جذبني فمك البني

البارت الثاني والعشرون

مسك يديها وشبك اصابعه الرجوليه مع اصابعها الناعمة ،
كان كف يدها غارق في حجم كفه الكبير ،
كان ملمس بشرتها كفيل بذوبان قلب صاحب الروح التائهة ،
شعر بأنها تضغط على اصابع يديه فزاد بضغطة يده كرده فعل ،
التلامس كان عباره عن تواصل بين روحين ، مشى معاها بخطوات قصيره كانت كفيله بتهدئه روعتها وانتهت النوبه بكلام من القلب للقلب ،
كان كفيل بشفاءها من المرض النفسي المحتمل اصابتها به طيله العمر...

ادهم : هاهيه منفكر بشغلات سلبيه بعد..

سلين : اي ..

ادهم : ليش متباوعيلي من احجي وياج..

ماعرف ليش خجلت كلش من لزم ايدي ومكدرت اباوع بعينه ابد هزيت راسي ساكته اعتقد قره الخجل بوجهي لان انتبهت عليه باوعلي من لزم ايدي وشاف رده فعلي ...

جر نفس طويل وكال ..

ادهم : لزمتي لأيدج كانت نوع من انواع العلاج النفسي لان ماكو غيرنه هنا سوى انه وانتي ، اعتبريها علاج من طبيب للمريض مالته احنه ك اطباء ننصح اقارب المريص او المرافقين اله يحتضنوه او يضلون لازمين ايده فتره معينه لهذا لزمت ايدج اليوم اعتبريني اب اخ كبير الج ..

رفعت عيني وميته خجل ماعرف شبيه كوه حجيت وياه..

سيلين : ليش وين الربط بينهن ...

ادهم : مسك اليد من قبل الرجل للمرأة يحفز مشاعر السعاده ويخفض مستوى التوتر والقلق ويعتبر علاج مجاني للتخلص من المشاعر السلبيه واستعاده الجسم للطاقه الايجابيه لهذا اول ما مديت ايدي الج ولزمتيها خف التوتر عندج نسبه ٥٠ بالميه ،
اما لو عندج شخص قريب عليج و يكون محلل عليج مثل خطيبج او زوجج يكون العلاج وياه اكثر فعاليه...

سيلين : هههه اول مره اسمع هيج شي زين ليش شنو السبب...

ضحك وكال..

ادهم : لان عند احتضان المريض من قبل اكثر شخص يحبه قلبه او مسك ايده يزيد من نسبة الأوكسيتوسين في الجسم هذا الهرمون يفرزه الجسم عند الاحتضان، ويلعب دور جبير بالمساهمة في تحسين العلاج النفسي في المستقبل حتى بعض العلماء سموه هرمون الحب او هرمون العناق..

حجاها وابتسم مادري هو خجلان مني مدري اني لان خجلانه منه هيج كاعد احس ...نصيت راسي وهو استرسل بالكلام..

ادهم : يمكن لهرمون الأوكسيتوسين أن يخفف من أعراض الأمراض العقلية المختلفة، وبالتالي يمكن أن يساعد المرضى الذين يعانون من اضطرابات التوحد أو اضطراب الشخصية الحدي أو اضطراب القلق"
ودراسات علميه تكول هرمون الأوكسيتوسين يمكن أن يقلل من التوتر الاجتماعي، ويزيد من الثقة والمهارات الاجتماعية.

سيلين : هههههه والماعنده حبيب شلون يتعالج..

ادهم : اساسا انتي كاعد تعالجين نفسج بنفسج فميحتاج حبيب...

صفنت عليه ضحكت.

سيلين : شلون يعني؟

ادهم : منتبه عليج هواي تحضنين نفسج..

سيلين : وهاي شعليها بالعلاج..

ادهم : شلون شعليها من تحضنين نفسج بأوقات الإحساس بالقلق والتوتر، راح يبث الدفء بجسمج و مشاعر الراحة في النفس راح تزداد بغضون لحظات بسيطة.

سيلين : صح كلش ارتاح من احضن نفسي حتى اهدأ وانام بسرعه..

ادهم : ملاحظ هذا الشي..

سيلين : شنو السبب ؟

ادهم : الشخص من يمر بأوقات عصيبة و ماعنده حبيب او شخص مقرب جدا الافضل اللجوء إلى احتضان نفسه، حينها يفرز هرمون الأوكسيتوسين لهذا يشعر الإنسان بالأمان، ويصبح بمقدوره مواجهة أسوأ المشاعر والأفكار السلبية براحة وهدوء، مع الإشارة إلى ضرورة زيارة الأطباء المختصين، عند زيادة الأفكار السلبية عن الحد الطبيعي والمسموح...

