بارت مفاجئ
رواية...جولييت واسرها...غياهب الإنتقام
بقلمي...نور سمو العراق
💔💔💔💔💔💔💔💔💔💔💔
وكبَرنا احنه وصِغر كُلشي ،
الدَرب والشوگ والمَلگى وضَمير الناس🥀
.................................
جولييت...
الاخ ..صدك هل كلمه ما بيها بس حرفين بس الها معاني هووواي ومو كل اخ اخ...
اكو بيهم تحسينه ضلع كل ما تميلين يميل وياج
واكو هو يميلج ويوكعج بقسوة علئ الارض...
ما اريد احجي عن اخواني لان تاريخهم اسوود ورغم كووولشي اني احبهم مو بيدي تغلبني العاطفه وما اريد الهم الاذيه
بس الاخ الحقيقي هو جاسر وهو ضلع الاخوته والسند والعضيد من بعد ابوهم
وصدك هو جبل سندو نفسهم عليه وكل واحد منهم يتعرض الشده هو يسندهم بيها...
هوايه امور اتذكرها من تمرضت ريهام جان دائما علاجها غالي وهو مشه صلاح علئ فلوس وتكفل بكل علاجها
وحتئ جعفر جان ينطي ومن يسويله مصيبه هو يروح يحلها وتكلفة زواج جعفر علئ حسابه
و وقار من تزوجت شلون اهتم بيها وكبرها كدام زوجها وبيت عمها ورغم هم اهل
وحتئ اشواق اشواق جان حيل يحبها حتئ مره من جنت مخطوبه سفرها الغير دوله تتعالج هي وزوجها بس مصار الها طفل
بس هو ضاج من اشواق من اخذت مجتبئ هو يعني حييل يحب اطفاله وهي استغلت ضعفي و استغلت موقفنا واخذت ابني مني
ومن ذييج الساعه لهل ساعه هو لا يحجي وياها ولا يسال عنها لان يكول تجاوزت حدودها وما احترمتني
وهسه رغم السواه جعفر وهو متخبل من جعفر بس احسه حييل مقهور عليه صح مقهور عليه اكثر بس يكول جعفر مو طبيعي وهاي مو تصرفاته
وحتئ گلي اني انقهرت علي شنو كاعد عند بيت عمي الشخص ما يرتاح اله ببيته وخاصه جعفر ما متعلم يطلع ويبات هلكد عند اي شخص...
وكال...السبب مو منه من نوال وان شاء الله بس خلي اتاكد من سالفة السحر واعرف شلون اربيها واطيح حضها...
اني صرت انام بغرفته بس شنو هو قافل غرفتي،ومصر جعفر هو الي ينضف الغرفه لو تضل بعد سنه
واني بصراحه كل ما أتخيل جعفر وهو هاجم عليه واعيده بذاكرتي اخاف وانهبط...
وبما ان غرفتي مقفووله اني ونايمه بغرفته حييل مهتمه بنظافة الغرفة
عزلتها ورتبت كووولشي بمكانه وكنستها وبعدها دا امسح وجنت مدنكه وامسح بوصلة المسح
هو دخل يخابر حط ايده علئ ضهري ودخل للغرفه بحذائه
عدلت نفسي ولزمت الوصله بيدي واني اباوعله يحجي بهمه بس ضجت حييل مسحت الغرفه زيين واني حااامل وضهري مكسور وهو يدوس بحذائة...
حط ايده علئ خصره ونفخ بضيق...جابر انت عووف الموضوع القديم ما نحجي بي ابببد انت واحد خاين و خنتني انت وعمي وصدكني لو محصل وقار ما اخابرك...
بعدها لزم راسه بوجع ورد عليه...هسه مو اكلك عوف هذا الموضوع جعفر اخذتو للنجف لو بعدكم
عقد حواجبه باستغراب ورد عليه بسرعه...ليش بالله ما يروح للنجف ترئ هذا تمرد هووواي
جر نفس عميق وتنهد...شوووف جابر اذا ما اخذتو عندي صديقي شيخ وهو كال اجي للبيت ما عندي اشكال
وبعدين ترئ جعفر مو هييج وهو اخووي ما اريد اله المضره واعرفه ما يرتاح عند اي شخص اله ببيتنه
اردف بعد ما جر نفس وزفره....اووووف لك هذا متخبل رسمي بس مو صوجه صوج بنت النعال الحاطينها ببيتنا
انوب واحد يحجي وياها ولزمت القران وحلفت ما يشهرها القران ويفكنه منها...
هسه شوف جابر انتم لا تتعصبون عليه وانطو علئ مايه وان شاء الله يصير خيير
هذا امره مو بيده جعيفر واعرفه رغم يشرب بس ويه الحق بس هل صفه بي حلوه وتخليني احبه
ضل شويه جابر يحجي وهو رد عليه...اي والله اول ما تزوج شهد وضل وياها كم شهر شلون صار لا يشرب لا يسوي مشاكل
بس هسه تخبل طلك البنيه انوب يوميه سكران وبعدها رجع هجم علئ عائلتي حسدناه مدري شنو ولو ليش حسدناه الولد انثول من السحوره...
جر نفس عميق كال...جابر ديرو بالكم عليه بين ما اتفق ويه الشيخ وانشوف شنسوي
واردف بسرعه...وهسه يالله مع السلامه وما اوصييك ترئ جعفر امانتكم...
قفل الخط وكعد علئ السرير باوعلي كال...شو واكفه ما تجين تسويلي مساج دكولين هذا زوجي جاي من الشغل تعبان
ابتسمت بهدوء وجريت نفس...لا ما اكول لان انت بس اكول دكول يالله تعالي،واني امرأه مشغووله
عض شفته ورفع رجله دينزع حذائة كال...غير تستقر مديرة الاعمال
رفعت حاجب بغرور...وشنو مديرة الاعمال احسن مني ؟
باوعلي وابتسم وهز راسه بعدم قبول...لا عمي انتي احسن منها ومن اهلها
باوعتله بدلع وغرور...شئ اكييد
هو ضحك وراح اخذ ملابس ودخل للحمام اني ضجت مبين يضحك عليه
والله اجيب مكينه رجاليه وهناك ببيتي اشتغل شغل هيج اكعد وزن اخلي هو يداين مني واسبوع واكض عليه الباب اسويها مذله...
