البارت 30
رواية ...جولييت واسرها...غياهب الإنتقام
بقلمي...نور سمو العراق
.........................................
لا تمر بخاطري مثل الغريب ؛ !
وانتَ صاحب دار وعيونک وطن
...
💔💔💔💔💔💔💔💔💔💔
وقار...
جان دنيا المغرب صليت اني وجولييت وهي جانت تعبانه شوويه وبطنها كبرت...
ياربي استغفر الله صح الك حكمه بحمل جولي بس خطيه هي مريضه وعمية وابد مو وقتها هل حمل ..
صدك حمل علئ جووولي وعلئ عاتقها وهل طفل الجديد مسؤؤلية هماتين لو مو حامل احسن ...بس اله بيها ارادة...
اجه جاسر من وكت اليوم تعشينه والحمد لله كل واحد راح علئ غرفته
اني دخلت الغرفتي ودخلت بنوبة بكاء عااارمه مقهووره حييل حييييل يعني جابر ابد ما اجت بعينه العشره ابد ما يتذكر موقف اليه..
صار شكد زعلانه ولا سأل عني،ولا كال هاي وين راحت ولا اشتاقلي عكسي اني الي دا اكذب علئ نفسي واكول ما اشتاقيت اله...
لذلك هو طلع صدك ما يحبني ولا بعمره حبني هو ما اعرف ليش تزوجني لحد الان متأكدة ومقتنعه ان هو تزوجني بس حتئ ينقذ جولييت
والله هو كل تصرفاته غلط اني صح مو معصومه بس هو يجفص بالبطن ويقهر...
ضايجه ومقهوره حييل اجتني رساله علئ الواتساب مكتوب...شلونها وقوره...
بلعت ريكي بخووف رقم غريب هذا بسرعه شكيت بي يكون جابر ...
اترددت اجاوب وبعدها شجعت نفسي وجاوبت...تفضل منوو ؟
رد عليه بسرعه كتب...معجب يام الحجايه الدافيه
ضليت اباوع للرساله باستغراب...يالله هذا مو اسلوب جابر ابببد منو ليكون هو جابر بس متنكر بغير شخصية...
كتبت...طاح حضك
رد بسرعه...تمونيين
تنهدت بضيق...كول انت منوو ولا تكعد تلعب عليه لان اسهل شئ عندي الحضر
كتب...احضريني عادي ادخل من غير رقم
هزيت ايدي واني اضحك...ههههه يمعود عادي ترئ اغير رقمي ومحتعرفه صدكني كول منو انت قبل لا احضرك
كال...احزري منو اني؟
ترددت اكتب جابر هماتين مجنت اريد احسسه ان هو مهم عندي لذلك ضليت محتاره وكتبت...شمدريني قابل اني عرافه...
كتب...تنصدمين اذا عرفتي اني منو ؟
ضحكت وكل ضني جابر...منو انت الجني الازرك
رد بسرعه...لا اني داوود خطيبج سابقا
فتحت عيوني بذهوول وصدمه ومن خوووفي شمرت الموبايل بسرعه ومجاوبته...
هو بسرعه اتصل مره ومرتين وتلاثه واني مصدومه وارجف من خووفي ومن ارتباكي
رجعت لزمت الموبايل باصابع ترجف وعيون دامعه كتبت...خيير شتريد
جان يطلعلي جاري الكتابه تقريبا طوول دقايق واجتني رساله منه كاااتب ...وقار حبيبتي اني والله ما اعرف شلون ضيعتج من أيدي والله لحد الان ما مستوعب جابر اخذج مني...
جابر لعب لعبه وصخه ضدي ودنت نفسه علئ عرضي الي هي انتي وجنتي خطيبتي وترئ،جابر اله سوابق اي اله سوابق وهم من قبل حط عينه علئ زوجة اخووج اني ما اريد احجي لان الكلام يجرح...
بلعت ريكي من كلامه وجاوبته برساله...داوود هل كلام مو مهم عندي وكل الي صار قسمه ونصيب وانت لا تنسئ نفسك نشرت صوري وفضحتني ولو فعلا تحبني ما تسوي بيه هييج...
كتبت... اكدر اتصل ؟
تنهدت بضيق كتبت...لااا مستحييل اني ما اريد اسمع صوتك ولا اريد احجي وياك وحغير رقمي ...
تجاهل كلامي وكتب...وقار اني صح نشرت صورج بس صدكيني جان الي اعذاري وظروفي انتي حبي الاول انتي عشقي وروحي وحياتي وابن عمتي غدرني بيج واخذج مني وهذا كله طير العقل من راسي...
انتي،يا وقار مو اي شخص مر بحياتي اني عشقتج وحبيتج حتئ اشتريت قطعة ارض وردت ابنيها الج ونستقر سوه ورغم انتي خنتيني بس اني لحد الان احببببج واموووت عليج وابوس تراب رجليج...
اني هسه بس سمعت جابر يريد يطلكج كلت لازم ارجعها اليه والله جابر يطلكج منا اني اخطبج منا والله ما يستاهلج
ترئ وما خطبج بس حتئ يتقرب من جولييت اي هو من خطبج حتئ يكون قريب من جولييت لان هو يحبها ويعشقها من زمان...
لطمت خدي بصدمه والدمعه بعيني...عزا بعيينك انت شدتحجي ولك لا تحجي هييج الله يخليك وخليك بعيد عني ترئ كلامك مو منطقي...
