البارت 31
رواية..جولييت واسرها...غياهب الإنتقام
بقلمي...نور سمو العراق
💔💔💔💔💔💔💔💔💔💔
مَاريدك وأريدك ، حرت وأحتاريت !!
تعال ولا تجِي وثنينهن صَعبات !
............................
شهد
دخل جعفر وهو يولول ويصرخ وملهووف ..ولج شهد ولج شهوده ماتت ماتت راحت الزينه راحت ام هله
اني رجليه صارن خيووط من الخوف لزمته برعب...يممه يممه ولك احجي منو ماتت صبريه رضيه لو بنت جاسر
رد عليه وهو يهز براسه وهو يلطم...ورجلج والولد عدمن مخليته ورجلج والولد عدمن مخليته ..
باوعلي كال...يالله شهيده يالله كولي لا خيه لا مالي حييل فراكج لا خيه لا ...صدك ميته يالبراسج يحلفون صدك ميته يالبراسج يحلفون
لزمت قميصه بعصبية...هي شنو دحجي،منو ماتت؟
حط ايده وهو يضغب بكذب...بزونتج شهد بزونتج ماتت بزونتج كتلوها
فتحت عيوني مصدومه ومرعوووبه ضربت صدره...جذااااب
رجع باوعلي بثقه...بالقران ماتت هسه دخلت لكيتها ميته بباب بيتنه ضلربينها بمصياده براسها
عاد اني ما صدكت...عاااااا يمه بزوونتي جذب جذب ولج يممممه ولج بزونتي الحلوه ماااا اريد بزونتي اريد بزونتي
عاط بيه...خاب،ومرض فضحتينه انلصمي شنو بزونتج احسن من الراحوا هذا يومها وهذي ساعتها
كعدت واني ابجي واصرخ واجت ريهام تركض هي،وعمتي كالن...شكووو شكووو شبيج تبجين
وكفت واني اصررخ ومنهاره...بزونتي تؤم روحي ماتت ماتت كتلوها خرب حضي والله كله بسببي كله مني السبب اني السبب لو مخيتها عند اهلي احسن ولج يمه بزونتي ماتت
عمتي غمتني...امداج امده فركج الئ متئتضلين زعطوطه عبالي مدري منو مات تاليها بزونتج ماتت
رديت عليها بنهيار ودموع...اي حقج حقج انتي ما تحسين بوجعي هاي ربيتها وعاشت عندي وكبرتها وزوجتها ومنتظره جهالها تالي تموت؟
عمتي هزت ايدها وخلت وراحت واني ضليت ابجي وريهام تواسي بيه واني ابجي...
لبست حجابي وطلعت اركض وجعفر لزمني صحت بي. .عوفني عوفني وووخر خلي اشوف بزونتي اشوفها يا نعال كتلها...
دفعني بغضب...امشي ادخلي لج فضحتينه هسه هذا يومها شنسويلها الله يرحمها...
لزمته واني ابجي...فدووه فدووه رووح جيبها روح خلي اشوفها...
كال..ذيج هي بالباب ميته رحت مديت راسي واني اباوع الها وابجي صدك ماتت ماتت حبيبتي
شهكت ودموعي ...رووح جعفر رووح ادفنها لا تخليها هييج واريد اعرف منو الي كتلها والله اخذ حقها منه..
صاح بيه بغضب...دفوتي جووه لا اجي امددج بصفها
دخلت واني ابجي منظرها حزني فاتحه عيونها ومتمدده والدم نازل من راسها الله ينتقم من الي،قتلها...
بس جعفر كال ...يمكن كتلها جيرانه ابو الطيور لان جعفر كال هي ماكله طير من طيوره وهو توعد الها ..هيج دمها راح هدر جعفر مراح حاسب ابو الطيور ...
واني خلصت يومي بس ابجي وراح جعفر يدفنها...
عمتي،بس تحجي عليه دكول انتي مخبله هسه شنو كاتله روحج علئ البزونه ..عاد اني،جاوبتها هو شنو كاتله روحي غير صاحبتي ومربيتها وكبرتها وعاشت وياي علئ الحلوه والمره
عافتني،وراحت ورهومه كعدت تصبر بيه شويه ودخل جعفر عاد اني ركضت عليه ملهووفه ولزمته...هاااا جعفر وين دفنتها
رد عليه بسرعه...دفنتها بوادي السلام بصف حبوبتي خاچيه اجيت ادفنها بصف ابوي بس كلت عيب تضل مره غريبه عليه...
صار عندي شك بكلامه المستهزء...لا برووح ابووك وين دفنتها ؟
حك رگبته وهو يباوعلي بترقب...شمرتها بالزباله
عاد هو ما كال هييج اني تخبلت لطمت علئ صدري بغضب...تحجي،صدك ولك جعفر شمرت بزونتي بالزباله وما دفنتها والله اليوم العب لعب...
كال بملل..دروحي لج ترئ موتيني هي بزونه وماتت ترديني احنطها وادفنها بهرم اخنتون لو شنوو
رحت زعلانه واني ابجي وادردم بگلبي،والله خبيص ليش هيج ليش محد يراعي مشاعري ترئ والله عشت وياها وربيتها ليش،هيج يسوون بيه ويستهزئون بيه...
