك ؟

سيلين: كيفك ....

كام طلع جبن من ثلاجه صغيره بالغرفه وياه مربه وخلاهن على الميز وطلع بره الغرفه وصه العامل اللي يشتغل بهاي البنايه على جايات ثنين رجع كعد ويهز بالكرسي وعينه بالكاع ماعرف بشنو يفكر بس مبين باله مشغول هلكد ما كام يحجي ويعلمني كمت اني هم افسر حركاته هنا ينطبق المثل انقلب السحر على الساحر هههه..

وره شويه جابو الجاي كعدنه ناكل ساكتين كملنه شلت  الصمون والجبن خليته بالثلاجه وكلاصات الجاي ذبيتهن بسله المهملات لان استعمال مره وحده..

رجعت كعدت اندكت الباب دخلو بنات ثنين و٣ طلاب وكفو كدام الميز مال عمو ادهم واني كعدت على صفحه ،..

ادهم : هااا شبيكم  ..

_ استاذ عفيه عيد الامتحان والله جان عندي ظروف ..

الثانيه هم نطت عذر والطلاب كذلك ..

ضل صافن عليهم ويلعب بشاربه ...

حجه واحد من الولد..

_ استاذ ممصدك بينه مو ؟

ادهم : عفيه عليك عليمن جايين تكذبون؟

_ استاذ اني ما اكذب والله كم مره اجيتك وكتلك امتحنتي يعني شسوي فهمني ...

ادهم : انتي ليش اندفاعيه بالكلام.

_ اني استاذ.

ادهم : اي شنو جايه تتعاركين..

ضلت تحجي وتعتذر وهمه هم يحجون اخر شي كللهم اشوف اذا عندي وكت اعيده الكم تشكرو منه وراحو التفتت عليه وكتله.

سيلين : شبيها البنيه ليش هيج فشلتها خطيه..

ادهم : اول شي تكذب بعدين دافعيها خاليها بوجه المدفع..

سيلين : شلون عرفت دافعيها..

ادهم : هاي شبيج يعني اليه تكليلي شلون عرفت..

سيلين : ليش عصبت؟

ادهم : ماحب يجتمع الكذب والحلفان سوه امقت هيج بشر..
سيلين : اول صفه نشترك بيها هم زين.

حجيتها وكتفت ايدي..

تقرب على الميز خله ايده بوضع متكتف وباوعلي وحجه بنبره هدوء تختلف عن ذيج النبره الجان معصب بيها.

ادهم : هواي شغلات نتشابه بيها .

سيلين : لا ماشوف هيج.

ادهم : انه اشوف ..

سيلين : ماعرف بعد بس الشفته من خلال علاقتنه بالفتره الاخيره يعني لان شويه صار بينه كلام وكذا ، مشفت تشابه غير بهاي الصفه..

ادهم : انتي متعرفيني انه اعرفج واكو فرق تره.

سيلين : ماعرف بعد..

سكتنه وره شويه رجعت سألته.

سيلين : الله عليك كلي شلون عرفت شخصيتها اندفاعيه..

ادهم : ههههه راح اعلمج بس لتبجين.

سيلين : اي عفيه صار عندي هوس اتعلم حتى كمت اراقب كل حركاتك.

ادهم : ملاحظ..

حجاها وابتسم..

سيلين : اي علمود اقراك مو بس انت تقراني هههه.

ادهم : ممممممم جيد..

سيلين : يلا احجيلي.

ادهم : احجيلج ،اذا شفتي شخص يتصرف ويحجي بدون تفكير ويحرك ايده اثناء الكلام وتكون ايده اليسار اعلى من اليمين هذا شخص اندفاعي اضافه لهذا يكون التعبير عن انفعالها غير مقبول من غالبيه الناس لان تكون مخالفه لقاعده تربويه واخلاقيه وعلامه على عدم الاستقرار الاجتماعي وحتى على الجنون المرأه شلون تعرفيها اندفاعيه من تقبض بيدها اليسار على كتفها الايسر او اليد اليمنى على الكتف الايمن ..

سيلين : صح انتبهت عليها تسوي هاي الحركات
زين واذا جان الشخص انطوائي شلون تعرفه

ادهم : مثلج يعني..

سيلين : اي ههههه.

ادهم : كومي ويايه راح نسوي تجربه واشوفج الشخص الانطوائي من المنفتح..

