البارت..الخامس والعشرين
رواية...جولييت واسرها...غياهب الإنتقام
بقلمي...نور سمو العراق
💔💔💔💔💔💔💔💔💔
اهتز كياني...
رجفت اعضائي..
اعتزلت العالم..
تناسيت اوجاعي..
تركت جرحي..
هلكت روحي وذهبت..
تتسلل لقلبك وتجس نبضه اتحضنني ام تنبذني؟!!
بقلم المتابعه...ammar123ammar
.......................................
وقار...
بمشاعر كسيره وحروف متبعثره علئ بساط من الالم والاسئ
بين الكره وبين الحب اتناقضت مشاعرهم وسببها الثار والحب المجنون الموجود بجوارحهم
ذكريات خسرانه ومقتوله تظهر علئ وجوه كل واحد منهم
وكلمات قاسيه صارت اقسئ من طعنات خنجر مسوم
بين جولي وشام وحياتهن علئ تساقطت مثل اوراق الخريف علئ باب الكاسر...
طلب صعب واصعب من الصعب من قبل شاام الام المثكولة ببنتها والي تكون صاحبة الحق بنظرها حاليا...
اني بصراحه انصدمت من طلبها ولو جنت متوقعه هذا الطلب منها بس الخيال مو مثل الواقع...
وطلبها حيير الجميع ...وخلت جاسر بموقف لا يحسد عليه...
جولييت بسرعه حطت ايدها علئ شفايفها وهي تمنع جيش الشهكات الي متجمعه بغصتها...
اما شام جانت تباوع الجاسر وهي تفح بغضب وانتقام وهي تنتظر جوابه وتحقيق طلبها المزعوم
كتفت اديها علئ نفسها وباوعتله بتحدي ورجعت عاد طلبها مره لخ..طلئها يالله شو منتظر ؟
هو جان يباوع الشام بجمود وكأن متوقع طلبها القاسي عليه دار وجهه لجولي
الي اول ما عادت طلبها دفعت ايدي،ومشت خطوات واثقه وهي تحارب دمعتها وما انتظرت منه جووواب
انضربت بالطاوله المحطوطه بنص المكان بطرف رجلها
جاسر تقرب منها ملهووف بعد ما صاح بيه بعصبية....الزميهااا
ما لحكت الزمها وانضربت بفخذ رجلها تداركت وجعها وهو لزمها باوعتلهم شام بقهر وهي تحاول تثبت نفسها وتثبت موقفها المهزوز
لزم وجهه وتكلم وياها بصوت غاضب وهو يلوم عليها...كم مره كتلج لا تمشيين انتي ما تندليين الاماكن ولا تعرفين وين الاثاث
شام بلعت ريكها بغصه وهمست بتساؤل...عمييه؟
هو بسرعه باوع الشام وبعدها رجع نظره الجولي وجر نفس عميق ومقهور...اي متشووف
ضلت تباوعلها لمحت نظرة عطف بعيونها لكن سرعان ما بدلت هل نظره وحل محلة نظرة غضب...
فركت اديها بتوتر وشجعت نفسها...وازا كانت عميه ما بتهمني انا يلي بدياه ببصير وانت لازم تطلئها
جاوبتها امي رضيه بتوسل وحزن...علئ كيفج يمه شلون يطلكها هي غير مرته وام ولده وعاشت بظلم عنده
دارت نفسهه لرضيه وجاوبتها بحده...والله محدا طربها علئ ايدها وئال الها ان تتجوز رجال متجوز من زمان
وبعديين اخوها ائتل بنتي بنتيييي قطعه من رووووحي انتي ما عم تحسييي فيه ولا تحسي بوجعي انا موجوعه والله
شهكت بعبراتها وغصت من بين دموعها ...انا انضلمت وتعذبت ونسجنت ظلم كنت بقول بطلع من السجن وبرجع لبنتي وجوزي ولما بجي بنصدم بالحقيقه المره وبلاقي بنتي ميته وجوزي متجوز شو زنبي انا...
دخييلكن حسووو فيه ...
رضيه جرت نفس وهي تداري دموعها وتمسحن بطرف شيلتها...مالج ذنب يمه وحاسيين بيج بس هم جولي ما الها ذنب والصار مو بيدها...
تجاهلت كلام امي رضيه وتوجهت الجاسر وسحبته بعنف وهي تحجي وياه بنهيار و دموووع...بدك طلئها وهلااااا اني ما بئدر شوووفوا ما بكرههها بكرههها اخوها المجرم ائتل بنتي لييش،
اذا ما طلئتها انت يلي بتتحمل موووت غزل بنتي انت المسؤول عنا كيف بتتجوز كيييف الي كييف
طلئها بسررررعه طلئها
زمجر بوجهه بغضب كاسح...وييين تروووح شلووون اطلكها شلووون
ردت عليه بنفس العصبية .الغضب...مااااا بعرف ما بعرف ياااا انا ياااا هي تنينا ما بيصيير ننجمع وانت يلي بتحدد هل شئئ
هو تقرب من جولي ولزمها من ايدها النحيفه واشر عليها بغضب...هاااااااي البنيه عااااشت عندي بالم بقهر بحزن الكل ظلمها اني وغيري
تعبت عندي واتاذت عندي فقدت كل شئ بسببي هاااي البنيه عاشت ويه وحش ما رحمها شلووون تردين مني اطلكها
لج هااااي مضلومه هاي انهانت ببيتي بسبب موت غزل وانضربت وتحملت مسؤؤلية اخوانها وكل شئ وفقدت نظرها بيتي
شلوون اعوفها بنص الطرييق وهي فقدت اعز ما تملك بيبتي انيييي
هاي البنيه ضاكت مني سنين من العذاب والووويل انتي ما ضكتي منيي شئ
تقربت منه بخطوات غاضبه وعيونها محمله بالدموووع كالت....ما دخلني فيها ما دائت بكتري عزاب انااااا اناااا يلي ماتت بنتي مو هي انا يلي جوزي ااخدتوه هي انا يلي تهجرت وانسجنت وحسرت كل شئ...
تقىبت اكثر منه ولزمت ايده سحبتها من ايد جولييت الي جان قابض عليها ونكتتها بغضب ...لا تمسكا لا تحسيني ان هي فد شئ مهم بحياتك
خلي يكووون عندك علم هي واخوها من نفس الدم ونفس الام والاب واخوها ائتل قطعه من روووحك
يا اناااا يا هي ....وصدئني تار غزل باخدوا من عيووون الكل وبقول الها انا امك بحبك اكتر من ابووكي يلي عايش غراميات مع اختو يلي قتلك
اني صحت بوجهه...انتي لا تضلييين تسربتين بحجيج هي شدخلها قابل كلتله اكتلها...
ياسمين كالت...شو بيعرفنا بيكون هيك حكت لاخوها...