والله لحد الان مصدومه بس هو جعفر واهله گلوبهم ميته وانوب يضحك عليه كل شويه وكال...شو ما لابسه اسود على المرحوومه
وصلاح يرد عليه بضحكه...الحزن بالگلب،وبعدين المرحومه وصت وكالت لحد يلبس عليه اسود لان ما احبه...
جعفر كال بضحكة...شهيده بس لا هم تردين جبره وتردين توزعين ثواب علئ روحها الطاهره..
اني جنت مغلسه منه وما احجي وياه
هم صح يستهزئون بيه بس،اني زعلانه ومطنكره ولا اتجاوب وياهم إيد...
.................................
ريهام...
شهد صار يومين زعلانه وتبجي علئ بزونتها صح هم يعتبرون الموضوع سخيف وماخذينه بضحم بس اني بصراحه لاا معتبرت الموضوع هيج لان هي خطيه مربيتها ومتعلقه بيها...
واني حتئ اكول الصلاح لا تصير مثل جعفر يستهزء بيها هي خطيه مشاعرها هييج وهي مربيتها اكيد تنقهر عليها...
عاد هو شويه بطل منها
اني اليوم قررت اروح للمستشفى اني وصلاح لان نريد نشوف جولي وطفلتها وهماتين نتحمد الها بالسلامه...
ومن خابرتها هي كالت ...جيبي وياج مرتضئ،ومجتبئ مشتاقه الهم...
عاد اني هماتين ما قصرت رحت دا اصيحهم لكيتهم كاعدين يم بيبتهم ام فلاح وهي تصلي...
مجتبئ جان لازم التربه من تركع يخليها جوه راسها ويرجع يبوسها برأسها وهو يكلها...عبيبتي تطلين احتن من ديج رطاوي ما يطلي...
ضحكت اتذكر جولي جانت من تصلي،يكعدون يصلون وياها ومن تدنك يصعدون علئ،ضهرها وهي تعلمهم علئ الصلاه ولو هم ميعرفون بس هيج يتعلمون من الصغر...
بس الشئ الي عجبني عمتي ام فلاح جانت زينه وياهم وفرحانه بيهم
وهم مخلصينها وياها عبيبتي بيبي ما عبيبتي بيبي وهي مكيفه عليهم دكول والله ذول احن من سجيوه واخواتها عليه شلون يحجون وياي وكل شويه وباسوني....
اني اخذتهم ورحت واني،أبتسم الحمد لله من حنت عليهم وعرفت قدرهم وقيمتهم...
بدلت الهم واخذتهم ويايه اني وصلاح وصلته للمستشفى طبعا هي لحد الان بالمستشفئ لان الطفله بعده نموها مكامل ويحتاج الها عنايه وبعدها بالخدج...
رحت علئ غرفة جولي دخلنه لكيناها كاعده بغرفتها ترضع بالطفله بس مغطيه صدرها من حست بينه دارت وجهها وهي تخفي نفسها عنه لان سمعت صوت صلاح وهو يسلم ..
وجان جاسر كاعد علئ الكرسي مقابيلها من شافنه سلم علينه وحضن اطفاله وهو يبوس،بيهم وهم مكيفين عليه ويبوسون بيه ويشكون اله واحد يشكي،من الخ وهو يضحك عليهم...
اني سلمت عليه وباركت اله وبعدها كعدت يم جولي وسلمت عليها وباركت الها...
ومرتضئ ومجتبئ اجو عليها يركضون وصعدوا علئ السديه وهم يبوسون بيها وهي حاضنتهم وتبوس بيهم
اخذت الطفله من ايدها جانت نااااعمه حييل بس عيووون وجهه جنها عيون بزون بس حييل حييل ناعمه يمكن وزنها كيلو ونص،حتئ اخاف الزمها...
ابتسمت جولي بهدوء كالت...ريهام حلوه لو لا ؟
باوعت للطفله وبستها بخدها...اي فدوه عين النبي تحرسها جنها حلقوومه تخبل...
ابتسمت وهي تتلمس بيدها ومجتبئ ومرتضئ صافنين عليها مجتبى كال...ماما هاي نيه حلدها زعيرون مو متل حلد فقومه سبييير
باوعله مرتضئ وخزره واني لزمته اخاف يضربه
ابتسمت جولي كالت...اي ماما هاي اختكم انتم تحبوها موو؟
رد عليها مرتضئ،بعناد وهو ياشر علئ نفسه...هي احتي اني مو احت مممش
ضربه مجتبئ بغضب...نعله ابوووك هي مو احتك ماما هي ان احتي ؟...
جولي بقهر...اختكم ثنينكم وبله لغووه تمام ؟
مجتبئ كتف اديه زعلان...ما اعبج
تنهدت بضيق مدت ايدها وهي تتلنس،بي وسحبته لحضنها وباسته بخده حييل وكعدت تفهم بيهم...
