#جوليت وأسرها....

بارت قبل الاخير

بارت قبل الاخير
رواية...جولييت واسرها...غياهب الإنتقام
بقلمي...نور سمو العراق...

💔💔💔💔💔💔💔💔💔💔

...............................

خليت أيدي علئ صدري الي يخفق بشده من كلام ياسمين وبتلعت ريگي صح يمكن الموضوع مو عادي

يعني واذا حامل جاسر مو اول واحد يتزوج اثنين ومرته تحمل بس المشكله الظروف لحد الان ممستقره ولحد الان متوتره...

وليش بالذات ياسمين اعلنت عن حمل شام هسه من جولييت رجعت ليش ما نطقت الخبر قبل هل مده شنو السبب وشنو الغايه

هاي اذا كانت فعلا حامل

اني بعد من صدمتي وكردة فعل طبيعيه جاوبتها...هااا صدك اييي الف مبروك ان شاء الله دكوم بالسلامه

ردت عليه بتنهيده...هل كلام وصلي لجاسر مشان يصير عندو علم بهل شئ لانو شام ما عم ترضئ نعلن عن هل خبر وبتقول ان مو وقتها ان تقول ان هي تحكي هل خبر لجاسر ...لانو مرتوا هلا رجعت من خطفها...

بس انتي احكي لجولي ان شام حتئ تكون عندا معلومه

جريت نفس عميق...حتئ لو شنو قابل الي متئ هي تضل ضامه هل شئ عنه ميصير مدام زوجته هي عادي الكل يتقبل الوضع

ردت عليه بعصبية...شو هو الي الكل يتقبل الوضع شو يعني غصبا عنكن هي حامل بحفيدكن ما بيصير هيك تحكي...

اني ضجت من كلامها وهي مناك لعبت عليه جاوبتها...انتي لا تتدخلين زين مني واحجي وياج خلي شام هي الي دكول الجاسر عن خبر حملها وانتي لا تضلين تحجين بكيفج واذا فعلا حامل الطفل نخليه بعيونه...

قفلت الخط منها واني افور من كلامها ياربي هل بنت مو طبيعيه شتريد بالضبط من ناحية اكول جذابه مو حامل يعني هي كعدت يمنه البنيه اكثر من عشرة ايام ما شفت ولا لاحظت اعراض حمل عليها...

وهماتين هي وجاسر علاقتهم متوتره من اجت لحد الان هي جانت رافضه ان يكون زوج الها الا اذا طلق جولييت

وبعدها هو اوهمها ان هي محرمه عليه و اوهم جولييت لحل النزاع طبعا ومن بعدها هي استشرعت وبينت ان هل شئ غلط وان هي زوجه حالها حال جولييت...

وهل مشاكل الي صارت وكل الي صار ما اعتقد خله اكو بينهم فد تقارب جسدي وعلاقه زوجيه وبعد ما اعرف يجوز بينهم واني ما ادري قابل اني نايمه وياهم...

خليت وكعدت علئ القنفه طبعا جولييت لحد الان عايشه بوهم خاطفها لان جولي من انخطفت تعذبت واكو اثار بوجهها تبين هل شئ لذلك هي كل شويه تفز مرعووبه وتتوسل لا تلمسسني لا تلزمني عوووفني...جاسر تعالي...

اني حتئ خفت بصراحه يكون كلام امي الي حجته عن لسان ام هاله صحيح لان جولييت بين الوعي والفقدان تذكر احداث من بين المر بمرحلة خطفها ودائما تذكر هل شئ وكانها تتخلص من شخص يريد يعتدي علئ شرفها...

ضليت محتاره ياربي شسوي منا جووولي ومشاكلها ومنا حمل شام...

زين اني شكو دكولي ذاك هو زوجها ودكولها اني شنو موقعي من الاعراب قابل حاي تنطيني الطفل...

شفت ماما رضيه لابسه احرام الصلاة ودتصلي رحت وكعدت يمها واني اعصر بالموبايل واباوع الها بقلق كملت صلاتها كلتلها...اءءء ماما اني عندي الج خبر اله بشده بس ما اعرف هل خبر صح خطا الله اعلم بس من مصادر موثوقه

باوعتلي مستغربه...لا دكليلي جولييت معتدين عليها حتئ ما افلش راسج واخليج بدون عقل

ضحكت...هههههه لا الموضوع غير هل شئ هل موضوع بي فد لغز اذا طلع جذب...

جرت نفس ...احجي بسرعه ما فارغتلج

تنهدت وبلعت ريكي...اءء شسمها هاي ياسمين خابرتني ودكول شام حامل

اني ما كلت هييج ماما رضيه فتحت عيونها علئ وسعهن كالت....هااااا تحجييين صدك شلووون يعني حامل وشكد عليها وليش هسه يالله حجت...

مديت شفايفي بعد معرفه

رجعت تسبح و وجهها ما يتفسر كالت...هذا هو يمه اذا هي حامل فهي مرته والكل لازم يتقبل هل شئ و اول وحده جولييت لان هو رجلها متزوج ثنين...

هزيت ايدي واني اضحك...هههه بعد جاسر منين يلحك كثروا عليه الزعاطيط

اردفت بجديه..واي صدك ماما بس جاسر لحد الان ما يدري بشام حامل وياسمين هي الي كالت هل خبر ...

وكولي انتي كولي الجاسر ان شام حامل وهماتين وصلي هل خبر الجولي خلي يكون عندها علم...

