البارت التاسع عشر
رواية ...جولييت واسرها...غياهب الإنتقام
بقلمي...نور سمو العراق
💔💔💔💔💔💔💔💔💔💔
جولييت دكول...
خاف أمـوت
ولسه ما طايبلي خاطر
وخاف أمـوت
وجبت عمـري
شامر أحلامـي اعله باچـر
عريان السيد خلف....
.
...............................................
تنبيه...البارت اهداء للجميع وتعويض عن البارت الي انلغئ
كووولش حابه اشكركم وبطلاتي يشكرونكم علئ تعاطفكم ومشاعركم الجياشه تجاها جوولي
وحابه اشكركم لتقديسي وحبكم اليه واشادتكم بسردي و وصفي وابداعي بهاذي الروايه
وانتم اصل الابداع وانتم النبع الصافي الي نتج عني اني ونتج عن روعة روايتي
احبببببكم كوووومه كووومه
ما جنت اعرف بارت البارحه حسوي صدئ واسع بالواتباد ولا بالكروب والبيجات بحيث اقره كلامكم عني وبسردي وبوصفي واني سعيده رغم حزني بالبارت
لذلك البارت هديه بسيطه مني الكم للجميع وبالاخص فراشاتي و ورداتي بكروبي المتواضع ورود وفراشات علئ الفيس😍
واعتذر منهم لان هل ايام مدا اتواصل وياكم كووولش اعتذر بس وقت ماكو و واهسي بالروايه كبير
واحب اكول للحاسدين والمسقطين ترئ كلاكم يزيد من اصراري وهذا شوفي اصريت اكتب بارت بعناد الحساد اهل حسابات وهميه 😁
متابعه ممتعه احبائي
..................................................
حازم...
الام اصل المحنه واصل الطيب واحنه بذور امي الي خناها وضيعنه ثمرة من ثمراتها الحلوه
معقوله امي تعذرنه علئ ضياع هل بذره البريئه ؟ صعب تعذرنه صعب
بس احنه مشينه بدرب كله شووك وما جان النه من هل دنيا مفر ولا من جاسر
ورغم كلشي محد توسد الظلم والحزن والقهر غير جولييت ومحد داس علئ الشوك بكدها...
لا احنه ولا ابووي ولا حتئ امي ...هي الوحيده الي موتتها الاهات وغيم الحزن علئ صورها
يمه الرسول وصه بيج وكال الجنه تحت اقدام الامهات وربي وصه بيج وكال وبالوالدين إحسانا
بس اختنه جولييت منو وصه واذكر امر الرسول ورفقا بالقوارير...
اختنه قارورة وانضربت وتكسرت كدامنه وهاي هي علئ فراش المووت شلون نسعفها وشلون نساعدها يا يمه...
امي من قرت الرساله ومن شافت الصور جن جنونها وصكت بمكانها واعصابها تجمدت
رجعت باوعت للصور بذهووول كبير وعيونها تلمع بدموعها الحارقه بعدت الدمع المالح من عيونها وصرخت بصوووت دووي ...يمممممممممممه يمممممه بنيتي يمي جووولي يمه حبيبتي يمه يروحي شصاير بحالج
وكفت وهي لازمه ضهرها بيدها والايد الثانيه لازمه بيها الموبايل وتبعد الدموع المتطايره من عيونها...يممممه سوده عليه يمه شصاير بييج يمه شلون هيج ضربج
عاصم وكف بحيره وبيده العكازه راد ياخذ الموبايل من ايده وهي ما قبلت ابتعدت عنه خطوات بسيطة وشمرت الموبايل علئ وجهه بقسوووه وحده كبيره
اجه الموبايل بوجهه و وكع علئ الارض وتناثرت اجزاءه مثل حال جولييت
نزل الدم من وجنته قريب من عينه بس ما حجه اي كلمه ولا نطق
امي شمرت شيلتها وملخت شعرها وتلطن علئ وجهه وتصاررخ...هسه ترجعوووني هسسه ترجعووني البنتي اريد جولييت اريد بنيتي
تقربت منها ردت الزمها ضربتني بقبضة ايدها علئ صدري وابتعدت عني وهي تمشي بصعوووبه
لبست شيلتها وطلعت من الشقه والثلج جان مغطي كل المنطقه بفلندا...
ركضت وراها وهي مشيت خطوات خارج الشقه بدون نعال و رجليها التعبانه غطست بوفر الثلج
وكعت علئ اديها وهي تبجي ورجعت كملت مشيها لزمتها من كتفها واني ابجي واتوسل بيها...يمه فدووه يمه الله يخليج راح تموتين من برودة الثلج ارجعي واني عهد عليه اخذج الجولي
دفعتني بثورة من داخل روحها المعذبه وبصقت بوجهي...وخرررر مني وخرررر والله ما ادخل هل بيت وهاي اني كاعده بالثلج وخليني اموووت اني اريد اموت ولا اشوف بنيتي بهل حاله
طلع عاصم والدم نازل علئ خده و صدره يصعد وينزل لزمها بقهر وهو يتوسل بيها..يمه لا تسوين هيج فشلتينه كدام الاجانب
صاحت بصوت عالي وهي تباوع لارجاء البيوت الفاخره الهادئه...ياااا نااااس يا عالم اسمعوا وشوفوا ذووول ولدي مجرمين حرموني من بنتي وعذبوها ودمروها تعالو اتفرجوا وشوفوا تعالو
كم بيت فتح الشبابيك وهم يباوعون عليها وهي البروده وصلت الاعظامها ودموعها تنزل بغزاره وتحرگ وجهها البارد...