مرتضئ كلها ...اتمها النيه عنونه « شسمها البنيه الصغيرونه »
ابتسمت ..اممم اسمها هدار
رد عليها مجتبئ ..ايييع ان علووو « ايع محلو »
ضحك جاسر كله...اي صح اني هم معجبني
جولييت بقهر وصدمه...يااا عزا شبي محلوو والله حلو
مجتبئ...لا ان علو تميها عزل
اني انصدمت وجولييت بهتت ملامحها وحتئ جاسر عبالك مي بارد ونزل عليه بسرعه عقد حواجبه متفاجئ من كلام مجتبئ
كله باستنكار...قصدك غزل ..شعرفك انت بهل اسم ؟
رد عليه ببراءة وطفوله...بيبي دول احتك اتمها عزل وتتلوها قگوها قلقه « بيبي دكول اختك اسمها غزل وكتلوها طكوها طلقه »
جاسر انتفض،من كلامه وجولي وجهه ضل ينطي الوان
كالت...حبيبي كافي الله يرحمها اسكت
جاوبها بعناد...مااا هاي النيه اتمها عزل
جولييت سكتت وجاسر وكف وتنهد رد عليه كله...كافي بابا اسكت
تجاهل امه وابو وتقرب من البنيه وهو يبوس،بيها.. عزل اني عبببببببج اوووووواي اتر من رطاوي
صلاح كال...سموها بالبيت غزل وبالجنسيه هدار بهل شئ يكون رضيتو الطرفين
جاسر باوع الجولي...بكيف امها اني،ما اريد افرض عليها شئ...
جولييا ردت عليه بهدوء وارتباك...اخاف ام غزل متقبل اسمي بنتي علئ اسم بنتها...
رد عليها صلاح...وشنو شام اخذت طابو بالاسم لا ما بيها شئ سموها بالبيت غزل وبالجنسيه هدار ما بيها شئ وهم يكون الاسم ذكرئ من المرحومه غزل
جولييت بلعت ريكها بحسره...والله اني من زمان جنت اتمنئ تصير عندي بنيه واسميها غزل علئ اسم اختها الله يرحمها بس من جبت بنيه غيرت رأيي لان يجوز ابو غزل ما يرضئ الاسم يستهلك الأكثر من اثنين
جاسر باوع الجولي الي هي جانت موجهه نظرها بفراغ وتحجي بدون ما تباوعله اصلا...
هز راسه باسئ من كلامها وعرفها تعزف علئ الوتر الحساس وتريد تفهمه ان اولادها ما اعز من غزل وهاي وجهة نظرة مو وجههت نظرها هي...كأن تريد توصل اله رساله مبطنه...
جاوبها بعد ما رفع حواجبه بتهجم من كلامها...انتي شتحجين شنو مستهلك وبعدين هذا هو مدام اخوانها يردون اسمها غزل هذا هو اسمها غزل بالبيت وبالجنسيه هدار حتئ ارضييج لا اكثر ولا اقل
ابتسمت باستهزاء ومجاوبته...
وهو اخذ الطفله وباسها بخدها بحذر وراح يرجعها للخدج لان هي،جولي،بس ترضعها يرجعوها للخدج...
لزمتها بقلق وسائلتها...شبيج جولي احسج مو طبيعيه؟
بلعت ريكها بغصه وشهكت...اي والله يا ريهام مدري شبيه احس الدنيا تمشي عكس ويايه واني والله ابد ما مئذيه شخص اني دست علئ كرامتي هواي بحيث ارضي العالم وتالييها انداس عليه...
مسحت دموعها وبستها بخدها...كافي يروحي ان شاء الله ربج يفرجها ..
جان صلاح ملتهي ويه جهال جاسر يركض وراهم هيج وهيج لان لو يخليهم يفلشون غرفة المستشفئ
صاح عليها بصوت غاضب مصطنع...ادري جولي بس تنطين خبز ما تنطين تربيه جهالج شبيهم خابصين الامه
ضحكت جولييت و وجهت كلامها لصلاح...شسوي يا بيت مهيوب ولدي طالعين عليكم
رفع حاجب باستنكار...ولج شنو احنه ما عدنا تربيه ؟
رجعت ضحكت مره ثانيه ...ههههه لا لا استغفر الله مو قصدي والله ونعم منكم بس انتم يعني هيج مشعوذين او مشيطنين
باوعلي ورفع حاجب ورجع باوعلي كلها...ونعم منج انوب طلعنه مشيطنين ومشعوذين لو ضالين علئ التربيه احسن
حطت ايدها علئ شفايفها وكملت بفشله . يااا عزا ونبي مو قصدي خاني التعبير هيج يعني قصدي وكحين او اسباع او مدري شنو
رفع اديه ببراءه ...عمي اني بريئ من بيت مهيوب اني رجال عاقل وهادئ بس اخوتي لااا صدك مشيطنين من فلاح الله يرحمه لحد جعفر ...
رد عليه مجتبئ. بت بابا عباب «بس بابا حباب »
تنفس بقهر...ابوك ابوك هو المصيبه الجبيره ابوك جان بالمدرسة يعارك ويضرب ويفصله المدير ويستدعي ولي امره
وهو جاسر جان يخاف من ابووي حييل فشيسوي يروح الجيرانه عنده دكان ياخذه ويكل للمدير هذا عمي ابوي مو هنا بالعماره ويرجعونه للدوام وهاي جانت سوالف ابوكم الحباب
لا وازيدك من الشعر بيت مره من المرات هو غايب باخير السنه وطلع راسب ويخاف من ابوووي ابوي شويه قاسي وجاسر مشعوذ ...