سيلين : عندك محاضره بخصوص هذا الشي..

ادهم : لا عندي درس  بس همه يحبون هيج نوع من التجارب وحبيت اشوفج شي بخصوص هذا الموضوع.

سيلين : يلا علواه ههههه..

لبس سترته وطلعنه رحنه للقاعه فتنه سوه سلم عليهم  واني هم سلمت وكعدت بنفس المكان مال اول مره اجيت بيه..

شرح المحاضرة وسألهم وبقت ربع ساعه على نهايه المحاضره..

سألهم..

ادهم : منو بيكم يدخن..

هواي رفعو ايدهم..

طلب من كل ثنين يكومون يوكفون كبال الطلاب ..

ادهم : علي اطلب من مؤيد جداحه علمود تورث جكارتك.

طلب علي من مؤيد ، مؤيد طلع الجداحه وبيده ورث جكاره صديقه ، رجع طلب من مؤيد يطلب من علي يورث جكاره ، علي شال الجداحه ونطاه لمؤيد يورثها بيده..

ضحك عمو ادهم وكال.

علي : شخصيه منفتحه .

ومؤيد : شخصيه مغلقه وانطوائي..

ضحكو الطلاب وكالو شلون عرفت استاذ..

رجع سألهم منو ينطي جداحته ومنو بيده يورث الجكاره لصاحبه هواي رفعو ايدهم ...

كال..

ادهم : متعه التدخين وطريقه استعمال القداحه تعبر عن مدى التواصل مع الاخرين ومشاطرتهم متعه التدخين ، اذا طلب شخص غريب قداحتك لاشعال السيجاره وقدمتها اله بكل سرور اعرف انك شخص منفتح واجتماعي بينما اذا تشبثت بقوه بالقداحه وشعلتها بنفسك للشخص الثاني يعني انت انسان انطوائي وعندك صعوبه بالتواصل مع الاشخاص اللي متعرفهم.

كامت طالبه حجت معترضه...

_ استاذ ميصير هيج بس الولد لعد احنه شلون نعرف شخصيتنه انطوائيه لو منفتحه.

ضحك وكال

ادهم : شباب اريد واحد بيكم يدبرلي شخاطه وبيها عود كبريت يعني مو تجيبها خلصانه.

كام واحد من الطلاب وكال ..

_ استاذ اطلع اشتري من بره ابو الجكاير كبال الكليه.

ادهم : خاف تتأخر والمحاضره راح تخلص..

_ لا عدنه شاغر عشر دقايق..

ادهم : تمام روح ولتتأخر ..

ضحك الطالب وراح ورة شويه رجع وبيده الشخاطه خلاها بيد ادهم اخذها والتفت عليه باوعلي يعني راح اكومج خزرته وهزيت راسي لا ابتسم وعينه على الطلاب وكال..

ادهم : راح نبلش ويه سيلين ..

شطت ردت ابجي اله شويه باوعلي وكال..

ادهم : يلا ..

كمت وكفت يمه نطاني الشخاطه وعود الشخاط وطلب مني اعلكها..

علكتها وكال طفيها طفيتها ورجعت لمكاني رجع طلب من اكثر من طالبه تكرر الحاله اخر شي شرح..

ادهم : سيلين شخصيه انطوائيه ورانيه شخصيه منفتحه.

سألوه شلون؟

ادهم : سيلين شعلت عود الكبريت بحركه نحو الداخل بينما رانيه شعلته بأتجاه الخارج..

الشخص المنطوي شلون نعرفه بعلم النفس من خلال هذا الاختبار البسيط نعرف هذا منطوي اما اذا شغلها للخارج هذا منفتح وحتى محب للغير ..

وحده كامت سألته.

_ استاذ يعني عدكم بس هاي الطريقه تعرفون بيها لو اكو طرق ثانيه..

ادهم : صفكي بيدج ..

ضحكت وصفكت..

ادهم : انتي ذات مزاج منفتح...

_ شلون عرفت..

ادهم : اذا جانت ايدج اليسار هي اللي تضرب ايدج اليمين اثناء التصفيق معناها انتي انسانه منفتحه وبحاجه الى الظهور والتواصل الاجتماعي اما اذا كانت اليد اليمنى هي الي تضرب اليسرى بالتصفيق فأنتي انطوائيه وتحبين تضلين بمحيطج الخاص..

