_سمعي غتعاودي ليا كلشي بالتفصيل الممل..!!
شافت بخجل وقالت:
_وااخا.. فاش ضربوك بالسلاح..( وعاودت ليه كلشي من الطان الطان تال السلام عليكم..).. وفي اللخر داتهم هاديك الگارد وهوما فرحانين.. مقدرتش نخرج ونخليهم..
لمعو عينيه بدهشة وهو كايشوف في هاد الملاك الشرير.. وكيشوف قلبها اللي صافي وإلا مكانتش غادي تقدر تخلي دوك النساء كيتعذبو وتهرب.. بسرعة جرها عندو وخشاها في حضنو وقبل راسها وقال:
_أنا سباب.. سمحلي..
هزت راسها فيه وحطت ايدها على فمو وقالت:
_متقولش هكا.. ماشي نتا سباب..
وشحال زادت كبرت في عينو وزاد حبو ليها.. بلا مقدمات شد ايدها باسها بقوة وقال وهو كيشوف ليها في عينيها البنية:
_إيناااس..!!
قالت إيناس بصوت رقيق وهادئ:
_نعاااام..!؟
كحز حداها وحط ايديه على خصرها وجبهتو في جبهتها وهو كيشوف ليها في عينيها:
_أ أنا كاانبغيك..
حلت عويناتها اللي لمعو وفمها اللي تحل شوية وهي كتسمع هاد الكلمة اللي كانت بنفسها بغات تقولها ليه لكن مكاناش عندها الشجاعة.. ابتسمت بفرح ودموعها بداو يطيحو على خدها وقالت:
_ح حتا أنااا.. حتى أنا كااانبغيك..
ابتسم بدورو بفرح وهو حاس براسو طاير في السماء.. طلق منها ونزل عند ركابيها وهي گالسة فوق الناموسية وجبد صندوق صغير من جيبو وفتحو وهنا لمعو عينيها أكثر وهي كاتشوف خاتم كيلمع بألماسة في الوسط.. شافت ليه في عيونو الزرقين وهي قريبة تموت بالفرحة وحاسة بقلبها كي الطبل في صدرها.. بلا مقدمات قال بابتسامة:
_إيناس المنصوري واش تقبلي تكوني مرات فهد سالم.. وتعيشي معاه حتى لأخر نفس..
ضكحت بسعادة وهي حاطة ايدها على فمها وعينيها كيلمعو بلا ماتفكر قالت:
_آااه قابلة..
زادت فرحتو أكثر وهو كيشوفها مدت ليه ايدها.. بسرعة جبد الخاتم الألماسي وركبو ليها في ايدها ثم قبلها بحنان وهو غايطير بالفرحة.. وحتى هي لاتقل عنو فرحة.. طلع عندها وخشا ايدو ورا راسها وقربها عندو حتى شفايفو على شفايفها كيقبلهم بعنف وحتى هي دورت ايدها على عنقو وبداو كيتبادلو هاد القبلة الحميمية..
كان إدوارد گالس في قهوة كيشرب قهوتو وفي ايدو سيجارة وگالس في طابلة كطل على برا من الزاجة.. وهو كيتفكر في الطبيبة الصارمة صاحبة العيون الرمادية والشعر الأسود والملامح الجميلة.. تبا له مقدر يسول حتى على اسمها.. بسرعة جمع الوقفة وتحرك ركب في السيارة وكسيرا بسرعة غادي متوجه عندها وملامحو كتوحي بالصرامة...
حتى حس بيها تخنقت عاد طلعها وهو كينهج عاد وجهها وغيطير بالفرحة لأنه وأخيرا ولات دابا خطيبتو رسميا.. ابتسم وقال:
_حبيبة هدا أسعد نهار في حياتي..!!
بدلاتو الإبتسامة بدورها وهي غتنقز بالسعادة ضمت وجهو بين ايدها وهو مازال عند ركابيها وقالت بعيمين لامعين:
_حتى أنا.. هاد أحسن يوم في حياتي..
_عن قريب غتولي ديالي بوحدي..
ابتاسمت لكن انفوا تفكرت شيحاجة جمعت ضحكتها وقالت بهدوء:
_فااهد..
