#الاسكريبت_كامل ❤️
(من يعشق بالقلب فعشقه باقي للممات)
ليه كل مره بشوفه فيها بقع في حبه من اول وجديد
سنتين من اخر مره شوفته فيها وقولت خلاص اكيد نسيته ومش فاكراه وانتهي من حياتي ومبقاش ليه وجود اصلا..... بس النهارده اكتشفت ان الحقيقه غير كده
لمحته بس من بعيد كل حاجه فيا اتلخبطت اتهزيت من جوايا ليه كده سيطر علي تفكيري طير النوم من عيني تاني ليه... وقعت في حبه تاني
ليه يا قلبي بتعمل فيا كده.. هو عاش حياته وارتبط وانت مش عارف تتخطاه ليه وتنساه وترميه بره حياتك ليه؟؟؟!!!!
__ ايه يا بنتي روحتي فين كل ده سرحان وتفكير
__ ايه بتقولي حاجه
__ لا مبقولش انا بهاتي مع نفسي من الصبح كملي نوم انا قايمه ماشيه انا ايه الي جابني ليكي اصلا
__ طب قومي غوري من وشي مش نقصاكي اصلا
__ عندي ليكي خبر بمليون جنيه
__ عرفااه
__ عرفتي ايه
__ محمد رجع من السفر شوفته النهارده الصبح
__ علشان كده حالك مقلوب شوفتيه فين واتكلمتي معاه لا احكي بالتفصيل وم الاول
__ مفيش تفاصيل انا شوفته في اول الشارع لفيت ورجعت عالبيت تاني بسكدا
__ اذا كنت انا جارته ولسه مشوفتوش
__ هو جاي يتجوز مش كدا
__ تقريبا كده دا خاطب البت الملزقه دي بقاله سنتين اكيد جاي يتجوز.... خوخه هو انتي لسه
__ لسه اي انتي كمان انتي عارفه انها حكايه قديمه وخلصت وهو هيتجوز وانا كان المفروض زماني متجوزه بس انا الي فشكلت الخطوبه يلا بقي قومي شوفي انتي رايحه فين....
مر يومان ولم اقابله لم المحه لم اتشرب تفاصيله التي اعشقها نعم اعشقها ايقنت ان هذه هي الحقيقه الوحيده في حياتي مهما انكرتها
في اليوم الثالث كنت خارجه من باب العماره تفاجأت به امامي ارتبكت توقفت قدماي عن التحرك مثل قلبي الذي توقف عن النبض تثبتت نظراتي علي عينيه التي تأسرني
ظلت هكذا لمده دقيقتين الي ان بادر هو بالحديث
__ خلود اذيك عامله ايه
قالها ومد يده بالسلام وضعت يدي في يده وما ان لمسته وكأن صاعق كهربائي ضربني لم استطع سحب يدي ولا الرد ولا تمالك نفسي امامه وهو ايضا احتفظ بيدي داخل يده اطول فتره ممكنه وكان الوضع راق له انتبهت علي نفسي وسحبت يدي وابتعدت قليلا
__ انا الحمد لله تمام حمدلله علي السلامه
__ الله يسلمك، اخبارك ايه تمام
__ ااه تمام عن اذنك
__ طب استني مامتك فوق
__ ااه فوق
( كنت لسه همشي لقيته بيندهلي باكتر اسم بحبه منه هو وبس معرفش كان قاصد يقوله ولا جه معاه بالصدفه بحكم التعود انه كان بيناديلي بيه علطول بس حسيت ان دقيقه كمان وهعيط مش هسيطر علي نفسي اكتر من كده)
_ خوخه
_ ها
_ مبسوط اني شوفتك واطمنت عليكي
وبعديها جريت من قدامه قلبي مكنش هيستحمل اكتر من كده معقوله للدرجادي بعشقه عقلي كان بيوهمني اني نسيته بس الحقيقه انا كنت مستنياه
بس ايه الفايده وهو مش ليا.. بس عنيه لسه بتلمع لما بتشوفني نبره صوته كانه عايز يقول كلام كتير بس مش طالع..
