أنتقام للعشق

البارت الحادي عشر

#أنتقام للعشق 🥀
البارت الحادي عشر
بقلم :نور حيدر
noorhaidar18
مساء الخير عليكم متابعيني 🦋🌿..

(علقو على الفقرات مو تنسون 💜🌸)

من كتلي أحبك تذكر الرد
كتلك لشوكت ما كتلك شكد
لأن صارتلي عبرة و قبلك هواي
يحب بس بلبداية و تالي يبرد
طلع كلبك قطار يودي و يجيب
تنزل ناس منه و ناس تصعد
واحد مايترس عيونك شبيك
مجموع التحبهم صارو شكد!؟

المهم خلصت القصة و هاي هيه
وشاله نظر و عناد ريه
ورقة مشككه من دمع العيون
و قلم مامستقر يرجف بديه
خلصت القصيدة و ظل نقص بيت
هذا البيت تلكاه بلوصية 🥀..

رسيل/
اسمي رسيل فاضل من محافظة واسط
تحديدا الكوت عايشة وي امي يم اهلها
عمري حاليا ١٨ سنة سادس أدبي ونجحت منه ..

أبوي توفى من جان عمري ٩ سنوات
بمرض خبيث وكع بيها و مات
و مانسيته لحد هسه جدي الي رباني
وحبوبتي تعبت على تربيتي و حاولو يعوضون
مكان أبوي بس ماكدرو ..

خوالي حنينين عليه و يحبوني كلش
و متربية و عايشة يمهم و مدلليني
ما منقصين عليه شي ..

بس جان شي واحد احتاجه و الي هو
حنان الام و خوفه عليه ..

أمي جانت مو كلش تهتم بيه
معتمده على حبوبتي و مرة خالي الجبير
الي هيا هم ربتني و اعزها و اكللها ماما ..

امي صح تحبني بس احسها مو كلش
عدها نفسها و بس تكلي أبوج مات و اني بعدني
شابة صغيره ماشفت من حياتي شي ..

اريد اخذ حريتي واريد اعيش عمري
و كل بنفسه صح تجيبلي ملابس وغراض
بس ابد ماحسيت بحنان الام ..

هواي تمرضت و طحت بس ماشفته سهرانه
يمي و ماتنام بلعكس جانت مرة خالي
تجي يمي و تظل كاعده يم راسي
و ماتعوفني ابد ..

اسئل عن عمامي الي عايشين بلعمارة
واكول ليش ما يسئلون عليه اني مو بنت ابنهم
ليش نسوني من مات أبوي مارحت الهم
و حتى ماعرفهم ..

اتمنى مرات اشوف بناتهم او اولادهم
واكول عندي عمام ..
يذكروني فقط بلمصرف وجدي مشايفته
من جان عمري ١٥ سنة ..

وعمامي من سنة لسنة حتى مرايحة الهم هناك
ومرات امي تمنعني عنهم تكول ماعندج اهل
بلعمارة عوفيهم و انسيهم مثل مانسوج
همه لو يحبوج جان ماعوفوج ..

وابجي و اروح لجدي و اكله
يكلي جذب بابا هم يحبوج و رادو ياخذوج
بس جان وصية أبوج انو ماتنحرمين من امج
و همه يخافون ربهم و خلوج يمنه هنا ..

وبقيت عايشة يم بيت جدي
عائلتنه متكونة من جدي وبيبي
وخالي حسن و مرت خالي سمية و أمي
وعدها ابن الجبير حسام عمره ٢٩ دكتور
وخاطب بنت عمه
و الثاني احمد ٢٣ سنة يدرس هندسة
و الثالثة و اخر العنقود نرجس عمره ١٩ سنة
وهاي تدرس صيدلة مرحلة اولى وصديقتي
توأمي ..

حالتنه المادية كلش زينة الحمدلله
كلشي نريدة متوفر النه ما مقصرين ويانه بشي
وخاصه اني و نرجس مدللين كلشي نريده يجي
يمنه ..

بس جان يجي يوم و يخرب كلشي
الصدمة الجبيرة امي راح تتزوج
خطبها دكتور و هيا وافقت بسرعة..

هيا أمي صح مو جبيره كلش عمره ٣٥ سنة
وحتى شكله اصغر من عمره و مهتمه بنفسه كلش
وهذا الخطبه يشتغل بنفس المستشفى الي يشتغل
بيه حسام و عمره ٤٠ سنة ارمل و عنده بنية ..