دزلي رساله صوتيه من فتحتها وسمعت صوته الخشن كلبي ضل يدك بخووف واني اتلفت لا يدخل عليه جاسر ...وبعدها اجت اكثر من رساله صوتيه..
كال..شلونج حبيبتي وقار شلونها مريتي ان شاء الله شوفي حبي اني سمعت من عمتي صبريه ان جابر قافل علئ طلاكج يعني ما يريدج
واني من زمان ادري بي هو ما يريدج وتزوجج بس حتئ يتقرب من جولييت وطز بي هو جولييت لان هو ما حب روحج ولا حبج الج ...
صدكيني بس يطلكج اني اتزوجج والله سويت المستحيل حتئ اوصل الج واخذ رقمج وكوه اخذته من صبريه
وفاتحتت اهلي بخطبتج صح اول مره ما قبلوا بس من شافوا اصراري وحبي الج وافقوا اصلا حتئ لو ما يوافقون مو ذات اهميه عندي لان انتي اهم شئ بحياتي...
تطلكي منه وان شاء الله وعد اني اتزوجج قبل لا هو يطلكج واموووت عليج
حذفت الرسائل كلها بسرعه وبعدها حضرته واني ارجف وابجي صدك جابر يريد يطلكني اي صح هو ابد ما حبني وحتئ اشواق كالت يريد يطلكج...
تقريبا مرة عشر دقايق واني ابجي وانحب علئ حضي اني رغم كلام داوود القاسي بس بصراحه مدري شبيه ارجف علئ جاابر
حسيت انطعنت بنص گلبي واني اشهك بالبجي اندك الباب واني كمزت من مكاني ومسحت دموعي بعشوائية ...
همست بصوت مبحوح...منووو
دخل بكل هيبه وجبروت وهو عاقد حواجبه سد الباب وهو يباوعلي باستغراب
بلعت ريكي بغصة...ج جاسر
تنهد بهدوء واجه كعد يمي وهو يباوعلي واني نزلت راسي بخجل ومسحت دموعي
مد ايده علئ وجهي ومسح دمعتي كال...شبييح منو وياج منو ماذيج
شهكت بحسره وحضنته واني ابجي...جاااسر تعبت والله تعبت اني والله ما عندي حظ بالهلدنيا من جنت صغيره تعوقت وانعكفت علئ نفسي..
انوب خطبني داوود واذاني ونشر صوري انوب هسه جابر ابد ما مهتم المشاعري ولا مهتم اليه اني ليش هيج يصير وياي
طبطب علئ كتفي وجر نفس...كولي الحمد لله على كل حال وهذا هو اذا جابر ما رادج مو نهاية العالم خلي يطلكج وكل واحد يروح بحال سبيله..
ما يسوه دموعج ..صدكيني واصلا هل زواج من اساسه غلط نهئ عليج واخذج وانتم ما بينكم اي تفاهم اني ما اكدر لا اجبرج عليه ولا اجبره واذا الطلاق حل مفيد خلي يطلكج
ضميت وجهي بكفوف اديه واني ابجي...شلون يا جاسر يطلكني شلوون هذا زوجي عشت وياه وكعدت واكلت وياه والعشره متهوون
سحب نفس عميق وهو يدخن بجكارته...اني جنت اريد احجي وياه واحاول اصالحكم بس هو تكبر هوواي وخلق من المشكله الف مشكله وكلامه عند اشواق ما عجبني ...لا تهتمين اله واذا يريد يطلك مو فد شئ مهم هو خلي يطلك...
بلعت ريكي وتنهدت ياربي شحجي شكوول اكول اني احب جابر وهو ما معترف بيه والله حتئ استحي احجي اي كلمة ...
باس خدي ورد عليه...كافي وقار انطيني بس،شويه وقت واني اخلي يرجعلج وهو الممنون ...
ابتسمت واني امسح بدموعي..شتسوي تزوجني ؟ ههههه
ضحك كال...للاسف لو مخلي رضا علئ الاحتياط جان هسه زوجتج اله خووش شاب والنعم منه...
ضربته علئ ايده واني اضحك بمزح...اي غير كله من وراك رحت زوجته ما فكرت باختك يمكن تتطلگ
جر نفس عميق ورفع حاجب كال...فاتتني للاسف ..
بعدها ضل يحجي ويايه وينصحني ويطيب بخاطري بس اني ما كتله عن كلام داوود...
مر تقرببا تلث ساعات وما اسمع بس الصريخ من طلعت شفتها جولييت اخذناها للمستشفئ طلع عندها ولاده مبكره ...
جنه بالانتظار ومن طلعت الدكتوره كالت...الحمد الله جابت بنوته بس للاسف الام دخلت بغيبوبه ما تنعرف شكد وقتها والطفله بحالة تعبانه واخذوها للخدج...
لطمت خدي بخووف...يااا عزااا ليش دكتوره شصار وياها...
باوعت الاوراقها ورجعت باوعتلي كالت بامتعاض...ماما شوفي هي البنيه متعرضه الضربه براسها واصلا الحمل مو زيين عليها من غير هي عندها صرع وهذا كله مآثر علئ صحتها...
لذلك جانت ولادتها صعبه واحنه حاولنه وياها هوواي رغم جانت كل شويه تفقد واحنه نخاف نفقد الطفل لذلك الضربه اثرت عليها ودخلتها بغيبوبه ثانية
ارتعشت اناملي وانتفض جسمي...زيين دكتوره شلوون فدووه اخاف تموت
رجعت باوعتلي كالت...ادعولها...