سيلين : يلا فلحت بشي زين واخير ههههه..

ادهم : مو كتلج انتي ذكيه..

سيلين : مرات احسك تمدحني علمود تزيد ثقتي بنفسي.
ادهم : مو عيب وان كذبت على مريضي في سبيل يتعالج لكن انتي فعلا ذكيه بعيد عن المجامله..

سيلين : شكرا عمو تعبتك بس سؤال اخير..

ادهم: جواب.

سيلين : هذا الهرمون الكلت عليه وقبله كتلي بالجلسه هرمون الادرينالين مو هيج اسمه صح.

ابتسم وميل راسه وكتف ايده ..

ادهم : صح..

اني هم ابتسمت على ابتسامته وضيعت السؤال ضليت صافنه بوجهة مثل الثوله..

ادهم : كملي شبيهن الهرمونات.

سيلين : ها الهرمونات اي شعليها بالعلاج يعني كتلي الهرمون الادرينالين هذا يحفز الجهاز المناعي ويخليه يشتغل وبالتالي يتعب الجسم لان يحارب فايروس معين هذا الثاني مدري شسميته شعليه بالعلاج..

ادهم : الأوكسيتوسين ..

سيلين : اي صح.

حك انفه وخله عكوس ايده على ركباته وشبك اصابع ايده سوه وجاوبني بهدوء بحيث شكو هم بداخلي سحبه بصوته ، فعلا اكو بشر صوتهم علاج و عمو ادهم كلشي بيه علاج للنفسيه بدون مبالغه ...

ادهم : الهرمونات التي يفرزها جسم الإنسان تلعب دور مهم في التأثير على حالته النفسية. واحد من تلك الهرمونات هرمون الأوكسيتوسين الي كتلج عليه، يفرزه جسم الإنسان عند احتضانه لشخص آخر. هذا الهرمون له عدة جوانب إيجابية في علاج المرض النفسي واكو هرمونات اذا تخربطت بالجسم ممكن تسبب تشوه بالوجه والجسم وتغير بالصوت لدى المرأه او يطلع عدها شعر خشن ب اماكن معينه يسموه هرمون ذكري لهذا المرأه تتأذه اكثر من الرجل بسالفه الهرمونات وهاي وحدها يرادلها شرح كلش هواي ماريد ادوخج بيه وانه جعت تريكيني لا..

سيلين : اكيد هسه اسوي ..

حسيته حجه هيج ويايه حتى ما اخلي ابالي شي ثاني ولا ابني تخيلات من وهم يعني ميطلعني من شي وارجع اوكع بشي اكبر منه ، لهذا ميعوف ثغره بأي تصرف من تصرفاته..

كمت مشيت وهو ورايه التفتت عليه جان يمشي وعينه على الكاع من شاف التفاتي رفع راسه وابتسم...

سيلين : شعجب رجعت من وكت اليوم..

ادهم : من وره وحده خلتني اعبر ال ١٠٠ كل شويه اريد انضرب..

سيلين : من ورايه؟

ادهم : لا انه جيت كملت محاضرات ورجعت.

عرفته كذب علمود ليحرجني اكثر ، راح لغرفته واني رحت للمطبخ لكيت ايفين ومريم كاعدات وجهن اصفر ابتسمت بوجههم ورحت حضنتهن ايفين بجت وحضنتني قوي ، ومريم ضلت تبوس بوجهي..

سيلين : اسفه خوفتكم.

ايفين : متنه عليج والله عفيه لتخوفيني اكثر..

سيلين : لا ان شاءالله الزم اعصابي منا ورايح بس كون امج تعوفنه بحالنه ..

ايفين : عمو منع عنج الموبايل..

سيلين : اساسا فلشته ..

ايفين : اي شفته احسن خلي يولي ارتاحي منه.

سيلين : نسوي ريوك.

ايفين : اني اسوي انتي كعدي..

سيلين : لا تعبتي صارلج شهر وشويه وحدج اني استلم البيت بعد..

ايفين : صيري زينه بالاول وبعدين نقسم الشغل ماخليج وحدج تتعبين..

سيلين : افونه اريدج هيج دائما تضلين لتنجرفين ويه الهوسه..

