البارت السابع عشر
رواية...جولييت واسرها...غياهب الإنتقام
بقلمي...نور سمو العراق
💔💔💔💔💔💔💔💔💔💔💔
ومن يتق الله﴾ هذا شرطٌ .. ﴿يجعل له مخرجًا﴾ هذا وعدٌ .. ﴿ويرزقه من حيث لا يحتسب﴾ هذه مكافأةٌ .. فحقق الشرط .. تستحق الوعد ..وتنل المكافأة
.....................................................
ريهام...
فما ضنك برب العالمين...
الثقه بالله شگت البحر الموسئ عليه السلام ونقذته من فرعون وقومه
والثقه بالله نقذت ابراهيم وجعلت النار بردا وسلاما علئ ابراهيم
والثقه بالله نجت نبينا محمد صلئ الله عليه وآله وسلم من الغار ومن الكفار
لذلك الثقه بالله محد يكدر يحس بيها اله الئ يعرف من ربه
والحمد لله اني ثقتي بالله كبيره ويقيني موجود وربي ابد ما خييب ضني وانطاني علئ كد نيتي
اجمل خبر واسعد خبر بربي انطه للانسان هوووايه انعام بس اجمل نعمه اني احسها برأيي هي الامومه
واحس الامومه هي العاطفه الاكبر عند كل مرأه
ممصدكه اني حصير ام الحمد لله الي رزقني بهاي النعمه بعد ما فقدت الامل والمرض استولئ علئ جسمي بس ربي ما قصر فقدت الامل بكووولشي اله بربي
اخذت التحليل من ايد الدكتور واني اباوع للتحليل بفرحه عارمه وابعد عن عيوني الدموع الحارقه الي حجبت عندي الرؤيه ...
شهكت واني اباوع للدكتور...فدوووه دكتور فدووه متأكد يعني صح اني حاااامل لو يعني ممتاكد
ابتسم بهدوء ورد عليه...لا بابا انتي حامل وحملج واضح
واردف بجديه...شوفي بابا ريهام انتي كنتي مريضه بالسرطان والطفل حيتغذه علئ جسمج لذلك يا بنتي انتي كل شهر تراجعينه ننطيج لقاح ونعاين حالتج وننطيج وقايه ومقويات وان شاء الله كل خيير
هزيت راسي بلهفه وقبول واني امسح دموعي...اي دكتور ان شاء الله والله كل شهر اراجع هنا وابد ما اقصر
ابتسم وهز راسه بقبول واني خليت وطلعت ملهوووفه والدموع بعيني جان صلاح منتظرني بالانتظار
من شافني وكف بقلق واضح علئ ملامحه الاسره واجاني بخطوات سريعه لزم اديه بخووف وهو يشوف دموعي ...هاااا ريهام شبييج شكووو ليش تبجين
نزلت عيوني باسئ واني اخفي فرحتي...المرض رجع عليه
بهتت ملامحه وتنهد بضيق ابتسم بهدوء ورجع لزم ايدي كال...يالله حبيبي لا تضوجين ميخالف تتعالجين عادي
هزيت راسي بقبول واني اريد اكتم ضحكتي واكمل تمثيليتي عضيت شفايفي ...ياربي سامحني سامحني ما قصدي اكذب والله بس كذبه بيضه اريد اشوف معزتي عند صلاح ههههه
كال...زين حبيبتي انتي تنامين بالمستشفئ لو شنوو
لزمت ايده ومشيت...اممم لاااا كالو تعالي بعد شهر
ركبنه بالسياره بعد ما طلعنه من المستشفئ وهو شفته حيييل انقهر وتضايق ساق بسرعه ورجع باوعلي كال...زين رهوومه ليش بعد شهر مو اخاف المرض ينتشر
رفعت عيوني بتفكير...مممم مو هو اللقاح لازم بعد شهر ولو لااا يمكن من ادخل بشهر الخامس...اهووو هسه اني شعرفني اراجع دكتوره نسائيه وهي تفهمني شنو الاسويه
وكف السياره باستغراب كال...اكلج انتي شجاي تحجين وبعدين شو احسج ممهتمه ريهام شبييج احجي شنو لقاح شنو شهر الخامس
حطيت ايدي علئ بطني وابتسمت ...مو هو الحمل هيج يتطلب لقاح وهماتين لازم اراجع دكتوره كل شهر لان اني جنت مريضه واخذ وقايه
هو فتح عيونه علئ وسعهن والفرحه بينت علئ وجهه اباوع الاديه ترجف مثل رجفتي من كلي الدكتور حامل
لزم اديه بهمه وارتباك وفرررررحه عاااارمه ...ريهاااام رر ريه ريهاام انتي انتي صدك حاااتتمل دكولين حمل يعني انتي حامل مووو ؟
ابتسمت واني اباوع لعيونه وبريقهن اللامع هزيت راسي بإيجاب
ما حسيت بي غير سحبني وحضني وهو يبوس بيه بالسياره وجان نهار والسيارات رايحه وجايه
حاولت اخلص نفسي منه وادفعه بس ما كدرت حجيت وياه بصوت هامس...صلااح صلاح عييب فضحتنا لا يجوون الشرطه ياخذونه هسه يكولون ذوول منحرفين
ابتعد شويه وهو يضحك ويرجف بنفس الوقت وبعدها احتدت ملامحه ضربني علئ ايدي حييل واني عطت وسحبت ايدي باوعتله بخووف...عزااا شبييك
رد بغضب...ليش ولج تخوفيني علييج ودكليلي رجع المرض ولج لو مجلوط بالله شدكلين الاهلي جنت اشاقه وياه
حطيت ايدي علئ شفايفي واني اضحك...ردت اشوف غلاتي عندك
باوعلي بطرف عينه كال....لو تدرين شصار بيه من كلتيلي رجع المرض غير كلبي و وكع ببطني واجيت اله شويه اشك القميص واضغب
ضحكت....ههههه خو انت كل ما صار وياك موقف وركضت علئ القميص تشكه عبالك القميص حايط نصيص
لزم ايدي وتكلم بجديه...لا والله ريهام ليش هيج تسووين بيه والله ما احب هيج شقه ثكييل وبعدين ترئ انتي انسانه متدينه وهذا انحسب عليج اثم لان انتي جذبتي