طلعت بسرعه اركض لكيت جاسر واكف وصلاح اخويه وامي جايين الضاهر مخابر عليهم باوعولي بسرعه وهو جاسر اجه يركض عليه لزمني بخووف وقلق كال...هاااا بشري جابت شلونها شلوون صارت بس لا فقدت ...
ج
جاوبته بتوتر شديد واني افرك اديه...هااا لا جاسر بب بس جوولي جابت بنيه ..
صلاح ضحك وباوع الجاسر بفرحه وجاسر جانت ملامحه جامده كال...هسه عوفيني من البنيه جولييت شلونها صحتها شلونها هي كل شويه وفقدت وتعبانه احجيلي ؟
باوعت الامي بخوف وجريت نفس..اءء بس جولي فقدت ودخلت بغيبوبه ما تنعرف مدتها...
فتح عيونه مصدوم من كلامي لزم اكتافي بحددده كال بغضب...شلووون استغفر الله يااااربي شلوون تفقد يعني ما كدروا يسيطرون على حالتها...
مسح وجهه بتوتر ...روحي صيحيلي الدكتوره بسرعه خليني افهم منها شئ
صلاح كال...استغفر الله هاي البنيه ولا ارتاحت حتئ بولادتها...
امي جاوبته ..الله كريم ان شاء الله ما بيها شئ انتم ليش معضمين الامور كولوا يالله...
جاسر باوعلها باسئ...يمه منو المعظم الامور البنيه عميه ومريضه وحالتها ما مستقره يعني شلون ما نعظم الامور شلون نضل هيج نباوع عليها ...
اجت الدكتوره هو ضل يحجي وياها وهي شرحت اله حالتها وكلتله ان هي دخلت بغيبوبه ما معروفه مدتها والطفله بالخدج لان شويه تعبانه وهسه نقلوها للعناية المركزه راح تضل كم يوم بالمستشفى...
هو كال...روحوا كلكم ارجعوا واني راح اضل هنا وخلي اخابر ولد صديقي علمود شغلي،والله كريم...
اني مقبلت وضليت وياه وصلاح وامي باليل كووولش راحو او مو باليل لا بالفجر...
جنت كاعده اني وياه بالانتظار وهو كاعد وحاط راسه بين كفوفه وعلامات الضيق واضحه علئ وجهه
حطيت ايدي علئ كتفه ببتسامه هو باوعلي همست..مبرووك حبيبي ان شاء الله تتربئ بدلالك ...
باوعلي بتفاجئ ورفع حاجب بمرح كال...الله يبارك بيج والله تدرين انتي اول شخص يباركلي حتئ امي وصلاح نسوا ما باركولي بسبب غيبوبة جولي...
ضحكت...اي خطيه نسوا نروح اني وياك نشوف الطفله وهااا لازم نسميها مووو صح
ابتسم كال...اي صح مشينه خلي نشوفها تشبة امها لو تشبه صبريه لان جولييت هسه بخيالها محد يمر غير صبريه ههه
ضحكت كتله...لا اكيد تشبهك انت لان انت الوحيد الي تمر بخيالها...
هو جر نفس ومشئ كدامي وصلنه للخدج وحجينه ويه الدكتوره وهي اشرت النه عليها جانت ناااااعمه ناعمه حييل وشكلها احممر ما مبين منها شئ بس تبجي بصووت عالي ...
والدكاتره واكفيين يمها وهم يسكتون بيها ولابسه بس حفاضه الحفاضه اكبر منها هههه
جاسر حط ايده علئ الجام وابتسم النعوومتها وضعفها باوعلي بحزن وابتسامه مذبوحه علئ شفايفه كال...نااااعمه مثل امها لا تشبهني ولا تشبة صبريه
ضحكت...وهاي صار عندك بنيه يا جاسر تعوضك عن غزل
ركز بيه ثواني كال...محد يعوض عن غزل ...غزل خساره بغض النظر عن امها وعن كلشي غزل بنت رووحي غزل اني الي ربيتها اقرب اليه من روحي
هزيت راسي بنفي...شنو قصدك يا جاسر يعني ولدك مو اعزاز عندك حتئ غزل ما تتعرض
ابتسم وجاوبني بنفي قاطع...لا مو هييج كل واحد اله معزته الخاصه بس غزل يتيمتي امها انفقدت واني صرت الها الام والاب وداريتها وما قصرت وياها وضكت الم فراگها ...
محتبئ ومرتضئ وحتئ هاي الطفله صح عوضوني عنها بس ما نسونياها واله اكلج مستحيل الضنا ينسي الضنا طالع من الكلب...
استوقف كلامه بنهر...بسس جولييت اكدر اكلج سدت مكان غزل لان مثل ما غزل يتيمتي جولييت كذلك
اعترف اذيتها وتمردت عليها بس جانت دوه لجروحي ودوه قااااسي ومريضها لجولي ما ينجرع
لو ما جولييت موجوده بحياتي وغزل ميته احتمال اني اموت وراها او انقاد للجنون بس جولييت ربكت حياتي اكثر من غزل ..
من يوم هروبها لحد ما لزمتها لحد ما جابت شويه شويه اني اتعالج بيها وهي تتدمر شويه شويه لحد ما انتهت واني عشت
لزمت ايده باسف ...الله يرحم غزل ويخليلك جولييت
واردفت بتساؤل...اي صدك جاسر شام لحد الان ما تعرف انت زوجها شرعا لو عرفت...