شام باوعت الياسمين بغضب وتكلمت من بين اسنانها...اسكتييي انتي لا تتدخلي ...
وكملت كلامها بحده...ازا كانت مضلومه او لاااا يا جاسر انا ما بديها بحياتي وازا بدكياني طلئها ونرجع مع بعض...
هو تقرب منها باسئ وحزن ...شام لا تحيريني خلينه نتفاهم خلي احجيلج شنو الصار
سحبت اديها من اديه بغضب....لااااا ما بدي ما بنتفاهم علئ شئ الا ازا طلئتها
تقربت منه وحضنت وجهه بين اصابعه الطووويله الناصعه ...انا بحبك يا جااااسر وتعرف ادييش بحبك
حس فيه وحياة غزل حس فيه ما بئدر انت بتعرفني ادييش بحب غزل...وبحبك
رفعت عيونها اله مره ثانيه وسالته بخووف وقلق ...ما بدك تطلئها...
هو جان يباوعلها بحمود ونزل اديها من وجهه وابتعد عنها خطوات وجر نفس بس بدون جواب
هي تخبلت جان اكوو تحفيه موجوده لزمتها وضربتها بالحااايط بصررراح اتناثر الكزاز علئ الارض وتكسرت اجزائها مثل ارواحهم
صرخت بصووت هز اركان البييت...بكرررررهك بكرهكككككك كتيير كتيير يا ظالم الله بنتقم منكم كلياتكن ..
راد يلزمها وهي ابتعدت بسرعه وطلعت تركض والمره الكبيره وراها احتمال امها لان تشبهها وياسمين وبعد وحده هم جانت تجي قبل ...
هو اتبعها بنظراته برووح ذايبه عليها وعلئ حزنها حط ايده علئ خصره والايد الثانيه فرك بي جبينه بتوتر وقهر...
واني لزمت جولييت الي جانت واكفه وشلال الدموووع علئ وجهها المتعوب...
طلعت اركض وراهن من طلهن شام جانت تمشي بسرعه والدموع تتطاير من عيونها و وياسمين تمشي وراها ولزمت ايدها كلتلها...تصرفك كلو غلط يا شاام انتي هييك بتضيعي من ايدك وهي تاخذوا لالها ما عرفتي تكسبي صح
ردت عليها شام من بين اسنانها...اخررررررسي انتي يبعتلك حمئ شو زنانه
بعد ما طلعن خليت ورجعت للبيت
شفت جاسر واكف بتوتر بعد ما شافها راحت من الشباك ضرب الباب بقضبة ايده بعنف وصرخ بصوووت عالي...يالله يالله اني شمسوووي بحياتي لييييش هيييج يصيير وياي لييش ...
الهم والقهر لييييش ما راضي يفاركني ليييييش
اندار الها بسرعه بعد ما طلعت منها شهكه صغيره فضحتها شافها الدموع ماخذه مسار علئ خدودها الشاحبه جر نفس وهز راسه بقهر ...
همست بصوت ذايب ومتعوووب...جج جاااسر طلكني
ضل يباوعلها ثواني كل معالم الانكسار واضح علئ هيئتها وعلئ شكلها نزل راسه وتنهد بضييق..
كعد علئ القنفه وسحب من باكيته جكاره ومجاوبها هي رجعت كررت طلبها بحزن...اي والله طلكني صدكني الدنيا مراح توكف علئ شخص معيين واني مراح امووت
جنت عبالي الحياة امي وابووي واهلي ومن بعد ما فاركوني عرفت محد يموت وره احد والانسان لازم يعتمد علئ نفسه...
رفع راسه الها وجاوبها ببرود عكس تيارات الحزن بداخله...ممكن تسكتيين ؟
بلعت ريكها بغصه وكملت من بين جيوش من الاهات...لا ما اسكت انت تعبان وبسببنا احنه اني ما كدرت ارد عليها لان اني تعبانه وما اعرف وين اوجهه نظري
بس يا جاسر ياريتها تفهم اني ما اخذتك منها ولا جنت اركض وراك اني انفرضت عليك لا تحملني سبب زواجي من شخص متزوج
باوعلي ومسح وجهه كال...وقار اخذيها الغرفتها بسرعه
اني اجيت تقربت منها ولزمت ايدها ردت اخذها هي دفعت ايدي بغضب كالت...لهل درجه اني مزعجه وما تحب تسمع اي كلمه مني هي سمعت الها واني انزعجت مني وتريدني اروح من وجهك ؟
رد عليها بغضب...لا اله الا الله اليوم شبيجن ناويات تعاركن لو شنووو ؟
انتي تعبانه ومربضه وهل ضغط مو زين عليج روووحي وخليني بهمي
بلعت ريكها بغصه وتكلمت بالم مخنووك ...اا انت دائما هيج وياي كلمتي ما الها هي خاطر عندك ترئ اني ما جاي اهييج مواجعك بالعكس اريد اريحك
وما اريدك تعطف عليه اذا انت تشوفني انظلمت ببيتك وضميرك يانبك عليه فاني اكولك ريح ضميرك لان والله شنو ما يكون قرارك حكون راضيه ...
رد عليها بتوسل...جولييت رحمه لالله عوفيني الوحدي ترئ والله روحي طالعه ومحد جاي يحس بيه
اني لزمتها ايدها وحجيت وياها بهمس...جولييت عوفي مو وكت كلامج هسه خطيه تعبان ومهما يكون شام جانت زوجته ويعز علي زعلها...
مشت وياي دخلتها الغرفتها خليتها علئ سريرها وهي بجت بعد ما احتضنت وجهها وتشهك بصوت يقطع الكلب...
والله ما جنت اريد منه شئ اريده هو يرتاح وما ياكل همي ولا يتعذب بسببي خلي ضميره يرتاح
ادري بي ما يحبني ويحبها خلي يحقق الها طلبها اصلا وجودي بحياته مثل عدمه
والله ما رايده منه ولا رايده عطف اني اريد حببب اريد انسان يحبني واني ما شفت من جاسر بس العطف بس كلبه و جوارحه الشام
شفتيها شلون الها حق تحجي وتطلب ويسمع الكلامها حتئ لو جان لاذع واني حجيت كلمه انزعج مني عبالك كلامي سم بالنسبه اله
ما فد يوم افتهم مني وسمعني لييش،هيج شنو ذنبي
اني حتئ ما اريده يخليني علئ ذمته ظلم والله من اول موقف هو منطيها الحق ويحبها مو مثلي يكرهه حتئ كلمة الحق مني...
مسحت دموعها وهمست...لا يروحي والله هو يحبج ولو ما يحبج جان طلكج شفتي شلون رفض طلب شام ودافعلج كدامها...
شهكت بدموع...لا والله ما يحبني بس هو ضميره يانبه عليه لان انعميت ببيته هذا هو كلامه واني عرفته ما يحبني ...
