فـي صمتـها نــاي

التاسع/ جزء 2

فـي_صمتـها_نـاي

#الـجــزء_الـثانـي

#البارت_التاسع

#للكـاتبة_زهراء_المظفر

°°°°°°°°°°°°°°°°

سأغير التقويم لو احببتني

امحو فصولا واضيف فصولا

ملك أنا لو تصبحين حَبيبتي

اوج الشُموس مراكِب وخيولا

لا تخجلي مني فهذي فرصتي

لأكون بين العاشقين رسولا

_________________________________

الاكثر تفاعل للبارت السابق
ـ مبروك💙

zezelolo321

___________________________________

قبل لاتبدون بالبارت لا تنسون تصلون ع النبي

اللهم صلِ على محمد وال محمد💙✨

مبروك عليه و عليكم ال 70 الف مشااااااهدة للرواية  😍😍😍
___________________________________

بسم الله الرحمن الرحيم
" واذا مرضت فهو يشفين"
صدق الله العظيم

ماعرفت بشنو ادعي اله بعد كل الايات والسور الي حافظتها راحت عن بالي وما صرت اتذكرها

ما طولوا هواي ربع ساعه جنت كاعده بيها ع نار هادئه مخليتني اغلي بيها

طلع واحد من الممرضين وكال ....

ـ لا تخافون ابنكم مابي شي بس يعقمون اله الجرح ويطلعونه .. خبصتوا الممرضين كلهم حسبالنه حالته خطره شنو الجاهل ما يتأذه شوي بسرعه تجيبوهم علينه

انتبهت لحيدر الي تقدم بخطواته للممرض وهو عاقد حواجبه ومشدد ع قبضه ايده وكال ..

- انته مو كلت بس يعقمون جرح الطفل خلص شغلك بدون هالحجي الزايد واذا تتضايق مني فهذا كلام الرسول (صلى الله عليه وال وسلم )

" اذا عملت عملاً فأتقنه "

رد عليه الممرض فورا من خلص حيدر قول الرسول ..

_ خويه هسه اني شكلت بس حالة ابنكم ما تستاهل تجيبونه النه واحنه كلنه ركضنه اله حسبالنه حالة خطيره حيل واكو حالات اهم من عده وخطره تأخرنه عليهم

ما تشوفنه بس 5 ممرضين نركض بكل المستشفى من مريض لمريض حتى ننسى يا مريض شفناه وهالتشوف بعينك الطوارئ ما تفرغ ابد وياريت واحد يكول رحم الله والديكم لا والله نشبع مسبه اذا واحد مات يمنه

طبطب حيدر ع كتف الممرض وهو يباوعي وكال

ـ رحم الله والديكم وحقكم والله يساعدكم بس انخبص كلبنه ع الطفل وامه زين ما راحت بيها من الخوف عليه

ابتسم الممرض لحيدر وكال وهو يمشي ..

_ الله يحفظهم الك الطفل وامه ..

حيدر ما صدك الي سمعه وصاح بصوت مسموع
ـ امييين يارب

نزلت راسي بخجل وكلبي صار يدك مثل الطبل .. حجيت وي روحي بصمت ..

- عفيه كلب ماتهدأ دكاته قبل شوي ع يوسف ومن تطمن ع يوسف صار ينبض بسرعه خجلان من حيدر

شويه وطلع ممرض ثاني من الغرفه وهو شايل يوسف بأيده و انطاه لحيدر حتى يشيله ...

- الحمد لله ع سلامته ، مابي شي البطل جرح صغير .. يكبر وينسى

تشكر حيدر منه وشال يوسف .. وتقدم الممرض عليه وهو يقدم الي علاكة وكال ..

- هاي بيها معقم وشاش ( باندج) تبدلينه اله كل يوم وانتبهي يطلع دم من جرحه وما تبدلينه اله لو يتوسخ ترى الجراثيم تتجمع ويلتهب مكان الجرح

اخذتها منه ومشيت وره حيدر الي مشه كدامي جانت عيوني ع يوسف الي ع يوم يوكفلي كلبي بهاي وكاحته يوميه مهبطني بشغله جديده

فجأه وكف حيدر والتفت عليه وشمر بوجهي كنيلكس وحجه بعصبيه وهو عاقد حواجبه وصاك ع سنونه واسلوبه ابد مو حلو ماعرفت افسر ليش سوه هيج ..