ايفين : ابد والله راح اضل هيج اصلا شنو استفاديت من ضيعت عمري بالغلط غير محد جان يعلمنه..

سيلين : ولتحلفين بعد ..

ايفين : انسى بس اوعدج ما احلف.

سيلين : يلا نسوي اكل عمو جوعان.

ايفين : ماشي..

رحت للثلاجه طلعت بيض وجبن وحبشكلات الريوك وخليتهن على الميز ، سمعت صوت عمو يتحمحم..

التفتت لكيته واكف باب المطبخ خال ايده بجيوب التراك ومبتسم عيونه على مريم ...

تقرب منها عقد حاجبه وانحنى قبلها براسها جانت كاعده على الكرسي مال ميز الطعام وهو واكف جبت الاجبان وزعتهن على الميز وعينه على حركاتي خصوصا ايدي لان جانت بيها رجفه من ارفع عينه اباوع عليه يغلس يسوي روحه يباوع على مريم ..

مريم : بابا تتريك ويانه اليوم..

جر كرسي كعد وكال

ادهم : اذا الاكل طيب اكل شنو دتسووون..

مريم : افونه ماعرف شتسوي وسيلين طلعت جبن هواي..

التفتت ايفين ..

ايفين : سويت مخلمه لعمو علمود ياكل زين ..

ادهم : رشوة يعني ..

ايفين : اي لان بيها مفاجئة....

باوعت على اختي ورجعت باوعت على ادهم المغلس على الوضع ..

سيلين : اتفاقيات من ورايه واني كلشي مادري..

سد عين وحك لحيته ، والضحكه انرسمت على ملامح وجها الهادئة ، باوع على ايدي جنت افرك بيهن وحده بالثانيه منتضره جوابهم ماعرف ليش صايره كل حركتي بيدي...

رفع راسه وعينه على ايفين كال..

ادهم : شوكت تعلمتي طبخ؟

التفتت عليه تضحك..

ايفين : عمو شبيكم متعجبين انت وايمن تره عمري ١٩ مو صغيره يعني ..

ادهم : بيبياتنه كبل لو موجودات جان كالو البكدج عدها ست جهال..

ايفين : هههههه والله صح ياعمو..

ضلو يحجون سوه واني رحت جبت ماعونين علمود ايفين تصب بيهن المخلمه ايدي رجفت مسيطرت وكعن من ايدي صاحت ايفين الله الله هو بسرعه دفع الكرسي الجان كاعد عليه واجه وكف يمي..

تناثرت اجزاء الصحن بكل مكان انحنيت علمود الم الكزاز ، تسارعت انفاسي وزادت دكات كلبي خجل واحراج من الصار،،،

مد ايده يلم ويايه ، بجيت وكمت اهمس بصوت ناصي ويرجف.

سيلين : اسفه هسه المه ...

ادهم : مصار شي نلمه سوه ..

التفت على ايفين وكللها.

ادهم : بلا زحمه عليج جيبي مكناسه نلم بيها الكزاز.

ايفين : وراك عمو جبتها..

كام وكف اخذها وبده يلم بالكزاز جانت المكناسه ام الفرجه وبيها اللمامه مالتها ، كمت مديت ايدي اريد اخذها منه كال.

ادهم : اتركيها وكعدي ارتاحي واهدأي مصار شي كلنه نكسر مو بس انتي..

جان يحجي ومركز بعيني علمود يأكدلي انتي انسانه طبيعيه..

هزيت راسي ب اي ورحت كعدت على الكرسي واعصر بملابسي ايدي ترجف اريدها تثبت شنو هاي الرعشه الغفل تجيني ....

ايفين اخذت منه المكناسه ولمت الباقي اجه كعد بالكرسي البصفي..همس..

ادهم : كومي غسلي واكلي شويه ...

باوعت عليه ماشوف ملامحه بسبب الدموع الماليه عيني اشوف بس غواش همست بصوت يرجف..

سيلين : ليش هيج ديصير بيه..

ادهم : دتصلين ؟

من كال هيج انفجرت بالبجي مسيطرت على نفسي ..

ادهم : ايفين اخذي اختج غسليلها وخلي ترتاح بغرفتها سويلها عصير واخذيلها الريوك للغرفه..

ايفين : صار عمو..

اجتي كومتني ودخلتني للحمام غسلت وجهي وبللت ركبتي بالمي البارد ورحت لغرفتي مددت ،،
شويه وجابتلي الريوك ..