رجعت وكفت مره ثانيه تريد تمشيبس ما خلاها عاصم واعترض طريقها...يمه فدوه انتي وين رايحه وين رايحه احنه مو بالعراق وتوصلين الجولييت انتي لازم تعبرين قارات
دفعته بغضب عارم ومسحت دموعها الحارقه بطرف شيلتها وتقربت منه لزمته من قميصه بتهديد...ولك شلون يا عاصم شلوون ولك هاي بنيتي هاي قطعه من كلبي ...
ولك انت من شفتك بين الحياة والموت مو وكفت بجانبك ولك ليييش ليش هاي بنيتي هاي جولييت اعز منكم والله
ولك اشوفها هيج ممدوده واني مو يمها ولك شلون من ضربها شكالت من خوفها شكالت يمه تعاليلي
لطمت علئ خدودها بجزع ونحيب...ولك شلووون تحجي باسمي وامها مو يمها ولك اني اليوم عار علئ الامهات ولك اني عاااار بنيتي تريد تموت وانه كاعده بنص الاجانب
باس ايدها بحيرة وتوسل...يمه والله والله اوديج واخذج واذا تردين اجيبها الج
رفعت اصبعها بتهديد...اريد اروح الها سفرني الها
باس ايدها بقبول ولهفه...اي والله يمه اخذج اخذج بس ادخلي فدووه راح تموتين
رفعت اديها وهي تدعي ودموعها تنزل علئ اديها الجامده من البرد...يارب موووتني موتني وعووف بنيتي فدوه من عمري علئ عمرها
سوده عليه يا يمه سوده عليه يا ضيم كلبي سوده عليه يا عذاب روحي
حسيت راح يغمي عليها من البرد ومن النحيب والبجي وفعلا اغمئ عليها دلاله علئ ارتفاع السكر والضغط عندها...
شلتها بين اديه ورجعتها للشقه وعاصم راح بسرعه ويمشي بخطوات بطيئه بسبب اعاقة رجلة من ضربة جاسر الكلب...
شغل المدفئه واتقرب منها ولزم اديها وهو يدفي بيها واني نزعت شيلتها وغطيتها وبعدها اخذت الها السكر والضغط بجهاز الضغط والسكر العندنا...
طلعوا كلش مرتفعات احتارينه شنسوي ورغم كلشي اختنه عزت علينا
شافوها الوحدها وهيج جرموا بحقها لا والف لااا اختنا ناخذ حقها وانطيح حضهم...
اجيت كعدت يم عاصم وجريت نفس عميق وحزين وهو كاعد لازم عكازته وصافن بلا شئ...
حطيت ايدي علئ كتفه وتنهدت باوعلي بطرف عينه كال...شفت شمسوي بيها ؟
هزيت راسي بقهر ونفخت نفسي بعذاب...اييي شافوها وحيده واستغلوا وضعها
واردفت بحيره...امي راح تسفرها لو شنو ؟
رمقني بنظرة انتقام...لااااااا راح اجيب جولييت هنا
فتحت عيوني مصدوم من كلامه...شلوون تجيبها انت راح تورطنا
ضرب علئ ايدي ضربات خفيفيه...لا تخاف ما اورطك اني راح اوهم امي واسايرها ان ما عندي فلوس السفرتها وبس اجمع كم فلس اسفرها
وراح اتفق ويه هذا الي طلعني تهريب بطيران عراقي وبصوره اصوليه
استغربت من كلامه...يعني شلوون فهمني اني ما افهم ...
ابتسم باستهزاء...هه انتم مو سافرتوا قبلي التركيا عن طريق المطار واني لان جنت مريض طلعت تزوير وهذا الي راح اسوي
راح اطلب منه يجيبها النه هو هي هاي شغلته وهو يعرف شلون يستغل الوضع
وراح نهربها لهنا نسويها مضطهده من زوجها ومتعرضه للعنف وراح هنا يستقبلونها اكثر ما يستقبلونه ..
حكيت لحيتي بتفكير...والله ما اعرف شنو اكلك بس ترئ جاسر مراح يسكت وما تعبر عليه
ضحك...لا لا تعبر مو عبرت المهمه الاولئ وان شاء الله اخلي واحد يحاول يخطفهى أو نخلي هشام وعمي ويطلعوها من المستشفئ ويسفروها النه وان شاء الله هنا نعالجها...
تنهدت...الله كريم ان شاء الله...
ضلينه اليوم كله نفكر ونخطط وخابرنه هذا الولد الهرب عاصم بطريقه أصولية وبطيران من العراق...
شويه وكعدت امي ضلت تبجي هي ضهرها سكط وما تكدر تمشي منا لهنا لذلك حالتها حرجه
كعدت تبجي بعد ما طلعت رسالة جولييت الها من زمان وهي تبجي وتنوح عليها وكل شويه ورادت تطلع وتروح تهج من البيت
منا لمن قنعها عاصم وكلها بس اجمع كم فلس اسفرج
وهي استسلمت للامر الواقع لان هي عبالها عاصم ما عنده فلووس...
واحنه من هسه بدينه بمخابرات وتخطيط لخطف جولي...
.........................................
ريهام...
جنت كاعده اصلي وادعي رفعت اديه بالدعاء الجولييت...ربي..ان مرضنا فأنت الشافي المعافي..ربي..ربي اشفيها وقر عيني في شفاء جولييت..يا الله تب علينا..تب علينا..وكن معنا في بلوانا..فان كنت معنا فمن علينا وان كنت علينا فمن معنا
تساقطت دموعي بغزاره واني بحضرة ربي واديه مرفوعه بالدعاء بصدق....أعرف يا الله ان هذا قدر ومكتوب..ما يتغير الا بدعاء وقت استجابه
ترجيتك يا الله...يا الله
گومها ب لسلامه..ولا تاخذ امانتك وهي طفله وعندها اطفال وما شافت من طعم الحياة شئ...
