_وشاء الحب_
( بقلم بسمة البياتي)
_البارت الثالث _
عنج مشوا يا دار وبهل مسيه
خل نكعد أنه اوياج نبجي سويه
ابتسام... يولي اصيل لاتخوفينا عليج احجي كلمة
البينة مكفينا مو ناقصين خوف
... انصدمت صدمة عمري يعني شنو معد (بعد) اشوف لمياء معد اسمع ضحكتها وسوالفها الترد الروح راحت وعافتني معد اشوفها للخلى ( للهناية)
سديت اذني ما اريد اسمع صريخهم والبجي لمياء عايشة وهساع تجي وتشيل بنتها بيدها مثل ما جانت تتمنى
احلام... حجت لو بعدها
ابتسام. على حطت ايدج ساكتة وسادة اذنها
جابوها لو بعد
.. بلي وخواتها ملتمات عليها
كضبت اصيل من ايدها وجريتها
.... وين ما اخذتها يولي لاتروح تتخبل بالزايد
خلي تشوفها بلجي تنطق و تطلع البگلبها
امشي اصيل ماتريدين تشوفيها وتودعيها
اصيل... سحلتني دخلتني للغرفة متروسة نسوان صوت بجيهن والصراخ طرش اذني
فوتتني النص الغرفة النسوان ملمومات على شنو ما ادري من تقربت. وركزت شهكت بصوت هاي لمياء احلام سوتلي مجال تقربت منها
لهين معد اكدر اظل ساكتة هساع تأكدت لمياء ماتت
حضنتها وصرخت بعلو صوتي
لزمت وجها بيدي حبيتها ( بستها) من كل مكان اهز بيها
يولي كومي البارحة مابيج شي جنا سهرنات سوه نغني نضحك
كووووومي بنتج من البارحة محد بحالها تبجي تريد ترضع مو جنتي تعدين الأيام حتى تجيبين وتشيلين جاهلج بيدج شو رحتى حتى قبل لاتشيلها وتشميها
خواتي جرني من فوكاها الدموع تجري بحرگة وغزارة
اخذني للغرفة الثانية حيل مابية روحي اهجس تريد تطلع من القهر
گعدت وخليت راسي بين رجلي وابجي
سمعت صوت بجي ناصي دحجت بنتها تبجي جيت يمها شلتها دموعي توكع فوكاها
هاي شلون راح تعيش بعد أمها محد يريدها خالة من سمعت بخبر موت لمياء من حرگة گلبها رادت تخنك الطفلة اتكول جيتي انتي واخذتي بنتي وخواتها يگولن هاي فگر كرطت راس امها
الطفلة جوعانة من البارحة عايشة على الماي والشكر
ابتسام... ليش ماتروحين للبيت وتأخذين الجاهلة وياج خالتي والبنوات مو بوعيهن خايفة يسولها شي اذا سمعو حسها
... حضنتها وحجيت بخوف عليش يأذوها هاي امانة بنتهم حرام عليهم
.. يولي گلوبهم محترگة مگاعد يفكرون بعقل
هساع اشوف واحد من الولد يأخذج للبيت
وره شوية جت كالت شاهر ينتظركم برا
طلعنا اني واقبال رجعنا للبيت
شاهر. عليش جبتي الزغيرة يمكن مايقبلون اطلعيها
... محد بحالها خالة والبنوات يگولن عليها فگر، أكلت رأس امها
... أستغفر الله وهي شنو ذنبها
لمياء هذا يومها تعددت الأسباب والموت واحد
... طبينا للبيت الطفلة تبجي تريد ترضع من اخلي اصبعي يم حلكها تفتحو عبالها صدر امها عمت عيني عليج
شاهر... الطفلة جوعانة رايح اجيبلها حليب
... اني واقبال مجابلين ( مكابلين) الزغيرة
دموعنا تجري هم عليها وهم على اختي وصديقتي وتوأم روحي
رجع شاهر جايب حليب وممه