بس مافكرت بيه أني وين اروح اذا راحت
صح ماشفت شي منها و لا شفت حنانه
بس عاد تبقى أمي  و عايشة يمها
عاد شي يخليني بأمان ..

كلنه كاعدين و منتظرين ردها
بس صدمني برودها و ما اهتمت بيه

باوعت على خالي حسن و كالت :
رجع الجواب الهم و كللهم أني موافقة

كلنه مصدومين اني و نرجس و الولد
باوع خالي عليه و كال :
متأكده يا فرح ..

هزت راسه و كالت :ايي شبيك يا خوي
متأكده..

كاللها : بس مو اظن كبرتي و بدال
ما تربين بنتج و تبقى يمج ترحين
تزوجين و ترى هو ارمل و عنده بنت ..

باوعتلي و رجعت باوعت على اخوها:
و شنو يعني مثل ماهو أرمل اني أرمله هم
لا تنسى يعني و عنده بنت اني هم عندي
وبنته ان شاءالله ما قصر وياها اعتبره
مثل بنتي رسيل ..

غوركت عيوني على ردها ردت اكللها
لعد و أني يمه شو مقصره وياي ..

كملت كلامها و كالت :
و بنتي رسيل كبرت ماتصغر
و كافي تعبت اني و ربيتها و كبرتها
و هسه يجي دوري اشوف حياتي الى متى
ابقى هيج و بنتي رسيل تحبني و تريد
السعادة الي ..

باوعتلي و كالت :مو هيج ماما !؟

ساكتة اني ماريد احجي اي شي

كال جدي و هو ماعاجبة كلام بنته:
اول شي خل اذكرج الي ربت و تعبت
هيا بسمة اعتبرتها مثل نرجس و اكثر
والله يجازيها لأن امها محتارة بنفسه
وهامله بنتها ..

كالت مرت خالي : عمي لا تحجي هيج
رسيل بنتي والله يشهد عليه اعزها بمعزة نرجس ..

باوعت لامي عوجت حلكه ما عجبها الكلام..

رجع حجه جدي و كال : وثاني شي
أنتي  نسيتي الاتفاق يا فرح لو اذكرج
اذا شفتي حياتج و تزوجين ترجع رسيل للعمارة
يم اهل أبوها..

انصدمت اني لأن ماجنت اعرف بهذا الشي
وكفت على حيلي و كتله :
شتقصد جدو شنو هذا الاتفاق شو اني ماعرف

كال جدي : اي بوية عمامج قبلو تبقين هنا
بس شرطو اذا امج تزوج و تشوف حياته
انتي ترجعين الهم لان امبقيج هنا
علمود امج و اذا تروح ترجعين يكولون شعده
تبقى هنا يم ناس غربة ..

حجه احمد: شنو غربة ترى احنه اهله
وعاشت هنا من طفولته  احنه اهلها ترى
مو همه و مالهم حق ياخذوها بعد هاي السنين ..

هز راسه جدي : صح كلامك بوية
بس الصح همه اهلها عمامهاا و احنه نعتبر
غربة و همه شيوخ ما يقبلون بتهم تبقى يم ناس
غربة و همه موجودين عيب عليهم ..

كتلة و الدمعة بطرف عيني :يعني شنو
اذا تزوج أمي يعني اني اروح منا ..

جدي : اي يا بوية و هسه القرار لأمج ..

باوعت على أمي الي كاعده و خاله رجل على رجل
و مامهتمه للموضوع اصلاً ..

رحت قريب عليه و هيا باوعتلي كتله:
اي يمه و هسه شنو ردج راح توافقين
لو لا من سمعتي الكلام ..

كالت : والله يا ماما كبرتج اني و تعبت
و هسه لازم تجازيني على تعبي
انتي ترى مو صغيره حتى افهمج
ترى ذولاك  اهلج ولازم ترحين يمهم
اصلاً انتي مكانج هناك بس اني ماقبلت
و كلت لازم تجين تعيشين يمي .

نزلت دموعي واني عرفت ردها من كلامها:
كافي كافي عرفت شنو جوابج
روحي يمه تزوجي و تهني بحياتج
و اني مامهتمين بيه ..

