أنتقام للعشق

البارت العاشر

#أنتقام للعشق 🥀
البارت العاشر
بقلم : نور حيدر...
noorhaidar18

مساء الخير عليكم متابعيني 🦋🌿..

(علقوو على الفقرات مو تنسون 💜🌸)

كم مرةٍ هجمت عليكَ ملامتي
وغيومَ صمتِ مخاوفي ورعيدي
مابينَ تحذيري وخيبةِ فكرتي
ودخانِ تهديدي
ونارِ وعيدي
قد صار جُرحاً ذاكَ من أرغمتني
وجعلتني أسكنتهُ بوريدي
إن الذي لم تنسهُ ها قد نسى 
وطوى قديمَ حنينهِ بجديدِ ...

ميامين /

جنت كاعدة بغرفتي و اشوف موبايلي وصله مسج
شفته من زينب كاتبة :تعاي اليوم عدنه مسوين لمة ابيتنا ..

ابتسمت و رجعت كتبت الها : ماشي اشوف بابا و اكلج..

رحت نزلت جوه لكيت زياد كاعد وحده
رحت كعدت كباله و اباوع عليه
هو انتبه لوجودي و ظل يباوع عليه و صافن بيه
أني ابتسمت بوجهه رجع هو ابتسم بوجهي ..

عدل كعدته و كال : اي تفضلي ميامين خير
رايدة شي لأن انتي اذا تردين شي تضلين كاعدة
وساكته لو توزعين ابتسامات ..

طفرت من مكاني و رحت كعدت بصفة
ولزمت ايده و حظنته كتله :
فديت اخوي الي يعرفني الله يحفظك الي
ويطول بعمرك و لا يحرمني منك و يارب
اشوفك لابس قاط زواج وو..

ما كملت كلامي حسيت ضربة براسي اجتني
خليت ايدي على راسي : ااخخ شبيك
ليش تضرب ..

: كافي لغي تردين شي احجي
شكد تحجين لخاطر الكعبة ..

مديت البوز شكبره و كتله :
هو موصوجك صوجي اني الي ادعيلك
من اعماق قلبي ..

غمض عيونه و باوعلي :
غير تحجي و تفضه لا تخليني
بهذا النعال و على كلبج ..

ابتسمت الها و كتله :
اليوم البنات ملتمات ابيت عمي ابو فارس
و اتصلت عليه زينب تكلي تعاي ..

خليت شوي بهارات بلكلام :
اول شي كتله ماكدر بس هيا ظلت تلح عليه
و عليج الله تعاي الكعدة مو حلوة بدونج
ولج انتي ملح الكعدة و لو شوية رادت تبجي
و انقهرت عليه و كتله ميخالف اشوف اهلي يلا ..

باوع عليه و ضحك:
على كيفج يابة الفيالة كامت اطير ..
ولج انتي شعندج يمهم اربع و عشرين ساعة
لأزكة يمهم عيب انتي غريبة بينهم
روحي لبيت عمي لو لبيت جدي احسن ..

: اصلا اني تبريت من عمامي كلهم
ذولاك احسهم اهلي و تربيت من صغري يمهم
واعرف البنات كلهن احسهم مو غربة
حتى هنا يكللي انتي وحده منا وبينا ..

سويت نفسي زعلانة و كمت:
بس اذا انت ما حاب تاخذني براحتك
عود أنت اخوي و الي اسند ظهري بيك
و اكول اخوي حزام ظهري بس الله المستعان ..

دنكت راسي بس اباوع عليه من طرف عيني
كل ساعه ادير وجهي و ارجع اباوعله ..

وهو بمكانه و يباوعلي مبتسم ..
وصلت لدرج و رجعت باوعتله  كتله :
ترى صاعدة و اذا اصعد ماانزل بعد
و حتى لو تلح عليه ماروح
اهم شي كرامتي ..

هستوني ردت اصعد و كال :
يلا ولج وجع ان شاءالله روحي
صعدي بدلي منتظريج ..

كيفت و باوعتله وديتله بوسة بلهوى:
اروح فدوه للحنين ..

ركضت بسرعه صعدت لغرفتي فتحت الكنتور
طلعت ملابس الي طلعت بنطرون جينز و قميص
يوصل لركبة من فوك سمائي و جوه ابيض
وبيه حزام من الخصر و لبست شال نسقت وياه
اخذت جنطتي و عباتي و نزلت لكيته منتظر ..

