الابواب الخمس

البارت السادس عشر

#الابواب_الخمس
البارت السادس عشر
للكاتبة Reem

سمعت من بعيد طارش كال اجانه
كليبي فرفح مايدري اشكثر ولهانة
ومن وصل شو مادخل بيتي
دخل خطابة اعلى جيرانة
وك عشرت عمر جنت أني وياك
هيج بكل سهولة اتخون بية انه
تذكر من جنت أيد بأيد وياك
تذكر من تكلي احبج حيل يفلانه
بس مااكلك بعد غير الله وياك
شهديلك جرح كلبي لوسلة ورد مليانة

بديعه : هااي حوبتج يذكرى والله حوبتج خلتهم طشارهم ماله والي
ذكرى : وحوبتي متوكع اله بهاي المكروده متسكتين بله
بديعه : مو الحوبه اذا موكعت بصاحبها توكع بعزيز گلب صاحبها
ذكرى : هاي حزوره
بديعه : لا مفهمتيني يعني اذا حوبتج متطلع بعمتي تطلع بلشي الي تحبه وتعرفين بيها اكثر اثنين تحبهم نجم وخوله

ذكرى : واذا حوبتي ليش مطلعت بساهره وصالحه
بديعه : يجي يوم تطلع ربج كريم وحبله طويل اذا مو هسه بعدين وهم بعزاز الگلب
ذكرى : كلام خوله لهسه يرن بأذني من كالت لعمتي شون سحلتني معقوله مسويات شى الي وخلني اجي اركض لصمد
بديعه : هو انتي لو شايفه حالج تصفنين الواحد مجلبه بيه تجلاب مبينه مو صاحيه قبلها بأيام تصيحين لو يصبوه ذهب ماارجع وراهه تصيحين اريدك ومااريد اهلي هاي سوالف مال وحده عاقله

ذكرى : ماادري وهم مااريد افكر راسي يكوم يوجعني اذا سون شى الله لايوفقهن ضيعني وضيعن مني سندي اخويه وانحرمت من شوفت اهلي
بديعه : مو نسوان المعزايات تكول طالباتنه بطلابه بايكات ورث ابوهن وذابحين امهن
ذكرى : على ذكر امهن اني كل مااريد اسألج انسى
بديعه : خير
ذكرى : عمتي ليش تكرهه اختها اكو واحد يكرهه اخته الوحيده تمنيت عندي اخت اله احطها بروحي
بديعه : واني شنو خراعه خضره هنا
ذكرى : ههههه لا ولج اخت واعز من الاخت الاقصده اخت من امي وابويه ماكو وحده تكرهه اختها بكد عمتي وليل نهار مينزل من لسانها المسبه عليها وعلى خلفتها لازم اكو سبب

بديعه : امشي نصعد بغرفتي واسولفلج لتطلع هاي المدهربه على كولت عمتي وتخلي أذنها يمنا
ذكرى : شبيج ويه سهاد دومج نكرج من نكرها
بديعه : يمعوده وحده مدري شونها ساعه تشوفيها حبابه وساعه تنكط سم اني مااحب هيج وحده لو خيه لو حيه مااحب حل وسط
وهاي وجهه من كفاها مااعرفه

ذكرى : مالج دخل بيها هي هم دوم بغرفتها كاعده
بديعه : خليها احسن تسوي فضل امشي نصعد
صعدنا ودخلنا لغرفتي وبان نايمه
ذكرى : همزين الجهال نايمين
بديعه : ماطول ماكو مهند ومرتضى البيت هدوء وينامون
ذكرى : احجيلي ليش عمتي تكره غنيه
بديعه : شوفي من جانت عمتي صغيره يعني هيج بلخمسينات جان عمرها ١٢ سنه وغنيه ١٤ سنه هنه الوحيدات مالهن اخ ابوها تمرض كام وزوج غنيه لصاحبه بلبصره وجان الرجال جبير عليها بكد ابوها وراحت وياه للبصره

وتالي مات ابو عمشه وماضل لعمشه احد كام عمي ودز على غنيه
ذكرى : ليش دز عليها
بديعه : هي بلبدايه مقبلت تعيش بيت عمها لان تكره مرت عمها تكول وحده مسمومه وتريد اختها جانت عمشه حيل تحب غنيه وكتلت روحها تعيش وياها ومن اجت غنيه من البصره كالت لعمشه
غنيه : انه مااخذج وياي ضلي بدار عمي
عمشه : موش انه اخيتج وابوي انطاج عمره وين اولي منو ينشد علي غيرج وانتي اخيتي الوحيده
غنيه : انه مره عندي زلمه واخافن عليه
عمشه : ياااا مني تخافين مني شجرالج اخيتي
غنيه : لا تكربين صوبي ياعمشه انه زلمتي غريب ومااعرفن شنهي نفسيته وانتي حديثه وحليوه ومااريدن عيونه تزاوغ عليج

عمشه : اكض نفسي واختل منه عبن ترتاحين واكنسلج واعينج عبن مااصير حمل ثگيل خيتي لاتهديني بدار عمي مريته ماترحمني احب على يدج (ابوس ايدج)
غنيه : لاتفتين گلبي يعمشه وبليه مناحه (بجي) انه لزم ارد لداري تضلين ويه عمي
و لا گل شوي ناشدتني مالي شغيلات واترك داري وزلمتي واگابلج واگعد
لا تودون علي اله انه اچي بنفسي
عمشه : وانه منهو ليه اضل ويه وليدات عمي وحيدي لاتكطين لحمج يغنيه انه اخيتج وبعازتج