رفعت اصبعي لشفايفي...تووووبه كذبه بيضه والله
ساق السياره ورد بعدم اهتمام...هاي مال جذبه بيضه سولفيها العشيرتج واني خطيتي بركبتج
لزمت ايده بضحكه...لا لا عفيه حبااااااااب هسه استغفر ربي وانتي تسامحني مو هيج
هز راسه بنفي
حطيت ايدي علئ بطني...شبيك حباب مو فرحانه بالطفل لا تضوجني
هو باوعلي وضحك لزم ايدي وباسها كال...واني فرحان اكثر منج والله بس صدكيني ريهام من كلتي رجع المرض حسيت روحي طلعت من جسمي
اني اخاف عليج وما اريد اخسرج ومجرد ما ينذكر المرض اني اتخبل وهسه مدام صرتي حامل
اريدج تديرن بالج علئ نفسج واذا حابه تخلصين حملج عند اهلج ترئ عادي اني ما عندي مانع
ابتسمت بحزن عليه شكد يحبني لزمت ايده بحنان...لا حبيبي اني اريد اخلص حملي عندك اريدك انت تداريني توكف ويايه
اشر علئ عيونه....بعيوني رهووومه اذا تردين اطلك ببدالج هم اطلك ادللي
ضحكت بمرح وصوت عالي....ههههههههه لا حبيبي صلوحي ولا يهمك اني اطلك واجيبلج درزن جهال انت عليك بس تتحملني وتتحمل نساوتي
ومن هسه اكولك اني مشتهيه سماگ وهااا هماتين مشتهيه نومي بصره اطحنه واخلي عليه ملح يعني اريد اشياء حامضه
مطكت من الحموضه وهو ضحك كال...لا تكعدين تمطكين عليه خلينه نرجع للبيت واجيبلج حموضة العراق كلها...
الطريق كله هو فرحان ما مصدك بحملي،وصلنه للبيت وكلنه الماما رضيه وعمتي ام فلاح وهنه حييل فرحن
واني خابرت ماما وبابا وجابر و وقار واتصلت علئ جاسر اخبر جولييت بس ما فتح خط
وماما رضيه راحت جابت جكليت وطشته عليه
وصلاح باليل ما خله شئ حامض مراح جابه انوب هو الي ياكل مو اني
واني اضحك عليه اكوووله انت تتنسئ لو اني اشو مخليت شئ ما اكلته
كال...مو جاي اسويلج واهس حتئ،تاكلين
وهااا ترئ اريد ابني كوون هييج سبع واريده يطلع قبل ابن جعيفر لان ما يصير اني اكبر من جعفر وجعفر ابنه اكبر مني
رمشت بعيوني...يا عزا هو غير مرته حامل قبلي شلون ابنك يطلع اكبر منه
رخئ ضهره علئ التاج مالت السرير ورد ببرود...جيبي بالسابع وغلبيهم
رفعت حاجب بعدم قبول...يااا عود انت تحجي صدك
ضحك وتقرب مني اخذ بووسه عميقه وجريئه...لا بويه اجذب عليج شوكت ما يجي اهلا وسهلا بي وحيا الله...
ضليت شويه اسولف وياه واضحك وبعدها رحت توضيت وصليت سجدة شكر الرب العالمين علئ النعمه الحاوطني بيها....
وشويه واجو امي وابويه وجابر و وقار خطيه حييل فرحوا بهل خبر وامي حضنتني وضلت تبجي وابويه محتار شيسوي اليه...
انتظرت جولي تجي واخبرها بهل خبر الحلو بس هي اتاخرت وما اجتي
ان شاء الله غير مره اكولها رحت لكيت صلاح نايم اني حطيت راسي علئ صدره وغمضت عيوني واني ارسم احلام ورديه لهل طفل الي اجاني معجزه من رب العالمين
بعد رحله من العذاب والمرض الشاق
الحمد لله رب العالمين ما يخيب ضن عباده...
..............................
جولييت...
رجعنه بالسياره للبيت تاخرنه تقريبا ل 12 باليل جان الجو حلو هسه جنه داخلين علئ الشتا والجو لا بارد ولا حااار
باوعت للساعه عزا بثنعش والملائكه البريئه العندي لحد الان منايمين
ابوهم اشترئ الهم غزل البنات وهم لازمينه ويوكلون بالديج وهو خطيه ما يقبل ما يريد ياكل
ومرتضئ يكوله...اتل حبيبي قييب « اكل حبيبي طيب »
جريت نفس وتنهدت...ماما عوفوا خطيه بهذلتوا احواله
عافوني احجي الوحدي وهم يجيبون الديج منا ويخلو منا دبكوه تدبك لان الشعر بنات صار مايع ودمرهم
وابوهم ما يصيح عليهم كاعد يخابر. من حلص مخابرته كتله...جاسر انت هم صيح عليهم ميصير هييج عنودين وشالعين كلبي
رد ببرود...خليهم بلعبون شرايده منهم
باوعتله بخزره...لا والله يعني حلووه احنه بالالعاب وهم ديجوهم ويركضون فشلوني
انوب هناك البنات يضحكن يكولن ذوول ولدج بالله شكلهن ولدي جايبين الديج وجايين
كتلهن اي ولدي،بس هسه اشتريناه هذا الديج من الطريق
وهذا مشمش الكلب يكولهن...لا شدابه بيبي طبريه دابته النه...« لا جذابه بيبي صبريه جابته النه »
هو طكها بضحكه وبصوت عالي ....هههههههههه خرب غيرتهم فشلوج
فتحت عيوني باستفهام..تحجي صدك تضحك هيج يعني عادي ترئ عيب يفشلوني اني امهم
جر نفس وباوعلي كال...هم اطفال لا تسويها قضيه
نفخت بملل...شنو الي اسوي قضيه جاسر اكولها الك بصراحه ولدك مو مؤدبين والدلال الزايد ما ينراد
انت اكعد وياهم وفهمهم لا تضحك بوجههم يعني حلوه احنه اليوم طالعيين والديج يفتر ورانه شنو جنطه ...