لبست العباية و طلعنه صعدت كدام يمه
حرك السيارة هو و شغل اغنية لحسام الرسام ..

اغنية حزينة باوعت عليه مهموم وصافن
جر حسرة من وصلت الاغنية لهذا المقطع..

شفتوا شلون جرحني اللي سكن كلبي

شفتوا شلون تركني وما ذكر حبي

شكثر عانيت واله اشتاكيت

حزن ع اليحن غنيت

ليالي ما غفت هالعين

ينام النوم واني اسهر

افكر عايش بانسان

عمره بحالي مافكر...

ظليت صافنة على حاله و مقهوره كلش
اخوي حب البنت الغلط حب جوري
و هيا ماتبادله هذا الحب و لحد هسه
اعرف بيها رغم ماسوه بيها شهاب هيج
بس احس بيها تحن اله و اخر مره بيوم العزيمة
من شافته و كالت شفته من اخذ ابنه ..

حسيت دموع متجمعات بعيونها
و صافنة و تكول شكد متغير حتى نظراته
متغيرات ..

يعني وحده حافظه لحد هسه حتى نظراته
نكول تنساه جذب بس كاعد تحاول ..

واني ما كاسر كلبي غير اخوي المسكين
وكع بيها و لحد هسه متأمل تصير اله ..

كتله : خووية ما تنساها

باوعلي ابتسم و رجع باوع لطريق:
شنسى ميامين هاي روحي من الدنيا
من كبرت لحد هسه اني احبه
و تعرف كلش زين بس كلبه ما اختارني
اختار ابن عمها و مالومها بهذا الشي
لان مثل ماحبيته تحب غيري و هذا الشي
مو بيدها و لا بيدي ..

كال: اتمنى تصير الي مو لغيري
و ماظن ترجع لشهاب لان هذا متزوج
وعنده طفل و هيا تكره..

تحسر و كال:ويمكن ما تقبل بيه  ..

كتله بقهر : و شبيك انت و ماتقبل بيك
بس كلت انته كلبه اختار و لا تتأمل هيج خوية
ماظن ينكتب نصيب الكم سوه ..

باوعلي و كال : ليش هيج تحجين
سامعة شي شنو !؟

: لا والله ما سامعة بس حجيتة على مودك
حتى لا تتأمل على الخالي بلاش و ينكسر كلبك
مرة ثانية ..

هز راسه و كال :الله كريم .

وصلنة للمطنقة مالتهم و كال :
وين انزلج عند بيت عمتي لو بيت ابو فارس..

: لا نزلني بيت عمي ابو فارس
لان كلهن مجتمعات هناك ..

اني اسميه عمي لان احترام الهم
وأحبهم و من صغري هنا يمهم ..

وصلنة يم باب بيتهم و نزلت و هو نزل وراي
دك الباب شوي و فتح الباب و طلع فارس
لابس تراك نيلي و واكف و الشمس فوك راسه
عاكسات عيونه البنيات صارن صفر
لو شعره الي بيه خيط شكار ..

ظليت صافنة على جماله عمي أنت
منين مصنوع من ككو لو شنو
لو من كيك ام الككو ..
لان هو اسمراني ..

ظليت صافنة على عيونه الي من اشوفه
مدري شيصير بيه بس اجت ابالي أغنية..
أنا العاشق لعينيك برب العشق فا ارحمني ..

فزيت على صفنتي صوت زياد يحجي وياي
كال : يلا طبي جووه ..

باوعت لكيت فارس يباوع و رافع حاجبه
عزاا بس لا انتبه عليه و اني اباعله شكد عيب..
هزيت راسي و دخلت جووه وزياد مشه..

شفت زينب كاعدة بلصالة هيا و امها
سلمت عليهن و كعدت كتلهن بتساؤل :
لعد البنات وين شو ماكو

زينب : بعدهن ماجايات هسه يجن ..

هزيت راسي و كتله :ماشي ..

سمعت صوت فارس يم الباب صاح :
يمه أدخل..
: اي يمه تعاال  ..

عدلت نفسي و عباتي و كعدت
هو دخل و  وصعد فوك كبل ..

ظلينة نسولف و البنات اجن رحنه للحديقة
لان مانحب كعدة البيت ..