غنيه : وانه مالي بعازتج ردي لعمي ولاتنشدين علي لا احش رجولج حش اگلها زلمتي غريب تگلي بعازتي ماتجوزين مني انه گوه كاضته للزلمه چا اجيبن اخيتي واكرب النار على داري لا تعاينين هيچ انتي كبرتي وموش صغيره وانه مااضل اگل برويحتي وانت تسرسحين بداري شيليني من راسج ودبري حالج چا شنهي خلفتج ونسيتج
عمشه : انه اخيتي الحين مااتت ويه ابوي عبن هنت عليها

غنيه : كفي لسانج ولا تهذرين واتركي الطلايب ويه مرت عمج والمره زوينه لا تكاطفين عليها بسوالف الشينه وهي تكف منج وعمي فقير ومايگصر كلها سنه وتزوجين ولده وتصيرين جنته لاتضلين تنوحين وتندبين حظج

ذكرى : وتالي شصار
بديعه : دارت وجهه غنيه وشمرت عمشه عند عمها ومرت عمها وراحت لبيتها
شافت الويل عمشه سوتها عربانه مال شغل تالي من صار عمرها ١٣ زوجوها فرج وجان فرج حباب وفقير عكس فلاح اخوه حقير على امه  وبعد مده ماتت العمه وبقت اداري بعمها واستلمت الشغل وياهم بلكااع ومن صار عمرها ١٥ سنه اجه عبيد للدنيا
ذكرى : وغنيه
بديعه : انقطعت وياها وتمشي وتصيح مالي اخت واترملت وهي صغيره تره عمتي جانت كلش حلووة لتشوفيها هيج بس التعب والركض على العيشه والشموس والقهر كبرها فوك عمرها

ذكرى : وشمدريج انتي حلووة
بديعه : شفت صوره وحده الها والله حلووة رغم الصوره مو حيل واضحه وفلاح من حجالي كلشي هم كال امي جانت حلوة لهذا طمع بيها عمي
ذكرى : حقها تكره غنيه احتاجتها بأهم وقت بحياتها وشمرتها ومسألت عنها
بديعه : هو حظنا الفگر سنين مكطوعين تالي الحظ التحاق العسكريه مال عبيد يصير بلبصره حتى يشوفها ويگتل روحه عليها مدري طكنه بسحر كلشي يطلع منهن واله عمشه تموت من اختها تاخذ اثنين نسوان منها ولج حتى بعرس عبيد وجوحي عمتي ماحضرت وبكل صلافه غنيه انطتهم بناتها وتدري امهم مراضيه

ذكرى : ماشاء الله الخباثه ورث ثاري
بديعه : اي خيه بلدم يمشي
ذكرى : هااي بتج كعدت
بديعه : تعاالي ماما
بان : جوعانه
بديعه : هسه اوكلج حبيبتي اكلج ذكرى نسيت شى هاي الفتره ليش مترضعين ناي
ذكرى : على ياضيم ارضعها حتى حليبي نشف خفت عليها من حركان گلبي وفطمتها وهسه حليب انطيها وكلت اعلمها على الاكل شويه شويه
بديعه : هي الله يحفظها صارت ٩ اشهر مو
ذكرى : اي
بديعه : زين كبرت ماشاء الله
ذكرى : انتي ليش متسوين طفل
بديعه : والله ياخيه بيد ربج اني جبت بان وهي نشفت
ذكرى : الله يرزقج اخو لبنون
بديعه : امين يله خلي ننزل ناكل

ذكرى : اروح اشوف خوله
بديعه : روحي شوفيها
دخلت للغرفه لكيتها كاعده وصافنه على يونس وهو نايم وتلعب بشعره بعده بحضنها
ذكرى : شون صرتي
خوله : شوني واني المفروض هسه داحظر نفسي لان باجر الحنه مالتي
تقدمت بهدوء وكعدت يمها
اعرف لو شكد منحجي وشكد منطيب خاطرج ميفيد لان الصار شى جبير ومو هين ومحد راح يحس بيج لان المج عظيم
بس لازم تتجاوزين الصار على الاقل كدام الكل لتخلين صالحه وساهره ينجحن بلصار تتذكرين من انتقمتي من جاسم شون شفتي منهار ويعيط وانتي مرتاحه  دائماً الي يأذي ينتظر نتيجه الاذيه مالته اذا حس المقابيله مرتاح ومتأثر هو راح ينكسر ويحس تعبه راح بلشط بس اذا شافه منهار ويبجي راح يحس بأنتصار عظيم
لتخليهن يفرحن بيج ولو هنه شيرجعهن بعد

خوله : يرجعن لتخافين كلها جم يوم تبرد السالفه ويرجعن وين ينطون وجوهم عيشتهم على امي وهذا جوحي لو تذبحي ميصرف فلس ويأجر لو يفتح بيت ويصرف عليه هنا كاعد ماكل شارب كله من جد عمشه ويضم فلوسه على گلبه وذاك الثاني مرته متقبل تعوف هذا المهجوم تكول قصر الملوك وتخاف احد ياخذه منها