خزرتني...اسكتي ولج لا تحجين ولا دكوليين هي مرته ودكله انتي ليش تسوين مشاكل

هزيت ايدي...علئ شنو اسوي مشاكل قابل شنو اني محبلتها ؟

ضربتني علئ ايدي بغضب...كبر لفج شهل الفاض السز ولج ...مو اني ادري بيج اذا ماتحجين يصير بيج الحگلگ اله تحجين يالله جنج فطيم بت سليمه ..« اقارب ماما رضيه »

تعصبت...اهوو هسه اني شحجيت ؟

تنهدت وهي تسبح..ولج يمه احنه مالنه شغل جولييت مريضه نفسيتها تعبانه احنه ما نريد تسمع منه وانوب تتخربط وتنصرع وتصير السالفه بوجهنا...

باعي يمه اني ادري هي شام مرته وجولييت مو من حقها اذا حجت واعرفها ما راح تحجي بس هي تضم بگلبها لذلك خلي تسمع من غيرنه مو منه وهو رجلها ما خاينها شام مرته علئ سنة الله ورسوله...

وبلكي الله يعوضها عن غزل ترئ اني ما ضايجه اذا شام حامل او لا هل شئ الصالح الكل وحتئ الكل يرضئ بالأمر الواقع...

نزلت عيوني بحيره....اي هم صدك والله اني بعد ما احجي بس عيب لازم ابارك لاخويه وابارك الشام شنو راييج ...

باوعتلي بطرف عينها واستغفرت كالت...يبووو ما تصير الج جاره خلي اخوج يكول شام حامل ومن بعدها نبارك اله ....

هزيت راسي بقبول وبعدها ضليت كاعده بس كنسلت عن الموضوع وما حجيت لاي شخص حتئ الامي وحتئ نسوان اخويه ما كتلهن وخاصة شخد لان شهد سرها بگهوه...

............................

جولييت...

مرت الايام عاديه عليه بس شنو اني شويه عندي خوف بداخلي من الي صار ولحد الان احس نفسي مو ويه اطفالي ولا ويه زوجي ...

سمعت من خلال كلامهم ان شام اهتمت باطفالي وهل شئ فرحني الحمد لله كدرت تتقبل الواقع وتتقبل فكرة ان اني مظلومه مثلي مثلها...

جانوا أطفالي يحجون اليه عن مغامراتهم ويه شام وشلون تلاعبهم وهم يتعصبون عليها واني اعرفهم شياطيين علئ ابوهم ههههه...

حاولت اتاقلم ويه وضعي واندل الاماكن لان لحد الان الحركه صعبه عندي وذاك اليوم حييل فشلت عود ردت افتح باب الغرفه اطلع فتحت باب الثلاجه واريد ادخل والملائكة البريئة مالتي يضحكون ..

بس رغم الموقف مضحك بس حز بخاطري اريده يسويلي عمليه بس اني ما اريد كل شويه وعدت عليه بنفس الموضوع الي هو العملية...

شويه واجه مرتضئ فتح الباب وكمز علية كال...سكيته سكيته ادت طبرية ام القيور..دايبه هووووايه قيورات...

»جكليته جكليته اجت هاي صبريه ام الطيور ..جايبه هوايه طيورات...«جمع طيور ...جمع خاص بمرتضئ »

ابتسمت بفرح....فديت خالتي صبريه ما تجي من شهربان اذا ما تجيب وياها صوووغه ....ذاك اليوم جايبه الهم بشوش يوميه مسبحيهن...

طلبت منه ينطيني شالي وياخذني الخالتي صبريه وهو ما قصر اخذني الها اول ما طلعت وهي استقبلتني بالاحضان وتبوس،بيه ...هلا يمه هلا بجكليته وروح امي انه رحت منج وانه ناااار اشتعلت بصدري كلت لازم اروح الجكليته اخاف دكول شمالها صبريه عافتني وراحت ...

ابتسمت وبستها...فديتج يا خاله لا والله انتي ما قصرتي ..

كالت...اي عود صدك جبت دجاجات للدويج جااا شني ضال بدون زواج المثله تزوجوا و زوجوا ولد ولدهم...

ضحكت كلتلها...يمعوده خاله هل ديج مظلوم ومن وره مشمش ومرتضئ ما يريد زواج بس الامن والأمان ههههه

صاحت بيهم بغضب...ولك مشيمش انت ومريضي ليش ولكم ويه دويجي اخذه منكم

رد عليه مشمش...هلاووو تاحده هي...ادلج بعدين هو وتح ما ادعد راعه...« هلاو تاخذه هي..اكلج وبعدين هو وكح ما يكعد راحه..»

تنهدت وكعدتني وباستني انوب صاحت علئ وقار...وقيره جيبي غزيله مشتاقه الها جبتلها ثوب يجنن من سوگنه ...

خطيه وقار جابتها وضلينه كاعدين اندك الباب واجت وقار كالت...امي اجت

اني من سمعت كالت...امي اجت ما اغرف شصار بيه بطني لوتني احس وراها شئ لان خالتي ام فلاح ما يجي شئ من وراها زين

سلمت علينه واجت كعدت ومرت ربع ساعة كالت بتنهيده...جولييت اريد احجي وياج علئ انفراد

اني بلعت العافيه احس رجليه ماتت ابد ما بيه اواجها وروحي انرعبت ما ادري حسيتها راح تسالني عن اشياء اني بغنئ عنها واكيد هل شئ يغثني...

خليت و ورحت وياها بعد ما مشمش وصلني وهو يكولي...عبيبتي سكيته امسي منا لا اودعين ...« حبيبتي جكليته امشي منا لا توكعين »

دخلنه للغرفه وهي طلعت مشمش قشمرته بالف دينار...

كعدت وتنحنحت كالت...اوووف ما اعرف شلون ابدي وياج بس اني حابه اتاكد من هل موضوع منج انتي خصيصا

فركت اديه وبلعت ريكي...اي عادي اتاكدي بس هو شنو هل موضوع ؟

صمتت دقايق وبعدها كالت...صدك عود انتي نايم وياج هذا الي يهرب للخارج وهيثم همين ..