او يمكن بيتعامل عادي وانا الي فسرت كل ده علي هوي قلبي... حقيقي مش عارفه
قعدت طول النهار الف وافكر وموصلتش لحاجه
رجعت بيتنا مسكت الفون ونزلت استوري ( مكانك في قلبي)
وبعد شويه لقيته منزل ستوري مقدرتش اقاوم وفتحته برغم انه مفتحش الستوري بتاعتي
وكانت مقطع من اغنيه تامر نفس النهايه ( حياتي ملاها عذاب قضي عليا خد مني الي عايزه وساب وجع فيا وماسبش اي باب رجوع ليا مهما عدي من حياتي مش هصفي ليه)
كنت عارفه انه يقصدني انا بالستوري دي... وكانه بيقولي خلاص افقدي الامل انتي عذبتيني ووجعتيني
طب ما انا كمان اتوجعت...
عدي اسبوع كمان ومشوفتوش ولا حتي لمحته بطلت اكل بطلت اشرب بطلت اخرج حياتي وقفت عقلي مبقاش يعمل حاجه في حياته غير التفكير فيه مكنتش اعرف ان كل ده هيحصلي لما اشوفه تاني كل ذكرياتي معاه هاجمتني بقوه نظراته ليا ولمعه عيونه الي عمري ما انساها اول مره قالي بحبك كلامنا هزارنا حتي خناقتنا الي كانت مبتنتهيش بس عمره ما سابني انام زعلانه
جرس الباب رن وقلبي دق في نفس الوقت عرفت ان هو جريت ملهوفه زي العيل الصغير الي مستني يشوف باباه طلعت لقيته دخل و قعد مع ماما واخويا وانا طالعه اجري زي الهبله بالبيجامه واللكلوك بصلي وكتم ضحكته بالعافيه وانا منطقتش ومن الكسوف دخلت جري تاني علي اوضتي قلبي كان هيخرج من مكانه اخيرا شوفت ضحكته تاني حتي لو كان بيضحك عليا مش مشكله
نظرته ليا الي مليانه حب متغيرتش ولا عمرها هتتغير ...
بعد ما مشي عرفت انه كان جاي يبلغهم بمعاد كتب كتابه وفرحه الي بعد اسبوعين وكان عايز ماما تكون معاه لانه بيعتبرها مامته واخويا طبعا لانه صاحبه...
قلبي اتقبض واتخنقت حسيت ان الموت اهون من الالم الي حسيت بيه في اللحظه دي
حسيت انه ملكي انا بس مينفعش يكون لحد تاني.. قلبه وحبه ومشاعره كل دول ليا انا بس.. ده حب عمري ازاي هيتجوز حد تاني..
بعديها بكام يوم وعلشان ماما تخرجني من حاله الاكتئاب الي انا كنت فيها والي متعرفش اي هيا سببها اخدتني غصب عني وروحنا بيتهم لاخته تشوفها محتاجه حاجه
روحت معاها وقلبي حرفيا بيتقطع وصلنا وحسيت ان الكل بيبصلي نظرات شفقه وكاني صعبانه عليهم مع ان مكنش حد يعرف الي بيني وبينه غير انا وهو ومنه صحبتي بس لكن قدام الكل احنا اخوات وجيران ومتربيين سوا...
اتخنقت اكتر من اجواء الفرح الي حواليا والغنا والرقص استغليت انشغال ماما مع الناس ورجلي خدتني طلعت فوق شقته الي هيتجوز فيها الي ياما حلمنا وخططنا انا وهو هنرتبها ازاي وهنعمل فيها ايه لقيت الباب مفتوح دخلت لقيت كل حاجه كنت انا عايزاها هو عملها الالوان الديكورات حتي زوق الفرش نفس الي كنت بوصفهوله بالظبط فضلت ادخل من اوضه للتانيه وانا دموعي مش راضيه تقف ومش عارفه اسيطر عليها لحد ما وصلت اوضه النوم لقيت علي التسريحه ساعه كنت جيباهاله هديه مسكتها سمعت حد ورايا بيقفل الباب بصيت لقيته هو..
