جذبني فمك البني

البارت الثالث

يابعد الكل يا واحد لاغي دور الكل 💫

ياحنين اهلي وحنيني ...

___________

اندكت الباب ، طلعت فتحته ولد مترب من فوك ليجوه مبين يشتغل عمالة ، واكف ونفسه سريع خال ايده على صدره وظهره منحني يلتقط انفاسه بصعوبه...

سيلين : تفضل المن رايد.

_ بيت حجي وضاح..

سيلين : اي

_ وين عمامكم ..

سيلين : بغير محافظة ليش؟

_ صيحيلي واحد جبير اريد احجي وياه بسرعه..

رديت الباب وفتت صحت ماما..

سيلين : ماما ولد يريدج بالباب..

تمارة : منو هذا ماعرفتي؟

سيلين : لا ..

ذبت الاستكان من ايدها وكامت لفت شال على راسها وطلعت حاجته ، دقيقه مطول حديثهم وماما كامت تلطم وتصيح يمه وضاح سوده عليه وتملخ بشعرها ، اني واكفه مثل الصنم اريد اتحرك ماكدر ، على صوت ماما اجتي عمه ياسة وعيالها دخلو للبيت فهمو السالفه والباب انفتح كامت الجوارين تطب مشهد حزين بشكل

هنا صرت بمفترق طرق افكر اذا الخبر صحيح يعني احنه ضعنه واذا كذب وبابا ما ميت بس متكسر هم ضعنه منو يصرف علينه منو يسدد الايجار منو يجيب تكلفه علاج اختي ابويه منو يداريه ثنينهن صعبات وما ينحملن وبالخبرين كسر ظهور ...

ما مستوعبه الصار كمت ابجي بخنيك ماعرف اعيط واصيح مثلهم اني من النوع دمعتي بسكوت تنزل ماكدر ابجي كدام احد اجتي حماة عمه ياسه تحجي ويايه وتهز بيه ..

_ شبيج حبيبتي ليش صافنه ابجي عيطي موزين هيج ...

تحجي وتبجي ...

اني عيوني مفتوحه وصافنه على ماما حتى ما رمشت
بين البجي والعويل والاهات جابو بابا سوده عليه ، اللي عرفته دايخ و واكع من فوك جان واكف على العماره يناوش الخلفه طابوك ودايخ ممتوازن وراح وراحت حنيته وطيبته راح كلشي حلو وياه ، صح حياتنه جانت مره ومتعبه بس مو بمراره الفقد واي فقد ؟ فقد السند فقد العز ،،

الاب عز البنيه اذا راح ضاعت وانذلت ، صارت الفاتحه واجوي عمامي ثاني يوم لان همه بالشمال واحنه بأحد المحافظات الجنوبيه ، خلصت الفاتحه وكعدو عمامي ويه ماما ...

عمو صلاح الجبير وعمو فرات الوسطاني وعمو محمود اصغر من بابا الباقين ما اجوي...

صلاح : هسه شلون ام هاجر تجين ويانه تبقين هنا..

فرات : وين تبقه هنا اكيد تجي ويانه..

محمود : وين تجي تضل هنا وندزلها مصرف ..

صلاح : هم خوش فكره..

فرات : شبيكم انتم صدك تحجون شلون تضل وبركبتها بنات صغار وماعدهم معيل يصرف عليهم..

محمود : انت تتكفل بيهم اذا اجوي.

فرات : كلنا نتكفل قابل بس اخويه هو....

صلاح : اني من هسه ماكدر تعرفون بيه عندي ست ولد ويادوب الحك على عيشتهم..

محمود : اني عطال بطال عائلتي ما مكفيها ..

فرات : والله ما تستحون ، كومي عمي لمي غراضج وغراض اختج ورانه طريق...

نترت بيه ماما
تماره : كعدي ،،، شو بكيفكم تحجون وتصفطون بالكلام اني ما ارجع لذاك البيت لو اموت ما عولت اطلع منه واخلص والدرب الجابكم يرجعكم ..