خلي يطلكني واعيش اني واطفالي صدكيني مراح احجي وخليها تاخذه والله اني ارووح وانطي الها
عاد هو دخل متعصب بعد ما فتح الباب كلها بغضب...اكلج شنو اني ورث الخلفوج وضاله توزعين بيه انوب هي تروح وتنطي بكيفها...
هي باوعت بعشوائيه ومتشوفه وين اني عضيت اله الشفه وباوعتله بنظره توسل يعوفها تحجي بكيفها لان احنه ما ندري شنو بداخل القلوب
يمكن هي تحجي هيج من قهرها ويمكن عزة نفسها ما تسمح الها تضل هنا...
هو سد الباب وطلع بس جان مقهووور حييل بس اني بصراحه حصرتني الضحكه عليه من كلها ورث الخلفوج وتوزعين بيه هههه
لزمت اديها بحنان...يروحي يعمري انتي لا تضوجين والله جاسر يحبج واني اكتشفت يحبج تعرفين شلون ؟
همست بتعب وتساؤل...شلووون ؟
ابتسمت...شام طلعت الوحدها وراحت زعلانه وهو ما حرك ساكن ...اني قارنت هاي لو انتي طالعه زعلانه جان ركض وراج ورجعج غصبا عنج
مسحت دموعها بطفوله...اي هو بس عليه يكفخ بيه لان محد اليه
تنهدت بضيق...لا لتحجين هييج ابد شلون محد الج لا يروحي كلنه الج احنننه بس هو يحبج ويخاف عليج لذلك ما يحب تبتعدين عنه...
ضليت كاعده يمها اهدي بيها وانوب اجت ماما رضيه كعدت يمها كلتلها ...استهدي بالرحمن يمه لا تسوين هيج ان شاء الله شده وتزول ...
شويه هي ضلت انوب نامت خطيه هي الحركة مو زين علئ طفلها واحنه منخليها ابد تشتغل او تتحرك بس هي هم متكعد لان هم حقها خطيه عايشه بظلام وانوب مو بس هيج طلعلها هم شام صفح وكلب كل الموازين....
...........................................
جابر
حس يعصف بروحي ما توقعتها ابد من جاسر ولا من وقار ما توقعتها ابببد
حتئ من صدمتي كلمة ما نطقت انلجمت كل حواسي وكل مشاعري...
جاسر مو معقول ابببد اني وياه اصدقاء من الطفوله شنو سامع عليه حتئ هيج يضربني وكلامه كله بسامير...
صار كم يوم ما اطلع من وره البوكس الي اخذته منه بس ميخالف يضل اخوووي وابن عمي
امي حييل ضاجت من تصرف جاسر وضلت تحجي عليه وحتئ ذمت وقار...
اوووف يا وقار بسيطه والله اذا ما طلكتج ما اطلع جابر ...
مع الاسف عليج والله احترمتج وقدرتج وانتي ما عندج احترام اليه شايفه روحج ومشمخره جنج اخووج ...
من ناحيتك غفور رحيم ومن ناحيتنا شديد العقاب اخوها سكط البنيه تسكط ومحد كله علئ عينك حاجب ليش لان محد وراها...
اجه كعد ابوي بصفي وحط ايده علئ كتفي كال...هااا بويه شلون صرت اليوم ان شاء الله احسن ؟
هزيت راسي بأي واني نار شاعله بصدري كتله ...بويه اني قررت اطلگ وقار لان هيج مره ما تنراد شعلت الفتنه بيني وبين اخوها وما احترمتني
تنهد بضيق وقبض علئ سبحته...كول يالله وليدي كول يالله ابغض الحلال عند الله الطلاق واحنه ما نريد نغضب ربنا بنيه محروك كلبها وزعلت واجه اخوها اخذها
ضحكت باستهزاء...هههه لا والله بويه هذا ضربني وهي دكلي عينك نكسه وهو يكلي عوف ام مرتضى مو بحاجة حنيتك
شنو قصده قصده اني عيني علئ مرته اي هو هذا القصد ترئ بويه اني ما احب الظلم واني ادافع لام مرتضى لان شفتها انضلمت عند ابن عمي
باوعلي بقهر وجبروت...مالك شغل بويه البنيه متزوجه ورجلها هو مسؤؤل عنها ترئ صدكني جاسر ما ضربك لان ضربت وقار ضربك لان ذاك اليوم يم الرائد رضا جفصت جفصه لا يم الله ولا يم بني ادم
عقدت حواجبي باستغراب...شنوو هاي شوكت شوكت اني حجيت ؟ اصلا شوكت اجيت ورضا موجود...
تنفس بضيق كال...من اجو الحراميه ودخلو بيت جاسر واحنه رحنالهم وانت كلت ام مرتضئ عزيزه اجيت اركض من سمعت يردون يخطفوها...
اني فتحت عيوني مصدووم ...اءءء اني حجيتها هييج لا ارادي مو قصدي والله اني صدك اعزها واحترمها لان عندي مواقف وياها وساعدتها من قبل
واشوف محد الها من هذا الباب ...
ابوي جر نفس...بويه انت فاضح روحك ولي يشوف تصرفاتك يكول تحبها لا تنسئ هاي مرت ابن عمك وهاي مثل اختك وحتئ حرام تفكر بيها لان متزوجه
وكفت مصدوم من كلام ابووويه...لاااا يابه لاااا مستحييل هاي انت هييج تفكر بيه لا صدكني مستحيل افكر. بيها مستحييل
بس اني ما انكر البنيه مؤدبه وحبابه وخلوقه اني حتئ جنت اتمنئ عندها اخت اتزوجها بس مو معناها ان اني احبها لو اريدها الي لا مستحييل
لا يابه اترجاك الله يخليك لا تشك بيه هييج والله كسرتني كلمتك هي غير مرة جاسر شلون افكر بيها شلووون افكر بمرة اخوووي
يجوز مجرد اعجاب بس ما توصل للحب يابه ابببد والله ...فدوه لا تشككوني بروحي ولا تخلوون الشيطان يلعب بعقلي ...
واني هذا هو راح اطلك وقار وكل شي ينتهي كل شئ وحتئ بيت عمي اكطع علاقاتي بيهم ما دام يضنون بيه ضن السوء
يعني انت و وقار وجاسر كلكم شاكين بيه واني احلف ابد ما عندي شئ وياها...
خليت وطلعت من الاستقبال دخلت الغرفتي واحس نار شابه بصدري من كلامهم يارب صبرك ترئ والله تعذبت حييل تعذبت ولكل يلوم بيه ...
شفت صورة وقار مخليتها علئ الجربايه تنهدت ومن قهري منها لزمت الصورة وشمرتها بالارض وبعدها خليت وطلعت
........................
جولييت ...
احساس يوجع من اخلص عمري الكصير بالتضحيه واليوجع اكثر من توكع وتكسرك الدنيا تشوف الشفقه بعيونهم...
