جذبني فمك البني

البارت السادس

عندي احساس راح انساك
بس احساس مو اكثر
ابادر بالهجر والكاك بعدك بالكلب تكبر
معيشني ويه شخصيتين الاريده وكافي ماريده
لان ادري اليحب خسران بس هم ادري مو بيده
اكول ايام وتعدي وارجع من جديد ابدي
تصير بخانة النسيان وارجع وانكلب ضدي

____________

الدكتور : اعتقد اليوم كافي سمعت  الأريده وانتي هم تعبتي اريدج ترتاحين يومين يلا ترجعيلي علمود تستعيدين نشاطج ...

مدلي كلينس اخذته منه مسحت دموعي ومكدرت احجي وياه ولا كلمة بس كتله شكرا واخذت جنطتي وطلعت منهاره احس ألم قوي بكلبي ومعدتي تكلب ..

نزلت اترنح ماعرف شبيه هالمرة الفضفضه كانت ثقيله على قلبي مرات البوح يكون اصعب من السكوت والاثنين قاتلات بالنسبه اليه ، يكفي ملامح الطبيب وعيونه تلوم بيه من وصلت للفقره التخص ادهم ...

وصلت يم سيارتي التقط انفاسي بصعوبه مرات اكول اني ابالغ بردات فعلي بس لا الصارلي هواي ويستحق مني المبالغه ...

فركت وجهي بحركه قلقه جنت عصبيه عبالك توني طالعه من عركه صعدت بالسيارة شغلتها بيها بانزين قليل ، شلون بالحظ من تلتم تلتم ،

درت الراديوا اريد قناة اسمعها علمود التهي انسى كل شويه يطلع شي و ميعجبني انسطرت طفيته ،

وصلت للمحطة عبيت بانزين ورجعت  للبيت صفيت السياره ونزلت الشارع فارغ الناس كلها ببيوتها لان الجو بارد ودنيا بدت تغورب نزلت بوجهي للشقه فتحت الباب وفتت علكت الضوه دست على شي جوة رجلي باوعت ورقه شلتها مكتوب بيها...

( اذكرج بيوم التجأتيلي جنتي منهاره متوجعة تبجين لان الدنيا ضاقت بيج من وسعها ، تتذكرين شسويت انه وكفت وياج حركت نفسي ورجعتلج ضحكتج ، هسه انه متألم موجوع منهار وينج عني؟؟؟؟
على العموم اتمنى دكتورج يفهمج مثل ما انه فهمتج وجنت اعزف على وترج الحساس ، رحلة علاج طيبه سيلي )

شامرها من جوه الباب لان قريبه جانت كلش لو بس اعرف وينك ارتاح...

كمت ارجف كلبي يدك من صفحه وعقلي يضرب براسي بكل قوه،،،

نبض ركبتي احس بيه يريد يطلع،،

كل حواسي اشتغلت ضدي كلشي كام يأذيني جسمي وعقلي وكلبي كلشي تبره مني ،

كلها تصيح ادهم منريدج الج ، كعدت بالكاع اضرب على كلبي بكل قوتي اريده يوكف ميدك تعبني يرجع عقلي يلوم بيه،،

لو ضميري بكل دقيقه يأنبني يذكرني بكل وجع سببته اله  كمت اكتم صرخاتي ماكدر اعيط الناس تسمعني كمت اتمنى اصرخ اتمنى اصيح بصوت كااااافي تعبت كافي بس ما أكدر للأسف حتى الصراخ انحرمت منه ..

كمت وكفت اخذت جنطتي وطلعت بالشارع امشي امشي سريع ماعرف وين اروح ،

ادور عليه بالوجوه بلكت الكاه ، يا شاب الأشوفه اتوسله بعيوني بلكت انت تطلع ادهم ،

المشكلة احسه قريب عليه كل شويه التفت احسه يمشي ورايه لا بصفي اي والله بصفي بس ليش مجاي اشوفك ليش ..

كلمه ليش طلعت بصرخه بحيث الناس الجانت تمشي التفتت عليه وكفوا يباوعون عبالهم مخبله يمكن صدك شكلي يوحي لهذا الشي ...

هذا اليكول خطيه شبيها وذاك يستهزء ويفر بيده ويصيح الله يشافيج ووو هواي حجي كمت امشي سريع واتعداهم وصلت مكان مابيه احد كعدت على الرصيف والألم يدك براسي وكلبي ، كمت الوم بنفسي لو بأمي لو بالوكت المن ألوم المن....

لهناااااك ورجعت لنفس الشعور والاحاسيس الجنت احسها قبل  من طردتنه امي الحنونه وفضلت رجال غريب علينه وخلتنه  بين البيوت ....