- مسحي حمرتج ومكياجج بسرعه لو عاجبج الوضع هيج كل العيون عليج

اخذتها منه قبل لا تطيح بالكاع وسحبت يوسف بحركه سريعه من ايده وكملت مشيتي بخطوات سريعه بدون ما امسح شي

طلعت من المستشفى وجان اكو كومه تكسيات بباب المستشفى ..

شايله يوسف والعلاكه الي انطاها الي الممرض بأيدي والايد الثانيه رافعه بيها طرف الفستان لان طويل وحركتي متعرجه بسبب الكعب العالي

وكفت كدام اول تكسي صار كدام عيوني فتحت الباب ونزلت يوسف ع الكاع حتى اكدر اصعد

بعدني ما صعدت اجه حيدر وراي واخذ يوسف من ايده وكال ..

ـ وين رايحه وحدج بتكسي شنو الي وياج مو رجال ؟ يلا تعاي وبلا فضايح اكثر كدام الناس

مشيت اله بخطواتي المتعرجه واحس اصابع رجلي تكسرن حجيت وياه بعصبيه ..

- انته شكو وتدخل بيه ؟ منو انته ابوي ،اخوي ، رجلي، ابن عمي، حتى تتدخل بيه ؟
انطيني ابني اريد اروح

شو هذا ولا جني جاي احجي وياه اخذ يوسف وصعد بسيارته وكال

ـ اذا تردين ابنج تعاي وياه اني ما انطيه هذا امانة اني الي جبته واني ارجعه اذا تردين ترحين وحدج روحي

زفرت نَفسي بملل وضوجه ورجعت يم هذيج السياره اخذ العلاكه الي طاحت بالكاع

اول ما وصلت يمها طلع السايق من سيارته وسألني

ـ خويه خاف محتاجه شي .. كولي اذا هالشخص متعرضلج لا تستكين

جاوبته بتوتر من سؤاله ..
_ لا خويه اني وزوجي مشاكل عائليه تسلم

اخذت العلاكه ومشيت قبل لا اسمع كلامه ..
شفت وجهه وهو يباوع للجهه الثانيه

صعدت بالمقاعد الخلفيه وسديت الباب بكل قوتي ..

من سمع الصوت فز من مكانه واحس كلبه انمرد ع سيارته لان هي مبينه جديده ومعتني بيها ، انقهرت عليه بس عادي يستاهل شكو يتدخل بيه ويحاجيني بهالطريقه

ياهو يجي يصير عنتر براسي وضل يصيح شنو اني بلا مشاعر اي واحد ضايج يطلع ضوجته بيه

خاف قبل جانت تصير بس منا ورايح ما اخلي واحد يتحكم بيه ..

من بعد ما طلع حيدر من صدمته العاطفيه وي باب السياره الي كسرته اني اله ..

حرك السياره بسرعه وراسا شغل المسجل ع اغنيه لكاظم الساهر جنت اول مره اسمعها وتأثرت بكلماتها جانت عيون حيدر عليه وعيوني هم جانت عليه ...يكول بيها كاظم

ـ ماريدك بعد روح
ولا احبك بعد روح

ما اشيلك وسط عيني
بس بالكلب والروح

ما المسك ولا لمسه
ولا اهمسلك ولا همسه

لسا ماشفت لسا
شمخبيتلك الروح

من سمعت هالكلمات درت وجهي عنه وضليت اباوع للشارع بملل وضوجه هسه هاي هم اغنيه يخليها ..