ذكرى : وانتي شراح تسووين
جان اطب بدعه
بديعه : اكيد راح تحرك الاخضر واليابس هو ذيج المره ركصتيهم هلمره شون
خوله : هلمره انتظر الي ينهيهم مو يأذيهم اذيتهم متريحني
ذكرى : دخيلك ربي شراح تسووين
خوله : مااسوي كتلج انتظر اله اخليهن يكولن لو مزوجيها وخلصانين منها
بديعه : اني هاي النبره تخوفني منج
خوله : اريد انزل جوه انام
بديعه : يانوم هي مال نوم وره هذا الحجي مالتج بروح ابوج بيش احلفج لتسووين شى موزين

خوله : كتلج مااسوي هسه بس كون عندي عمر ومااموت گبل مااشوفهن متلوعات بعزيز گلبهن كبالي
ذكرى : والله حقج شتحجين حقج بس الانتقام ميسوي شى ولا يحل عوفيها على ربج وهي تنحل والله مانام  مظلوم واله ربج نصره
خوله : خلي انزل عفتهم ونزلت ذني بطرانات ميدرن شحس هسه وشون كعد اتكطع لو الزمهم احركهم واحد واحد ميبرد نار گلبي انه اعرف شوكت اخليجن تكولن ياريتنا مندكينا بيج يخوله

بديعه : شتتوقعين تسوي
ذكرى :علمي علمج بس مبينه الشغله موزينه واعتقد مو هسه فتره يأمنن وتكسرهن خوله ذكيه مستحيل تسوي شى هسه وتوكع بيها وهي متأكده راح يرجعن
بديعه : اني هم اكول راح يرجعن لو السجينه ضاربتها بگلبها جان خلصنا
ذكرى : يمعوده جان البنيه دخلت سجن
امشي ننزل نشوف شكوو

خوله : طبيت لغرفه امي لكيتها كاعده وحاطه الفوطه على عينها وتبجي مهتميت وتمددت بفراشي وغطيت راسي
عمشه : يمه خوله احبيبه
خوله : شتردين
عمشه : يمه انه مااريدن يتكدر خاطرج
خوله : تكدر يايمه تكدر وميفيد الحجي بعد
عمشه : اعرفنج طاك گلبج مني ومن اخوتج عبن الصار موش انه السبب يايمه وروح ابيج موش انه چا انه لو اعرفن صالحه ولت لبيت ام اكرم احش رجولها وادگها دگ وانعل ابو اصلها عبن گلها ولا انتي
خوله : محد طيح حظنا غيرج من الاول كتلج طلعيهن لا شون اطلع الباشا عبيد والوزير جوحي من قصر الملوك

عمشه : يمه چا غير وليداتي
خوله : لو مربيتلج چلب اكرملج
عمشه : يااا طركاعت السوده حاقده عليهم هيج ليش يابنيتي خايبه شمحله الحلك وان گال خويه
خوله : تدرين اذا ابقى احجي وياج هسه الزم بيتج هذا وارشه نفط واحركه جوزي مني ورجعي ولدج حتى لتضلين تنوحين فوك راسي ادري كلها جم يوم وتشدين الفوطه وتصيحين ياعبيد يمه ياجوحي يمه رجعيهم وخلي يفيدوج بكبرتج

عمشه : لا يمه مايردون عگب الصار كلاته نعلت الله على بنيات غنيه گل البله بيهن باطات جبدي بط من يوم لخذيتهن لوليداتي اااااخ كون اردن بذيج الساعه اخنك عبيد ولا كال اتزوج صالحه
فتح الباب صمد
صمد : نزلت جوه
عمشه : اي يمه اصعد لغرفتك

ذكرى :اكلت وصعدت لكيت صمد كاعد
صمد : تعالي اكعدي يمي
ذكرى : خير محتاج شى
صمد : تعالي اكعدي
ذكرى : شصاير خوفتني
صمد : ماصار شى بس لشوكت راح تبقين هيج مطنكره عليه متعبتي من المشاكل
ذكرى : اني ام المشاكل اني الاضرب واهين لو اني الي اتزوج مره ثانيه
اني لهسه محاسبتك على سوايتك ورجعت الك وماادري شون قبلتها على نفسي سوايتك كسرت ظهري صمد وخلتني اخسر نفسي واهلي
صمد : وشبيهه اخوج شصار قابل اني اول واحد يتزوج على مرته

ذكرى : مو اول واحد ولا اخر واحد وخليني بحالي
صمد : ارجعي مثل قبل لتتعاملين هيج ويايه
ذكرى : والله ياريت ترجعني مثل قبل اقلها ارتاح وارجع اهلي لحضني وارجع اخويه من يشوفني ياخذني بحضنه رجع ذيج الايام الله وايدك

صمد : انتي مو ادميه صوجي كاعد ومحترمج واحجي وياج انتي مال اهانات وضرب
ذكرى : ايااك تمد ايدك عليه اخاف ذيج المره سكتت وصرت نعجه جوه ايدك هلمره والله اروح لاخويه اخلي يجي يكطعك
صمد : يااخ عيني اخوج الراح لديالى وشااال

ذكرى : كمت وكفت شنووووو
صمد : اخوج طاار راح ماكو بعد فوزي
ذكرى : ركضت سحبت العبايه ونزلت اركض
بديعه : خير شكوو ياستار
ذكرى : هسه اجي
طلعت امشي لبيت اهلي واكول جذاب هذا ديحرك اعصابي مديت ايدي وفتحت الباب وطبيت هدوء كل مره هيج وكت من اجيهم يجي مهدي لو حوراء عليه
صحت ماما يوووم وينج
دكيت باب المطبخ شكد محد فتح رجعت الجهه الثانيه ادك ادك جان تنفتح وصارت امي بوجهي شمرت نفسي بحضنها وابجي