مانعرف شلون نسوي هم زين جت ابتسام علمتنا
الزغيرة ماتعرف ترضع بالگوة گدرت تأخذ الممه شربتها ونامت
شاهر...راجع البيت خالتي محتاجين شي قبل لا روح
اقبال... خايفة
شاهر.. ول يابة عليش خايفة
... من اجيب اموت مثل لمياء
اصيل... اني.وشاهر صفنا عليها
راح شاهر كعد بسدها واخذها الحضنو
شاهر... استغفري ربج محد يموت گبل يومو
لو كل النسوان تموت بالولادة ماجان ظلت بشرية
أصيل... راح شاهر
بقينا اني واقبال انداري الزغيرة وجودها هون علينا حجم المصيبة صح دموعنا مانشفت بس الحمد لله على كل حال
للمغرب جت امنة من الرمادي حضنتها وطكيت بجي
ما رحت للفاتحة ظليت ادري الزغيرة
شاهر ويانة يحير شيجيبلها
خلصت الفاتحة ولهساع محد سآل عليها لا خالتي ولا ابوها كلمن ملتهي بهمو
نعيمة... حسنة اتكول انطو الزغيرة النافع ولاتجيبوها عليه للبيت ما اريد اشوفها
شاهر.. الله اكبر الطفلة شنو ذنبها تيتمت وهي بهذا عمرها وفوكاها محد يريدها
عوفوها هين اني اربيها
نعيمة.. عليش انت تربيها عدها أب ياخذها خما يعوف بنتو
... اذا يريدها عجل وينو من صارت والهساع ماشايفها ومايدري عنها شي حتى اسم مامسمينها
... نافع حالتو تبجي الكافر مجابل گبر حرمتو ويبجي من يهدي يجي يشوفها
اصيل... أسمها فيروز
الكل دحجو عليه
امنة... حلو الأسم منو سمها
... اخر ذكرى الي ويا امها هي فيروز
نعيمة... نجعمي اهلها هما يسموها لاتدخلين
شاهر...عجبني الاسم ولايك الملامحها هذا هو اسمها فيروز اني احجي ويا. نافع واخلي يسجلها بهالاسم
... فيروز عندي وعند شاهر صارت بغلات الروح
ابوها جة شافها وعافها كال اذا تقبلون خلوها جم يوم يمكم بين ما ارتب وضعي
راد ينطي مصروفها شاهر ماقبل كال فيروز دام هي هين من مسؤوليتي
راح نافع صار عمر فيروز شهر بينت ملامحها تشبه امها وبعد احلى
شاهر ماخلة شي ما نگلو ( جابو) الها ملابس كاروك العاب احسو هو ابوها مو نافع
طلع اربعين لمياء واني لهسه ما اريد اصدك هي ماتت
بيومها جة كال هيرو فيروز تا اخذها
كعدت احضر بملابسها وابجي وشاهر حاطها بحضنو ومبين الضوجة عليه ظل يحاجيها
... هاا يبعد ابوج راح تروحين. وتركيني يولي شلون راح اتحمل فراگج يومية اريد الشغل يخلص تا اجي اشيلج
... شاهر الله عليك گلو يعوفها شلون راح اتحمل ما اشوفها
... شبيدي خيتي الله يشهد مثلج ضايج واكثر بس هذا ابوها خما اكلو لاتأخذها
راح اطلب منو يجيبها نشوفها وگت فراغو
.... راحت فيروز فرغ اللبيت علينا
حتى اقبال ضاجت وجود الطفل بالبيت نعمة وونس
مر اربع تيام واني وشاهر نلوب عليها
اليوم الظهر اجة نافع جايبها
اخذها شاهر من ايدو يحب بيها
نافع... خجلان منكم حاولت اعودها علينا ماكدرت ليل ونهار تبجي مستغربة وزوجة اخوي عدها اطفال أصغار ما تكدر اطول خلگ وياها
شاهر... ازعل منك اذا عدت هالكلام هذا بيت اخوك