احساس يوجع من تلكين واحد بعد عناء وقهر يحبج ويداريج بس المشكله متكدرين توصلين اله لان الوصول اله مستحييل وهو ملك للغير
احساس يوجع من تلكين الشخص الساندج متوجع ومتعذب وتتعذبين لعذابه واني فاقده الراحه شلون انطيها اله...
احساس يوجع من تتعلقين بواحد قاسي ويعذبج وما عنده ذووق وتكونين مجبوره لان محد الج غيره...
احساس يوجع من تنهزمين من قلقج بالنوم ولكن للاسف القلق هو الي يعكر نومي
رغم الظلام الي محاوطني بس اني حيييل حييل تعبانه وعبالك هل ظلام ينهش بروحي ومرات اشوف نفسي حابه هل ظلام لان ما اريد اشوف وجهه اي شخص
رب ضارة نافعه اي والله الهروب من الواقع مثل الظلام الي محاوطني الحمد لله علئ كل حال ...
حسيت بخطوات واحد من اطفالي دخل وهو يصييح...يماااا يمااا سكيته وين انتي
عدلت نفسي وكعدت...تعال يروحي اني هنا
اجه عليه وكعد يمي وحضني كال بحزن...سكيته انتي ليس تله نايمه نايمه اني والله اعبج اليد العب اياج ؟
ابتسمت بحزن وبسته بعشوائيه...يروحي انت هياني يمك العب ويايه
لزم ايدي وهو يطبق اصابعي ويكول...هدا ممش الحايس هدا بابا العلو هاي بيبي رطيه هاي عمه وطار هاي سكيته العلوه « هذا مشمش الخايس هذا بابا الحلو هاي بيبي رضيه وهاي عمه وقار وهاي جكليته الحلوه »
وبعدها حط اصابعه الناعمه علئ بطني وهو يدغدغني بحركات ناعمه واني اضحك بالجذب اريد اسعده وانطي حافز ...
هو يضحك بصوت عالي وبعدها كال بحزن...سكيته انتي ليس باعين علئ عايط ما باعين عليه انتي ما سوفيني « جكليته انتي ليش تباوعين للحايط ما تباوعين عليه انتي ما تشوفين ؟
بلعت ريكي بغصه وهمست...لا حبيبي اشووف يا عمري انت شوف تلكه جنطه صغيره خليتها بالكنتور لونها جوزي جيبها اليه ...
هو راح دور عليها وما لكاها خله وراح صاح رضيه اجت دورتها وانطتها اليه سالتها بتردد...ماما جاسر موجود لو لا
ردت بتنهيده...لا يمه مو هنا ليش محتاجه شئ ؟
همست بعذاب...بيش الساعه هسه ؟
كالت بهدوء..الساعه بثنعش ونص باليل
تنهدت وهي سدت الباب عرفتها طلعت بلعت ريكي المر بصعوووبه وين راح ليش هيج متاخر لهل درجه صار هذا البيت ما ينطاق وما يكعد بي...
صحت بصوت خافت...مرتضئ ماما
اجه لزم ايدي كال...هااا عبيبتي دولي ليدين مي اسيبلج ؟ « كولي تردين مي اجيبلج »
ابتسمت...لا يروحي انت بس اخذني طلعني للحديقه
هو خطيه لزم ايدي راد يطلعني واني ضليت اتلمس الجنطنه منا لمن وصلت للسحاب وضليت ادور عن الشئ الي ضامته من زمان لزمته بيدي وخليت وطلعت وهو روضي دليلي
وصلني كال...ماما هته اعنه يم وده عمرا وعلوه « هسه احنه يم ورده حمرا وحلوه »
ابتسمت ورجعت بذاكرتني من اول ما اجينه لهذا البيت وطلبت منه يزرع بيها اتذكر ضحكت وكتله...شحتزرعلي
رد ببرود وهو ينفخ الدخان بين ارجاء الحديقه كال...ازرعلج بستان ورود وشجره صغيره تفييلج
ضحكت...ههههههه احب هل اغنيه واحب الاشجار حتئ من ازعل منك اكعد جوه الشجره واضل اتحسب عليك
رد بقهر...اي بربوك كلشي يطلع منج ..
اردف بعدم مبالاة...بس ازعلج وتجين تكعدين جوه الشجره اجي اكصها...
رديت عليه واني مقلصه عيوني بقهر...شكد خبيث حتئ الشجره ما سلمت منك لهل درجه مجرم
كال...اذا تحطين ضهرج علئ غيري اكيد اصير مجرم
رفعت حاجب...يعني منخلص منك ؟
جاوب ببرود وهو يباوع الارجاء الحديقه...للاسف لاااا
همست بكلبي وعلاااا كووون انوب انتبهت علئ نفسي ثووول هسه شكو اغلط عليه هاي فووك ما مسويلي شجره تفييلي صدك مو وجهه نعمة...
رجعت من ذاكرتي واني امشي بحذر بالحديقه وطينها البارد حسيته دخل بعظم رجليه ضربتني نسمة هوا بااااارده
حضنت نفسي بدلال جنت قبل لا تجي شام واول ما انتقلنه لهنا كل يوم نكعد اني وياه هنا وجنه نسولف ساعه نذكر الماضي الالئيم وساعه ننسئ رواحنا بسوالفنا وحوارات كلها بسامير وقصف...
تلمس العلبه المخمليه الي بيدي وفتحتها تلمست الي بداخلها ورفعت راسي العنان السماء...
رجعت بذاكرتي من انخطبت اله وامي كالت هو راح يجي حتئ تكطعون مهر ضليت معانده الع تروح تجيب اله حلقه فضه...
وهي ما قبلت تجيب كالت...ولج والله بطرانه خلي هو يجيب الروحه هسه اني بيه حيل اروح للسوك اجيبله حلقه....
ضليت معانده وكاعده علئ الدرج وزعلانه ومطنكره اله تروح تجيب اله وهي بعد استسلمت للامر الواقع وراحت جابتله من الصايغ ..
ضربتني علئ كتفي واني لازمه الحلقه وفرحانه واباوعلها بفرح كالت...هاااج يالططوه جبتها ب35 الف اخذتهن من المصرف من وراج ومن وره جويسرج نقصت المصرف...
رديت عليها بعدم اهتمام...عادي حتئ لو نخلصها مركة فاصوليا وتمن المهم جبتيله حلقه والمهم يكول هاي خوش بنيه ما نستني ومهتمه بيه
رحت بدلت لبست تنوره سوده وقميص ماروني وخليت شويه مكياج لان امي متقبل اخلي مكياج دكول جنج بزون مدغمثه ...
رحنه كطعنه مهر جنت قاصر فرادوا بابا وهو خابر علئ بابا اجه من رجعنه ضل تغده يمنا ...