كذب الانسان العايش بيئه عوجه ومليئة بأمراض نفسية يطلع انسان سوي احتمال يمثل بس ليوين اكيد لفتره معينه ابسط مثال اني..

امثل القوه والهدوء بدوامي وكدام الناس والكل ماخذ عني نظره انسانة راقية هادئه تصرفاتي موزونه بس اني لا هذا تمثيل كله جذب اني محطمه اني صح قويت بيوم من الايام بفضل انسان وكفلي وساندني بس قويت لأجل غايه معينه وتالي تبخرت ....

كاعد اشوف نفسي دارجع لنقطه الصفر رجعني ادهم منين ما انتشلني ، بس لا ما ارجع مستحيل لازم اقاوم اي اني لازم اقاوم واوكف على حيلي...

رجعت امشي ورجعت الأفكار ابالي من انطردنه واحقد على ماما أكثر..

وصلت للشقه دخلت وعبالك جنت شايله جبال الدنيا على ظهري كعدت بالكاع ارتاجيت على القنفه راسي ثكيييييييل مليان هموم لو يصير ابدله جان بدلته وخلصت ،

مددت بمكاني وقرفصت حضنت نفسي ونمت مهتميت باردة لو بدون فراش نمت ودموعي تنزل ،

ماعرف شكد مر وقت كعدت متكسره وجسمي يوجعني بس لا ارجع اتمرض مثل ذاك اليوم ،

كمت رحت للحمام نزعت ملابسي وغسلت ايدي و وجهي دخلت للغرفة لبست تراكسود ثخين وجواريب لأن مثلجة وأطرافي لونهن بنفسجي من البرد شوكت يخلص الشتا ابد ما احبه ولا تهويني اجواءه تخنكني ...

سويت بعض التمارين الكال عليها الطبيب ، على اساس تطرد الافكار السلبية وتخليني ريلاكس ، بس بالعكس صرت اتعصب اكثر لهذا عفتها وكمت مددت ،

وين ادهم جان بحجايه ينفض كل تعب مني ، مرات احسه جهاز يسحب مني كل الضوجة والتعب والطاقة السلبية ، شنو أتذكر وشنو أريد انسى حتى انسى ...

بقيت متمدده والصوبه النفطيه كبالي ، الهول اظلم بس ضواها الاحمر يعكس عليه ،

مرات الانسان من يمر بحاله كآبه او بظروف مؤذيه يحس حتى الضوه يحاربه ويأذيه لهذا كمت اكتفي بضوه خفيف لو ما اعلك اصلا ....

حسيت بالجوع كمت سويت لفه اكلتها وجبت غطه من الغرفه تغطيت ونمت على القنفه للصبح ، كعدت ثاني يوم رحت للكلية ، للأسف نازله بيه انذارات هواي وفاصليني ، رحت للعميد حجيتله ظروفي وتوسلت بيه قبل يرجعني للدوام ،

رحت سألت على استضافه للمسائي مقبلوا حاولت وياهم توسلت بيهم يلا قبلوا اعتبروني حالة أستثنائية كلش صعبوها عليه مع العلم اني شايفه هواي طلاب يسوون استضافه من الصباحي للمسائي او العكس ..

المهم صارت ورجعت للدوام الحمدلله، رحت للشركه داومت وبنهايه الدوام رحت للمدير حجيت وياه ...

_ وين اكو هيج شي ما اكدر اطلعج قبل ساعه ١٢..

سيلين: استاذ فدوة لعينك هي شهرين تحملني بيها هذه اخر سنه ترضى تروح عليه .

_ لعد تاخذين شغلج وياج للبيت تكمليه والسبت هم تداومين...

سيلين : ماشي موافقة ..

_ اخذي راحتج ..

اشرلي بيده يعني طلعي ...

سيلين : شكرا جزيلا..

_ اهلا ..

طلعت فرحه بداخلي وشي يكلي شلون راح تلحكين بس اني متعوده على التعب ، واصراري هذا ما اجه من فراغ اصراري اجه من محاضرات ايام وليالي اخذتها منه والأني بيه هسه الفضل كله يعود اله ...

باوعت ساعه ٢ ونص ، حرت ارجع للبيت لو اروح للدكتور ، هو يفتح ساعة ٣ ونص ، مشيت وافكر اروح لو لا اخر شي قررت اروح واخلص ، رحت وانتظرته بالعياده لحد ما اجه شافني وابتسم حجه ويه السكرتيره على المواعيد ودخل لغرفتة ، وره شويه كلتلي ادخلي ...

