البارت العشرون
رواية...جولييت واسرها...غياهب الإنتقام
بقلمي...نور سمو العراق
💔💔💔💔💔💔💔💔💔💔
ارد انافق
اي انافق حتى اعيش
واجرح حساسه النعامه من اكلها
المايعرف يطير ليش بجنحه ريش
وخاطر الناعور يرضى راح امدحنه جذب
من اشوفه يفتر بصف نهر ناشف راح اكله شكد حلو احساسك رطب
علموني
تريد تشلع كلب نخله
كبالها احرك سعف
تريد عاهر ترضى عنك لاتسولف عالشرف
شكد ليذه الدنيا عندي
من اشوف الاخذ صاحبتي انخطف
الذنب ذنب الرمه الطيره
والسهم نيته سليمه
شكد هضيمه
التذل الشمس غيمه
@asmaer2
............................................
جابر...
فعلا شكد هضميه من الشمس تذلها الغيمه جولييت شمس صافيه ونوال غيمه سوده وغيمت علئ حياة جولييت
من حجيت ويه وقار عرفت البنيه مو بخير ولحد الان حالتها مو مستقره وتجيها نوبات صرع
ولحد الان عيونها ملفوفه بشاش يردون تستقر حالتها حتئ يشوفون نظرها اذا سليم او لا...
والمشكله هي ما تعرف انو سقطت طفلها ولحد الان متأكده من حملها...مصيبه عظمئ وما الها حل...
هسه هذا كله يهوون بس كون تصير زينه لا انوب تموت لان ضربة الراس ما الها امان وهي جانت ضربتها قوويه....
اول ما ضربها جاسر علئ خدها وكعت من طولها وطفر الدم من خدها المنفوخ بالبتوكس تمزق الجلد وتشوهت وجنتها...
صرخت بصوت عالي وهي تشوف الدم بعد ما لزمته بيدها وكفت لكل عصبيه واخذت تحفيه كزاز علئ شكل غزاله وشمرتها بتجاهنه بس الحمد لله محد منه انضرب
لزمها جاااسر من ايدها وضربها بالحايط بكل قسووه ايدها طك العظم لزمتها وهي تصرخ...ولد الكلب انعل ابوووكم يا ابو كل ميت عدكم ولكم كواويد تستگون علئ مره
رد عليها جاسر بغضب واحنه لزمناه لان راح يجرم بيها...ولج بنت الكلب بنت الزمال اليوم هذا وجهج المعفن اشوهه الج
تخصرت وهي تغلط وتصييح ..ليش ليش لان اخذت ثار اخوك من جولييت هاي جزاتي
اني جنت لازم جاسر هو دفعني وصرخ بيه بغضب...وخرررر مني شكووو لازمني تريد افلش،وجهك وياها
لزمته بهدوء...بس علئ كيفك ما يصير هيج هسه تنسجن وتتعاقب
هز راسه بوعيد ...لا والله اله اطيح حضها هل مجرمه التافهه انوب دكول اخذت ثاري ام السحوره
انوب هاي اطياف وامها يصيحن ...يا ناسيا عالم هجمت علينه الزلم واحنه بس نسوان
عاط بيهن راد رضا بغضبه المعتاد...خاب ومرض تاكل نعل لو شلون
امر الشرطيه الي جايه وياه تلقي القبض علئ نوال
صاح بيها...ام نصير القي القبض عليها
ورجع حجه ويه جاسر وجاسر جان يستمع اله بانصلت وملامحه تعبر عن القساوه والألم هز راسه بقبول
ونوال تصييح...عوووفيني عووفيني والعباس اخوو زينب ما اخلي اي واحد يسجني ولكم اني تاج راسكم
ولكم انتم زلم ما بيكم خيير محد بيكم اخذ ثار مهيوب وفلاح غيري ...
ابتسمت وكوه كتمت ضحكتي ياربي شلون ورطه راح اضحك وانوب اخاف جاسر يسجني يكول احنه بيا حال وانت تتمضحك
بس والله تذكرت جعفر كون هنا اله يطكها بزيج ههههه
جاسر اشر لام نصير وانطاها اشاره
هي جانت ام نصير شايله بيدها دونكي هاي الي يلزموها الضباط يضربون بيها وهاي يكون مرات بداخلها نتاله صعقه كهربائيه تكهرب
فهي هاي ام نصير تقربت من نوال وركعتها بيها ونوال عاطت وكمزت كلتلها ام نصير وهي تطك ركبتها...واخو زينب الحلفتي بي اليوم اخلي السجن كله يبجي عليج
وعاطت بيها بصوت هز البيت هز...انطينييييييي ايدج ادبسز
نوال سلمت اديها بخوووف وهي تصييح وتدعي....يارب يا جولييت كووون اشوفج بالتابوت ويدفنونج بصف ابوووج والله البس احمر
اخت المجرم كتلو زوجو ويتموا بناتي وبهذلوني يردون يدخلوني سجن...