رد ببرود...خلي يتونس خطيه
هزيت ايدي...ويتونس ويه جهالك ترئ مرعدوه تمرعد خلو يكفر بصبريه
جر نفس...هسه شتردين
جاوبته بقهر...احجي وياهم لا تخليهم بس عليه اني تعبانه والله وياهم كل شويه مغسله ومبدله واكل ومدري شنو
وكل شويه راكضه وراهم لا يسون مصيبه من غير مساج رجلين مشمش
وهاا الديج ماخذله صفحه كل شويه واجوني سوي جاي صبيله اكل والله اني مداريه الديج اكثر منك بسببهم...
رد بهدوء...هو كل ظالم الله يسلط الاظلم منه انتي ظالمتني وما مهتمه بيه والله سلط عليج ولدج ظلام وضلموج بالديج
بلعت ريكي بغصه...انت جاسر ما اخذ منك لا حق ولا باطل اذا عاجبتك وضعية اطفالك عادي بكيفك اني شدخلني...
وصلنه للبيت بس اني جنت ضايجه ما ادري شبيه رغم بالبداية حييل فرحت بس من رجعنه مدري حسيت نفسي مزعوجه
يمكن اثار الحمل او يمكن اني اخاف من المستقبل واخاف بلي يصير بالقادم
وبصراحه اني صح اطفالي وكحين ومتمردين بس،ولا يوم شكيت منهم وحتئ،من اخذوا الديج وياهم عادي متقبله الموضوع مو جديده عليهم هاي السوالف
بس اني فجاة كلبي انقبض وضليت اتحجج بيهم
دخلنه البيت انوب رحنه للغرفه هو نزع الجاكيت مالته واني اخذتهم غسلت الهم
وبدلت ونزعت حجابي وهو كذلك بدل
صاح عليهم بحنان...بابا رضاوي تعال انت ومجتبئ عندي موضوع وياكم...
هم اجو يركضون وحضنوا ...هااا بابا عبيبي اني اعببك
ابتسم وباسهم بحنان...اني اريد احجي وياكم بابا انتم ليش هيج وكحين ومعذبين ماما
رد مشمش بعصبية...اني مو وتح
ومرتضئ جاوبه...والله اني عباب هدا ممش دول نعله سكيته نعله سكيته ...
ضربه مشمش...انسب شداب والله اني عب سكيته ما عب وده القاوه
انوب تعاركو بيناتهم كتله...شووف شووف جاسر شلون وكحين وما يحترمون
رد عليه بغضب...انتي كافي لا تزيديها مدكليلي شبييج تخبلتي
سكتت مجاوبته
رد مشمش...بابا هي سكيته دوول نعله ابووك ممش نعله ابوك روطي
فتحت عيوني مصدومه من كلامهم وكفت بعصبية ورفعت اصبعي بتهديد..وجذابيين والله جذابين اني ابد محاجيه هييج
صحت بوجههم انتم ليش تجذبون منو معلمكم علئ الجذب
عفتهم وطلعت برا واني ضايجه وروحي احسها مختنكه وتريد تفر من جسمي
طلعت بالحديقه واني لازمه گلبي ياربي دخيلك احس،روحي حتفر من جسمي
شبيه شصار بيه ما اعرف احس اريد اصرررخ اعييط املخ شعري حاله مو طبيعيه
رفعت راسي العنان السماء وهمست بضيق...ياربي انت ملجئ شبيه اني ليش انكلبت ميه وثمانين درجه
شصار ويايه شكوو اريد اروح اكعد يم ريهام بلكي تقره عليه ارتاح شويه احجي،وياها
كعدت علئ المرجووحه تقريبا ربع ساعة شويه الجو برد حضنت نفسي بخوف من الضلمه والبرودة الي داعبت بشرتي وداعبت اغصان الشجر...
حسيت بي كعد بصفي وحط ايده علئ كتفي همس بصوت هادئ...شبييج ليش فجأة انزعجتي صاير شئ
حطيت ايدي علئ وجهيي وبجيت بصوت مجهش بالبكاء...ما اعرف شبيه اني ما اعرف شبيه احس روحي مختنكه احس روحي مثل الطيره الي تريد تفر من كل شئ
تنهد وسحبني خله راسي علئ صدره وضل يمسح علئ شعري وهو يقره سوره قرآنيه قصيره ...
يهمس من بين شفايفه بوقار ايماني...بِسْمِ اللَّهِ الرَّحْمَنِ الرَّحِيمِ
قُلْ أَعُوذُ بِرَبِّ الْفَلَقِ . مِنْ شَرِّ مَا خَلَقَ . وَمِنْ شَرِّ غَاسِقٍ إِذَا وَقَبَ . وَمِنْ شَرِّ النَّفَّاثَاتِ فِي الْعُقَدِ . وَمِنْ شَرِّ حَاسِدٍ إِذَا حَسَدَ ....صدق الله العظيم....
مسح علئ صدري ورجع مسح علئ وجهي احتضن وجهي باديه وعقد حواجبه...قبل شويه ما جنتي هييج شكو شبييج شنو الزعجج لا دكولين مرتضئ ومجتبئ لا تخلينهم حجه
حطيت اديه علئ شفايفي واني اكتم عبرتي...اي جاسر خليتهم حجه اني مدري شبيه تعتبت نفسيتي،فجاة
ضل يقره عليه ويسمي شويه ارتاحييت ...