سرعان ما انصدمت ودرت وجهي ع حيدر من كمل كاظم اغنيته وراسا صارت عيني بعينه من كال

لا تزعل انا امزح
الشوگ البكلب يفضح

انا مثل الطفل افرح
اذا تضحك يمحبوب

ماعرف ليش ابتسمت ونزلت راسي بخجل وحيدر بادلني نفس الابتسامه بس ضعف الحجم ابتسامته من الاذن للأذن

كملنه الاغنيه واحنه نوزع ابتسامات ع شنو مادري

قبل لا نوصل للبيت يوسف ضل يطفر ويصرخ بالمقعد الامامي يم حيدر ويبجي يريد عصير وكف حيدر السياره كدام اول محل حلويات قريب علينه ونزل من السياره

سحبت يوسف يمي اريد اسكته لان صوته شهيره وكلش عالي اخاف واحد يسمعه وحسباله خاطفينه لان يصيح اريد ماما ومن اجي يمه يحرك كلبي ويزيد ضيمي وهمي ومايريدني يريد فخريه

شويه واجه حيدر جاي وجايب وياه علاكه انطانياها وكال ..

_ يمعوده جبت اله كلشي انطيه اي شي يريده بس سكتيه صوته شعلوه

فتحت العلاكه وشفتها متروسه ترس حلويات وعصايب فتحت عصير برتقال ليوسف وانطيته اله حتى يسكت وكلت اله ..

ـ شدعوه هالكد جايب شنو حتى المسافرين مايشترون هالكد

جاوبني وهو منتبه لتقاطع السيارات الي صار كدامنه

- شدراني شنو يحب جبت اي شي شافته عيني بس حـتى يسكت لان صوته للمحل واسمعه يصرخ وبعدين مو مشكله انطيهن لروضة الاطفال الي بالبيت من نرجع يفرحون بيهن

غيم الصمت ع الاجواء داخل السياره من حسينه ع يوسف نام ..

صار هدوووء لعدة دقايق ... وقطع هالهدوء صوت تلفون حيدر الي بده يرن

فتح الخط وبده يحجي ..
- هلا بخوخه .. لا لا مابي شي جرح صغير ..

اي الحمد لله .. .. بالطريق راح نوصل ..
هو انتي بس فكري مجرد تفكير تتغدين بدوني وشوفي شسوي بيج ..

ههههه لا شسويلها قابل راح اكلها ؟ يلا يلا مع السلامه .. ولج ولي كلنه مع السلامه شلزكتي
يلا باي ..

سد الخط ورجع الصمت يمد الملل بأجواء السياره بس حيدر رفع الملل وجاب الخجل من بده يحجي وكال ..

ـ ما اتوقع راح تصيرلي فرصه احسن من هاي وحقج شما تكولين عليه كولي ..

سكت هو واني سكتت لعدم فهمي واستيعابي للي كاله .. استأنف كلامه وكال

ـ ناي اني اسف ع الاسلوب الي عاملتج بي قبل شوي بس انتي ما شفتي الممرض شلون اكلج اكل بعيونه والي موجودين بالطوارئ نفس الشي وانتي امانه يمي وغيرتي ما سمحتلي اشوفهم يباوعون لوحده من اهلي وتمشي وياي

جاوبته بهدوء ..
- مصار شي اني هم ما انتبهت لروحي من خوفس ع يوسف ..

هز راسه وكال ..

- اكلج هي خربانه خربانه خليني اكول الي بكلبي كله مره وحده لان كمت امسلت بالحجي

باوعته واني عاقده حواجبي ومرسوم ع وجهي ابتسامه صغيره بسبب كلامه الغامض

استأنف كلامه وكال ...

ـ يجوز انتي ما تتذكرين هذاك اليوم بس اني اتذكر كل ثانيه تعدت وانتي يمي ..

تفاصيل وجهج التعبان مافاركتني بيوم .. ما تتصوين شكد حقدت ع المرحوم من سولفتلي فخريه ع الي يسويه بيج

ناي من الاخير اذا ما عندج مانع اني اريد اتقدملج رسمي و على سنة الله ورسوله

واني استعجلت بهالموضوع وياج حتى لا تكولين شافني يوم واحد ويريد يسوي علاقه لو يخلص وكت ، اني مو نوع الي يدور علاقات عابره بحياته اني رايد حلال الله ورايدج انتي تصيرين حلالي ..