كملت مسح ورحت سبحت بالحمام مالت البيت وسبحت مجتبئ ومرتضئ...
رحعت للغرفه ابدل الهم سمعت صوت المي لسه جاري ياااعزا بعده يسبح شنو السالفه يريد يطلع النفسه جلد جديد
انوب بس لا غرك ومات لا اسم الله يضل ابو الجهال ولا يهووون ابببد
جنت لافه شعري بالخاولي والبس بمجتبئ جان كلي...سكيته سكيته هاي ودهه القاوه ليس حلدها سبييييييييييير...« حلكها جبير »
ضحكت بصوت عالي علئ كلامه وكعت علئ الجربايه رجعت كعدت واني اضحك كرصت خده ...لا ماما مو كبير صغير
فتح اديه حييل ...لا سبيييير سنه قاااسه..« لا كبير جنه طاسه »
حطيت ايدي علئ شفايفي واني اكتم ضحكتي...ولك ماما عييب لا تحجي هييج ميصير
رد عليه بعناد...لا ان عيييب « مو عيب »
جاوبته بزعل...لا حبيبي ميصير عيب هي اكبر منك لا تحجي هيج احنه مو لازم نحترم الاكبر منه
مد شفايفه بزعل...ما اعبها وده القاوه وانتي سعليج هي امت؟...« ما احبها وجهه الطاوه وانتي شدحلج هي امج ؟ »
عقدت حواجبي بقرف وكلت بكلبي ويييع لو نويله امي جان تبريت منها من اول يوم ولا نزلت دمعه عليها
لزمت خدوده بحنان...لا مو امي بس لان هي اكبر منك
رد بغرور ...مو اتبر مني هي بس حلدها سبير « مو اكبر مني هي بس حلكها جبير »
عضيت شفايفي،واني اكتم ضحكتي يالله ينتبهون علئ كووولشي انوب نوال تاهمتني عود اني اعلمهم واني والله اببد ما الي خلگ السوالفها
وهي من كثر ما تعارك بيهم ضلوا يكرهوها ويشوفوها محلوه وينتبهون عليها...
دخل مرتضئ وهو شايل الديج والديج اكبر منه كال...ماما اح اتبح الديج « ماما راح اسبح الدييج »
عطت بصوت عالي....لااااا
هو مو عرفني ما قبلت اخذ الديييج وركض سريع واني اركص وراه دخل للحمام فتح البوري بلله واني لزمته اخذته منه
طلعته بره واني احجي عليه...عزا بعين عدوكم ولكم خافوا الله بهل مسكيين
رد عليه بعصبية...هو وتح طار هواي ما تابح... « هو وسخ صار هوايه مسابح »
عقدت حواجبي بانزعاج وقهر...ماما شبيكم ليش هيج تعذبوني وتخلوني اركض وراكم حتئ النونو الي راح اجيبه الكم خايفه يوكع بس من وراكم وبعدين اخاف اجيبه وتخنكونه
ما اسمع اله صوت حاد وهي دكولي بصدمه....انتي حااااااااااامل ؟
درت وجهي عليها شفتها نوال عقدت حواجبي وتجاوزتها واني لازمه اطفالي ومشيت
لزمتني من كتفي كالت بقلق،و وجهه صار اصفر....احجي انتي حاااامل
دفعت ايدها بتذمر...وانتي شدخلج حامل مو حامل شنو انتي زوجي اشو كووولش متستحين
فتحت عيونها بعصبية....شلووون حااامل انتي شنو من مله علئ شنو تكثرين بجهالج ترئ ما يشرفون وخالهم قاتل...
حطيت ايدي علئ بطني وجريت نفس...لا هذا الموضوع ما هامني بس القاهرني شلون اكثر بيهم وانتي مرة عمهم ...
رفعت حواجبها ومطت شفايفها المنفوخه وردت بخبث...اني اكووول العمتي ام فلاح وهي تشوف وياج صرفه
باوعتلها بانزعاج...كملتي كلامج
باوعتلي من فووك ليجوه وكالت...ما عندي وياج كلام
ابتسمت ببرود...لعد الله وياج
اخذت مجتبئ ومرتضئ ودا ادخل مجتبئ كال...ماما اطيح عليها وده القاوه
ابتسمت...لا ماما عيب
دخلت لكيته هسه طالع من الحمام وهو يلبس قميصه هم ركضوا هجموا عليه ويبوسون بي
هو حاضنهم ويبوس بيهم رفع عيونه اليه كال...ما تتعلمين من ولدج لو مخلصتها بس صافنه
ابتسمت ...لا تعلمت
رفع حاجب بتساؤل...وشتعلمتي بالله
رفعت عيوني بتفكير واني احسب باصابع اديه...اممم اول شئ لازم الديج اشربه جاي واسبحه واقوم بواجبه ثاني شئ لازم بين ثانيه وثانيه عركه ويه وجهه الطاوه وثالث شئ اذا مرتضئ سب ابو مجتبئ لازم مجتبئ يسبه ههههههه ...ورابعا لازم البس النعال تك وتك...