دكيت الباب ودخلت ، جان يلبس بالصدريه...

سيلين : العفو دكتور انتظر بره خاف بعدك ممتهيأ.

ضحك..
_ شعندي قابل تعاي سيلين كعدي..

رحت كعدت على الكرسي وارتاجيت عليه مددت رجلي كأنما نايمة على سديه دكتور الاسنان .....

اليوم اول مره يشغل موسيقى هادئة ...

همس ..

_ رخي جسمج وغمضي عينج ...

سويت مثل ما طلب مني...

_ هسه تخيلي انتي بمكان كلش حلو كدامج بحر وفوكاج سماء لونها ازرق صافي ، اشجار الليمون والبرتقال قريبة عليج وكاعد تشتمين ريحة قداح، الصوت التسمعيه زقزقه عصافير وصوت تلاطم امواج البحر ...

_تخيلتي لو بعدج حركي راسج بدون متحجين ...

اشرت براسي اي..

_ هسه اجاج من بعيد اعز انسان على كلبج او اكثر انسان كلبج تعلق بيه..

هنا عقدت حاجبي وانفاسي كامت تزيد نبض كلبي تخربط..

_ على كيفج اهدأي اهدأي اخذي نفس عميق وازفريه ...

سويت مثل ما طلب مني بس نفسي يرجف...

_ كرريها اكثر من مره..

كررتها تقريبا سبع مرات حسيت بنفسي ارتاحيت شويه..

_  انتي مشكلتج ويه هذا الانسان التخيلتيه هسه ..

فتحت عيني وباوعتله.

سيلين : شلون عرفت..

_ انتي جنتي هادئه ومن كتلج تخيلي انتي بهيج مكان تخيلتي وانتي مبتسمه مجرد طلبت منج تتخيلين الشخص التحبيه تخربطت احوالج ، نفس ما ذكرنه قصه ادهم اقاربج هذا نفس الشخص الساعدج هو حبيبج صح...

اشرت براسي صح..

_ احجيلي عنه اريد اعرف كل التفاصيل..

سيلين : ما اكدر احجيلك عنه ابد..

_ شلون اعالجج لعد..

سيلين : ماعرف مو لازم احجي..

_ طيب ليش جايتني اذا متريدين تحجين انتي تعرفين طبيعة شغلنه شنو ، احنى نسمع لا نفحص بأجهزه ولا نسوي عمليات ونزيل الألم ، احنى نعالج بالفضفضه واذا شفت حالتج محتاجه علاج اكتبلج...

جريت نفس كلش قوي وهمست..

سيلين : بس اني ما اعرفك شلون افتحلك كلبي..

_ هذا احسن شي بالدنيا انتي متعرفيني..

سيلين : شلون يعني مافهمت..

_ من تحجين ويه انسان غريب ميعرف شي عنج  ما راح يحكم عليج ولا يعرف الماضي مالتج شنو ولا مستقبلج ، مرات الأفضل بالبوح نتجه للغرباء نحجي كلشي مضوجنه وندير وجهنه ونرجع ليش لان ميكدرون يأذونه واصلا وين يشوفونه بعد لهذا طلبت منج تحجين كلشي واعتبريني ما موجود..

ابتسمت بخوف وبعد تفكير طويل حسيت نفسي مستعده احجي حسيت كلامه حفزني وأثر بيه كأنما نبت بسمار بلوح ....

سيلين : راح احجيلك من البدايه حتى متحكم عليه بسرعه ولا تكرهني...

_ اني انسان حالي حالج لا اليه حق احكم عليج ولا ادينج وبعدين ليش اكرهج انتي ما مأذيتني ، يمكن اذيتي انسان عزيز عليج بس الكاعد اشوفه انتي دتعاقبين نفسج وكاعد تجلديها بطريقه مؤذيه واني اتصور هذا الشي عاقبته مو زينه اذا استمريتي بيه..

سيلين : راح اسولفلك بس حايره من وين ابدي...

_ اخر مره توقفنه من والدتج طردتكم وهم حجيتيلي عن ادهم بس متعمقنه ،،،
حتى اكون صريح وياج شويه ضجت من ردج لجميل الرجل الوكفلج وساندج بحياتج بعد ماكانت مثل البيت الخربان ،  بس مع هذا فكرت احتمال الج اسبابج لهذا حاب اسمعها ...

سيلين : هسه ابدي من والدتي لو ادهم..

_ والدتج..

سيلين : هذا الملف من حياتي شكد ما اسده واهجره لازم يصيرلي موقف يذكرني بيه وارجع اتغاضى عسى ولعل اغلس عنه وانساه بس راح احجيلك...