اني و زينب و جوري و جمارة و زهراء
بس فاتن ما اجت تكول تعبانة ..

اباوع على جوري و زهراء كل وحده
تباوع لثانية و نظرات كره و حقد بيناتهن
خاصة زهراء اريد اضحك من هاي النظرات
ماعرف ليش ..

شربت ماي و اني اشوفهن يتخازرن
هنا اني ماتحملت و طكيته ضحكة
حتى الماي طلع من خشمي ..

انتبهن كلهن عليه و كالت جمارة :
شبيج ولج تضحكين شصاير وياج
اسم الله  ..

اضحك اني اريد اسكت ماعرف
صدك بوقته حسيت نفسي تافهة كلش
كمت من مكاني و أني اشر بأيدي
: ماكو شي ههههه رايحة اغسل و اجيجن ..

كمت من يمهن و اني مدنكة راسي و اضحك
رحت بأتجاه باب المطبخ لا تشوفني عمة ام فارس
و هم تسئل بيه و ماكدر اجاوبة ..

وصلت يم الباب و اني اضحك و ماحس
غير انلطخت بشي صلب حسيت راح
يغمى عليه من قوة الضربة ..

رجعت ليورة و ردت اوكع
شهكت : هئ يمه
و ماحس غير لزمني من ايدي و رجعني عليه
اني خفت لا اوكع خليت ايدي على كتفة ..

كال : اسم الله انتبهي

رفعت راسي و باوعت عليه
صارت عيني كبال عيونه صفنت عليه
و بهتت كلش عيوني تروح على حاجبه
السود الكثيفة لو على عيونه
الحادات و رموشه الطوال ظليت صافنه عليهن .

كلت و اني مبتسمة ناسية نفسي :
هاي شنوو العيون ذني حقيقات لو خيال ..

كال و هو رافع حاجبة :
شنو شقصدج !؟

فزيت من صفنتي و صحيت على حالي
باوعت لكيت نفسي لحد هسه مجلبة بيه
عزا العزاج ميامين شمسوية ..

وخرت بسرعة و اني باوعت عليه
لكيته يباوعلي  و رافع حاجبة..

دنزل حاجبك هذا يكول بس انت عندك حاجب
حجيت بيني و بين نفسي  ..

: ااا شكرا

كال و هو مبتسم : على شنو تشكريني مصار شي..
بس على فكرة ترى حقيقات ذني مو خيال ..

مافهمت شيقصد بعدين تذكرت كلامي
فتحت عيني بقووة و درت وجهي
ركضت يم الباب و رجعت كعدت بمكاني
ساكتة و عاقلة و هنا يسئلن بيه
شبيج ولج منو لازمج ليش هيج تركضين ..

بس اني ساكتة و الدمعة بطرف عيني
طاحضني صدك لساني يحتاجله كص
شحجاني و شعندي رايحه لو منجبه
و كاعدة يم البنات..

بس هو المثل مدري شكال
من يضحك كثيرا يبكي كثيرا ..
عزا العزاج ميامين ما تحبين تسكتين دومج
اجفصين ..

بقيت كاعدة لحد ما شفت موبايلي يرن
عرفتة زياد كمت لبست عباتي و استأذنت
من البنات لحن عليه ابقه بس ماكدرت
حتى جوري كالت ابقي باتي يمي بس ماقبلت
اريد امشي مانسيت الفشلة ابد ..

سلمت عليهن و طلعت لكيت فارس واكف يم
الباب و اسمعه يكلله هسه اصيحه..

دار وجهه و اجه عليه و اني مستحية من الصار
دنكت راسي و هو وكف كبالي رفعت راسي عليه
باوعلي و كال بهدوء : يلا اخوج زياد منتظرج

هزيت راسي : ماشي

طلعت و هو وراي صعدت بلسيارة
وظليت اباوعله من الشباك شلون يضحك
ويسولف وي زياد اخر شي سلم عليه و زياد
صعد بلسيارة و هو دخل للبيت ..

......

جوري/

انتهى الدوام و طلعت انتظر احد يجي
شوي واتصلت على ليث يجيني
شفت سيارة اجت و توقفت كبالي..

ردت امشي بس توقفت من شفت
الي نزل من السيارة باوعت هذا شهاب ..

شجابة هنا وشيسوي نزل النظارة من عينة
و ظل مركز عيونة عليه بس يباوعلي ..