ام فوزي: شجابج بنيتي هسه ابوج يجي ويگلب الدنيا
ذكرى : يمه اشتاقيتلكم وطك گلبي عليكم
ابويه شلونه وانتي صحتج شلونها
ام فوزي : تحت رحمه الله ادخلي وسدي الباب الجو بارد
دخلت ونزعت النعال الكاع مفروشه وكعدت يووم فدووة فوزي وين
ام فوزي : اخذته مرته كدرت تسحبه من حضنا يايمه اخذته بين اخوتها وعزوتها وضلينا احنا بليه عزوه

ذكرى : نزلت دمعتي واتذكر شون راح زعلان مني ليش قبل يروح
ام فوزي : الصار هد حيله وكامت الجكاره متنزل من ايده وكل الوكت عصبي ويعيط حتى جهاله جان ميضربهم كام يكطعهم بس يتوكحون تالي بيوم وليله نزلو والجنط بيدهم ودار وجهه وراح
ذكرى : كمت اضرب على رجلي كله مني من سود الله وجهي

ام فوزي : كاافي بنتي هاي قسمتنا والحمدلله على كل حاال خليه بعيد وسعيد هنا بس المغثه وحركان الاعصاب
وابوج هم متخبل من المنطقه ولوما المحل وعيشتنا جان هم بعنا وطلعنا من يوم مااجينا لهاي المنطقه الكشره شكو مصيبه وكعت على راسنا البيت والمكان گله كرفته فگر فتره واخلي ابوج يبيع البيت ونطلع منا

ذكرى : وتعوفوني
ام فوزي : انتي العفتي يايمه مو احنا خليني ساكته مااريد اسم گلبج وكومي روحي لبيتج ليجي ابوج ويگلب الدنيا
ذكرى : اريد اشوفه لبابا وابوس رجله واتوسله يسامحني

ام فوزي : ارحمي بحال ابوج الضغط صاعد عنده لينجلط من المشاكل روحي بنيتي ابوج حلف يمين اذا شافج هنا يسحلج للشارع ويشمرج لعيالج لتهينين نفسج كافي الصار ذيج المره والله يمشي ويصيح ماعندي بنيه بتي ماتت
ذكرى : حتى انتي مترديني
ام فوزي : شون مااريدج هو اني عندي غيرج بس جفيان شر ومشاكل وگلبنا خلصان من ماكو ابوج تعالي اشوفج وترحين قبل ميجي مالي حيل هوسه بعد
ذكرى : صار ماما صار مااجي وهو موجود

طلعت امشي

ودموعي على خدي يضرب بيها الهوا البارد
دخلت البيت ويه دخلتي طب نجم
نجم : شبيج تبجين صار شى
ذكرى : شيصير بعد الصار
نجم : جنتي بيت اهلج
ذكرى : اي
نجم : عرفتي بفوزي
ذكرى : معناها تدري
نجم : قبل كم يوم شفناه اني وصمد جنا بلباب وهو صعد الجنط الصبح وطلع عرفنا راح منا
ذكرى : عافني وراح نجم  كله من ورايه خجلته وصغرته كدام الكل وماخليت هيبه اله ومن وره شنو من وره واحد ميسوه اضفر فوزي
نجم : اششش ليسمعج

ذكرى : خلي يسمع كله منه اني شجاني متكولي شرجعني من خرب حظي الاسود الجابني بهذا البيت من ساعه السوده العرفتك والعرفت اهلك وعرفتكم كلكم
نجم : اوووف على كيفج ياعيني وكافي بجي راح يطلعون على صوتج
ذكرى : خلي يطلعون اريد افتهم شسوو بيه وخلوني مخبله اجي من بيت اهلي اركض واصيح صمد ولك اني اصيح صمد واجلب بيه عضيت اصابيعي حييل من حركت گلبي
بديعه : شكوو اسم الله صوتج جوه عالي
نجم : تعاي يمعوده دخليها جوه كامت تهذري من وره فوزي

ذكرى : اهذري موو
نجم : كاافي ذكرى وادخلي جوه
ذكرى : ادخل على اختك وين رايح خلي ولو واحد بيكم بيه خير
عااط بيه حييل
نجم : كااافي تره بديتي تتجاوزين
ذكرى : شكد ظليمتي جبيره بس بكد ظليمه خوله ماكو خمس اخوه ولا واحد ينشد بيه الحيل الله يعينها صدك الله يعينها
بديعه : شووو ادخلي انتي هم شخطتي مثل حماتج

ذكرى : طبيت ابجي وشافني صمد وهو ينزل هااا تأكدتي راح الشفيه
ذكرى : قصدك صكارك
صمد : ولج انجبي تره اجي اكطع النعال على راسج
ذكرى : طبعاً يحقلك تكطع وتعيط وتضرب غير الجان مخليك تخاف تعلي صوتك عليه راح واله لو هو موجود هنا تكدر تتنفس
بديعه : لسانج يمعوده شوو اصعدي
صمد : عوفيها اجي اكسر راسها واريد اشوف منو اليطلع الها
ذكرى : لا عبالك طار تره بس ادز عليه حتى لو زعلان مني يعرف اخته اذا نخته يعوف الدنيا ويجيني لتنفخ ريشك ليكصهن الك