جان عمري ١٧ سنه  جنت صغيره  كل همي اخلص دراستي وانام من وقت بدون مشاكل ...

روتيني اروح للدوام وارجع الكى البيت نفس ماعفته لا فراش مشيول لا جدر على النار اختي العليله ماما شايله ايدها منها معليها بيها تاركتهة عليه ،

للأسف اختي رجعناها للدوام وماكدرت تكمل تتخربط ويخابرونه ويروح خالي يطلعها اخر مره المديره كالت اني ما مسؤوله عنها تروح تموت نقلوها لغير مدرسه ...

ماما اختصرت الموضوع بطلتها وكعدتها بالبيت ،

بعد فتره ماما اشتغلت وصارت بيدها فلوس منين منعرف تطلع ساعه عشره الصبح ترجع ب ١١ بالليل مهدوده من التعب ،،،

تسألني شسويتي ما سويتي وتروح تاكل عشاها اني ضامته الها وتفوت تنام بيوم من الايام اجتي وياها واحد يابه هذا منو هذا بمقام ابوكم ،

يمعوده شدتحجين  اي والله هذا ابوكم ، سكتنه ، كامت تطلع تشتغل وهو يبقى بلبيت سكر وجكاير وقرف كمت اخاف اروح للمدرسه واعوف اختي وحدها وياه،،،

اخر شي ايفين اقترحت تقفل الباب عليها بين ما ارجع وبالفعل كامت تقفل الباب واني اروح وارجع الكاها بغرفتها ،
اخذها اغسللها واغير ملابسها واسويلها اكل تاكل ...

_ عفوا على المقاطعة اختج شكد عمرها وشنو مرضها ..

سيلين : اختي اصغر مني بسنتين ومرضها بكلياتها عدنه وراثه اخواتي ثنين توفوا بنفس المرض بس هاي اختي قاومت مو مثلهن (الله يرحمهن) ، واني مابيه شي الحمدلله..

_ الحمد لله كملي...

جريت نفس عميق واسترسلت ...

سيلين : اروح للهول اشوف زوج امي نايم ميكعد غير العصر ، الليل كله سهر هو وماما والضحك والاصوات المقرفه مالتهم بحيث كرهتني بنفسي وبعيشتي ، متحسب حساب لنفسيتنه ولا تكول بناتي شلون راح يطلعن اذا كبرن ....

مشت الايام بين الخدمة والضرب ، اذا لكت ماعون ما مغسول تضربي اذا البيت عفت بيه ثغره انكتل وضربها بدون رحمه كلبها قاسي مرات احسها تطلع سنين الفقر واللوعه العاشتها ويه بابا  بيه ...

خلصت المدارس نجحت رحت للسادس الاعدادي ، عطله وكعدت المفروض ارتاح اني بالعكس انسكمت سكم ، عراك وصياح وضرب عبالك عدوتها مو بنتها ، بعدين عرفت ليش شدت ويايه ،،،

زوجها كايللها بنتج احله منج وعجبتني لو شايفها قبلج جان تقدمت الها وضل يلوم بيها شلون ضمتني عنه ...

ايفين سامعتهم من اني بالمدرسه ومن رجعت سولفتلي عقلي راد يوكف..

ورة فتره انصدمنه بتصرفها الارعن من عرفنه مسجله البيت بأسم زوجها شلون مندري بس خالي يكول  لعب على عقلها وقشمرها وبهيج صار هو ابو البيت وكلمته المسموعه حتى على ماما تمشي...

وبيوم جنت نايمه وهو يفتر فوك راسي من تبتعد خطواته افتح عيني اشوفه يروح لأختي دنك عليها عبالي راح يخنكها عطت بيه التفت عليه باوع مصدوم وطلع يركض من الغرفه...

ثاني يوم صارت مشكله بينه وبين ماما على بنتج تشك بيه وبنتج متحترمني لو تاخذيهن وتطلعين لو تطرديهن اختاري اني لو هنه وبهيج ماما اكيد تميل لزوجها لان متمسكه بيه بيدها واسنانها ،

_ بناتج ماريدهن هسه يطلعن ليلة وحدة مايباتن هنا ..

اسمعها تتوسل بيه وتكوله..

تمارة : التشوفه اني وياك بس لتعصب...

انقهرت وين جان بابا يحجي وياها بكل أدب وهيه شلون جانت شايله خشمها عليه ونافره عيشته وتحاجيه معلك...

اجتي جنت كاعده يم اختي وحاضنتها تصورت راح تكول معليكم بيه هسه يهدأ واحاجيه او تنهرنه حتى منطول لسانه وياه ولو احنه ممسويها بس هيج فكرت ، انصدمت من كالتلي اخذي اختج وروحوا لعمامج اني تعبت مو حمل مسؤوليتكم ..