فرات : عيب هالحجي ام هاجر وين تبقين وحدج هنا وانتي حرمه ..

تماره : ماعليه شي خاف عليه اذا اجيت ابيتكم نسيت شسويتو بيه..

فرات : الحجيه ماتت الله يرحمها منو يأذيج بعد..

تماره : وسوالف زوجه صلاح تبطل اكيد لا اني اروح يم اخويه ..

ضل يتناقشون وماما مصره على نفس رأيها ، استأذنو وطلعو ، همه اساسا حجايتهم جانت بارده يعني لو يكدرون يضغطون على ماما جان راحت بس همه ميردونه كرهونه بسبب ماما لان صاحبه مشاكل ..

من طلعو ماما خابرت على خالو اللي فاجئنه وصدم ماما من ما قبل نروح يمه..

سلوان : وين جايه انتي صدك تحجين والورث مال رجلج تعوفيه ببطونهم..

تمارة : ليش اذا رحت راح احصل فلس انت صدك تحجي..

سلوان : والله اذا جبتي ورثج وياج اخليج فوك راسي ماجبتي بيتي يتعذرج..

تمارة : هاي الخوه مالتك اني لو عندي احد غيرك الجئلك..

سلوان : ليش باقي اخوتج وين روحيلهم شكو جايه عليه..

تماره : عاشت ايدك اخويه ماقصرت اني صوجي من دكيت الباب الخطأ..

سلوان : انتي تعرفين وضعي داج وكوه مدبرها وبناتج الله يسلمهن يرادلهن مصاريف وضيفي علاج الصغيره شصير اني عيني روحي لعمامهن غصب عنهم يتكفلون بيهن..

تمارة : الله كريم تدور الدنيا سلوان.

سلوان : شنو قصدج تماره..

تماره : مالي قصد يا ابن امي وابويه ماقصرت روح خاف اخرتك..

سدته وضلت تبجي وتون على بابا هسه يلا حست بمكانته جانت تكوم وتكعد تعير بيه و تصيح اخوتي اهلي عزوتي وبابا ياكل بنفسه ، شيجيب مو بعينها لسه اتذكر هذا الحوار بينهم ابد ما انساه .....

جنه صغار كلش بس افتهم يعني وهم عمه ياسة حجتلي من كبرت ..

تمارة : شوف اني بعد ما اتحمل عيشة اهلك شنو مكعدني بنصهم احسب كم عائلة مليت والله مليت ..

وضاح : شسوي وين اوديج انتي شفتي حالي يادوب اكدر اوفر اللكمه ..

تمارة : اني هذا الحجي ميصرفلي الك اسبوع واحد اذا ما طلعتني بيت وحدي اخابر اخويه ياخذني يمه وتحلم تشوف اضفري..

وضاح : شنو تهدديني ب اخوج انتي....

تمارة : لا ما اهدد بس كاعد اكلك...

وضاح : هالله الله بيه يابه وين اوديج اني وبعدين وين عايفه بناتج العليلات ..

تمارة : اني معليه تعبت من مرضهن ومن المداراه لو من خدمه اهلك شتحمل حتى اتحمل شبابي ضاع وياك بين الفكر والمرض..

وضاح : ذكري الله حرام هيج تحجين المرض علينه حق والفقر مو عيب هذا حالي شسوي..

تمارة : اطلع اشتغل اكثر من شغله شوف اخوتك كل واحد ملبس مرته اشكال الذهب بس اني اباوع عليهن اتحسر لك اني جنت مدللة عد اهلي تالي اصير بحسره الدشداشه وعيني على هاي وذيج..

وضاح : وين اشتغل فهميني اني غير شغلتي هاي ما اعرف وبعدين شعليه ب اخوتي همه الله مفضل عليهم واني هذا حالي ، شلون امد ايدي الهم ...

