بارت 32
رواية..جولييت واسرها...غياهب الإنتقام
بقلمي...نور سمو العراق
💔💔💔💔💔💔💔💔💔
اي مشتاگلـڪ...
توجعني واحجيها...
بس توصل اللهاتي
واختنك بيهة
واللزمها اخاف العالم يسمعون
اسد شفتي واتصير بعيوني وابجيهة ...
هذا البارت تعويض عن التاخير الصار من قبل كم يوم والتمس منكم العذر
................................
جولييا...
بعبق ايماني وبهيبة الحضور كاعده بالصحن الكاظمي الشريف صليت صلاة الزياره ركعتيين واني،سرحانه بخيالي...
اتذكرته من اجينه نجي للزياره هو اخذني علئ صفحه تنهد لزم اديه بحزن واضح علئ،صوته وهمس بصوت خافت معذب...جولييت ابريني الذمه علئ كلشي
رمشت بعيوني من كلامه ومن طلبه المفاجئ نزلت راسي باسئ ومن ألم مجهول بداخلي جاوبته ...اني ما بيوم حقدت عليك صدكني اني انسانه اتقشمر بكلمه اي والله اتقشمر بكلمه روحي مثل روح رضاوي ومجتبئ يمكن ما اعرف من الحقد شئ...
عصر كف ايدي بقسوه وكأنه يحضر لكارثه او خايف من شئ قاتل مميت كال بتنهيده طوويله. اني صدك تجبرت وقسيت ومرات لكل فعل ردة فعل هم جنتي تستفزيني اشياء صارت اني،ما جنت رايدج تسويها...
بس تضلين الانسانيه الوحيده الي شفتها تعذبت كدامي وتعذبت العذابها وهذا الشئ مخفي عنج اكو اشياء انتي غافله عنها اني لو اكعد اشرحلج وافهمج ينراد النه عشر سنين ليگدام
اني تعبان منج وعليج ترئ،لا تضنين ان كل الي صار وكل الطغيان والالم الحصلتي،انتي وحدج عانيتي منه اني حالي من حالج ...
احتضن وجهي بكفوف اديه تدرين بيوم الي صديقة شام كالت ان شام رجعت هيج حجيت بداخلي بس محد فهمني
عقدت حواجبي باستفهام ...شنو حجيت
عصر كفوف اديه حييل وتنهد بضيق همس بعذاب...يا شام بحياتي ما ترجيت احد سواج بحياتي ما طلبت شغله من أحد بحياتي ما توسلت بغيرج كوني ميته !!
حسيت صار عندي دوار من كلامه حتئ بهذا الكلام والتوسل ما فهمته ليش يتوسل بيها تكون ذكرئ علئ العهده القديم وان هي بعد ما ترجع الخاطري لو لخاطر الموقف الصعب الي هو انحط بي بسبب موت بنتها المرحومه والظروف الصعبه الي انحط بيها...
سكتت ما علقت علئ كلامه وهو ضل يحجي ويايه بصدق كال...اعذريني اذا ضوجتج بيوم او زعجتج والله اني هم نفسيتي تعبانه ومحد يحس بيه ...
لا تزعلين مني ولا تنقهرين مني واتاكدي انتي معزتج فاقت الحدود عندي انتي طفلتي وبنتي ويتيمتي
اني جنت مذهوله من كلامه وبس اهز براسي بقبول وسارحه بكلامه المباغت والمفاجئ
بعدها انطاني فلوس واني بسبب تاثيره عليه بالكلام نسيت كوولشي واخذت الفلوس،من ايده رغم اني اماطل وياه هوايه واحب استفزه دائما وما اخذ منه فلوس...
وهماتين فتح جنطتي وكال هذا كارت بي،رقمي خلي بجنطت اخاف تضيعين خلي اي شخص يتصل عليه
وان شاء الله بس اسويلج عمليه اشتريلج موبايل راقي
رجعت الواقعي واني اسبح بالسبحه بيدي،رفعت راسي العنان السماء...
يارب امحي الحزن من عيونهم ونسيهم الماضي يارب اسعدهم وازهر ايامهم انت قادر علئ كلشي وانت المستحيل عندك ممنوع انت يلي تگول للشئ كن فيكون يارب حاجتي قدمتها بين يديك وانت المستعان اذا مو الك التجئ المن التجئ يااارب
انتبهت النفسي ادعيلهم !!!
واني منو يعيد الفرحه الوجهي ...فقدت كل احبابي وفقدت نفسي اول شئ يارب الفضاء ...مليت من الجراح ومليت الأوجاع ومليت من حياتي كلها تعبانه حد النخاع
حسيت بشخص حط ايده علئ كتفي بس بطريقه ماذيه وتكلمت بصوت يرهب ....انتي جولييت ام مرتضئ مووو ؟
جنت بحالة ذهوول يالله يمكن تكون امي لا بس هاي مو صووت امي ولا لمسة امي بلعت ريكي وهزيت راسي بقبول
وكفتني بغضب وبصوت مختنق ومتخووف كالت...ابنج ضاع من عمته وقار مرتضئ ابنج ضاع وتدور عليه وما لكته وكلتلي اجيبج لباب الدروازه
اني من كالت هييج تخبلت وانخطفت انفاسي لزمتها بخووف وانهيارر....يمممه يمممه اللع عليج خاله صدك تحجين يمه ابني رضاوي فدوه خاله كولي اجذب عليج فدوه خاله
رحت واني اركض وابجي وقار اتأخرت عليه اكيد ضاع منها وضلت تدور عليه وما لكته يمه يمكن خطفوا شافوا صغير وطفل واخذوا
ضليت اتعثر بخطواتي وانصدم بالناس والناس تصيح خطيه الزموها يمكن عميه متشوف
اجت نفس المره الي كالت مرتضئ ضاع لزمتني بهدوء كالت...علئ كيفج يمه علئ كيفج كولي يا الله هسه نلكاه عمته يم المناداة وتصيح بسمه وهسه اني وياج نروح للمناداة الي بباب المراد ونصيح بسمه وان شاء الله نلكاها
لزمت بعبايتها واني ابجي،بتوسل...فدوه خاله خاف ما نلكاه يمه ابني يمه والله ما يندل حبيبي رضاوي ليش هييج وقار لييش شلون تغفلين عنه
اخذتني وتمشي بيه احنه جايين من باب الدروازه وهي اخذتني من باب المراد
جنت امشي وابجي واجر بالعبايه وكل شويه وعثرانه بيها و واكعه...