بديعه : عوفها صمد دفعتها وصعدتها ليفوك وصمد يريد يضربها
دخلتها للغرفه شجاج تخبلتي
ذكرى : ملييييت تعرفين شنو مليت عفيه بيت كله طلايب ومشاكل وسحوره مكافي اخلص عمري كله هنا
بديعه : اي كله هنا وجهالنا هم هنا يخلصو لدوخين روحج واكعدي واسكتي خلي اشوف عمتي شبيهه تصيح

عمشه : امردك مرد  وروح ابيك جوز من البت كل شوي صياحك لراس الشارع وايدك هاي مال تجسر گل شوي مادهه عليهه
صمد : يمه لسانها طولان وتتجاوز اول تالي
عمشه : چا من سوالفك الغمه يل اغم لعبت بلبت فلك تزوجت عليها هججت اخيها طگيتها چا زين منها وتباوع بهاي الخلقه الخايسه
صمد : يمه انتي ويايه وياها
عمشه :وياهه عبن اعرفنك موخوش واعرف گل سوالفك يصمد لاتشعل النار بيدك عبن ماتكدر اطفيها لون كبرت

صمد : اي ضلي وياهه وعايفها الج اشبعي بيها
عمشه : وين مولي دهر الصابك
صمد : مولي لصديقي راح اظل يمه جم يوم وماارجع اخلص منكم
عمشه : عيونك تعاين لذاك الصوب افگسهه
يبن عمشه
صمد : صديقي الله اكبر صديقي ميصير اروح اله
عمشه : ولي كون ولت روحك ملوفد تلوفد امداها لبطني الجابتگم

خوله : كاعده اسمع بس مغطيه راسي مااريد اشوف احد وانجرت المخده رفعت عيني لكيته نجم
نجم : شون صرتي
خوله : زينه وجريت المخده ورجعتها على راسي رجع سحبها
شرايد نجم
نجم : انتي شرايده والتردي يجرالج تردين اروح اتعارك وياه والله هسه ادمي وخلي ادخل الحبس فوزي مو احسن مني من دافع لاخته كولي
خوله : مااريد شى بس عوفوني
نجم : اعرف بيج تكرهينا كلنا بس والله كلنا نحبج وخاصه اني احسج اقرب اخوتي اليه
وشسوين ماازعل منج بلعكس مرات الوم حالي لان مكتلت نفسي ومنعت هواي شغلات جان لازم متصير الج

خوله : اريد شى واحد منك
نجم : من عيوني
خوله : ورقة طلاكي باجر بيدي مااريد ابقى ليله ثانيه على ذمته
نجم : هاي ماكو اسهل منها هسه اروح واتواعد ويااه وباجر انروح للمحكمه رايده شى ثاني
خوله : لا مااريد تقرب وباس راسي وطلع
ااااااااه محد يحس بيج يخوله غير الضاك لوعه ولفه مو اله

اطلكت خوله واستقبلت الامر بهدوء تام وهذا الشى الجان مخوفنا اني وذكرى
حاسه وراها شغلات هوايه البيت هادئ مشاكل ماكو الصار بس عبيد وجوحي رجعو للبيت وياهم مهند لان مدرسه عنده
بقت ذكرى مسؤوله عنه وادرسه وتهتم بكلشي يخصه عبالك ابنها ذكرى بهاي الفتره ذبت حيلها على البيت ورغم صمد ماكو مهتمت ولا دارت بال كامت تطبخ وتنظف وايدي وياها بس هي اعتنت بحمويني اكثر مني كامت اي واحد يريد شى يصيح عليها وهي متقصر تركض ركض

ومن اسألها ليش هيج تسوين تكول اريد اشتغل واتعب حتى ماافكر قبل ماانام وابقى ابجي على كلشي صار بيه وحمويني ماشفت شى موزين منهم ومامسوي شى صعب الاكدر عليه اسوي
شالت البيت شيل وكلنا منتبهين كل اليوم تركض هنا وهنا واني عليه العشى والخبز

كل هاي الفتره مسمعنا اي خبر عن صالحه وساهره والولد هم ساكتين اتوقع ينتظرون تبرد الشغله مبين عرفو صالحه وره سالفه خوله لان ابد محاولو يحجون ويااها ولا يعاتبوها
خوله : حبست روحي بلغرفه اصعب الايام جان ثاني يوم وثالث يوم من المشكله واني صافنه على الساعه بلحايط وشون ادك براسي كل دقيقه وثانيه واكول هسه مكيجت هسه سويت تسريحه هسه لبست بدلتي
اتخيل لحظه لحظه لحد ماوصلت الليله الي لازم انام بيها بحضنه خلصتها حاضنه المخده واشهك وامي تباوع عليه وتشهك ويايه وخرت المخده وكتله لتنسين هذا اليوم حتى اخاف بيوم اخذ حقي لتكولين يمه ليش هيج سويتي حرام عليج احفظي حالتي واسمعي ونتي واني اشهك لله بعذابي
حتى لا تجي الساعه وتلوميني

عمشه : دجيتيني بخنجر مسموم بگلبي وگلب هلي يايمه سوده بوجهي
جبيره علتي ومامش طبله
وعلي دنياي متحزم طبله
تدري الناس ياهو الي طبله
ابليس وخرب الخي وي اخيه