تخصرت وتحجي بعصبيه وتنفض براسها..

تمارة : عوفك من الحجي وانطيني فلوس اريد اروح للسوك..

وضاح : بشنو احلفلج وتصدكين ماعندي حتى فلوس الطبيب مال بناتج كلشي ما مجمع ...

تماره : معليه كتلك اريد فلوس اريد اشتري انفه عن نفسي..

وضاح : من عندي ماقصر وياج بس هسه عذريني ما اكدر..

تمارة : زين لعد ضل جمع لبناتك وخلي فلوسك على كلبك واني رايحه لبيت اخويه..

وضاح : استغفر الله ربي واتوب اليه، لج يابه عيني العني الشيطان واكعدي عينج على بناتج خطيه ذني منو الهن..

تمارة : عماتهن يحيرن بيهن اني شكو..

حجة وياها راد ماكو قفلت عليه اخذت عبايتها وراحت لبيت اهلها وعافت اربع بنات براس بابا كلنه صغار وهو لازم يطلع للشغل ، نزل جوة صاح على عمتي ياسة ..

وضاح : ياسة ياسة عيوني وينج..

ياسة : هنا هنا تعال..

راح بابا وفتح الباب لكاها كاعده ، تنهد وكال...

وضاح : اعرف تعبتج بس تمارة طلعت زعلانه والبنات وحدهن شلون اريد اروح للشغل..

ياسة : اووف ياخويه شوكت ترتاح..

وضاح : ماكو راحة ماكو..

ياسة : شصار سولفلي...

حجالها الصار كله وطلع للشغل صعدت فوك يمنه ، الغرفه وصخه والملابس مطشرات بكل مكان صاحت على هاجر اختي الجبيره...

ياسة : هاجر تره انتي مو صغيره ليش هيج الغرفه وسخه..

هاجر : عمة اني وين اكدر اشتغل مو تدرين بوضعي.

ياسة : اي سوده عليه نسيت ياعمري والله نسيت...
كامت تلملم بالغرفه ونظفتها،،

عمه الوحيده الشايله هم بابا الكل حاير بعائلته وبجهاله ، عماتي متزوجات وعمامي كلمن بغرفه وعنده جوكه جهال بيت جدو صاير بيت وسبع بيبان ...

كملت عمه تنظيف وكعدت كابلتنه وتحجي ...

ياسة : شلون بيجن شلون راح تكملن حياتجن ويه هيج ام والله مصيبه ، جانت امي الله يرحمها خوش صاكرتها ماتت وراح الخوف من الجناين كامن يخوطن ويخربطن وكل وحده صارت هيه ام البيت وتنهي وتأمر عمامكم للأسف كلهم على كلوب نسوانهم محد بحال احد. ...

جرت حسره وسكتت

صار الليل وعمه تعبت تريد تنام وبابا تأخر كلش

تالي الليل يلا اجه حيلة مهدود ....

وضاح : روحي نامي تعبتج اليوم..

ياسة : شنو تعبتني لتحجي هيج واني راح انام هنا يمك لو متريدني..

وضاح : تعبتي يابويه روحي ارتاحي كتلج واني يم البنات..
ياسة : انام يمك والله معلية..

ضحك وفرشت اله ونمنه كلنا سوه ...

مرت الايام ونتساعد ويه عمه على البيت ، وبيوم تخربطت هاجر بليل وبس تبجي بصريخ فز بابا مخروع راح عليها لكاها زركه صايره لبس ملابسه على السريع شالها ونزل يركض ، على الصوت طلع عمو صلاح صاح شكو جاوبته عمه..

ياسة : تخربطت هاجر ..

صلاح : يووو خطيه شلون قهر هذا..

