.
.
حور.اليوم شگد بالشهر
شمة.14/11/2017
حور.تمام
وصلتني اخبار أموني حبيبي
يوم 2/6/2018 يطلع من السجن
بعد ما خففولة من الحكم سنة
أباوع لمصطفى هسة عمرة 16 ونص بعدة طفل
وأمين لمن خالو وجدو يروحولة وماما تكولي صاير رجال
اندفعت باب البيت ودخلت فاطمة وسيارة رجلها طلعت
تبجي وتمشي سريع طلعتلها
حور.شبييج
فاطمة.انييي حااامل باركووولي
فرحتلها رحت حضنتها وبوستها
صارلها 9 اشهر متزوجة ضرغام وردة وياها
شگد تمدحة وتحبة بشكل غريب
بس بيبي ام ضياء هواي تلح عليها بشغلة الخلفة
خاف بيج شي ليش ماحملتي قصي هم مرتة ماحملت خاف بيكم شي ومن هذا الحجي
طلعت عمةة دعاء فرحاانة بوستها وعيونها تدمع
وحلا تكمز راح اصير خالة
دعاء.يلا إن شاء الله الجاي حمل حور وشمة
درت وجهي عنها شكد ميخافون الله
ويردوني احبل ويعرفون أجيبة ويروح مني
دعاء.موو حور
حور.لا وتعرفين ليش فمالة داعي
رحت للمطبخ وعفتهن
شمة هاي السنة الرابعة الها خطية ماكو حمل
حيل اضوج عليها تسمع حجي وتسكت
هواي مزهكيها بس قصي يحبها
لسا اذكر كلامة من وكف بنص البيت وصاح
قصي.لحد يحاجي شمة ويضوجها اني قانع
وحق محمد لو لآخر يوم بحياتي لو واحد گال تزوج مرتك ماتخلف مااسكتلة اني ماريد اطفال ماشي
صح هو يحقر وياها ويأذيها بس يحبها
هو هذا حبهم تعب بتعب
صار عيد ميلاد سيف الثاني قبل 5 أشهر
وهسة عمرة سنتين ونص
همينة سوولة حفلة وأخذهم آصف
الي يذبح صاير يعرف يحجي حبيبي
يخابر آصف مرات اسمع صوتة وابجي
بابا أريد سيارة
بابا ماما تكول خلي يجي
بابا حور الصغيرة وكعت
وآصف يكعد يحجي ويا ساعات
اني ابقة اسمع بدون ميدري
وكلامة عبالك واحد جبير مو طفل
طلعت للحديقة الم الملابس
اخذتهم وصعدت للغرفة اكوي
باوعت الساعة 2 ونص آصف ع جية واني لسة مكاويتلة القاط الي يريدة
والله صدوك ربع ساعة ودخل للغرفة
سلم وراح للحمام طلع راح لخانة المستمسكات
صارلة سنة أو أكثر مامنتبه عليهن
فتح الكنتور ويبحوش دعيت كون يريد غير شي
نص ساعة يبحوش يجيب ويودي مالكاهن
طبك الكنتور حيل واني سويت نفسي دا اكوي وممنتبها
آصف.اكوو واحد يدخل للغرفة يلعب بهاي الخانة
سويت نفسي ماأدري ولا مهتمة
حور.شمدريني قابل اني احرسهن
ماعرف
آصف.تعااي دوريلي مستمسكاتكم انتي ومصطفى
فضيها
جان منزعج ويحرك بشعرة بعصبية
حور.دور انتة اني عندي شغل
آصف.كوومي تعاي هنا ادب سز
متشوفين دورت مالكيت تحركي
عفت الأوتي ورحت للكنتور ادور ورقة ورقة بتركيز
هاي لا هاي لا وهو يفور ويغلي لحد آخر شي مالكيناهن
ضرب الكنتور برجلة نكسرت الباب
آصف.خررة بيج اي والله غيرر تنتبهيين للعزة
لو حضرتج مخلصتها بس مشاكل وي هذا وذاك
العرامة عاميتج عن كلشي
حور.مو تضيع غراضك وترجع عليةةة
صحت بي خزرني
آصف.صوتج بت الكلب
خليت الأوتي ع قميصة حتى يحترك
حور.بابا مو كلب احترم نفسك
وبعد لتغلط لأن اني هم اكدر اغلط
بس للميت احترام لأن يم الله فساكتتلك
رفعت الأوتي لمن شميت ريحة حرك اجة يمي
آصف.بلا غلطي
سكتت
اذا بنت ابوج غلطي اذا بنت كلب غلطي
حور.اني مو بنت كلب فمراح اغلط
أبوية تاج ع راسك
بقة يباوعلي ويصم أيدة دفعني ورجع للكنتور يدور بخبصة وهو ميدري لو يدور عمر كامل ميلكاهن
حط أيدة ع راسة يتذكر