ايفين : كعدي اكلي هاي لان اكلج قليل هيج صار بيج ضعف.

سيلين : هسه اكل..

ايفين : اروح اريك مريم لو تحتاجيني.

سيلين : لا انتي هم اكلي..

ايفين : ماشي..

طلعت واني شربت العصير ردت اكل مكدرت نفسيتي مسدوده خليت الصينيه بالكاع ونمت..

ورة ساعه اكثر كعدتني ايفين..فتحت عيني باوعتلها ..

سيلين : ها

ايفين : ليش مماكله..

سيلين: مشتهيت ..

ايفين : واحنه نمشي وره حجيج عمو مو كال تاكل يعني تاكلين.

سيلين : مكدرت والله..

ايفين : كومي يكول خلي تتوضى وتصلي هسه ترتاح.

سيلين : هسه شويه واكوم.

ايفين : كومي سيلين تره الضعف البجسمج من النوم كومي تحركي شويه ، ذيج الايام من تحركتي ولعبتي رياضه شكد فرق..

سيلين : صحيح بس اليوم لان صيحت هواي وبجيت ضلت الرجفه بجسمي..

وره شويه سمعنه صوت ايمن وادهم يحجون مخبوصين شكو مندري ..

ايفين : هاي شكو ؟

سيلين ؛ كعدي لتطلعين عيب..

ايفين : لا ما اطلع ..

وره شويه اندك الباب فتحته ايفين فات ايمن وجها مخطوف لونه..

ايمن: بنات بسرعه بدلو

سيلين : ليش وين نروح.

ايمن : معليكم بدلو بسرعه واي شي يخصكم ضمو بجنطه واجي اخذه..

ايفين : غير نفهم شكو.

سيلين : سوي الكلج عليه اكيد اكو شي بعدين نفهم.

ايمن: شويه عقل من سيلين اخذي ...

ايفين : عاد انت استاذ بالنقد..

ايمن : بلا بسرعه منتضركم ادهم بالسياره..

ايفين : النوب ادهم..

سيلين : ايفين شبيج مو وكت حجي متشوفيهم شلون اعصاب صايرين..

كمت اني طلعت ملابسنه وخليتهن بالجنطه واجتي ايفين ساعدتني بدلنه على السريع وصحنه على ايمن..

فات اخذ الجنطه وصعدها فوك بيته واحنه طلعنه لكينه عمو ادهم بالباب واكف منتجي على السياره شافنه صعد واشر بيده يعني صعدو..

صعدت اني ليكدام وايفين ليوره مشه بالسياره ساكت وعينه على الطريق ، كل شويه يدك موبايله ويفصله..

اخر شي جاوب..

ادهم : ها ايمن توني طلعت تره ، ماعرف اشوف وين وابلغك ، اي اي اعرف هذا هو تمام الله وياك..

سده وضل يستغفر ، ايده لازمه الستيرن بقوه وباصبعه يضرب بالستيرن بقلق..

كمت انتبه مثله على الحركات وعلى الاشياء الجنت ما انتبه عليها اللي فهمته هو قلق من شي بس شنو ماعرف..

ضليت ساكته ، حجت ايفين لان راح تنفجر اذا ضلت ساكته متتحمل بعد..

ايفين : عمو وين رايحين جنه مهزومين من شي..

التفتت على عمو باوعت عليه اريد اشوفه شيكول ، رفع عينه باوعلها بالمرايا ورجع يسوق ..

سكتت ايفين بعد مسألت ...

صف السياره كبال مطعم وكال نزلو..

نزلنه وهو مشى بالسيارة راح يصفهة بكراج ، انتضرناه باب المطعم وره شويه اجه وصل يمنه وكال..

ادهم : فوتو بنات ليش وكفين بالشارع.

ايفين : منتضريك عمو..

دفع الباب مال مطعم فات وفتنه وراه التفت علينه وكال.

ادهم : امشو كدامي ..

مشينه كدامه اشر على مكان الطاوله..

ادهم : هنا كعدو ...

سحبنه كراسي وكعدنه هو هم كعد..

وره شويه اجه النادل سألنه شنو تتغدون..

باوع علينه كال..

ادهم : شنو عاجبكم تاكلون..

سيلين : اي شي..

ادهم : وانتي..

ايفين: كيفك..

ادهم : ٣ نفرات مشاوي..

ايفين : عمو ماريد لحم ماحبه..