ومناك انطاني الجنطه كال...اخذها لاهلك واني راح اشوفلي مكان اشوفلي ناس تحميني من ابوي
واحنه من يوم ندور عليه وماكو تاليها خابرونه علئ التليفون الارضي من البصره كرابتنه كالو جاسر وصل لا يضل بالكم
ابوي انصدم هذا شلون ركب شلون اندلهم وراح جابه واجه بس ما كتله لان راحت وياه رضيه ورضيه تحبنه حييل وضاله تتوسل بي بالطريق ومن جابه واجه
سمعت ابوي يضحك بس جاسر مو يمه يكول الرضيه...هذا جاسر صدك زلمه راح للبصره الوحده وهو ما يندل بس المنطقه وسأل المختار وهم ماخذينه الكرابتنه هناك وما كايللهم شردت من ابوي لان راسب كاليللهم ابوي كلفني بمهمه هنا
ضحكت جولييت...بس اني ولدي مؤدبيين مو مثل ابوهم اني ابوهم غاسله ايدي منه
هو دخل كلها...ليش بويه غاسله ايدج مني شمسويلج شو اخذتيني لحم وشمرتيني عظم...
هي عضت علئ شفايفها وكتمت كلامها
رد عليه صلاح بضحكه...جنت اسولف الهم عن ماضييك الاسود وطفولتك البريئة
باوعله بنظرة عتب وعض شفته...افااا عليك صلاح فضحتنه ليش هييج تفضح اسرار اخووك كدام الغاسلين اديهم مني...
صلاح بضحكة..سولفت الهم من رسبت وانهزمت للبصره خايف من ابووي
ضحك بتنهيده....بوووياي والله بيومها من اجاني ابوي دخلت فلم رعب علئ اكشن كلت راح انكتل واني اشوف امي رضيه كل شويه وعضت اصبعها وتتوعدلي كلت لا هذا هو انكتلت
بس تفاجئت ابوي باسني كدامهم وما كأن شئ صار ومن رجعنه بالسياره جنت اباوعله بترقب واني منتظر الكتله بس ما ضربني وضل زعلان عليه شهر كامل واني محتار شلون ارضيه واطيب خاطره
الف رحمه علئ روحك يابه صدك انت خساره ما تتعوض حكيم وحليم وتستاهل تكون شيخ عشيرة ..
همست بحزن الله يرحمه وجولي باوعت الملامحها عبست بحزن اي حقها تحزن لان عمي مهيوب صدك رجال ونعم منه وقتله اخوها فعلا اي ذكره منه تاذيها هي،قبل ما تاذي غيرها احساسها فضييع بهل لحظه لان الخساره بسبب اخوها...
ضلينه عندها شويه وخلينه ورجعنه للبيت بعد ما صلاح كال الجاسر...صدك ما تدري منو الماتت ؟
عقد حواجبه باستغراب. اي منوو نويله لو خالتك ام هاله
جر نفس عميق وحزين...لا بزونتة شهد مرة جعفر
صفك جاسر اديه باسف....لاااااا حرامات شلون ماتت والله المرحومه باخر ايامها صارت صاكه...
بس جولي طلعت اخس من شهد وهي حييل حزنانه علئ البزونه...بس صدك والله خطيه...
.................................
وقار...
مر اسبوعين واجت خالتي صبريه مره ثانيه خطيه هي ابد ما خلت جولي تجيها وتجيب الها...
دكت الباب واني طلعت الها شفتها تنزل بالاغراض من السياره باوعت هاي سيارة جابر والي بداخلها هذا جابر
من شفته عيوني ضلت متعلقه بوجهه الوسيم وهو باوعلي بنظره طولت شويه وبعدها دار وجهه للامام
ضليت اباوعله وعيوني ترمش كلبي يرجف منه وعليه
باوعتلي صبريه وهي تنزل بالمسواك كالت...خايبه شمالج روحي بعد نامي وياه اكلتي الولد اكل
انصدمت من كلامها وباوعتله بجمود واتداركت نفسي بلعت ريكي بغصه وابتسمت بحزن ...شلونج خاله
جاوبتني بقهر...وخل خلاله كووون الج ولجويبر ابو المتعه
صاحت عليه من بعيد وبصوت خشن...خاب جويبر ابو المتعه ما تجي تنزل المسواك يمن كوون مال اللطم انزززززل لا اجي افلش السياره علئ راسك
هو نزل من السياره وضل ينزل بالصناديگ والاغراض،وانوب جايبه بشوش،يبووو نخلص من الديج تطلع النه البشوش...
جان جابر يخلي بالاغراض بالحووش ويباوعلي،بعتب بس لا سلم ولا نطق لي كلمه
صبريه باوعتله وهي تهز بروحها ..ما تسلم بحلكك عظم هاي،وقيره بت عمك يالله بوسها وسلم عليها
هو دنك وخله وراح بدون ما يجاوبها واني روحي صعدت للستار وانقهرت حيل
خلته راح وهي كالت...خايب اهمداك يابو المتعه
ورجعت باوعتلي كالت...لا تنقهرين خلي يطلكج وجوليته تتطلك وازفجن ثنينحن بيوم واحد واخليهم يتخبلون وروح امي
ضحكت علئ كلامها ودخلنه جوه عزلنه المسواگ اني وياها وهي فد نادره ومعدله نضفت المطبخ و الثلاجه طلعتهن يجنن...