فتحت عيوني مصدومه من كلامها واحس انكسرت نصين هزيت راسي بنفي ..خاله انتي شتحجيين ؟ مستحييل هل كلام والله جذب...

نفخت بضيق كالت....اي هاله وامها وكلها تحجي بهل موضوع يعني گرابتج كلها تحجي بهل موضوع انوب يكولن عود انتي مهزومه ويه هذا الهرب اخوتج وعود انتي متفقه وياه اذا هربج لاخوتج ينام وياج

ومتفقه وياه من قبل لا ترحين للامام الكاظم عليه السلام ومناك انتي مستغله الفرصه ومهزومه وضاحكه علئ جاسر بهل شئ ومورطه ولد عمج

حتئ هاله دكول لاهلنه اهلي واهل امج ان هي هاي شهادة هيثم وهشام...

حسيت نار صعدت بداخل روحي بتلعت ريكي المر...وانتي صدكتي هل كلام

لحظة صمت منها وبعدها كالت...اني اريد اسمع منج انتي كلامهن ما يهمني كليلي اكو واحد منهم تعرض الج ...

صرخت بوجهها بغضب واني ابجي....لااااااا جذب جذي كل الي صار جذب اني اعرف الي صاااار هو كله بسبب بيت عمي هم السبب هم الحقراء

هم كايلين الاخوي عاصم ان جاسر ضاربني وعامي عيوني واخواني انتفضوا واتفقوا يسفروني الهم

هاله العار هي واخوانها هم الي اذووني بهل محنه والله واذا جاسر ما اخذ حقي منهم لا اعرفه ولا يعرفني ...

رجف كل جسمي من اتذكرت اعتداء هيثم عليه بجيت وجاوبتها بقهر...تدرييين خاله اني انسانه ضعت من الكل مو من حق اي واحد يحاسبني علئ هل شئ ...

واحد كلب مثل هيثم والله راد يعتدي عليه بس الله الله هو الي نقذني منه ربي ما قبل اكووون مدنسه ربي هووو الحافظ ...

والله ومحد لمسني ليش هيج يحجن بعرضي ليييش والله تعبت ولعبت نفسي وجزعت والجزع حرام بس ما اكول غير حسبي الله ونعم الوكيل ...ربي هو ياخذ حقي منهن حرام رمي المحصنات...

ما اسمع بس صوت خالتي صبريه الخشن وهو ترعد...شكووو شكووو ام فلاح شكووو شبيج ويه جكليته ليش هيج جويلته صوتها طالع وتبجي انتن ما تملن منها ليش،بس تيجن بيها...

شوفن ولجن وروح ابوووي اني بس منتظره كلمة من جكليته اله اطلكها من جويسر اخذها واريد واحد يفک حلگه شني موتوها ما تحبون تشوفوها مرتاحه...

جاوبتها خالتي ام فلاح بارتباك...علئ كيفج خيه صبريه علئ كيفج ماكو هيج جنت استفسر منها...

ردت عليها بانزعاج...اكلج خيه اشو انتي ما تعرفين تحجين شني جايه ودكولين وتستفسرين والله هذا نايم وياج وذاك نايم وياج انتي ما تستحين يو زحتي المستحه ...

واردفت بجديه...اكلج وبعدين انتي ما عندج ثقه بجكليته تثقين بحجي هويله العار وتتهمين جويليته بشرفها وما تصدكينها من تحجي وتجين تصدكين هوويله وروح امي اله اروح اهد عليها واطيح حظ اهلها...

اني ضليت ابجي كووولشي ولا الشرف وخالتي صبريه طكيها ركضه وهي تصيح..خايبه وقييره تعاي اخذيني البيت هويله افصم ضهرها فصم هل نعال هاي...

..........................

وقار...

ما اشوف اله گبت العيطه وخالتي صبريه ضلت تصييح وتحجي وتغلط علئ هاله وعلئ خالتي ام هشام ...

انوب كالت...وقيييره وقييره الطرمه گومي امشي وياي گومي خلينه نروح نطيح حضها الهاي العار بنت العار ولج انه مو زين مني وساكته لحد الان وهم خطفوا جكليته و روعوها وخبلوها...

اني باوعت الامي بخوف اخاف متقبل اروح وبعدها كالت...روحي ويه خالتج صبريه ذن صدك مصخنها...

عاد اني ما صدكت خليت ورحت اركض وياها بعد ما لبست نعالي وحجابي وصايتي وجهال جاسر يركضون ورانه...الوووح اياااااج عمه لوووح اياج « اروح وياج عمه اروح وياج »

رجعتهم وسديت الباب وهم ضلو يبجون ويصيحون...وطار افتعي الباب والله بس اجين عفج وما نعليج قبين ببيتنا...

« وقار افتحي الباب والله بس تجين اعضج وما نخليج تطبين ببيتنا »

ضحكت عليهم وخليت ورحت اخذنه تك تك وانطلقنه وخالتي صبريه خلصتها علئ الولد ...بعد امك وصلنه بساع اليوم اريد انعنع ضلوعها هل عار بت العار...

هي قبل لا تطلع من البيت جابت وياها توثيه لكتها مشموره بالحديقه بس مسدسها ما جابته دكول خليته ببيتي كون كنوش يعرف يرمي جاا ضميته عنده...

والله شويه و وصلنه عند بيت خالتي نزلنه بعد ما انطت الكروه كلتله...خايب هاك كروتك خضيتني خض حتئ معدتي صارت بگلبي شسالفتك لو جايبه كنوش يسوق احسن منك ...