هو ابتعد منهم وتقرب مني حضن خصري كال...وما تعلمتي البووس والحضن والحنان الي مغركيني بي
رمشت بعيوني....لا اني مؤدبه هههههه
كرص خصري حيييل...عوووفي الادب علئ صفحه ولا تخليني افششر
باوعتله بمرح...متكدر تفشر تخاف مني
رد بقلق...اي ارجف منج
ابتسمت ونزلت عيوني وهو مركز بملامحي التعبانه
رجع باوع المرتضئ ومجتبئ كلهم...بابا روحو البيبي رضيه راح تموت الديج وتاكله
عاد هم كووولشي ولا الديج طكوها ركضه بسرعه وهم يسبوون برضيه المكروده ههههه
اول ما طلعوا لمس خدي بطرف اصبعه كال...جولييت تحبيني ؟
بلعت ريكي بخووف ورهبه ما اعرف شعوري شنو ولا احساسي شنو كبريائي ما يسمح اليه افصح عن الي بداخلي ولا اكدر اتغاضئ عن امور صارت بالماضي
عضيت شفايفي ونزلت راسي
هو رفع زجهي باطراف اديه الدافيه وركز بعيوني كال....عيونج حلووووات بيهن بحر من الاسرار
ابتسمت باستهزاء...متحبهن مووو ؟
جر نفس...نقطة ضعفي هل عيووون شكد ما جنت اريد اقسئ مجرد نضره من هل عيوون يضيع كل شئ مني،ويختفي
غمضت عيوني وكلبي يرجف همست بعذاب...اتذكر مره كلتلي ما احبهن يشبهن عيوون عاصم
ركز بعيوني ثواني وجاوب بلهفه...يروحلج فدوه عاصم الكلب شنو هو ويشبه عيونج انتي بحر سما صااافيه
حطيت ايدي علئ خده واني اباوعله بقهر....خايفه جاسر خايفه هل كلام يوم ويومين وينمحي تعرف شنو انت ترفعني للسما وبعدها تضربني بالارض
غمض عيونه وجر نفس بغموض ...بس كل شئ اختلف كل شئ مدام اهلج سافروا انتي تنتمين الي انيي ومن مسؤؤليتي اني انتي الگشه الي تعلقت بيها تفتهمين شنو احجي
رمشت بعيوني ما كدرت افك شفرة هل غموووض
تنهد بضيق وضل يباوعلي واني منتظره منه اجابه كال...انسان هالك وميت وحيي نفسه بيييج
حطيت ايدي علئ صدري وسالته بترقب...يعني اني رجعتلك الحياة جنت مييت واني حييتك...
هز راسه بقبووول...
تقرب مني والتهم شفايفي برومانسيه واني غمضت عيوني تحت رجفه اعتلت كل جسمي ورجليه ترجف بارتباك
اي قرب منه يربكني وحتئ وان كان زوجي وعندي،اطفال منه بس حياتنه ممستقره لذلك ادنئ رومانسيه منه اني ارجف واخاف واكثر شئ اخاف من المستقبل
بادلته بهدوء وهو دخل اصابعه بشعري وغمرني بكل حب
سحبت نفسي منه واني مرتبكه ورحت بسرعه نكتت الديباج مدري شبيه
هو ضحك وحضني من وره وباس كتفي بحنان عض رقبتي علئ كييف
عطت بصوت ناصي ودرت وجهي عليه...شبييك جووعان
هز راسه بذوبان...اييي
صفطت المخدات ...تمام هسه اصبلك غدا تدلل
دارني عليه ونومني علئ الجربايه باس خدي واني ابتسمت ...اليوووم شبييك تخبلت
هز راسه بأي
ضحكت...ترا اعفك كولة مجتبئ اذا ما توخر
رد بخدر...بالله عضيني
ضحكت...لا شكرا ما اريد اعض اني صدك معاشره سلوكيه بس مو جلبه
رفع حاجب وضربني علئ خدي بس علئ كيف كال...انتي ما توبين تحبين تجفصين شنو عايشه ويه سلوكيه ولج شنو احنه جلاب
رمشت بعيوني بفشله...لا لا مو قصدي عليكم علئ اطفالي هم بس يعضوون مو علئ اهلك انتم ناس طيبه وهادئيين وعاقليين وهنيالي عليكم
باوعلي باستهزاء...تستهزئين حضرة جنابج احنه ناس مشرانيين ندور الشر دواره
ضحكت...رحم الله امرء عرف قدر نفسه
باوعلي بغموض...صايره حلوه
ابتسمت...مو احلئ منك ابو رضاوي
باسني بلهفه وعنف خنكني دفعته اختنكت هو باوعلي وضحك
اتصل موبايله هو غلقه وطلع بدون ما يجاوب
اني طلعت وراه ولاكتنه وجهه الطاوه لابسه عبايتها و لابسه حجاب وحاطه طن مكياج
باوع الها جاسر باستغراب كلها...وين رايييحه
ردت بارتباك...هااا اي امي مريضه واريد اروح اشوفه
اشر الها بعيونه...امشي ادخلي جوووه ومن يجي زوجج عود وين ما ترحين روحي وقسما بذات الله هسه اذا رحت وطلعتي ما تتخيلين شسوي،بييج
هو خله وطلع واني ضليت واكفه جان باوعتله شد الباب هزت ايدها وضحكت باستهزاء...صاير شريف براسي وهو عرضه دايح وضال يفتر بالدواوين وبنص الشيوخ
ابتسمت ورفعت حاجب...عرضه يدخل دواوين وشيوخ يحتمي،بيهم احسن ما يدخل سحارين ويفتر عند المشعوذين ويبيع نفسه علئ هل سوالف
فتحت عيونها بعصبية ومصدومه من كلامي...شنو قصدج ولج اني،سحاره
رفعت اكتافي بعدم معرفه وبرود وخليت ورحت واني لازمه ضهري
كالت بضحكه..عمتي ام فلاح ما راضيه علئ حملج ومدام ما راضيه صدكيني يوكع
جاوبتها بهدوء...مدام زوجي راضي ما الي شغل بكلام الناس
عفته ورحت الريهام ريهام جانت حييل فرحانه دكوول صلاح قرر ياخذني للبصره حروح للبصره لج عيني ممصدكه
حضنتها واني فرحانه...يعمري تستاهلين كل الخيير وان شاء الله ياربي يرزقج بالطفل الي يسر گلبج وخاطرج
باستني بخدي...تسلمين يروووحي اني ثاقه بربي واملي كببير وان شاء الله يرزقني واذا ما رزقني صدكيني ما اتذمر ولا احجي قابله بقضاء ربي وقدره
ضليت اسولف وياها واحجي وشكيت الها من الصار قبل كم يووم وبصراحه رغم اضحك واسولف بس حاز بخاطري هل موقف صعب والله انطرد من البيت وحمايه يركض ورايه بسجيين....
رجعت الغرفتي كعدت بيها اني اذا ما اشغل نفسي بفد شغله اضل اكل بروحي وانقهر واموت روحي
كلت خلي ارتب ملابس جاسر مدام ما عندي شئ ولو هن مرتبات بس حبيت اعييد نظام ترتيبهن ...