استمرو بالاسئله الى ان انتهى الوقت وطلعنه من القاعه ترك اثر بقلب الطلاب كلش حلو وصل الهم رساله بطريقه حلوة وسهله ونطاهم بعض النصائح علمود يغيرون من نفسهم..

ادهم : عجبتج التجربه.

سيلين : كلش ، تعرف شنو ؟

ادهم : شنو ؟

سيلين : ماعرف احس اكو فد ترابط بينه بس مداعرفه شنو عمو اني بديت اتعلق ...

وسكتت خفت يفهمني غلط ،هو هم سكت راح لغرفته واني رجعت لقسمي ضليت افكر خاف حجايتي خطأ خاف افتهمني غلط اني جان قصدي بديت اتعلق بالحياه اللي هو عايشها بديت احبها واتمنى اتعلم منه اكثر بس خاني التعبير معرفت شلون اعبر ...

وصلت للقاعه جان داخل الاستاذ هذا كلش شايف نفسه ومتعالي على الطلاب دكيت الباب شافني كال فوتي ، استغربت شعجب قبل ادخل وراه بس الضاهر جانت اكو نيه بايته بداخله ويريد يطلعها هسه..

قبل لا يبدي الدرس كال.

_ اكو ناس تصعد بالواسطات واكو ناس تنجح بالواسطات وهمه ما يسوون شي لو ما الموصين عليهم ابسطلكم كلامي بمثال مثلا طالبه او طالب عنده استاذ هنا يدرس بالجامعه ، يستغل الفرص يغيب براحته يضرب امتحان براحته ويتحجج بالمرض بس احب اوصل رساله لمثل ذوله الاشخاص اني ما انجح ولا اعيد امتحان لاي طالب حتى لو كان ابن العميد..

شصار بيه وجهي صار احمر ونار كامت تطلع منه سرى كاعده بصفي خلت ايدها على ايدي وضغطت عليها علمود لا ابجي لان الكل يعرف اني اقارب ادهم واني الوحيده بالقاعه اقاربي استاذ بهاي الجامعه يعني مبين الكلام عليه ،

خلصت المحاظره من بعد ما روحي طلعت اول ما طلع الاستاذ البنات التمو عليه ، يواسوني معليج بيه ولتضوجين وانتي شاطره نعرفج متحتاجين توصيه ،

مكدرت بعد كمت ابجي بصوت عالي خطيه ولد شعبتنه طلعو من القاعه وضلو بس البنات يمي ،

جان موقفهم كلش حلو ويايه..

رغم حجيهم الحلو وتهدأتهم الي بس اني نار بكلبي ونزلت لمعدتي حسيت بطني صارت حجاره كمت ابجي من الألم مالتها بحيث كعده ماكدر اكعد ،

وحده من البنات كالت اصيح استاذ ادهم ، همه يعرفوه لان مرات يجي ينطي محضاره توعويه ما الها علاقه بالمواد مالتنه ،

راحت صاحته اجه بسرعه وياها فات والبنات وخرو على صفحه جنت كاعده على الكرسي هو كنبص كدامي مثل ما يكعد كبال مريم من تبجي وتتذكر عمه ياسه نفس الحركه سواها ويايه جنت لازمه بطني وابجي تخبل التفت على البنات سألهم ..

ادهم : شبيها ليش تبجي منو وياها ..

_ استاذ رعد كام يحجي عليها ...

وحجتله كل السالفه ، رجع باوعلي وهمس بصوت ناصي..

ادهم : على شنو تبجين  واذا كال هيج ليش ضجتي ..

نزلت عينه على ايدي الخالتها على بطني كال..

ادهم : توجعج.

هزيت راسي اي كام وكف اخذ الملازم مالتي والجنطه وطلب من بنيه تكومني وتجي ويايه...

ادهم : تكدرين تمشين.

هزيت راسي اي..

مشينه وطلعنه من الجامعه وكل شويه يلتفت عليه يباوعلي ويرجع يمشي وصلنه للسياره صعدت والبنيه حجه وياها وراحت ..

صعد والتفت عليه.

ادهم : شنو يوجعج بالضبط فهميني.

سيلين : بطني..

حجيتها وزدت بالبجي.

ادهم : منين توجعج..

سيلين : كلها بس اكثر شي من فوك..

شغل السياره ومشينه وصلنه لمنطقه بيها عيادات مال دكاتره صف السياره وكال..

ادهم : انزلي تكدرين.

هزيت راسي اي..