كلها...والله خبصتينه بكنوش

كلتلها...خاب دوولي تروحله فدوه ...

هو ضل يضحك عليها وهي ودكفت بباب بيت خالتي ام هاله ودگت الباب بثنين اديها هطرته تهطر ...

طلعوا مرعوووبين ....شكووو شكووو منو هذا

اول ما فتحت الباب صبريه دفعتها ودخلت للبيت كسرتها تكسر...

هي من شافت خالتي صبريه خلت وشردت جوه وصبريه تركض وراها بتوثيتها وشدت عبايتها علئ خصرها ...

وتصيح بعلو صوتها...خايبه هوووويله اليوم اخليج اتمنين الموت وما تلكينه والله اليوم ازوعج العافيه انتي وامج...

طلعت امها و وياها سحر تخصرن كالن ...شكووو خير هادات علينه ما تستحن

صبريه تخصرت وهي تحجي ببرود.. لا والله خيه ما نستحي عفنا المستحئ والخجل الجن مو انت شريفات واحنه كحا..

ولجن ليش تحجن علئ جكليته...وروح امي وروح امي اليووووم اطلع قهر ابو اللول وحسنه بيجن ...

هي هجمت عليهن وهنه هجمن عليها واني واكفه بس اتفرج وهي صارت بالنعل بس شنو خالتي صبريه لوتيه طاحتلهن بالتوثية وين اليوجعهن محد كدر يوكف بوجهها يتقربن منها وهي تجيهن الضربه

وتصيح...ولجن كح...برابيك ولجن انتن شني وتجيبن سيرة جويليته علئ اللسانج من تغدن سبع فدوات الها ولفروخها ولكنوش ويالخايسات يالجايفات يالغوارات...

اردفت بوعيد بعد ما صكطتهن...اكلجن ولجن اذا وحده منجن جابت سيرة جكليته علئ السانها اله اكصه الها واخلي يتلولح برگبتها

تفلت عليهن وطلعت وهي تجر بتوثيتها كالت ..ما ريحت نفسي خلي ارجع بعد بس جم غلطه واجي...

رجعت كلتلها...خايبه ام الوصخ من تحجين بعرض جكليته انتي تجين وياها ولج جويليته تشرفج وتشرف اهلج وعشيرتج و ولدج وبناتج

خالتي ام هاله ضلت تصيح وتغلط علئ خالتي صبريه وكلتلها...والله بختج بهل توثيه اله جااا موتج

عاد خالتي صبريه ما قصرت طكتها بزييج اقوئ،من زيج جعفر...

وخلينه وطلعنه وخالتي ام هاله تتهدد وتهدد واذبح واصلخ وبس اصبري الي...

خلينه ورجعنه بتكتك وخالتي صبريه تدخن كالت...بعد كون اهدن علئ جويسر

سكتت ما ناقشتها اخاف انوب تكتلني ما الي حيلها...

رجعنه للبيت وهي تسولف كالت...موتتهن تموت ولجن انه بت عرب ابووي امي عمارحيه وابوي من ديالئ وماخذه السباعيه منهم ولو انه طالعه الامي

جولييت خطيه فرحت بس جان اكو شئ،بداخلها زاعجها ...وحقها الشرف مو قليل وهنه ما مخليات بيت اذا ما رايحات وطاعنات بشرفها ...

....................

جولييت....

سوسة الجفا هاله تنخر بيه من زمان وكل مره تخليني طريحه ومكسوره بسبب كلامها اللاذع وحقارتها...

خالتي ام فلاح من حجت هيج ويايه حسيت روحي ما ضلت بيها انفاس وروحي حتفارگ جسمي المتوجع ...

صدك انهرت من كلامها ومن اتهام هاله الباطل ومن بعدها خالتي ام فلاح صار بينها وبين خالتي صبريه نقاش حاد وخالتي صبريه هدت علئ بيت خالتي ام هاله...

احس خالتي صبريه احن عليه من امي ومن كل شخص مر بحياتي هوايه ساندتني وتحبوني وتموت عليه حتئ لو كنت علئ خطا...

اعتكفت علئ نفسي واني ابجي وما ادري بجهالي وين خالتي ام فلاح ضلت يم الجهال...هي وماما رضيه

بعدها حسيت بيد حنونه علئ شعري وهمس دافي...شبيها جكليته ليش تبجي ما تعبتي ؟

حطيت ايدي علئ شفايفي وشهكت بحسره....عوووفني جاااسر عوووفني خليني بضيمي

سحبني وكعد وضمني الصدره كال باستغراب... اني يا يوم شفتج وخليتج بحالج اذا جنتي تبجين او فرحانه

حضنت وجهي بكفوف اديه همست بعذاب...الدنيا هامت بيه والكون اعتصر عليه واحس مختنكه من كووولشي

نزل اديه وباس خدي بحنان.. شبييج احجيلي منو مضوجج ...

سولفت اله واني ابجي عن الي صار. وعن كلام هاله وامها الي موصلاته لعشيرتي وخالتي ام فلاح هي الي كلتلي...

حضني وتنهد كال...خلي يولن ما يوصلنج هاي من غيرتهن هييج يحجن لان مجاي الله يرضئ عليهن وما حققن غايتهن...

بجيت بصوت عالي واديه علئ وجهي اخفي ملامحي الحزينه عنه ....ريحني جاااسر ولو بكلمه

ضحك وباس راسي كال...شبيج مغثوثة بحجيهن
هو بس خيط القماش ال غطى جسمج
ب عيني استر من عبيهن..

انصدمت وانذهلت من كلامه ومن الشعر اليه حجاه عني وما اعرف حسيته مثل النسمه الدافيه وتخللت بداخل اعضامي

رفعت ايدي واني اريد اشوف ملامحه اريد احضنه كلامه مو بس بلسم انعشني رد عليه بكلام كووولش حلو احيي الي كتبه ..