واني حيل جنت فرحانه بي ومحد ياخذ فرحتي كعدت يمه وانطيته الحلقه بالعلبه
هو باوعلي مستغرب كال ...هاي شنوو ؟
ابتسمت بخجل..اءءء هااا هاي حلقه لان اني مجبتلك حلقه من انخطبنه
لزمها بيده وابتسم كال...اهااا شكرا ليش كلفتي نفسج
جاوبته ببتسامه واني افرك باديه...هاااا لاااا ماكو كلافه بالعكس ادلل
واردفت بحب...البسها
باوعت الاصبعه شفته لابس حلقه اختفت ابتسامتي بسرعه وبلعت ريكي بغصه همست بهدوء...اءء العفو اني اني مجتت اعرف بيك لابس حلقه مجنت منتبهه
رد عليه بهدوء.. لا عادي البسها
فتحها اجه يلبسها بس اني لزمت ايده ...لا لا الله عليك خليك لابس حلقة زوجتك القديمه
اخذت الحلقه بسرعه وضميتها و وكفت بسرعه خليت ورحت واني الحسره والغصه تعصر بروووحي اجيت ابجي بوكتها كد ما انقهرت
لحد الان ما نزع الحلقه مالت زوجته القديمه لعد شكد يحبها بس ليش تزوجني ؟
جاوبت نفسي بخذلان....لان انتي انفرضت عليه يا جولييت هو مجرد نقذج من ظلم اخوتج ومن اتهام هاله الحيوانه مو حبا بيج اتزوجج وخطبج
بس حتئ يساعدج لا تنتظرين منه حب وحنان...
رجعت الواقعي الأليم واني اتلمس العلبه سحبت الحلقه من بينها ورفعت ايدي وشمرتها وما عرفت وين استقرت وين صااارت
غمضت عيوني بألم والدمعه النازفه تحرگ خدي...كل يوم تتخلين عن ذكره اله يا جولييت طلعي من كلبج وعيشي،النفسج اترجاج
ضليت واكفه بمكاني والهم مزروع بصدري
همس مرتضئ برجفه...ماما حلينه نقب دوه متت من البلد...ماما خلينه نطب جوه متت من البرد
لزمت ايده ومشيت وهو يمشيني ويكلي...ماما لا قيحين امسي عدل..« ماما لا تطيحين امشي عدل »
وصلني للغرفه وحضنته ونمت واني ابجي محتاجه لامي مثل حاجة رضاوي ومشمش اليه وينج عني اريد اشكيلج تعاليلي...
نمت والدمعه شاكيه الهم بداخلي وماخذه مسارها علئ خدي....
..................................
ريهام ..
خلصت أخر محاضرة الي بالكلية ، واليوم عندي موعد ويه الطبيبة ، انتظرت صلاح يجي عليه للكلية ياخذني من الجامعة ونروح ..
دااطلع تليفوني من الجنطة حتى اخابره ، وجان يررن اخذته باوعت بشاشته شفته صلاح يتصل
ابتسمت واني اجاوبه هلو حبيبي هسه دااخابرك
كال بضحكة سبقتج معناهه اني احبج اكثر ...
ضحكت ورفرف قلبي بين اضلاعي ..
لا والله هذا مو مقياس
كال لعد شنو بالله
كعدت على المصطبة خليت ايدي على بطني
كتله ننتظر ابنك ونشوف ، اذا طلع يشبهني انته تحبني اكثر واذا طلع يشبهك اني احبك اكثر ولو اني متأكدة رح يطلع يشبهك لأن ما اشوف غيرك
كال امممم لا هذا هم مو مقياس دمشي نروح للدكتورة وخل نعرف جنس الجنين اذا ولد انتي تحبيني اكثر واذا بنية اني احبج اكثر ...
ضحكت ديله حبيبي انتظرك ....
بعد ربع ساعة من الانتظار وصل صلاح ، اتصل بيه وطلعتله ، فتت للسيارة ، سلمت عليه
اخذ ايدي باسها وكال خو متعبانة حبيبتي ؟؟
جاوبته لا عمري متحمسة اعرف شنو بيه بنيه لو ولد ....
هز راسه مبتسم واني اكثر منج والله اريد اعرف راح اصير ابو منو
ضحكت وخليت ايدي على زنده حبيبي الله يحفظك النا اني والنونو ..
لزم ايدي بحنان وحرك السيارة ... وصلنا للعيادة
احنه حاجزين رقم الحمدلله دخلنا بسرعة لان حيل تعبانة اريد اخلص وارجع للبيت بسرعة واحس رجلية ماتحملني بعد من التعب ..
دخلت لعيادة الدكتورة نمت على السدية وهيه خلت جل على بطني حسيت ببرودته ، كززت اسناني ، بعدها
بدت تاخذلي سونار وتباوع بالشاشة ..
جان كبالي اكو شاشة واشوف طفلي بيها ابتسمت وحمدت ربي على نعمته ، صح متحمسة اعرف شنو جنسه ، بس الف الحمدلله على هاي اللحظة الي جنت احلم بيها وصارت حقيقة ، الله عافاني من مرضي ورزقني طفل من زوجي الاحبه واموت عليه
ظلت تحجيلي الدكتورة عن وضع الطفل
كالت وضعه تمام والجارة بمكانها وبيج بنوتة ...
ابتسمت وظليت اردد الحمدلله يارب الحمدلله ...
كامت الدكتورة انطتني كلينكس مسحت الجل من على بطني ونزلت ملابسي وكمت وهيه كتبتلي السونر وطلعت من غرفتها
توجهت لصلاح بابتسامة شاكة حلكي ، هو لزم اديه
كال ها بشري شلونه وضعج انتي ؟ والنونو شلونه
واني اباوع بعيونه كلت الحمدلله حبيبي وبيه بنوته ..
ضحك وكال بفرحة صدددك بنية ، الف الحمدلله يارب اهم شي سلامتج انتِ حبيبتي خو ما اكو شي يخوف ؟
هزيت راسي : لا عمري كل شي تمام والله ليظل بالك ...
كال بهاي المناسبة عازمج أني .. كال هيج ومشى بيه لازم ايدي
شديت على ايده بقووة لا عفية والله تعبانة خلي نرجع للبيت ارتاح ..
كال ماريد اعتراض ادري بيج تردين ترجعين للبيت تشتغلين عبالك بس انتي بالبيت ، يمعودة لاحكة ع الشغل هسه ...
اخذني لمطعم اكلنا بيه وبعدها رجعنا للبيت ..
بالطريق اجاه اتصال كال هاي أمي
رد عليه وفتح سبيكر وخله تليفونه يم الكير يحجي وياهه ..
اجانه صوت عمتي تحجي بقهر ...
يمه صلاح هاي اختك طالعة زعلانة من بيت عمك وبقت يم بيت اخوك جاسر كلي شون اسوي وياهه متقبلت تجي ويايه للبيت ...
التفت عليه متفاجئ فاتح عيونه على اوسعهم
وقار زعلانة ؟ شبيهه !!!