خوله : خلصت الليله واني ساعه ابجي وساعه اتنفس وساعه اصفن لحد مااجت ورقتي واطلكت وحبست روحي بلغرفه مااريد اشوف اخد وبدعه تجيب الاكل وعلى كد الحمام ومااريد اشوف بشر
دخلنا ١٩٩٠ سنه جديده وبدايه السنه اجت عمشه وكالت
عمشه : يمه لو تعرفين شجبتلج
خوله : خير
عمشه : تلفزيون هالكبره وجديد وروح ابويه موش من السكراب
خوله : شسوي بيه
عمشه : چا موش كتلتي رويحتج عبن امل صويحبتج عدهم واحد
خوله : حييل هاي قبل ٣ سنوات هسه يله اتذكرتي
عمشه : بروح ابيج لاتكسرين خاطري شلته على افادي وجبته عبن اشوف فرحتج
خوله : يافرحه يايمه فرحتي اندفنت ويه الماتو
عمشه : كومي يايمه لاتكدرين خاطري يبعد بيتي وهلي

خوله : كمت وشفت الجهال كاعدين بلكاع ومنتظرين يشتغل ونجم يشكل بالاريل مالته
وكلها صافنه عليه
شغله والكل يهوس ويصفك والجهال فرحانين
شلت ناي من الكاع وحطيتها بحضني
تعااي ولج شو انتي كبرانه
ذكرى : بعد جم يوم تكمل سنه
خوله : كون متكبر تضل هيج صغيره ولج المن كبرانه للضيم
ذكرى : رجعنا وتالي ويااج
خوله : خلي نشوف التلفزيون الجديد العمتج جابته

بقيت ايام كلها ادخل للغرفه وقت ماتنفتح القنوات اكبالها واكعد ومن يخلص البث اطفي وانام اخلص وكت بيه بس عيوني تتنقل على ذكرى الصايره متكعد كل الوكت شغل وكراب شجاها هااي
كعدت الصبح سويت جاي وطلعت خبز وحطيت جبنه عرب بيها لفيته وكعدت اكل انفتحت باب سهاد
سهاد : شعجب اليوم كاعده من وكت
خوله : عجبني ليش عندج مانع
سهاد : لا استغربت هاي الفتره كلها انتي ماكو لهذا سألت
خوله : شو انتي ولا تمدين ايدج بلبيت احد گلج هنا فندق
سهاد : ليش مبين مكطعه البيت انتي من التنظيف
خوله : حطيت الكلاص بلكاع وانداريت عليها وكتلها بصوت عالي بيت بيه ٣ جناين وتردين انظف ليش يمه
سهاد : شكو بيها غير هو بيت اهلج قابل بيت غريب لو بيت عيالج ياانسيت ماعندج بيت عيال

كمت وكفت گبالها وبيدي الجاي اسمعي لج اخاف تشوفيني ساكته تره اني مو بزونه ماكلين عشاها وتسكت متعرفين من تطبك خبالاتي شسوي ودرت شوي جاي على صدرها وعاطت
سهاد : يمه احتركت حركتني خوله الحكوني

خوله : اششش جربي احجي بعد مو الكلاص كله اديره القوري كله وربج اخليهم يحيرون وين وجهج وين كفاج استري على روحج سهاد اذا طلعت ضيم السعلوات نسوان حموينج بيج راح تسكطين جوزي مني احسلج ولتبسمرين

سهاد : هذا هو سكتت والله مالي دخل بيج
خوله : البيت يلمع من وره ذكرى ساعديها لتضلين هيج
سهاد : مااشي اساعدها
خوله : نسوان مال حرك
عفتها ورجعت اكمل الجاي باوعت حرامات ربعه وكع بصدرها يله اكمل اللفه واصب بعد

بديعه : هيج احسن جوتج
سهاد : والله هاي مو صاحيه وكمت اخاف منها
بديعه : اي خافي منها تره ماعدها يمه ارحميني
سهاد : هذا هو راح اجوز منها ولا احجي وياها ابد
بديعه : الف رحمه على ابيج يخوله من كرصتيها هيج كرصه

ذكرى : الجو بارد ثلج ومنومه يونس ومهند بلكاع وناي بفراشها اباوع على روحي متمدده بفراشي والبصفي فارغ هاي الفتره كلها صمد ماكو اجه مرتين اخذ ملابس ودار وجهه وراح رغم حاسه هو يم وحده مو واحد بس ما مهتمه ليش احرك بروحي واذا اعوفه وين اروح الاخ راح لديالى والاب اتبرى مني وامي مريضة مو حمل مشاكل كمت يوميه الزم السبحه واتحسب على الظلمني واذاني

التزمت بصلاتي وقرايه القران وحتى بدعه كمت اجبرها وقت الصلاه تصلي حتى لو عدها شغل تعوفه تصلي وترجع تكمل ومرات تتوسل بس تكمل بيدها مااقبل اله تصلي احبها ومااريدها تتأذه من احد بيوم

بديعه : كعدت بيوم عادي لابسه كومه كوه امشي دشداشه قديفه وروب فوكاه وكلاو على راسي من الصوف بارده نهايه شهر الواحد ١٩٩٠
نزلت لكيت ذكرى بطرك الدشداشه وتكنس وتنظف يمعوده بارده ثلج حتى الصوبه ما مشغلتها
ذكرى : مو اتحرك مااحس
وين حموينج
بديعه : طلعو اليوم حتى عمتي عدهم خرابه جديده بيها غراض وطلعو كلهم
ذكرى : الله يقويهم ويرزقهم
خوله : صباح الخير
بديعه : باع الثانيه هم بطرك الدشداشه ولجن شبيجن بس اني لابسه الكنتور كله
ذكرى : هسه من تشتغلين ترتاحين