كتله بخووف...الجهال وين راحو لا يسون مصيبه
ضحك كال...لا ناموو ونامت مصايبهم وياهم
سحبني من صدر الثوب بعنف كال بغضب مصطنع...صدك ولج سابتني كدام ولدج
جاوبت بارتباك وخوووف...لا والله جذابين اني ما اسب حتئ بكلبي بس للامانه للامانه مرات اكولهم اءءءءءء
ركز بعيوني ورد بسخريه ...اي شنووو احجي بلعتي لسانج
بلعت ريكي ...هاااا لا بس هز يعني مرات من يضوجوني يعني هييج
قطع كلامها وكمل الباقي...تسبيني مووو؟
جاوبته بسرعه ...لا لا مو اسبك والله جذابيين بس اكول هيج يعني مرات من انقهر منك او تضوجني اكلهم عليمن تطلعون خبيثين علئ ابوكم لو اكولهم جايبين خباثة ابوكم وجايين
والله والله غير هل كلمه ما كلت بس ترئ ما تعتبر مسبه هاي تعتبر ذم
وهاا ترئ عادي اني مرات هماتين امدحك اكولهم مثل ابوكم اذا ما ياخذ حقه ما يرتاح
باوعلي باستهزاء...وهم شيسون انتي ذابتها براسي ما تصدكين يسوولهم شغله
رفعت اكتافي بعدم مبالاة...اي بس ترئ،هااا اني ما اسبك خاف يجذبون عليك واني احجي ما اضم عليك
لو سابتك جان كلت اي سبيتك ترئ اني لا اخاف ولا استحي ...
رد عليه بغرور...بس ترئ هاي هم تعتبر مسبه من دكليلهم خباث وهااا اعتقد دكليلهم انذال لان هاي كلمتج المعتاده
جاوبته بترقب وبنيه مو صافيه...بعد ما اعرف يجوز حاجيه بس ما اتذكر ولو هسه لو تسالني شنو متغديه ما اذكر
هو هز ايده ورخه ضهره علئ المرجوحه وضل يتمعن بالنجوم واني كذلك رجعت ضهري ابتسمت كتله ...جانت امنيتي من اني طفله توكع نجمه من السماء واحتفظ بيها تالي السما كلها طاحت فوك راسي هههههه
باوعتله شفته ما ضحك علئ كلامي وطلع باكيته وضل يدخن
رجعت اتاملت السما كتله...اتذكر بيوم عرسي امي ويايه جانت بالصالووون من طلعنه من الصالون اجه صلاح اخذنه
لحد الان اتذكر حنانها عليه وهي كل شويه دكولي...يمه جولي اصعدي بالسياره برجلج اليمين يمه كولي بسم اللة يم الزهرة ام الحسن والحسين تحضرج
لحد الان صوتها الحنين ونبرة صوتها الدافي تطرب باذني
جانت حييل فرحانه بزواجي وفرحانه بيه وما درت هل زواج راح يبعدنا عن بعض
اني يا جاسر لو ممتزوجتك واخويه كتل اهلك ما جان فاركت امي ولا صار بيه الي صار
رد عليه ببرود ونفخ الدخان بالهوا...ماكو مشكله اخذج فصليه
درت نفسي كلي عليه وباوعتله بصدمه...ياااا شنو فصليه وين اكو ديرة فصلية ابو رضاوي لا ترجعنه لعهد العصملي
وهااا ترئ ما اقبل اجي فصليه لا عبالك ترئ محد تقبل بالذل ومحد يستاهل اضحي الخاطره
رفع حاجب...افاا محد يستاهل مووو؟ ومصايبج السويتيها بسبب اخووج والله لو طالبج فصليه تجين
هزيت راسي بنفي واخذت باكييت الجكاير منه والجداحه خليتهم بحضني...لا والله وداعة مجتبئ ومرتضئ ما اجي كوول ليش ما اجي لان كلتلك مستتحيل اضحي
اني هسه تعيرني بالسويته والمشاكل الصارت لان اني ما ردت تكثر المشاكل بينك وبين اهلي وما ردت اشوفك بعيوني قاااتل
صفة بوجهي واني طلعت جكاره و ورثتها لزمتها بين أصابعي وباوعتله وابتسمت ادري بيك حسيت بيه غامضه بس حكولك مثل وانت افهمها بطريقتك
ابتسمت وكتله بهدوء...اثاري انت الحزن كله ...وترئ اني احب حزني...
رجعت اباوع للسما واني ابتسم وهو مصدوم من كلامي رفعت الجكاره لشفايفي وما حسيت غير بضربه قاسيه علئ ايدي علئ اثرها وكعت الجكاره علئ العشب ولهبت القليل من اجزاءه
باوعت اله مصدومه من تصرفه وهو زمجر بغضب...ولج بربوك تردين تدخنين
عقدت حواجبي بتذمر...اي اني اتنسئ علئ الجكاير وترئ حرام عليك تمنعي وهااا ترئ يطلع بخشم ابنك
رد بغضب...انعل ابو ابني لو اعرف خشم ابني ينترس جكاير ما اخليج تدخنين ...