جاوبته عمتي : يمه شكوول وشحجي هذا جابر ضاربها وغالط عليها ، اول تالي بنت مهيوب تنضرب وتنهان والله كلبي متوجع عليها حيييل ....
ضرب ايده على الستيرن بعصبية
جااابر ضااارب وقااار شبي تخبل وعلى شنووو بالله وليش يمد ايده عليها تايهتله ؟ ماوراها زلم شبي تخبل هذا ؟
ردت بنبرة يغلفها الحزن مادري ييمه مادري اني خابرتك اريدك تطيب خاطرها بكلمة لاتظل مهظومة ومكسورة خاطر
زفر ببطئ وجاوبهه : صار يوم بدون متوصين
ان شاءالله سهلة اني أتصرف ..
غلق المكالمة ونزل على جابر
هوو شلوون يتجرأ ويمد ايده عليها شبي تخبل خو ما تخبل ؟؟
والتفت عليه ريهام انتي جنتي تدرين بي ضاربها لوقار وساكتة ؟
حجيت وياه بنبرة رجاء
صلاح بس اهدى انته دتسوق هسه وبعدين هم عائلة بيت واحنه لازم ندخل بالمعروف مو انجج الموقف ونكببهم بالزايد ...
ضرب الستيرن بعصبية جفلني
وكال افتهم بس مو من حقه يضربها وانتي تعرفين كلش زين وقار وضعها خاص شنو يستقوي عليها ويضربها
اي اعرف صلاح اني وياك بهاي بس هم ماندري شنو ظروفهم وشنو الي جبره وخلاه يضربها ، صلاح انته تعرف جابر وشكد يحبها لوقار و اكيد فقد اعصابه
وماكدر يلزم نفسه
التفت عليه باوعلي ورجع دار وجه على الطريق
وكال بنبرة جنون شنووو تبرريله انتي؟ ماتوقعتج هيج ريهام هاي عود انتي الي طول عمري اعرفج حقانية
رديت برفض قاطع لالا مابرر إله بس لازم نسمع من الطرفين ونعرف ليش هيج تصرف جابر
كال ترة هاي مو أول مرة تطلع وقار زعلانة الظاهر هو مديحترمها ولا يقدرها واني حاس بيها تضم بداخلها هواي واخر شي ظلت ما تتحمل
كتله بتوسل لاعفية صلاح لتكول هيج ترة جابر يحبها ويحترمها بس كل بيت لازم تصير بي مشاكل وهيه مصارين البطن تتعارك واحنه لازم نوكف وياهم ونصالحهم ونرجع المياه لمجاريها بينهم ..
هز راسه وكال بنبرة تهديد سهلة سهلة ..
درت وجهي ع الجامة وزفرت ببطئ ..
ورددت يانار كوني برداً وسلاماً منين طلعت النا هاي السالفة الله يهديهم على بعض وقار وجابر ....
وصلنا للبيت نزلت من السيارة ، مزاجي تعكر بسبب الي صار من نقاش حد بيني وبين صلاح محبيت يفهمني غلط ، اني احبها وقار وهيه كلش قريبة عليه واعتبرها اختي الي ماولدتها امي
ونفس الشي جابر اخويه الوحيد واعتبره مو بس اخ وصديق همينه وهم محتارة بيناتهم
اني مستحيل اتحيز لطرف منهم بس بنفس الوقت اريدهم يهدأون وماريد اطراف تتدخل بيناتهم وتأجج الموقف اريد هم يحلوها احسن بس لمن يهدأون
انتبهت صلاح مانزل من السيارة ، طليت عليه من الجامة وسألته بنبرة تساؤل : وين رايح صلاح ؟
هو باوعلي وجان متأهب لحتى يحرك السيارة ويطلع
جاوبني بعصبية ظاهرة .. ..
رايح لبيت جاسر اشوف وقار ..
درت وصرت يم الجامة الي بصفه وهو يباوعلي ونظرات الصرامة تبثها عيونه بكل إصرار ...
حدقت بي يائسة من اختراق ملامح وجهه الجامدة وعيونه الملتهبة ..
ترجيته : عفية صلاح بالهداوة حاول تهديها وتنصحها جابر مهما يكون ومهما صار بينهم هو يبقى زوجها وهم بعدهم بأول الطريق وكل شي واله حل ..
ابتسملي ابتسامة حلوة ما تتقارن ويه عصبيته الظاهرة قبل شوية على عيونه
واني على اثر ابتسامته الاحبها ابتسمت همين ..
اخذ ايدي باسها
كال لا تهتمين عمري انت فوتي جوة هسه وارتاحيلج شوية ماريد ارجع اشوفج تشتغلين احذرج ترة
واني رايح اشوف وقار خطية بالي يمها
هزيت راسي ودعته وصيته على نفسه وفتت جوة
واني فايتة اسمع هوسة هوووسة بالبيت ...
شفت سجى وشهد يتعاركن وعمة ام فلاح
تصيح عليهن ..
ولج اني منين اتلكاهه منجن من وقار الي تكسر الكلب من جاسر الي ظيم الدنيا كلها على راسه والله والله على ساعة اطك واموت والسبب انتن ..
لزمتها من ايدها بس عمه على كيفج ويه نفسج ماتسوى شبيهن البنات شسالفة !!
شهد تخصرت كالت اني نظفت الطرمة الصبح وهاي الخايسة تجذبني تكول لا اني نظفتها
ردت سجى بوقاحة : اني الخايسة لووو انتي الخايسة والجذابة شووكت نظفتيها بالله!!!
انحولت بسببهم وحدة تجر عرض وحدة تجر طول وصوتهن طالع واني اصلا جايه تعبانة ودايخة شون تنحل بالله هاي ياربي
كتلهن اني هسه ارتاح وانظفها حلاً للنزاع بس كافي الله يخليجن مو حالة هاي ...
عمه ظلت تصيح ماريد اشووف وحدة منجن كبالي يله لانخلني اخابر جاسر يجيجن يرعد ويطيح حظجن والله مناقصتجن انتن همين ...
هنه سمعن باسم جاسر كله وحدة دارت وجهه ومشت .. ضلن ينضفن ويغلطن
كعدت عمتي على القنفة واني كعدت يمها لزمت ايدها
كتلها عمة اني اخذت سونر وطلع بيه بنية ..
باوعتلي وابتسمت بقهر
كالت اي صلوات على محمد الله يكومج بالسلامة يمه اهم شي تمام الخلقة والصحة والسلامة ، بنية ولد نعمة من الله ...
كتلها اي الحمدلله والشكر ..
سألتني على صلاح ..
جاوبتها باقتضاب ..وحيرة
_ راح لوقار لبيت جاسر يشوفها
لان عرفت موضوع وقار وجابر راح ينفتح هسه ..
وكعدنا نحجي عنهم .. وعمه مقهورة على وقار واني صايرة بين نارين ..