__ عجبتك الشقه
__ جميله ربنا يسعدك بعد ازنك لازم امشي
مشيت خطوتين كنت لسه هفتح الباب نده عليه
__ ساعتي
__ مالها
__ عايزها انتي واخداها ليه
__ اعتقد بقت قديمه وملهاش لازمه عندك انت جبت غيرها جديده
__ مش انتي الي تقرري ان ملهاش لازمه
__ لسه محتفظ بيها ليها
__ انا مبفرطش في حاجه تخصني وغاليه عندي مش زي ناس
__ ناس مين انا... انت بجد جاي تعاتبني دلوقتي مش انت الي سبتني وسافرت قولتلك ما تسافرش مسمعتش كلامي...
__ كان لازم اسافر اكون نفسي وانتي قولتي هتستني لكن بعد كام شهر يجيلي خبر انك اتخطبتي اتصل عليكي موبايلك مقفول...... بلاش نفتح في القديم
واداني ضهره وانا بدات دموعي تنزل اكتر وحسيت اني عايزه اطلع كل الي جوايا مبقتش قادره استحمل
قعدت علي الكرسي الي ورايا لان شويه وكنت هنهار فعلا وبدات اتكلم
__ بعد ما انت مشيت عشت ايامي كلها عذاب ضعفت قوي من بعدك وجودك معايا كان هو الي مقويني فعلا بقيت حياتي ملهاش قيمه ولا طعم ولا حاسه بحاجه
في يوم كنت قاعده في اوضتي ماسكه صورك وحاجتك والكراسه الي انت كنت بتكتبلي فيها كنت في دنيا تانيه دخل عليا بابا محستش بيه غير وهو بياخد الكراسه والصور من ايدي وبيضربني واخد مني التليفون امي واخويا كانوا هيتجننوا ويعرفوا في ايه لكن بابا ما اتكلمش بس عاقبني اسوأ عقوبه اول عريس اتقدملي وافق عليه وانا رفضت بس حطني قدام الامر الواقع
وزي ما انت عارف بابا كان تعبان في اخر ايامه وكان ممنوع من الزعل والانفعال مقدرتش اقول حاجه غصب عني سكت اتخطبت بس بعد وفاه بابا الله يرحمه فركشت الخطوبه بس طبعا كنت انت خطبت في الفتره دي وحاولت اتاقلم ركزت في الدراسه حطيت همي فيها وعشت واوهمت نفسي اني نسيت بس.. بس..
سكت واتخنقت مقدرتش انطق
اتكلم هو بلهفه ووجع
__ بس ايه كملي.... ولا اكمل انا احكيلك عن المر والعذاب الي انا شوفته في الغربه غربتي مكنتش سفر غربتي كانت انتي بعدي عنك عن وطني عن حياتي الي كانت متلخصه فيكي وبس..
لما عرفت انك اتخطبتي كنت هتجنن لدرجه اني كنت هسيب شغلي وكل حاجه وانزل بس معرفتش اجيب جوازي من الكفيل في وقتها علشان كان عليا فلوس ليه ومش هعرف اطلع من البلد غير لما اسددها مكنش قدامي حل غير اني اشتغل ليل نهار بدات اكبر في شغلي بس مكنتش بحس باي طعم لاي حاجه ولا اي نجاح
كله كان بالنسبالي عادي امي واختي لما بعتولي صوره العروسه مكنش فارق معايا حلوه ولا وحشه ولا اي حاجه هما كانوا عايزين يفرحوا ويخطبولي فوافقت زي ما انتي اتخطبتي معرفش يمكن وافقت علشان ارد علي الي انتي عملتي فيا... عدي سنه وعرفت انك فركشتي خطوبتك.. بصراحه فكرت انا كمان وخصوصا ان طول الفتره دي محبتهاش بس هيا اتعلقت بيا جامد وعلشان انا راجل مينفعش اعلق بنات الناس وبعدين اسيبهم...
خلص كلام وسكت وانا كمان سكتت كنت عارفه انه اتعذب واتوجع وكنت عارفه انه بيحبني بس الظاهر النصيب كده بس انا مش قادره حاسه اني عايزه اقوله اني بحبه ولو لاخر مره لان بعد كده مش هقدر ولا هلاقي فرصه زي دي تاني..
وقفت قصاده وقولتله
__ محمد انا لو اتاسفتلك عارفه ان اسفي مش هيبقاله قيمه بس عايزه اعرف حاجه واحده
__ عايزه تعرفي انا لسه بحبك ولا لأ مش كده
__ لسه بتفهمني من قبل ما اتكلم.. انا لسه كتاب مفتوح قدامك
__ وانا متاكد مليون في الميه انك عارفه الاجابه بس وحشك انك تسمعيها مني صح
_ لا مش صح
قرب من شويه وبص في عيني وقالي بنبره عمري ما هنساها
__ عمري ما بطلت احبك ولا هبطل انا بحبك... حبك ده الحقيقه الثابته الي في حياتي الي عمرها ما هتتغير... بحبك ومفيش غيرك في قلبي...