كعدت اسفط بيهن وارتب بالحافه مالة الكنتور اثار انتباهي صوره سحبتها
من شفته حسسيت روحي صااارت اشلاء عبالك صار بيها انفجار صاخب
بلعت ريكي بحيره وغصه ...مو كلت ما احبها مو قبل يوم اعلنت ان اني اكرهه اشووو من شفت صورتها تزلزلت روحي
حضنتها بحناااان الصدري والدموع غلبت علئ قساوتي بجيت بصمت مريييع
رفعت الصوره واني امسح الدموع الحارقه من عيوني حجبت عندي الرؤيه
امي اي امي واكفه بصفي واني بايستها بجبينها ولابسه بدلة الخطبه هاي الصورة بخطبتي وعاصم واكف بصفي
تمعنت بالصورة زيين شفته مشخبط علئ وجهه عاصم بقلم احمر
واني واكفه بايسه امي بحنان لزمت الصوره بقسوووه من الوسط وقررت امزقها بلحظه انهيار حطيت اديه اعلن عن موت هل صورة
بس گلبي الخبيث ما سمحلي اخرب معالم الصوره عقجتها بيدي وشمرتها بنص الكنتور وسديت باب الكنتور
حتئ بعد ما اريد ارتب الملابس انسدت نفسي وكرهت روحي
حاولت اصبر نفسي ما انهار مثل كل مره
وكفت بصموود لا اني قووويه اني مو بحاجة امي ولا احبها ولا اريد اخواني اني اعييش النفسي و أطفالي وبس
نمت علئ فراشي واني ابجي يالله اني شكد شفافه علئ ادنئ ذكرئ منهم انهار وانهار انهيار فضييع
يارب دخييلك صبرني صبررررني....
......................................
جابر
البارحه كعدنه ويه جعفر هذا جعفر متخبل رسمي ما اعرف شنو البي
ابوي حجه وياه واني كتله...انت شحاط عقلك ويه جولييت ترئ فقيره
رد عليه بغضب...هاي فقيره هاي حيه سامه حاطه كورها وكور سجاوي والله اني علئ سجاوي اكتل سلف كامل
بالقران كرهني بسجاوي كد ما يحجي باسمها
انوب كال...اني بعد ما اعيش وياهم اذا عشت وياهم اكتل واحد من ولد جاسر لو اكتل جولييت ما بيها مجال واذا كلش،كلش اكتل صلاح لان هو هم محارب سجاوي و نوال...
لذلك قررت ينطوني نص البيت
ابوي رد عليه بعدم قبول...علئ اي اساس انت تاخذ نص البيت ترئ البيت ورثه واذا يطلعلك تلاثين مليون واذا حاب تطلع هسه جاسر ينطيك تلاثين مليون والله ومحمد وعلي وياك
رد علئ ابويه بعصبية و وكف بتعب...شنووو شنوو ما اريد تلاثين مليون اريد 60 مليون لو نص البيت تنطوني تلاثين مليون وين اروح بيهن اكعد بالحواسم
دك علئ صدره...اني جعفر اكعد مرتي نوال وبنتي سجاوي بالحواسم لا والله اله اكعدها بارقئ،منطقه وبعناد جولييت وجاسر
جر نفس ايوي بضيق ورد عليه...بس بويه هذا حقك وهذا تقييم البيت وانت ما يطلعلك ستين جاسر اله حصه وصلاح واخواتك
كال...لااا اخواتي ما ياخذن حصص وين اكو مره تاخذ حصه
عكاب...شلون ولك ما الهن حصه وين الحلال والحرام ترئ ألهن وغصبا ما عليك
رد بعناد...التاخذ حصتها لا اني اخوها ولا اعرفها
ابوي اجه يتعارك وياه بس اني لزمته وهو خله وراح طلع
رحت الوقار ضليت احجي وياها كلتلها مو بوعيه لا تحجين اي كلمه الاهلج وهي هزت راسها بموافقه
اجه باليل سكران وخله ونام واني ثاني يوم خابرت جاسر وحجيت وياه
و وقار خلت وراحت تكعد جعفر اني قفلت الموبايل وهي اجت تركض تصرخ وتصييح...الحكوو الحكوو جعفر كتل روحه جعفر انتحر
حسيت المووت دخل باعضامي،من كلمتها ركضت للغرفه واشووف الشريط شاربه كله ومتقيئ ولزمت ايده لا حياة لمن تنادي
صرخت بصوت عالي واني اصيح علئ،ابووويه...ويابه ياااابه وين وصرت تعال بسرعه
و وقار خطيه ضلت تلطم وتبجي وتصرخ وتلطم علئ وجهها
انقهرت عليها لزمت اديها واني امنع ضرباتها علئ وجهها علئ كيفج علئ كيفج ما بي شئ هذا كلشي،نا بي بس هو متخربط شويه
هي جاوبتني بانهيار...جابر اخووويه هذا اخويه شلون دكول ما بي شئ اخويه ما اعرف اذا مات او لااا يمه سوده عليه حبيبي جعفر
اجه ابوي يركض وامي تركض حاولنه نشيله هو الله يسلمه ثكيل صحت علئ ولد جيرانه خطيه ساعدنه واخذناه للمستشفئ
بسرعه اخذوا بالطوارئ علئ غسل المعده واني خابرت علئ جاسر بس قفل الخط بوجهي ومجاوبني
ضليت اتصل عليه اتصل منا لمن حصلته تكلمت بجديه وحده...جاااسر وين انت
رد عليه بهدوء....طالع بالسياره ليش اكوو شئ
تنهدت وجريت نفس...جعفر تخربط واخذناه للمستسفئ وياريت تجي
هو رد بلهفه وقلق...ليش شبي شصاير وياه يالله جاي جاي هو بيا مستسفئ هسه
وصفت اله المستشفئ وهو شويه وخله واجه يركض لزمني بقلق وارتباك...هاااا شبي جعفر شصاير وياه ليش تخربط
رديت عليه بهدوء...جعفر البارحه شارب وجايب وياه شريط كبسله وشاربه كله
فتح عيونه مصدوم وهز راسه باسئ شويه وطلع الدكتور كال...لا تخافون ما بي شئ بس صاير عنده تسمم شارب هواي علاج ومنتحر شنو سبب الانتحار