مسحت دموعي بطرف العبايه وسجدت واني اللامس الارض حسيت بدموعي الرطبه تلامس السجادة الناعمه ...سبحانك ربي الاعلئ وبحمده يالله يالله اشفي جولييت ياربي...
استوقفني صوت بكاء اطفالها الناحب وكفت بحيره من دخلو عليه وهم شايلين الديج ويبجون جانوا يم اشواق
مسحت دموعي وابتسمت علئ منظرهم الأسر اتذكرت جولييت من جانت تشوفهم شايلين الديج دكول...ياربي اني شايفه الجهال تشيل دبدوب لعابات اشو اني ديجهم ويفترون ههههه
فتحت ايدي الهم اريد احضنهم الديج انهزم منهم وهم عافو لاول مره واجوا. كعدوا يمي كال مجتبئ بحزن ودمعه بطرف عينه...عمه اليد ماما
تنهدت بقهر وكتمت عبرتي بسته بخده...يعمري هسه تجي ماما هي كالت من اجي اجيب ملاعييب المشمش وروضي
مشمش رد عليه بعصبية...لا بت اليه «بس اليه »
ضربته مرتضى بغضب...نعله ابووت نعله ابووت هي سكيته عبني...« نعله علئ ابوك نعله علئ ابوك هي جكليته تحبني »
لزمتهم بحنان...لا لا عمه عيب هيج تغلطون هي تحبكم ثنينكم وان شاء الله تجي وتلعب وياكم بس بعد لا تعضوها ههههه
هز راسه مرتضئ بنفي...لا اعفها ليس لوح عوفنه وعدنا...« ليش تروح وتعوفنا الوحدنه »
رد عليه مشمش وكانه يريد يبجي والدمعه تلالي بعينه...هي سكيته ماتت قلع منها دم قكتها وده القاوه...« طكتها وجهه الطاوه »
مرتضئ دمعت عيونه وحضني بخووف...ماما ماتت قلع منها دم
حضنتهم باسئ وكلبي نار عليهم...لا يروحي لا اسم الله ما ماتت هسه تجي لا تخافون
حاولت انومهم بعد ما عشيتهم وهم فعلا نامو غطيتهم وضليت اقره عليهم ايات واسبح...
دخل صلاح جان هسه جاي من المستشفى وجان دنيا اليل
بلعت ريكي وسالته بخووف...شنو بشر ما كعدت ما توقف النزيف
جر نفس ونزع قميصه كال...لا والله علئ حطت ايدج كلشي ماكوو ...بعدها حالتها حرجه...
حمدت ربي وشكرته وهو دخل سبح واني رحت حضرت العشا اله ...
هو جان راجع هو وجاسر لان جاسر رجع يسبح حضرت الهم العشا ثنينهم
بس جاسر ما قبل ياكل دخل باوع المجتبئ ومرتضئ،واني جنت واكفه بجانبه اباوع الهم نزل نفسه الهم وباسهم بحب وحضنهم...
كال بتنهيده طويله...ريهام ديري بالج عليهم هم امانتج واني،ما اوصيج لان اعرف انتي شنوو واكيد ما تقصيرين وياهم
ابتسمت...لا اكييد ان شاء الله ما اقصر بس فدوه تعال تعشا ما يصير هيج صار كم يوم بدون اكل...
رد عليه بقهر...ما اشتهي والله ومشكوره ما قصرتي
خله وطلع واني ضليت كاعده ويه صلاح كال اروح الها ب12 باليل كتله اروح وياك ما قبل كال مو زين عليج وانتي هم حالتج علئ كدج...
ضلينه شووويه تقريبا ب11 باليل وجان الجو شويه بارد وهدوء محد اله مزاج الكلشي...
وبنات نوال كاعدات بغرفة امهن لا يطلعن ولايمشن وهي سجاوي زعلانه شلون جعفر كتل امها واحنه كلنا نحجي عنها...
وهي امها انهزمت ومحد يعرف وين وحتئ اهلها كالو ما نعرف بس جذابين ما يعترفون وين حتئ ما تدخل سجن...
وهي حتئ سجئ ما تعرف امها ويين ...
جنت كاعده وما اسمع اله صرخه قويه وانهيار تام من قبل مرتضئ فزيت مرعوبه اني وصلاح رحنه نركض عليه
لزمته وهو شلون المتعارض وخايف ويصرررخ بصوت مرعب وعالي ما اعرف شلون اسكته وهو ما ادري شبي...
ضليت اقره عليه وامسح علئ راسه وهو يصييح ببكاء ونحيب...ماما ماتت ماما قلع منها دم
باوعت الصلاح بحيره وبلعت ريكي...عزااا صورة امه بباله ضربوا امه كدامه وهو طفل
اخذه مني صلاح وباسه بخده كال...البسي،بسرعه خلينه نطلعه شويه
والله لبست بسرعه وهو صاح الاشواق اجت ضلت يم مشمش بس هي خطيه تخبلت علئ مرتضئ...
طلعنه برا وركبنه بالسياره وهو يسكت بي ويبوسه وما نسمع بس صوت الكلاب
هو ارتاح شويه ويباوعلنه ويضحك...عووو عوو هته عف عمه هههه « هسه يعض عمه »
ابتسمت علئ كلامه ياربي شسوت وجهه الطاوه عارضت حتئ جهالها وخبلتهم الذيج المسكينه
شلون فلشت راسها ببطل مي جامد وخلت الدم ينزف منها...