__ بس دا مينفعش حتي لو لسه بنحب بعض مبقاش ينفع ملناش نصيب
__ يعني انتي لسه بتحبيني
__ انا ماشيه اتاخرت قووي
وومعرفش جريت ازاي من قدامه طلعت من عنده روحت علطول مستنيتش ماما قفلت علي نفسي في اوضتي.. معرفش ةنت حاسه بايه جوايا مشاعر كتير متلخبطه فرحانه وموجوعه وزعلانه ومخنوقه بس لسه صوته ببرن في ودني وهو بيقولي بحبك قد ايه كان نفسي اسمعه منه كان نفسي الزمن يقف بيا في اللحظه دي... مش عايزه الوجع الي بعدها.. بس في شيء جوايا بيقولي انه هو نصيبي وليا انا وبس ومش هيكون لغيري...
عدي اسبوع ومعاد فرحه قرب قوي كلها كام يوم ويتجوز
وفي وسط افكاري لقيت منه صحبتي فوق راسي
__ ايه يا بنتي انتي خلاص مبقتيش تخرجي من اوضتك
__ في باب علي فكره الناس بتخبط عليه.. وبعدين اخرج ما اخرجش ملكيش دعوه وانتي بالذات مش طيقاكي
__ انا ديما حظي كده معاكي مع اني جيبالك حته خبر انما ايه
__ قولي يا اختي لما انشوف
__ محمد سافر
__ نعععععم سافر ايه انتي هبله وفرحه
__ يا بت انا كنت هناك ولسه جايه عليكي علطول انتي عارفه انا راشقه هناك اليومين دول بحب جو الافراح وكده وكمان صحابه ايه مزز...
__ مزز ايه ده انا هطلع روحك انطقي يا بت سافر ازاي
__ طب اهدي بس يا شبح عليا هحكيلك.. صاحب الشغل كلمه انتي عارفه انه هو الي ماسك حسابات الشركه كلها وكده والمحاسب الي سابه مكانه لخبطله شغل بملايين وعلشان هو مصري زيه ومحمد الي جايبه صاحب الشغل قاله انت المسؤل قدامي يا اما هعتبرك شريكه وانكوا عايزين تسرقوني... وحوار كبير قوي مكنش قدام محمد حل غير انه يحجز وفي نص ساعه كان في الجو
__ طب والفرح
__ كلم ابو العروسه وقاله هاجي قبل الفرح بيوم بس طبعا ابو العروسه اعترض ازاي تمشي قبل الفرح بس محمد ما اهتمش ورجع..
__ طب وهو كده هينضر في شغله ولا ايه
__ لا محمد بيقول وهو ماشي انه هيظبط كل حاجه ومفيش عليه ضرر ان شاء الله
__ يااارب ربنا يصلحله الحال
************
عدي كام يوم وكان فاضل علي الفرح يوم واحد ولسه محمد مجاش لان الامور اتازمت معاه هناك وكانت عايزه وقت علشان تتحل و عرفت من منه انه كلم ابو العروسه وكان عايز يأجل الفرح طبعا ابو العروسه موافقش علشان الفرح والتجهيزات والمعازيم وكده احرجه قدام الناس فقرر ان يلغي الفرح خالص......
قلقي علي محمد كان بيزيد يوم عن التاني كتير حاولت اكلمه بس مكنش بيفتح نت خالص اختفي وكنت بخلي منه تسالي عليه بس بردوا بتقولي كلام مبيرضيش فضولي ولا قلبي هو كويس... لا انا حاسه انه في ازمه مش كويس في مشكله كبيره.. انا عايزه اكون جنبه في ازمته حاسه انه محتاجلي انا بحلم بيه كل يوم
لساني مبيبطلش دعا ليه ربنا يطمني عليه ويرجعهولي بالسلامه اشوفه بس واطمن عليه ومش عايزه حاجه تاني حتي لو هيرجع لعروسته
شهر تلاتين يوم عدوا عليا كانهم تلاتين سنه واخيرا شوفته فاتح نت العلامه الخضره رشقت في قلبي
وقفت علي المحادثه متردده ادخل اكلمه ولا لأ طب هقوله ايه... لا خلاص مش هكلمه هو طالما فاتح نت يبقي كويس، بس انا عايزه اطمن عليه
حسمت ترددي وخلاص هبعتله لقيته قفل تاني..