ضحك كال.. ههههه شام مو مثل جولييت كلشي يمشي عليها راحت واستشرعت من وراي وعرفت الكلام باطل...
حطيت ايدي علئ خدي بتفاجئ...يااا عزااا وانت شكلتلها جذبت عليج لو شنو ؟
رد ببرود...عادي كلتلها ما اعرف استشرع واجيج واخذت فتره كلتلها استشرعت وكلامج صحيح انتي زوجتي شرعا...
جاوبته...اي والتالي
جر نفس...عادي ماكوو شئ
بلعت ريكي ...يعني مو لازم تعدل بينهن مدام هن ثنينهن نسوانك ؟
هز راسه بقبول...
ياربي فور دمي لا يحجي لا يكول اخذ الكلمه منه كوووه ميصير هيج الله يساعد جولي عليه لا يمطي حق ولا باطل...
واني استحي أسأله شكوله انت هم تنام وياها والله حتئ استحي منه وعيب...وهو تطلع الكلمه منه بالشافعات...
مشئ عني واني رحت اركض وراه كتله..وحتسميها غزل موو ؟
رد عليه بهدوء...تكعد امها وتناقش بموضوع اسمها...
رحنه للعنايه المشدده دخلنه علئ غرفة جولي هو عادي اول ما دخل عليها باسها بخدها وباسها برأسها
جانت نايمه ومتغطيه برجف ابييض وملبسيها ملابس مال مستشفئ وحتئ راسها كذلك جامعين شعرها بمال مستشفئ ما اعرف اسمه
بس جان شكلها محزن الئ ابعد احد هالات تحت عيونها قويه وشفايفها جاااافه حييل و وجهه شاحب مثل الموتئ ...
انقهرت عليها ضايعه بالسرير هو لزم ايدها وباوعلها بحسره تكلم وياها عبالك كاعده كلها...شلونج جولييت اكعدي مو انتي جنتي متحمسه لهل طفل من البارحه ولدتي وهو بعازتج وابد ما اجيتي شفتي انتي الحنينه اكعدي وساعدي نفسج...
جانت ملامحها الحزينه جامده وما تعبر عن شئ فعلا كلامه بقهر وهي بغيبوبه يمكن تسمعه من كلها انتي الحنينه شلون عايفه طفلج ونايمه يمكن يريد يحفز عندها حافز الانتعاش حتئ تثور عليه وتساعد نفسها وتكعد
باس ايدها بحب وتنهد ...يالله جولي اكعدي لا تعذبيني
شويه واتصل موبايله هو باوع للموبايل وقفله بسرعه بس رجع اتصل مره ومرتين عاد هو طلع برا وضل يخابر...
عرفته اتصل بشام طلعت بسرعه سمعته يكولها...اي جابت بنيه ...اوك اوك يالله مع السلامه احاجيج غير مره...
ما فهمت منه شئ. وبعدها خليت ورجعت دخلت جوه عند جولي
.........................
ريهام...
اجتنه ماما رضيه من الصبح وهي جايبه مجتبئ ومرتضئ ثنينهم لابسين تفس التراكات ومرتضئ شايل الديج والنعالات تك وتك كلمن لابس تك الثاني...
ابتسمت علئ شكلهم وجنهم هسه كاعدين من النوم كالت رضيه..يمه موتوني اجرت تكسي وخبلوا ابو التكسي انوب يا سيطره نفوت منها ولزموا الديج ...دول تلام عليتم ما دول تلام عليتم
رد مجتبئ وهو يرفع ايده...تلام عليتم عبيباتي
ضحكت اني وشهد و رحت عليه بوسته بخده وحضنته ...يعمري انت السلام عليكم والله
باوعلي وهو مبرطم...عمه ماما ماتوو ؟
جريت نفس حزين وابتسم ...يروحي ماما راحت تجيب الكم نونو حلوو. مثل فطومه بنت عمو جعفر
هز ايده بعدم قبول...هي فقومه حلدها سبيير « حلكها جبير »
صرخت شهد بصوت عالي وهي حاضنه بنتها...لااااا مشمش والله اذبحك لا دكول حلكها جبير فدوووه والله صغر صغر راح ابجي ياربي...
ما اشوف اله مرتضئ جاب مشمش براشدي وذاك صرخ بصوت عالي
ركضت عليه وشلته ...ياااا ولك ليش ضربته مو خطيه اخووك
رد عليه بغضب...ودح اقلط علئ فقومه
جاوبته رضيه بغضب..انهجم بيتك يالحنين ولك من هسه شديت حرابه ويه اخووك بعدك ما ضكت خيرها
هو باوع الرضيه بغرور وراح واخذ الديج قربه من فطومه وهو يكللها...هدا عبيبتي الج اني عبج مممش عايس ان يعبج...« هذا حبيبتي الج اني احبج هذا مشمش خايس ما يحبج »
بسته بخده واني شايله..اي مشمش نسيبي ما يحبها يحب بنتي مو هيج مشمش
رد عليه وهو يصرخ...عوووفني لا عفففج والله اليد اتتله
جاوبني بعناد...مو اعويه اني اء عبه « مو اخويه اني ما احبه »
ضل يتلوئ وبعدها ما كدرت نزلته وهو ركض وملخ مرتضئ من شعرها وشرد وذاك تخبل شلون يملخها ويصرخ يريد يكتله ومشمش خاتل وره رضيه ويضحك بخباثه ويكله...فقومه مو علوه حلدها سبييير تنها وده القااااوه هههههه...