ادهم : نفر تكه دجاج..

_ صار وبعد.

ادهم : مي بلا زحمه عليك..

_ صار تدلل ..

ادهم : مشكور..

كعدنه ساكتين بس ملامحنه تحجي اني وايفين نريد نعرف شكو شنو الصار بحيث طلعونه من البيت بسرعه.

وره شويه نزل الغده وكعدنه ناكل اني على كيفي اكل هو انتبه عليه كال لايفين.

ادهم : سوي لاختج لفات الضاهر لباجر متخلص غداها.

سيلين : لا اني اكل..

ادهم : راح نخلص وانتي بعدج كلشي مماكله..

دنكت اكل ، هو وصه على جاي اله ولايفين لان رادت تشرب ، شويه ودك موبايله.

ادهم : ها شصار ، مممم يعني جتي وياهم ، اي ، وشكتلهم مثل ما وصيتك غير عاشت ايدك سبع والله ، اي اي ماشي مو كلت هسه يفكرون لنرمان ، شعبالك لعد هههههه دروح روح بعدين ، مريم يمكم غديها تره املص اذاناتك ههههههه..

اول مره اشوفه يضحك من كلبه وعيونه تلمع ، ابد مشايفته يضحك ولا سامعه صوت ضحكته اقسى شي يبتسم بهدوء لان الصار بيه وبعمه مو قليل لهذا جان على طول ضايج وعاكد الحاجب هسه بده شويه شويه يتغير صح احنه تعبناه بس دا احس ملهيه شويه..

كمل المكالمه باوع علينه وكال.

ادهم : كملتو؟

سيلين : اي.

ادهم : يلا نرجع لو تردون توصون شي..

سيلين : لا هاهيه نرجع..

كمنه طلعنه بره المطعم وكفنه. ..

ادهم : انتضروني اجيب السياره واجي..

اشرت براسي اي..

راح وره شويه طبك ودك هورن صعدنه ورجعنه للبيت ، هدوء وماكو اي شي بس ايفين ضلت تحوص..

ايفين : اريد اروح لايمن..

سيلين : اكعدي لو يريدنه نعرف جان سولفلنه ..

ايفين : هو ميحجي بس ايمن يحجي خلي اروح اسأله حبابه شيصبرني شنو سالفه الملابس وطلعتنه الغفل وليش ما قبل ناخذ مريم ويانه..

سيلين : ياالله منج ومن فضولج لج انتي شنو..

ايفين : انتي شلون تتحملين فهميني شنو هالهدوء العندج والله خبلتيني..

سيلين : من تدخل فيما..

قاطعتني

ايفين : معليج اني اريد اتفشل..

عافتني وطلعت..

سيلين : والله مخبله ..

كعدت على الجربايه وره نص ساعه اجتي جايبه الجنطه مال ملابس وتضحك شمرت الجنطه بالكاع وكالت.

ايفين: هاج هدومج بدلي.

سيلين : شو تضحكين شكو احجي.

ايفين : ليش احجي من تدخل فيما لا يعنيه يبرد كلبه ههههه..

سيلين: لج لتتلوكين احجي شكو.

ايفين : معليه ماحجي روحي سألي عمو ادهم لان لو يريد يحجي هو يحجي..

سيلين : ترجعيلي كلامي مو بسيطه.

ايفين : والله والله ماحجيلج..

سيلين : مو كلنه بدون حلفان..

ايفين : نسيت ..

مطت جسمها تضحك ..

ايفين : احلا شي بالدنيا من ترضي فضولك..

كمت طلعت ملابسي من الجنطه واخذت الخاولي علمود اروح اسبح..

سيلين : عابتلج وعابت فضولج اي والله خبله هههههه...

حجيتها وطلعت رحت للحمام سبحت شويه انتعشت ، رجعت للغرفه مشطت شعري ورحت توضيت فرشت سجادتي ..تسارعت دكات كلبي اشتياق لهذا اللقاء
صح مصارلي هواي من صليت بس حسيت بصلاتي راحه مو طبيعيه ،

تشوقت للسجود تشوقت اشكي همومي لربي ردت اوكف بين ايد رب العالمين ويحتضني ،

كمت وكفت غمضت عيني وبلشت اردد الايات بصوره متقطعه برجفه صوت مختلط بالبجي مالتي ،

سجدت وهنا فقدت بعد مكدرت هلكد بجيت حتى قطعت صلاتي ضليت ابجي وادعي واتوسل ربي يخلصنه من امي ومن شرها حسيت طلعتنه اليوم من البيت بسببها كمت ادعي يحفظنه ويبعدها عنه واشكو لربي منها ،