مسحت دموعي و كتله بقهر :
بس لا تظلين تكولين اني ربيتج و تعبت عليج
ترى محد تعب عليه و سهر عليه غير
ماما بسمة هيا الي ربتني و اهتمت بيه
الا انتي والله ماشفت شي منج ..

كتله بحركة كلب و نسيت الي كدامي
مهما يصير تبقى امي :
بس انتي غلطانة لو امبقيتني يم عمامي
مو احسن و لا هذا حركان الكلب
اذا تدرين بنفسج ماتكدرين على روحج
الا تزوجين تدرين بنفسج مراح تكونين وفية
بعد وفاة بابا ..
ما تكدرين الا تزوجين هو هذا هامج
اصلا مع الاسف انتي امي
لو الله اخذج و لا اخذ بابا عاد شفت
حنان و حب من يمه ..

ماحس غير راشدي قوي على خدي
حسيت وجهي اشتعل نار
باوعت لكيت امي واكفة كبالي
ووجهه احمر من العصبية كالت :
ادبسزز نسيتي نفسج ويامن تحجين
ترى ابقى امج فهمتي مو كبرتي عود و طولتي
لسانج ترى بلقران هنا اموتج ..
وغصباً ما عليج اتزوج و اعيش حياتي
الى متى ابقى هيج كاعدة يمج ..

ابتسم بأستهزاء : هو هذا الي
كادره عليه تضربين و تصيحين
روحي عيني تزوجي و ربي بت زوجج
بلكت تلكى يمج حنان ما لكيته اني عندج
تزوجي و خلفي شسويلج يعني ..

خالي كال : بابا رسيل عيب تبقى امج

: اعتذر خالو .

درت وجهي و عفته و صعدت فوك
واسمع جدي يحجي وياها :
الله لا يرضى عليج مثل ماكسرتي كلب
البنية ولج يتيمة و هيج تسوين بيها
روحي تزوجي و خلصينه منج و من شرج ..

صعدت فوك بس مارحت لغرفتي رحت صعدت
بلسطح مكاني المفضل من اضوج لو انقهر
اصعد فوك اعزل نفسي عن العالم كله ..

رحت للسطح و خليت طابوكه و كعدت عليه
دنكت خليت راسي على رجلي و ظليت ابجي
محروك كلبي ليش اني من الناس ..

هيج يصير وياي أبوي مات و اني صغيره
و امي عايشة بس لو ميتة احسلي
ماشفت اي شي منها و هسه تريد تزوج
وتعيش حياته لعد و اني  شلون اعيش..

حسيت خطوات قريبة عليه
وحسيت احد حضني عرفته هاي نرجس
رفعت راسي الها و حضنته و ظليت ابجي
واشهك :
سمعتي عمتج شتحجي تكلي روحي الهم
واني كلشي ماعرف عنهم زينين لو لا
هيج كلبه بارد تشمر بتها يم ناس ماتعرف
بس بأسم عمامي ..

اني شلون و اعوفكم ماكدر والله
اريد ابقى هنا ماريد اروح للعمارة
شسوي رايحة هناك و اني ماعرف احد ..

ظليت ابجي و شابكته و هيا تبجي
وياي من هدئت شوي و مسحت دموعي
شفت واكفين كدامي احمد و حسام
يباوعولي مقهورين ماجنت منتبه عليهم ..

كعدو كبالي و كال حسام :
شوفي رسيل و اسمعي
انتي تعرفين امج الي بعقله تسويه
و عدها نفسها اهم شي ماتهتم بغيرها
حتى لو بتها اهم شي مصلحته  ..
و انتي ترى صدك اول و تالي مرجعج عند عمامج

كتله : شنو يعني تريدني اروح ما تريدني ابقه

: لا ولج مو هيج قصدي والله
اصلاً اني ماريدج ترحين ولج انتي اختي الثانية
بس اريد افهمج انتي تعرفين علاقتج وي امج
وسمعتي شرط عمامج و هسه شي اكيد راح يسمعون
و مراح يرجعون عن قرارهم لان عيبة
تعتبر عدهم شيوخ و مايقبلون بتهم تبقى عد احد
واعرف  هسه انتي تكولين انتم اهلي..