هنا اني بجيت متحملت وعطت بيها..

سيلين : لعد ليش خلفتينه اذا انتي مو كدها ليش جبتينه للدنيا ليشششش عذبتينه فهميني مو راح اتخبل ..

تمارة : ماما اني تورطت سجلت البيت بأسمه وبعد ما اكدر احجي اي شي..

سيلين : ليش هذا ورثنه اني واختي شلون هيج تسوين صوج عمامي امنوا بيج وحطوا بيدج فلوس المفروض يسجلوه بأسمنه ليش غلطوا هيج غلط...

تماره : امشي لج انتي وعمامج والقندرة عمامي يلا خابريهم يجون ياخذوكم ...

ركعت الباب وطلعت ...

اني هنا شنو أسوي دكتور انت كلي امي واني من دمها نكرتني وطردتني واني سادس ولازم اكعد اقره واطلع معدل ،

دكتور اني ذكيه لو الظروف بجانبي جان اني هسه زميلتك بالعمل فوكاها تريد تشمر اختي المريضه وتعرف كلش زين يرادلها مداراة وعلاج وقت بوقته واكل خاص ، زين ليش هيج صار ويايه تعرف كل  الصار نمى رغبه بداخلي انتقم منها او أأذيها بس  من اتذكر هاي امي اضل ابجي ما اكدر أأذيها ...

جريت نفس طويل وكملته كلام.....

كعدت وسكتت كلت هسه تنسى وهاي مجرد تهديد ممعقوله اكو ام تتخلى عن بناتها ...

ورجعت المشكله اشتعلت بالليل بينهم ثاني يوم طردتنه هيه وياه ....

جنت اكدر اتعارك وياها واصيح بس مرات الانسان يتعب من الحياه من اهله وحتى من نفسه لهذا سكتت واخذت اختي وطلعت وصلت الباب صاحتني التفتت باوعت بيدها فلوس تقربت خلتهن بيدي  ...

تمارة : هاي فلوس اجري سيارة وروحي لخالج يوصلجن لعمامج..

ياوعتلها بقهر هزيت راسي متحسفه هاي امي مجاوبتها طلعنا وسدت الباب ورانه ...

سيلين : تعاي نكعد هنا و نفكر بحل للمصيبه مال امج ..

ايفين : شنو هذا القهر ماما تطردنه علمود زوجها ميقبل تره هذا بيتنه..

سيلين : ميقبل عيني ميتحمل مسؤولية بنات مو بناته.

افين : هسه ماما ليش تزوجت وعافتنه.

سيلين : ماما ههههه والله ضحكتيني وعلى شنو تكولين ماما امج ماتت من قررت تطردنه بالشارع ماكالت بناتي صغار شلون هيج اخليهن وين يروحن بهذا الليل.

شايله بيدي الفلوس الأنطتها ماما الي ومردتهن بيدي من الاعصاب وعيوني تصب دموع كمت كلشي ما اشوف من القهر..

ايفين : نخابر عمو صلاح يجي ياخذنه..

سيلين : اي ونرجع لنفس اللغوه والخدمه متسكتين فدوة..

ايفين : اني اروح واخدم بيت جدو احسن بمليون قاط من العيشه ويه زوج امج على الاقل .....

اختنكت دنكت راسها تبجي.. رحت يمها هزيتها واباوعلها بقلق..

سيلين : احجي لج شسوالج احجي..

ايفين : كل مره يتحارش بيه..

سيلين : اذاج احجي لا يا نذل ياكلب يا دوني، اله اروح اطيح حضه.

ركضت للبيت كامت جرتني ..

افين : لا يمعوده عوفيه يولي امشي نروح لبيت جدو فدوه ماأريد اضل هنا..

حرت شسوي اخابر بيت جدي يجون ياخذونه هسه يكولون انتن دكيتن رجل ترجعن ويه امجن لبيت جدكم وتنازلتوا عنه ، ما اخابر الكلاب السايبه متخلينه بحالنه حرت وحيرتي جبيره...

جريت نفس وكمت افرك بركبتي صارت مثل النفاخه من القهر..

راسي كثر ما فكرت حسيت بيه يريد ينفجر توصلت لقرار هذا هو اخابر فكره اختي هيه الصح.....

لزمت موبايلي واتصلت رن اول رنه واجاني صوت عمو الذكرني بكلشي سيء مريت بيه عدهم ...

صلاح : الو منو؟

سيلين :عمو اني سيلين بنت اخوك وضاح..