خلصنا حجي كالت كومي يمه ارتاحي بغرفتج ومعليج منهن ذني الخايسات لاحكة ع الطرمة تتنظف بعدين ارتاحي وناميلج شويه ..
هزيت راسي وكمت من يمها رحت للغرفة ، غيرت ملابسي تمددت شوية وبالي مشغول ويه جابر ووقار خايفة بالايام الجاية تتطور الامور بينهم للاسوء لان هواي تدخلات دتصير بينهم ..
غفيت شويه ع السرير وأني أفكر .. وكعدت على صوت صياح .. خفت لا الصياح هذا يخص جابر ووقار
بسرعة كعدت صاير المغرب لان الغرفة ظلمة من كد التعب ماحسيت بنفسي شكد نمت وصلاح لهسه ماكو
علكت التيبلامب يمي لان صرت مااشوف شي
كمت لبست شالي وطلعت من الغرفة
الصوت جاي من الصالة توجهت الها ، فتت شفت شهد كاعدة ع القنفة ولازمة بطنها وتتلوى كلساع ياترجع ظهرها ع القنفة يا تميل ليكدام وتحوص وتصيح
طلعوها طلعووووها ماريدها ماريدها ترفس بيه وتدفر نهار كله يمه شلعت كلبي مااااريدها ....
نعله علئ ابوج جعيفر ولج اكعدي يالخفه هاي انتي ببطني والكاع ما ترجعج من تطلعين شسوين
ردت عليها عمتي ام فلاح اي موو هيه تنورة وماتردينها لو قطعة قماش لو مدري شنوو وبعدين ليش تسبين بجعفوري
شوون الله بلانا بيج وحدة زعطوطة والله عجيب امرجن شكوو تتزوجن اذا موو كدها عبالج الزواج بدلة وصفكة وهلهولة مووو ؟؟؟
لزمت شهد ركبتها وتصيح يمه يمه مخنووووكة مااتحمل بعد والله احس كاعدة بكبر والله مو بيت...
عمتي ام فلاح خلت اديها على راسها
وعاطت الله اكبر اسم الله اسم الله يالفكر لا تتفاولين علينا كووولي يا الله
بقيت اباوعلها مقهورة عليها احسها مو طبيعية شهد نهائيا ..
ظليت اعصر بأصابعي وسجى واكفة تباوعلها متخصرة
شلون اكول لعمتي شهد مو طبيعية ومبينه مسحورة
خاف اكول كدام سجى وتكول تحرضينهم عليه ..
خطية شهد لازمة بطنها وايدها اللخ تضربها بقووة على القنفة وتصيح يييمه لحكي لبنتج يمه اخذيني يمج يمه والله تعبت من هالدنيا والله
رحت لزمتها من ايدها وكومتها كتلها كومي وين جعفر
كالت نايم بالغرفة ولا يهمه اني ولا يسويلي جارة والله اكوله مخنوكة ميصدكني ..
ظلت سجى تباوع علينا بنظرات شرسة وشيطانية
مهتميت لنظراتها واني لازمة شهد واوجهه لغرفتها ..
دكيت الباب وهي فتحته وفاتت ، وكفت بالباب ودكيته مرة ثانية ..
فتحه جعفر كال فوتي ريهام ليش واكفة ...
فتت جوة وسديت الباب كتله جعفر ترة شهد مسحورة عفية تلاحك الها خطية هيه حامل خاف يصير ببنتكم شي ..
هو انصدم وظل يباوعلها ، هيه كاعدة على السرير ايد على بطنها وايد ساندة جسمها بيها على السرير
تغمض وتفتح وتبجي وتدردم وتعض بشفتها ..
كال زين شسويلها ريهام ؟ خاف دخل بيها جني وجهه الطاوه مثل ما دخل بيه
كتله اخذها طلعها فرها خطية دتكول مخنووكة ..
كال بحماس ولهفة والقلق واضح على ملامحه
اي هسه دقايق ..
راح الها واني طلعت من الغرفة ..
بالي مشغول صلاح تأخر ، جان مأذن المغرب رحت توضيت وصليت ، قريت سورة مريم فوائدها للمراة الحامل عظيمة ...
وبعدها بديت شغل البيت ..
..................
شهد...
مدري شبيه مختنكه حتئ الطفله ما حابتها انوب بس واحد يحجي وياي اكب بوجهه اريد بس اعارك صايره حييل وكحه
حتئ الطفل الي ببطني عاركته وسبيته وهو شنو ذنبه...
اخذني جعفر فراني شويه وبعدها اخذني وكلني موطه شويه جان الجو بارد طحت بيها شمرتها
هو كال...طاح حضج كوون ليش شمرتيها
رديت عليه بملل...بارده ما اكدر اكلها
جر نفس كال...لو مخليتها محتره ومايعه جان صارت عصير بس انتي مرة مبذره احتمال اطكج بمره لان ما احب المره التبذر
باوعتله بقهر...ممكن تسكت ترئ،روحي طالعه
رد عليه...سكتت اكراما للسحر المركوعه بي اله لو صاحيه وكايلتلي هييج هسه اطلع الطفل من خشمج وخشم الخلفج
بلعت ريك بحسره...جعفر صدكني حييل مخنوكه...
مسح علئ لحيته كال...لا تخافين اخابر جاسر وياخذنه الصديقه الرجعاني الاصلي من وجهه الطاوة طكتني بسحر خلتني اشوفها هيفاء وهبي بدل وجهه الطاوه
هزيت ايدي بعصبية...اهوووو هم جاسر يمعود هذا من اشوفه حتئ الجني يطير مني
رد عليه...اي والله اخوووي راعب حتئ جني نويله خخخخخخخ
تنهدت بضيق...شهل ضحكه
رد بقهر...ضحكه مال سكارئ يعني شلون لا تخلونه نشرب ولا تخلونه نصير عفطيه ونضحك ضحك السكارئ
واردف بغضب...هسه حتئ الي يحبله وحده وتتزوج وتعوفه ينراد اله شويه شويه ينساها اول مره يتذكر ماضيها وانوب سوالفها وانوب كلش ينساها هسه اني نفس الحاله شويه شويه جاي انسئ بطل العرك ضلت بس ذكرياته
همست...ما تصيرلك جاره
وصلنه للبيت هو شاف بزونتي سمنانه وصايره حلوه تجنن وكبرانه
كال باستغراب...هاي الفرعونيه شسمنها صايره حلوه بس لا تشرب ابو الطلقه
رديت عليه واني اهز بروحي...لا عيني تزوجت واحد مدللها دلال ويحبها ويباوع الحلكها
هز ايده ...عشتو واكيد رجلها برلماني،ويكرف كرف متعدله نافخه البراطم وسمنانه وبيضه صايره ونضيفه احسها تقلد وجهه الطاوه
جاوبته بقرف...وييع لا تجيب طاريها
عفته ودخلت جوه وهو يباوع للبزونها كلها ....نويله شكد عدلت بروحها ما حبيتها وانتي ما احبج لو تصيرين الاميره ديانا...