ومرتضئ يصييح بصوت عالي...نعلللله ابوووووك
رد عليه مشمش بعناد و وعيد...نعله ابووك انته..اودف اودف والله بت ادي بابا ادله علئ انت قلط علئ ابويه « اوكف اوكف والله بس يجي بابا اكله علئ انت تغلط علئ ابويه »
جاوبه مرتضئ بعناد وعدم خوف وهو مبرطم شفايفه...نعله ابووك يالله
دخل جعفر وهو يفر بجيس الحفاظات كال...هلا بولد اخوووي اليوم مشرفينه اهلا وسهلا والله
رضيه جاوبته..بعدهم ما دخلو وتعاركوا من والله بت ام حلك مجتبئ غلط عليها ومرتضئ ما يقبل
باوع المرتضئ..عفيه بنسيبي عفيه هيج اريدك اريد امووت وعيني تغمض واني مرتاح ومسلمها الرجال وبعد عمك انطوني فلوس المهر من هسه اجيب بي حفاظات لان اركض والعشئ حفاظات مو خباز...
مرتضئ كله بترقب عبالك ديعترف علئ مجرم...عمو هدا مممش دول علئ فقومه حلدها سبيير
باوع المشمش بنص عين..يعني اخووك وراضي بيها انت تسوي طائفيه وفتنه لييش ؟ يعني تريد تنبهه علئ حلكها لو شنو
رد عليه مشمش بعناد..واي فقومه حلدها سبير
جعفر جاوبه بملل...هسه خلي نشوف اختك حلكها شلونها ولو انتم عائلة جاسر حلككم فراوله قابل مثل عائلتي وحدتهن حلكها طلاقتين مثل بوفية رضيه...
باوع الشهد بتبرير...شوشو لا تاخذين علئ نفسج حبي اقصد علئ فقومه و وجهه الطاوه انتي حلكج فستق مال بوس
ضربته رضيه علئ كتفه...ولك عاد استحي كوول هل مره واكفه كوول مرة اخووي واكفه
ضحك ...اعذريني رضرض نسيت عندج جفاف من مات ابوي لحد الان
بس مرة اخوي لا تخافين عليها هسه يجي رجلها ويروي الجفاف العاطفي لعندها انت فكري بس بنفسج وعوفي عباد الله...
اني خليت ورحت جعفر ما عنده لحية مسرحه يحجي طك بطك واني استحي من كلامه ...
اخذت الاطفال دخلتهم بغرفتي وهم يسولفون علئ امهم وخطيه مجتبئ يكول ...عمه عمه ماتو ماما ما اعرف امسي الزم الحايق وامسي ما تسوف « عمه عمه ماكو ماما ما تعرف تمشي تلزم الحايط وتمشي ما تشوف »
تنهدت يارب ترجع تشوف طبعا اني وياها حبلنه سوه بس اني قبلها بشهر بس هسه هي جابت قبلي،لان خطيه صارت عندها ولاده مبكره.
همزين سجئ،مو هنا جان كالت كلجن جبتن بنات ههههه والله شبيها البنيه رحمه من الله بس هي،تفكيرها تفكير ابو جهل...
انوب اتصلت بيه لعبت لعب دكولي شنو عمو يحجي عليه ويتوعد بيه شنو خايفه مثلا هو مو مرته انهزمت من قبل شو ما صار رجال عليها صار بس عليه
ما عرفت شنو ارد عليها بس كلتلها...عيل هل كلام انتي مو صغيره ومو حلو تعيدين نفس الغلط وهل كلام لا تعيدي بس يسمعج عمج تحجين علئ مرته يطيح حضج
ردت بوقاحه..عشتوو علئ شنو يطيح حضي خلي يلزم مرته بالاول يالله يتمرجل براسي واني ترئ ما خايفه وياريت توصلين هل كلام اله
عاد اني قفلت الخط بوجهها ادري بيها ملقنه هل كلام من طلعت امها من السجن وهنه كل شويه واتصلن عليه وضلن يغلطن عاد اني حضرتها ما عايزه مشاكل ولا احب الفتنه والقال والقيل...
اني جنت قبل شويه متونسه علئ جولي صح هي مخلصتها بجي بس تضحكني واندمج وياها هووايه واحسها نفهكني مثل ما اني افهمها...
اتذكر قبل لا يشيلون وقبل لا تضربها نوال شويه جانت علاقتها بجاسر هسه صايره زينه ...
هو اجه من شغله وهي شافته وختلت وره البرده الي بالمطبخ كالت...ريهام من يسالج كليله راحت الاهلها بعد متريدك ههههه
عاد اني لطمت صدري...يا عزا العزاني تردين اجذب لا لا استغفر الله ربي مالي شغل
كالت بتوسل..فدوه فدوه رهومه كليله ما ادري بيها كذبه بيضه اريد اكمزه اكطع خلفته اخلي بعد ميخلف...
كلتلها باستهزاء..اي هاج كوولش كمز وخاف
باوعتلي بنظرات بريئة وتوسل...شبييج فدوه ؟
حطيت ايد علئ ايد وتنهدت...يالله امري لربي
هي ختلت وره البرده والبرده جانت كصيره شويه ورجليه طالعه من جوه انوب طالعات بييض ومدبدبات جنها رجلين رضاوي
ضحكت عليه هو دخل للمطبخ كال باستغراب...ويين جولييت
بلعت ريكي وباوعتله باحراج هو باوع بارجاء المطبخ واستقرت انضاره علئ رجليها ابتسم وعض شفته بكتمان غمزلي امشي بخطتها
كال بصوت حاد...ويين جولييت فريت عليها البيت كله وهي ماكووو...