ركعها جاسر بالسويج مالت السيارة اجه بحنجها وزمجر بيها بغضب...ولج بنت الكلب شرايده منها وتدعين عليه انت ربج وصحت والله لو ميته اله ادفنج وراها وانتي عدله اخليج تتمنين الموت وما تلكينه
ردت عليه بستهزء...عليمن علئ الرافعه راسك هههه صدك لو كالو حظ العواهر جواهر شردت منك وبعدك تدافع الها
هو مجاوبها بس غمز لام نصير وام نصير ركعتها بالدونكي وفتحت عليها النتله
عاطت نوال بصوووت عالي وضلت تتوسل بام نصير ...فدووه فدووه لا تسوين بيه هيج والله مظلومه ذوول ناس ظلام وشافوني فقيره وهيج سوو بيه
ردت عليها ام نصير باسف مصطنع...اووووي قهرتيني ولج ادبسز ام براطم والبنيه المنومتها بالمستشفئ من ظلمها جدي
ردت عليها بتمسكن...هي كلبه هي ذيج ما تعرفينها اخوها كتل رجلي ورملني ويتم بناتي واني اخذت ثارهم
هزت راسها وغمضت عيونها بملل...ولج يا ارمله لو كل الارامل مثلج محفحفات ومكيجات وصابغات الشعفه جااا اقري علئ الدنيا السلام
ويالله امشي كدامي لا أفلش راسج وانومد بصف ذيج المسكينه الضربتيها
اخذوها وهي كل شويه وضلت تصييح وتغلط وتدعي وام نصير سكطتها تسكط...
صعدوها بالسياره وبعد ما شفناها وجاسر لزم الرائد رضا كله بقهر وبامر...شوووف رضا اذا ما خليت ام نصير تطيح حضها لا انت صديقي ولا اعرف
رد عليه بثقه...لا يابه انت تحجي صدك ترئ مرتك اختي ولي ما ارضاه علئ اختي ما ارضاه علئ مرتك
دار وجهه وصاح بصوت عالي...ام نصير
هي نزلت وباوعتلو و دكت التحيه ابتسمو عليها وبعدها وجهت نظرها الرائد رضا كالت...أأمر سيدي
جر نفس وخله المسدس وره ضهره...ابو مرتضئ يريدج بموضوع
هي رجعت باوعت الجاسر وابتسمت ورجعت دكت التحيه مره ثانيه وكالت...يدلل ابو مريضي
اخذها جاسر علئ صفحه وضل يحجي وياها وهي تهز براسها بقبول بس ما عرفت شنو الدار بينهم
وبعدها سلم عليهم واخذوا نوال واحنه رجعنه بسيارته انتبهت عليه جان المسدس بخصره
حمدت الله وشكرته ما اتهور وضرب نوال طلقه
امي رضيه لزمت ايده بحنان وجرت نفس عميق همست...حبيبي يمه كوول يالله لا تهلك روحك هيج ترئ جولي كعدت وان شاء الله ما بيها شئ
مسح علئ وجهه بتوتر ورد عليها...وحتئ لو كعدت يا يمه اول شئ لحد الان حالتها ما مستقره وثاني شئ فقدت الطفل ولحد الان ما اعرف شلون اصارحها بهل موضوع
والأدهى من هيج نظرها لحد الان ما عندهم اي طمانينه عنه فلحد الان هو مو بخير
همست واني اباوعله...ان شاء الله تصير بخير
تنهد بالم وجاوبني...ان شاء الله....
وصلنه للبيت نزلنه اني ورضيه وهي بس،شاف اطفاله وخله وراح للمستسفئ...
ورغم كل شئ احسه لحد الان ما طايقني واني الغبي ما استغليت الفرصه واخذتلي راشدي دفره من نوال للاسف ...
خلصتها بس افارغ بيهم...
اضل ما عندي كلب وكلبي طيب وشسوي للناس تذمني اني يمكن صح ما اعرف اتصرف
والله ما جان قصدي اهرب جولييت من جاسر بس اني حميتها منه
ولا جان قصدي اخفي موت عاصم بس جنت اريد جولييت وجاسر يستقرون
ولا جنت اعرف اذا نوال حلفت مراح تنتهي المشاكل وهل رعنه تضرب جولييت...
نفخت بقهر....اوووف الحمد لله على كل حال نحمده فالسراء والضراء...
.................................
شهد...
جنت كاعده اغسل بالحووش وريهام جانت توكل بجهال جووولي
مكعدتهم علئ الدرج وهي صاعده علئ بايتين وهم كاعدين علئ البايه الاولئ يعني رجليهم علئ الارض
اني مو انضف وهم كل شويه وكالو ورفعوا رجليهم ونعالاتهم تك وتك...تهوده عبيبتي تعاي متحي منا..شهوده حبيبتي تعالي امسحي منا...