حسيت بيها مشت بيه طريق والناس تسالها...شكو شصاير شبيها البنيه
وهي ترد عليهم...ابنها ضاع وتدور عليه...
اعتقد وصلتني للسيطره الي ببداية الامام واحد من الشرطه كلها...تعالي شبيها هاي البنيه احنه شرطه ويمكن نكدر نساعدها...
هي سحبت ايدي ومشت بيه كلتله...لااااا بس ابنها ضاع منها وهسه ولد كال اخذو مناك واحنه رايحين وراه...
مشت بيه وهي تركض واني اركض وياها وابجي وهي تحجي دكولي...فدوه لله ابنج الثاني الويه عمته شكد حلو هم تووم لان عمته كالت هو يشبه هذا الولد ؟
حطيت ايدي علئ صدري واني اشهك وكلبي يخفق بقوه...اي اي توم سوده عليه ماما رضاوي شلوون ياربي بس لا ما لگاه فدوه كولي وين راح مو دكولين الولد كلج هناك شو مشيتي،بيه هواي وماكو...
مشت حسيت بيها عبرتني شارعيين وصوت السيارات والهورنات والهووسه وبعدها صار هدوء وما حسيت غير اندفعت بسياره...
انضربت بجبيني بباب السياره صرخت بصوت عالي وبخووف ورعب وحطيت ايدي علئ راسي ...منووو ممم منووو انتم وووين مرتضئ
حسيت باب السياره نسد عليه بعد ما سبحتني ايد ضخمه من زندي صرخت مره ثانيه ولميت نفسي بخجل وخووف ورعب
شهكت واني احس بنصهار حمم بركانيه نزلت بداخل روحي اتلفت بالمكان واني اريد اشوف شنوو الي صار واني اصلا ويين ضليت عبالك كاعده علئ،نار بس اصرخ واكمز واضرب بالباب
قطع صرختي صرخه حاده من واحد منهم بعد ما نهرني،بغضب...انلصميييي واسكتي خلينه نشوف شغلنه ...
زحفت من مكاني وحصرت نفسي بالباب واني ارجف وابجي وضامه اديه الصدري...
تكلمت بصوت جاد وحاد كلتله...وهاي الامانه وصلتها الك وترئ تعبت حييل وخفت لا انلزم وضحيت بنفسي لازم تكون هديتي جبيره
رد عليه واحد منهم...تستاهلين والج الي تردينه
نزلت من السياره حسيته و واحد منهم نزل وياها واحتمال اتفقوا ما اعرف والله ما اعرف شكو
رجع صعد بالسياره ما اعرف بيهم هم شكد وشيردون مني واني ميته بجي وارعب ...
واحد منهم سحبني من عنقي بطريقه حيل تووجع صرخت علئ اثرها كال بتهديد...جولييت شوفي لا تخلينه نتهور وناذيج احنه منج وبيج ونريد الج الخير
صرخت بصوت عالي واني اضرب بي بقسوه واخرمش بيه واعيط...ابن الكلب ابن الزمال رجعني عووفوني جااااااسر تعال
ما حسيت اله ضربه قاسيه علئ وجهي
وبعدها اجتني حالة الصرع رجف جسمي بقوووه واهتز كامل جسمي واصابعي تعوجت وصكت اسناني
رجع ضربني مره ثانيه اسفل عنقي فقدتني الوعي وبعدها ما حسيت علئ،شئ...
.....................
وقار...
الناس باعت ضميرها وطغت وهلكت نفسها بمالذات الدنيا الزايفه ...
اني،بالبدايه كلت يمكن جولي راحت تزور او يمكن لان اتاخرنا عليها راحت تدور عليه وهي ما تشوف وضاعت ...
ضلينه نركض اني وماما رضيه وهي شايله الطفله وهي تبجي بصوت نااااصي وتعبان خطيه حتئ ما بيها حييل تبجي،...
واني لازمه مجتبئ ومرتضئ واركض بيهم وادور من نص النسوان وسالهن ...
رحت اركض للمناداة بباب الدروازه صحت باسمها ماكوو بعدها اكو كم مره كالت بنيه عميه موو؟
جاوبتها بارتباك وانهيار ...اي فدوه اي عميه عيونها ملووونه وصغيره
كالت باسف...اي اجت مره اخذتها مدري منو ضايع ما افتهمت شئ لان هي جانت توكف واتوگع
ضربت علئ خدي ياااا عزا العزاني وين راحت انوب هي ما عندها موبايل استغفر الله ياربي فدوه دخيلك يارب بس كون نلكاها...