:بس اكلج عند الناس احنه نعتبر غربة
هم اهلج مو احنه و مرجعج يمهم
و اصلاً مانكدر نتصرف بشي يخصج
الا نسئلهم همه بالاول
احنه مالنه كل حق ..

دنكت راسي و اني اسمع لكلامه
حجه احمد : صحيح كلام حسام
همه يجون و ياخذوج ..

كتلهم: بس خايفة اني خاف مايتقبلوني
خاف مو زينين مثلكم و اني ماريد اعوفكم

ابتسم احمد و كال: لا زينين و خوش ناس
لأن اذا مو خوش ناس و مايخافون الله
جان ما نفذو وصية أبوج الله يرحمه
وبقوج يم امج حتى لا تنحرمين منه .

رجع كال : وتعاي انتي ماريد اروح منكم
ومدري شلون هسه خل تعرس امج والله كريم ..

كالت نرجس : ولج اضحكي و انزلي
لا تبينين لامج انتي جنتي تبجين
لو مقهوره بلعكس سوي نفسج ما مهتمه ماشي..

هزيت راسي و ابتسمت:
ماشي .. الله لا يحرمني منكم
ماعرف شلون اعوفكم و امشي ..

حسام : اهوو غير تسكت العوبة
هسه يكول راح تروح اليوم دنزلي
خل امج تسمع صوتج و عياطج ..

ضحكت و كمت نزلنه جوه و شفت
جدو و خالي و امي و مرت خالي كاعدين
بعدهم و ساكتين بس امي تهز رجله امبين
عليه معصبه  ماهتميت..

تذكرت كلام حسام و ابتسمت صحت بصوت
عالي :حوووسااااام .

ضربني على راسي و كال :
وجع الي يوجعج حوسام بعينج
احجي اسمي عدل ..

ابتسمت اله و اشرت بعيوني على امي
هو افتهم وضحك عليه كال :
يا عيون حوسام انتي شتردين

أمي باوعت علينه كتله:
ضايجة و اريد اطلع و صدك راح تصير
عدنه مناسبة اريد اشتري فستان لان ماعندي

: اي مو تدللين اليوم العصر اخذج
تشترين تردين بعد شي

: لا حبيبي مشكوور حوسام

اقترب من يمي احمد و حجه بهمس:
الله لا ينطيج صار عندي شلل رباعي بلساني
من حوسام ..

ضحكت عليه وشفت جدو و خالي ضحكو
عرفو سالفتي ..
امي ضاجت و مشت و هيا تهز بأيدها
اليوم امي بس تهز ما شاءالله ..

صدك وره اسبوع و صارت الخطوبة
هيا يعقد عليه وياخذها ...

اجو خوالي و خالاتي و البنات
وام عريس الغفلة و اهله و اجت بنته
تصير هم تقريبا بعمري بس هادئ وساكته..

راحت سلمت على أمي  و هاي اخذته بالأحضان
و تبوس بيها و البنية تكللها خالتي ..

كالت أمي الها : يا عيوني كليلي بعد ماما
لا تكولين خالة اني هسه امج و ان شاءالله اعوضج
و اصير بمكان أمج..

اني جنت عادي بس من سمعت هيج
طلعت رحت للمطبخ اختنكت ..
شكد حجي و حجي و نفاق ما تحملت..

صارت الخطبة و انكتبت بعد بأسمه
و رادت تمشي سلمت على اهله و من رادت
تطلع يلا تذكرت بتها ..

باوعت و كالت : ماما رسيل ما تردين تسلمين عليه..

كتله كدام النسوان : صدك خل اسلم عليج
يمكن بعد ماشوفج خاف اروح للعمارة
و انتي تلتهين بعد بزوجج الجديد و بنتج الثانية..

كرصتني مرة خالي و خزرتني بس ماهتميت
اهم شي فوخت كلبي لان من زمان شايلة عليه
حتى لو امي بس قهرتني ..

رحت بستها و هيا باستني من طرف خشمه
بدها اصلاً تاكلني ..

راحت و بدينه اني و نرجس و البنات نعزل
البيت و نربته لان هوسه صار ..

بليل و جان يجون الولد و خالي وجدي
و كعدنه اني و نرجس و مرة خالي و بيبي..

صاح علينه جدو باوعلي و اشر اجي
اكعد بصفه رحت يمه و هو حضني و كال :
بوية عمج ابو محمد سمع بلي صار
وامج تزوجت و توكلت و كال بعد
بتنه ماله كعدة هناك ..