وجايبه تمر مسويته بدهن حر ضمته بالكاونتر كالت...هذا لجكليته بنيتي بس هي تاكله وروح امي اذا جويسر اكل منه اله انتحر
رفعت حاجب بصدمه . يا خاله انتي تكرهينه
كالت...اي والله اكرهنه عذب بنيتي جوويليته وهي صغيره ومالها والي ولج هو العنده جكليته شلون يكدر يعذبها ويقسئ عليها بس اخوج مجرم
ضليت كاعده اني وياها هي رادت تروح للمستشفئ وجبناها نسولف كالت..وجهه الطاوه طلعت من السجن يا بعدها...
جريت نفس بملل من ذكر اسمها كلتلها...اي طلعت من
السجن صار تقريبا بالاربع اشهر من اول ما شردن بناتها جاسر طلعها
وهسه سمعت من ريهام ان دتنخطب هاي سجئمتصله بيها وكايله الها...
طلعت جكارتها ودخنتها بقهر...واللع عمي خووش طكت الها تلث رجوله وينه و وينه بعد شتريد جااا مثل حضي ابو اللول جنه شيشه مال كحه ويتعيقل عليه أنوب تزوج عليه حسنه وجهه جهه جنه معلاگ بايت...
ضحكت عليها...ههههههه اي والله خاله بعد كلمن وحضه وهي سوكها ماشي
نفخت الدخان من خشمها وشفايفها كالت..واي جااا غير ضاله تشد وتمط ومحتاره شتسوي جااا مثل حضي مخلصتها انش بالهووش واحصد بالزرع وكل يوم ميتلي غالي...
تنهدت وسرحت بتفكيرها...اي والله يوميه رايحلي غالي من ثوري الباعه ابو اللول وعرس،بي الثوري الكتله داوود ...
...........................
جولييت...
تقريبا شهر كامل اني بالخدج ويه طفلتي ارضعها و وياها وياها لان هي خطيه صحته شويه مو تمام الضربه من زمان اثرت عليها وهماتين صارت عندي ولاده مبكره وجبتها بالسابع يعني لحد الان ما كامله
بس الحمد لله المهم تمام الخلقه
اليوم كتبوا النه خروج لان صارت زينه وحتئ يكولون شويه سمنت ونشنشت يعمري شكد اتمنئ اشوفها...
هو جاسر طلعنه من المستشفئ الله شاهد هو ما قصر ويانه اببد واني اكول الخاله صبريه هو ابد ما مقصر ويانه دكول خلي يروح هذا واجبه وكله رياء شككتني بروحي وبي...
ركبني بالسياره وربط حزام الامان عليه وانفاسه تضرب بوجهي وبعدها خله الطفله بحضني وساق بسرعه...
كتله بتنهيده طووويله...جاسر اني لازم اسوي العمليه وارجع اشوف اني مو وحيده وما عندي شئ لا اني،ام وعندي تلث اطفال برگبتي يعني،يحتاج الهم عنايه واهتمام
ومن بس،هيج اني ما اريد اي شخص،يعطف عليه وبعدين صدكني حتملون مني فلازم اسوي العملية حتئ اهتم باطفالي وبنفسي،واعتمد على روحي...
تنهد بضيق،كال.. اكيد اسويلج عمليه اني،من البدايه ردت اسويلج عمليه بس انتي حامل ومو زين علئ،الطفل
وان شاء الله بس،تستقر حالتج شويه اسويلج وان شاء الله ترجعين تشوفين وتنورينا من جديد
اردفت بارتجاف...جاسر اني عندي الذهب مالتي،بيعه وسويلي،بي عمليه
ضرب علئ الاستيرن بقووه وكأن كلامي ازعجه وجاوبني بحبروت هااائل... اسككككتي كلامج مو منطقي انتي ليش هييج تتصرفين ليش تتحسسيني،اني مقصر وياج شنو تبيعين ذهبج اني الي اتكفل بعمليتج هسه لو تصير بمية مليوون
انتي زووجتي ومسؤؤله مني لا تضلين تطنطنين بكلامج ترئ كلامج ما بعجب
اشرت علئ نفسي،مذهوله من كلامه...اني اطنطن بكلامي ؟
رد بقسوه وتهجم...اي تطنطنين ومتعرفين تحجين ترئ كلامج يجرح بس انتي،ما تحسين ابببد
تنفست بخفوت واضطراب وسكتت مقهوره من كلامه
من وصلنه وهو نزلني ولزمني،من خصري وشال الطفله بالايد الثانيه ودخلني جوه
استقبلتنه رضيه و وقار وخالتي،صبرية ...سلمن عليه واخذن الطفله مني ...
واني أخذني جاسر للغرفه لزمني وباسني بخدي،واني بسرعه ابتعدت عنه رجع لزمني وحضن وجهي بكفوفه كال بذوبان...شبييج ليش احسج مو طبيعيه انتي سامعه شئ
هزيت راسي بنفي...