خطيه ماما رضيه تركض هيج وهيج وما لكتها وانوب مجتبئ ومرتضئ ضلوا يبجون يردون امهم احتارينه حييره...
رضيه ضلت تبجي وتلطم واحنه ساعتين ندور عليها وماكوو ومحد ينطي كلام صحيح ناس دكول شفناها طلعت منا وناس دكول منا وكل واحد يحجي،شكل
اتصل عليه جاسر واني الخوف دب بعظامي دموعي جانت مثل المطر واديه ترجف كلتلها بخووف...ماما جاسر اتصل ؟
لطمت علئ خدها بنهيار عدة مرات...دهر صابني كوون موت الاخذني كوون شگله شگول شحجي اخذت البت وضيعتها شلون ارجع وهي مو وياي
باوعت اللسما الشمس حتغيب بس من الحرگه والقهر لحد الان احس بلهيب حرارته يممه راح يجي الليل وجولي ماكو
رجع اتصل مره ثانيه كالت ماما رضيه بسرعه...افتحي خط بس لا دكليله ماكوو كليله دخلنه مطعم ودخلت للحمام وكليله ازدحام من نطلع اخليها تخابرك ...
اني هماتين فتحت خط حاوت اضبط انفاسي وجاوبته بارتباك...الووو هااا جاسر شلونك ؟
كال بهدوء...الحمد لله شنو زرتوا بعدكم ارجعوا من وكت قبل لا يصير الليل
جاوبته بخووف...اي ان شاء الله حنرجع
كال...انطيني جولي احجي وياها
رديت عليه بسرعه بخوف...هاااا اي اءءء هي احنه هو بالمطعم وجولي راحت هي وماما رضيه تغسل وتدخل للحمام من تجي اخليها تخابرك وهاا هماتين ازدحام ان شاء الله من نرجع بالطريق تخابرك
رد عليه بتنهيده طوويله..ديرين بالجن عليها لا تضيع منجن ترئ هي ما تشوف ولا تندل اني خليت رقمي بكارت بجنطتها و وصيتها ذكريها مره ثانيه ...
جاوبته بعد ما بلعت ريكي بقلق وتنفسي ضاق...اي اي ان شاء الله يالله مع السلامه ...
قفلت الخط وحطيت ايدي علئ جبيني بخوف وقلق ورعب ...شسوي يمه احجي هسه وين نلكاها ...
رحنه سالنه السيطرات الشرطه امن الضريح محد يعرف وين راحت ...وانوب البرود العليهم يكول...هسه تلكوها وين تروح
صارت الساعه بثمانية باليل وهي ماكو وجاسر حرك الموبايل حرك علينه
كالت رضيه...لا انخطفت يمه انخطفت والله مو مال ضاعت حتئ لو ضاعت جان لكيناها بس البنيه انخطفت
بس شلون تنخطف من الضريح شنو شلون خطفوها والله حيره...بس خطيه جانت تبجي،وتلطم وتصرخ وانوب الجو برد والبنيه ترجف وتنوص ببجيتها حتئ ممه ما سوينه الها من كثر ما ارتبكنه
كالت ماما رضيه...خلينه نرجع ونكول الجاسر هو يجي يشوف حل لهل مصيبه خلينه نرجع أطفالها وبعدها نرجع ويه جاسر...
رجعنه بالسياره واحنه نبجي ومجتبئ يضرب برضيه ويبجي...ليش عوفين ماما وعدها ليس ما ديبيها مناك...« ليش تعوفين ماما لوحدها ليش ما تجيبيها مناك »
احنه اجينه بتكسي وخطيه ابو التكسي حييل انقهر كال يجوز ضاعت ومشت وهي ما تندل الطريق مو شرط خطفوها
رضيه تلطم علئ صدرها...لا خطفوها خطفو بنيتي الصغيرونه هم من زمان رادوا يخطفوها وهسه هاي فرصتهم
يمه شكول شحجي اني اخذتها بيدي ورجلها يوصيني عليها ويكولي،يمه جولي امانتج ما تشوف لا تضيعها خلي عينج عليها
اني ادري هيج تضيع مني واجي لا والله فلا اجي عزا العزاني صخام الصخم وجهي شكول شحجي لو ميته ولا صار هيج وين نلكاها بعد ويبن....
وجهت كلامها اليه وهي تمسح بدموعها كالت...خابري عمج ابو حابر خلي يجي بسرعه البيت جاسر خلي يلكالنه حل لهل مصيبه
اني هماتين ما جذبت خبر بسرعه خابرته بس ما كتله جولييت ضاعت بالإمام الكاظم عليه السلام...
وصلنه للبيت فتحنه الباب جان فارغ محد بي والاضويه طافيه شغلتهن واني ابجي وماما رضيع مددت رجليها وضلت تبجي بصوت عالي
اخذت الطفله للغرفه نومتها بكاروكها وسويت الها ممه رقم وأحد بس خطيه كوه شربته ونامت ...