ضحكت...ما شاء الله صايرين مؤدبين ما عرفتكم
ضحكت ريهام كالت...لا هم مؤدبين من زمان ههههه
رجعت توكل بيهم واني رجعت امسح بالوصله واجت سجئ تمشي ونعالها كله وسخ
تنهدت و وكفت ما مسحت ضليت امسح وهي كل شويه رايحه جايه تخبث عليه
عاد اني قهرتني وكفت وتخصرت الها...عيني مدام عارضة الازياء يروحي شوكت تكعدين مو دا امسح
ردت عليه بغرور...وما تمسحين شدخلني بيج انتي كلج هنا خلگ خدامه وماما الاصل
طكيتها بضحكه قويه....هههههههههاي ضحكتيني امج الاصل واني خدامه ؟ لا يا گلبي امج ام السحوره وبعدين اني حتئ لو اشتغلت ونضفت ةاشتغلت خدامه تعتبر نظافه مو وساخه مثل امج وسخت البيت بسحورتها
شو هاي صرررخت بصوت عالي عبالك وحده متحمله عليه وهجمت عليه اني كلت خلي تجي والله اله ازورك وجهها تزورك
طلع جعفر من الغرفه علئ صرختها وهو متعصب ودفر الباب ويفرك بعيونه كال...هاي يا ادبسز صرخت وفززتني من النوم
هي سكتت مجاوبت واني اشرت عليها
هو باوعلها مصدوم...انتي صرختي ولج سجيوه طالعلج اللسان والله اكصه الج واعلكه برگبتج
ما تستحين تصيحين انتي مو بنيه وصوتج عيب يطلع لو متعلمه من وجهه الطاوه وحدجن لسانها اطول من براطمها... صدك لو كالو الساس نداس
حطت ايدها علئ خصرها وردت عليه باستفزاز...وشبيها ماما انتم احسن منها
رد عليه جعفر بثقه...لا والله مو احسن منها احنه لو احسن منها جااا فلشنه راسها قبل لا تفلش راس جولييت ...واحنه لو احسن منها جان لصمناها بسحر ولعناه اسلاف اجدادها بس نضل مو احسن منها...
جاوبته بعناد وشمخره...والله انتم مدري شبيكم ويه ماما وعلئ شنو كاتلين روحكم علئ جولييت انتم اصلا لازم تفرحون وتغركون ماما بالذهب لان اكيد حركت كلب عاصم كتال بابا واخذت ثارها من اخته
جعفر ما تحمل وطكه بزيج وريج كلبه
وانوب ضحك وهو يصفك ويهز راسه بضحكه مستهزءه ...عفيه عفيه والله ضحكتيني واني الدكتور مانعني
واردف بجديه...ولج انتي ليش ما تسكتين لا اجي اشك حلكج ولج بنت الاودام امج ام السحوره شنو وتاخذ ثارنه ؟
صرخت وضلت تبجي بصوت عالي...سبييت بابا انت تغلط علئ بابا ما توقعتها منك عمو هيج اخوك مو غالي عليك وتسبه والله حرام عليكم بابا شمسويلكم
طلعت عمتي ام فلاح كلتله بعصبية...شبيك جعفر شبيك تسودن شكو شصاير
عض اصبعه بقهر...ولج هاي نويله بجلالة قدرها نفس الجذب ونفس الصلابه وحتئ نفس البراطم ببتوكس وبدون بتوكس...
هي ردت علئ بيبتها...شوفي بيبي سب بابا والقران والعباس سب بابا
ريهام صفنت متفاجئة...ياااا عزا ولج شوكت سب ابووج ؟
صرخت بوجهه ريهام...مو يكلي بنت الاوادم
ضحكت ريهام وهزت راسها بعدم قبول...اي واحنه كلنه اوادم قابل حيوانات ترئ هاي مو مسبه
صاحت بصوت عالي...لا شنو يكلي بنت الاوادم اني مو بنت الاوادم اني اشرفكم
جعفر ضحك كلها...والله صح اللسانج انتي صدك مو بنت اوادم اذا امج نويله منين تصيرين بنت اوادم ويالله انتي مو بنت الاوادم
هي خزرته وتباوعله بنظرات حاده
عاد هو تخبل هجم عليها ولزمها من تشيرتها بحده طارت من بين اديه...شوفي ولج لا تخوزرين وتصيحين وعود تقلدين امج وتاخذينه باللسانج
امج محسوبه علئ اهلها وتربيتها ترجع لاهلها بس انتي محسوبه علينه والله اذا مره ثانيه عليتي صوتج ورفعتي وتجاوزتي باللسانج ما تلومين اله نفسج...
والله اطيح حضج وحض الخلفتج كافي،علينه امج متحملينها مو انوب انتي تطلعين عليه
ردت عليه ام فلاح ...علئ كيفك يمه وياها بعدها صغيره...
رفع اصبعه لامه بتهديد...يمه رجاءا لا تخبينها علينه والله محد سودن نويله غيرج
من جان فلاح ما يخليج تتدخلين كاص اللسانها ومكسر مفاصلها ومن مات وانتي صرتي بضهرها تفرعنت ...
امه سكتت ومجاوبت
اردف بعصبية...وترئ ذنب ذيج المسكينه البهذلتنها بركبتج وبركبتها لان انتي الي ساندتيها علئ هل شئ ولا دكولين اني بريئه نطق اخر جمله وراح
انوب اجت رضيه وكالت نوال دخلت سجن وهي سجئ اتخبلت هي حقها تضل امها مهما يكون...
وكل شويه واجت هاده علينه احنه النسوان والله الي يرش امي بمي ارشه بدم وكولوا سجئ ما كالت...
رضيه جرت نفس هاي شبيها فوك ما اهمها ضربت البنيه ولعبت بحالها وفلشت راسها وموتت روح بريئه ما شافت النور لحد الان...