حضنته حيييل واني ابجي واضحك...الله الله يجننن انت شنووو انت ترفعني للسما وتخليني مثل الطيير كلامك يجننن يجننن...

ضحك كال...اي والله ينطبق عليج والله انتي اشرف من عبيهن ومن عشيرتهن لا تهتمين الهن وكلامهن خلي مثل الحذاء شوكت ما يعجبج البسي ودوسي عليه انتي ارقئ من هيج انتي تشرفيهن...

ضحكت بفرح...عيدلي الشعر

ضرب خدي بخفيف...كافي لج بربوك لا تصيرين طماعه ...

ضحكت بصوت عالي وحضنته...

كال بمرح...هاااا ولج شوو فرحانه مو مثل قبل تتعيقلين عليه لا تفشر ولا تفشر

ابتسمت وضميت راسي بصدره...عادي ابو جهالي انت تعودت علئ اللسانك ...

ضل يلعب بشعري واني ما اعرف حبيت اساله عن شام كتله...صدك هم رحت الشام ؟

جر نفس عميق كال...لا ما رحت بس خابرتها وتسأل عنج ..

ابتسمت بحزن...اني هماتين اريد اخابرها واتشكر منها لان بصراحه هي ممقصره ويه هدوره و الاطفال...

تنهد بهدوء كال...اي لا هي حبابه ما تقصر اني خابرتها اذا محتاجه شئ وتضل ام غزل ومن واجبي اساعدها واقدم الها تريده عشت وياها سنين والعشره ما تهون...

بلعت ريكي من كلامه...اي هي هماتين مو ذنبها وان شاء الله ربي يصبرها...الضنا اغلئ من الرووح

سحب نفس عميق...وغزل جانت مو بس ضنا غزل حنينه عليه غزل ما اعرف اوصفها غزل اني صرت الها ام واب وربيتها بروحي جنت اخاف عليها مثل الريشه بس للاسف القدر اكبر مني ومنها وحرمني منها وحرمها من امها ...

نزلت راسي باسف....الله يصبر الكل علئ فراكها ...

همس...اميين

عضيت علئ شفايفي كتله...جاسر انت ليش ضميت عني ان شام زوجتك شرعا شنو الغايه اني سمعتك من زمان بس محجيت

حط ايده وره ضهري كال...جنت اريد اعرف شلون اتخذ قرار صح واراعي شعور الصفحتين هم انتي وهم هي اولا انتي حالتج تعبانه وعندج صرع والعصب متدمر عصب المسسؤؤل عن النظر فما ردت يكون اكو شئ يشغل بالج واني اعرفج انسانه تكتمين بداخلج وما تاذين غيرج بس تاذين نفسج

وشام من كلتلها انتي محرمه عليه جانت الغايه منها هو اخماد النار الي بداخلها كونها زوجه اولئ وام فاقده طفلها لذلك هي تحس بنفسها ان هي بكل تصرف تتصرفها صاحبة حق حتئ لو كان هل شئ مو من حقها...

ما ردتها تجي لهذا البيت وتتهجم بحكم ان هي زوجة هذا الرجال الكاعد بالبيت ومن حقها تدخل فكلت انتي محرمه شرعا...

وهم ردت اعرف شلون اخذ قرار وأفكر صح واني بعيد عنجن ثنينجن مو بس هي لان بصراحه ضليت عاجز كدامجن ...

طفله بريئة ماتت باحضاني

وام مفقوده ومثكوله نفقدت من سنين عني...

هل شئ خلاني بصراع داخلي بحيث ردت ابتعد عن الطرفين واشوف المنو اميل وابعد عنجن المشاكل بهل شئ اطمنج وهي اهدئ من روعها...

جريت نفس بخيبة أمل وتوتر...بس اني سمعتك دكولها ان انت مو يمي وانت جنت نايم بصفي وتبوس بيه ...

ضحك كال...هسه شويه ودكولين اغتصبتني وتذبين عليه تهمه

ابتسمت بحزن وسايرته...عادي استقبل تهم خالتي ام هاله طالعه عليها...

رد عليه بقهر..تروحلج فدوه بس لتراب رجليج انتي،وياها ما تتقارنين هاي مو خاله هاي زباله

ابتسمت...هسه لا تغير الموضوع كمل ليش من سالتك كلت الها اني مو يمها تخاف منها ؟

تنهد بقهر كال...والله فد بربوك ولج شنوو اخاف منها

واردف بجديه...اني ما راح احجي وياج لان انتي ما عندج ثقه بيه لذلك راح اسمعج المكالمه الي دارت بينه...

فتح المكالمه هي صدك نفس،ما سمعتها بس اني من كال لا مو يمها انزعجت لان نكرني وخليت ورحت دخلت جووه...وبعدها صارت عندي ولاده

جانت بنص المكالمه كلتلها...مشان الله احكي عن جد انت عندها نايم معها ولا شووو احكي لا تخبي عليه ؟

رد عليها ببرود..شبيج شام اكيد عندها هذا بيتي وبيت زوجتي واطفالي وانتي تدرين اني متزوج وشرحت الج الوضع وحجيت الج عن زواجي من جولييت فاكيد اني ببيتي قابل انام بالشارع ...

رد عليه بقهر...هااا لكان هيك يالله منيح تصبح علئ خير

تنهد ورد عليها...شام لا تزعلين انتي عزيزه عليه واني ما افرق بينج وبينها وان شاء الله انصفجن ثنينجن بس اني لحد الان ما اعرف شلون اتصرف واكيد لا اضلمج ولا اضلمها...