كرص خشمي كال...لا تصيرين ام خنيس،جنج قسمة مرة زامل ما تنطق الها بحرف
رفعت حاجب بقهر...انوب صرت قسمه
ضحك ورجع باس،خدي...اي بس بالسكوت بس الشكل لا انتي غيييير
عضيت طرف شفتي بحزن ومجاوبته
تنهد ورجع حضني كال. احجي شبيج شنو الي مضوجج انتي والله ابد مو طبيعيه ما جنتي هييج
جاوبته بسرعه...شوكت تطلكني
ابتعد عني ومشئ عني خطوات كال...من يبيض الديج
ضربت رجلي بالارض...اهووو لا تاخذني علئ كد عقلي احجي الصدك شوكت ننفصل وانت عادي روح شوف حياتك
رجع تقرب مني وباس عنقي عبالك مدا احجي وياه كال ..صايره حلوه بس ليش جاي تنفرين مني يجوز لان نفسه موو ...لان انتي جنتي حتئ تتنسين عليه...
بلعت ريكي بصدمه من وقاحته بالكلام شوكت تنسيت عليه والله ما ادري اصلا تنسيت كوجه حامضه ببنوتي وبمرتضئ،ومجتبئ نساوتي خلصت عند خالتي صبريه بعد شوكت تنسيت عليه هو يحب يبالغ...ويالف قصص...
رحت دا اطلع الي ملابس بس هو ساعدني وطلعلي ملابس دا البسهن حسيت بالباب انسد بس مال الحمام مو الغرفه كلت جوز دخل يسبح
نزعت ثوبي ضليت بالاتك ودا البس،جان هو كال بصوت مستهزء....هههه والله عمي زين تطلب الطلاگ وتسويلي اغراءات
ضميت الثوب الصدري ورجعت خطوات واني اتلفت بالمكان كتله بفشله وارتباك ...انت ويينك ليش هيج تسوي بيه ليش تستغل ضعفي ومرضي
تقرب مني وحضني واني اتلوئ،بين اديه كال...رحت غسلت و رجعت لكيتج مشلتحه بس عادي ترئ ياما تشلتحتي كدامي تذكرين من جنت انومج عندي وانتي نومج مستهتر اوووف شسويتي بيه
سحب الثوب ولبسنياه بهدوء كال...شفتي شلون سترتج وما خليتج هيج كدامي وترجعين ودكولين تستغلني ولج بربوك اني يا يوم مستغلج
همست بدلال...ما احبببببك
رد بغرور...مو مهم المهم اني احببج
ضحكت باستهزاء وهو خله وطلع وسحب ايدي وغسلي بره بالمغسله كال المستشفئ،بيها جراثيم لا انوب تتمرضين وانتي مناعتج مو قويه
جاوبته...لا تصير حنين وهم اضل ما احبك
رد ببرود...وهم ارجع وافشر عليج وانتي تكيفين مو فشار غزل عندج...
رفعت اكتافي بعدم قبول...منحرف شسويلك
باس،خدي...سويلي اغراءات
همست...شكد منافق
عاد هو لزم وجهي بعنف وبااااسني حييل وابتعد عني بارادته كال ببرود وخدر...شفتي المنافق شيسوي
رديت بقهر...اي هي هاي سوالفك تبوس بيه وتحجي عليه
جاةب بنفس البرود...شسوي،منافق مو بيدي
اني لو اشوف بذيج الساعه جان ركعته باكبر جفجير علئ راسه كد ما دقاني بكلامه وبروده...
ضلينه يومين علئ هل حال...هو زين ويايه وما عنده اي مشاكل ويايه
وخالتي صبريه راحت وطلعت اربعين طفلتي اخوانها يسموها غزوله ويحبوها حييل واني اخاف عليها منهم لان هم اببد مو امان لان يلزموها ويسبحوها سواية من سبحوا الديج...
اجتني وقار بصوت خايف كالت...هاي شام تريد تحجي وياج
اني استغربت واخذت الموبايل من ايدها بس مدري شبيه خفت حييل واديه رجفت كلت ...الو هلو
جاوبتني بهدوء...اهليين كيفك الحمد لله عسلامتك
بلعت ريكي وجاوبتها بهدوء...تسلمين الله يسلمج
كالت...ليه سميتي بنتك غزل لشووو ااه
عقدت حواجبي باستغراب وجاوبتها...اءءء لان اخوانها رادوو هييج بس هي بالجنسيه هدار
كالت بغضب. لا عاد تبرري انا بعرف ليش هيك سميتها لانو بدك ابوها ينسئ ان في غزل ماتت وانقتلت علئ ايد اخووكي لو كان عندك كرامه ولو شووي ما كنتي سميتي بنتك علئ اسم بنتي
وياريت لو بتغيري الاسم لان هل اسم اسم بنتي وابوها ما بينساها لو خلفتي عشر بنات وكلون سميتيهن غزل ما بينساها ولا بيعوضوا عنها فهمتتتي
سدت الموبايل بوجهي وخلتني فرت من قهري كالت وقار ...خير شكوو شتريد منج
مسحت وجهي بتوتر ما تريد شئ،بس جاسر اجه لو بعده ..