تحلف وقار دكول قبل لا يفتحون شعرها جانت كصيبتها يابسه مثل الخشبه لان الدم يبس عليها...
حسبي يالله ونعم الوكيل عليج يانوال ما اكول غير هل كلمه ليش هيج اذيتي هل بنيه اليتيمه
والله فقيره لا تحجي علئ واحد ولا تحتك بشخص كافيه خيرها شرها...
والله مرات مجتبئ ومرتضئ يقشمروها وتتقشمر بالكلمع الحلوه
وكل هذا وعندها عزة نفس صح ما تاذي بس ما تفرض نفسها علئ اي شخص ومكتفيه بنفسها واطفالها....
الحمد لله علئ كل حال واملنا بربي كبيير....
رجعنه للبيت بعد ما نام ولو هو كل شويه وفز وضل يبجي ويريد امه...
........................
وقار...
جان واكف علئ شباك بباب غرفتها وعقله طاير والكلام عنده مقتوول
عرفت اخووويه حييل حييل مقهور مو بس عليهر وانما شنو وحده مثل نوال تضرب مرته وتهدد حياتها بالموت
شهكت وبجيت من باوعتلها وشفت تنفسها ضاق والدموع انسابت علئ وجنتي وركضت عليه لزمت اديها بحنان...هااا جولييت جووولي شبييج
باوعلي وتقدم مني بخطوات سريعه وتيار من الحزن يجتاح صدره ما يريد يغيب صوتها ولا تغيب طلتها
باوعتله اقترب منها والتمست الحنان والحب بعيونه لزم ايدها بحب...هااا حبيبتي هااا جولييت اذا تحسين بيه الزمي اصبع ايدي
جان محتضن ايدها الناعمه بيده الضخمه ما جانت الها اي استجابه
ضل يباوعلها بتيقن وهو ينتظر منها اجابه ويترجاها تستجاب اله
نزل راسه باسف ودگات گلبه تسارعت علئ حالها اقترب منها اكثر وهمس عند وجهها المتعوب وهمس بعذاب...الله يجمعني بيج علئ خير يا جولييت
كعد علئ الكرسي وجر نفس باوع لاديها وابتسم بحزن اكبر من شاف اديها معضعضه باوعلي ببضحكه معذبه....هاي اطفالها من يتعاركون يكون الها نصيب من العض
ابتسمت...وليش يعضوها هل مسكينه
رد بتنهيده...مو معركت ما تنتهي اله بدخول طرف ثالث يتحمل كافة النتائج لذلك جولييت جانت هي الضحيه...
جريت نفس طويل وحزين...هي دائما جانت الضحيه
مسح علئ خدها بحنان وباوعلي...فعلا اوووف تعبان حييل تعبت نفسيا اني مجاي اكدر اشوفها بهل شكل...
تدرين ادخل البيتنه اشووفه اضلم ما بي ضوه وتدرين اني هسه حسيت بوجودها وقيمتها
احس ما الي طاقه اذا فقدتها تدرين مرات حتئ التفكير اخاف منه
اخاف تموت بلحظه تمر عليه لحضات ميته ووو وما اكدر ادفنها وهي راسها مضروب وينزف ...
ما اكدر اتخييل احرف الها كبر والچم جروحها
هذا كله يخليني اتمنئ لو الزم نوال والله اكلها باسناني والله ما حقدت علئ عصام كد ما حقدت علئ هل عار
واذا جولييت فقدتها الزمها واحركها نويله وحق الله كون بيها بخت وتعيش لان اذا ماتت احتار شلون اجرم بحقها...
تقربت منه وحطيت ايدي علئ كتفه...الله يعينك يا خويه وربي يشافيها وما تشوف بيها مكروه
رد عليه بصدق وتنهيده...اميييين يارب
رجع باوعلي بتساؤل...اي بشريني جابر طلع من السجن لو بعده
هزيت ايدي بقهر...لا والله لسه ما طلع هو خطيه المسكين لا بيها ولا عليها وحتئ ما ماد ايده عليها وهي راحت اشتكت عليه
جر نفس...هاي فد وحده عار ضاله تشبج لحيه بلحيه وفكرها يدولب بيها بس بسيطه هسه اطلعهم وهي هل نعال اذا ما خليتها تعفن بالسجن واخليها تتنازل عن بناتها ما اطلع جاسر...
ابتسمت بمرح...ونعم منك خويه وترئ يا خويه من جابر وعمي رادوا يحلفون جولييت ترئ مو قصدهم وانت تعرف شكد يحبوها وخاصة عمي...
رد عليه بسرعه ممزوجه بغضب...اعرف وقار بس هم ما يعرفون يتصرفون ودائما تصرفاتهم ممدروسه وبسببهم ترئ انضربت مرتي
شنو جايبها يحلفها علئ اي اساس ترئ هاي ما صايره تحلف الظالم والمظلوم
سكتت ما عرفت شنو احجي وهو طلع موبايله وخابر شويه وكله...هلا رائد رضا باوع انت رتبها الي وطلعهم وان شاء الله اني اعرف البيت الي ضامه نفسها بي واجيبها تلقي القبض عليها
قفل الخط وبعدها كال...وقار اني عندي مشوار ضروري هسه شويه واجي ما أتأخر
بعد اخووج ما اوصيج بس تكعد او اي شئ يصير وياها اريدج تخابريني تمام مو ما تخابرين
رديت عليه بقبول...اي خويه ادلل ميخالف
هو خله وراح طلع واني ضليت يمها وشويه واجت امي وماما رضيه واشواق خطيه اشواف اول ما اجت باست جولي وضلت تبجي لان خطيه هي وجهه الزراك كل شويه ويكتسح مسافه من وجهها
انصدمت صدمة عمري امي اجت وباستها براسها وابتعدت عنها بجمود
وماما رضيه تبوس بادين جولي وتبوس بخدودها وتبجي
امي هم بجت بس مو مثل ماما رضيه
وخالتي صبريه لحد الان ما تدري محد كال الها والله لو تدري اله تحرك البيت علئ راسنه ...