دخل للغرفه لبس دشداشته ولحك بابا للمستشفى انتضرنه للصبح وانفجعنه بخبر وفاه هاجر ، هنا بابا تدمر انكسر ظهره نصين ، صار اشبه بخيال الموتى ، سمعت ماما بالخبر اجتي لبيتنه تدك وتلطم وحملت بابا المسؤولية بابا فقير ومن اهل الله ، خلاها تحجي تحجي وهو ساكت حتى الناس صدكو سبب وفاه هاجر هو ابوها وصار اللوم كله عليه...

رجعت ماما للبيت ومن يوم وفاه هاجر جرت عدل لان حست بتأنيب الضمير شلون عافتها وخافت على تقى لا تموت وتخسرها..

مرت سنه ضبط وانعاد الفلم نفسه ويه تقى هم تخربطت جانت كاعده كلشي مبيها اخذوها للمستشفى وتوفت بنفس المرض كايللهم الدكتور سبب الوفاه ..

_ هو الفشل الكلوي بسبب ارتفاع اليوريا بالدم سبب ضرر شديد بالكلى فقدت الكليتان قدرتهم على ترشيح الفضلات بشكل صحيح أدى الى دخولها في مجرى الدم وللأسف هذا الصار ويه اخواتي..

البيت صار كئيب وبابا انكسر وحالته النفسيه تأزمت بطلوه من شغله صار عطال بطال ...

مرت الايام بين حسرة وقهر على خواتي ، وبيوم اجه بابا لعمه ياسه وكال..

وضاح : ياسة اني راح اروح لمحافظة ________ جنوب العراق هناك لكيت خوش شغل تجين ويانه..

ياسة : ليش المن تاخذ وياك وشعندك متغرب هنا اخوتك واهلك..

وضاح : الماعنده رزق ماعنده وطن ياسة ، وين الكه رزقي يصير وطني ، راح اخذ تمارة والبنات وهم ما اكذب عليج بعد ما اتحمل اضل عايش هنا ويه ارواح البنات احسهن يخنكن بيه لان ماكدرت اسويلهن شي..
حجاها وغطه وجها باليشماغ وبجه..خلت ايدها على كتفه وكالت..

ياسة : حبيبي صلي على النبي هذا امر الله قابل بيدك..

وضاح : لو عندي فلوس جان ما ماتن ، جان سفرتهن وعالجتهن الفقر كتلهن العوز موتهن ...

ياسة : حبيبي الله يصبر كلبك العليك سويته وماقصرت ..

وضاح : انتي صح صغيره بس عقلج جبير وتفتهمين اريدج تجين ويايه هاي تمارة اخاف اعوفها وحدها بلبيت ما تتأمن وخايف تهمل البنات..

ياسة : اجي وياك ميخالف بس مدرستي شلون..

وضاح : انقلج هناك باجر اجيب كل اوراقج ، ها شكلتي..
ياسة : بكيفك اللي تشوفه صح ومناسب الي سويه..

باسها براسها وراح على ماما يحجي وياها وكبت العيطة بينهم وصلت للضالين ماعرف شلون قنعها ورتبنه امورنه ورحنه لغير مكان ولغير محافظة بيت طين وحياطينه بارده بس جان على كد حالنه يادوب يكدر بابا يدفع الايجار مالته..

مرت فتره استقرينه بابا بشغله مرتاح وماما نفس طبعها هواي عدها تصرفات سيئه ...

عمه ياسه كملت خامس اعدادي وكعدت ماكملت لان بابا حالته الماديه مو حمل تكاليف دراستها هو اصر تقدم وهيه رفضت بعدين رجعها وكملت سادس ونخطبت  حبها ولد جوارينه اسمه ادهم كتل نفسه عليها اهله ما قبلوا لان احنه بنضرهم مو من مستواهم اول شي عائلتنه فقيره وبسيطه وهمه طاكين ،

واضافه لهذا عمه ما داخله جامعه رادوله وحده مكمله بس هو اصر عليها صارت حروب ويه اهله حتى ابوه سحب كلشي من ايده ، بس بعدين ماعرف شلون قنعهم واخذ عمه تزوجو سنه ضل وسافر يكمل دراسه بره....