غلق المكالمه من عنده واني تفاجئت...ليش خليها تكمل

رد عليه بهدوء...انسانه مجروحه ومظلومه شام ومرات ما تعرف تحجي وتتجاوز اعذريها وماكو داعي تكملين باقي المكالمه...

وسدي هذا الموضوع اني لا مستغفلج ولا ناكرج اني حجيت وكلت ان انتي زوجتي واني عندج مو ذنبي اخذتي بس اول سطر وانهزمتي...

غلست عن باقي الكلام وتنهدت...جاسر شوكت تسويلي عمليه ترئ والله دااختنك حييل احس حبل مربوط علئ رگبتي ويخنك بيه ومحد يحس بيه والله مليت من هل ضلمه مشتاقه اشوف وجوهكم...

نفخ بهدوء كال...اي يروحي ان شاء الله ما ضل شئ للعملية وتفقت ويه الدكتور وكال ان شاء الله بس تجي اسويلها تحليلات وفحوصات اجري الها العمليه

لزمت ايده بلهفه وفرح...اي فدوووه جاسر والله تعبت اريد اشوف هدوره عفيه...

حضني وضمني الصدره ...

وفعلا ضل يراجع بيها وحددوا اليه موعد عمليه وان شاء الله يارب تكون ناجحه بس لحد الان ما انطانه امل كبير بالعملية...

............................

سجئ...

راحت عمه ريهام البيت جدو مهيوب واني ضجت حييل لان بصراحه ما اعرف احس محرجه اني واخواتي واحنه عند بيت جدو عكاب...

بيبي كالت...ان شاء الله نرجع وقار وحجوا ويه جدو عكاب وجابر وكال ان شاء الله ارجعها...

همزين راح تجي وقار هي صح اني اخاف تسبب الي مشكله ودكول لعمامي عليه بس احسن علئ الاقل احس اكو بنيه ويايه...

عمو جابر اليوم عازم عمو جاسر واصدقائة الي ساعدوهم وانقذوا جولييت من ولد عمها واخوانها...

اني جنت اساعد ببيي بالعزيمه احس ضهري انكسر بس ميخالف هم ما قصروا ...

اني ما جنت اسمع بس صوت ضحكهم والخبصه مالتهم....

خليت ورحت غسلت مواعين ...

شويه وما اشوف اله عمو جاسر دخل للمطبخ وهو يصيح...جااااي جاااي ...

من شافني فتح عيونه مصدوم واني رجليه ماتت من الخووف ولزكت روحي بالكاونتر بلعت ريكي ببكاء...عع عمووو و والله

باوعلي بقهر كال...شجابج هنا...

نزلت راسي واني امسح بدموعي هو تقرب مني ولزمني من كتفي كال...احجييي ولج شجابج هنا...

نقذ الموقف دخول بيبي ام جابر لزمته من ايده بحنان...هااا يمه جاسر كول يالله خليني افهمك

باوعلها بغضب كلها...صار شكد هنا وشجابها

لزمته من ايده وهي تتوسل بي وبعدها اخذته للغرفه وضلت تسولف وياه انوب اجه عمو جابر هماتين ضل يحجي وياه ..

مر تقريبا ساعه كامل وانوب واحد من جماعة عمو صاح من الاستقبال بصوت غاضب وعالي...خااااب ابو مرتضئ،وييين صررررت مخلينه كاعدين الوحدنا شنو مزهريه...

بلعت العافيه ياربي بس لا يكتلني عمو والله السويته مو قليل وكله بسبب ماما ياربي شسوي...

شويه واجه عمو باوعلي بجمود وبعدها كال...تعالي سجئ

تقربت منه واني ابجي كال بهدوء...شوفي عمو هل كلام ما اريد اعيده امج تزوجت وضحت بيجن وهي من زمان مضحيه بيجن لذلك يا بعد عمج تبطلين سوالف امج وتمشين ويه العالم علئ سراط المستقيم وخلي النفس راضيه عليج

سحبت ايده ردت ابوسها واني ابجي...عمو فدوه عمو والله بعد ما اعيده ابببد ونوال مة امي اني تبريت منها اليوم الدين والله

سحب ايده مني وبعدها سحبني من راسي باسني علئ راسي بهدوء كال...يا عمو قابل احنه نكرهج احنه نريد مصلحتج وما نريد واحد يحجي عنج وان شاء الله الصار عبره الج وانتي تضلين انتي واخواتج امانة اخوووي المرحوم ..

واني مسؤؤل عليجن اليوم الدين ومن اقسئ عليجن مو السبب بس لان اني ما اريد العالم تحجي عليجن وما اريد الناس تحجي عليجن تمام

هزيت راسي بقبول ودموعي تجري...اي والله عمو بعد كله بامرك انت ابووويه والله بعد ما اسوي شئ،بدون علمك والله كله ارجعلج ...

كال ببتسامه...يالله حضري اخواتج حتئ ارجعح البيت جدج لان ذاك بيت ابوج مو بس بيت جدج ...

فرحت حييل وبسته بخده وركضت واني احضر اغراضي واغراض اخواني...

لبست تنوره زيتونيه وقميص كريمي وحطيت الشال علئ راسي بدون ما الفه وانتظرته هو صاح علينه وطلعنه واني شايله جنطة الملابس...

من طلعنه جان واكف شاب بس حليوو اني صح مراهقه يس عيني زايغه طالعه علئ امي هههه

لا بس اني ما اعرف مثل كل بنيه صار نظري عليه وهو لا باوعلي ولا شئ بس جان حاط ايده علئ خصره وكل شويه وكال...يالله ترئ ذليتونه بهل عزيمه نريد نولي ...