نزلت كوه اريد امشي ما اكدر اجه وكف بصفي وكال.

ادهم : ها سيلين لتخوفيني وصلنه هاي الدكتوره باعي..

حجاها واشرلي على مكان العياده مشيت على كيفي وصلنه للعياده دخلنه مقبلت اله حجز حجه ويه السكرتيره مقبلت اخر شي كللها.

ادهم : مدام شوفي حالتها تره مو مال انتظار..

الناس الكاعدين كالو عادي خليها تاخذ سرانه احنه نكدر ننتظر هيه لا..

دخلت وهو ضل بره سألتني الدكتوره وشرحتلها وين الالم كالت نامي هنا ، اشرتلي على السديه رحت نمت اجتي وكفت يمي كالت.

_ رفعي بلوزج..

رفعته وخلت ماده سائله على بطني ومررت جهاز السونار ، وره شويه كالت ..

_ ماما عندج قالون العصبي فد مره صاير ليش هيج تاركه نفسج...

سيلين : ماعرف كل مره يوجعني بس مو هيج..

_ راح اكتبلج علاج تلتزمين بيه واهم شي الاكل  مو كلشي تاكلين..

سيلين : تمام..

حجيتها ومسحت دموعي..

كتبتلي علاج اخذته وتشكرت منها وطلعت لكيته بره واكف شافني اجه يمشي سريع وعاكد حاجبه سألني وعيونه مليانه قلق.

ادهم : ها شكالت بشري..

نطيته الورقه مال سونار اخذها قراها وكلي..

ادهم : كتبتلج علاج.

سيلين : اي هذا.

اخذ الوصفه وكال  ..

ادهم :  تعاي صعدي بالسياره واروح اجيب العلاج واجيج..

سيلين : تمام..

رحنه للسياره صعدت وهو راح اقل عشر دقايق رجع وبيده علاكه صغيره خلاها ليوره ودنك حاجاني من الجامه..

ادهم : سيلين نزلي ضربي هاي الابره يم مساعده الدكتوره مادام احنه يمها ..

اخذتها منه ونزلت فتت ضربتني وطلعت  ..

ادهم : معافاه...

سيلين : شكرا..

صعدنه وكتله.

سيلين : يلا نرجع للبيت حتى انام..

ادهم : ارتاحي علمود اتسوك كم شغله تاكليها من نرجع..

حجاها ودنك على بنطرونه نفضه بيده وكتف ايده مندار عليه  باوعتله ودرت وجهي رجعت راسي ليوره على الكشن غمضت عيني ، مرت نص ساعه ردت اغفه همس بصوت ناصي..

ادهم : صرتي احسن مو ؟

فتحت عيني انداريت عليه لكيته نفس كعدته وعينه عليه ..

سيلين : احسن الحمدلله ..

شغل السياره وكال..

ادهم : لازم تلتزمين بالاكل كلشي كالت عليه ممنوع متاكليه..

سيلين : مثل شنو قريت بس مافهمت..

ادهم : شكو اكله تحتوي على الالياف متاكليها بقوليات فاصوليا خضره قرنابيط تأذي القالون لان غنيه بالالياف الغير قابله للذوبان بس اكو اطعمه غنيه بالالياف وقابله للذوبان يصير تاكليها مثل شوفان توت جزر برتقال..

سيلين : وبعد قريت قائمه طويله كاتبتها ..

ادهم : الخبز والصمون تتركيه جاي كهوه مشروبات الغازيه بتيته القلي واي شي مقلي بالدهن تتركيه لحوم الدهنيه المكسرات خضروات مثل الكرفس الملفوف البروكلي هم تسبب تهيج بالقالون العصبي اي اكله بيها توابل ممنوعه صلصات حاره حتى الشاميه هم موزينه..

سيلين : لعد كلشي ما اكل احسن ..

ادهم : بين متصيرين زينه عندج اكلات محدده تاكليها ..

سيلين : مثل شنو ؟

ادهم : اكلات غنيه بالاوميغا 3 موجوده بسمك السلمون والسردين ، بس عندج المكسرات غنيه بالاوميغا 3  بس ممنوعه لان تزيد المشكله بدل ما تخففها ...

سيلين : وهاي اضل على السمج ؟

ادهم : عصاير طبيعيه خصوصا عصير التفاح كلش زين موز بيض شوفان ذكرته والسمج والدجاج اللبن  كذلك البتيته اذا مهروسه وسلك ممكن تفيد بس مو بكثره.