ضحك جاسر باستهزاء ورد علئ الدكتور...واحد سكران وشيلكه كدامه يشربه شتترجئ،منه
دخلنه عليه لكيناه كاعد والمغذي مشكل بيده من شاف جاسر دار وجهه زعلان
جاسر ضحك وهز راسه وهز ايده...لا انوب هو الما راضي
اني وابوس بسناه وتحمدنه اله بالسلامه
كعد جاسر علئ الكرسي وباوعله كله...شلونك لك مطي
هو باوع الجاسر بعصبية وكله...لا تغلط
رد عليه جاسر ببرود...انجب
اني كوه كتمت ضحكتي عليهم جاسر لزم ايد جعفر وضل يحجي وياه بهدوء ويسايسه
وجعفر ضل يبجي يكله اني مختنك اني محد يحس بيه انتم ما تحبوني
جاسر در عليه بتنهيده...هو مال ما نحبك ما نحبك بس مال تصير ثور بيد وجهه الطاوه ما نقبلها
نزل عيونه بقهر...لا تحجي علئ مرتي تقبل احجي علئ مرتك
رد عليه جاسر بجبروت...اكص اللسانك غيير
جعفر...ليش عليك حلال وعلينه حرام
جاسر ضحك...لان انت ما تحب نوال ولا تواطنها بعيشة الله شمعنئ هسه تدافع الها
اني راح اخذ الشيخ اعرفه يادبك ويطلع الجني ابو شورت مال نويله تذكره اكيد هسه متلبس بيك فلازم نطلعه من راسك
هو باوع الجاسر بخزره وجاسر ضحك واجه صلاح ضل يسولف وياه ويضحكون وياه شويه ارتاح
بعدها رجعنه للبيت وباليل رحنه للنجف وانوب رحنه الكربلاء وجعفر اول مره اشوفه يدخل الامام ويبجي ويصلي عرفته مهموم
واول مره اشوفه يصلي احنه رحنه كلنه للزياره وجاسر ويانه وبعدها اخذناه للشيخ كال هذا مسحور الولد
وضل يقره عليه ايات قرانيه ويعالجه بالقران وانطاه مي مقري عليه وهو جعفر شويه وركض وضل يتقي تقيئ مو طبيعي
واحنه واكفين علئ،راسه والشيخ يقره عليه ويمسح القران علئ راسه
اباوع المغسله الي تقيئ،بيها جعفر انترست فصم مال تمر استغربت اشو احنه حتئ ما ماكلين تمر وحتئ لو نفرض اكلنه تمر شنو جعفر ياكل حتئ النوه
بعدها انطاها بخور وحرمل و ورقات تلاثه كله هاي الورقات تحركها قبل المغرب وتتبخر بيها
والله صدك اخذناه والبيتنه ضلينه نسوي اله العلاج والبطله وهو خطيه مسكيين يسبح ويتبخر
ويكعد يصلي ويقره قران اول مره اشوف جعفر يصلي ويقره قران ويبجي ويطلب العفو من رب العالمين
اخوانه ما قبلو يجي البيتهم كلوله منا لمن تطيب
وثاني يوم باليل اجونه وسولفون اله عن السواه وشلون يكول نوال حبيبتي نوال مرتي وهو ميت من الضحك يضحك بصوره مو طبيعيه
وكل شويه واشر علئ نفسه اني اكووول هييج من طاح حضي علئ هل عمله
احب وجهه الطاوه ولكم هذا مو سحر لا هذا الجني اتلبس بيه شلون مصيبه اني احب وجهه الطاوه ههههههههههههههاي لا بشرفي ممصدك
سولفوا اله شلون تهجم علئ جولييت وشلون طردها ويكول سجاوي بنتي
وهو يمووت من الضحك انويله ام براطم مرتي اني لحد الان ما مبدل جناسي خاف يكتبون اسم الزوجه نويله اني بالجنسيه ما معترف بيها مو انوب اعترف بيها كدام الملئ
لا عمي هاي طاكتني بسحر مخليتني صاير حلكي بعلباتي
لا انوب شلون ورطه منتحر من وره نويله هسه لو ميت ورايح للجهنم شكول للعالم حتئ عذر ما عندي مثل العالم
اكلهم وجه القاوه كولة مشمش طكتني بسحر وما ادري بروحي
ولكم تعالو وكابلوني وخلونه نلطم علئ هل مصيبه والله ممصدوم بروحي منتحر بكد ما مصدوم مطلك شهوده ومعترف بنويله
زين هاي شلون سالفه عمي يبيت مهيوب بعد لا ادخل عليكم ولا اجيكم انتم ناس تلفون المشعوذين والسحره والدجالين تطردون نويله اجيكم عايل وياكم
اخوانه ضحكوا وضلوا يسولفون وياه كله جاسر...انت صرت مطي رسمي وفلشت غرفة ام مرتضئ واني حلفت محد ينضفها غيرك
رد عليه بلهفه...لا بالقران محد ينضف الغرفه غير نويله والجني ابو شورت واريد واحد يحجي
ويرجع يضحك ويموت من الضحك ويكول...الله عليكم خلي اطكلي بطل عرك ولكم شلون اني اكوول نويله مرتي
بس لا والله خطيتي بركبتكم انوب اني مسحور وطارد مرتي كلتلكم وجهه الكاوه ما اتزوجها وانتم لزكتو اله اتزوجها
انوب شلون فشله من ام مرتضئ ضاربها الله لا يوفقج وجهه الطاوه المحتركه
بسيطه بس خلي اطيب اله اطلكها خلعي بدون رجعه وبالمحكمه واريد كواد يرجعها اليه
رد عليه صلاح...الحمد لله كلنه شرفاء...
ضلينه نسولف ونضحك والاستقبال عباره عن جكاير وهم يوميه يرحون ويجون يشوفون جعفر
وهي نوال تخابر عليه وهو ما يرد عليها ومرات يرد يكول اريد اطمنها وبعدين اثور عليها بس خلي احصن نفسي واخلص من شرها...
ام السحوره ام براطم ويغلط غلط عليها وكل شويه وكال يا وسفة الوسفه شلون اطلك شهوده لخاطر وجهه الطاوه....
..............................
جولييت....