اللي فززني ورجعني لواقعي حصوه انشمرت على الجامه مال الهول اول شي عبالي يتهيألي بعدين ، كمت رحت للمطبخ سويت حليب حار وكاكو علمود بلاعمي حسيتها محتقنه كلت اشرب شي دافي بلكت للصبح تفك ،
جبته وجيت للهول خليته على الطبله علكت التلفزيون وطفيت الضوايات كلبت بالقنواه طلع فلم كلت اتابع اقتل الوقت ، اخذت الكلاص وبديت ارتشف منه شويه شويه جان حار كلش ردت اجوي بلاعيمي علمود اطيب بسرعه ،
اندمجت ويه الفلم لهناك وهم انضرب الشباك بس هلمره بشي اقوه ،
كمت طفيت التلفزيون حتى تصير ظلمه و اذا باوعت ما ابين فتحت البرده باوعت ماكو احد فارغ الشارع مجرد التفتت هم انضرب الشباك تخبلت معقوله شنو السالفة رجعت باوعت هم ماكو احد ،

ضليت واكفه بمكاني ، الى ان تعبت وايست سديت البرده ورجعت كعدت

هم انضرب الشباك كلت ما كوم لو مدري شيصير هذا هو كاعد يلعب بأعصابي..

هلمره راح على شباك غرفتي رحت باوعت لكيت واحد واكف ناطيني ظهره لابس اسود من فوك ليجوه وكلو فوك راسه كلشي ممبين منه ، بس هيئتة وطوله وقيافته تكول هذا ادهم ،

رجف كلبي كمت لبست على السريع ونزلت اركض اريد اتواجه وياه كافي لعب ، وصلت للمكان الجان بيه ماكو اختفى زين شلون عرف اني راح انزل ،

ياربي احفظلي عقلي معقوله هاي شبيج سيلين لو متعرفيه هو يقراج نسيتي كم موقف وموقف صار وكشفج المصيبه يعرف بشنو افكر لان هذا العقل الشايلته هو غذاه بفكره لهذا فاهمه اكثر مني...

رجعت للعمارة لاكاني عمو ابو عبد سلمت عليه..

ابوعبد : خيرج طلعتي تركضين..

سيلين : عمو شفت ولد واكف هنا قبل شويه..

ابوعبد : وين يعني ؟

اشرتله على المكان ضحك..

ابوعبد : هذا شارع عام واكيد ما يخله من الناس ليش منو عندج وتسألين عليه الاعرفه انتي وحيده..

سيلين : لا ماعندي مجرد سؤال...

ابو عبد : ليش انتي عندج عداوات مهزومه من احد شو وضعج ما يطمن ....

سيلين : عمو الف مره سألتني وكتلك اهلي ميتين منين اجيب اهل واعيش وياهم..

صرت عصبيه ورجفت..

ابو عبد : يابه على كيفج اسف بس استغربت موقفج وخوفج لهذا سألت..

سيلين : ماكو داعي للأسف اني اعتذر منك بس والله تعبانه حيل هاي الايام...

ابو عبد : الله يساعدج واي شي تحتاجين بلغيني اني ابوج وام عبد امج.

سيلين : والنعم والله متقصرون تصبح على خير.

ابو عبد : وانتي من اهله..

صعدت بخيبه امل تصورت راح اشوفه الكاه واكف واعتذر على الصار ونرجع سوه ، كلبي انقسم نصين نص مشتاقله ونص خايف منه ....

دخلت للشقه وسديت الباب رحت للمطبخ ردت اسوي اكل ، النفس متريد وماعادت تشتهي العسل ، عفت ورحت للحمام غسلت وجبه هدوم وشريتهن وعندي كوي كعدت اكوي وكل شويه بالي يسرح بمكان ، كملت ورحت كتبت قائمه مسواك كلت انطيها لام عبد تتسوكلي ، لزكتها على باب المطبخ علمود ما انساها الصبح من اطلع...