............................
جابر...
جنه كاعدين بالسجن وجعفر كاعد علئ الجربايه وحاط رجل علئ رجل ولازمله طاسه يطبل بيها...
جبتيلي العذاب وبي ربطيني....
وأنا صغير يا يمة إشايف بعيني
وزدتيلي الحمل حد ما كتلتيني
وها ها ها ها
ها يمة... ها يمة ... ولج يمة... ها يمة... ها يمة... ها يمة... ها يوم
إرتاحيتي من زوجتيني... هلورطة
الورطتيني... إرتاحيتي بس فرفحتيني
وجهه الطاوه من زوجتيني وها يمه وهااا يوم
هزيت ايدي بقهر...ياربي هذا ماكو احساس انوب يغني بس عمي حقه كاتل وجهه الطاوه ومطيح
حضها اله اني المقهور من صدك
لا ضارب لا ماخذلي جلاق لا راشدي حقي انقهر
اخذت الطاسه من ايده وشمرتها باوعتله بقهر...جعفر اريد اعرف انت شنو من مله احنه مسجونين وانت تدك وتغني
كح بوجهي بخبث...شسوي يا جابر ارفهه عن نفسي
ورجع يغني ارتاحيتي من زوجتيني واحد كله...شكد متزوج
رفع اصابعه واشر اله...ثنين بس مو نسوان انتقام حيايه اكلني بكشوري وحده مطلكها وما ادري شنو السبب
والثانيه هي الذبتني سجن هههههه بس بالقران مفوخ كلبي بيهن
اجاه واحد كله..جعفر عفيع ما تشوف بشرتي شو مجلده وبيها حب احمر
لزم وجهه داره يمين ويسار وجر نفس كله...بشرتك تعاني من شيخوخه مبكره وتعاني من حب الشباب يعني بشرتك عجوز بس روحها خضره
ضحكت وضربته والولد كله بغضب...شبييك تضحك عليه
رد عليه...وروح عيال و ورح عبال ما اضحك عليك غير هي هاي بشرتك اني حلاق واعرف بهل سوالف
باوعتله بملل...من شوكت صرت حلاق ولك
ندسني بعكسه وكمل يحجي ويه الولد
انوب واحد صاح عليه كله...اكول جعفر اني معطب من الشمس شسوي واصير ابيض شفاف
رد عليه بصدق...هو مال تصير ابيض ما تصير لو اصبغك بصبغ بويه بس عندي الك الحل
جيب خلطه وحطها بجدر فافون وشرط طابخين بي قبل يومين مركة باميه واجيب من الخلطه واخلط وجهك وجسمك وان شاء الله نتائج مضمونه
باوعلي وهو يضحك بمرح...تذكرت شهودتي جانت تعلمني علئ هاي الاشياء لان جانت تحب هيج سوالف وجنت كله اجيب الها مكياج تكسباير خخخخ
ولو هي وجهه مو صافي جنه گرده مال بناء ههههه بس احبها بنت النعال
جر نفس حلفت من تجيب شهوده اخلي صبريه تجيبها اليه للسجن واشيلها هنا كدام السجناء واكلهم...شوفوا ولكم كواويد كلكم ترحولها فدوه بس جابر ابن عمي لا ....هااا شلوني ؟
ابتسمت باستهزاء...ليش ما تاكل نعل شنو تريد تخلينه كم شهر بالسجن من وره وجهه الطاوه وانوب ننتظر شهوده تجيب
ضربني علئ كتفي...شبيك لك السجن للرجال صير رجال مثلي
وكف وراح وهو يصيح من باب السجن...ابوو خليل ابو خليل اذن بعده احنه ناس صدك مساجين وعلينه سمعه زفت بس نعرف ربنه كلش زين
رد عليه الشرطي...اي اذن
عاد هو راح توضئ وكعد يصلي رمشة عيين خلص صلاة
تفاجئت...شبسرعه لبگتها لبگ يركضون وراك حتئ الملائكه العلئ جتفك ما كالت حلال...
تمدد ومد رجليه...هسه انت شدخلك العافيه بالتداريج المهم اني ما تارك صلاتي من سحرتني نويله لحد الان....
صفن كال...هسه جولييت شلونها اني عود ردت اعتذر الها لان منكلب عليها ابو زيد الهلالي قبل لا اروح للزياره...
بس هاي ام وجهه المعفن ما انطتنه مجال ولك ماكو هيج مره ما بيها انوثه اضربها وترجع توكف جنها حصان ريسز
اردف بانتصار...بس بالقران كتلتلها كله چيكه ما چيكه بيکه ما بيكه لو هادين عليها ثلاثين تفاگ ما يسوون بيها هيج...
ضحكت بصوت...غير يستقر عريف شلتاغ
ضحك...لا بالقران مو مبالغه ولك موتتها تموت ما تشوفني فرحان بالسجن
ولك انوب تصيح هسه اخذت ثار فلاح كون طالعلها فلاح وراكعها بربد علئ راسها مفشلها...
اردف بعد ما لزم ايدي بقهر...طبعا الصار بيه والصار هل ايام كله من وراك انت السبب وانت المسؤؤل عن هل شئ...