سيلين : ماشي..

ادهم : سيلين مو ماشي وبس التزمي تره وضعج تعبان كلش لتخلين بالي..

سيلين : لا التزم ليضل بالك..

نزل يم ابو مخضر تسوك وجابه للسياره ورجع صعد طبك يم ابو اسواق ونزل جاب كم شغله واجه صعد ومشينه.

سيلين : صارت بالخمسه هسه يضل بالهم..

ادهم : خابرتهم بلغتهم نتأخر..

سيلين : عاشت ايدك .

وصلنه للبيت نزلت وهو نزل فتح الباب ودخلت جوة كبل رحت للغرفه نزعت ملابسي ونمت ، ايفين سألتني شبيج كتلها تعبانه عافتني وطلعت للمغرب كعدت صوت بالمطبخ ايفين ومريم شقاهم وضحكهم واصل لسابع جار كمت راسي يوجعني من البجي طلعت لكيتهم بلمطبخ شافتني سكتت وكالت..

ايفين : هاي شنو سلامات يكولون متخربطه..

سيلين : اي طلع الألم مال بطني سببه القالون .

ايفين : من ورايه صار بيج.

سيلين : القهر وين يروح لعد..

ايفين : عمو وصه سمج شوي علمودج..

سيلين : سمج بليل..

ايفين : مو انتو ممتغدين وكال موزين عليج تاكلين اي شي كتب هاي القائمه وكلي لزكيها على الثلاجه .

التفتت باوعت كاتبها بخط يخبل ومرتب خليت ايدي على وجهي وبجيت اجتي ايفين حضنتني  .

ايفين : ليش البجي ياعيني شنو تتوجعين ؟

سيلين : ليش هيج زين ويانه لهدرجة لج غريب عنه ميربطنه شي وياه لا بالدم ولا قرابه ولا اي صله.

سمعت صوته ورايه كال. .

ادهم : مو شرط ارتباط بالدم مرات الارتباط الروحي يكون اعمق واجمل ...

التفتت عليه لكيته واكف باب المطبخ خال ايده بجيوبه ومبتسم مسحت دموعي وضحكت..

سيلين : عموو افضالك هواي صارت وبدت تخنكني..

ادهم : بعدين نتفاهم بهذا الموضوع تره جوعان كلشي ما ماكل.

سيلين : ليش ما اكلت ...

ادهم : انتظرتج ناكل سوه اشتهيت سمج وصيت وقبل ساعه جبته وانتي نايمه..

سيلين : يلا هسه نتغده بس اسوي زلاطه..

ادهم : سوت ايفين بس طلعيها من الثلاجه..

سيلين : تمام ..

طلعت الزلاطه والسمجه من الفرن وخليتهن على الميز جبت الخبز وكعدنه نامل ..

ادهم : اكلي على كيفج وامضغي اللكمه زين علمود لتتأذين  ..

سيلين : اوك..

اكلنه ردت اكوم كال..

ادهم : سيلين هواي شربي مي كلش زين ..

سيلين : اي ..

ادهم : شنو راح تسووين ..

سيلين : ارجع انام

ادهم : باجر لتداومين اخذلج اجازه ولتخلين بالج يم حجي رعد..

سيلين : بس هو كل مره يضوجني واليوم مردت اداوم من وراه .

عكد حاجبه وكال .

ادهم : ليش شسوه وليش ساكته مكتيلي؟

سيلين : اعرف راح تسوي مشكله ومتسكت..

ادهم : انه من هالنوع برأييج..

سيلين : لا بس متعوفه اعرفك.

ادهم : احجي شسوالج.

حجاها واجه وكف قريب مني  مركز بوجهي وبؤبؤ عينه يتوزع بين عيوني دنكت راسي حجه بحديه..

ادهم : احجي شنو كلج او شنو سوالج ؟؟؟؟

رفعت راسي باوعتله شكله عصبي  .

سيلين : هسه انت ليش معصب ماكو شي مجرد يضوجني وبس..

ادهم : سيلين تره اعرف بعض الاساتذه مو راحه تعلميني بيهم احجي احس ما اعرف بطريقتي وساعتها ازعل منج..

سيلين : ماعرف نضراته مو مريحه واكثر من مره طلب مني اصعد فوك ..