رضا اعرفه من زمان فرد عليه...ما تولي منو لازمك وين ما يركض رضا تركض وراه ...

عمو جاسر جان شايل اختي الصغيره ويبوس بيها كلهم...يالله خلي اوصلكم بطريقي مدام ما جايبين سياراتكم وبله لغوه زايده...

رضا...شهل الصداقه المعفنه صدك ما طلعت عزيمة ذله...

اجه رضا يصعد بالصدر وعمو لزمه..وهاااا خيير ابو الشباب شو كاعد بالصدر ونبيل كاعد وره بنات اخوي وين اخليهن بالصندوك ...

رضا...يعني رتبتي وهيئتي وعنفواني وتريد تكعد المزعطه ليكدام واني وره ...

نبيل كله...يالله ماكو اشكال ابو مرتضئ خلي يكعدن يمي مثل اخواتي ومثل بنت خالي ...

جاسر...انلصم لا اجي اسحلك من السياره وانت رضا اكعد ليوره...

رضا...لا والله ما اكعد صدك تحجي الجهال ليكدام واني ليوره شدكول عليه وزارة الداخلية ...

جاسر...دكول تاكل تبن ويالله وره واذا تريد اكعد بالصدر وكعج نبيل بحضنك

بس مال انت تكعد بالصدر وبنات اخووي يكعدن يم نبيل هذا الشئ شيلو من اذاناتكم...

نبيل...واني شبيه شو السلك العسكري يحلفون باخلاقي

رضا...اي مو اخلاقك اية الله العظمئ

دفعه...وخر خلي اكعد بصفك ابو مرتضئ لا عزيمته بيها خير ولا توصيلته بيها خيير مذله وطاحت شواربنه...

صعدت اني بالصدر وبيه الضحكه واخواتي وياي وعمو يسولف وياهم واني حاضنه اخواتي ورضا تخبل تخبل لان اني كاعده بصدر وهو ليوره ...

ونبيل صابته غيره وكال..نزلوني حسيت روحي وحده ماكلين عشاها شنو كاعد ليوره وحاط بنات اخوك ليكدام ...

رد عليهم...يابه غير شرفي شلون اكعدهن بصفكم والي يباوع عليهن افكس عيونه...

رضا...ترئهنه جهال..

نبيل باعتراض...لا مو كلهن جهال...

باوعله عمو من جام السياره ورفع حاجب بعدم رضا

نبيل كال بتغيير...لا بصراحه بعدهن جهال...

وصلناهم بالطريق ومن بعدها وصلنه عمو البيت جدو مهيوب وهي اشتغلت عليه الرزايل دك من كل صوب بس عمو ما قبل وضل يحجي وياهم وتقبلوا الامر الواقع......

.........................
وقار

بيت عمي انطونا خبر راح يجون لبيت جاسر ، بس معرفت ليش ، وبقيت كولش محتارة ، امشي واعصر بأديه مرة واكل بأصابعي مرة ..

الى ان سمعت صوتهم اجوا وفاتوا بالاستقبال .. وفاتت عليه ماما رضية وكابلتني مبتسمة ووجهه مستبشر ..

كالت يله يمه وقورة يردوج بيت عمج روحي سلمي عليهم وسمعي منهم وشوفيهم شنو يردون ..

باوعت لنفسي لابسة كلبية ، رفعت راسي باوعت عليها
لزمت اديهه كتلهه واني ابلع ريك : بس ابدل ملابسي واجي ماما ..

هيه ظلت تصرب على اديه باصابعها ومبتسمة
براحتج يمه اي غيري ملابسج كشخي وتعاي ...

ضحكت واني ادير وجهي منها وأروح للغرفة ، بدلت ملابسي ، لبست ثوب بنفسجي طوخ بينصل ونازك ولفيت الشال هم بنفسجي بس غير درجة ولايك ويه الثوب ..

ولبست زنجيل ذهب شويه فخم وحلوو ..

بقيت واكفة يم الباب مال الاستقبال واستحي افوت واعصر بأصابعي ، لشويه انفتحت الباب وطلعت ماما رضية ووياهه عمتي أم جابر ..

أني خجلت ورجعت بخطواتي ليورة شويه ، ماما رضية كالت وينج تأخرتي يمه ..

عمتي ام جابر كالت خليها على راحتها خيه ..

واني رحت سلمت عليها ، حضنتهه وبوستهه ..

وهيه سحبتني من ايدي وفوتتني على الاستقبال اول مافتت اجت عيني بعين جابر لحظة بس ..

عيونه حجت هواي بهاللحظة ، بقيت اباوعله واني اتوجه لعمو الي كان واكف يمه سلمت عليه بوسته اريد ابوس ايده هو سحبها وباس راسي ..

باوعت لجابر بنظرات عابرة وداروح اكعد بدون مااسلم عليه ...

عمو سحبني وكال سلمي على زوجج و ابن عمج ..
حسيت بخجل .. ، والتقت نظراتنا جانت تشرح كولشي عتب و حب ..

همست شلونك جابر ومديت ايدي اصافح ايده ، هو ضحك ومد ايده وظل يحركهه وعصرهه ..

سحبتها منه بسرعة بعد ما سمعت منه رد السلام ..
_ هلا وقار شلونج يابه شون صحتج

هزيت راسي وتمتمت بخير الحمدلله ، ورحت كعدت بصف جاسر

عمي الشيخ عكاب كال احنه اليوم جايين نكطع الزعل ونرد بنيتنه وقار لجابر ونرجعها للبيت كافي زعل وخلي الكلوب تتصافى وترجع المياه لمجاريهه شتكولين بويه وقار ؟

جاسر مد ايده لكتفي وظل يربت عليه
كال ها وقار شتكولين ؟

باوعتله مبتسمة : بكيفك انته ..
رد : لا ماكو بكيفي انتي قرري ..