اني كلت خلي اكول الاشواق واكول ام فلاح عن المره الي شفتها
اجيت حجيت الهن هنه استغربن كالن اخاف تحلمين ضحكت كلتلها...لا والله ما احلم بس اني فعلا شفت مره واجت صورتها وما اعرف ليش صورتها
ردت اشواق كالت...اخاف دكتوره؟
جاوبت بسرعه...لا لا مو دكتوره هاي اني شايفتها مدري بنت خالتكم مدري عمكم مدري خالكم بس شكلها مألوف وعبالك اعرفها واكيد شايفتها يمكم
كالت اشواق بغضب...اخاف هاي خالتي ام هاله بس هي ما تحجي ويانه شعجب اجت الجولييت
ام فلاح تنهدت وضربت ايد علئ ايد وكالت...لحد تحجي هل كلام ما عوزنه مشاكل واني اروح لام هاله واشوفها اذا جايه الجولييت لو لا وصدك مصورتها وانشوف احنه ما نريد نتهم بختنا
واردفت بتفكير...بس ليش يعني تصورها شعندها وياها واحنه وين جنه من دخلت وصورتها
اشواق جاوبتها...يجوز امها رادت تصورها الها ام هاله حتئ تشوفها
لوت شفايفها بشك...والله ما اعرف بس اني ان شاء الله اروح اني و وقار وافهم شنو السالفة وام هاله مو من حقها تصور جنتنه اذا هي فعلا مصورتها
كلتلها...والله خاله اني اذا تشوفيني صورتها اعرفها واميزها وحتئ بنتها اني والله شايفتها بس ناسيه شكلها والله بس اشوف صورتها اكول هي هاي...
هزت راسها بتفكير وبعدها خلت وراحت واني رحت الجعفر طلبت منه نروح الجولييت عيب ما رايحين الها
كال...والله ما اكدر اريد اروح اطلك وجهه الطاوه خلعي هيج اخلعه من الجذر حتئ بعد ما ترجعلي
حضنته بحب...اي فدوه ما اريدها خبيثه هاي خلصني منها
جر نفس ...اي بس بت الكلب بس لا تطلب حاضر وغايب بس الحمد لله ما عاقد بالمحكمة جان تزين راسي صفح خخخخخخ
ضحكت وحضنته...شلون انقهرت عليك من دخلت سجن حتئ ضليت ابجي
رد عليه بقهر وهو حاضني...واني شلون انقهرت من كالو افراج وطلعت من السجن
ولج المساجين كلها قطيتها كله تعال احفك تعاي اشوف بشرتك من ذيج الساعه قررت افتح محل حلاقه واسمي نفس الجهره شنو رايج بي
ابتسمت وحضنته بكيفك واني اسويلك خلطات تجنن
عض شفته وباسني حييل وحضني...فديت التريد زوجها يطك والله فديته هي وعشيرته
ضربته بدلع...يمه اسم الله عليك
حضني حيييل ورجع باسني بقوه ورد عليه...لا هيج هواي عليه
غمرني بحبه ودلاله وصاير زين ما يشرب ولا شئ ويصلي ولو صلاته ام الثواني ما نلحك نفهم منها شئ
بس الحمد لله من انهدئ علئ الطريق الف الحمد لله...
............ .............
جولييت...
فتحت عيوني علئ سواد حالك مثل ظلام اليل بغياب القمر
رفعت اصابعي بخووف علئ عيوني تنهدت وحسيت بارتياح من تحسيت الشاش الملفوف علئ عيوني
بس متغلب عليه الخووف والقلق ما اعرف اني وين منو يمو منو واكف بصفي وساندني
بجيت بألم من عرفت محد يمي واني وحيده بدهليز المظلم
حطيت ايدي علئ صدري واني اشهك من البجي حاسه بخنكه مو طبيعيه
هل شاش الملفوف علئ عيوني عبالك ملفوف علئ عنقي وخانكني خنك
حطيت اديه علئ عنقي وعبالك مثل الي اسوي اله مساج ابعد الخنكه من روحي المجرووحه
همست بتعب...سوده عليه يابه كلبك الحنين حس بيه ما نمت شويه اله وتجي تمسح علئ راسي
يابه بنيتك تعبت ومحد يمها والله محد يمي خايفه من هل ظلمه حييل وما اريد امووت وعيش بظلمة القبر
الله ينور قبرك يابه ويجعله قصر من قصور الجنه ولا جعله حفرة من حفر النار
شهكت بعذاب وحضن وجهي الصغير المتعوب باديه ...يابه انت ميت وتحس بيه وكل شويه تجيني وروحك الطاهره تفتر عليه
بس امي عدله وما اجتني اي والله يابه ما اجتني ولا يمكن حست بيه
بس كلي فدوه اني شمسويه حتئ هيج تجافيني وتكسر جناحاتي
والله ما رضيت يابه والله وحتئ علئ ولدها العذبوني دافعت اي يابه دافعت
وحصلت الضربه والاهانه والرزاله وتدري ابد والله ما شتكيت
هسه اني اشكي الطيف الحاضر الغايب يابه