درت وجهي وهمست...حرام عليه ترئ
هو رجع يباوع للنجوم كال...انتي دكولين عليه اني بالنسبه الج حزن وهل حزن انتي تحبينه قصدج تحبيني مووو صح
شفته لحد الان رافع راسه يعانق السما سحبت باكيت الجكاير وبسرعه خليته بصدري بطريقه خفيه
رديت ببتسامه...و شنو الفايده ترئ تضل حزن
باوعلي وابتسم باستهزاء...ولا يهمج نبدله فرح
حضنت نفسي ببرد ...يالله خلينه ندخل ترئ بردت
هو وكف كال...يالله امشي
التفت يمنئ يسرئ وهو يدور علئ باكيت الجكاير والجداحه واني من حسيت بي مشييت علئ السريع حتئ ما يلحكني
بس هو اسرع بخطواته ولزم عضدي بقسوه ودارني عليه كال...طلعي باكيت الجكاير ترئ اني من قبل حالف اذا شربتي جكاره السعج بيها تلسع وبشفايفج
جاوبته ببراءه وفتحت اديه...هاااك ما عندي شوووف
هو تلمس جسمي وخصري عوود يدور علئ الباكيت واني اكمز من لمساته الجريئه
مد ايده بصدري واني دنكت ولزمت ايده بارتباك...اهووو وخررر وخررر ما عندي
سحب الباكيت والجداحه وهز راسه باسئ بعد ما عض شفته...وتجي وتشكي من مرتضئ ومجتبئ دكول عنوديين وهي رب مال عناد الخووثه
انوب ضامتلها باكيت شكبره شكده بصدرها ذاك هو مبين عبالها اعمئ ما اشوف
رديت بكذب ...هوو اجه
ضحك بسخريه...جااا شكد منحرف هل باكييت ولج صدك لو كالو كيدهن عظيم ذبيتي تهمه علئ الباكيت المسكيين
رجع لزم ايدي بجديه...لا جولييت والله قسما بذات الله اذا شفتج مدخنه ما تلومين اله نفسج صدك احركج بالجكاره
رديت بسرعه وصدق...لا والله شبيك اني لا ادخن ولا اتنسئ علئ جكاير بس اريد ابين الك مثل ما انت ما تحب ادخن اني هماتين ما احبك تدخن
مشيت قبله ودخلت للغرفه لكيت مشمش وروضي نايمين والديج نايم بصفهم صايره اغار من هل ديج حييل يحبونه اكثر مني
بستهم بحنان وتاسفت لان قبل شويه عصبت عليهم
تمددت علئ الجربايه وجاسر اجه نام بصفي سحبني الحضنه واني نمت بحضره صدره
جنت اليل كله ما نايمه شكد حلوو من يصير حنيين ويتغيير
بس هسه هو هادئ حييل صح طلعني من مشكلة اخوويه بس اكيد حيضل وراهم وراهم منا لمن يرتاح
اتصالاته كثرانه وكل شويه تجي رسائل مخفيه ما اعرف مصدرهن شنوو ...
حطيت ايدي علئ خده وابتسمت اتذكرته من ضرب ايدي واني دا اريد ادخن
عود هسه اني معترفتله وكايلتله انت حزني الاحبه تالي هطرني علئ ايده بقسووه هههه
شفته تحت تأثير حلمه وهو يحجي بهمسات و همهمات ما فهمت منهن شئ بس كلمه وحده جانت واضحه
وهل كلمه زلزلت روحي وثارت بركان ملتهب بصدري رغم كووولشي هو ما نساها واني نايمه بصفه وهو يحلم بيها ويهمس باسمها
اني سمعته وهو يكولها...شااام شااام
ضليت صافنه بوجهه مصدوومه من كلامه ومن ذكر هل اسم
هل اسم عذبه وعذبني وهو هم تعذب اي شام يمكن حالها مو احسن من حالي هماتين بنيه مظلومه ومسكينه ويمكن عانت هوووايه
والاصعب من هييج بنتها انقلت غدر وظلم وطغيان وعلئ ايد اخووويه شلوون مصيبه ياربي
حذيت ايدي علئ،شفايفي واني اكتم اهاتي ودموعي الحارقه خليت و وخرت اللحاف مني ونمت بصف اطفالي
والدمعه ما نشفت من عيني منا لمن اذن الصبح صليت ونمت...
هو كعد صله شافني نايمه يم اطفالي واني ابجي اجه رفعني الصدره وباوعلي بقلق شاف الدمعه ماخذه مسار علئ خدي الشاحب ...
اخذني للسرير وحضني ومسح دمعتي تقرب مني اكثر وباس شفايفي بذوبان
ابتعد شويه ومسح دموعي كال...منو وياج ليش تبجين انتي مو طبيعيه
تنهد وجاوبته بكذب واني امسح بدموعي...لا بس تذكرت امي
نفخ بضييق وحضني كال...اششش ان شاء الله الوضع يتغير واذا الج رجعه الامج ترجعين
رفعت راسي من صدره كتله...بس اني بعد ما اريدها
ضحك ورجع حضني..دنامي نامي رافعتلي عيونج جنج عيون نزون اليفه ...هسه بس تجي امج تركضين الحضنها
ابتسمت وحضنته ما ادري يمكن صدك بس والله كلبي حييل مجروح منها....
تنهد ورجع مسح دموعي كال...هاي انت كل شويه مطلعتلج سبب واني اشوف السبب لا امج ولا اطفالج
رفعت راسي بدهشه...لا والله ترئ صح هم وكحيبن واخاف يكبرون ويضلون هيج وبس المشاكل من وراهم
ضحك كال...لا اني جنت هيج مره من المرات تعاركت وضربت واحد بطابوكه وطلع الدم
فالمره الضربت ابنها اجت النه وشتكت مني واني بيومها شردت ...