انتهيت رادت عيوني تطلع من مكانها ،
اطرافي رخت وعيوني ذبلت بس احس كلبي برد ، كمت مسحت وجهي وبلشت اصلي كملت صلاه لميت السجاده وطلعت من الغرفه البيت هدوء مابيه احد ، التهيت منا ومنا صار المغرب جنه كاعدين بالهول اني وايفين اجتي نرمان طبت سلمت وراحت لغرفه ادهم شويه وطلعت للمطبخ كمت رحت وراها.

سيلين : تحتاجين شي اسوي وياج .

جانت فاتحه باب الكاونتر وبيدها دله التفتت باوعتلي وكالت..

نرمان : شلون صرتي ؟

سيلين : الحمد لله انتي شلونج ..

نرمان : الحمدلله ملتهيه ماعندي وكت ابد متشوفين ماكدر اجي لهنا..

سيلين : الله يساعدج بس شعجب من هسه تبدون مو بعده الدوام مبادي.

نرمان : الرساله معليها بالدوام وكل ما نبدي من وقت احسن النه علمود ناقش من وقت ونخلص..

سيلين : الله يسهلج شنو تدرسين انتي يعني اختصاصج شنو..

نرمان : علم نفس..

سيلين : حلو يعني مثل عمو ادهم.

نرمان : هو منو حببني بهذا المجال غيره جنت اضوج منه وعبالي يعقد طلع لا فد شي خيالي اذا حبيتيه وفهمتيه راح تعشقيه..

سيلين : حلو بس انتي هنا درستي لو بالخارج وجيتي تكملين هنا..

نرمان : لا درست هنا ردت اروح ويه ادهم بس انخطبت من كملت سادس اعدادي وبعدها ...

جرت حسره طويله خلت مي بالدله ونومي بصره وخلته على النار التفتتلي وعيونها مليانه دمع..

نرمان : بعدها دخلت جامعه سنتين وزوجي استشهد بأنفجار..

شهكت وخليت ايدي على حلكي..

سيلين : لا الى رحمه الله ..

نرمان : شعجب متدرين ياسه محجتلج..

سيلين : ماصار موقف علمود اسألها اني شفتج لابسه اسود من جيتي بوقت مرض عمه وردت اسألها وراح من بالي.

نرمان : وعدت نفسي لا انزع الاسود ولا ابطل حزن عليه ولا اتزوج غيره لهذا التهيت بدراستي وطلكت الدنيا كلها.

سيلين : الله يرحمه ويوفقج بكل خطوه تخطيها واسفه اذا فتحت جروحج..

نرمان : ماكو داعي تتأسفين الحمدلله على كل حال..

ردت اغير موضوع وياها سألتها بخصوص دراستها ..

سيلين : يعني نفس دراسه عمو بالضبط لو هنا تختلف.

نرمان : لا تختلف من السما للكاع.

جريت كرسي وكعدت..

سيلين : ليش مو نفس الاختصاص..

نرمان : صح نفسه بس هناك بالخارج عدهم علم النفس بالدرجه الاولى بالنسبه لباقي الدراسات كلش يحترمون هذا العلم اتذكر ادهم من كمل ماستر ورجع يكول كلولنه من تدرسون اعتبرو كل الطلاب مرضى نفسسين وعلى هالاساس تعاملو وياهم لان كل طالب عنده ظرف معين عنده ضغوطات بلبيت او بالعمل او مرض معين يعاني منه او عنده اعاقه ،

يكول فهمونه منعاملهم كلهم سواسيه يعني اذا خمسه محضرين الواجب واربعه لا منساوييهم ونحاسبهم انت ليش مو مثل فلان ،

احتمال فلان القصده الاستاذ هذا مرتاح بيته عنده وقت يدرس بيه وساوواه ويه اليشتغل عماله مثلا ،

او الطالب الي يشتغل اساويه ويه الطالبه الماعدها شي ،
واكو طالبات شايلين بيت اهلهم والمسؤوليه عليهم اساويهم ويه الابن المدلل للعائله الفلانيه ،

بس اني من درست هنا معلموني هذا الشي لهذا مراح اطبق نصيحه ادهم شلون مدرسوني ادرس ههههه..