خلص اليوم نمت وكعدت بدلت وطلعت بوجهي للدوام اول ما وصلت للميز مالتي لكيت باقه ورد صغيره بيها ٣ وردات ملفوفه بورقه بيها كتابات ناعمه بالانكليزي شكلها حلو ولطيف ، شلتها لكيت بيها كارت صغير فتحته مكتوب ...

( stay calm)ابقي هادئة

اخذت نفس قوي وذبيته ، كملت قرايه كاتب

( مبروك عملك الجديد )

هزيت راسي مستغفره ، رحت على زميلتي سألتها..

سيلين : هذا الورد منو جابه..

_ ماعرف اول ما اجيت جان موجود..

سيلين : منو اجه قبلج من الموظفين؟

_ اني اول وحده اجيت والباقين اجوي ورايه ..

سيلين : شكرا ..

_ عفوا..

عفتها ورجعت كملت شغلي بس بالي كله مشغول بيه شلون دخل هنا وهو ماعنده باج ، عود كيفت صارله كم يوم ماكو كلت ايس مني او مل تعب ...

كملت شغلي وخلص الدوام رجعت للبيت ، صاحني ابو عبد ...

سيلين : ها عمو..

ابوعبد : سيارتج كملت وكلفت كذا ورقه .

سيلين : حيل عمو هواي منين اجيب..

ابوعبد : يابه سيارتج صارت خرده موزين رجعوها الج ...

طفرت الدمعه بعيني تشكرته ورحت صعدت...

راح اضطر ارجع اسحب فلوس منين اجيب لعد ثاني يوم رحت للمصرف سحبت فلوس ورحت لابو عبد نطيته الفلوس واستلمت سيارتي صح رجعت مثل قبل بس ضجت منها لان انضربت دخلت للبيت وكبل رحت للدفتر سجلت شكد ساحبه لحد الان تقريبا ١٠ ملايين ،

غمضت عيني بتعب شوكت اسددهن كل يوم اكول بعد ما اسحب وتطلعلي شغله صفح واروح اسحب من الفلوس ،

ومرات عود اجمع واكول اروح اسدد بدال اللي اخذتهن وهم تصيرلي شغله بحيث اصرفهن واصرف فوكاهن من الراتب ، يعني من كل النواحي ما متوفقه ولا رزقي بيه بركه ولا حياتي امنه ولا نفسيتي مستقره ، بركان مشعول بداخلي بسبب اذيتي لهذا الانسان .....

ثاني يوم طلعت بالسياره حسيت بروده بعظامي عرفت تمرضت رحت للشركه اجر بروحي كوه دخلت بوجهي للغرفه سلمت جاوبوني ببرود،،،

الموظفين يضوجون مني لان ما انطي عين ولا اسولف ولا اجامل حديه بشكل على كد الشغل وبس لهذا الكل انسحب مني الصراحه اني ارتاحيت لهذا الشي،،

كعدت وره حاسبتي وبلشت اشتغل كأنما رجل آلي بدون مشاعر لا اتعب ولا استسلم اشتغل لحد ما اكمل ما اخذ استراحه ولا اريح ايدي اتعب نفسي علمود من ارجع للبيت اذب روحي وانام نومه عميقه ،

كملت شغل وطلعت حسيت بدوار كلش قوي هملت صحتي كلش بهاي الفتره حتى اكلي مو شي لو اسوي لفه جبن لو اكتفي بشرب الجاي لو مشروب ساخن متكون من حليب وكاكو رجعت للبيت لكيت بالباب اربع اكياس كبار استغربت شنو ذني مالمن عفتهن ورحت دكيت باب شقه ابو عبد طلعلي ابنهم الصغير..

_ ها خاله امي تره مو هنا..

ضحكت يعرف جايه عليها اختصر السلام والسؤال..

سيلين : ابوك وين؟

_ راح وياها..