فيروز بحسبة بنتي يشهد الله البيت خالي بلاياها كلساع اريد اجي اشوفها واخجل منك
... رحمه الله والديك وكفتكم وياها ما انساها ابد انتوا احن من اخواني عليها
...اتركها هين واي وگت تشتاگلها تعال شوفها البيت بيت اخوك لاتخجل
... ونعم منك يجعل بيتك عامر خوية
اصيل... رجعتلنا فيروز وانترس البيت بحسها
كلما تكبر نتعلق بيها اكثر
خالتي اوف يا خالتي غادية تراب من القهر على لمياء
من تجينا اهجس گلبها يرفرف على الصغيرة وبدت تحن عليها
خليتها بحضنها شالتها تشمشم بيها وتبجي
ومن يومها تعلقت بيها ما كدرت تاخذها يمها
محد يداريها بنواتها كلهن مجوزات ( مزوجات) وجانينها لاهيات بروحهن
وخالتي ورجلها كبار بالعمر ما يگدرون عليها
فاتت اقبال الشهرها الخوف لازمها ومن كثر الوهواس العدها خوفتنا وياها
اقبال... اذا متت اخوج لشكد ويجوز بعدني
... فان حظج شوكت اتبطلين هالخرابيط
..ادري باخوج قبل لاتطلع السنة مالتي يلگي حرمة ثانية النسوان هالايام صايرات مثل الذيان عليه
... وال يرحم اهلج سدي هالسيرة راح تهججينو من سوالفج
... الحمل مخرب جسمي خايفة يشوف وحدة احلى مني وتعجبو
....الحجي وياح ما منو فايدة
يولي شعجب ماتضوجين من فيروز لان متعلق بيها وهالكثر يحبها
... لا عاد مو الهدرجة يولي مكيفة بيها اريدو دوم يظل بالبيت يلعب وياها ومايطلع ويا ربعو
... هههه هين الحجي طلعتي مستفادة من منها
عقلج وعقل الجاهل واحد
... ههههه والله جثير احب فيروز مو علمود شي
نعيمة.... اقبال تجين وياي البيت ام حسين نشرب جاي العصرية عدهم
... لا شيوديني هو اني بالكوة اكوم واكعد
.... يولي تلحلحي المشي يفيدج لاتظلين بس جاعدة
اصيل وين الثوب الجابتو الج امنة انطي الاقبال تلبسوا شسوين بي كومة عندج
اقبال.. شسوي بي عندي مثلو امنة جابتليا
... الرجال يريد اهتمام ولبس حلو هي شسوي بالكشخة
اصيل...كلمة ما حجيت جبت الثوب وانطيتو الاقبال
صح انقهرت بس كتمت بگلبي
شلت فيروز ودخلت للغرفة
راحن امي واقبال من رجعن جت اقبال بيدها الثوب
ها شنو عليش مالبستي
.... يولي شسوي بي اخذتو حتى خالة لاتحجي وهساع كوتلها مصار على قياسي
تلبسينو بالعافية بعد عمري الثوب مفصل عليج ومايلوگ الغيرج
... عجل امي ليش ماتصير حنينة عليه مثلكم
... ولج والله تحبج بس هي هذا طبعها ماتبين حبها غير الشاهر
.. وره اسبوع جابت اقبال وصار عدنا بنوات اثنين بالبيت فيروز ونجوى
فرق العمر بينهن سبع اشهر
امي ضاجت وگلبت الوجه ماتريدها بنية
شاهر.. هو وين اكو احلى من خلفة البنات من شفت فيروز تمنيت تصيرلي بنية مثلها والله استجابلي ولو فيروز بحسبة بنتي وبعد اغلى
نعيمة...اريدلك وليد يشيل اسمك واسم ابوك اقبال البطن الثانية اذا جابت بنية ثاني يوم الگيلك حرمة واجوزك
اقبال.... ليش خالة تريدنو يجوز عليه قابل بيدي وماجبتلو الولد