جاوبته بترقب وفشله..وهاااا مدري وين راحت يمكن لأهلها...
رفع حاجب وهو وهو متصنع الغضب...لااااا وين راحت هاي اليوم لا ما ذبحتها ما اطلع جاسر
هي طلعت من وراه وتمشي بترقب وتباوعلي وتضحك بسكوت وصاحب بصوت عالي...بوووووه
هو سايرها وباوعلي بخووف وقلق حط ايده علئ صدره ويتنفس بقلق ورهبه مصطنعه...صدك تحجين طيحتي كلبي ببطني
وهي تضحك من كل عقلها....هههههههه كمزتك ؟
رد عليها بقهر...اي كمزتيني حتئ خلفه بعد ما اخلف
طكتها بضحكه قويه....ههههههههه العباس عليك كمزت الحمد لله الحمد لله طلعت قوويه
رد عليها ببراءة...بعد لا تعيدها لا انجلط وترحين تبتلين بيه
كملت ضحكها الهستري ....لا تخاف اشمرك بدار العجزه انت بس توكل وانجلط هههههه
قلص عيونه بوعيد ...لو ما ريهام واكفه جان فشرت علئ كولتج
اني استحيت وبلعت العافيه من كلامه ردت انسحب انسحاب تكتيكي بس هي مخلصتها بس تضحك حيرتني...
رجعت لزمته بشك...اكلك انت صدك كمزت لو تضحك عليه
تجاهلها وهو يمشي...اي وداعتج كمزت كمزه اله شويه جان انجلطت تعالي شوفي اديه شلون ترجف...
سرعت بخطواتها ولزمت اديه...ويين شوو ما ترجف الله عليك بس كول صدك كمزت لو لا ؟
تركها بدون ما يجاوبها وهي تريد تتاكد شويه واجت وهي تتذمر وتمسح بخدها اني عبالي ضربها...
لزمتها كلتلها شبييج كالت...عضاني بخدي حييل انوب يكلي بعد ما اخلف لان كمزتيني واني ممصدكه بي يكولي اذا حبلتي تاكدي انتي ما كمزتيني
واذا ما حبلتي فانتي كمزتيني تعاي اليوم وخلي نجرب ونشوف انوب عضني حييل
دخلت شهد شافت خدها احمر كالت بخبال...يااا شبي خدج هذا يا سلوگي عضج
اني سديت حلكها واني اضحك...عزا بعينج ان شاء الله ولج جاسر عضها هههه
حطت ايدها علئ خدها بخوف..العزا العزاني همزين ما سمعني والله عيب ...
بعد من مرة هاي الايام كلها وجولي طلعت حامل انوب بتوم بس .واحد مات ذكرتها بهذا الموقف وكلتلها شاف رجليج بس انتي ما انتبهتي
هي ضحكت كالت...اي هو جذاب ادري بي مسوي روحه خايف ويرجف
ياربي يكون بعونها ويفرحها بطفلها ويرجعها الهم سالمه غانمه....
صدك من شالت البيت فرغ عليه وصار وحشه بس خطيه هي لازم تستقر ببيتها بعيد عن المشاكل وعن بيت عمي مهيوب...
............................
وقار...
صار تقريبا صار اسبوع واحنه بالمستشفئ اني اروح واجي وكل شويه وحده تجي منا وحتئ اشواق اجتي
وطبعا اشواق راجعت هوايه بس مصار عندها طفل هو السبب من زوجها مو منها بس هي تحبه وما تنطي بي
وهسه قررت بعد تعب من السنين ان تسوي طفل انابيب وضلت تراجع يارب يرزقها يارب...
شويه واجت صبريه دخلت للمستشفئ اني من بعيد عرفتها لابسه نعالها ابو الصبغ والعبايه مفتوحه من الجهتين وتمشي هي واختها ام جابر
من شفت ام جابر دك گلبي سريع ياربي شسوي والله احبه جابر وهو ما يستاهل حبي...
اجت سلمن علينه اني وماما رضيه واشواق كالت صبريه بتهجم...اكلكم عود جكليته من يصير بيها شئ ليش ما دكلولي شني منتظريها تموت يالله لو شني ؟
جاوبتها بعد ما بلعت ريكي...والله خاله نسيت عاد هي سدت اديها وفتحتهن بوجهي كالت...اهمداج كوون
فشلت منها ومن تصرفها بس عادي احنه متعودين عليها وعلئ اخبالها وخاصة من ناحية جولي هي تتخبل تعتبرها مثل بنتها وتعزها كووولش معزة قوويه...
اردفت بغضب...وعلي وروح امي هاي اخر مره جويسر يحبل جوييليته شني معمل مال تفريخ ضاله تخلف وتشمر عليه خلي يخلف من شويمه
انه جويليته رقيقه ما تحمل فروخه لجويسر هل تخربطت وفقدت انه لو جكليته تموت ربحي بيمن بجويسر وفروخه.؟
جاوبتها رضيه بفشله...ولج خيه اسكتي عيب منا الدكاتره والعالم
صاحت بصوت عالي وغاضب...جااا وشني انه خايفه من الدكاترة يوو مستحيه من الوادم ...وروح امي هسه اصيح بصوت عالي جووويسر موت جكليته هو وفروخه ...
وبعدها اردفت بحب وحنان...صدك جويليته جابت بت وهااا بتها حليوه ياااا لااااا
وجاوبت نفسها بنهر...خاب يمن كوون امداني انه شني واشك بانتاج جكليته هو الجكليت شيخلف غير الجكليت اكيد احله من امها...