وبعدها سمعت صوت عمي وجابر يحجون ويه رضيه بس بصوت عالي وحاد
طلعت اركض شفت عمي لابس دشداشته وفوكاه العبايه وعكاله وجابر لابس بنطرون وقميص
شفت عمي قبض علئ سبحته بغضب عارم كلها...شلووون ترجعيين شلووون وشلون تغفلا عن البنيه وهي ضريره وما تشوف المن رحتن وياها ثنينجن
غير وحده كون تضل يمها والثانيه تقضي بقية الامور شلون ثنينجن ترحن منها شلوووون؟
ردت عليه ماما رضيه بنحيب...شسوووي اني رحت ازور الطفله و وقار ضلت يمها ورضاوي مشمش رادوا الحمام وهي اخذتهم عافتها بمكانها تصلي اجت ما لكتها
جابر كال بلهفه...زين ما صحتوا باسمها ما سالتوا عنها شنو فص ملح وذاب
حاوبته ببكاء والم ...والله سالنه وصحنه بس ماكووو ماكووو
شويه ودخل جاسر باوع باستغراب للمكان واستغرب اكثر من وجود عمي وجابر كال باستغراب. السلام عليكم
عمي مسح وجهه وتنهد ورد عليه ...وعليكم السلام بويه
سالهم بقلق فضيع ...شكوو شصاير
ركض عليه مجتبئ وحضن رجليه وهو نزل ايده علئ،ضهر مجتبئ وشاله وهو يبجي باسه بخده بحنان ساله بهدوء...شبيك حبيبي ليش تبجي ؟
رد عليه ببراءة وطفوله وعيونه تدمع..ماما طاعت « ضاعت»
باوع بعيون مجتبئ باستغراب وبعدها باوعلنع بنظره حاده موجعه كال بغصه ...شش شكووو شنوو شيحجي احد يفهمني
عمي جاوبه بتنهيده...جولييت ضايعه من رضيه بالزياره
فتح عيونه مصدوم من كلام عمه المعلن باوعلي بغصه وتكلم بصوت ممزوج بحييره...و وقاااار جوليا
وبعدها أردف بصرخه هزت اركان البييت ...جوليييت وووووين وينها ...
ضل يدور عليها باركان البيت وبالغرف وهو منهااار الي ابعد حد رجع علينه وهو يرجف صرخ بصوت مليان قسوووه...وييين جولييت ويييين
رفعت عيوني المشوشه من الدموع لهيئته المرعبه شفته يباوعلي،بنظرات انتقام رجعت خطوات خايفه منه وتدعثرت و وكعت واني اريد انهزم من نظراته المرعبه
لزمني من اكتافي بغضب وهو يهز بيه بعنف....ليش،وقاااار ليييش مو كتلج ديري،بالج عليه الف مره وصيتج عليها الف مرررره ...
همست بضعف شديد..ج ا س ر ....و والله مدري شلون غفلت عنها والله
دفعني بقسوة علئ الارض حسيت تكسرت وصرخت بصوت عالي ركض عليه جابر و وكفني وهو يسالني عن حالي،واني،بس ابجي وروحي هايمه
لزمه عمي عگاب وهو يهدي بيه...علئ كيفك بووويه علئ كيفك
صرخ بي جاسر وهو يدك علئ صدره ....شلووووون تطلب مني اهده واني ما ادري بمرتي ويييين ما ادري منو اخذها ويمكن ماتت واني ما ادري بيها
وأردف بحزن شديد...وشنو اني مــــا عنـــــــــــدي غيــــرهـ عـــــــــــلى عــــــــــرضي هاي مرتي هاي عــــــــــرضي...هاي ام مرتضئ
جاوبه بتنهيده...اي كل شئ ينحل بالهداوه بعد عمك انطينه مجال
هو تجاهل كلام عمي،وحط ايده علئ،خصره وهو يتصل كال...الووو هلا رضا تعالي بسرعه وكعت بمصيبه الها اول ما الها تالي،اي تعال،البيتي
قفل الخط وهو يفتر بالصاله ويروح ويجي واني خابرت علئ،صلاح وجعفر كلتلهم عاد هم تخبلو اجو بسرعه
كعد هو علئ القنفه وجعفر كال . اخاف انهزمت لان هي من قبل هم انهزمت وخلتنه بحيره
باوعله جاسر بغضب وصك علئ،اسنانه...جعفر تسكت لا وحق الله اگوم ابتلي،بيك وطلع ضيم كلبي كله بوجهك
هو سكت وامي رضيه كعدت تسكت بي ...جعفر يمه اسكت ما تشوفه شلون منهار ...
شويه واتصل الرائد رضا وهم كلهم طلعوا بره بعد ما اعرف وين راحوو. .
وشويه واجت امي وشهد وريهام وضلن يبجن امي كالت خاف خطفها اخوها...
رضيه ردت عليها...شني خطفها اخوها هو وين اخوها غير بالخارج وشني اخوها دخل للضريح واخذها...
جاوبتهل امي...اندري والله هلولد ولا ارتاح من تزوج جولييت لحد الان اني ما جنت راضيه بهل زواج واعرف ما وراه بس المصايب وشوفي هاي تاليها...
جاوبتها امي...عوفينه من هل حجي الما يوكل خبز هسه بس كون نلكاها
.......................
حازم...
خابرنه هشام وكال ...انتهت المهمه علئ خير وجولييت صارت بامانتنه وان شاء الله عشرة ايام بالقليل وهي عندكم
فرح عاصم بهل خبر وهو يحس بنشوة الانتصار كله ..بس كون ولا واحد من أطفالها وياها ؟ لان اني ما اريد اربي اطفال عدوي
رد عليه هشام...لا بعد اخووك جبتها الوحدها محد وياها...