كلتلها...لا بعده هسه خابر كال بالطريق
سكتت مجاوبتها وهو بس اجه واني انهرت حييل هو تخبل لزمني وعاط بيه كال....شبييج شبييج تخبلتي شكوو تصيحين
عطت بي ...والله روح كل المرتك الي خافيها عني ودكول محرمه عليه وتجذب عليه ومستغفلني كلها لا تحتك بيه وخلي تعوفني بحالي حتئ علئ الطفله اجت حاسبتني شنو مسميتها علئ اسم بنتها
تقبل بالله انت بهل كلام بس انت اكيد تقبل هاي ست الحسن والدلال قابل جولي الي ضاله ملطشه بيدك
هو لزمني بعنف من اكتافي وهزني بغضب ...شنوو ملطشه وشنوو اقبل اشو انتي صايره كلش تتعيقلين ومتعجرفه
ضحكت باستهزاء واني ابجي...اي اني اتعيقل لك اني يا يوم تعيقلت يا يوم تكبرت وتعجرفت دستوني كلكم برجلكم وسكتت ما حجيت
شوف مثل ما هي مرتك اني مرتك وكلها خلي تحترم نفسها واذا مو كدها انت طلكني
اني من حجيت هيج هو هجم عليه بس لزمته رضيه ضل يصيح ويغلط انوب فلش البيت ما اسمع بس التفليش
وقار اخذتني الغرفتي واسمعه يخابر بشام وضل يصيح عليها وتجاوز عليها وخله وراح
ضل كم يوم زعلان مني ولا حتئ يحجي ويايه واني كذلك لا احجي وياه ولا مهتمتله بس داخلي مكسوره حييل ومقهوره...
........................
جابر ..
كاعدين بالبيت العصر ورى الغدة وكالعادة دنشرب جاي .. اندكت الباب خليت الاستكان وطلعت اشوف منو ..
طلعت فتحت الباب واتفاجئ بيها سجى بنت المرحوم فلاح واخواتها ..
جانت واكفة شايلة اختها الصغيرة على خصرها ومبينة تعبانة ووجهه مخرمش ولابسات ملابس بيت واخواتها حالتهم يرثى لها وتقهر .
على عيونها نظرات توسل خذلان وحزن ..
من اجت عيني بعينها نزلت اختها وكالت بنبرة مرتجفة ومتلعثمة شلووونك عمو جابر ...
رديت عليها بصدمة : سجى ؟؟ هاي شصاير منو جابج ؟
كالت عفية عموو ممكن ادخل عندكم ؟ بس احجي وياكم حباب ..
تحجي وتفرك باديها ..
اني جنت مذهول من الموقف حتى مكتلها فووتي عبالي رأسا بقيت صافن .. على كلامها وتوسلها وعيت
وخرت من فتحة الباب سويتلهن مجال وفاتن جوه تلاثتهن واني سديت الباب وصرت كدامهن ..
تعالوا تفضلوا تفضلوا ..
فتحت باب الاستقبال ودخلتهن جوة للصالة مكان ما امي امي وابوي كاعدين ..
لمن شافوهم كاموا متفاجئين .. هيه سجى سلمت
وهيه مدنكة السلام عليكم ..
ردوا عليها وملامحهم باهتة .. او بالاحرى مذهوليين ..
ابوي سألها هاا بوية خير ان شاءالله منو جاي وياكم ..
هي دنكت واني رديت عليه بسرعة ..
يابه جايين وحدهم ..موو جايين وحدكم
ابوي حس اكو شي اشرلهم كعدوا بويه استريحوا ..
هيه كعدت ع القنفة واخواتها بصفها
مدنكة تعصر باديها وترجف ..
سألها ابوي انتوا شون جيتوا وحدكم امج شون امنتكم بويه ؟
رفعت راسها وعيونهه كلها دموع ..
جدو ماما هيه الي طردتنا ااقصد .. هيه كالت روحوا على عمامكم ماريدكم اني ماما تريد تتزوج جدو وخطيبها ميريدنه ..
رد ابوي بعد حسرة ..
لا حول ولا قوة الا بالله هاي شوون ام هااايه ؟
اكو ام هيج تسوي بضناهه زين شون خلتكم تطلعون من البيت وحدكم وانتن بنات ماخافت عليكم ماخافت الله بيكم ؟؟
كالت بخوف ونحيب...لا لا هي جابتنه هنا اجرت النه تكسي وذبتنه وراحت
كتلها شوفي سجى هذا اول درس الج ، ترة امج مو خيرة وانت عفتي بيت جدج الي جنتي معززة مكرمة بينهم ورحتي ركضتي وراها وهيه باول موقف باول شخص تقدم الها عافتج انت واخواتج وانتي الي جنتي حاقدة على عمامج بسببها وتكولين ظلموها يله شوفي هسه منو المظلوم
خلت ايدها على حلكها وظلت تبجي وتشهك
واختها الصغيرة وكفت توخر ايدها من على حلكها وتمسح دموعهه عنهه ..