طلبت منه اني تبقين يمه و خالج حاجاه
و كتله بنتك بنتنه و احنه الي ربيناها
بس ما قبل كال بت اخوي تجي يمنه
احنه اهله و بهاي اليومين نجي ناخذه..

بجيت و كتله : يعني هاهيه جدو
راح امشي منا و بعد ماشوفكم ..

خالي كال :لا بوية شنو هذا الحجي
طلبنه نشوفج كل فترة و همه وافقو
كالو تبقى بتكم و أنتو الي ربيتوها ..

مرة خالي دمعة عينه و كالت :
اووف شلون بيه هاي بتي
اني الي ربيتها شلون تروح من يمنه..

بهذا الوقت البيت كله صار كأبة
و اني كاعده وحدي فوك ..

اجت عليه نرجس و كالت :
ولج كومي خل نعزل ملابسج مابقه وقت
هنا بس يومين و ترحين ..

كتله : شو جنج فرحانة بروحتي ..

حجيت هيج و هيا بجت و حضنتني:
ولج كوه مصبره روحي ما ابجي علمودج
راح اشتاقلج بعد ويامن اتعارك ويامن احجي
اسراري انتي اختي و صديقتي شلون تعوفيني..

شبكته و بجيت وياها اخر شي هدينا
وكالت : يلا كومي خل نعزل
ونطلع باجر نتسوك خاف ينقصج شي
و ابوي كال اطلعن و اشترن لان اول
بداية تستحين يمكن اطلبين منهم ..

ضحكت : وليش استحي بيت عمي
ماستحي ..

:ادري بيج انتي غاسلين وجهج بمرك
ماكو مستحى

صدك ثاني كعدت لكيتهم ضايجين
و حسام و احمد مرايحين دوام ..

: شكو ليش ممداومين

حسام :اخذنه اجازة خل نشبع منج

دمعت عيوني بس ردت اغير جو
كتله : اوووي حووسااام

احمد : وجع ان شاءالله لا تحجين هيج
نرفزتيني ..

ضحكت : ههه شنو غرت لان
مادلعتك يلا حمووود

كام: كاافي ولج لا بلنعال ..

:ماشي
ضحكت امي بسمة على سوالفنه و كتلهم
: يلا وين تردون اطلعوني اليوم
اريدكم تفروني الكوت شبر شبر
لان صدك راح اشتاقله ..

حسام : مو تدللين

: ايي و اريد اروح اكعد يم سدة الكوت
و اتعشى هناك راح اشتاقله والله ..

احمد :ماشي اوامر ثانية ست رسيل

هزيت راسي :لا ..

صار العصر و بدلت لبست بنطلون جينز
وقميص طويل لفيت حجابي و اخذت موبايلي
و نزلت جوه لكيتهم كاعدين  ..

طلعنه الي يسوق حسام و بصفه احمد
واني و نرجس وره كعدنه..

كال حسام : وين اخذجن

كتله : اخذنه للهوره خل نشوف الملابس
ونشتري..

: ماشي

ابتسمت : حووسام

احمد باوعلي و كال :حوسام يكلج وجع

حسام ضحك: كولي شتردين

: شغل اغنية حباب واريد اغنية
عيشي حياتج ..

ابتسم : ايي و نصوره حاله و ندزه لامج

: ايي عفية و اكول مقصودين و حركات هيج

احمد : اييي حتى تجيج بلنعال ..

شغل الاغنية و اني ظليت اصفك
و اهز جتف اني و نرجس ما نتحمل اذا نسمع
اغنية لازم نركص و نهز و همزين الجامة مضللة ..

ظليت اردد وياها
ضحكي بفرح وابتسمي
و بنفسج انتي اهتمي
ماريد واحد يمي ينكد عليه ايامي
كلشي الي يعجبج سوي
و ابتعدي على الما تحبيه
كلبج مدلل خليه وردية كل احلامي  ..

وصلنه و نزلنه و ظليت اتسوك كلشي بنفسي
حتى حلويات اشتريت لهناك لان صدك
استحي اطلب منهم و اني ماعرف شنو همه
و شنو طبعهم ..