اني ضحكت.. اي خاله فدووه تجنن بس بعدها ناعمه ولحد الان بالخدج لان صحتها مو تمام وبعدها ما كامله احتمال تضل كم شهر منا لمن يخلي نومها...
جرت نفس حزين...يمه سوده بوجهي كوون بحسنه ولا ببت جكليته انا هذا هو قررت بعد ما دابت جكليتي اخذها هي وفروخها وتعيش عندي واريدن واحد يمر بخطيتها...
شويه واجه جاسر وصبريه مطنكره عليه ما اعرف شبيها وتباوعله من وره خشمها وتخوزر بي وهو ما منطيها اي اهتمام بس سلم عليها...
يعرفها تكرهه وتريد تاخذ جكليته منه...
شويه وتجت الممرضه تركض وكالت...المريضه جولييت كعدت وتريدكم...
عاد احنه ما صدكنه خالتي صبريه وجهها خير علينه الحمد لله
...........................
جولييت...
اريد شويه من حضنج يمه فاض بيه الحنين واني اريد اسمع صوتج العذب
اني يا يمه اتنفس من دوونج صرت ام للمره الثالثه وانتي مو يمي ولا حضرتي ولادتي
ما ادري اني وين جنت ولا اشووف شئ بس حسيت بنغزة ابره بيدي صرخت علئ أثرها وفتحت عيوني نفس الظلام محاوطني من زمااان ...
حسيت بايد ناعمه لزمت خدي وهي تحجي ويايه بصوت هامس...هاا حبيبي الحمد لله على سلامتج همزين كعدتي لان طفلتج بحاجتج...
بلعت ريكي بغصه ورديت عليها بهمس...اءء اني ويين ؟
جاوبتني بسرعه وهي تفرك بيدي..حبيبتي انتي بالمستشفئ جبتي بنوته حلوه مثلج بس محتاجينج ترضعيها رضاعه طبيعيه وانتي دخلتي بغيبوبه بسبب الضربه الي براسج
كعدت ملهووفه واني ابجي واتنفس بضيق...ايي ايي اني جنت حااامل يعني اني جبت عفيه اريد طفلي اني جبت بنيه مو صح
لزمتني وهي تهدي من روعي...حبيبتي اهدي لا تخافين اي جبتي بنيه بس هي بالخدج لان انتي جبتيها بالسابع وشويه حالتها ممستقره لا تخافين بس ان شاء الله ما بيها شئ...
رجعت نمت واني ابجي همست...ويينهم ؟
ردت عليه بلهفه..زوجج وكل عيالج واكفين بره ان شاء الله هسه اصيحهم الج..
هي خلت وطلعت واني ضليت اتنفس بضيق وخوف واني احن الشوفت بنتي
اتذكرت كلامه يمكن يكون عادي بس اثر بيه حسيته نكرني واستغل شئ مني ...حسيت اني لا شئ عنده
دقايق وحسيت بوجودهم كلهم هو اول الحاضرين قبلاته اخترقت وجهي وراسي وهو يتحمد الي بالسلامه ويباركلي بمولودتي الجديده...
وبعدها خالتي صبريه و وقار وماما رضيه وام جابر ضلوا يحجون ويايه ويباركولي واني ابتسم بحزن سالتهم عن مرتضئ،ومجتبئ كالو بخير الحمد لله حمدت ربي وشكرته....
ضليت بالمستشفئ وبس هو عندي يروح ويرجع اليه لان ما يقبلون يضل وقت اكثر بالمستشفئ
بعدها اجت الدكتوره كالت...ماما انتي لازم تجين ويانه حتئ ترضعين الطفله بالخدج او نجيبها الج هنا...بس تجين انتي افضل بقسم الاطفال لان نخاف عليها...
جاوبتها بخوف شديد وبسرعه...لا لا اني ارووح الها اني اروح اشوفها واني ارضعها حبيبي ما اريد اتعبها ...
جاسر رد عليها للمرضه كلها...روحي اني هسه اجيبها بس ارتب امورها شويه...
صدك هي خلت وراحت وهو لبسني الصايه ولبسني الحجاب جنت حييل مشمئزه من قربه مني وخايفه بنفس الوقت خايفه يستغل ضعفي ومرضي ويضلمني...
اخذني للخدج وكعدني بغرفة الانتظار حسيت بي دخل مره ثانيه وهو شايل الطفله ويحجي وياها يكولها...حبيبي باباتي تعالي خلينه نشوف ماما اجت عليج وهي تعبانه شفتي شلوون تحبج
وكفت ملهووفه والدمووع سبقتني واني أستقبل بنتي رغم من الغيبوبه تعبت جسمي وحتئ احس لساني ثكيل والنطق عندي صعب بس تحملت الخاطر بنتي
هو رجع كعدني وحط البنوته بيدي واني ما اعرف وين ابوسها محتاره وما اشوف ضليت ابوس بيها بعشوائيه وابجي
همست بعذاب...ياروحي يا يمه انتظرتج هوواي تكونين حبيبه الي اشكيلج من ظلم ابووج ومن ظلم اهلي ومن ظلم القدر اليه
يعز عليه والله يايمه اشكي للناس والشكوئ لغير الله مذله سمعيني يا يمه ولا تكرهيني...