سكت وره شويه جاوبني بس حسيت بصوته ضيكة خلك..

صلاح : اي وشرايده..

سيلين : بنات اخوك بالشارع وماكو احد يلفيهن .

صلاح :ليش امج وين؟

سيلين : موجوده.

صلاح : روحن يمها ماعدجن عمام انسي..

سيلين : لعد نبقى تحت رحمه زوج أمنا ويضل يتحارش بأختي ترضاها..

صلاح : امج دكت رجل وهي رادتكم وياها وكالت اله اخذهن وانتن بكل عين صلفه رحتن وما التفتن وراجن وكسرتن كلمتنة ..

سيلين : عمو جنه صغار واكيد نختار امنه شمدرينه هيج راح تسوي بينه .

صلاح : والله ياعمي اني ما مستعد اخذجن يمي تعرفين  عندي ست ولد وين اخليكم.

سيلين : مو يمك نروح لبيت جدو .

صلاح : وهو بيت جدج بيه محط رجل روجه تطك روجه ، قنعي امج وابقن يمها احسن الكم عمو.

اختنكت حسيت روحي انذليت بما فيه الكفايه ، هاي الماعدها اب على راسها تشبع ضيم وقهر ،
اثاري الابو ياناس خيمه يفيي على بناته وحريمة..

صلاح : وين رحتي..

سيلين : وياك عمو وياك ، راح اكلك شغله ، اذا ما اجيتوا علينه اني واختي راح نضيع مو بعدين تدورون علينه وتطالبونه بشرفكم لأن ما كدرنه نصونه....

صلاح: لج بنتي انتي حبابه واختج صغيره روحن يم امجن غصب عنها تلفيجن صدك جذب..

سيلين : عمو ماكو غصب اكلك زوجها خيرها لو احنى لو هو وماما اختارته..

صلاح : هيييي ليش تصيحين..

سيلين : عمو مليييت وين نروح فهمني مو راح اتخبل.

صلاح : ماعرف دبرن نفسجن..

ردت اسده سمعت صوت وحده تحجي ..

بسعاد:  سمعيني لج خاف عبالج بعده زاكروز رايدج شيلي الفكره من بالج لا وحق هو محمد اكلب عاليها واطيها وكولي لأمج ام الزلم تلفيجن احنى ما عايزين قهر وحمل جديد يادوب مدبرين عيشتنه..

سيلين : عندج ست ولد ورجلج وياهم وكوه مدبره عيشتج ، لعد العدها بس بنات شتكول..

بسعاد : طاح حضج شلون لسان بومه مثل امج حطت عينهة عليه وعلى ولدي وتالي بيتنه احترك.

سيلين : اي ورب العالمين خوش عوضج تعويض جدي نطاكم حاله وماله وحتى ورث ابويه راد يصير ببطونكم لو لا عمو ادهم طلعه من عيونكم وتالي راح بخت النايم للظهر.

بسعاد: لك صلاح تعال شوف بنت اخوك التكول عليها فقيره ....

بعدها تحجي سديت الموبايل بوجها ..

ايفين : ها شنو كالو..

سيلين : ميريدونه..

ايفين : شلون عفيه شنسوي..

سيلين : ننتظر بلكت امج الله يهديها وتدخلنة..

اكو صبة يم باب بيته كعدنه عليها ، بارده الدنيا وسليمانيه شتاها يكرص .باوعت على اختي بدت تتلوى ..

سيلين : هااا شبيج..

ايفين : ألم بكلياتي احسها تريد توكف.

نزعت قمصلتي خليتها على كتفها وحضنتها ...

سيلين : دفي كلياتج تروح توكف وانتي عندج بس هالكلى ..

ايفين : وجعها يدك بكلبي.

سيلين : ياربي دخيلك احمي اختي ..

حضنتها بقوة اريد ادخلها بنص كلبي ، اخاف عليها بس هاي الأخت بقتلي كلهن راحن مني..

وره ساعه تقريبا حسيت بالرجاج مال الموبايل يهز على رجلي ، طلعته رقم غريب..

سيلين : الو.

زاكروز: الو هلو سيلين اني زاكروز...

سيلين : هلو زاكروز شلونك.

زاكروز : زين زين انتوا وين..

سيلين : بالشارع..

زاكروز : خرب ياشارع..

سيلين : يا شارع يعني غير شارع بيتنه.

زاكروز : تكدرون تدخلون جوه على ما اوصل ، تعرفين الطريق بعيد اذا طلعت هسه بالقليل  ساعتين يلا اوصلكم تتجمدون من البرد..

سيلين : متقبل نفوت..