خلي وياي فدووه لا تخليني الوحدي وخلي روحك الطاهره تحوم علئ روحي المهزومه
يابه حتئ من وره امي ومن وره اخواني انحرمت من اطفالي انحرمت من كلشي
وكدام الناس ما حجيت عليها ولا ذميتها كلت امي ما تعوفني امي تحبني امي اني روحها بهاي الدنيا
وبداخلي عتب جبيير يابه ما اكدر افصح عنه ولا احجي لأي بشر حي حتئ لو ينصفني
بس انت الي شكيتلك من ظلم امي واخواني وحتئ لجاسر ما حجيت تدري كل مره اكله امي تحبني امي تحبني امي ما تتركني
اكيد امي هسه مقهوره عليه وتريد تجيني وتاخذني بس انتظرتها هوااي وطال الانتظار
واليفقد لذة الصبر يفقد لذة الفرح واني فقدت الاثنين
حسيت بطكطكه فزيت مرعوووبه واني اتلفت براسي المجروح يمنه ويسرئ وهمس بخوف وخفقات كلبي الف...بابا بابا وين انت
صرخت بصوت من الوجع الاجتاح روحي وبعصرة قويه نحبت....اريييد بابا بابااااا
احتضني بحضن غامر ودافي كبلني وضم راسي لصدره عرفته وشلون ما اعرفه وهو الحاضر الغايب بحياتي ...اي هو جاسر عرفته اول ما حضني
هديت من روعي اول ما حسيت بوجوده وعضيت علئ شفايفي بخجل...حييل زحمه جنت احجي واشكي والدمعه شاكيه الهم بداخلي وهو موجود وسمع كل كلامي
باسني بشعري ورجع باسني براسي وجبيني وهمس بعذاب...لا تخافين حبيبتي هذا اني يمج ولا تركتج والله
اشوفج تنامين وتكعدين واني اباوعلج واريدج تحجين وياي بس اكول تعبانه ما اريد اضوجج
همست بفشله ...ابوي ما تركني ولا لحضه وصورته كدامي ما انمحت من مخيلتي يجي يوكف علئ راسي ويبوسني ويحضني ويكلي بويه تحملي
باس ايدي كال...اي اتحملي و وعد مني ان شاء الله منا نطلع من المستشفئ بيتنا ونستقر هناك
حطيت ايدي السرير واني اتلمس الفراش اريد التقي بيده لمست ايده ولزمتها حييل بلعت ريكي بحسره...جاسر ترئ امي تحبني حيييل ..
حسيت بقبلات دافيه علئ خدي...اي ادري بيها تحبج وتموت عليج ومستحيل تتخلئ عنج
تنفست بضيق وبحسره...اي اتذكر مره جنت بصف الثاني ابتدائي وهي زعلت من ابويه وبعدها راحت البيت جدي زعلانه بس ما اخذت ولا واحد منه
ضلت تقريبا اسبوعين زعلانه واني جنت اخلص يومي ابجي وابجي بس من اختلي الوحدي حتئ بحزني فضلت الوحده من اني طفله
اجت بيبي وكالت...امج ليلها كله تبجي عليج و دكول بنتي جوولي شحالها هسه ما تكدر بدوني
يمه سوده عليه يصغيرونه يمه مرة عمج غطتج قرتج ضفرت شعرج شحال حالج من بعد امج يجولي
وهذا جان يوم من الفراك اسبوعين ما اتحملت بعدها بس للاسف صار سنين اني مفاركتها
وصح هسه سمعت اني عتبت عليها وبجيت عليها ونقدتها بس ما اعرف شنو ظروفها واضل عاذرتها
سمعت تنهيداته الي وصلت لاعماق روحي ورد عليه بحنان...اي امج تحبج واكيد الها ظروفها وان شاء الله ترجعين الحضنها
ضحكت باستهزاء...ما اضن
ضليت شويه كاعده واني افرك باديه ما اعرف فجأة اختنك وروحي تريد تطلع واريد ابجي
ما حابه هل ظلام احسه يخنك روحي واحس نفسي مكطووع والله والله احس شخص صاعد علئ صدري ويخنك بعنقي
اريد ضوه اريد اشوف احس تنفسي بنضري والله مدري ليش هيج احس ...
اكعد وانام وعلئ نفس الوضع من غير وجع راسي الي احسه يشلع شعري من مكانه ...
همست بتعب...جاسر مشيني شويه اختنكت حييل
هو اخذ بيدي وسحب رجليه ونزلني خله ايده علئ خصري العاري والايد الثانيه لزم ايدي بيها
اني جنت لابسه صدريه مال المستشفئ تكون من وره مفتوحه يعني ضهري عاري ولابسه بجامه هم يخلون الصدريه هيج حتئ لا سامح الله اذا ساءت حالتي واحتاجيت صعقات كهربائيه بسرعه ينزعون الصدريه
وهماتين يخافون علئ الجرح الي براسي فما ينزعون الصدريه من الراس لا بسرعه تنفتح من اكتافها
وهذا الشئ استغله جاسر الصالحه رغم مرضي بس هو منحرف ويستغل ايد فرصه
اتلمست البرده الموجوده علئ الشباك وهمست اني ويين...