ضليت ثواني دافنه وجهي بصدرها وابجي وهو ما قبل بهل شئ كال...كافي جولي لا تقهرين نفسج حتئ الطفله من ترضع وتكونين مقهوره تتاذه
سكتت الخاطرها واني لسه ابوس،بيها كال.. يالله كافي بوس رضعيها
غطيت نفسي بشالي وطلعت صدري دا ارضعها بس ما اندليت ملامحها ضليته محتاره واني اتلمس بيها واتمنئ اشوفها
هو تقرب مني وراد يلمسني لميت نفسي بغضب ونزلت الشال اكثر علئ صدري همست...جاسر عووفني
كال بستهزاء...شنو مستحيه هاي اول مره اشوف مره تستحي من زوجها واني كل يوم مذكرج التوم مني وهل طفله هم مني واني شايف ومتعمق
بلعت ريكي من كلامه...مو قصة استحي منك بس اكو اشياء بداخلي ترفض هل شئ انت انت
كطعت كلامي وما كملته علئ شنو اكمله اجرحه والجرح جرحني اكثر...
تقرب مني اكثر وهو يرد بخبث...دخليني اساعدج ماكو مره تخجل من زوجها ولا تستنكف منه
حطيت اديه علئ صدري والايد الثانيه لازمه بيها بنتي...ماااا ماااا صيح الدكتوره
ضل معاند واني الملم بنفسي منه وكل شويه وكتله...اهووو دووخر هي شنوو استغفر الله ياربي خوو انتم ولد مهيوب العناد يمشي بدمكم
رد عليه ببرود...شفتي شلوون
كعد بصفي وجبرني وساعدني بس اني جنت زعلانه ودايره وجهي منه كال...ادري شكو دايره وجهج للجهه الثانية...
جاوبته بعناد...احسن
ضحك...اي شكو شصاير؟ وترئ انتي ما تدرين بروحج دايره وجهج عليه يعني لا بيج ولا بزعلج
درت وجهي للجهه الثانيه هو مجان كاعد بصفي وصوته يكولي هو قريب مني ما اعرف ياربي دخت
ما احس اله باسني بخدي انصدمت ...يااا عزا شلون جذاب يكول دايره وجهج عليه واني اصلا مو عليه قشمرني وخلاني درت وجهي عليه.
مسحت بوسته وهو لحد الان ما يعرف ليش اني ضايجه منه ياريت والله لو يطلگني صح راح اتعذب لان محد الي وصعب اني ضريره وبرگبتي تلث اطفال بس ما اكدر اتحمل هل نفاق والله...
خلصت رضاعتها واني اتمنئ اشوفها وكل شويه واتلمس ملامحها
همست بتنهيده...عيونها يا لووون ؟
رد عليه بمرح...نفس عيونج وحلوه حييل مثلج
بستها بنعومه...يعمري يحبيبتي سميتها لو لحد الان ممسميها
جاوبني بتنهيده...انتظرتج نتناقش باسمها
اني جنت ناويه اسمها غزل بس بعد الي سمعته قررت ما اسميها غزل وغزل وحده ما تتكرر الله يرحمها ويسكنها الجنه ...
تحب ابوها حييل ودائما اتحلم بيها ادافع لابوها دفاع مستميت حتئ وان كان علئ خطا
لمستها بحنان وجاوبتها...اريد اسمها هدار
جاوبني باستغراب...اسم حلو بس غريب
ضحكت ...مثل امها اسمها غريب وعاشت غريبه بس بنتي مو مثلي لان اني اكل اوادم عليها وراح تشووف مستحييل استغنئ عنها ولا اضحي بيها مثل امي
تقرب مني ومسح علئ راسي بحنان كال...اكييد واني ابوها ما اخليها بحاحة اي شخص واذا صار بيها مثل ما صار بيج اطلعها من حلك السبع انقذها...
بعدها اردف بحزن...اسم الله عليها ان شاء الله ما تشوف اله كل خيير...وان شاء الله هل بنيه وجهها خير علينا ونسعدها ونفتخر بيها
ابتسمت بهدوء ورجعت بستها وهي تنوص خطيه حتئ ما بيها حيل تبجي...
وبعدها اخذوها للخدج واني رجعت للغرفتي لان لحد الان حالتي تعبانه شويه...
.........................
شهد...
جنت كاعده اغسل بفطوومه وعمتي ام فلاح تلعب بولد جاسر صايره تحبهم وهم هماتين يحبوها
رغم شويه يتعيقلوت عليها وكل شويه وكلولها امشي اشتري النه وهي مكيفه عليهم
وحسيتها شويه من اجو جهال ارتاحت ونست بنات فلاح او تناستهن وانشغلت عنهن
هي رحت تشتري الهم وشويه واجت واني بدلت الفطومه وانطيتها الها...
وما اشوف اله جعفر دخل وهو يصييح...ولكم الحكوو الحكوو ولج شهد تعاي ولج يمممع
طبعا جعفر ابد ما يشرب بعد ويصلي باوعتله شفته مو سكران بس حالته مو طبيعيه
كتله بخووف ورهبه...خير جعفر شكوو؟
رد عليه بانيهار...ولج ماتت ماتت
نهاية البارت...يتبع
كونوا انتم كونوا بخير...احبكم 💔
نور سمو العراق 😘
موش تنسن التصويت خوووش بصوت علي اخو دينا 😬
وبنات اني مقدره وضعكم البارت ينشر متاخر بس شسوي مدا الحك ان شاء الله احاول اضبط وقتي ادلوو...
لطلحه اكييد 😍😍😍 Talha-25-3