هز راسو وقال بتساؤل:
_نعااام..!!؟
_صافي.. الألكسندر دابا مات.. بغيت نرجع عند ماما توحشتها.. وأكيد حتى هي غتكون توحشاتني..؟
ابتسم ليها وقال:
_معلوم احبيبة.. راني وجدت كلشي غدا غنمشيو في أول طيارة..
خرجت عينيها بالفرحة وقالت:
_واااش بصاااح..هههه..شكرا..!!
زاد ضمها ليه أكثر وقال:
_متشكرينيش.. كندير غير الواجب ديالي..
ابتاسمت بحب وقبلت خدو وتمخششت فيه وهي غطير بالفرحة لأن وأخير تجمعت بحبيبها..
أمام المستشفى توقفت سيارة إدوارد بقوة على إثر شدة الظغطة ديال المكابح حتى تسمع صوت إحتكاك العجلات مع الأرض القوي.. ومن وراه الكثيبة ديالو اللي توقفت بنفس الطريقة وأكيد غادي يتيرو انتباه المارين.. نزل إدوارد بكل هيية وتكبر وايد في الجيب.. وعينيه الفيروزية مغاطاة بالنظارات السوداء النفيسة.. تمشى بكل هيية حتى دخل من البوابة وتمشى من الممر والفتايات الإيطاليات غير حالين فامهم وكيتغزلو فيه...
تمشى مباشرة لمكتب الإستقبال ووقف على الخادمة وقال بصرامة بالإيطالية:
_دكتورة عينيها رماديين وشعرها كحل..
موظفة الإستقبال غير حالة فمها حتى طلعت معاها عاد قالت بثوثر:
_اا..؟.. كاينين بزاف ديال الدكتورات عطيني الإسم ديال هاد الدكتورة..
بتاسم جنب وقال:
_معارفش..؟ أنا عطيتك المواصفات.. ااا..!! تفكرت جنسية المغربية..
ابتسمت ليه وخشات راسها في البيسي كدون فيه حتى قالت:
_الدكتورة سارة الأوي(العالوي😂).. كينة في أول غرفة من الطاج الثاني..
بلا مايقول والو قلب عينيه وزاد متوجه لطاج الثاني.. مدة كان واقف قدام المكتب ديالها وشاف الإسم ديالها مكتوب بالإيطالية ضحك ودق الباب..
بينما الجميلة سارة متكية كتخدم في الوراق ديال الحالات اللى عندها حتى كتسمع الدقان هزت راسها بتساؤل وقالت بصرامة:
_دخوول..!!
تفتح الباب ودخل الأشقر بابتسامتو الشريرة.. بكل تمختر وجعرفة توجه گلس فوق الفوطوي وتفطح برجل فوق الرجل.. وهي غير حالة فمها فيه ومن جماليتو ورجولتو الطاغية لكن بسرعة جمعتها وقالت بصرامة وهي هازة القلم في ايدها:
_نعااام.. أش ضارك..؟
ابتسم إدوارد ابتسامة جانبية وقال:
_ضارني قلبي.. كنحس بيه كيألمني..
السيدة من نيتها قالت ليه بصرامة:
_في هاد الحالة.. خاصك دير التحاليل.. لتكون كتعاني من مرض القلب.. الله يحفظ!!
مع الهضرة اللي قالت إدوارد مبقاش قادر تكرشخ ضحك ووجهو حمار وهو كيسمعها كتقول لتكون كتعاني من المرض القلب.. ميقت فيه باستغراب وقالت بحدة وعاقدة حجبانها:
_علاش كتضحك..؟!! واش قلت شي حاجة كضحك..
جمع الضحكة غير بزز وقال:
_فهمتيني غلاط.. قلبي كيضرني حيث كيعاني من مرض سميتو الحب وبغيتك تعالجيه في أقرب وقت حيث مبقيتش قادر نستحمل..
جاتها الضحكة من هضرتو لكن مبغاتش ضسرو عليها فقالت بصرامة:
_نوض عن هاديك اللي كتبغيها هي اللي عندها الدوا لهاد المرض الخطير..
شاف فيها بتجعرف وقال بابتسامتو المكرة:
_حتى أنا داكشي اللي درت.. جيث عند سارة العالوي هي اللي تعالجني..