كتله اني بغضب...گلع خلي ينطينياها نحجي وياها
عاصم طلب منه نحجي،وياها وهو جاوبه ..لا ما اكدر لان هي مريضه ونهارت وتخربطت وان شاء الله بس تكعد اخليها تحجي وياكم...
قفل الخط وهو فرحان واني مدري جانت مشاعري مخربطه اتذكرت قبل فتره هو هشام وهيثم كالو احنه تعاركنه ويه جاسر بسبب جولييت لان هو ضاربها واحنه هدينه عليه وصارت بالسلاح
واحنه نطالب بيها لان هي بنت عمنه وعرضنه وما نريدها تنذل عنده ما كافي عليه هو عمه عيونها وانوب مخليه ملطشه بيد مرته السوريه وضاله خدامه الها...
وانوب تجيب اله اطفال وهو ينطيهم الزوجته تعويض غن بنته وقاهرها وحارگ دمها وهذا الكلام وصل من جوليت واحنه فزعنه الها...
و رسل النه تصوير شلون هم مضروبين من قبل الكاسر النذل ومن ذاك اليوم قررنه نجيب اختنه النه و ولده اله يتهنئ بيهم ...
بس احنه ما كدرنا نوصل الها ونكلها احنه اهلج لذلك للقدر كلمته والخطه صارت هييج
بس الحمد لله راح تخلص اختي،من قهر الكاسر وراح ترجع الاحضانه وان شاء الله اللقاء قريب ...
.........................
جولييت...
تأوهت بالم وبجيت بحذر احس حتئ اضلاع صدري توجعني تلمست المكان بعد ما كدرت من نومي ...
همست بعذاب...ااء اني ووو وي
بترت كلامي وجسمي يرجف واحس بغثيان وعندي رغبه بالتقيئ
حاولت اجمع شتاتي وأعيد افكاري اني بحلم لو بعلم اصلا اني ويين ....
اتذكرت اءء اني اي يمكن اخذووني خطفووني ما اعرف اني شنوو ما كدرت اميز الاصوات ولا اشوف ولا اعرف شئ...
بجيت بعنف وبحرگة واحس گلبي يقفز من مكانه ويهشم صدري انفاسي متسارعه
حسيت بشخص رفعني من كتفي وخلاني مقابله حسيت نفسي مثل ورقه خريفيه بدون ما اثبت ..
همس بهدوء وصوت خدران...جولييت
صرخت واني ابجي وادفع بي...وخررر منو انت شترييد مني شترييد ولج يممممه جاااسر وينك
لزمني من شفايفي وعصرنهن حييل كال...لا تجييبين اسم هل عار علئ اللسانج مفهووم
دفعته بقسوووه وصرخت بوجهه.. انجب محد غييرك عاااار ولج يمه ويينج انتم منو شتردون مني عوفوني والله ممسويتلكم شئ
قبض علئ،خدودي ويهمس عند وجهي بوقاحه كال...لا تدافعين لزوجج العار احنه جايين ننقذج منه ومن ضلمه وجبروته انتي تعرفين اني منو
عطت بوجهه بنهيار والدمعه سالكه علئ خدي وشاكيه الهم بداخلي ..انت واحد عار ونذل اي اعرفك انت اكبر نذل انت نفسك الي ردت تخطفني من قبل مو صح
ضرب علئ خدي بخفيف وهمس بخدر وهو يتلمس بمعالم وجهي...اي صحيح بس اوووف والله احنه منطين الجنه لجاسر وهو ضال يتنعم بنعيمها واحنه النه جهنم
ضربته بعنف بعشوائيه....عوووفني انت شتحجي ؟ انت منو اصلا
ضحك بصوت عالي كال...اني هيثم ابن عمج اخو هاله تؤم روحج سابقا
لحظة صمت مطبق مني واني مرتبكه ومذهوله ومتفاجئة همست بنهيار ..اءء هيثم ؟
ضحك وحط ايده علئ خصري وهو يدخن والدخان مله صدري كال...اي هيثم نسيتيني لو لااااا
لعبت نفسي منه حيييل اجيت اتقيئ امعائي دفعته مره ثانيه وابتعدت عنه واني امشي بروح مسلوبه وبعدم إرادة مني...
انضربت بالحايط واستوقفني صوته المستهزء...هههه وين وصلج اليا حااال تذكرين من جنتي تستهزئين بيه ...
انفتح لباب دلاله علئ دخول شخص ثاني كال بحيت بوجع وبخووف خايفه لا تسول الهم نفسهم واعيش بعذاب من بعد هل موقف...
حسيت بشخص كعد بصفي واني زحفت وابتعدت عنه تكلم ويايه بصيغة حنينه وصوت مختلف كال...هااا جولي شلونج اني هشام ابن عمج لا تخافين مني احنه نريد الج الخير ونريد نخلصج من ضلم الكاسر .
انتي لازم ترجعين الامج ولازم تلتقين بيها امج متعذبه عليج انتي بنتها حبيبتها ونظر عينها
صرخت بنهيار واني اضرب علئ وجهي...ما اريدها ما اريدها ما ارييد امي رجعوني الاطفالي لا تقررون مصيري بكيفكم لا تلعبون بكيفكم
اني ام ما اكدر افارك ولدي وعندي طفله مريضه وبحاجتي حسو بيه اني،ام اني امممم والله طفلتي مريضه رجعوني الخاطرها...