اجتنه بيومها صبريه جايبه مطي مالتها بس،مو كنوش
واحنه جنه صغار وجان بالشارع العام مالتنه جسر اني وجابر وصلاح نصعد المطي علئ الجسر وننزله يعني شلون ولدج هسه من عذبو الديج
فهذا المطي مل خل وجيت من الجسر هو جان جسر ناصي تعبر منه العالم لان جان الشارع سريع بالسيارات والعالم تخاف تعبر
جيت المطي والسيارت اجت تتداعم وكلها ضلت تصيح وتغلط علينه واحنه نهزمنه واجو اشتكو عند ابوووي كلوله جاسر هيج سوه
من رجعت لزمني ابووي وكتلني امي رضيه عبالها كتلني لان ضربت الولد لزمته كلتله ...يااا علئ بختك مهيوب تضرب جاسر وتريد تجبنه لان ضرب الولد صدك جذب هم جهال يتعاركون منا ويتصالحون منا
ابوي عاط بيها خلاها جفلت بمكانها كلها يا غضب يا ولد هذا المصيبه ابو المشاكل لازم المطي مال صبريه ويصعده الجسر وينزله والمطي مل منه وشمر روحه من الجسر والسيارات جا تداعمت وسوالي مصيبه
لطمت امي رضيه علئ صدرها...يااااا وتكتله لخاطر المطي
ابوي رفع اديه اجه يخنكها بس استغفر ربه وراح وبيومها اجتنه صبريه ضلت تهلهل وتصيح هسه تخسرولي مطي
انوب رحنه وشدينه رجل المطي وداويناه هههه
ضحكت بصوت عالي ...ياااا انت معذب المطي و ولدك معذبين الديج
ضحك كال...اي والله جانت طفوله حلوه اتذكر مره جان عدنه فريق نلعب طوبه
جان جعفر الكولجي اعترض ما راد يصير كولجي بس اني جبرته
اشو هذا كل طوبه تجي ما يصدها اكله...ولك ليش ما تصدها انت مو كولجي يكلي والله حالف بالعباس اي طوبه ما اصد
رجعت ضحكت بضحكه قويه هو حط ايده علئ حلكي كال...ولج اشش فضحتينه
كتله بمرح...كمل كمل
سحبني وحضني كال...وجابر ميت جده جان ابو امه و لابس دشداشه سوده وملثم وحاط الدشداشه بالبجامه ويركض بالطوبه
كالو هذا ليش ملثم رد عليهم...والله حزنان علئ جدي
حطيت ايدي واني اكتم ضحكتي يااا عزا غير فريق هذا
هز ايده كال...لو لاعب بيهم جان هسه احنه ماخذين كاس العالم
اردف بضحكه كال..جعفر جان يكول ولا فزنه بكاس هسه كون نفوز بكاس مال عرك...من ذيج الساعه عرفته يطلع عركجي
واردف بحزن...جانت اشواق نلعب فوك السطح ونخليها الكوولجي خطيه كل ضربه تجيها بس هي صامده احسن من جعفر ما يصد يكول والله حالف بالعباس
باوعلي وكال...تدرين مشتاق الاشواق ترئ ابوي من زمان موصيني علئ اخواتي
بلعت ريكي بغصه ...خطيه روح الها
رد بنفي...لا ما اروح خلينه هييج احسن...
بعدها ضل يسولف عن ذكرياته واكثريتها تضحك وتاريخه حافل بالمغامرات مثل ولده
وهسه اتاكدت ولده طالعين عليه
نمت وغلب عليه النعاس واني اكول ان شاء الله القادم افضل...
...........................
شهد...
جنت كاعده بالطارمه اكل جبس ليز حار واندومي وككاو شئ ما يشبه شئ بس النفس هيج مشتهيه
زوجته ابويه صايره خدامه عندي وشريد تجيبلي اي هييج احسنلج من سحلتج جنج وجهه الطاوه
جريت نفس...اوووف يوجه الطاوه مربيتلي عله اخذت زوجي مني وشمرتني شمرة الجلب
بسيطه والله بسيطه اله اطيح حضج وحض جعفر وياج ما اطيح حضج الوحدج ...
اندك الباب بقووه اجت مرة ابويه فتحتها اسمعه تحجي...خيير شتريد يالله امشي،ولي منا ما عدنا الك مره
فز كلبي من مكانه اكيد هذا جعفر ابو العرك حبيب نويلة
شمرت الجبس من ايدي و ركضت طلعت بسرعه بطني كبرانه واني صغيره صايره جني تمرايه
باوعت الجعفر وهو من شافني عاف مرة ابويه تحجي الوحده ودخل عليه اني رجعت خطوات زعلانه منه
وهو حضني .باسني بخدودي...شلونج شهوده اخبارج احوالج ان شاء الله مرتاحه
دفعته بغضب وابتعدت خطوات عنه باوعتله من فووك ليجوه ...خيير شعندك جااي،
رد بولهان ...مشتاقلج
عقدت حواجبي باستهزاء...لا والله اشتاقتلك جهنم كوون كووول اميين
ولك انت نسيت شسويت بيه لو اذكرك ولك انت دمرتني وطيحت حضي تذكر من دكلي جنج صبريه من تسرح بالهووش لو لااا
اشر علئ نفسه بصدمه..واني اني شوكت وروح وجهه الطاوه ما اتذكر
رديت بدون نفس...سكران لو صاحي
جاوب بحب ونعاس...اول مره بحياتي صاحي وبعد ما اسكر اله بيج
هزيت ايدي وضحكت باستهزاء شفت زوجتة ابةيه تباوع علينه كلتلها...خير شنو فاتحه مسرحيه روحي سوي جاااي هي عضت شفايفها بقسووه وخلت وراحت
هو ضحك وغمزلي كال...والله قووويه شنو هاي عبالي عايشه حياة سندريلا ومرة ابةوج السحاره طلعتي انتي السحاره
باوعتله من فوك ليجوه بتذمر....اي مو اني نووويله هسه كوول انت شعندك جااي
تقرب مني وحضني وهو يشم بشعري،وخدي ...احببج ولج شلون تعوفيني وترحين واني مريض واتقئ تمر ونوه ومدري شماكل
لزم بطني وابتسم بفرح كال...بعدج ما جبتي والله قديمه عبالي اجي الكه ابني بطولي وصاير دكتور
رفعت حاجب باستهزاء...عشتووو وعلئ منو يطلع دكتور علئ ابووو اكيد تلكاه لازم البار وبطله بيده
رد بحده وعصبية...يخسئ،اني ابني يشرب لا والله اكتله واموته واشرب من دمه كلشي ولا الشرف والعرك والعربده
ضحكت بسخريه..ولعد ما دكول الروحك
حك ركبته بفشله...كلتلها واتفقنا بعد لا اشرب ولا شئ و وعدتها وصار كم يوم لا شارب ولا شئ وحتئ اصلي ههههههه
شفتي التطور الصار اصلي وما اشرب بتاريخ العراق ما صايره
بس هااا ترئ الفضل لنويله شربتني سحر وزوروني وصرت زيين اول مره وجهه الطاوه تسوي شئ وتخليني اصلي
دفعته ...ديله عيني روح تهنئ بوجهه الطاوه ان شاء الله منك العرك ومنها السحوره
رد بقهر...لا خلي تووولي راح اطلكها ولج والله اني ما واطنها بعيشة الله شلون بين ليله وضحاها اصيح نويله مرتي نويله الحب ترئ،والله ذيج هي مبين مسحور بس انتم اغبياء ما تفكرون
هسه اني لو متهورش وميت من وره السحر ربحي بيمن بنويله لو بسحرها
لزم ايدي فدوه شهوده ارجعيلي
زوجة ابويه جابت الجاي واني تنهدت بعد ما راحت كتله...تطلك وجهه الطاوه يالله...