كملنا شغلنا وكاعدات نضحك سهاد بيت اهلها اندكت الباب طبت ام اسماعيل رادت تكوم خوله مخليتها اكعدي قابل كاتله ناهبه خلي تشوفج شون تضحكين ومرتاحه
ام اسماعيل : هله بلحبايب شونجن
ذكرى : هله خاله اكعدي
ام اسماعيل : عمشه وينها
بديعه : طالعه على باب الله خيرج خاله اكو شى
ام اسماعيل : ولجن سراحيه ماي كلاص جاي مابيجن حظ
ذكرى : اني اكوم تدللين
ام اسماعيل : شونج يمه خوله
خوله : هله خاله بخير جنت حيل متوتره ومبينه لان من شفتها تذكرت ذاك اليوم من خوفي سحبت ناي وسويت نفسي اللاعبها وضلت تحجي على هاي وذيج واني اضحك بناي وجان تكول

ام اسماعيل : يااا نسيت اكلكم غير اليوم عرس اكرم ابن ام اكرم
خوله : كوه لزمت ناي رادت توكع من ايدي
ام اسماعيل : شبيج يمه
خوله : مابيه شى خاله
ام اسماعيل : وهذا وجهج الصار جنه نوميه
بديعه : لا خاله بلعكس يخبل وجهه مورد
ذكرى : خيركم
خوله : لا ماكو شى بس اكرم اليوم عرسه
ذكرى : عزه وكعت الصينيه من ايدي
ام اسماعيل : يابنتي اثوليتي هاي شبيهه جناين عمشه ولا وحده حوك
بديعه : تتغدين ويانه لو ترحين مستعجله

ام اسماعيل : اييي مستعجله اروح لبيت اشرب جاي ابرك
بديعه : هله بيج خاله هله بيج
خوله : بس خاله مكلتي منين الاخذها اكرم
ذكرى : روحي خاله ماكو شى
ام اسماعيل : اوكفن انطن صبر اخت مرت اخوه مثلكم شون صالحه وساهره
خوله : هااا بلعافيه عليه
بديعه : وشبسرعه تزوج
ام اسماعيل : وعليش يتأخر الغرفه وجاهزه والذهب وجاهز شال هاي وحط ذيج
خوله : لا عاب حلكج خاله صدك شال هاي وحط ذيج تكول مزهريات مو نسوان

ذكرى : سلمينا خاله الله وياج
ام اسماعيل : وگبر كون ايدفعن ادفع بيه تجي عمشه واگلها عليجن ماضلت يمجن العافيه ماتستاهلنها
بديعه : منج ولا نريده طلعت واثنينا اني وذكرى صفنا على خوله
ذكرى : انطيني نااي
خوله : هااج بقيت هادئه احس عظامي ثلاجه ولحمي يجوي دمي يجري بسرعه ويحرك بشرايني كعدت صافنه على التلفزيون واحسب للساعه اريد اشوفه وهو عريس

بديعه : اشتعلت لشتج ام اسماعيل بله هاي سوايه البنيه جمدت ياعيني عليها
ذكرى : وين نوديها اليوم الزفه مالته
بديعه : نختلها قابل اوف ربي شيخلص اليوم هسه وكت عمتي تتأخر اليوم اقلها موجوده تساعدنا اذا صار شى
ذكرى : ان شاء الله ماكو شى

بقينا كاعدين يمها تكول حرس والي تكوم من عدنا علمود الجهال لازم الثانيه موجوده
صار العصر وساعه ٤ سمعنا مزيقه كامت خوله

بديعه : وين فدووة
خوله : شبيكم خايفين بس اشوف والله مااسوي مشاكل
ذكرى : عليج الله ورسوله لترحين
خوله : اصعد من السطح اشوفه وعفتهن وصعدت كل بايه اصعدها واكول بگلبي مو هو اكيد هاي ام اسماعيل تكذب عليه معقوله وره شهر ونص يتزوج بهاي السرعه والسهوله وصلت للبيتونه جنت هاي المده كلها مصاعده فوك ولا واصله شفت غراض مصفطه باوعت جهازي وملابس مال العرس دفعتهن برجلي وفتحت الباب مال السطح اجاني هوا ثلج من حراره جسمي حسيته هوا تموز

وصلت التيغه (ستارت السطح الحايط) واباوع شون امه لابسه الهاشمي وتهلهل وتهوس والجكليت ينطش واصدقائه واخوه وابوه الكل يركص وفرحان عيوني ادور عليه اباوع على سياره العرس جان المفروض اني بيها مو هيه
جان يطلع من بيتهم لابس القاط والرباط ويضحك لزمو ايده ويهوسون اله ابتسم مدري شون رفع عينه على سطحنا جنه يعرف اني اشوفه اختفت بسمته ونزل ايده من اخوه

ذكرى : تعالي ندخل خلي يولي ميسوه اضفر رجلج
خوله : شوفي شون فرحان اليوم وحده تنام بحضنه غيري
بديعه : وعلى شنو تحرگين بروحج ولا يسوه العتب والزعل وهذا الرجف
خوله : رجعت باوعت عليه وهو عين عليهم وشويه يرفع راسه يباوع عليه وامه ومرت اخوه يركصن وكلها تكمز
كعدت بلكاع متحملت منظره
ذكرى : شون بينا تعالي ننزل خوله حتى عيب وكفتنا هيج هسه عبالهم بعدج كاتله نفسج عليه خلي يولي
خوله : نزلت اركض واني ابجي واناشغ طلعت للحوش وجبت نفط وصعدت