تنهد بهدوء ورد عليه بحنان...موجودين بالغرفه
عبثت ايده علئ خصري بفساد ..لزمت ايده واني اتذمر ...شبيك مو عيب ترئ اني حاليا مريضه
رد عليه ببرود...وشنو المريض معصوم محد يتحارش بي
لزمت ايده حييل...لا محد يتحارش ترئ عيب والله اني ما قبلت البس هاي وحسيت بيها مفتوحه من الظهر لا انوب الممرضة الغبيه دكول لا تلبسين بجامه
ههه تريدني افتر بالغرفه ورجليه طالعه
لزمني من اكتافي وباسني بعنقي كال...خلي تولي هي بكيفها بس يا حلو انتي كيفج اذا اجي اني انزعيها واذا اروح البسيها شنو راييج
رديت عليه بعدم قبول....لا والله
ضحك كال...اي والله ولو عادي اني قررت من نشيل ببيتنه تتشلتحين بكيفج وافتري عليه ترئ عادي الله محللج
ابتسمت من بين حزني...ترئ لحد الان محرمتك علئ نفسي
كرص خصري حييل كال...مو بكيفج تحريم بيبي الله يغضب عليج
لزمت ايده بوجع واني اخفف من قبضته عليه...اوووي وجعتني وبعدين بس انت من تحرم الله ما يغضب عليك
رد عليه واني متشوقه اشوف ملامحه....لا الله غضب عليه واجيتي تضيعين من ايدي
ابتسمت ولزمت ايده وعدلت الصدريه لزمتها من وره لان اني ما اعرف نظراته اليه واذا شكلي مخربط او لا ...
سحب ايدي وكشف عن ظهري باسني بكتفي العاري ورجع حضني حييل من وره حسيت نفسي ضعت بحضنته...
تنهدت وتكلمت بهدوء...تدري من جنت صغيره واحتلونه الأمريكان جانت امي دكول لا تطلعن ذول الامريكان يلبسون نظارات يشوفون بيها الواحد بدون ملابس هههه
واني جنت ما اشوف همر او مدرعه اذا ما اختل وره شجره او حايط او وره رجال ما جنت احب يشوفوني عاريه هههه
تفكير طفولي بس حلو الحمد لله من جنت طفله خجوله
دارني عليه وكرص خدي...وحتئ وياي خجوله
ابتسمت....اي متشوف دا اتختل منك وما اريد تشوف جسمي من وره حسيتك مثل الامريكان ابو نظارات عاريه ههههه
باسني بحراره بشفايفي ورجع حضني همس عند اذني بس ما باسها...تدرين انتي كلش حلوه وكلشي بيج حلو ضحكتج عيونج روحج حتئ حزنج ودموعج حلوه
ابتسمت ونزلت راسي بخجل...شكرا هاي يمكن اول مره تمدحني وتتغزل بيه بجديه قبل كله استهزاء
رفع وجهي ابطراف اصابعه ورجع باسني بلهفه...وترئ الاستهزاء افضل من الجد بس انتي ما تفتهميين
لويت شفايفي بعدم معرفه..يجوز صدك اني دائما ما افهم عليك لان انت كبير وغامض مو مثلي اني من جنت طفله بريئة وما افهم بفك الشفرات...
عض رقبتي بس علئ كيف ورد باستهزاء...بريئه موو ومو باستني وهي طفله واله شويه جان وكعت بحضني وخلصتها شلونك شيخ شلونك شيخ
رفعت أصابعي بتهديد...مو اني
رد بسخريه...اي صدك هاله
رفعت اديه دا اريد اشوف بعد المسافه بينه حضنته بعشوائيه وكان هل اسم مزعج بالنسبه اليه همست بسرعه وعصبيه...لا مو هاله اني
ضحك بصوت عالي وحضني حييل
حسيت الوجع اشتد عليه لزمت راسي بدووخه و وجع وغثيان ورجليه ما كدرت اسيطر عليهن
شهكت بدموع...راسي جااااسر
شالني بين اديه ورجعني للسرير وغطاني كال...اشش لا تخافين هسه اروح اصيح الدكتور واجي
لزمت ايده بخووف...لا لا لتروح اني اخااف من الظلمه واخاف اضل وحدي والله لا ترووح وتخليني
تنهد بحيره وبعدها اتصل علئ جعفر جان موجود جوه وكله يوديله الدكتور الغرفتي
وصدك دقايق واجه الدكتور فحص حالتي وانطاني مهدئ وشكل اليه مغذي وراح
وجاسر لحد الان عندي
لزمت ايده وشهكت بدموع...جيبلي مرتضئ ومجتبئ؟
رد عليه بحيره وألم...ميخالف والله اجيبهم بس شويه اصبري عليه لان بس يجون هسه يضلون يبجون عليج ويلزكون هنا
بس شويه صيري زينه و وعد مني اني اجيبهم الج
ضحكت بحزن...اشتاقيت الهم والله كووولش اشتاقيت السوالفهم والطاء من يگلبوها قاف
اشتاقيت السوالفهم من يامرني اسوي جاي واكل للديج ويجبرونه اله يلبس نعال
هههههه اتذكر مره من المرات لازمين المشط ويمشطون بيه وهم يكلوله...اودف عبيبي اتويلك بايتي...عود قصدهم يسووله تسريحه سبايكي
اضحك عليهم من ينهزم منهم الديج وهم يركضون وراه يكلوله نعله ابوك داتر...هههه عبالهم ابو الديج انت
ونعله امك طبريه ...وطلعت صبريه ام الديج
ضحك هو بحزن ما حسيته نابعه من روحه وتنهد بضيق وكان شايل جبال من الهموم...
سكتت وحسيت العلاج بده ياخذ مفعوله ونمت بعد ما حسيت ولو اني عايشه بظلام حالك مثل سواد گلوبهم...
..............................
وقار...