بدات كتفقد أعصابها وقالت بغضب:
_امسيو قلت ليك سير عند حبيبتك ماشي أنا..
وسع ابتسامتو كثر وقال:
_حتى أنا داكشي اللي درت جيث عند حبيبتي تعالجني ولكن بان ليا تعصبت..
خرجت عينيها من الصدمة وحلت فمها وهي كتسمعو كيقول عليها حبيبتو.. واش هادا من نيتو جاي عندها وسط الخدمة وكيقول هضرة باسلة..
بسرعة جمعت الوقفة بعصبية وناضت موقفت حتى لعند رجليه وقابت بغضب:
_نوووض.. خرج علياااا... من هنا..!!
وتسحبيه تحرك هو امزاد تفطح ووسع ابتسامتو أكثر وقال:
_وإلى مبغيتش..!!؟
قالت بغضب:
_غادي نعيط للأمن يجيو يديوك..
ودارت غادة لكن كان أسرع منها.. جرها بسرعة من ايدها حتى طاحت گالسة على رجليه.. بينما هو استغل الفرصة وحوط خصرها بايديه وزاد جرها عندها حتى التصق صدرها مع صدرو وايديها تحطو على كتافو وولات أنفاسهم مقتاربة بينما هي حست قلبها غيخرج من بلاصتو أول مرة تحس هاد الإحساس أول مرة يجرا ليها بحال هكا.. بقات حاضياه بعيونها الرمادية وهي كتأمل وجههو الوسيم ولحيتو الشقراء وعيونو الفيروزية أما هو حس بروحو خرجت من قربها عمرو في حياتو حس بحال هكا بقرب أنثى.. حتى من إيناس محسش هكا.. يمكن عاد قدر يفهم بصاح معنى الحب الحقيقي.. مقدرش أبدا يشيل عينيه عليها جاتو أروع مشافتو عينو خصوصا عيونها الرمادية اللي ملائمة مع شعرها الأسود الغامق الحريري اللي كامل تسندل على عنقو لدرجة حس بالنعومة ديالو وشم رائحتو اللي كتفوح منو بنكهة التفاح الأحمر.. ناهيك على رائحتها اللي كانت مخلطة بين نكهات الرمان الطيب وورود الياسمين غمض عينيه كيستشق هاد العبير الرائع وكيفتحهم بثقالة وهو كيشوف في شفايفها اللي ولاو دابا بالنسبة حلوة شوكولاطة خاصو يدوقها في أقرب وقت وإلا غادي ينتهي بيه بالأمر في مقبرة الحب
هز ايدو ببطء وشال بيهم نظارتها البيضاء وهي غير كتفتف بالثوثر وقلبها بحال الطبل قريب ينقز من بلاصتو بقوة الخفقان.. شال النظارات وحطهم جنبو وهز ايد حطها مكالي بيها خصرها بإحكام والإيد الأخرى خشاها ورا راسها وأناملو كتغلغل وسط خصلات شعرها السوداء الحريرية..
حست بالثوثر الشديد بحركاتو اللي كيحاول يدوبها بيهم فمبقاتش قادرة خاصها توقف هادشي في أقرب وقت.. لكن قبل ماتحرك حست بشفايفو سخان تحطو على شفايفها كيمتصوهم ببطء ولطافة لدرجة ولات كتحس بلذغات قوية في البطن ديالها.. وعينيها محلولين قليلا من الصدمة..
حتى بدات كتحس بيه كيمتصهم بقوة وكيتلدد بيهم وهو شادها باحكام...
كانت الخالة سوزن كالسة في الصالة ديال القصر كتناول قهوتها.. ومرة مرة ضحك غير بوحدها مني تفكر كيفاش ولدها حمار بالحشمة مني دكرت ليه موضوع طهارتو.. وهي فرحانة لأنه وأخيرا ختار البنت اللي تلائمو يكمل معاها حياتو وفرحانة أيضا.. لأنها تجمعت مع ولدها بعض گاع هاد السنين وغادي تشوف حفايدو وهما كيكبرو قدامها كتحمد الله على كل وهي سعيدة.. حتى سمعت خطوات قادمة ورفعت راسها ووسمعت ابتسامتها أكثر وهي ولدها الگوڤيرنور نازل من الدروج ومعاه أميرتو وهما مشادين من ايدهم والبسمة مكاتفارقش وجهوهم..