اليوم جاسر كال نروح نشتري اثاث للبيت واني كووولش فرحت وهماتين كال نجيب فلاح يعدل المزرعة مالتنه لان العشب مالتها صاعد
اني لزمت ايده بتوسل...فدوه جاسر حباب حباب اريد تزرع الي شجرة ليمون وشجرة برتقال
ابتسم وكرص خدي كال...ادللي ازرعلج التردينه وبعد شتردين
رفعت عيوني بتفكير...اممم اريد هماتين رشاد و نعناع و ريحان وهماتين اريد سلگ وكرفس ههههه
نفخ بملل...شنو ولج بستان هي كلها مية متر المزرعه واني طلبت منه شتلات وكم نخله
لزمت اديه ثنينهم بتوسل...عفيه عفيه كوله ما تخسر شئ والله وبعدين ترئ هواية المية متر تكفي
هز راسه بقبول...اوك تمام اذا قبل شنو تردين اخلي يزرع الج
وكفت علئ اصابع رجليه بمرح وبسته بخده وابتعدت بسرعه هو خله ايده علئ خده وضل يباوعلي مصدوم
وبعدها جر نفس كال...يالله بدلي حتئ نشتري اثاث وبعدها نروح البيتنا ونشوف الفلاح شنو يكول
بدلت بسرعه لبست نفنوف بسيط لونه ماروني و وياه شال كريمي وحذاء نفس اللون وبدلت الاطفالي وخلينه ورحنه
دخلنه المحل اثاث كووولش حلو وراقي جاسر اشتره تخم للاسنقبال لونه ذهبي ونوعيته ملكي بس هماتين اخذ رايي بي واني عجبني
واخذنه كاونتر لونه فستقي مطعم بابيض لان السيراميك مالة المطبخ نفس اللون
واخذ غرف نوم صغار المجتبى ومرتضئ وهم جانوا عبالك كبار يناقشون ابوهم والهم رأي وكل شويه وعاندوا وهذا منريده
وهااا الديج جابوا وياهم خلو بالسياره جاسر ما قبل نجيبه بس هم ضلوا يبجون
جاسر كال والله هذا الديج علئ يوم اذبحه واكله وارحم بحاله خطيه موتوا كرهوا بروحه اعتبرها رصاصة رحمه واذبحه واكله
وبعدها هو ما قبل يشتري غرفة نوم كال غرفتي جديده وغرفتج فلشها جعفر ما تفييد
باوعلي ببتسامه كال...شنو تردين اخذي هسه لان اني بعد ما اكدر اجي الايام الجايه عندي شغل
اجيت اكوله اريد موبايل بس استحي اطلب وصاحبك حلو لا تاكله كله
بس اثار انتباهي مكينه صغيره كتله بعد ما بلعت ريكي بخجل...احم جااسر اني اول مره اطلب منكم ياريت تقبل وتنفذ طلبي
رفع حاجب كال...تدللين ام مرتضئ اذا مو علئ ابو غزل تتدلين علئ منو بعد
ابتسمت ونزلت عيوني...ههه شكرا بس اني عاجبتني المكينه اريد هاي عجبتني
مسح وجهه بضيق مدري ليش يكره المكينه كال...ولو اكرهه بس لان اول مره تطلبيني ادللي
اشتراها اليه حييل حييل فرحت وكال ان شاء الله انطيج فلوس وترحين انتي وامي رضيه تكملين الباقي يعني فراشات الاحتياجات البسيطه وصدك اشترئ طباخ النه كوولش حلو
رحنه للبيت واجه الفلاح ضل يحجي وياه وكله شتريد ازرع الها من كل نوع شجره او شجرتين ما اكثر
اني كووولش احب الزرع احسه غذاء روحي ونقاوة وانتعاش وتحسيني بابداع الخالق
احب هييج أجواء من اكعد الصبح واشوف الاشجار والزرع كووولش حلو هيج شئ وكال حجيب سنادين واكمل المزرعه
بعدها رحنه اخذنه المطعم اسمه الدربونه بصراحه اول شئ متت ضحك علئ اسمه شنو هل اسم بس بعدين عجبني الاكل مالته
وخطيه الديج كاعد ومسموط جده بالسياره كله من وره مجتبئ ومرتضئ كرهوا بروحه انوب عنوديين مدري علئ منو طالعيين
جان يووم كووولش حلو احلئ يوم عشته وحتئ اخذنه للألعاب
بس هاي من رحنه للالعاب نزلوا الديج وياهم اباوع للناس جايبه كلاب واني جايبين ديج فشلوني الله يفشلكم يا متستحون....
حمدت الله وشكرته ان شاء الله يديم النعمه عليه بحق كل من صاحب حق...
..............................
شهد
جنت كاعدة بالصالة مخلية رجل على رجل وافكر بجعفر وميتة قهر واهز برجلي بس مابين هالشي ..
فاتت مرة ابويه من يمي ..
كالت راح تضلين هيج انتي راااح تضليننن كاعدة والشغل مكووم فوك راسي ع يابو شنوو والله حامل
ادري شنووو ابنج متعلك بشعرة بس تكومين يوكع لو لازكته بعلج ؟؟
فكيت رجليه وكمت بهمة واباوعلها معاجبني ..
تخصرت وميلت روحي كتلها اكوولج انت شوكت تتوبين مني ؟؟
مو تدرين بيه ضامة سوالفج واذا اطلعها ترحين ورة الشمس ..
رفعت حاجبها تأفأفت وراحت وهي تتلفت وتمشي
اي والله خليتها تتلفت وتمشي اني شهد والاجر على الله ..
ررن موبايلي باوعت بالشاشة هذا جعفر يتصل ..
رديت عليه من ورة خشمي وكلت الووو .. بتذمر ..
رد هلا بالروح هلا بالعشق مشتاقلج وربي ..
تأفأفت هم سكران !!!
رد بهيام بييج سكران تركت السكر والعربده ..
كتله لا هاي واكفة عيني جيبيلها كرسي خل تكعد ..
والله شبيج شهودة ليش مصدكيني ياعيني
لو تجيب درزن قرايين ما اصدكك وروح الوجهه الطاوه ....
كال غير طلعت طاكتني بسحر سامطه جدي التاسع عشر ..
صرت امثل الجني ابو شورت الجان يتحرش بيها
لا والله اني الجني بجلالة قدره ..
اكولك جعفر ماتحل عني هسه انتي متوازيى تاكل رزايل قبل النوم ادري علاج هيه ؟
انته شايف نفسك شون جنت مثل الطلي بيدها لا والله حتى الطلي مياخذ كلام النعجة بكدك ..