حسيت بواحد منهم احتضن جسمي الهزيل صرخت بصوت معذب وضميت نفسي منه....ياربي لااااا عوووفني لا تلمسني
عرفته هيثم الي احتضني وهشام دفعه مني حسيت بي وكع علئ الارض وهو يتألم
بنبرة تهديد من هشام كله بغضب عارم. ولك لا تتجاوز وياها هاي بنت عمنه وبمثابة اختنا ولا تنسئ هي،اخت عاصم اطيح حضك اذا بعد اتقربت منها...
بلعت ريكي واني ارجف وشويه جابولي الاكل ما اكلت ما كدرت واني اتوسل بيهم يرجعوني انوب دخل واحد ثالث ضل يحجي وياي كال اني الي راح اهربج للخارج واني الي هربت اهلج من قبل
ابد ما ارتاحيت اله وكلبي ضل يرجف من نبرة صوته ابد ما عندي ثقه بأي شخص
طلعوا وخلوني الوحدي لا اندل انهزم ولا اشوف الطريق وين وضاله محتاره وبس ابجي واناجي ربي بصوت حزين ..
همست بنحيب...وييينك جاااسر فدوه اروحلك لا تنساني لا تنام عينك وتعوفني اني ذنبك وغلطتك اني خطيئة بركبتك
تعالي لل تعوفني الوحدي تعال اخاف والله اخاف اخاف من الظلمه اخاف علئ روحي،من ذول الي بدون ذمه ولا ضمير
حضنت جسمي بخوف وشهكت برعب...اخاف علئ روحي اخاف واحد منهم يعتدي عليه ويعذبني...
والله بوقتها صدك امووت واقتل روحي ولا اسامح اي واحد
يمه رضاوي،يمه مشمش سوده عليه شلون حركوا كلبي وكلولي ابنج ضاع شلون استغلوني وضيعوني واسغتلوا مرضي وحاجتي...
اووف يمه غزووله شلون بيه والله خطيه شلون انطاهم كلبهم يبعدون عن ضناي وهي طفله باول شهرها شدكول عليه دكول امي عافتني وراحت
ولج يمممممممه اني احن علئ اطفالي منج مدا افرق بينهم وانتي فرقتيني،من اخوتي ...
يارب كون وقار تدير بالها علئ هدار ما تنسئ،ممتها ولا تنسئ تغسل الها...
ضليت النار تاكل بيه للصبح وما غمضت عيني ابببد واني،كل شويه فازه من مكاني اخاف واحد منهم يدخل عليه...
......................
جابر...
رحنه للامام الكاظم عليه السلام واجه ويانه رائد رضا وهو جايب همر عسكريه وانطلقنا بسرعه ...
جان طول الطريق جاسر بس يخابر ويتصل ويصيح ويخطط لحد ما وصلنه للكاظميه المقدسه...
دخلنه هناك بس ما انطوا الباجات وسالنه عن بنيه ضايعه وضريره...
وبعدها دخلنه جان جاسر يمشي وهو ورائد رضا وبعد ضباط ليكدام بهيبه واضحه عليهم والعالم تباوع الهم باستغراب...
دخلو للاستعلامات وامانات العتبه وشرحوا الهم الحاله وهم ما قصروا رادوا المكان الي جانت هي كاعده بي...
واني خابرت وقار وهي وصفت الي المكان واني اجيت وصفته الهم حتئ يفتحون الكاميرا الموجوده بالمكان لان الامام علية السلام مطوق بالكاميرات...
رضا كال الجاسر...اني همين خابرت أصدقائي هنا وخليتهم يتحرون عن المستشفيات احتمال اتكون سوت حادث ونقلوها علئ مستشفئ او تخربطت
رد عليه جاسر ...عمي ميخالف راضي بس كون بخير وبس كون الگاها وما بيها شئ والله ذبيحتين اجيبهن هنا بس كون بخيير...
بعدها هم من عرفوا المكان فتحوا الكاميرات واحنه ضلينه مركزين بالكاميرا...
فتحوا هوواي مقاطع بس مجان اي مقطع هي بي لحد ما طلعت صورتها
اني باوعت شفتها مصورتها الكاميرا من بعيد من اول ما اجت وكعدن كلهن لحد ما عافتها و وقار واخذت وياها مرتصئ،ومجتبئ،
جاسر رد بصوت عالي وملهووف وهو ياشر عليها...هاااي هاااي اي هي هاي مرتي
باوعلهلم واردف بعذاب...اي هي هاي ام مرتضئ كملي،المقطع بسرعه ...
جانت تصلي وتبجي وتدعي ربها ورافعه اديها بايمان جاسر من شافها بهتت ملامحه ولزم صدره بوجع
بس جان المقطع هوووسه ماكو صوت مميز للاسف
وبعدها اجت يمها مره مبوشه وحجت وياها هي،من حجت وياها جولي،تخربطت أحوالها ضلت تركض وتوكع والمره تركض وراها...
جانت جثله وطويلة وضخمه وما مبين منها أي شئ بس بنية جسمها وجانت مبوشه ولابسه كله اسوود...
وبعدها الكاميرات كلها مصورتها لحد ما طالعه من باب المراد ...
الشخص الموجود بالعتبه قفل الكاميرات وباوع النه بهدوء .... هاي المقاطع العدنه هذا الي اكدر اساعدكم بي واذا حابين تسحبون المقاطع اسحبوهن ...