جانت عيونه تريد تاكلني اكل واذنه بس تريد تسمع جوابي اصابعه تشابكت ببعض بتوتر والانتظار صار مزعج من ناحيته مع انها ثواني قليله بس ..

سكتت وما جاوبته احس روحي تجمدت وكلبي نبضاته صارت مسموعه ، لساني نشل وما اكدر انطق بأي كلمه ..

هو هم حس بيه وعرف إني ماراح اكدر اجاوبه بشي فـ كمل طريقه للبيت وما ضغط عليه وهو يكول ..

_ شوكت ما تشوفين روحج اخذتي قرار نهائي كوليلي

غمز وهو يكلي ..
- فكري عدل واستعجلي تره فرصه ذهبيه اني ما اتعوض

وصلنه للبيت واني اتهرب من نظرات عيونه نزلت من السياره وهو توجه ليوسف حتى يشيله

دخلت امشي بخطواتي المتعرجه الي حتى العجوز تمشي احسن مني وفستاني كله دم من يوسف وحجابي خربان وشكلي مدري شلون اوصفه الكم بس باختصار جنت العب نفس بحالتي المبهذله هاي

غميت روحي بخفاء وجنت احجي وي نفسي بصمت ..

- امداني حتى من واحد عبرني وراد يصير وياي رومانسي واعترافات وكذا شافني بهذا شكلي الي يطرد النعمة والعافيه

وصلت قريب ع الباب الداخلي للبيت و وكفني سؤال حيدر ..

- ناي اكيد عندج يوتيوب بتلفونج موو ؟

هزيت اله راسي بمعنى اي ..
كال انطيني ياه شويه بس

انطيته تلفوني الي جان بالجيب الي موجود بواحد من جوانب الفستان

اخذه شكم ثانيه وجان بالكوه مسيطر لان شايل يوسف بأيد والتلفون بأيد

شويه وانطاه الي وكال .. من تفرغين وتـصير وحدج وما عندج شي سمعيها

هزيتله راسي بمعنى اي واخذت منه التلفون
دخلت للبيت والكل جانت عيونهم عليه وتسألني عن وضع يوسف وشلون صار واني اردد بالحمد لله زين وما بي شي جرح بسيط

كعدت يم البنات وذبيت الحذاء من رجلي احس رجلي تكسرت من وراه وجريت اذني تووووبه اذا بعد البس كعب

ماكو غير دقايق و اذن الكل كامت توضت
وكمت وي البنات للمطبخ حتى اتوضه ..

اسمع صوته وهو يصيح جوعان ولجن جووعان بيبي تعالي لهذن الخارمات ( العجوزيات - الخاملات )

هو يحجي مثل بيبته وابتسامتي ماعرف شلون اضمها وما ابين اهتمامي اله

وصرت كل ما اسمع صوته كلبي ينبض بنبضه قويه مثل الكهرباء الي تمشي بكل جسمي وتنفضه الي

اول ما دخلت للمطبخ كالت الحجيه ..

هلا يمه تعالي اكليلج شي وجهج اصفر من الخوف خلي تردلج رويحتج لو خلي يسون الج عصير حالي تشربينه شويه يردلج عافيتج

جاوبتها بابتسامه وكلت ..

- تسلميلي بيبي ومشكوره لو اريد جان شربت بس اني عندي سكر الحلويات ما اكدر اتقرب منها

الحجيه لطمت وجهها والصدمه توضحت ع معانيها وهي تكول

ـ جا يمه شمالج من هسه مسكربه وعاويه ( مريضه وتعبانه )

امده الوكت الي خلاكم شباب وين شباب قبل واحدنه يعادل عشره منكم

جاوبتها فخريه وهي تحاول تطلعني من الفشله الي دخلتني بيها الحجيه

ـ بيبي هيه شلها علاقه وراثه وحكمة ربج هم اعترضي على هاي بعد

جاوبتها الحجيه وهي تگلب بجدر التمن ..