صار الليل و رحنه يم سدة الكوت
كعدنه هناك و طلبنه عشه و كعدنه ناكل
ظليت صافنة على المكان و الجمال
محروك كلبي شلون اعوفه و اروح  ..
وصلنة للبيت ميتين تعب ..

بس اتفقنه نسهر و صدك جبنه حبشكلات
و تباعنه فلم و ل٢ يلا رحنه نمنه ..

بس اني بقيت كاعده افكر بأيامي سمعت اذان الفجر
صليت و دعيت الله يوفقني  ..

ثاني يوم الظهر كاعدة بالصالة
و الجنط اخذهن حسام صعدهن بلسيارة
كالو اجه عليج ابن عمج اسمه شاهر
هو الي راح ياخذج ..

اجتني نرجس تبجي و تحضن بيه
و اني الدمعه بطرف عيني ماريد ابجي
كتله : ولج اسكتي ترى كوه مصبره روحي
و مو بعيدة عنكم هيا هاي العمارة قريبه ..

: وين قريبة والله بعيدة ولج راح اشتاقلج

اني بجيت وياها و اجت امي بسمة حضنتني
وظلت تبجي و حبوبتي هم ..

اجه خالي و جدي و ودعوني
حضنتهم وكمت ابجي اعتبر خالي ابوي ..

حزت بخاطري امي ما اجت و سلمت عليه
مع انو درت .. مرة خالي اتصلت عليه
بس كالت مشغولة ماكدر اجي ..

سلمت على احمد و حسام و اخذوني يوصلوني
مشيت و اني مدنكة راسي طلعت لطرمة ..

وكفت و سمعو صوت شخص يحجي وي جدي
يكله : لا توصي عمي ترى هاي بتنه
مو غريبة و توصي بعيونه نخليه ..

جذبني صوته بيه بحة رجولية تخبل
تخليك تريد تشوف منو صاحب هذا الصوت ..

حسيت خطوات قريبه عليه و شفت حذاء اسود
كبالي ..

اجاني فضول اشوف هذا الي اسمه ابن عمي
رفعت راسي و عساني مارفعت على هذا الجمال ..

شخصية و جمال لابس كله اسود بأسود
هذا الي ينكال عنه الاسود يليق بك..

شأوصف و شحجي من شفته سحت
هذا ابن عمي باوعلي و ابتسم ..

جعل محد غيرك يبتسم شنو من شخصية
و هيبة و جمال..

ياربي شحجي وشأكول كلبي ظل يدك بسرعة
احس نبضات كلبي اتخربطت شنو شبيه
بس لا حبيتك اي اني مو سامعة حب من اول نظرة
اي هيا هااي و الله..

ما حس غير كرصة بأيدي احس شلعت جلدي
بس ما صرخت كتمته عيب من الولد ..

باوعت لكيته احمد همس :
عيونج اكلتي الولد ندري حلو بس مو هيج

كتله ؛ ولك شنو حلو كول كيكة
قمر لا شنو قمر ماعرف شحجي يربي

باوعلي و كال : طايحة الحظ تحجين هيج كبالي
بس اكلج ترى هذا ضابط

ابتسمت : يا عيوني ضابط و اكول شخصية..

اجاني صوته و كال بهدوء : شلونج رسيل
يمكن ما تعرفيني اني ابن عمج سلمان شاهر ..

ابتسمت و كتله بغباء  : أهلا اني رسيل

ابتسم و كال : اي اعرف..

يبوو نسيت هو كال اسمي بس والله
من شفت شكله نسيت كلشي ..

ضجت من ودعت اهلي صعدت بلسيارة كدام يمه
و سلمت من السيارة على خالي ..

صعد هو و كال : يلا بسم الله

حرك هو و اني اباوع على منطقتنه طلعنه من يمه
اباوع على البيوت كله راح اشتاق لكلشي ..

كال بهدوء: شبيج ليش ضجتي
شنو ما فرحانه راح تجين

كتله بخجل لان احسه بعده غريب :
ضاجية لان راح اعوف اهلي و بيتنا
و راح اعوف المحافظة الي عشت بيها ..

كال و هو يباوع لطريق : احنه هم اهلج
لا تخافين راح ترحين و تشوفين..

سكتنه ثنينه و جان الصمت سيد الموقف
كل ساعه انام و اكعد الطريق جان طويل ..