شاهر... يمه اني شاكيلج كايلج رايد وليد وال يرحم اهلج سدي السيرة
وانتي عليش تبجين من تشوفيني تجوزت هذاك الوكت كعدي نوحي
... شاهر مل من المشاكل امي بطرف واقبال بطرف
شال فيروز وطلع
جيت يم اقبال يولي نفسة موزين البجي عليج لوما تعرفين امي وسوالفها
مو دوم اتكوليلي خالة بس لسان ماكو فعل
... بس لسان وياج لان انتي بتها خما تضرج منج
ادري بيها تجوز شاهر اذا ماصارلو وليد
... كولي يا الله بعدكم زغار والعمر جدامكم شو من اول بطن يأستي
.... والله اموووت اذا اخذ حرمة عليه
... مياخذ شاهر يحبج مايبدلج بغير حرمة
امسحي دموعج وهاج رضعي بنيتج دشوفيها شكثر حلوة تسوة الف وليد
امي جثير تضغط على. اقبال ماتراعي هي نفسه وترضع موزين عليها الزعل
گلت الاقبال ابقي يم اهلج بين مايطلع الاربعين ترتاحين اهناك
من غيرتها اووسواسها ماقبلت تخاف اذا راحت امي تلكي حرمة الشاهر وتجوزوا
فيروز كامت تغار، من نجوى تتخبل اذا اني لو شاهر نشيلها
وكحة وسوالفها تخش الگلب مالية علينا البيت بلعبها وصوتها شايلة نفس، روح امها الله يرحمها
شاهر يموت عليها ويفضلها حتى على بنتو
ابوها بين فترة وفترة يجي يشوفها ياخذها الحضنو ويظل يبجي يگول انحرمت منها ومن امها
اذا اخذها يمي محد يداريها ومستحي منكم لان ثگلت عليكم
شاهر... بشنو مثگل علينا فيروز تارسة البيت ومونستنا
احنا الشايلين هم نخاف تاخذها ومعد انشوفها
... جمايلكم كثرت ووكفتم وياي وويا بنتي دين برگبتي واتمنى اردها الكم بالأفراح
... مابين الأهل والاخوة جمايل وديون جم مرة گوتلك لاتحجي هجذان ازعل منك
...من راح نافع
امي كالت الشاهر نافع شوكت يأخذ بنتو خما تظل طول العمر هين
... خير الظاهر صارت عندج سالفة جديدة
... صاير ماتستحي كلمة والثانية تسكتني
البنت وكحة وكلما تكبر تزيد بالوكاحة شوف حالك تارك بنتك وداير وراها
...واغلى من روحي بعد
يمه هاي يتيمة اليمسد على راسها الو حسنة مو عاد اليتكفل بيها ويداريها اذا تريدين الجنة وصحبة النبي داريها واخذيها الحضنج الاجر كلو بيها
... امي سكتت كلام شاهر فشلها وخلاها ماتكدر تنطق كلمة
اليوم العصر جت خالة حسنة تخوط برجلها بالكوة تمشي التعب وكسرة الظهر مبينة بيها
حسنة... اني وابو معن قررنا نرد للرمادي
نعيمة.. منين طلعتي بهالسالفة شعدكم راجعين
.... عيني ماتجابس ابقى هين كل مكان يذكرني بعزيزة گلبي
اصيل.... بخوف وفيروز تأخذوها وياكم
... لا ما اكدر عدها اب مو من حقي اخذها
اريد اعيش الباقي من عمري قريب من بنواتي وولدي
نعيمة. معن يبقى هين لو يرد وياكم
... لا الولد ويانة مايبقون هين
عندي سالفة وياكم اريد احجيها
نعيمة... ياسالفة
.... أريد اطمئن على فيروزة گبل لا اسافر
اصيل... فيروز ابطن عينا لاتخافين عليها خالة هاي بنت الغالية الله يرحمها