سيلين : ليش يعني بكلشي نختلف عن العالم حتى بالعلم..

نرمان : اذا المجتمع ممعترف بهذا العلم تردين اهل العلم يعترفون بيه هسه ابسط مثال روحي كولي اريد ازور طبيب نفسي كلها تصيحلج مخبله مع العلم اللي يمنعج هو هذا اللي يحتاج طبيب نفسي ...

سيلين : صح ..

نرمان : مرات اسمع باقي الاقسام يقلدون علينه يكولون معقدين لو يطلعون القاب مثلا شاخطين كأيبين ومدري شنو بس من يكعدون يناقشونه صفر يمنه بالمعلومات تعرفين ادهم من درس بالخارج يكول درسونه كلشي يخص علم الانسان بحيث يتساوه ويه دراسه الطبيب النفسي ...

سيلين : واضح من اسلوبه وطريقه كلامه مرات احسه هو طبيب نفسي مو مجرد دكتور جامعي..

نرمان : هو نفس الدراسه بس الفرق الطبيب يختص بعلم الدماغ ويتعمق بشغلات اكبر وينطي علاجات وكذا بس ادهم واني نكدر نعالج المريض بالكلام فقط.

سيلين : حلوو

نرمان : السوالف حلوه وياج اروح اودي الشراب لادهم لازمته نوبه صداع وخابرني ميكدر يشيل راسه.

سيلين : يااا هاي شوكت شو مادري.

نرمان : من الظهر خطيه ولسه ميكدر يفتح عينه مطفي الضوه ونايم ..

سيلين : اذا يحتاج شي كليله يدز عليه اذا انتي ماكو.

نرمان : اني هسه يمه بس بليل اذا ايمن نزل نام يمه ميحتاج ترحين عليه بس اذا نام من وقت انتي عينج على الباب خاف يكعد يصيح احد..

سيلين : ماشي..

نرمان : عاشت ايدج والله جان سهرت بس ماكدر ميته نعس وايمن هم تعبان كلش هذا بس اكله هسه يكوم يبجي.

سيلين : شنو السالفه اني موجوده وايفين قابل شنو ..

نرمان: عاشت ايدج...

سيلين : وايدج..

راحت لغرفه ادهم واني رحت يم ايفين ..

وره ساعه سوينه عشا وكعدنه ناكل اني وايفين ومريم ..

ايمن ونرمان اكلهم فوك سوه وقليل يتواجد ايمن بس بهذا اليوم اجه يمنه علمود يبات يم ادهم لان مريض..
اجه للمطبخ جنه كاعدين نتعشى.

ايمن : اي عمي ليش لا اكلكم وحد وسوالفكم وحد وايمن بس شلاع الكلب عليه انكل واجيب واتسوك ومحد يذكرني بلفه..

سيلين : انت جيت وطلبت واحنه قصرنه.

ايمن : اي جيت وسألي اختج كم مره اجي بليل اريد عشا تكلي محد يتعشى كلنا نام خفيفين انت هم اكل تفاحه ونام وتسد الباب وتفوت.

ضحكت وانداريت على ايفين لكيتها مدنكه تاكل وتضحك..

سيلين : صدك ايفين رايد منج عشا وممسويه.

ايفين : يمعوده عشا كله وره ساعه ١٢ مرات اعرفه هو يدك الباب واغلس ما افتحها..

ايمن : بسيطه عود تعاي توسلي شنو صار وتعال سولف انه اسولف بعد..

سيلين: صدك تعال سولفلي هاي العوبه مقبلت تحجيلي.

ايفين : ايمن اذا حجيت نتخارب..

ايمن : لا ما احجي عمي كلشي ولا نتخارب ..

سيلين : صدك تحجون عود..

ايمن : اي والله.

سيلين : ملازم اني اعرف المن اسأل..

ايفين : اي سألي واستفسري وارضي فضولج احنه منحجي..

ايمن كام يضحك..

سيلين : تعشو تعشو بسيطه..

كملنه اكل غسلنه المواعين ايمن راح للهول نام واني وايفين رحنه لغرفتنه مددت وهيه هم مددت ضليت احوص اريد اعرف شنو الصار بس ادري بيها تذلني ومتحجي ..

ردت انام مريم فتحت الباب واجتي يمي وكفت..

سيلين : وين جنتي حبيبتي ..

مريم : جنت يم عمه ودزتني عليج كالت بابا كاعد يتألم ..

كمت من الفراش ولزمت ايدها .