سيلين : متعرف وين راحو يتأخرون لا..

_ ماعرف بس اذا تردين شغله ضروريه منهم خابري ابوي..
سيلين : عاشت ايدك هسه اخابره..

فات الولد واني طلعت موبايلي اتصلت على ابو عبد

سيلين : الو شلونك عمو ..

ابوعبد : هله بنتي شلونج خوماكوشي..

سيلين: عمو اكو اكياس باب شقتي انتو متسوكيلي شي..
ابوعبد : لا ابد لا متسوكين ولا شي..

سيلين : لعد شنو ذني منين اجني..

ابو عبد :ماعرف والله يابه عوفيهن على حطيتهن من اجي اشوفهن الج لو ادزلج عبد الله..

سيلين : لا ميحتاج هسه اني اشوف شكرا عمو..

ابوعبد : هله بنيتي..

سديته منه ورحت وكفت يم باب الشقه التفتت منا ومنا امنت ماكو احد دخلت المفتاح بالباب فتحته وشلت الاكياس دخلت وسديت الباب برجلي جنطتي وكعت من كتفي بلكاع عفتها كعدت على القنفه وفتحتهن وحده وحده

فواكه لحوم مخضر حليب نساتل معجنات جاهزه بس احميهن خمرة مال جبن ،

ضحكت هاي ام عبود متسوكتلي خطيه لان نفس القائمه اللي كتبتها جايبتهن وعمو ابو عبد مطفي ميدري ،

كمت اخذتهن وسفطتهن بالثلاجه ،

فرحت لشغله وحده المعجنات بس احميهن وام عبود جايبه هواي خليتهن بالمجمده وحميت وحده اكلتها ويه الجاي عدلت راسي شويه ،

كمت رحت للغرفه نزعت ملابسي بدلت ورحت غسلت وجهي وبللت ركبتي احس صخونتي بدت تزيد ، رحت نمت ماضل شي للغروب بس ماكدر اقاوم بعد اخذت غفوه نص ساعه وكعدت خابرتني نسرين سولفنه شويه وسديته ، ردت انظف الشقه مابيه حيل اندكت الباب فتحته ام عبود..

ام عبد : ها خاله شلونج هاي توني جيت بوجهي عليج..

سيلين: هلو ام عبد الله يساعدج وعاشت ايدج على المسواك كلشي جايبه واكثر من الكاتبته ..

مبتسمه واحجي هيه عكدت حاجبهة ...

ام عبد : بس اني ما متسوكه وانتي ما موصيتني..

اختفت ابتسامتي...

سيلين : يعني اني ما ناطيتج القائمة مال مسواك..

ام عبد : ابد غير ذاك اليوم ما كررتيها حتى اني استغربت بعدين كلت جوز عدها اللي يكفيها وما طلبت..

سيلين : لحظه لحظة اني كاتبه قائمه وبيها ،،،،

سكتت وطبيت اركض للمطبخ باوعت القائمة بمكانها يعني لا ناطيتها لام عبد ولا واكعه مني وهنا تأكدت كل شكوكي ادهم فايت للشقه حتى بيوم اللي فتح الباب ومافات هذا هو وهو اللي رش العطر ، صاحتني رحت يمها حجيت طبيعي وياها ما اريدها تحس لو ابين الها اني عندي مشكله لان اذا عرفو يطلعوني منا و وين انطي وجهي..

ام عبد : ها وين رحتي ..

لزمت كصتي وردت اثولها ..

سيلين : هاي اني طلعت موصيه صديقتي بالدوام ومتسوكه ودازتهن بيد اخوها هسه دزيتلها مسج وتأكدت هيه..

ام عبد : ها الحمد لله ...

سيلين : شكرا خاله خوفتج..

ام عبد : الشكر لله امي..

طلعت وغمضت عيني بقهر وبجيت بعز ضوجتك مني وتفكر بيه وبأحتياجاتي ....

يتبع....