زاكروز : لا اله الا الله ، باعي عيني فوتوا جوه واني هسه جايكم ..

سيلين : ابوك وامك ميريدونه شلون راح تجي بدون علمهم..

زاكروز : شحده اليفك حلكه بكلمه غير كلبت الدنيا عليهم من ريحان حجتلي.

سيلين : والله ماعرف شكلك تعبنه واختي وضعيتها كلش موزينه..

زاكروز: دفيها زين على ما اوصل..

سيلين : ان شاءالله.

زاكروز : يلا كل شويه اخابركم موبايلج بيدج مو..

سيلين : اي زاكروز..

زاكروز: نعم..

سيلين : شكرا.

زاكروز : لا شكر على واجب بنت عمي ، مع السلامه..

سيلين : الله وياك...

كعدنه ننتظره والبرد كتلنه وماما لا طلعت ولا شافتنه رايحين لو بعدنه ،،،
مشايفه هيج كلب يعني لو واحد يسولفلي ويكلي هيج امي سوت ويانه ما اصدك اكو ام بهيج قساوه بس للأسف عشت وشفت هذا الشي ويه امي ..

وره ساعتين وكفت تكسي نزل منها زاكروز اجه يمشي وخشمه احمر من البرد ، عاكد الحاجب وعصبي من بعيد صاح ..

زاكروز : كوموا صعدوا بالسياره بين ما افلش البيت على راسهم واطلع..

مشيت وصلت يمه ولزمته..

سيلين : عفيه عوفهم امشي نروح اختي تعبت وبدت روحها تغيب..

زاكروز : ولج مو كلبي مفور خليني ابرد كلبي بيهم واطلع..

سيلين : واذا كتلك لخاطري..

ابتسم وضيق عينه..

زاكروز : لعد الحارك دمي شنو والجابني مناك لهنا شنو غير خاطرج ...

سيلين : عفتك مثل ما انت بعدك بنفس المشاعر ..

زاكروز : صارت اكثر صدكيني ليلي ما انامه من اشتياقي الج يابنت عمي شسويتي بيه..

سيلين : يلا نروح..

زاكروز : نروح امرج..

رجعنه لأختي سندناها اني من جهة وهو من الجهة الثانية صعدناها وصعدنه نيمتها بحضني...

سيلين : زاكروز ..

التفتلي..

زاكروز : نعم ..

سيلين : بله زحمة شغلوا تدفئة ايفين ثلجت..

زاكروز : ماشي..

حجه ويه السايق وشغلها ، السياره تدك بينه واني فكره تجيبني وفكره توديني شلون راح اعيش هناك وشلون ادرس يوميه مكان يوميه مدرسه شكل حتى كمت اتجنب اصادق اخاف اتعلق بوحده واعوفها لهذا ضليت وحيده ...

_ الله يعينج ويساعدج على ما بلاج  كافي اليوم تعبتي ومبين الموضوع متعبج ، بس محسيتي روحج ارتاحيتي من حجيتي لو لا..

سيلين : لا دكتور كاعد اتأذه يمكن هذا اخر يوم ازورك ما اكدر اجي نفسيتي تعبت واني اتذكر الماضي..

لم شفته لداخل حلكه وطبك كفوف ايده وحجه مترجيني....

_ خليني اساعدج ، ليش انتي هلكد ضعيفه وبسرعه تستسلمين ، صدكيني اني كاعد اشوف اكو تقدم ملحوظ بحالتج وان شاءالله نتجاوز كل الصعاب..

سيلين : دكتور اني ما احس نفسي كاعد استفاد بالعكس كاعد اشوف تأذيت اكثر ، بس سؤال اني بيه شي عقلي بيه شي اني اجيتك علمود اعرف الشفته وهم لو حقيقه.

_ مرات العقل الباطن يصور النه اشياء نحسها حقيقه بس هيه لا مجرد خيال مرات نسوي شي واحنى فكرنه سارح ومن نرجع نشوفه نكول احنه مسوينه وهذا منين اجه مثل سالفه الخاولي الحجيتيلي عنها..

سيلين : يعني الفهمته منك هذا كله تخيل..

_ اكيد لان اذا هو موجود ليش ميواجهج ..

سيلين : هم صح شكرا .

_ ماكو داعي للشكر وانتظرج على الموعد ...

سيلين : الله كريم..

طلعت من العيادة امشي واحجي  ويه نفسي اذا هو ما موجود والورقه القريتها شنو يعرفني جايه لدكتور نفسي ..ماعرف اضحك على روحي لو ابجي اني شي متأكده منه على شنو رايحه لطبيب لهذا قررت بعد ما اروح ...