بجت خالتي كالت الهساع ما أكدر أكول الله يرحمها يولو بعدها زغيرة على هالكلمة
نعيمة.. كولي يا الله خيتي حتى احنا العايشين نحتاج اليترحم علينا لمياء الها الجنة ان شاء الله
... اصيل اريدج تاخذين نافع وانتي تربين بنتو
... من الصدمة فتحت عيني وحلكي خالتي شگاعد تحجي شنو اخذ نافع
... لاتستغربين نافع خوش زلمة لومو زين ماجنا جوزنا لمياء
اصيل نافع بعدو شاب ومصيروا يتجوز اذا مو هساع بعدين وأكيد من تصير عندو حرمة ياخذ فيروز والله اليعلم شتطلع حرمتوا وشتسوي بيها
الخاطري فكري بالموضوع
... لا ابد شگاعد تحجين خالة شششلون اتجوز رجل لمياء اختي وصديقتي واني ادري بيها شكثر جانت تحبوا شلون تريدين اخذ مكانها
... سؤال وجاوبيني اذا اخذ فيروز تتحملين فراگها
... جرن دموعي وهزيت راسي بمعنى لا
... عجل فكري الخاطر هالزغيرة ادري الموضوع صعب بس شسوي ماعندي غير حل
...غصيت بالبجي شلون انتي بنفسج كاعد تخطبيني الو
... لان انتي بغلات الراحت گبل لا اشبع منها وادري بنيتها يمج راح تعيش مدلله نعيمة شو ساكتة
... نافع خوش زلمة مايتعيب
... هااا بنيتي شنو رايج
... ساكتة ودموعي تجري ما اعرف شجاوب الموضوع صعب واذا اخذ مني فيروز بعد اصعب
نعيمة... دام سكتت أكيد موافقة من يجي شاهر اقتح الموضوع ويا وأشوف شنو رأيو
.... جت خالة حبتني من راسي وراحت شبعت بجي
اقبال. اذا ماتريدينو عليش سكتي وما حجيتي
... ما اكدر ارفض اخاف ياخذ فيروز ومعد أشوفها
... البي خير الله يقدموا الج انتي طيبة وتستاهلين زلمة طيب مثلج
باليل صاحني شاهر جيت كعد بمسافة عنو
.... تگلطي ( تقربي) اريد احاجيج
جيت بسدو
.... صح الكلام السمعتوا من امي خالتي طلبتج النافع وانتي وافقتي
... خجلت الدم فار بوجهي ظليت افرك ايد بأيد
... ول يابة مو وگت مستحى جاوبيني
انتي وافقتي لو امي وخالة حسنة ضغطوا عليج
نعيمة... انت شيصير زتو ( شمره) برأس امك اني شعليه هي الوافقت
اصيل.. لا خوية اني الوافقت الخاطر فيروز
... هذا زواج ماينفع بي الخواطر اذا على فيروز يمنا ونشلها بعيونة المهم انتي ترتاحين وتاخذين الشخص اليناسبج
... اذا نافع تجوز اكيد ياخذ فيروز بحزتها اموت والله
خوية بعد موافقتك اني موافقة
... الله يسعدج نافع خوش نافع زلمة والنعم منو
... الظاهر خالة حاجية ويا نافع وماخذة موافقتو الموضوع صار بسرعة
نافع جاب اخوتو وطلبني وبنفس اليوم گطعنا مهر
وقرروا الزواج بعد سنوية لمياء يعني بعد اقل من شهر وبدون عرس هذا قراري وقرارو مانريد عرس وهوسة
امنة صارلها يومين يمنا
وره العشا طلعوا
شاهر وقادر وزوج امنة عمر يتعللون بيت عمي
نص ساعة وطبت ابتسام تبجي نريد نفهم شبيها ماتحجي عبالنة متكاونة ويا رجلها
فاتت احلام وبنواتها نفس البجي والدموع
نعيمة. احجوا شصاير لا اشك ثوبي من الطول للطول
احلام.. اخوي شاهر..........
يتبع