كالت عمو اني والله ماريدكم تلوموني اني الي سويته غلط وهسه كلهم تخلوا عني حتى بيت جدي ميريدوني وماما تكول رجعوا لعمامكم وتضرب بينا وتأذينه واني محتارة ماادري وين اروح ووين اودي خواتي
كاللها ابوي ليش محتارة بويه بيت ابوج مفتوح الج بيت جدج مهيوب رباج وانتي صغيرة يحتويج انتي واخواتج ومحد يتخلى عنج شون يصير هالحجي !
لا جدو الله يخليك والله عمو جاسر متحلف بيه ماريد ارجع لبيتهم اخاف والله اخاف والله تعبت من الضرب ياهو الي يلزمني يضرب بيه عفية لا تكلوله اني هسه عندكم خاف يجي يضربني
كاللها لا بويه لا جاسر وعمامج لازم يعرفون انتي مسؤؤليتهم
كامت على حيلها تفرك باديها وترجف بعد شويه وتوكع
وتتبجي وتتوسل الله يخليك جدو لا تكوله والله يموتني موو كتلك اني هو متحلف بيه الله عليك الله يخليك ..
راحت يمها امي لزمتها من جتفها تهدي بيها
وابوي من شافهه هيج ظل يطمن بيها
هذا هو بوويه ماراح اكل لجاسر لا تخافين
وبعدين وجه كلامه لامي
ام جابر اخذي البنات صبي الهن اكل خاف جوعانات وخلي سجى ترتاح بغرفة ريهام
باوعت لابويه ودموعها على خدها يعني مراح تخابر عمو جاسر وتكوله احنه هنا ؟
جاوبها بهدوء روحي ارتاحي بويه رووحي ولا تخافين ..
اخذتهم امي وراحن ..
تقربت من ابوي وسألته بصوت هامس
ها يابه شراح نسوي هسه ؟؟
رد لازم نخبر عمامها مايصير نضم عليهم هيه مسؤؤليتهم يا بويه ...
............................
وقار ...
كعدنا الصبح اليوم متفقين نروح لزيارة الامام الكاظم ، نزور الطفلة ..
تحضرنا كلنا وروضي ومشمش خبلوني يردون يلبسون على ذوقهم ... طلعت نص الكنتور يله عجبهم ..
ساعدت جوليت وبدلت للطفلة وخليتها بحضن ماما رضية واني رحت لبست ..
كعد جاسر شافنه متحضرين احنه كلناله قبل يوم حنروح ..
ظل يباوع لجوليت بحسرة ، هيه لمن سمعت صوته تنفست بعمق وعضت على شفايفها ...
وبعدها طلع محفظته وانطانه فلوس ووصى على الجهال وعلى جولي وراح وهو يلتفت عليها يباوع
الى ان طلع من الباب ووصاني اقفل البوب ورايه ..
اني شلت الطفلة ولزمت جوليت من ايدها ، وماما رضية لزمت روضي ومشمش وطلعنه من البيت
وكفت جوليت على صفحة وانطيتها الطفلة شالتها على ما قفلت باب الشارع ..
باوعت اله من بعيد شفته لحد الان بعده ما رايح رجع علينه وضل يحجي ويه جولي بس ما سمعت كلامهن بس هو جان يحجي وياها بهمه وهي بس تهز براسها...
بعدها عدل حجابها وطلع فلوس وخلاهن بيدها وعي لحد الان تحجي وياه
رجع علينه كال...والله لو ما عندي شغل جان اني اخذتكم بس عندي شغل ودزوا عليه كال..عود دعولنه
ضحكت جولييت...ادلل راح ندعي عليك
وبعدها صعدنا بالسيارة وانطلقت بينا للامام الكاظم ..
اخذت جولييت اني زورتها لان متشوق وماما رضيه والاطفال ضلوا بره بالصحن
زرنه اني وياها جان ازدحام كووولش قوي صادف يوم اربعاء والزياره ضخمه
كعدنه اني وياها برا بالصحن نصلي وماما رضيه كالت راح اروح ازور الطفله واجي وبعدين اخذ التوم ازورهم...
هي راحت وجولي وكفت تصلي،ومرتضئ يبجي يريد يروح للحمامات كلتلها جولي راح اخذ مرتضئ للحمامات
هي جانت تكبر ما حاجتني ولا جاوبتني اني،بعد موتوني اخذتهم ورحت جان ازدحام علئ الحمامات
نزعتهم وبعدها غسلت الهم وطلعنه توضيت من جديد
رجعت للمكان ما لكيت بس رضيه والطفله تقربت منها كلتلها بتساءل...وين جولي
كالت بخووف...غير وياج خليتها يمج
انخطف لوني وبخوف جاوبتها...ياااا عزاا وين راحت عفتها هنا والله
رحنه نركض واحنه ندور من نص النسوان ماكو قص ملح وذاب
طلعنه للمناداة ناديه باسمها ماكوو تقريبا ساعتين ندور وماكو عاد اني تخبلت وماما رضيه ضلت تلطم ..يمه بنيتي جولي يمه شلون ارجع وانتي ماكو يمه شكل لرجلج الدهر صابني كوون
نهاية البارت...يتبع
كونوا انتم كونوا بخير...احبكم 💔
نور سمو العراق 😘
لا تنسوا التصويت والمشاركه احبتي بكم نكتمل🌹