آصف.وين حطيتهن ويين خرب عقلي
امشي روحي سألي امي يمها امششي
فتحت الباب وطبگتة حيل غلط علية
نزلت العمة
حور.عمة المستمسكات مالتنة يمج
دعاء.لا شيسون عندي
صعدت لاآصف
حور.عمة تكول مو يمي خاف مخليهن ببغداد
عكد حواجبة وأجة يخربط بشعرة
آصف.لا مامخلي شي هناك
حتى ملابس مامخلي مو النوب مستمسكات
حور.ماادري هسة أريد أنام باجر دور
آصف.ماكو نوم امشي دوريهن
حور.والله مو اني الضيعتهن انتة ليش اني ادور
جرني من أيدي للكنتور
آصف.سلاب سلاب دورين يلا ابدي
حور.ماادور معليةةة
شمر العطر بالغرفة طشر الكزاز ونملت الغرفة من ريحتة
شفتة هيج معصب رجعت ادور هو واكف ع راسي كد ما تعبت اتمنيت اكولة موهنا وارتاح
ساعة كاملة خلاني انفش الغرفة وهو صعد يدور فوك الكنتور بالجرارات ماكوو
حور.تعبتتت
آصف.روحي نامي اني اكمل
حور.وشبقيت اني مو كولها دورتها
هسة تكول نامي
آصف.ابقي كاعدة
حور.لا والله ليش عيني أريد انام
الساعة صارت بالأربعة
آصف.كوووومي انطمري لا أجي اكطعج
استغفر الله العظيم ولامرتاح بهالعيشة الزفرة
هسة تعال سوي بدل ضايع لعبان نفس
اكل نعل الا يطلعن
حور.عليمن تسوي بدل ضايع وهنة موجودات
اندارلي
آصف.وين موجودات
حور.بالغرفة غير
غطيت راسي وجاوبتة اخفي توتري
آصف.نطمري ليطلع صوتج
اصلا منو بعد تحجي تبت
واني منا تعبانة وأريد انام بسرعة غفيت وهو يدور
ماعرف شكد نمت وكعدني الغرفة هوووسة
باوعت الساعة 6 العصر
آصف.كومي سويلي جاي راسي راح ينفجر
حور.متشوفني نايمة
جان رحت وخليت البنات يسوولك جاي
آصف.كومي انتي موجودة شعلية بيهن بسرعة جاي
كمت من مكاني مشابعة نوم بس حكم القوي
سويت جاي وأخذت وياية كعك وكوب الي وكوب الة
حطيتهن ع السرير وغمست الكعكاية بالجاي
آصف.بطلي هالسالفة
صرتي ام وبعدج ع هاي الحالة
حور.منين ام بعدني عزباء
خزرني حطيت الكعكاية بحلكي
آصف.الأسبوع الجاي اعقدلج
وتصيرين متزوجة شنو رائيج
وكعت الكعكاية من أيدي بالجاي وطفر علية
حور.مستحيل اخليك تعقدلي فاااهم
والله أگلب الدنيا ع راسك اخبلك والله
آصف.أعصابج يحلوة
بعدين اني اموت ع خبالج
حور.احترم نفسك والله اكولهم هذا اغتصبني قبل الزواج
افضحك واخلي سمعتك بالكاع
جر شعري وكعت ع السرير
حور.وخرررر ايدك
آصف.ماجذبتي صدك اغتصبتج
وسويتج ام موو
ضحك بإستفزاز صرخت
حور.الله لاينطيك بحق النبي الله يشلع گلبك
دفعني عدلت شعري مسحت دموعي
حور.عمري اسمي ماصار يم اسمك
خلي عقد السيد يفيدك زواج سري هذا
اشهار ماصار بي شيش بيش حتى يم الله مينحسب لأن غصبتوني انت بس غلا مرتك
عصب وضل يحاول يلزم نفسة
آصف.شوفي ياگ... مايعقد عليج الأسبوع الجاي
خو اني ردتج طول عمرج نكرة بس بعنادج
متت خوف اذا عقد كول شغل ماما يخرب
واذا تطلع نخلة فوك راسي ماكدر أطلع منا
حور.الكة الجنسية اول وبعدين احجي
عفتة وطلعت من الغرفة اذا ابقة يتخبل أكثر
نزلت وبيبي دازة جوكليت لأم البنين (ع)
لأن فاطمة حامل وعمة من هسة تريدلها دكتورة وتكول كول 30 يوم نروحلها
حور.واني همينة أنذر نذر لأم البنين اذا حققت الي أريدة
عليكم الله ادعولي
كولهم ردو آمين
وهمة ميدرون اني اريد توكفلي حتى أطلع منا
نزل آصف نطو جوكليت باوعلهم بإستفهام
آصف.شكو