رفعت حاجب باستغراب وتساؤل...شنو قصدك اني شجابني عليك وعلئ وجهه الطاوه
جر نفس ...تذكر من عمي كال واحد منكم يتزوجها واني كتله خلي جابر يتزوجها وانت رفضت ؟
هزيت راسي بقبول...
كال...اي هسه لو ما اخذها جان هسه احنه بخير بس انت السبب...وتحمل النتائج احتمال تكون سجنت لهذا السبب
ضحكت بدون نفس ونزلت راسي بعد ما هزيته باسئ...هههه والله عليك سوالف...
شويه واثار انتباهي بعد ما صاحوا باسمائنا...كالو افراج
رد عليه جعفر بلوم وعدم رضا...لا ابو خليل ما ردتها منك والله بعدني ما متعرف علئ الشباب
باوعله بطرف عينه وكله...يالله امشي امشي يتعرف علئ الشباب هو ابو المشاكل
تركه يحجي وراح سلم علئ الولد واحد واحد واخذ ارقامهم وهم تخبلو عليه
المسجون كم يوم اخذ رقمه والما عنده موبايل وعده يجي يزوره...
خلينه وطلعنه الحمد لله واخيرا طلعت من السجن والله السجن غابه ما ينراد بس هذا جعفر مدري شنو من مله كلشي عاجبه
بس وجهه الطاوه ما عاجبته من زمان ولو هي ما تعجب الكل
وهي شكلها يعني حلو بس مكروه من خبثها وتصرفاتها الملعونه ...
.............................
وقار
من بعد ما اجت امي وماما رضيه و اشواق ضلت اشواق يم جولي واني رجعت البيت اهلي لان بصراحه عندي حاجات اريد اخذهن وهماتين اريد اسبح...
وعرفت جابر طلع كلت اخاف يجي للمستفشئ
دخلت لكيت جاسر واكف ولازم موبايل سجئ الي اخذه من قبل منها هو ما فتحه لان يعرف شنو بي بس فرمته
شفته خله الموبايل علئ الكاونتر بالمطبخ واني جنت اشرب مي
سجئ جانت مراقبته وكأن تريد تخطف الموبايل هو طبعا جاسر فرمت الجهاز ورجع السمكارت بي لان هي ما فتحت الرمز...
اتصل موبايله ضا يحجي وانوب اجو اطفاله شالهن وضل يبوس بيهم وتالي خله وطلع
هي اول ما شافته طلع اخذت الموبايل بسرعه وخلته بصدرها اني انصدمت منها ومن جرئتها طفله وينها وين سوالف التضمضم بالصدر...
خليتها طلعت ورحت ركض الجاسر كتله بخووف...جاااسر جااسر سجئ اخذت الموبايل
رد عليه ببرود...ادري خليها تاخذه
تندهشت من ردة فعله وبلعت ريكي بحيرة...ليش،مو هاي تتواصل ويه امها واحنه ما نريدها تتواصل وياها
ارد ببتسامه باهته وثكيله...بس اني اريدها تتواصل لان هي الس راح توصلنه لامها
تركني تحت ذهولي وخله وطلع ابتسمت علئ دهائه وذكاءه
صحت عليه جاسر لا تروح لوحدك اروح وياك بس اسبح
رد عليه بهدوء...تمام منتظرج
ضل كاعد ويه ولده وهم يسولفون عليه بحب وكل شويه وباسو وسالو عن امهم وهو يجاوبهم بسياسة...
شويه وخابرت اشواق وهي تبجي وصوتها مبحوح رعبتنه رعب
عاط بيها جاسر بغضب شديد...ولج احجيييييي شبيها جولييت
رد عليه بلهفه وسرعه...جولييت صحت وكعدت وتريدك
هو ما لحك يطلع واني ركضت وراه بدون حتئ لا اسبح...
ركبنه بالسياره وهو ساق بسرعه جنونية وكل شويه وضرب علئ الستيرن...خررررب شلوووون هييج شلون تصحئ واني مو يمها ردتها اول ما تفتحت عيونها عليه
لزمت كتفه بحب...حبيبي خويه علئ كيفك انت هم تعبت وياها
باوعلي بغضب...وشنو اريدها تجازيني ترئ هاي مرتي من حقها اتعب وياها ولا مسوي عليها فضل ولا منيه...
نزلت راسي بفشله وفركت اديه بخجل...
وصلنه للمستشفئ بسرعه دخلنه علئ غرفتها جانت شبه ضلمه
جانت نايمه الشاش ملفوف علئ عيونها وشعرها متناثر علئ وجهها الشاحب
ركض عليها ملهوووف ولزم اديها بحب ولهفه وصدره يصعد وينزل وهو يشوف الدمعه النازله من الشاش وشاكيه الهم بداخلها
خطيه تبجي وحيده تبجي جريحه وتبجي حزينه علئ حالها ..
همس بعذاب الها...جولييت حبيبتي تحسين بيه تعرفيني
اول ما سمعت اسمه رفعت جسمها المتعوب ولفت اديها علئ رگبته وبجت بمرارة وصوت عالي
حضنها بحب ودلال ودفن وجهه بشعرها الملطخ باثار دمها اليابس وهو يهمس الها بكلمات هدت من روعها شويه
همست بصوت خافت بسبب الجفاف اي صاب شفايفها وريگها....جج جاسر ااني اني مجتبئ ومم مرتضئ وين
رجعها علئ فراشها وحضن كفوفها بكفوف ايده باس اديها ثنينهم...لا تخافين الحمد لله زينين
رفعت اديه بصعوووبه وحطتهن علئ عيونها وجرت نفس عميق وحزين ولزمت ايده حييل...خااايفه خايفه حييل اا احس كك كله ظلام
جاوبها بلهفه ووكانة يحجي ويه طفل...اي حبيبي هذا شاش ملفوف علئ عيونج لا تخافين ما بيج شئ
ردت بثقل باللسان وصعوبه بالنطق..لا لاا لت لتعوفني ا اخاف من الضلمه...