......................
وقار...
تحت تاثير نومي وحلمي المفزووع شفته واكف بباب بيتنه وهو لابس دشداشه لونها جوزي ولابس عباته السوده وبيها خط ذهبي وعكاله وجفيته ولازم سبحته و واكف بباب بيت اهلي بجبروت وهيبه والغضب مبين من عيونه الحاده...
ابتسمت بفرحه ولهفه من شفته...باااابا حبيبي بابا
حضنته بفرح وهو بادلني الحضن بس جان بين الانزعاج علئ ملامحه
لزمت ايده وبستها كتله بفرحه عارمه...بابا انت ما متت انت مو كتلك عاصم
رد عليه بجمود وملامحه تبين حقده علئ هل بيت كال...لا بويه يا وقار انا عايش وجاي اخذ جولييت وياي
فتحت عيوني مصدومه ومدهووشه من كلامه...شنوو ليش يابه ليش تاخذها...
رد عليه وملامحه القاسيه تنطق بقسوه ...انتم كلكم ضلمتوها وهي ما الها مكان وياكم اني جاي اخذها مو مهيوب الي تنذل طفله ببيته وتنعمي وانتم ساكتين
جر نفس ونزل عيونه السبحته واخذ منها تلث خرزات كال...اخوووج جاسر كليله ابووك بنه بيت الجوليت بصفه ويريد يجي ياخذها وعيونه تشوف
وكليله اذا بعد ضلمت جولييت اخذها واحرمك منها انه متعبتني جووليت ما اكدر انام وهل بنيه انضلمت ببيتي ...
بلعت ريكي وهو سحب ايده مني ومشه جان الجو مغرب والشمس غايبه وابووي غاب مثل الشمس
فتحت عيوني مفزوعه من الحلم وحطيت ايدي علئ صدري باوعت الموبايلي حياذن الصبح...
وفعلا شووويه واذن...
طلعت توضيت وهو شفته طلع من غرفتها دخلت جوه ما حسسته بوجودي
صليت وكملت وشويه كشف الجوو
شفته طلع الشغله طلعت وراه كتله..وصباح الخير هو دار وجهه عليه ورد عليه بتنهيده...هلا صباح النور
لزمت ايده واخذته للحديقه كتله بحزن ...جاسر عندي موضوع وياك ؟
رد عليه ...شنوو احجي بسرعه مستعجل
بلعت ريكي وتنهدت نزلت راسي وسرعان ما رفعته..اءءء هذا تحلمت بابوي زعلان منك ؟
عقد حواجبه بقلق وارتباك كال...لييش زعلان مني ؟
سولفت اله الحلم وهو تخبل وكل شويه وتحدت ملامحه ويحتقن وجهه...
ابتعد شويه وضل يخابر وبعدها شفته طول بالاتصال بس ما عرفت ويه منو جان يمشي بالحديقه ويخابر
وبعدها دنك وهو يلتقط فد شئ من الارض قفل الخط وتقرب مني وهو لازم حلقه كال بغضب...هاي منو شامرها هنا
باوعت الها كلها طيين بس جانت جديده اني قبل يومين شوفتها اليه جولييت وخليتها بجنطه
كتله...يمكن الجهال شمروها
هو قبض عليها بحده وكال بوعيد...لاااا مو الجهال هاي جولييت
مسحها وخلاها بجيبه كال...باعي اني راح اروح للنجف ازور ابوي اذا اتاخرت لا ينشغل بالكم...
لزمت ايده بتوسل...فدوووه جاسر خليني اروح وياك صار كومه ما زرت ابويه
تنهد بضيق...لا حاب اضل الوحدي للنجف....
خله وطلع واني دخلت جوه انذكرت ابوووي حييل انقهرت والدموع تجمعت بعيوني بجيت بصوت حزين ومسحت الدموع بيدي المعاقه...
كعدت جولي صلت سالت عن جاسر لان اتاخر كلتلها راح للنجف وهي سكتت ما حجت شئ...
شويه واجت خالتي صبريه وعرفت بشام رجعت وعرفت بطلبها وهو طلاق جولي
كالت بغضب...انه بنيتي جكليته عندي حتئ لو غلطانه ما اقبل واحد يحجي عليه انه عنصريه واليحجي يطبه حريشي،
انوب جاك من تالي عكبك تتشرط عليه جااا واذا ما طلك شني قلة زلم يطلكها منا وانا ازوجها منا
وفريختها اخليهم فلاليح عندي اكبرهم وازوجهم وازفهم علئ كنوش
ضحكت كلتلها...صدك خاله شكد عمر كنوش
جرت نفس...والله يا يمه ما ادري بس هو بكد جابر عمره بالتلاثين صاروا سوه هو وجابر
اتذكرت جابر وجريت نفس حزين
خابرت علئ جاسر كال بعدني بالنجف...
شويه واندك الباب راح رضاوي فتحه واجه يركض كال...اددت هاي التحلط علئ امي وتبوت ببابا ...« اجت هاي التغلط علئ امي وتبوس بابا »
شويه وشام توسطت البيت كالت...وينو جاسر ابو غزل...
ابتسمت بحيره...هااا راح للنجف
كالت...عطيني رقموا
اني ما قبلت بس امي رضيه كالت انطي انطيته الها وهي كتبته واتصلت اول ما رد عليها جاوبته بنحيب مفجع...جااااسر انت عند غزل مو هييك ؟
واردفت بعد ما جاوبها...لا تجي خلييك هوونيك انا جايه لعند انا جايه علئ النجف بدي زور قبر بنتي المضلومه...ونتفاهم علئ كل شئ وان شاء الله خير
نهاية البارت ...يتبع
كونوا انتم كونوا بخير....احبكم 💔
نور سمو العراق...😘
لا تنسوا التصويت و المشاركه 🌹
بارت طووويل اطول من الحرب العالميه الثالثه مدري الثانيه يستاهل التصويت مو لو مو مو....
بنات يمكن هسه متحبون شام عادي بس بمرور الوقت ان شاء الله تحبوها البارحه رجعت قريت البارت الاول شفتكم تكرهون جولييت وهسه تحبوها 😁😁😁😁 لذلك يعني اكيد اول ما يظهر شخص بالقصه تكرهوا...حتئ كاتبين ما حبينا البطله وهسه تعاركون لخاطرها 😍
خطيه طلحه يصمم صور وتالي يتعرض التهديد 😁
شكد احب هل بنوته كد ما تعليقاتها تجنن ومثقفه ...😍😍😍😍😍😍 ترئ العراقيين ورده مال الله ترئ بس هم شويه دمهم حامي 😁😁😁😁
الاغنيه حلوه 💔