قومت صليت ودعيت كتير لحد ما نمت وانا قاعده علي السجاده صحيت علي صوت ماما وهيا بتناديني
__ انتي ايه الي نيمك كده قومي بسرعه غيري هدومك وتعالي
__ اغير هدومي ليه يا ماما في ايه
__ قومي بس في ضيف بره عايز يقابلك
__ ضيف مين واحده من صاحبي يعني
__ ايوه قومي بقي
__ انتي بتشتغلني يا ماما هما صحابي هيقعدوا بره ليه دول بلاقيهم فوق دماغي علطول
__ بت بطلي غلبه البسي وتعالي ورايا
__ ايه الام الشريره دي
__ بت بتقولي حاجه
__ لا دقيقه وجايه وراكي يا ست الكل
دخلت اوضه الصالون لقيت محمد في وشي ايه ده هو في ايه هو هنا بجد ولا انا بيتهيالي طب ازاي وجه امتي افكاري خادتني وتنحت قدامه مفوقتش غير علي صوت ضحكته وهو بيقول
__ ايه يا بنتي واقفه كده ليه بقالك ساعه تعالي اقعدي ده زي بيتكوا بردوا
__ انت جيت هنا ازاي وامتي هو في ايه
__ انا جيت امبارح وجاي اسلم عليكوا بس
__ انت كويس
__ ااه كويس جدا تمام قووي دلوقتي بصراحه
__ امال ايه الي انا سمعته ده والمشاكل الي حصلت معاك
__ ااه الحمد لله عدت علي خير المهم اني خلصت مشاكلي وجيت علشان اشوف نفسي واتجوز بقي
__ ااه روحت لخطيبتك حددتوا معاد تاني للفرح
__ لا ما خلاص بقي مفيش نصيب كل حاجه انتهت خلاص
__ امال جواز ايه الي انت راجع علشانه
__ الله جرا ايه يا خوخه بلاش اتجوز في عروسه تانيه هروح اشوفها النهارده حتي اخوكي جاي معايا
__ نععععم
__ بالظبط هو ده الي هيحصل ايه عندك عروسه ليا
واكنسل العروسه دي
__ لا معنديش عن أذنك
دخلت اوضتي وانا ناار قايده البيه عايز يتجوز واحده تانيه ما صدقت خلصت من واحده تطلعلي واحده مااشي يا محمد انا هخليها جوازه سودا علي دماغك ماااشي
وست منه ساعه ما اعوزها تختفي... ااه يا ناااري منكوا هتشل
عدي اليوم وبعد العشا كنت قاعده مع ماما في الصاله لقيت اخويا داخل هو ومحمد
ايه ده هو في ايه هو رجله خدت علي بيتنا ليه كده
دخلوا وقعدوا وماما رحبت بيهم جدا وبعد شويه ماما دخلت واخويا كمان انا حتي ملاحظتش ان هما مشيوا كان كل تركيزي مع الاستاذ الي راجع مبسوط اكيد شاف العروسه وعجبته
__ انت مبسوط كده ليه للدرجادي العروسه عجبتك
__ ههههههه هيا عجباني من زمان اصلا
__ من زمان ليه وانت كنت تعرفها
__ طبعا اعرفها من واحنا صغيرين
__ مين دي بقي
لقيته قرب مني وجه قعد جنبي
__ ايه في ايه
طلع حاجه من جيبه وفجأه مسك ايدي ولبسني خاتم
وباس ايدي جامد مكنش عايز يسيبها ولا يشيل شفايفه من عليها
مستوعبتش الي بيحصل هو ده بجد دموعي نزلت مني وقلبي كان بيتنطط من فرحته احساس العوض الي بعد سنين غربه وتعب وعذاب الحلم الي عشت عمري بحلمه وشوفته بيتحقق قدامي كنت حاسه اني لمست النجوم بايديا عشت احلم باللحظه دي واتخيلتها كتير بس طلعت اجمل مما تخيلت بمراحل
رفع راسه وفضل ماسك ايدي جامد ومسحلي دموعي وهو كمان حسيته لحظه كمان وهيعيط معايا