ظليت افتر بشوارع بغداد الناس تمشي وفرحانه ، كل ثنين سوه لو مجموعه صديقات لو اخوات ، لو عائله بعائلتها لو كبلات ، بس اني ماعشت اي شي مثل العالم والناس طول عمري عشت وحيده وهسه صفيت وحيده...

حسيت بروحي جعت طبكت يم مطعم وصيت على اكل كلي نص ساعه ويكمل رجعت كعدت بسيارتي اختنك انتظر بالمطعم ،،

بقيت اباوع على الرايح والجاي ، من بعيد باوعت شخص دخل للمطعم يشبه ادهم لو هذا هم خيال ، لا اكيد اتخيل ممعقوله لهاي الدرجه يجي ياكل بنفس المطعم ، اي هذا واحد يشبهه ، ضليت بين ال اي وال لا والتفكير اكل راسي اخر شي نزلت دخلت للمطعم ادور عليه ...

كلها عوائل كاعده زين اني افتر عليهم واحد واحد هم عيب..

اجاني ولد سألني.

_ تفضلي اختي تدورين على طاوله فارغه ...

سيلين : ها لا بس ردت اشوف الاكل خلص لو بعده.

احجي وعيوني تفتر بالمطعم تدوره..

_ حضرتج طالبه سفري لو هنا تاكلين.

سيلين : لا هنا....

_ تفضلي كعدي وهسه اشوفلج الطلب..

رحت كعدت بالمكان الأشرلي عليه ، كعدت واهز برجلي سريع ، حسيت اسناني بدت تصطك من وحدها ماعرف برد لو خوف اليوم كاعدتله هنا اريد اشوف شلون يطلع واني عيني على الباب...

صار وقت الاكل جابوه ..

سيلين : شكرا..

_ عفوا ..

اكلت و كملت بعدها اشرت للنادل اجه..

سيلين : بلا زحمه الحساب ...

_ ثواني ..

راح واجه جايب دفتر جلد فتحته بيه قائمه الحساب سحبتها لكيت ورقه بضهرها مكتوب بيها ...

( هاي الايام هواي كاعد اشوف على وجهج الابتسامة الزائفة ، استخدميها افضل لان تدوم فتره اطول من الابتسامة الحقيقيه ،

هبوط الفم ملاحظج هاي الحركه هواي تسويها الحركه تشير بأنج حزينة ، احباط غضب توتر ، لسوء حضج كل هاي التأثيرات السلبية سيطرت على حياتج من جديد لهذا تعودت زوايا فمج على الهبوط نزولاً ،

اعزيج هذا الشي غير محبب خصوصاً بالتقدم بالعمر ، راح يكون شكلج بائس وقبيح وكهل...

نصيحتي ابقي مبتسمه طول الوقت حتى متظهر هاي التعابير على وجهج لان راح تصيرين مخيفه ..

بالمناسبه كايلج قبل اصابع القدم الها دور اساسي بالمحافظة على توازن الجسم واكثر من مره منتبه عليج تنزعين حذائج وتضمين اصابع رجلج بقوه الى الداخل ، بوقتها طلبت منج تبطلين هاي الحركه وهسه هم اكلج بطليها لان تدل على احساس شديد بالفشل والخيبه ..
الظاهر بدينه نرجع لنقطه الصفر..)

قريتها وشهكت خليت ايدي على حلكي ، لعد شكد قريب مني ، بحيث شافني نازعه حذائي وفعلا تعبت وضليت احرك بأصابع رجلي وهو منبهني على هاي الحركه قبل ...

ضليت اتلفت منا ومنا ماكو مموجود طلعت الفاتوره ردت اعرف شكد الحساب ، قريت واصل  ..

لبست حذائي وكمت تقرب النادل مني..

سألته بتردد.

سيلين : عفيه اكو ورقه لكيتها بهذا الدفتر متعرف منو خلاها ومنو دفع الحساب..

_ اكو ولد اجه وجان كاعد بالزاويا وراج من طبيتي طلع ،،، وره شويه رجع دفع الحساب وخله هاي الورقه ..

سيلين : وهسه وينه متعرف..

_ طلع قبل ربع ساعه..

جريت نفس قوي..

سيلين : شكرا جزيلا..

_ اهلا..

رجعت صعدت سيارتي ماعرف اريد اصرخ اريد ابجي لان صدك تعبت ليش هيج يلعب بأعصابي ليش ميواجهني ويخلصني ...

وصلت للعماره صفيت سيارتي ونزلت بوجهي صعدت فوك فتحت الباب وانصدم بشي ابد ما متوقعته خلاني باهته وجامده بمكاني...

يتبع ...