جاسر رد عليه بتنهيده طووويله....ما اعرف اني مشوش
رضا كال...هي طلعت بارادتها وهل مره الها وقع بهل حدث يعني ليش اجت لام مرتضئ وليش خلتها ارتعبت وراها شئ
جاسر بتفكير وروح مسلوبه...اي اكييد كالت الها شئ وخلتها طلعت بس شنوو شنو الي يخلي زوجتي تنهار بهل شكل ...
هي وحده من الاثنين هاي يا اما كالت الها عن امها وطلبت تشوفها او كلتله انتي ضعتي،من اهلج او واحد من اطفالج ضاع. .ما ادري عقلي مشوش
رد عليه واحد من الظباط...انت عندك اعداء
ضحك باستهزاء وعذاب...عندي شياطين مو بس اعداء ...
المشكله اني ما عندي دليل ولا اعرف هي مخطوفه لو طالعه بإرادتها تعبت
زين طلعت وين راحت معقوله مثل ما كال رضا شوت حادث او تخربطت ؟
هم ميخالف أندور المستشفيات ونشوف شنو الحل
صدك رحنه وما خلينه مستشفئ يعتب علينه ماكو فص ملح وذاب
جاسر تخبل تخبببل ويرجف اباوع الاديه ترجف عبالك شلون يوم غزل من ماتت
لزمته اهدي بي بس هو هيهات باوعلي بحزن بنظره قاتله كال ...اريد اصرخ جاااابر
تنهدت بضيق ما اعرف شلون اصبر عليه والله مصيبه ما بعدها مصيبه
كال بحزن. .غزل دفنتها وعرفت امنتها بيد رب كريم بس جولي شلون بيها مرتي ما ادري وين وعند منوو مرتي تخااف ...
اردف بعذاب...شلون انام شلون اكعد شلون اكل واني ما ادري بيها بيد يا وحش والله ما اريد شئ بس،كون هي بخير وما ياذوها والله تعبت وهي مسكينه
راحت زعلانه مني خشنت خاطرها وما بيوم طيبته ام مرتضئ تعذبتي مني واني الناوي اداويها وما اعرف شلوون...
جريت نفس عميق طبطبت علئ كتفه .. ان شاء الله تلاكاه خلي املك بربك كبير . .
تنهد بضيق وهمس ...ونعم بالله
وبعدها كال...خلي اروح ازور بلكي الله ويفرجها عليه.
راح زار وجهه واني ضليت اسال بالناس والشرطه
وبعدها اجو وياي صلاح وجعفر خطيه جانوا متخبلين ....
من طلعنه واحنه لسه نسال واحد من الشرطه كال...اني اليوم شفت بنيه عميه تركض و وراها وحده مره مبوشه تركض وراها...
اني سألت شكووو كالت ضايع ابنها وكلولنه هناك ولزمته وضلت تركض بيها...
عاد جاسر خابر وقار وضل يحجي وياها وعاط بيها كلها ..بس احجي الصدك هو واحد من التوم ضاع منج لو لا
هي جاوبته بنفي وهو قفل الخط كال...دكول ما ضايع وتحلف هذي المره مراقبتها واكيد تعرفها لهل سبب هي اخذتها...وقشمرتها...
تنفس،بوعييد .... بسيييطه والله وجنيتوا علئ نفسكم...
اكيد عاصم العار هو الي خطفها ...هسه زين عند عاصم بس لا تطلع عند غيره...
وهاي صار يومين احنه علئ هل حال ما خلينه مكان يعتب علينه والشرطه اتولت المهمه وجاسر متتتخبل منهار عليها...
................................
وقار...
صار يومين وجاسر ما داخل للبيت ومتخبل منهار علئ،جولي واحنه كل شويه واجتنه عالم وناس من اقاربنه تسأل عن جولي،...
عرفت بنات فلاح موجودات هنا عند بيت جابر كلي جابر بس اني كتله خليهن هسه لا تفتح موضوعهن ان شاء الله بس تهدئ،الامور اني،احجي ويه اخويه...
جنت شايله غزوله الصغيرونه وهي تبجي من راحت امها عنها لحد الان وهي بس تبجي ما اعرف شبيها
حتئ اخذناها للدكتور اني وماما رضيه وفحصها كال ما بيها شئ لا تخافون...
شويه واندك الباب راح مرتضئ فتحه وهو يصيح ادت ساميه اهووو هته حلي ماما ابجي...ماراضي جان ويدردم عليها...
هي دخلت هي،وياسمين كالت بدون اي مقدمات...وينو جاسر عم اتصل عليه ما عم يرد عليه وانا خفت صاير شئ
بلعت ريكي بحزن وجاوبتها....لا ماكوو شئ ببس
عقدت حواجبها كالت...بس،شوو احكي صاير شئ ولا ما عاد بدياني
تنهدت بضيق...لا مو هيج بس احنه رحنه للزياره وجولي مرته ضاعت منه ولحد الان صار يومين وعي ماكو
فتحت عيونها مصدومه .شوو هاد عم تحكي عن جد لييش ليكون هربت من اخووكي مو عم يقول زالمها...
تافئفت بضيق...لا مو هييج ما اعرف هي وين راحت بس احتمال خطفها اخوها لان قبل فتره هماتين هيج صار والحمد لله كدرنا ننقذها...
جرت نفس عميق وكالت بتردد...لك هاد اخوها اديشوا كلب وحيوان ضلموا حتئ علئ اختوا معقوله هاد اخوها ...
مسحت وجهه بتوتر وهي تشوف الطفله تبجي تقربت منها بارتباك وتردد وبلعت ريكها كالت...شوبها لي عم تبكي ما بتعرفي تسكتيها ؟
هزيت راسي بنفي واني ابجي...ما اعرف مدري شبيها بس تبجي ...