عمي جاوب : اي بويه وقار كافي هاي الفترة الي كضيتوها واحد بعيد عن الثاني اكيد جابتلج فد نتيجة
صح لو انه غلطان!!

مديت اديه بتوتر وصلتهم لحد ركبي ومشابكة اصابعي
ببعضها كتله اي صح عمو بس اني ماعندي مشكلة ارجع بس هم جاسر خلي يكول كلمته ارجع اني ..

جاسر لزمني من ايدي وكومني واخذني باتجاه جابر ظليت ارجف خجلانة عبالك مو زوجي ..

جاسر خلاني كبال جابر وكله هاي اختي امانة ابوي راح اخليها بامانتك مرة ثانية ودير بالك عليها وماريد اسمعك مزعلها وان شاءالله اخذت درس من الي صار كله ..

هو كال تدلل ابو مرتضى شعدنا غيرك وغير اختك ..
ودنك باسني على راسي ، رفعت نظري عليه مبتسمة وعيوني تلمع وهو مبين عليه فرحان لان تصالحنا ..

سأله جاسر شوكت تاخذهه ؟
هو رد هسه حالا فوورا ..
جاسر وجه كلامه اليه كال يله وقار رجلج مستعجل عليج .. حضري نفسج

ضحكت ترخصت منهم رحت حضرت اغراضي .. هم بقوا على العشه وبعدها ودعت الكل ورحت وياهم

دخلنا لبيت عمي وهم يكلولي توة نور البيت ، فرحت بداخلي وحسيت بقيمتي عدهم

اني مشفت منهم شي مو زين بس هيه كل المشكلة بيني وبين جابر ، عمي وعمتي احبهم ويحبوني وكذلك ريهام اختي اعتبرها واموت عليها ..

دخلنا للغرفة هو جان بيده الجنطة بسرعة سد الباب وحضني حيييييل حتى قبل ميفتح الضووة

واني تشبثت بحضنه مثل الغركان وحيل مشتاقتله ...

مد ايده فتح الضوة ورجع باوعلي ويتفحصني يلزم باديه يبوس بيهم ويتلمس خدودي ويبوس بشفايفي .

بعدته مني شويه واني اضحك شبيك جابر دتتفحص بيه خاف نقصت ايد رجل موو ؟

كال ولج مشتاقلج خبيثة هيج تهون عليج العشرة ..

هاي شبيك بعدك زعلان عليه جابر ؟ المفروض اني ازعل موو

رد لا بس صدك مشتااااااك وانتي طوختيهه فد مرة ترة ..

شكلنا راح نتزاعل مرة ثانية موو ؟

اخذني كعدنا على السرير لازم اديه ظلينا نتعاتب شويه بعدها خلاني على صدره ويتغزل بيه ويهمس ويعبر عن شووقه الي ..واصابعه بداخل شعري ..

بعدني عن حظنه ثواني باوعلي و بابتسامة حلوة تلامس هدوء ملامحه ..
كال احبج وقار ...
..........................

ريهام...

اليوم عملية جولييت راح جاسر وياها وصلاح وجعفر وخالتي ام فلاح وماما رضيه وخالتي صبريه ومناك اهلي يجون...

هي خطيه خايفه حييل وكل شويه و ودعت جهالها وحضنتهم ومن بعدها راحت ...

اني جابني صلاح قبل لا يروح الهم لان ضليت عندهم اسوي اكل وانضف البيت خطيه محد الهم

وهماتين جنت محتاره بالطفله بنت جولي بصراحه جولييت ابد ما تهنت بهل طفله ولا شافت طفولتها ان شاء الله تطيب وتشبع منها...

العصر خابرت عليهم كالو...خلصت عمليتها بس ينراد اسبوع يالله يفتحون الشاش وبعدها يشوفون اذا انعاد النظر او لا بعد ضلت يم الله...

ضلت يومين بالمستشفئ وهم يرحون ويجون عليها واني بالبيت...

دخل جاسر هو وماما رضيه باليل اني سويت اله العشا دا يتعشه واجت شام هي وامها ...

دخلتهن بالاستقبال كالت...بدي جاسر اذا ما بجعزك

بلعت ريكي وهزيت راسي بنفي...لا ولو ادللي هسه اصيحه

رحت حاجيته هو استغرب كال..شعجب اجت بدون ما تتصل بيه خير ان شاء الله

ترك الاكل ومن بعدها غسل وخله وراح واني رحت ضيفتهم هي كالت الامها...امي ممكن بتتركينا علئ انفراد بدي احكي معو بموضوع مهم...

امها ابتسمت باحراج وباوعتلي ابتسمت الها كلتلها...اي خاله تفضلي تعالي هناك يم ماما رضيه...

خلينه وطلعنه ومن طلعت هو صاح عليه كال...ام مريم جيبلي جاي بلا امر عليج ...

جاوبته بهدوء...اي تدلل ثواني واجيبلك

سويت اله جاي ودا ادك الباب سمعتها كلتله بكل حزم واصرار...جاسر اناااا

نهاية البارت....يتبع

كونوا انتم كونوا بخير...احبكم 💔

نور سمو العراق 😘

موش تنسن النجمه البتقاليه فديتجن 😍

اليوم كان لازم يكون هو البارت الاخير بس للاسف ما كدرت لان اني اليوم رحت للجامعه ورجعت تعبانه ونمت وسويت عشا وبنتي طنكرت عليه وكل شويه وكطعت الشاحنه يووو لخه كوه كتبت...

المهم ان شاء الله لو باجر لو عكبه البارت الاخير 😥

الطلحه اكييد 😍

ههههههههههه هاي رسلوا من الخاص