__ كفايه دموع يا حبيبي خلاص انا من دلوقتي مش عايز اشوف غير ضحكتك وبس،، انا بحبك
__ وانا كمان قووووي
__ هههههههه استني لما اخدلك صوره وانتي كده ووشك احمر في بعضه من العياط
__ صوره ايه وسع كده وبعدين تعالي هنا انت بتشتغلني من الصبح وتقولي عروسه وبتاع وكمان مسالتنيش موافقه ولا لأ لبستني الخاتم علطول وانا بهدوم البيت كمان... لا يا عم مش لاعب انت تعيد من الاول تاني مش يمكن موافقش
__ نعم يا اختي متوافقيش بعد كل ده ده انا جيت الصبح من المطار عليكي وبقالي شهر منمتش عايز اخلص كل حاجه واجيلك وقبلهم معذباني بقالك سنتين
__ في ايه يا عم انت قلبت ليه كده ما كنا ماشيين كويس الله.... عايزه اعمل فوتسيشن انا
__ احلي فوتسيشن لاحلي عروسه هعملك كل الي نفسك فيه والي بتحلمي بيه.. بقولك ايه مش انتي خطيبتي دلوقتي
__ لا خطيبتك ازاي هو انت جيت خطبتني من ماما واخويا
__ ايوه طبعا خطبتك منهم امال سيبنا قاعدين لوحدنا ليه يا اذكي اخواتك
__ انا عارفه بقي امال محدش قالي ليه
__ علشان انا كلمتهم من قبل ما اجي واتفقت معاهم علي كل حاجه وقولتلهم ميعرفوكيش حاجه..
__ اااه وانا اخر من يعلم يعني طب قوم روح يا محمد الجوازه دي باظت خلاص
__ باظت مين دا انا اصور قتيل هنا... وانا مش ماشي غير لما اخد حضن من خطيبتي
__ نعم لا دا عند امه يا ادهم
__ يخربيتك الظاهر انك عايزه تتربي من اول وجديد...
__ والله ما حد عايز تربيه غيرك حضن ايه الي انت عايزه
__ ما تعلي صوتك كمان شويه اندهي لامك واخوكي خليهم يجوا يشاركونا اللحظه.... خلاص مش عايز من خلقتك حاجه دا انتي بت فصيله.. كلها كام يوم اصلا واخد الي انا عايزه
__ ليه هيحصل ايه بعد كام يوم.
__ هنتجوز
__ نتتت.. ايه
__ نتجوز يا قلبي ما انا مش هستني انسي
__ لا طبعا مش اقل من ست شهور استعد فيهم
__ لا سبيني انا بقي المرادي اقولك انا لا دا عند امه يا ادهم.... وبعدين انا مباخدش رايك بعرفك بس..
*********************''
بعديها باسبوعين كان فرحنا ازاي بقي معرفش هو كان مرتب كل حاجه ومجهز كل حاجه انا ممكن احتاجها وعايزاها محبتش اكسر فرحته واجل تاني كفايه تاجيل بقي واخيرا هيجمعنا بيت واحد...
كتبتنا الكتاب في القاعه خدني من ايدي بعد ما سلمنا علي اهلنا وقرايبنا وطلعنا بره خالص وقال للناس رايحين نكمل الفوتسيشن واحنا كنا خلصنا كل حاجه اصلا وصلنا لمكان هادي ومنعزل شويه عن الناس واضائته هاديه شدني عليه مره واحده وحضني لا ده كان جنه من حضن كان حياه تانيه احتواء روحين اتجمعوا وبقوا روح واحده كان معناه واحساسه ميتوصفش
حضني قوووي واحتواني واخيرا اتكلم
__ انا عشت عمري كله احلم بالحضن ده.. واخيرا حبيبتي في حضني
__ انا بحبك.. بحبك قووي
__ حبي ليكي ملوش وصف ولا كلام الدنيا كله يكفي خليكي في حضني بس وانتي هتحسي بكل حاجه ❤️
#بقلمي_ايمان_العطار
*****'**************************
يااارب يعجبكوا 🙈😍😍🥰 الي يقرا يسيبلي كومنت حلو ❤️🙈