- يااا شبيك ولج اكلتيني شدراني بيها وراثه ، وهسه ع اساس الي كلته موش صحيح

جيلكم كله مدري شلونه ومعصكلين لا بيكم لحيمه لا شي والي يحاجيكم تكلوله تعبانين خايبين وينكم وين التعب من امداني

الكل سكت واني تقربت من فخريه اسألها اذا عدها شي اغير ملابسي كلهن دم واريد اصلي ..

كاتلي انتظري هنا ع ما اسأل البنات الج لان هيه ما جايبه وياها ومرت ابوها محد تحجي وياها ومحد يطلب منها شي ف مستحيل خوخه تنزل راسها لسحر علمودي

ضليت انتظر وحدي بالمطبخ .. دخل حيدر وهو يغني ويركص بدون ما ينتبه بوجودي

وشيصبر العاشگ يا خاله
شيصبر العاشگ ياخاله
و اها اهااا اهاا

تبسمر بمكانه من دار وجه وشافني كدامه ماكدرت اسد حلكي وما اضحك ع شكله المفتشل

بدون ما يحجي اي شي توضه ع السريع وطلع من المطبخ ..

مسحت دموعي الي جانن ينزلن لان حابسه ضحكتي بالكوه ..

بهالاثناء دخلت عليه بنيه شابه وحيل حلوه ماشفتها اول ما اجينه اني وفخريه الصبح

سألتي بصوتها الناعم والي كله انوثه ..
- انتي ناي مو ؟!

هزيت راسي بمعنى اي وكلت الها ..
- اي اني حبييتي ..

تقربت مني وحظنتني بقوه كأنها تعرفني من سنوات باستني وسلمت عليه وبادلتها بالسلام وكالت..

- اني سهر زوجة علي الي هو اخو فخريه الجبير وهم اصير اختها لسحر زوجة ابوهم

ابتسمت بوجها لان وجها المبتسم يجبر الواحد يبتسم اله كالتلي وهي تقدم الي قطعه ملابس ..

- فخريه كالت محتاجه شي تلبسينه لان ملابسج متـدمره هاي اني همزين جبت وياي احتياط ولو مال بيت بس لبسيها لحد ما تغسلين فستانج وينشف

اخذت الدشداشه منها من بعد ما تشكرتها وتحمدتلي ع سلامة يوسف

مع انها ثواني معدوده شكد حبيتها بيهن وحسيت بكلبها حيل طيب واكيد الكل يحبها

جان بوجها شي يوحي انها حزينه بس جانت تتصنع الابتسامه ، اني اكثر وحده يمكن تحس بهالشي

دخلت للحمام بدلت ملابسي وغسلت الفستان من الدم ونشفته بالغساله

توضيت وطلعت شريت الفستان بالشمس

توجهت لغرفة فخريه صليت والكل عيونها جانت عليه ويسولفن بيناتهن

اول ما خلصت صلاتي سألتني وحده من البنات
ـ انتي سنيه ؟

جاوبتها بهزة راس وابتسامه بمعنى اي ..

شكد حبيت ابتسامتهن وتعاملهن وياي وسوالفهن سوه مافرقن بطائفه ولا مذهب بالعكس تعمقت بكلامي وياهم ضلوا يسفولون الي عن اهل البيت عليهم السلام

وشنو همه وشنو منزلتهم من الرسول وصلة القرابه بينهم وبين الرسول وهم ضلوا يسالوني عن عاداتنه وتقاليدنه الي اني ما شافيه شي منهم ولا بيوم سويت شي منهن

شويه وكمنه صبينه الغده الكل لتمت ع طاولة طعام جبيره حيل يترأسها ابوهم الي كاعد ع كرسي متحرك

و حيدر و ولد ثاني اتوقعه اخوهم الجبير بس جانت معاني وجهه كأيبه ومو يم السوالف وبيبيهم كاعده يمهم والباقين البنات بصفحه والجهاال مخليهم بالاخير حتى يهوسون ع راحتهم