توجه الگوڤيرن ومعاه إيناس عند الخالة وسلمو عليها بحرارة ثم شاركوها الجلسة.. ابتسمت سوزن وقالت:
_أشنو سر هاد السعادة واش مغتقولوش ليا..؟
ابتسم الگوڤيرنور وهو كيشوف في إيناس اللي هبطت راسها بالحشمة وقال:
_دابا إيناس ولات خطيبتي..
ضحكت سوزن بفرح وشافت في ايدها اللي كانت حاملة الخاتم الألماسي وزادت حلت فمها بسعادة وقالت:
_مبروك عليكم اولدي.. الله يكمل عليكم بالخير ويسعدكم مع وليداتكم..
قال الگوڤيرن بابتسامة:
_امين اماما الحبيبة..
بينما إيناس عينيها لمعو بالفرحة وناضت بسرعة وتلاحت على سوزن عنقتها وهي كتبوس في حنكها وتشم في ريحتها وقالت بفرحة:
_شكرا اخالتي على كلشي.. حسيت بيك ماما وديما كنشم فيك ريحتها وكنشوف فيك عويناتها الزرقين اللي بحال ديالك..
زادت سوزن ضمتها أكثر ودموعها طاحو حيث بصح ثأثرت بكلامها وقالت:
_وديما غتبقاي تشوفيني ماماك احبيبتي..
حتى من الگوڤيرن كان شوي غادي يبكي بسباب هاد الحالة اللي دارو بجوجات حرك راسو بقلة حيلة وقال:
_وصاافي براكة راكم قربتو تبكيوني معاكم..
بهضرتو عاد بعدو شوية على بعضياتهم.. مسحت إيناس دميعاتها وجلست حدا سوزن وهي كتبتاسم بخجل..
بينما الگوڤيرن شاف فيهم وقال:
_ياله.. راه خاصكم توجدو ريوسكم حيث غدا غادي نمشيو للمغرب في أول طيارة.. في الحقيقة بغيت نخطب..
ضكحو بجوجات على كلامو وقالت سوزن:
_أنا غادي نوض نوجد شي حوايج مهمين..
قالتها ثم ناضت ومن تم توجهت لبيتها.. أما إيناس بقات کالسة وكتشوف في فهد بخجل وبابتسامة طفيفة بينما هو غير حاضيها وحاضي كيفاش كتصرف مع كل واحد بشكل.. اللي شافها كتعامل مع ماماه بهاد الطريقة وشافها كتنقد دوك النساء من المجرمين ميقولش هي اللي دارت في الوزير ديك الحالة.. ابتسم وهو حاضيها بحب لشخصيتها الغامضة واللي مزال هو براسو مفهمها وأصلا زادت كبرت في عينو كثر من خلال الأعمال ديالها سواءا الشريرة أو الطيبة.. خرج من أفكارو وهو كيشوفها كتنوض وقالت:
_غنمشي نوجد راسي..
أومأ ليها راسو ثم تحركت ومشات بينما هو زاد وسع ابتسامتو بفرح...
مطلقها حتى حس بأنفاسها انقطت وهو كيشوفها كتنهج في وجهو بقوة وحناكها توردو بالحشمة..
وحتى ايديها عادو كيترعدو بالثوثر وقلبها حاسة بيه طاح عند رجليها.. بقللت عينيها بخجل وقالت:
_ا أناااا.. أنااا..
ابتسم إدوارد وقال:
_نتي شنو..؟
_أنا خاصني نمشي عندي حالة طارئة..
ثم ناضت بسرعة وخرجت من المكتب وهي غادي تنفاجر بالحشمة.. بينما إدوارد بفرح وهز ايدو كيتحسس شفايفو والمذاق اللي باقي عالق فيهم..
في المغرب
في بلاد المغرب أعلنت السماء على الظلمة وفي المنزل ديال إيناس كانت گالسة مليكة في الصالة وحداها عزيز اللي غير حاضيها ساهية من الصباح وكتشوف في نقطة واحدة وعينيها مكيوقفوش من الدموع.. شاف فيها عزيز وقال بحزن:
_رخي على راسك امليكة.. مكتاب علينا وربي كيختبرنااا... معلينا غير الصبر..