لزم ايدها حييل وعصرها بيدها...لا ما اعوفج هاي اني يمج والله..
بجت بصوت عالي وحزين وانين غريب ينبع من شفايفها الجافه انين كئيب مؤلم
مسح الدمعه من علئ خدها الشاحب وباس خدها بحب
لزمت ايده حييل وتكلمت بصعووبه وهي تبجي بوجع قاتل همست بصوت مبحوح...اب ابووي اجااني شافني علئ هل حاال كال بويه بعد ما اخليج هنا انا اكعدج وياي عندي بيت هناك
رد عليه وهو يكتم وجعه...لا جولييت لااا
كملت بالم قاهر...طلعنه وجان الجو بارد ومطر والمطر ينزل بس خفييف ركبنه سياره جانت سيارة أبوية هههه ابويه بعمره ما جانت عنده سياره بس بالحلم عنده
هو جان يباوعلها واعصاب وجهه تشتد بمرارة من حلمها الكئيب...
اردف ببحه...نزلنه يم بيت وبااااب طووووووويل حييل وطلاقتين بس جان المطر بنزل عليه ويبلل النقوش البي وتضرب بالارض
وكفت بتعب كدام الباب وكتله واني اتوسل بيه...لا فدوه بويه لا ما اجي وياك مناك مرتضى ومجتبئ وجاسر منو الهم
هو انذهل من هل حلم من نطقها الاسمه ومن اهمتيه بالنسبه الها
حضنها بحب وباس ايدها حيييل وضل دافن وجهه بباطن اديها ثواني
هي كملت كالت..بس جانن بيدي وردتين وقراصه انطيتهن لابووي
هو رفع راسه الها ورجع باس اصابع ايدها وجر نفس كلها...المهم رجعتي
ضلت لازمه بيده وهمست بنحيب متعوب...نوال ضربتني حييل
رد عليها بقهر...خلي تولي والله اله اطيح حضها الج
حطت ايدها علئ بطنها كالت...ربي يحفظ هل طفل ما اله ذنب
هو بسرعه باوع علينه بصدمه وتوتر واحنه نبجي اني واشواق
همس بجرة نفس قاسيه...ان شاء الله يا عمري
همست بعذاب...مجتبئ ومرتضئ امانتك جيبهم الي اريدهم مشتاقه اشوف عيونهم
جر نفس...والله بس تصيرين زينه اجيبهم الج
اجه الدكتور عاين حالتها وسوالفها فحص بس طلب تكون الاضاءه خافته طول الوقت لان بيها ضرر علئ نظرها وهم لحد الان ما متأكدين من سلامتها...
بعدها ضلت تبجي من الوجع وتصرخ بانذباح احتارينه احنه وجاسر شنسوي الها
اجه الدكتور انطاها ابر مسكنه وانطاها منوم ونامت والدمعه نازله علئ خدها وملطخه بالدم وشاكيه الهم الجره عليها...
...........................
شهد ...
جنت كاعدة وايدي على بطني وبنتي تتحرك واني مكيفة عليها شكد احبها من تحوس بداخلي ...
اجه ابويه كال كومي كومي واخيرا راح نفتك منج اجه جعفر يريد يرجعج ..
قلبي تملكته الفرحة هو اني الي راح اخلص منكم موو انتوا ..
مشيت باتجاه الباب امشي واحس روحي رغم ثقل الحمل خفيفة مثل الفراشة ..
رحت شفته جعفر ومرتجي على الباب واكف لمن شافني عدل وكفته ويباوعلي مبتسم على طولي ..
رحت يمه وانطيته ظهر ها ابو النسوان اجيت ؟
ظل يفرك اديه بحماس اي اجيت ارجعج ..
خاف ارجع الك وانوب تتزوج عليه ..
كال هو الشرع حلل اربعة ترة ..واني بحياتي ما هزتني مره
غير صبريه مره تعاركت وياها وهزتني خلتني اوكع تمر خخخخخ
التفتت عليه مصدومة كتله شنوووو امشي اطلع بره ..
كال لج لااا تعاي هنه اربعة عيونج وضحكتج شعرج وطولج ...
ابتسمت بغرور ابتسامة نابعة من اعماق قلبي ..
كتله هاا عبالي ...
كال يله روحي البسي جبت سيد حتى يرجعنا واخذج للبيت اليوم محد يفكج مني لج مشتاقلج مشتااااقلج .
كتله هسه .. مشيت من يمه على كيف وبثكل عود
ومن وصلت لنص الهول طكيتها ركضة مال مخابيل .. كبر يالخبله حامل حامل
بدلت ورجعني عند السيد واخذني لبيتهم ، دخلت سلمت على الكل وهو اخذني سحل للغرفة ..
كعدت على السرير واجه كعد يمي ، انطيته ظهر
ظل يتغزل ويشم بشعري ..
أريد افتهم الله من يا طين خالقج مكثرلج مي و شكر مدري مكاسره بعسل.. لج احببببج شهووودة احببببج ..
التفتت عليه كاااافي جعفر فضحتنا هاي شبيك اثكل ..
مااسكت مااسكت بوسيني يله ..
كلت بدلع بعدني زعلانة عليك ..