اني يوسف كعدته يمي بس اريده ياكل شويه ماكو يريد الا يم الجهال اخر شي مليت منه وخليته يروح

طبعا الكعده ما تخلى من حيدر ونظراته

خلصنه وجبتنه وكمنه كلنه البنات جمعنه المواعين وكلها صارت تتعارك بالمطبخ منو يغسلهن

صاحت بيهن فخريه ..
- ديلا فضنها كل ثنين يسون الهم شغله شنو كل اسبوع نحجي نفس الحجي

اما اني اريد اروح يم حويدر مشتاقتله ..

طلعت من يمهن ورحت يم حيدر متعودين اني وياه كل ما نتجمع ناخذ النه ساعه تقرييا نكعد بيها سوه اني وياه قبل لا يجي عليه حسام

دخلت لغرفتي وهو شوي واجه وراي ..

تربعت ع الجربايه وهو اجه خله راسه بحظني متعود ينام ع رجلي

كل مره العب بشعره بس هالمره اول ما اجه وخله راسه بحظني جريت اله اذنه وكلت ..

ـ هي هالجره المفروض لعيونك مو لأذنك بس خاف تنعمي ويروح شبابك هدر

ـ خرب يومج شبيججج

ـ اني شبيه لو انته ولك اثكل شويه اثكل هو هيج الي يباوع ما بقه واحد ما انتبه عليك سيد روميو

ـ لا تخافين محد ينتبه ليش هو منو مخلي روحه بكلشي غيرج هالبيت

ـ اي هم صدك كلامك منطقي جدا جدا ، بس كلي شلونهااا ؟

كعد ع حيله وخله وجه بوجهي وهو يكول ..

- ولج تخبل تخببل راح اموت عليها وماكدرت اتحمل بعد اكثر خطبتها

ـ ياا شوف حظي واني اكله اثكل يا ثكل يا بطيخ الولد سيس وغرگ بالحب

ـ اي والله اول مره تكولين حجايه براسها حظ ولج خاف جنت اكلج معجب بيها هسه يا اعجاب يا حب لو بيدي هسه اروح اعقد عليها
قنعيها بروح المرحوم ابو الفلافل العشق القديم

ـ دام حلفتني بروح المرحوم ابشر بسعدك

ـ اني ابشر بسعدي وانتي ابشري بطلاكج يبعد جبدي

ـ ولي مو صوجك يلا خ اروح حسام جاي يرمش عليه اليوم جاي ع وكت ..

...

جنت بالمطبخ ابدل ليوسف ملابسه لان كلهن صارن مرگه ..

كملت اله تبديل ورحت اجيب الفستان حتى ابدل اكيد هسه نشف .. جبته ودخلت للحمام ابدل

بدلت وتذكرت نسيت تلقوني ع الغساله من مساع ..

فتحته اشوفه شبي ما بي ..
اول ما فتحته صار بوجهي فيديو ع اليوتيوب لكاظم الساهر " قولي احبك "

سديته بسرعه من دكت فخريه ع باب الحمام تستعجلني لان اجه حسام علينه ..

بدلت ع السريع واخذت كل اغراضنه وطلعت..

.....

بليل طلعت من غرفتي مفتقده حسام طلع من يمي ع اساس راح يشرب ماي وصار اله نص ساعه ما رجع ..

تمشيت بالبيت ما اله وجود ..

فكرت انو يمكن طلع او راح لمكان فقررت اروح يم ناي شوي ..

خليت ايدي ع قبضة الباب مال الاستقبال الي تنام بي ناي وسمعت يكول الها ...

ـ فكري هسه انتي و مهما راح يكون قرارج ماريد فخريه تعرف بي رجاءا خلي يكون سر بينه حاليا ..

__________________________

يتبع ....💙

لا تنسون التصويت وشاركوا الرواية وي صديقاتكم ..

ـ توقعاتكم

ـ رأيكم بالبارت 💙.

سبحان الله وبحمده _سبحان الله العظيم¡💙