رد بمرح...اطلكها واطلك الخلفها غاليه والطلب رخييص
كتله بدلع...يالله روووح الله وياك عود من تطلكها تعالي
اشو هذا ما صدك لزمني حييل وباس شفايفي حييل وخله و راح وهو يغني ....ام يوسف الحكيلي حبيبي صار يكرهني تعاي اقريلي هل فنجان بلكن يرجع يحبني
وهز ايده من وره نويله وجماعتها ...ضليت ادور سحارات ههههههههههاي
ضحكت عليه وسديت الباب يارب بلكي صدك ويخلصنه من وجهه الطاوه ونعيش مرتاحيين لان بصراحه مليت من مرة ابويه ومن هل عيشه الزفره ...
رجعت اكل صايره شسمني من الاكل هل ايام مرتاحه وادلع هههههه.....
..................................
جولييت...
عرفت بريهام حااامل والله والله من صرت حامل ما فرحت مثل ما فرحت الريهام بحيث حضنتها وضلينه نبجي
والله رهوومه دره مال الله كوووولش،تستاهل ياربي يثبت حملها وينصفها لان صابره وحبابه ومن نسل طاهر
ما انسئ وكفة ابوها ويايه واخوها وحتئ امها...
ثاني يوم رحنه للبيت مالتنه احنه طبعا بيتنه ميتين متر ميه بيها بنيان عادي وميه مسويها حديقه يعني هيج ...
من رجعنه واني اسولف عن الحديقه وماما رضيه تضحك عليه كال...جووولي يمه اشوفج مسويه حديقه بس لا الج قصد بيها
ضحكت كلتلها...اي اريد السوك يصير بس الي واني ابيع مسواك للسوك واكسر علئ بستان خالتي صبريه ههههههه
هي ضحكت كالت...خوش راح تطكين طكه منا خياطه ومنا تبيعين مسواك
ريهام ضربتني...والله عمي طلعتي داهيه حتصيرين مليارديره هههههههه
رفعت حواجبي بمرح...اي عيني وحجيب اربع دجاجات ازوجهن الديج مشمش ورضاوي و اضل ابيع بيض وهنه يبيضن هههههه
ريهام كالت...اشتريلج هايشه بعد وزوجيها كنوش وخلي تجيبلج هوايش مطعمه بطعم المطايه ههههه
ضربتها...انجبي ريهام شهل نسل الطايح حضه هطا يعتبر زنا لا حبي اني مزرعتي حلال وكله حلال
وكفت بمرح...رهوومه حبي شنو مشتهيه اسويلج النبي عليج كولي لا تستحين اسويلج باذنجان قلي ام شوي
ريهام...ههههه هااا نسيتي ولج فتحي محل بصف بيتج
هزيت ايدي...اي سبع صنايع وان شاء الله البخت ما ضايع بس لا والله رهوم اذا تردين شئ كليلي شنو مشتهيه اسويلج
ردت بحب...لا يروحي تسلمين انتي هماتين حامل ما بيج حيل...
كرصت خدها...لا مالج شغل بيه حييل انتي بس اطلبي وامري واني انفذ
ابتسمت وباستني دخلت نوال شافتها باستني اشوو هاي خزرتنه وراحت...
طلعت اشوف مشمش وروضي،ويين سمعتها دكول الخالتي ام فلاح...خاله شوفيهن شلون متصاحبات عليه
وهاي رهيمه صايره اللوگيه مال جوووليت ولا يستحن عود يغورن بيه هن حوامل
فدوه خاله خابري جعفر وخلي يجي ترئ ما يصير ضال هناك وما نعرف شيسوي،ما يسوي
جاوبتها خالتي...مالج شغل اني الزم ريهام واخليها تبتعد من جولييت
تكسرت اشلاء روحي بصدمه...تبعد ريهام عني ليش اني شبيه وتبعد ريهام عني والله مو من حقهن
نوال جرت نفس كلتلها...خاله بس جولييت تمردت هوواي وهي اخت القاتل بس مو صوجها صوج جاسر لو يذبحها اشرف اله ترئ نزلت راسه بالطين
وهو محتار شيسوي الها انوب راح يكعدها ببيت الوحدها صدك حظ العواهر جواهر
ردت عليها خالتي...جاسر عقله براسه ويعرف خلاصه وهو مصر يطلع من بيتنه ويستقر ببيته واني ما اكدر امنعه هو بكيفه
وبعدين كافي تحشين براسي عليها ترئ البيه مكفيني خليها تطلع من هل بيت هم احنه نرتاح وهم هي ترتاح
نوال بخبث...وتنطين ابنج الها
ام فلاح بسخريه.... اي مو ابني فرخ جاهل ولج انتي شلج بهل حجي وبعدين شنو انطي الها هو لولده مو بس الها...
عاد هي ما رضت علئ الحجي ضلت تصييح وتدعي وانوب صعدت كطعت بناتها تكطع تخبلت مدري شبيها....
شويه ودخلت اشواق جايه هي وزوجها اني عادي سلمت عليها وهي كذلك ما بينه شئ
هماتين باست مشمش ورضاوي تحبهم حييل هي وخاصه مجتبئ...