لزم قميصه يشيله وينزله عود هو عصبي ..
لااا افتح الباب هسه واصييح بعلووو صوووتي تبوسيني لووو شلووون ولج حرام عليج طلعت من السجن جيت عليج ركض ..
وكفت كباله وتخصرت له هم ناقصك متجيني بعد وتروح لوجه الطاوة الي سجنتك وطكتك بسحر خلتك ماتندل دربك ولا همينه تنساني اني حبيبة عمرك شهودة..
كال بلهفة وحماس اموووت ع الشهد اموووت ع العسل لج انسي موضوع وجه الطاوة هسه صار ماضي ..
اريد بووووسة
اووو انته ماتفك ؟
بوسيني وافك .. ويأشر على خده ..
قربت شفايفي من خده داابوسه باغتني واقترب من شفايفي والتهمهم بذووبان ..
واديه التفت حولي وحدة على ظهري تقربني منه بتملك شديد وحب والايد الخ يغرسها بخصلات شعري ويداعبه . وصار ملكي وبعد ما يتخلص مني مستحيل ..
صار يزيد من قبلاته ومشاعره الي تقوده بحب وهيام ...
ترئ احببه جعفر حييل وهو متغير مو مثل ما جان مرافك وجهه الطاوه
اني عود جنت ناويه اكله عن المره الدخلت صورت جولييت بس نسيت ما مصدكه رجعت وخلصت من مزبلة زوجة ابويه وابويه
بس ان شاء الله اكول العمتي ام فلاح وهي تعرف هاي منو...
..........................
جابر
جولييت صار يومين من كعد من غيبوبتها توقف النزيف عندها بس لحد الان حالتها حرجه وما تطمن
رحت البيت عمي لان خابر عليه جاسر راد شاهد اتعجبت شلون يريد شاهد والجاني ما موجوده
رفعت حاجب بعدم معرفه وخليت ورحت لكيته يحجي ويه سجئ وهو ماخذ منها الموبايل ويكلها...افتحي الرمز بسرعه ولا تخليني اعيد كلامي
ردت عليه بخووف...ما اعرفه
عاط بيها بغضب....احجييييييييييييييييي
بلعت ريكها بخوف واخذت الموبايل بيد راجفه وفتحت الرمز خطفه من ايدها وهو يرمقها بنظره غاضبه
دخل السجل المكالمات وشاف مدة المكالمه من رقم ما مكتوب عليه الاسم لبس الهتفون وسمع الكلام وهو كل شويه واحتدت ملامحه
مشئ خطوات وصاح علئ رضيه ضل يحجي وياها وهي كلتله اي اندله اروح وياك
خلينه وطلعنه وصلاح راح ويانه هو خابر علئ رائد رضا وشويه واجانه
هذا الرائد عصبي فووول ما يرحم جانوا يسمونه ابو شيبه عنده خصله بيضه بنص شعره
انسان حيادي ماشي بعمله بصورة صحيحه والمتجاوز ما يرحمه علئ الحق ...
طبعا هو جان متزوج وطلك انوب اخذ بنت ابو زهراء الي انقذه من الملاكم الضربني قبل
وابو زهراء يحمد بي وحتئ بنته علاقتها حلوه وياه وتحبه وامورهم طبيعيه
اجه ضل يحجي ويه جاسر وجاسر لزم مسدسه خلاه بضهره ورد عليه بهدوء...اي اي شبيك يا رضا مو كتلك اني متاكد
اني انطيت الموبايل البنتها وجنت مسجل المكالمات وهي من حاجيه وياها كايلتلها عند خالتج ام أطياف
هز راسه رائد رضا بجبروت وانطلقنه البيت ام أطياف اخت ام سجاوي
طوقنا المكان ودكينه الباب مثل اي اللقاء قبض شئ عادي
فتحت الباب اطياف لا ياربي وجهه الطاوه ومخليتها بس هاي بعد نافخه براطمها اكثر هذن شعدهن ويه نفخ البراطم
باوعت باستغراب مخلوط بحده...شتردون
رد عليها رائد رضا بحده وغرور...وين نوال هادي دعير...
جاوبته بدون نفس...ما عدنا
باوعلها من فوك ليجوه...دوخري وخري حلكج جنه چوب منفوخ وخري
هي اجت تسد الباب وهو دفر الباب بقوه هي انضربت بالباب و وكعت وصرخت
اجت نوال تركض هي وامها
وهو جاسر شافها تخبل عبالك شاف ابليس بذات نفسه
دفع رضا بحددده وهجم علئ نوال
وهي بجت بصوت عالي ولطمت علئ صدرها ...شفت مرتك شسوت بيه شفت شلون بهذلتني وخلت جعفر كسر اييي
بعدها ما مكملة جملتها وهو ضربها براشدي الدم طفر من وجنتها بعد ما تمزقت من قوة الضربه
نهاية البارت...يتبع
كونوا انتم كونوا بخير...احبكم 💔
نور سمو العراق..😘
لا تنسو التصويت والمشاركه بكم نكتمل احبتي 🌹
باجر هماتين اكو بارت ان شاء الله 😍
والقفله حلوه كووولش اليوم 😁
كووولش يمثلون جولي وجاسر 💔😥
وتابعوا هذا الحساب والقصه مالته كووولش كووولش حلوه يالله عبابين لا اعفكم بصوت مشمش 😂😂😂
وهذي قصتها ادخلو علئ حسابها وتلكوها...
ولي يسأل عن صور المضحكه لطلحه طلحه خطيه عنده حالتة وفاه وبس سويه يتعدل وضعه ان شاء الله يسويلكم صور حلوه😍