ادهم : ليش رادج تصعدين ؟

ارتبكت كلش نضراته وقربه وترني .

سيلين : عمو لتضغط عليه ..

ادهم : شمسويلج ضاربج قابل هو داحجي وياج يلا جاوبيني.

سيلين : كال ما اعيد الامتحان لكل الطلبه الغايبين اعيده بس الج لان موصين عليج بس امتحنج فوك ثالث محاضره واني مصعدت..

ادهم :ليش مصعدتي..

سيلين : يعني انت تشوفها عادي اصعد..

ادهم : لتجاوبيني بسؤال احجي ليش مصعدتي فوك تمتحنين..

سيلين : هو صح اصعد لو غلط .

ادهم : انتي شتكولين..

سيلين : اكيد غلط  ..

ادهم : لعد ليش تصعدين يمي اذا غلط..

رفعت عيني باوعتله مستغربه سؤاله..

سيلين : لان اعرفك زوج عمتي واعرف اخلاقك شنو.

ادهم : شبيها اخلاقه رعد..

سيلين : عمو وين تريد توصل..

ادهم : احجي شبيها اخلاقه وخلتج متصعدين تمتحنين
دنكت راسي وكتله.

سيلين: نضراته مو حلوه..

ادهم : رفعي راسج وحاجيني..

رفعت راسي بس ميته خجل.

ادهم : شبيها نضراته وين يباوع.

سيلين : يعني من حجيت وياه نضراته موحلوه جانت.

ادهم : اعرف مو حلوه شلون جان يباوعلج.

سيلين : عمو يعني شنو شلون انت افهم.

ادهم : يعني نضرات اجتماعيه لو وديه؟؟

سيلين : شلون يعني ..

ادهم : يعني مثل ما اباوعلج هسه لو نضراته يتودد بيها الج يعني يباوع على عيونج نزولا لشفتج وباقي اجزاء الجسم.

دنكت مجاوبته..

ادهم : سيلين  انه هنا اخوكم ابوكم اي شي اعتبروني و من احجي وياج لتستحين حاجيني علمود من اروح للعميد اخليه يحلم يدرس بهاي الجامعه.

سيلين : عمو مو كتلك راح تسويلي مشكله..

نتر بيه .

ادهم : لعد اعوفه يوميه مبجيج ؟

سيلين : معليه بيه ومحاضراته ما ادخلها بعد..

ادهم : وترسبين والحق ساعتها وياه.

سيلين : والحل؟

ادهم: معليج انتي انه اسويله فركه اذن ميوصلج بعد يشوفج منا يدير وجها لغير مكان..

سكتت ..

ادهم : اخذي علاجج ونامي  ..

سيلين : ماشي ..

رجعت لغرفتي اخذت العلاج ونمت..

ثاني يوم اريد اصلي كل شويه وضوئي يفسد بسبب القالون جنت لابسه جادر الصلاه ورحت عليه جان يصلي بالهول انتضرته كمل رفع راسه وكال..

ادهم : ها شلون صرتي ..

سيلين : الحمدلله احسن..

ادهم : اخذتلج اجازه اربع ايام.

سيلين : عاشت ايدك بس سؤال عمو فدوه.

ادهم : شنو كولي ؟

سيلين : ماعرف خجلانه كلش بس بسبب هذا الشي كاطعه صلاتي.

ادهم : شنو غير اعرف لتخجلين احجيلي.

سيلين : يعني من اصلي يفسد وضوئي فهمت عليه.

ادهم : قصدج ريح وكذا..

هزيت راسي..

ادهم : هاي بسبب القالون ..

سيلين : زين شسوي تدري اكثر من مره اعيد الوضوء وتالي اعوفها واكوم..

ادهم : اللي اعرفه مادام حاله مرضيه وشي موبيدج كملي صلاتج وراح اعلمج على شغله تكوليها بعد صلاه المغرب من ضمن التعقيبات كوليها سبع مرات ، تمنع البرص والجذام والجنون وسبعين نوع من البلاء منها الريح والبرص والجنون وهي ( بسم الله الرحمن الرحيم ولاحول ولاقوة الا بالله العلي العظيم ) ..

سيلين : شكرا عمو تعبتك راح اجربها ..

وفعلا التزمت بالاكل وهاي التسبيحه ،،،هواي شفت فرق وخفت هاي الحاله وصرت احسن..