دارت عندو مليكة وقالت:
_لا اعزيز لااا.. قلبي حاس بنتي باقا عايشة.. وأصلا كن كانت ميتة فين هي گنازتها..
حرك عزيز راسو بقلة حيلة وقال بحزن:
_عارف فاش كتفكري.. ولكن أكيد هاد المجرمين لاحوها في شي بلاصة..
_لااا.. لا اعزيز قلبي اللي كيقولي بنتك باقا عايشة وكتمشى على الأرض.. وأنا حاسة غادي نتلقاها في أقرب وقت..
_الله يدير شي تاويل ديال الخير..
أصبحنا وأصبح الملك لله
أمام الباب ديال قصر الگوڤيرنور.. كان هاد الأخير واقف عند السيارة بأحسن حلة والنظارات الشمسية في عينيه وهو كيطلع مرة على الساعة ومرة على الباب كيتسنى أميرتو والأم ديالو.. لحظة حتى كيبانو ليه خارجين بأحسن حلة.. إيناس كانت لابسة كسوة في الأخضر نصف كم وطويلة حتى لتحت ومزيرة من جهة الخصر وأكيد مرصعة بالأحجار الكريمة وبعض أحجار الألماس وشعرها الحريري مسندل ورا ضهرها.. توجهو كاملين ركبو في السيارة والگارد قادو لڤاليز ديالهم وأكيد خاص تكون الكثيبة الحامية ديالهم.. مباشرة توجهو بعدما كسيرا الگوڤيرن باللوطو حتى وصل المطار.. مدة وبعض الإجراءات ركبو في طيارتهم الخاصة وحلقت متوجها لبلاد المغرب..
كان إدوارد واقف قدام المستشفى بنظاراتو السوداء والليكات في ايديه وهو في السيارة ديالو وعينيه كيقلبو عليها في كل مكان.. أما هي ياله جاية كثمختر بكل عنفوان وتكبر..
ابتسم مني لمحها جاية وبسرعة نزل من السيارة وتحرك ماوقف حتى لقدامها.. بينما هي غير شافتو خرجو عينيها من بلاصتهم وأول حاجة جات في بالها هي القبلة ديال البارح.. دورت راسها بخجل وقالت:
_نعااام.. كاين منقضيو..؟
ابتسم على هضرتها وقال:
_بغيت ندوز معاك هاد النهار إلى مكانش عندك مانع..
بقللت فيه عينيها وقالت:
_لااا.. عندي الخدمة بزااف..
_أشنو هذا أخر كلام عندك..؟
شافت فيه بثوثر وخجل وقالت:
_ولكن.. أوكييي غير ليوم..
ابتسم بفرح على كلامها وقال:
_إذن ياله..!!
ابتسمت ليه بينما هو شد ليها في
ايدها وداها للسيارة وركبها ثم انطلق لمكان
للمجهول بالنسبة ليها..
حطت الطائرة في مطار طنجة.. ونزل الگوڤيرن وبالرفقة ديالو إيناس وسوزن.. والكارد مكلفين بليڤاليز كيقادوهم في السيارات.. ركب الگوڤيرن في مكان السائق وإيناس حداه وسوزن من وراهم وشدو الطريق للمنزل ديال إيناس ومن وراهم الكثيبة ديالهم.. إيناس كضحك غير بوحدها وكتفرك ايدها حيث فرحانة.. غادي تقابل والديها.. بينما سوزن كمشت وجهها بقلق وشدت في صدرها.. في حين الگوڤيرن لمحها من الزاجة وقال باهتمام وخوف:
_ماما واش نتي بيخير..؟!!
التفتت على إثرها إيناس باهتمام بينما سوزن قالت:
_واالو اولدي غير حاسة بقلبي تقبط عليا..
_غانديك المستشفى..
لكن قاطعاتو وقالت:
_لا اولدي أنا راه بيخير والله.. غير حيتاش شحال مبقيت جيت للمغرب..
بينما إيناس قالت:
_إلا حسيتي بشي حاجة قوليها اخالتي..
_وااخا ابنتي..!!
يتبع...