سيلين : شمدريها عمه..

مريم : هو خابرها وراد عمو ايمن وعمو مادري وينه.

سيلين : نايم بالهول تعاي نكعده..

رحت للهول صحت ايمن ايمن مغلس ميجاوب مدري صدك نعسان..

سيلين : تعاي ويايه نروح نشوف بابا.

مريم : يله....

مشينه اني وياها رحنه لغرفته اول ما فتحنه الباب سمعت صوته يأن ويهذي بكلمات مامفهومه ، هدتني مريم راحت يمه مشيت وراها سحبتها من ايدها وشاورتها ..

سيلين : لتكعديه تعاي ..

ضلمه الغرفه بس ضوه الممر مضوي جزء منها رحت علكت ضوه التيبلام واقتربت من السرير جان نايم على ظهره وخال المخده على راسه وحاضنها بقوه علمود يخفف الالم اعتقدت هيج شي لان لزمته للمخده مو طبيعيه كلش انقهرت عليه ، اخذت مريم وطلعنه رحت للهول علكت الضوه وكعدت ايمن..

سيلين : ايمن ايمن اكعد عمو مدري شبيه.

فتح عينه باوعلي راد يبجي..

ايمن: يعني شسوي هو ياخذله يوم ونص يلا يفكه الألم ..

سيلين : كوم افرك راسه خطيه شوفه خاف مصخن لان كاعد يهذي بنومه..

ايمن : هذا ما نايم تلكيه كاعد ويون اويلي عليك ايمن مترتاح حتى بليل..

كام يدردم وراح للغرفه رحنه وراه وكف فوك راسه مد ايده راد يجر المخده لزمته من ردنه ..

همست.

سيلين : هاي شدتسوي يمعود...

ايمن : ادري لعد شلون اعرف شبيه مابيه شنو اتنبأ غير اكعده...

سيلين: انت شبيك ماعندك كلب مدتشوفه شلون متأذي وكت تصنيفك.

عاط عمو بصوت تعبان..

ادهم : يعني السوالف ما تحله اله فوك راسي طلعو بره وسدو الباب .

ايمن : امشي هسه زين كتلج مابيه شي انتي تلحين.

طلعنه بره سد الباب التفتت عليه..

سيلين: شلون مابيه شي شفته شلون عاصر المخده على وجها .

ايمن : شقيقه عنده تعرفين يعني شنو اذا متعرفين بحثي عنها واقري ما الها علاج ولا يسكنها اي دوه هيه من وحدها الله يهديها عليه وتفكه..

عافني وراح واني ضليت واكفه يم الباب كلش انقهرت عليه ،

فتحت الباب وفتت شداسوي مادري صح غلط هم مادري بس اللي ادري بيه هو هواي تعب عليه وهواي سهر سولفتلي ايفين ادق التفاصيل من يوم اللي اجه للشمال ورجعنه لحد ما صحيت و وكفت على حيلي حسيت نفسي ممنونه اله ،

دخلت جان موخر المخده بس وجها كله متشنج حواجبه معكوده ،

وعركان اخذت كلينس مديت ايد ترجف ردت امسح قطرات العرق البوجها جان يأن بصوت ضعيف وتعبان ،

مسحت كصته رخت ملامحه كلها ونفسه صار هادئ ومنتظم فتح عينه شافني جنت كلش قريبه يعني بينه ربع متر اقل بسرعه كام من الجربايه وكف على حيله باوعلي ومشى مترنح قبل لا يوصل الباب داخ لزم راسه وايده الثانيه سندها على ميز التواليت جان اكو تول خفيف عليه عطور مسيطر على وكفته انجر وكعن بالكاع تطشرن باوع عليهن ورجع باوعلي بعتب..

سيلين: اسفه بس ضل بالي عليك.

محجه شي عاف الغرفه وراح للمكتب سد الباب..

لميت الغراض التطشرت العطور بيهن تكسرن وبيهن لا ،لميت الكزاز و مسحت الكاع طفيت الضوه وطلعت رحت لغرفتي لكيت ايفين ومريم نايمات اني هم مددت ونمت لان اليوم جان حيل متعب..

ثاني يوم جان طبيعي بس عمو ضل نايم حتى للدوام ما راح ، للعصر اندك الباب باوعت من الشباك نزل ايمن من فوك وفتحه ، ويدخلون عمامي كلهم و ولدهم وراهم ماما..

يتبع..

مساء الخير..