دعاء.فطومة حامل
آصف.هااا يابة راح أصير خالو
راح يمها حضنها وبوسها
دعاء.الدور ع حور وشمة
إن شاء الله الأسبوع الجاي ناخذهن للطبيب
إن شاء خير
آصف.اصلاً حور حجزتلها ببغداد
سالفتها مو خالية خاف بيها شي
هسة مو مهم الطفل خاف عدها مشاكل
دعاء.اي خلي تسوي فحص كامل
آصف.إن شاء الله
حور.لبغداد ماروح لو تحط سيف ع رگبتي ماشي
آصف.محد سألج وأخذ رائيج
حور.عود تكدر تاخذني هناك حتى اسويلك سينما ببلاش
عرض مباشر يم الدكتورة
آصف.امشيي لج ، المهم أريدكم تدورون البيت تنفشونة يعني مو شلون ماجان المستمسكات مال حور ومصطفى ماكو بلكي مخليهن وواحد منكم شايلهن
دعاء.باجر ندورهن
آصف.ماشي بس دورو عدل مو حي الله
اني رايح لبيت عمي ازهر خاف يمهم
طلع من البيت صعد لغرفتي اعزلها لأن صارت هوسةة
لميت كولشي ورجعتة لمكانة
اشرطة حبوب منع الحمل مطشرات بالغرفة من مدور
معقولة ماعرفهن ، حطيت أيدي ع گلبي وشكرت رب العالمين منين يعرفهن مشايف أحد يستخدمهن اكييد
رجعتهم بين الأخشاب بالفتحات إلا اطمنت
خاف يرجع يدور تحت السرير
رجع للبيت ملاگيهن وعمة ثاني يوم نفشت البيت وهم ملگتهن عيونة صارت بگصتة ويتحجج وطايحة براسي
لعب بحالي لعب بس يصيح ويرزل ويغلط ع ماما ذاك الغلط واني مرة اردة ومرة أسكت
فترة وراح يقدم ع بدل ضايع يمة اني شصار بية
خاف يدري بجناسينة وشهاداتنة مقدمين ع لم شمل
وهنة موجودات بدوائر الدولة وحق الله يفنيني ومحد يخلصني منة موجوة خوف اجتاحتني وخلت الخوف يتسرب لداخلي
شهر شهرين مرت حرب أعصاب لحد ما براس السنة الجديدة صادفت العصر
آصف راح لبغداد يطلعهم قصي أخذ شمة وطلعو
فاطمة يطلعها زوجها واجت أخذت حلا وياهم
واني محد گلي بالجذب تعاي ويانة
شگد انملة گلبي منهم أتذكر قول الأمام علي (ع) أگولة صدقت مولاي واذكرهم لمن يگول
(قاتلكم الله لقد ملأتم قلبي قيحا
وشحنتم صدري غيظا وجرعتموني نغب التهمام أنفاسا )
هيج اني وادعي الفرج من رب العالمين دخلت عمة نور الي بوقتها جانت ملاك الرحمة وجها مستبشر اجت حضنتني
نور.وج عمة قبلو فيزتكم انتي ومصطفى قبلوو الطلب
حضنتها وابجي وأردد (فتح من الله )
حور.عمةة والله تحجين صدوك
اكدر أطلع بعدين أخذ ابني واتركهم همة وربهم
نور.الفيزا طول من 4 اشهر ل 6
وامج تكول يبقون للسادس حتى طلعتهم وطلعت امين سوة ، وخالج راح يجي ياخذ وثائقكم من المدارس
وتكول هناك تدرسون a1بعدين من تضبطون اللغة تكملون دراستكم بس يمكن انتي يرجعوج خامس ماافتهمت التفاصيل امج تفهمج
بقيت أبجي وهي بوستني وحضنتني
نور.ماكدر مااساعدج انتو وأمكم انضلمتو
هوااي نضلمتو الله ع الضالم
حور.عمة بس نخلص ماريد شي
حبابة فتحيلي كامرا وي ماما حباابة
اتصلت بماما واني ضليت ابوس بالشاشة
وهي تضحك طلعت للبلكونة ترويني الأجواء والشوارع
شلون مزينة وجنن تفتح النفس
مي.السنة الجاية نحتفل سوة
اكحل عيني بيكم تلاثتكم
حور.اربعة مامااا ويانة سيف
عكدت حواجبها بإنزعاج
حور.شبيج ماما
مي.سيف منكدر ناخذة
بلكوة بقيت مسيطرة ولازمة الموبايل بأيدي
حور.شتحجين ماما
مي.انتي معاقدة ممتزوجة وهنا ميعترفون ولاعدهم عقد سيد قابل العراق اهم شي عقد المحكمة وانتي معندج
حور.اي عادي أخذي امين ومصطفى واني ابقة هنا