للمغرب يلا وصلنه نزلنه على نزله
عبارة عن بستان و صار كبالنه
ثلاث بيوت هو توقف بلبيت الوسطاني
وجان اكبرهن ظليت اباوع على البيوت
فخامة و جمال و بنص بستان شكد حلوو ..

فتح باب البيت و رجع صعد دخل السيارة
بلكراج مال البيت ..

كال و ابتسامة هادئة : وصلنه نورتي المكان ..

: شكرا

نزلنه و اني اباوع على الحديقة الجبيرة بنص البيت
طب و طبيت وراه ..

لكيت ولد ثنين واكفين يم الباب سلمو عليه
ودخلت شفت مره جبيرة و رجال ..

عرفني شاهر عليهم و عرفتهم ..
سلمت على جدي و بيبي و عمي
و تعرفت على ليث و غيث و جوري

ارتاحيت عليهم لان كامو يشاقون وياي
ويضحكون اعتبروني مو غريبة ..

جدي كال : بعد يومين عزمو العائلة
بمناسبة دخول رسيل بنت ابني النه..

ابتسمت واتشكرت منهم صعدتني جوري
لغرفتي و جانت بسيطة و حلوه ..

كعدت يمي و ظلت تسولف وياي و عرفتني
عن العائلة كلهم و خلتني وحدي حتى ارتاح ..

.....  

جوري /

اجت بت عمنه رسيل انقهرت عليه
من دخلت علينه مثل الغريبة و تباوع علينه
و خايفة بس شوي شوي ارتاحت ..

لان حسسناها مو غريبة و نشاقي وياها
و جدي كال عزيمة بمناسبة جيتها النه ..

ثاني يوم كعدت ب١١ و نزلت علينه و مستحية
كالت امي الها :
يمه لا تستحين هذا بيتج اخذي راحتج ..

ابتسمت بخجل : مشكورة خالة ما تقصرين..

شوي و نزل غيث شعره مهوس
و كوه فاتح عينه من شاف رسيل عدل شكله
و رتب شعره كال :
نسيت هذا الجمال يمنه لو اتذكرت
جان لبست قاط و بيدي و رده 
ااخخ بعد شتريد غيث هذا الجمال كله عايش يمك
اني من هسه راح انهي عليج خاف احد ياخذج..

ضحكنه على كلامه حتى هيا ضحكت
و كالت : ايي مو اني راح اوافق عليك

سكتت حست على نفسه كتله :
اي و اخيرا احجي خل نسمع صوتج

غيث بشقة : ايي من تروح دعيه و فطيمة و زينبه
والي اعرفهن كلهن بحياتي
فدووه لصوتج .

كالت بأستغراب : هذني منو

كتله : ذني حبيباته ..

عرفته شنو هو و ابتسمت عليه ..

ثاني يوم صارت العزيمة و اجن البنات و اتعرفن
على رسيل و هم شقه و سوالف وواخذت ميانه
امبين عليه اجتماعية هيا .
بس زينب ماجت صارلي اسبوع و اكثر ماشفته

ظلينه نشتغل و لليل صبينه العشى لزلم و النسوان
طلعت بره اني اريد اروح للغرفة البرة ..

نخلي بيها الغراض الي تخص المطبخ و الاغراض
من دهن و معجون ووتمن و غيره ..

هو قريب شوي على المطبخ خليت الدهن بيه
و من ردت ارجع حبيت اروح اشوف زينب شبيها
ليش ماجت بالي يمها حتى ليث اليوم سئل عليه و حسيته متوتر ..

ما حسبالي اكو احد يجي للحديقه لان النه احنه
البنات و اكو حديقة  للزلم يكعدون بيها وره بيتنه يصير يم الباب الثاني للديوان ..

طلعت هستوني ردت اوصل للحديقة
حتى اروح من الباب الي بيناتنه ..

ماحس غير ايدي انسحبت و رجعتني وره
من الخوف شهكت ايده  صارت على شفايفي
تمنعني من الحجي ..

دفعني للحايط باوعت لكيته شهاب
يباوع بعيوني وايده بعده على حلكي ..

وخر ايده وظل يباوعلي  بنظرات غريبة
كلت بصدمة :
شهااب

كال و عينه ما شاله عني: اشش صوتج

يتبع ...
noorhaidar18

انتهى البارت اتمنى يعجبكم 💜🌸
لا تنسون الايك +التعليق ✔