اخذتها من ايدي بحذر وحضنتها ولفتها بالملحف كالت بهدوء وهي تناغي الها...لك يا فصعوونه له عم تبكي شبكي ...لا عاد تبكي تؤبريني
باوعتلي كالت...عندك مي وهيل وشكر شوي اذا عندك عطيني مشان شربها شووي احتمال بيكون عندها تقلصات ...
اني هماتين رحت جبت الها واني اركض وهي كعدت تشربها بخاشوكه ...
ومجتبئ واكف بالباب ويخوزر بشام ومكتف اديه وكل شويه وكلها...هي ان بتج بت ماما ...
هي ابتسمت بحزن كالت ..شو عم يئوول
ابتسمت بعذاب...يكول اريد ماما
بللت شفايفها بقهر وباوعتله بحنان.. ان شاء الله بترجع امك يا حلوو ...
ضلت كاعده والطفله يا سبحان الله هدئت من شالتها شام وشربتها وبعدها شربتها ممه...
وضلت عندنه لليل ووبعدها اجت امها واخذتها كالت. ان شاء الله اذا احتجتوا شئ اتصلي فيني وانا كمان بتصل اطمن عنكن وعن الطفله
باستها ودمعت عيونها ...بنتي كانت متلها كمان هيك ناعمه وحلوه واسمه غزل ههه
مسحت دموعها وبعدها راحت وهي كل شويه واجت باست الطفله...
تنهدت بهدوء الحمد لله من صايره زينه شويه اني احس شام رغم عصبيه بس داخلها طيب ونضيف وهي هم حقها بلي سوتها بس مو من حقها تهين جولي لان جولي مو سبب بموت بنتها ولا هي الي موتتها. .
انوب خالتي صبرية لحد الان ما تعرف جولي مختفيه ونبي اذا عرفت اله تنجلط لا تهد علينه وتحرك بيوتنه وتذبنه سجن.....
.........................
جولييت...
هميت دا اريد اوكف بس رجليه خذلتني و وكعت مره ثانيه ...
بعدها وكفت واني أتلمس بالمكان واديه ترجف واحس انفاسي مخطوفه ...
هشام بهاي الغرفه المجهوله دلاني علئ الحمام والمغسله جنت اخاف ادخل بالحمام اخاف موجودين ويستغلوني ويستغفلوني...
وصلت للحمام وغسلت وجهي حييل واحس بالم من الضربه الي اجت علئ وجهي...
رجعت النفس المكان كوولش خايفه من هيثم هيثم من زمان جان حقير وحيوان من جان مراهق ...
واني اشوف نظراته المقززه وحتئ،مره لزم ايدي جنت صغيره ويكولي تعرفين من اتزوجج شنسوي،
واني من خوفي رحت كلت الماما وماما هدت عليهم وطيحت حضه وكلتله بعد اذا تحارشت بجولي اطيح حضك وحظ اهلك
ومره جنت عمري 12 سنه وهو 18 جان كال جولي انتي الي اني وياج نتزوجج بس تكبرين
جانت اخته سحر وهاله واكفات اني رديت عليه بقرف...ايييع ولا اقبل بيك انت شايف وجهك
واردفت بحالميه....اني اذا اتزوج اتزوج واحد حلوه وشخصيه مو مسلوع مثلك
عاد هو بيومها تخبل وكتل هاله وكلها بعد لا تمشين وياها هاي الادبسز ...
وهاله ضلت ما تمشي وياي واني اتوسل بيها اكلها اني ما غلطت عليج غلطت علئ اخوج لان ما احبه...اني ليش جنت اريد اصالحها لان اخاف امشي الوحدي او ما اعرف امشي الوحدي للمدرسة
كالت...اي تعلمي الادب عيب تغلطين علئ اخويه وهو اكبر منج
وبعدين تصالحنه بس هو مدري شبي عليه حتئ هو الي كال عود اني ادخل شقق ويه احمد خطيب هاله
وهسه لمساته اليه كووولش قذره وحقيره اني من زمان اكرهه هو مو مثل هشام هشام شويه اشرف واحسن منه ولو هم ما بيهم واحد شريف...
جنت اتلمس بالحايط واني ابجي شكول عليك يا عاصم الناس دنيئة نفس شلون انطاك كلبك تامني بيد ولد عمك الكلاب...
ما تدري الشيطان ما مات وما تدري هل ناس قذره وتسيرهم شهواتهم...
والله يا عاصم بعد هل موقف السويته بيه وخليت دمعتي جاريه علئ اطفالي فلا اسامحك واتمنالك الشينه قبل الزينه...
حسيت بشخص حضن خصري وشمر حجابي وهو يشم بشعري
صرخت بصوت عالي واني ادفع بي...وخرررر وخرررر يمممه منو انت...
جاوبني بذوبان وخدر...اليوم انتي ملكيي اليوم اطلع طاقتي السلبيه كلها بيج
نهاية البارت...يتبع
كونوا انتم كونوا بخير...احبكم 💔
نور سمو العراق 😘😘
لا تنسوا التصويت احبتي الرواية بكم تكتمل😘
تنويه...البارت اهداء لاحد ادمونات كروبي بالفيس كروب ورود وفراشات...كل عام وانتي بالف خير يا سما 😍😍😍😍
الطلحه اكييد 😍Talha-25-3
جوجو 💔💔😥