كال بصدمة بس لا اغتصبتني واني ما ادري بروحي؟؟
ان شاء الله تتلكاها بخوتها ..
لا والله انته ادرى بروحك بعد لمن تسكر تجيني ديله روح روح مالي خلكك ترة ..
شهودة حياتي والله مادري بروحي ليش تظلميني احنه مانرهم غير لبعض حياتي لا وجه الطاوة تفرقنا ولا الاضرب منها لج والله اسحلها سحل هالنعجة ..
هلووووو عود خلص نفسك من سحرها انوب اسحلها يلااا جاووو
رد عليه ...انتظري بالقران مركوع سحر ما اعرف رضيه من صبريه
جاوبته بحده...لو تصير درزن مال قرايين وتحلف بي ما اصدكك
جر نفس ...بالقران شبييج ولج انتي جلبه لا تسالين لو دكول وين وله هذا وبعدين اني يمكن حتئ تعرضت للاغتصاب
ولج نويله طاكتني بسحر سوت بينا مثل الحسناء والوحش
قفلت الخط الجذاب ابو العرك يسكر ويضل يبيع مثاليات براسي ويبري نفسه
بعد هذا هو ولا اريده هو مطلكني واني مدام يدافع لنويله وهو صاحي ما اريده....
.........................
ريهام...
بعد طول الطريق من بغداد للبصرة وكفت بينا السيارة
بالكراج الوقت جان العصر ..
حسيت بالجو جان رطب يختلف عن جو بغداد .. وياه اجاني صداع وعيوني غوشت شويه .. بس تماسكت ..
جان صديق صلاح ينتظرنا ، سلم عليه سلام حاررر بشوق وود ..
وبعدها سلم عليه .. ورديت عليه بامتنان واني مدنكة اخذني صلاح من ايدي فتح لي باب الورة مال السيارة ودخلت بيها ..
ضربني هوا التبريد مال السيارة شوية ارتاحيت .. وباوعتله جان يخلي الجنط بالصندوك ..
دخل كعد بالصدر والتفت عليه ، جنت مخليه ايدي على راسي ومددة ايدي ع المقعد مال السيارة ..
سمعته همس ريهام... وخرت ايدي من على جبيني وباوعتله مبتسمة ..
كال بيج شي ؟ تعبانة حبيبي ؟
هزيت راسي بتعب جاوبته : لا يرووحي ليظل بالك زينة اني هذا دوار السفر ..
ضحك ويباوعلي بحب ..
دخل صديقه للسيارة هو التفت عليه وظل يسولفون طول الطريق عبالك جوعانين حجي ..
واني صدك دخت وانسطرت واتمنى انام هسه بالسيارة بس كلساع نفوت بطسة تصعد السيارة وتنزلها واجفل .
علما وصلنا لبيتهم شويه ويصير مغرب ، حيل بعيدة منطقتهم عن الكراج ..
نزلنا واني خجلت شويه مكان اول مرة اجي وماعرف ناسه بس صلاح اصر خطية صديقه يعرفه من سنين جان يدرس وياه ببغداد ومكدر يفشله وميلبي دعوته..
فتح الباب وفوت السيارة بالكراج وطلعت مرته وبناتها سلمت عليه فدوة شكد حلوة وتنحب ..
عدها تلث بنات وهم يخبلن هاي الوسطانية عيونها جنهن مي الاسالة صافيين كلش رصاصي مدري ازرك ...
كعدنا بالاستقبال ، بس احس نفسي تعبانة ومكسرة واريد بس انام ...
جان مموجود احد يمنا ، ميلت راسي وخليتها على كتف صلاح ، هو باسني على راسي ولزم ايدي
كال شبيج حبيبي ؟
بلعت ريك وخرت راسي وهزيته داحس مو طبيعية وخايفة لا رجع المرض لان نفس الاعراض بس ماريد اقلقه ..
كال اذا دتحسين بشي حتى اوديج للمستشفى هسه ..
جاوبته برفض قاطع : لا حبيبي ماكو انام واصير زينة بس عيب منهم هسه انام خلي اتعرف على زوجته وها اريد اصلي هسه اكيد اذن ..
براحتج حبيبتي عود نتعشى وننام وكت اني هم تعبان والطريق طويل متعب ..
دخل صديقه وصلاح طلب منه نريد نصلي صاح على مرته اجت اني رحت وراها تأكدت زوجها ميفوت
كالت طمأني حبيبتي البيت بيتج هسه هو يبقى هناك هم اكو مغسلة وحمام ..
ابتسمت الها وتوضيت وهيه خطية واكفة يمي علما خلصت ..
رحت لغرفة البنات صليت .. ووراها رحت يمها للمطبخ
دتسوي العشه ، تعرفت عليها هيه من كربلاء ومتزوجة بالبصرة ابن خالتها يصير ..
بناتها عمرهن عشرة و ثمانية والصغيرة تلث سنوات الله يحفظهم هيه اسمها رواء ..
تعشينا وكعدنا نسولف شويه ونمنا بالاستقبال ، كلش جنت محتاجة انام تعبانة ، خليت راسي على صدره وطوقت ايده بيدي واستنشقت عطره هو باسني على راسي وكال تدرين احمد ربي الف مرة باليوم الله خلاج الي وماحرمني منج .
همست حبيبي بس متشوف شون تعبني المرض وخلاني اكبر قبل اواني .
تحرك وقلب نفسه صفح صار بمواجهه ويايه
كال ولا يهمج حبيبتي انت حلوة مثل العنب حتى من يعتك يصير زبيب ..
ابتسمت وعيوني بعيونه وضوه الثريات الملونة فوكانة تعكس على وجهه باسني على خدي بوسه طويلة
ويمسد خدي الثاني بأبهامه ..
غفيت واني اتوسد صدره الدافي بحب وطمأنينة ..
كعدنا الصبح تريكنا اباوع للبنات واكول بقلبي جنت ماخذة فكرة عن اهل البصرة كلهم سمران بس هسه البنات وامهن بيض كيمر ..
حتى رواء كالت هيه طالعة على امها وامها بصراوية فدوة بس كلش خوش ناس وكريمين كلش وينحبون ..