رجعت للبيت صار من اول ما وكعت جولييت لحد الان واني اناوب عليها والله وابد ما خليتها كنت الها اخت واكثر
وحتئ اختي اشواق ما قصرت اببد هم اذا اني اجي هي تروح وتكعد يمها يعني مسوين عليها مناوبه
خابرتني صديقتي السوريه كالت عندي موضوع وياج ضروري بس اني جاوبتها والله جان كتلج تعالي،بس والله اني حيل مشغوله هاي الايام وان شاء الله تعالي غير مره واهلا وسهلا بيج
او اذا حابه احجي علئ التليفون ردت عليه بسرعه...لا لا ما بدي احكي علئ تليفون ان شاء الله بس تفضي خابريني وانه بجي لعندك
جاوبتها...اوك يروحي تمام ان شاء الله...
بعدها خابرتني امي كالت ...اريدج تجيني عندي وياج موضوع
استغربت شنو السالفه اليوم عباد الله مواضيعها تدك
خطيه جابر هاي صار فتره هاملته رحت لكيته كاعد بالغرفه يخابر بريهام ويتطمن عن الاحوال
اجيت كعدت يمه بسته بخده وهو سحبني من خصري وقفل الموبايل بدون ما يكول مع السلامة
ابتسمت علئ تصرفه وهو يدون سابق انذار باسني بحراره بشفايفي وابتعد بارادته واني بادلته بحب ورمانسيه
كال بحب وهو يمسح على خدي بحنان...تدرين كبرتي بعيني حييل يا وقار من بعد وكفتج ويه جولي وابد ما تركتيها
اني والله مو احبها ولا سئ بس البنيه فقيره ويتيمه ومحد الها اذا مو احنا نوكف وياها منو يوكف وياها
نزلت عيوني وابتسمت بقبول...لا جابر انت ما توصيني اني جولييت صح اخوها قتل أهلي بس ابد ما اعتبرتها سبب بلي صار ولا اخذتها بذنب غيرها والله يشافيها يارب
همس بتنهيده طويله...اميييين ...والحمد لله لان طلعتي اصيله وبنت اصووول وما رضيتي بالظلم
همست الحمد وبعدها طلبت منه بتوسل...جابر فدوه أخذني إلاهلي صح اني هاي الايام ما لافيه علئ البيت بس امي عندها موضوع وياي وما اعرف شنو
ابتسم ورجع باس خدي كال...يالله حضري نفسج وخليني اخذج
صدك اني بسرعه بدلت واخذت اغراضي وخليت ورحت وهو كال اريد اروح لديالئ اشوف شنو خالتي صبريه ...
وصلت الامي وهو راح لديالئ دخلت جوه لكيت امي محضره نفسها وخلينا وطلعنه بس اني ما اعرف وين رايحين
بالطريق كلتلها وين رايحين
ردت عليه رايحين...البيت خالتج ام هشام
استغربت واندهشت من روحتها بس،ما علقت ولا ناقشت ...
وصلنه الهم ودخلنه هن استقبلنه انصدمت من الكلام الي دار بينهن وعن تصويرهن الجولييت
ردت هاله بخوف وتوتر ورعب...هاااا اي صدك مو هو هشام اخوي كايل لاخوت جوليت وخابرتنه خالتي تبجي وطلبت انصور جولي
وضلت تتوسل واحنه فتحنه وياها كاميرا وهي حجت وياها وضلت تبجي
جاوبتها امي بغضب...جولي حجت وياها ؟ هي جولييت جانت فاقده
ردت عليها خالتي ام هشام...لا لا ام عاصم عي الحجت ويه بنتها وضلت تبجي
والله واحنه لان حلفتنا بالعباس وضلت تبجي حبينا انطمنها وبعدين هي امها ومن حقها تشوفها وانتم مو من حقكم تمنعونها من امها
ردت عليها امي بغضب عارم...والله اذا ابني جاسر عرف بيجن مصورات جولييت والله يكلب الدنيا عليكم
نطت خالتي من مكانها...لااا لا احنه ما اخذنه الها صور هو مجرد فتحنه كاميرا وهي حجت ام عاصم ويه بنتها وهذا كل الي صار...
امي باوعتلها بشك وكلتلها...خوووش اني اكول الجاسر علئ الصار وان شاء الله هو الي يعرف شلون يتصرف وياكم
عاد هن تخبلن ضلن يتوسلن بيها وحتئ رادن يبوسن رجلها وحلفن امي ما تحجي
وامي سكتت بس مقابل ما يتعرضن الجولييت ولا ياذنها بعد
رجعنه للبيت واني هل موضوع ياكل بدمي وقررت احجي الجاسر بس تعدي علئ جولي سلامات...
لان هسه هو خطيه مو بحال اي شئ وهماتين ما اريد تكثر عليه المشاكل والمصايب....
.....................
جابر...
رحت الخالتي صبريه كلت هم اكلها علئ جولييت وهم اجيب منها صناديك مال فواكهه وحليب ومشتقاته...
اخذت جعفر وياي ضايج والطريق طويل اريده يونسني شوويه
هو اخذني الطريق كله يطك اصبع ويغني...وصبريه حلوه واروح الها فدوه وصبوره حلوه واروح الها فدوه...