بديعه : لج عيني شراح تسووين
خوله : اسكتن لا احرك روحي واحرك البيت كله
ذكرى : عوفيها بدعه هذا النفط لغراضج مو
اني اساعدج
بديعه : باع المخبله الثانيه

ذكرى : اسكتي بمعوده لتروح تحرك روحها اششش
عاونتها حاسه بيها مو هينه الصار الها اني نجم من تزوج احتركت روحي لمن فحمت واني لا انخطبت اله ولا شى ومتزوجه وعيب حتى افكر هيج والروح مارحمتني مو عاد هيه

جرينا كل غراضها بلسطح ورشت نفط عليهن وذبت الشخاطه وكبن الملابس
بديعه : يبووو راح يحترك البيت
ذكرى : روحي جيبي البطانيات القديمه شويه وانطفيهن
خوله : كعدت كبالهن بلكاع واني اشوف قطعه قطعه تموع كدامي تمنيت اكون مثلهن واموع واختفي من الدنيا
ذكرى : عيطي فدووة ابجي هذا جهاز عرسج يحترك وحبيب عمرج ذاااك المزيفه مالته تارسه الفرح ابجي
خوله : اااااااااااااه ليش هيج عفتني ليييش بسرعه نسيت كلشي الله ياخذك شكد نذل وحقير 
ذكرى : بقيت يمها لحد مبجت وارتاحت

بديعه : خلي اطفي يمعودات البيت راح يشتعل حتى الگير ماااع
ذكرى : تعالي انطفي
طفيت اني ويااها الغراض نصهن تلفن والنص الثاني تصخمن شلناها بكواني مال طحين ونزلناها جووه
تعالي شيلي ويانه وحطي گلبج بوحده من هااي الكواني وللزبل محد يستاهل هيج تنكسرين
خوله : سهله ماكو شى يدوم

ذكرى : راحت الزفه بقينا نواسي خوله طبت تسبح واني بدعه بلباب نخاف لتسوي شى بروحي طلعت والخاولي براسها
وين رايحه
خوله : اوكفن
ضالات نفتر وراها حتى جهالنا عفناهم طلعت للسكراب وللغرفه الجوه بحوشت وطلعت صره وبطنها علاكه
هااي شنو
خوله : فلوس جوحي الباقيه
بديعه : لا على بختج لهسه ضامتهن

خوله : ولهسه جوحي يدور عليهن ودوم من اطلع لو اروح لمكان يدور مبقى مكان بلبيت مدور ويلوب بس محد حااس بيه
ذكرى : وشراح تسووين
خوله : انطني المشط
ركضت جبت المشط الها مشطت وشالت شعرها
منو تجي ويايه
بديعه : وين يلمصخمه انتي مبين راح تودينا بهبيه مره حركتي الغراض وهسه هاي الفلوس هاي شوكت جمعهن جوحي
خوله : منوو تجي فضني
بديعه : اكو غيري ذكرى متطلع البس العبا واجي ويااج

خوله : اذا اجت امي كولي اخذتها بدعه لامل ويرجعن
ذكرى : لتتأخرن فدوة ومكلتي وين رايحه
خوله : مو اكو شى اسمه صدقه
ذكرى : اي صدقه من مالج مو من مال اخوج وفوكاها بايكته
خوله : تره هسه اذبهن بلمجره اختاري
ذكرى : لا روحي تصدقي بيهن احسن

بديعه : طلعنا اني وياها ونفتر شكو بيت يتيم وناس على كد حالها انطتهم ١٥ بيت فرينا واني اطحن على هاي الفلوس والله لو يعرف جوحي يخوله اله يعلكج من شعرج
رجعنا وهي مرتاحه وتضحك ولا جنهه الجانت تبجي وتعيط وتحرك قبل شويه
خوله : اثاري الصدقه راحه نفسيه واني ماادري
بديعه : اي الصدقه من جيبج ياخيه مو بوكه
خوله : لتلغين واسكتي هسه خلي يدور براحته خلي يرجع حاال الضيم حاله مثل الجلب يشتغل ويقصر عليها

رجعنا للبيت وهمزين محد جاي وره ماطبينا بساعه الكل رجع جانت خوله مرتاحه وتباوع بلوجوه وتبتسم والكل مستغرب اله اني وبدعه كوه نبلع اللكمه
خلصنا اليوم هزات ورجيف وثاني يوم كعدت من الصبح لبست مهند ملابسه وانطيته لفته ودزيته للمدرسه
كعدت انظف وسهاد ويايه بدعه تكول دايخه ومالي حيل تكول كل مااتذكر الفلوس شون انطتهن انهضم واني اضحك عليها

عمشه : وينجن يمكموعات اريدن كلاص جااي
ذكرى : اي عمه اجيت
كاعده عمه تشرب كلاص الجاي واني بيدي الكط التمن وانفتحت الباب وطبن ساهره وصالحه وياهن مره كاامت عمتي وعيونها نطت
هااا يغنيه شجابج لا هله بيج ولا ببنياتج
غنيه : جبتهن واجيت يحبن على يدج ويرجعن عبن هاي دارهن ومالهن مجان غيره

عمشه : چا وانه هيج اتسامح وياهن وانسى گلشي ذني موش بنيات حيايه ولزم تنكطع روسهن
غنيه : انه اليوم اجيتج ولدارج ارد البنيات واخذ بت منج
عمشه : منهي
غنيه : انه اريدن خوله لجاسم يعمشه

يتبع ...