أخذي ولدج واني ابقة يم أبني
مي.تدرين شسويت حتى اشتريلكم الفيزا وأسحبكم يمي واخلصكم من الضيم لو لاااا احجي كم ساعة انام باليوم هم تدرين لو لا لج 3 ساعات بس وبعدين أطلع اشتغل بسوبرماركت ومطعمين علمود منوو وتجين بكل انانية تكولين ماطلع
غصباً عليج تجين بيج حظ انتي عندج ابن منين صار ابنج
اذا شافج يعرفج انتي تعرفي سمعتي كلمة ماما حسيتي بالأمومة لو مخليج تخلفين وتندگين
ويمكن مكيفة آصف مقاسمج فراشة مسويج حيوانة
عبالج ماشفت صورج بدون شعر ماشفت ذلتج
حلا مقاطع صوت وصورة تدزلي وتكول شوفيها
أبقي اصلاً لتجين هيج بنية انانية ماريد
سدت الموبايل واني بقيت أبجي انهاريت
رادت عمة نور تسكتني عفتها صعدت للغرفة قفلت الباب
تمددت بفراشي ادري راح اتخربط مااتحمل هيج كلام وفعلا تخربطت وصحيت الدنيا ليل الساعة 10
كمت من مكاني دلكت راسي دخلت للحمام
والله صعبة اعوف ابني ياااربي خلصني
ثاني يوم رجع آصف والبيت كولهم نايمين
جانو طالعين وتعبانين بس اني وعمة دعاء وبيبي كاعدين
اني يمكن عدوني ع الكبار
وفعلاً اني فقت عمري بهوواي
بالجنسية انحسب 20 ونص
بالواقع يمكن أكبر حتى من بيبي بكد العشتة
للعصر إلا كعدو نزل آصف وقصي والبنات وراهم
آصف.احميلنة الأكل
قصي.اي والله ميت جوع
درت وجهي عنهم گطفني آصف بالكوشة ذبيتها
آصف.ويامن جاي احجي
حور.اني تغديت شكو احميلكم الأكل شمة وحلا تحميهن
حلا.حقج مضغوطة لأن محد طلعج بقيتي بالبيت جنج بومة
آصف.اذا گمتلج اخليج تمنين لو ماطلعة أمس
احترمي نفسج لو أگوم اعلمج شلون تحترميها
ماحاجتج هية
يلا كومي احمي الأكل بسررعة
كامت والدمعة بطرف عينها الخبيثة اعوذ بالله
فوكاها رجع خزرني وأشرلي بسيطة
وخرت عيني عنة شمة نزلت جهزن الغدة واجن حطنة
التمو ياكلون اشرلي
آصف.تعاي اكلي وياي
حور.ماااااريد
آصف.تاكلين سم
فترة اسبوع وراد ياخذني لبغداد غصب
شسويت لعبت لعب اذا أخذني يدرون اشرب حبوب
بجيت ولطمت وهددتة اقطع دوة النوبة مالتي
حتى ضربني راشدي رغم صار سنة أو أكثر ماضاربني
تالي عمة من شافتني هيج گالتلة عوفها
وهو أصلا قرر يأجلها مويعوفني براحتي
منا للموعد اليختارة لو يموت ميلگاني بعد
اليوم عمر سيف 3 سنوات
لسة مشايفتة واحتمال إذا شفتة بشي مكان ماعرفة
الي اعرفة عنة
اسمة
اسم أمة غلا لأن من البداية ماسجلو بأسمي
واعرف يشبهني نسخة ثانية من عندي
هذا الي أعرفة عن أبني
وهذا عيد ميلادة الثالث
وهاي السنة الثالثة أحلم بشوفتة
ماتخيلتة يطغة ويتجبر هالكثر
أبداً والله ومثل كل سنة علگتلة شمة بدموعي ونوحي وطفيتها أني
الي بقة ع سفرنة شهرين بس
وهمة يدرون أمين راح يطلع بعد شهرين
لآخر فرصة ممكن أنطيها لآصف مابخلت بيها علمود ابني بس الي اليوم صاير رجال ويسولفون علي مبين اكبر من عمرة
جنت كاعدة اخيط دگمة قميص آصف
لمن أجة ببالي مابقة شي لطلعتنة حاجيتة
حور.آصف
آصف.ممم
حور.ترجعلي ابني
آصف.لا
حور.خلي نبدي من جديد
اعيش وياك وي ابني لتغير تعاملك
بس رجعلي ابني وبس
آصف.دوختيني شش
زفرت بحزن وعقجت وجهي بألم من كم العبرات الي بصدري لمعت عيوني بحقد إلا أعوفك بين نارين
حبك الي وانت فاقدني
وكلام الناس ومرتك هاربة
يتبع.........