وصلنه للبستان مالتها ونزلنه ونشوفها من بعيد جايه هي كنوش يتمشون
جعفر طلع موبايه وطك الهم صور من بعيد كال...راح ارسلهن لابو اللول واكله صبريه طكت صارت تمشي ويه شخصيات مهمه خخخخخ
ضحكت وهي باوعت علينه وصاحت بصوت عالي يمكن فززت كل الفلاحين...ياهو جويبو ابو المتعه وجعيفر ابو العرك يا هلا يا هلا نورت ديالئ وشهربان بوجودكم
امش كنوش امش خليني اعرف علئ عمامك
اجت هي وكنوش طاحتلنه بوس واشرت عليه كالتله يمه كنوش اعرفك...هذا جويبر ابو المتعه يصير ابن اختي
وهذا جعيفر ابو العرك يصير هم من كرابتنه وابو اخوي بالدين دير بالك ترافكه واحد ساقط وكواد ويشرب
رد عليها جعفر...خلف الله عليج خاله هسه كنوش من سمع باخلاقي بعد راح يبطل وما يزوجني اخته كنوشه
ردت عليه...لا كنوش وحيد ومدلل ما عنده اخووت مو هيج يمه ؟
هو نهگ عليها وجعفر جيت عليه لزمه من الجرس البركبته وضل يبوس بي...هلا هلا هلا بكنوش شيخ العشيرة شلونك شلونك زين احوال الجهال شلونهم
ضربته صبريه...ولك عوفه ما يحب البوس هوواي...
رد عليها بقهر...والله عمي هنيال هل كنوش عليج مدللته دلال جاا مثل حضي متزوج ثنين وما معيشاتني عيشة كنوش
تخصرت صبرية بتذمر...ياااا وتجيب كنوش العاقل ويه وجهه الطاوه من تغدي كون سبع فدوات بس لاذانات كنوش
هو طكها بضحكه كلها...اي صدك ما كتلج طلكتها وجهه الطاوه
رفعت حواجبه الها وردت عليه...شعجب طلكتها مو تصير مرتي ومرتي كولة جاسر جنك ابو بدر رجل فوزيه
رد عليها بقهر...جا غير سامطتني بسحر خلتني امشي صفح
واردف بضحكه...لا والله خاله صدك احجي اني لو عايش عيشة كنوش ودلاله جااا هسه تلكينه امشي واتفل علئ العالم
ردت عليه...خايب من كون ما الكبر لهل طوول كوول شعجب طلكت وجهه الطاوه
رد عليها بتنهيده...غير ضربت جولييت وفلشت راسها وهسه جولييت بالمستشفئ وحتئ الطفل سقطت
هي فتحت عيونها بعصبية ومصدومه من كلامه وطلعت مسدسها من جيبها...يممممه جكليته الحلوه مضروبه ومسقطه وانه ما ادري واليوم اكتلك انت وجويبر
لزمنها واحنه نهدي بيها وهي تصيح وتغلط واجتمعوا علينا الفلاحيين عبالهم جانوا نبوگ حلالها...
وبعدها افتهموا السالفه انوب اخذنها وجبناها ويانه وهي بس تغلط وتسب بينه
باوعت البستان صبريه وتذكرت هل بستان شهد علئ ايام التقيت بيها ويه جولييت
وبهذا البستان لزمني جاسر وياها وبوقتها جرم بينه ثنينه وهي اخذها مثل الاسيرة وكبش الفداء
لحد هاي اللحظه اتذكر تك نعال برجلها وهو يسحب بيها وتك وكع منها وتلطخت رجليها بالطين
وصلنه للجمله العصبية...
بس ما قبلو ندخل عليها وضلينه بالحديقه لان كالو جاي يفتحون الشاش من عيونها...
اني ضليت علئ نار تملصت وخليت ورحت صعدت الغرفتها لكيت جاسر واكف يمها و وقار وعمتي ام فلاح وامي رضيه وابوي يفتحون الشاش طبقه طبقه من عيونها...
درت وجهي عنها لان جان شعرها شويه طالع رغم كل شويه وجاسر غطا شعرها وعدل حجابها
بس فضولي ناحية عيونها يخليني كل شويه واسرق النظر الها
ضلن بس قطعتين علئ عيونها رفعن الدكتور وامرها تفتح عيونها...
فتحت عيونها الملوونه وبيهن لون عجبب ما تملكه اله هي
رمشت بعيونها برمشات تأسر القلوب وتدمي الفؤاد
جانت تباوع عكس اتجاه تحركات الدكتور ومن يسألها متجاوب
وجاسر جان يباوع عليها بخووف وهو لازم ايدها نزل نفسه الوجهها كلهّ.... جولييت تشوفيني؟
ردت برعب ورجفه اعتلت كل جسمها مع انين غريب وكئيب ومؤلم...ما اشوووف
نهاية البارت....يتبع
كونوا انتم كونوا بخير...احبكم 💔
نور سمو العراق 😘
لا تنسوا التصويت والمشاركه بكم نكتمل احبتي🌹
شنو هل تفاعل الحلو وشنو هل تعليقات الحلوه ترئ خجلتوني وانستوني واسعدتووووني احبكم بكد حب صبريه الكنوووش 😍😍😍😍😍
وشبسرعه حبيتن رائد رضا وهو ما طلع بالقصه بس مقتطفات 😁
ودكولون ليش دكولين البارت لاهل الفيس لا مو بس الهم والكم انتم اهل الواتباد انتم النفس وروح الروايه بيكم
وكل من شارك بدعم هل روايه اذا كان بتصويت او تعليق او مشاهده فهي الرواية كلها هديه الكم وتستاهلون اكثر من هييج 😍😍
احبكم احبكم..😘