مرت اربع ايام مداومت من بعدها داومت وفعلا استاذ رعد تغير تماما معليه بيه ولا بأي طالب ينطي محاضره ويطلع ،

دوامي عادي مرتاحه بيه وبلبيت هم مشت الايام وبعد اسبوع السنه مال عمه ياسه و تجدد الحزن بلبيت عمو اعصاب وبهذا الاسبوع عزل نفسه ،

واني مخنوكه وبس ابجي حتى دوام مداومت مكدرت ماعرف احس روحها ويانه و ذيج الفتره سوينه ثوابات بسيطه لان عمو التهة بحالتي المرضيه وبمصايب اختي مضل براسه يسوي ثواب ضخم لعمه بس جان يروح يزورها بين فتره وفتره وبيوم اللي يروح يرجع ينام وميحجي ويه اي احد ياخذله يومين يلا يرجع طبيعي ،

وقبل يومين من دوره السنه اجه دك الباب كمت فتحتها كال.

ادهم : سيلين باجر اهلي كلهم راح يجون لهنا اريد اسوي ثواب لياسة هواي قصرت وياها ذيج الفتره،،
قبل لا تجون جنت كل اسبوع يجون اهلي نسوي ثواب بس من اجيتو التهيت .
اللي اريده تتحملون و اي كلام اي تصرف بلغوني بيه انه اتصرف واذا كدرتو تضلون هنا براحتكم تختلطون بعد احسن بس خايف واحد يسمعكم كلام مو طيب وماراح اسكت وتصير مشكله ..

سيلين : لا نتحمل قابل شنو.

ادهم : عاشت ايدج هو باجر وعكبه نروح للنجف ويضل يوم واحد يبقون بيه بعدها يروحون.

سيلين : تمام..

ادهم : عاشت ايدج.

سيلين : وايدك شلون صار راسك.

ادهم : من انقهر يوجعني وهاي صارلي اسبوع ياسه كل يوم اشوفها بالحلم واكعد بعد ما اكدر انام ..

سيلين : الله يصبرك.

ادهم : يلا اروح اكمل باقي المسواك.

سيلين : تحتاج اجي وياك.

ادهم : لا انه وايمن نجيب ونجي..

سيلين : تمام..

ثاني يوم اجوي واحنه بغرفتنه كلشي مندري بره شكو ، على كد نروح للحمام ونرجع والاكل يجيبه ايمن اخذته منه ايفين مباوعلها اول مشافها دار وجها ،

كلش انقهرت رادت تبجي حتى غده مقبلت تتغده اله لحيت عليها..

بليل كلش رحت للمطبخ لكيت عمو واكف ويمه نرمان ماعرف بشنو جانو يحجون من طبيت سكتو ونرمان كالت راح انام تصبحون على خير وراحت ..

سيلين : عمو شبيها عيونك..

ادهم : مو تدرين راسي..

عرفته باجي بس ميريد يكول ..

سيلين : هاا زين باجر منو ومنو حيروح لعمه..

ادهم : كلنه ..

سيلين : اهلك هم ؟

ادهم : اي طبعا.

سيلين : الاعرفه ميحبوها..

ادهم : اعرف بس عدهم اموات يزوروهم ..

سيلين : عبالي نجي وياك اني وايفين.

ادهم : اخذكم اسبوع الجاي وحدكم علمود لتتضايقون.

سيلين : تمام تصبح على خير ويارب ترحون وترجعون بالسلامه.

ادهم: الله يسلمج وانتي من اهله.

رحت نمت وهو هم فات لغرفته.

ثاني يوم راحو ورجعو وره اسبوع اخذنه اني وايفين هواي بجينه وهواي عاتبنه عمه وهو هم بجه هواي وحضن القبر وضل يشكيلها ، غسلنه القبر ورجعنه اسبوع كامل يلا رجعنه لحياتنه الطبيعيه بس الحزن عليها دفناه بالكلب لان لازم الحياه تمشي..

مر شهر كامل جنه بالدوام ورجعنه تغدينه غسلت المواعين ونمت ، كعدت العصر رحت للهول توني اريد اعلك التلفزيون سمعت صوت نرمان من غرفه المكتب مال عمو تكله.

نرمان : لو بس اعرف ليش متقبل تنطيها المره صار اكثر من مره اجتي عليها وكلش خوش قسمه..

يتبع...

حبايب باجر استراحه

والله من المغرب لحد الان اكتب عيوني تعبت ❤