جاسر دخل جان جاي يروح للدوام لزمته بتوسل وحنان...فدوه جاسر تصالح انت واشواق ترئ خطيه وجل من لا يخطئ
رد بجبروت...لا خلي توولي هسه اني جعفر رغم موقفه الحقير بس ترئ ما حقدت عليه بكد اشواق
لان جعفر عقله مو براسه بس هاي عقلها براسها وتمرد عليه واخذت ابني
اخذ اغراضه وخله وراح ما شافها حتئ
وهي خطيه اجت ملهووفه عليه كالت...وين جاسر اريد اشوفه
بلعت ريكي بتوتر...هاااا بالدوام ان شاء الله من يجي من الدوام احجي وياه
هي عرفت طلع اول ما شافها راحت وهي تجر بثياب القهر والذل مسكينه هي انلعب بعقلها وغلبتها العاطفه
يارب يرزقها ويقر عينها خطيه والله...
............................
وقار
عمي الشيخ كال اليوم نروح البيت مهيوب الله يرحمه اريد اروح واخذ جعفر واريد احلف نوال بالقران اذا بعد تسوي سحر او مسويه سحر الحعفر
طبعا هي كل شويه وخابرت ...خلي يجي جعفر وين جعفر واريد جعفر بس احنه كلنالها جعفر ما يجي لان جاسر متحلف بي بس يشوفه يكتله
لان احنه ما نريده يروح الها ...
صدك خلينه ورحنه البيت اهلي لكينه جاسر مو هنا عمي ضاج كال...شلون نسيت اني،جان لازم اتفق وياه ما يروح للشغل...
بس عمي استدعاها هي وماما رضيه وامي كلهم حضرن ...بس جولييت جانت بالمطبخ
اني صدك شفت اختي اشواق اوووف صار شكد مشايفتها صدك اخابرها بس مو مثل ما اشوفها بسته وحضنتها وسالتها عن احوالها وهي كذلك
اجتمعنه كلنه بالاستقبال وجان صلاح موجود وجعفر وحتئ جابر
عمي كعد كلهن ...بويه احنه لحل النزاع وحتئ البيت يكون امن وما يفقد استقراره انه قررت احلفج ام سجئ بالقران الكريم
هي وكفت بارتباك...شنووو شنوو علئ شنو تحلفني ليش احلف اصلا شنو اني هسه وجاي احلف واني ترئ مرة ابنكم المظلوم المات مغدور من اهل جولييت
وبعدين علئ شنو تحلفوني
رد عليه جعفر بدون نفس...لان انتي مسويتلي سحر وهذا السحر بهذلني وشويه اجيت افقد حياتي فانتي لازم تحلفين
وبعدين شنو اني بيوم وليله اهجم علئ مرة اخووي واطفالها واصيح بنص العالم نوال مرتي ونوال احبها
ردت بصياح هز البيت هز والله ما احلللف ما احلف لو شما يصيير واني مو سحاره انتم السحارين
اني بس اريد اعرف شغله وحده انتم ليش تكرهوووني ليش تتهموني باطل عساها بحضكم وبختكم وان شاء الله تتلكوها بعزيز كلبكم
والله يقهركم مثل ما قهرتوني
رد عليها جعفر بانزعاج...هسه تحلفين لو شلون ولا تضلين تصيحين علينه عود تضيعين السالفة
صفنت ثواني وكالت....ما احلف اله جولييت تحلف هي ما مسويه سحر
جاوبها جعفر ببرود...حتئ لو تحلف اني اطلكج اطلكج
ردت عليه باستهزاء...ديله عساس هسه انت فد مندله
عمي كال...بويه وقار روحي صيحي جولييت وتعالي
اني لكيته بالمطبخ طلعت من المجمده بطل مي متروس هو مي بس هو مال ببسي الدبل كوولش كبير
وجامد حييل كلتلها بسرعه وهي جانت حييل خايفه وترجف هي بيها طبيعيه من اخوها كتل اهلي،لحد الان تخاف من ادنئ مشكله دكول المشاكل ما تجي من وراها بس المصايب
كلتلها ...عمي،يريدج بسرعه
هي اجت تركض وشايله بطل الثلج بيدها وصلت للباب كالت...يااا خلي ارجعه هسه اني المن جايبته
فتح الباب رضيه وجرتها اخذت البطل منها وخلته علئ الطاوله صار بصف نوال
هي سلمت وعمي صاح عليها كلها تعالي بويه اكعدي يمي..اريدج تحلفين بالقران دكولين اني لا مسويه سحر ولا اسووي حتئ نوال تحلف
هزت راسها بقبول وكلتله...اي عمي والله احلف اني لا مسويه ولا اسوي
عمي باس راسها كلها...ادري بيج بويه بس اريد اشوف علة ام سجاوي
كال...عمي وقار روحي جيبي القران
اني رحت اجيبه وهي نوال بعدها تصييح ...انتي اختت كتال رجلي انتم حرمتوني من رجلي
ردت عليها جولييت بهدوء...اذا تحبين زوجح ليش كتلتي روحج علئ حما
بعدها ما مكمله كلمتها ونوال شالت بطل الثلج الجاااامد وجان ثكييل حييييل وشمررررته بقوووووه ناحية جولييت ما نشوووف اله الدم طفر علئ الحاييط...
صرخت بصوووت عالي....جولييييت
نهاية البارت...يتبع
كونوا انتم كونوا بخير...احبكم 💔
نور سمو العراق..😘
لا تنسوا التصويت و المشاركه بكم نكتمل
واعتذر اليوم ماكو صور الطلحه لان خطيه عنده حالة وفاة الله برحم موتاه وموتئ،المسلمين اجمعين
التصميم من ابداع سمسمه...😍
تصميم من ابداع ديم 😍😍😍
للمبدع طلحه 😍😍😍
وتابعو هل حسابات فضلا وليس امرا AtyafAtoofa