بعد الريوك اخذوا الاغراض وخلوهم بالسيارة وكالوا نروح نتغدى على شط العرب ..
فرحت اول مرة راح اشوف شط العرب رحنا مسافة دقايق بالسيارة لمزرعة على الشط فتح النا الباب واحد ودخلنا ، صارت شجرة ورد يم الباب ظليت اباوعلها عجبتني ..
صلاح انتبه كام اخذ منها وانطاهه الي
كتله يااا صلاح حرام خاف ميقبلون هاي مو ارضنا ..
دخلهه بحجابي وكال هسه اترخص من رائد ولا يهمج عمري ..
هزيت راسي وضحكت باوعت كبالي جمال وحصونه
رحت يمهم محاوطينهم بسياج خشب اجه تقرب مني الحصان خفت شويه بس بعدها عرفته مايأذي ..
بس اشو هذا الحصان سخيف كولش وميانته زفرة زيادة عن اللزوم وهماتين ميستغرب ..
خمط الوردة من راسي واكلها واني عطت ومن الخوف اجيت اصعد السياج الخشب وافوت ع الجمل يحميني منه وحتى صلاح نسيته ..
سمعت صوت البنات يضحكن عليه واني ظليت اضحك وايدي على قلبي اهدا من روعه ..
واجه صلاح ع الصوت عاتبته وين رحت؟
كال مو رحت اترخص من رائد عمود الوردة
كال صدك جذب هيه وردة كله كدامك ..
كتله بنحيب مصطنع الوردة المفروض قبل لتكطعها تستأذن خمطها الحصان لان مو مال حلال ..
كال تعاي هسه اكصله الشجرة كلها رائد وترخصت منه ..
جريته من ايده تعال نشوف الشط ماريد ورد ماااريد ..
تبعته ورحنه شفنه رواء ورائد ديحضرون تنور الحطب حتى يسوون بي السمج ..
وكفت اباوعلهم هو يساعد زوجته ويسولف وياها ويضحكون ...
دخلوا جوه اكو مكان مثل المطبخ بي طباخ واغراض ومواعين .
واني اخذني صلاح ع شط العرب فتح باب حديدي ونزلنا درجات للشط كبل .. باوعت للمي شكد حلو ويأسر الروح ..
نسمات الهوا تداعب امواج المي وتخليها تزحف للصبه ع الجرف وتغسلها وتسحب وياها اوراق النباتات ...
باوعت اكو حوض مي ع الشط محوط بسياج حديد نزلن بي البنات لابسات نجادات ودخلن يسبحن رغم صغار بس محترفات بالسباحة ..
صفنت عليهم صلاح دغني بخصري التفتت عليه
مو عيب تتحرش ..
ضحك تسبحين وياهن ؟
لا عيب ابوهم هنا ..
رد اروح اطرده هسه ميكوول شي يقبل ..
ضحكت لا يابه اذا جان صاحبك حلو لا تاكله كله فشلة منهم ..
لج اشاقة خو ما صدك اطرده انتي بس كولي اذا تردين تفوتين للمي لو لا
لا اخاف وماعرف اسبح ..
اروح اجيبلج نجادة مثل البنات بس اهم شي مايبقى شي بنفسج اليوم ..
رديت لا حبيبي اخاف افوت بالمي اخاف
، باوعت مسطبة اشرت عليها كتله امشي نكعد هناك ونباوع للمي احسن ...
اخذني من اكتافي ورحنه كعدنه ع المصطبة وريحة شوي السمج وصلت
النه ..
باوعتله كتله فشلة ماساعدناهم ..
كال هم كريمين واحنه نستاهل ..
ضحكت اعزمهم يجون يمنه ببغداد المرة الجاية
كال اكيد والله عزمته واخلي ببطن عيني يستاهل رودي ..
وها ترة بعدني على وعدي اخذج لتركيا وغمزلي ...
خليت راسي على صدره حبيبي متقصر ...
وشبكت اصابعي واصبعه سوى ..
بعدها تغدينا بغرفة زجاجية كلش حلوة وبيها كعدة عربية ومغطينها بمثل الخيمة ديكورها كولش حلوو ..
السمج جان كلش طيب ووره الغدة كعدنا نشرب جاي وصلاح ورائد اخذولهم اراكيل وانطلقوا .. والبنات سكنوا الشط ..
العصر اخذونا لبصرة لاند تونسنا بالاجواء وبعدها
لمول كالوا هذا تايم سكوير ...
اخذت حاجات منه بس فشلت رائد مقبل صلاح يدفع فلوس ابد حيل خجلت كلش كريم هالرائد وطيب حيل ..
يوم ثاني اخذونا لمطعم اسمه بيت المندي تغدينا بيه مندي دجاج كلش طيب ..
ووخلصت ايامنا بالبصرة بس اني احس مو طبيعية بالليل لمن ارجع خشمي يطك دم ورجليه احس ماتن ونفسي تلعب مرات بس من نطلع ارتاح شوية ..
اخذت رقم رواء اتواصل وياهه ودعناهم ورجعنا لبغداد ..
بس لمن رجعت اني ايام ظليت بالفراش وصلاح يتوسل اروح للدكتور واني ماريد اكوله هاي لان سافرت وتعبت طلعت عليه اريد راحة هسه ..
بس هو اصر اروح يخاف عليه اخذني ورحت للدكتور ..
رحت وطلب مني الدكتور مجموعة تحاليل وجنت خايفة حيل وماما اكثر خوف مني عليه وصلاح كل شويه يخابر لان جان بالانتظار.. واكوله بعدها التحاليل ..
الى ان طلع التحليل اخذته من المختبر ورحت للطبيب انطيتهم اله ظل يباوع بيهم ..
كال ريهام مبرووك انتِ حامل ..
نهاية البارت ...يتبع
كونوا انتم كونوا بخير...احبكم 💔
نور سمو العراق 😘
لا تنسوا التصويت والمشاركه بكم نكتمل 🌹
اليوم القفله حلوه وهادئه بس باجر لا حضروا نفسكم احزروا القفله شنو 😓
صور الشط العرب البصره الفيحاء من ايادي مبدعه 😍😍😍
😍😍
كله من ابداااع طلحه اكيييد
بعد ما طلبوني هذا بارت مفاجئ وطوييل حييل وباجر ان شاء الله بارت 😍😍