اجت جمارة انتبهت عليه وين أباوع
كالت : اا جوري بيج شي..

انتبهت عليها و احس شهاب بعده يباوع
كتله : ها لا مابيه شي شنو رايحة ..

كالت : اي والله اجه عليه شهاب..

هزيت راسي الها : خووش يلا روحي ..

ظلت تباوعلي و بحلكه حجي :
شبيج جمارة ليش واكفة ماترحين ..

كالت بتردد: ماتجين ويانه خاف محد ياخذج

باوعت عليه و خزرته هاي شتحجي:
انتي شتحجين هاا لو اعرف ابات اليوم هنا
بس ماصعد وي هذا يلا روحي جمارة
لأن كمتي تخربطين بالكلام ..

هزت راسه و راحت عافتني ظلت واكفة وياه
مدري شحجت و هو باوعلي و صعد بلسيارة..

بس ظلت سيارته واكفه ماحرك و اني بقيت
مدنكة راسي لو دايرة وجهي ماريد اباوع عليه ..

شوي و أجت سيارة ليث هو من شاف سيارته
حرك و مشه ..رحت  اني صعدت بلسيارة
التفت عليه و رفع حاجبه كال بهدوء:
هذا شعنده هناا و شيسوي حجه وياج شنو ..

كتله: يعني شيسوي اجه ياخذ أخته
نسيت هيا وياي بنفس الجامعة ..

هز راسه و حرك و اني بقيت صافنة
ليش يباوع و ليش ماحرك سيارتة
الا من شاف ليث اجه يلا مشه
ابتسمت بأستهزاء هه شنو تحركت عندك الغيرة
هو لو عندك غيرة جان ماسويت الي سويته ..

وصلت للبيت وصعدت فوك غيرت ملابسي
ونزلت جوه اساعد أمي و فاتن
صبينه الغده و التمينه كلنه ..

خلصنه وكعدنه بلاستقبال و جابت فاتن الجاي
وأبوي طلب من يمنه كلنه نكعد يمه عدهم حجي
ويانه ..

حجه أبوي و كلنه كاعدين و مجتمعين
بعد طلب منه و من جدي ..

باوع على جدي و كال : بوية احجي ..

كال بهدووء : راح تجي بنت عمكم المرحوم فاضل
تعيش هنا يمنه ..

ظلينه كلنه ساكتين مانعرف شنكول
كل شخص يباوع بوجه الثاني ..

أبوي باوع على شاهر و كال : بعد يومين
تروح تجيبه حتى تعيش هنا يمنه ..

حجه شاهر : بوية ليش وشكو تجي
يعني مدة و ترجع لو شنو السالفة ..

حجه جدي : عمكم الله يرحمة من تزوج
و راح للكوت يم مرته جان يجي و نشوف حفيدتنه
بس من مات عمكم جان طلبه و وصيتة ..
هيا بنته تبقى يم امها مايريد بنته تنحرم من امها
مثل ما تنحرم منه واحنه ما كلنه لا ..

و كلنه تبقى يم أجداده بلكوت بس جان شرطنه
اذا امها تتزوج ترجع يمنه لأن نبقى احنه اهلها ..

وصدك بقت البت يم امها و جانت تجي كل شهر
اشو الام سوتها كل شهرين و بعدين كل سنة ..

وبعد البت انمنعت من الجية و كل مانريد نشوفها
اطلع الف حجة و كمنه احنه نروح نشوفها
اني و عمامكم ..

حجه غيث : نعرف جدي بهاي السالفة
حتى الله وكيلكم نسيت عندي بت عم
الا صدك هيا شني اسمها نسيته وصعب ..

اني كتمت ضحكتي على كلامه
باوعله شاهر و كال : رسيل اسمها

غيث رفع حاجبه  : و هسه هذا عود شنو من اسم..

ليث : اسكت غيث خل نسمع
اي و هسه شنو التغير و تريد تجيبونه هنا
بعد هاي السنين ..

حجه أبوي و كال : لأن مرت عمكم اتزوجت
قبل شكم يوم و اجانه هذا الحجي و سمعنه
فا بعد بتنه شعده تبقى هناك لازم تجي تعيش يمنه..

غيث : دهر دهرها شعده متزوجة
بدال ماتكعد تربي بتها رايحة تعرس ..

خزره محمد و كال :صم حلكك و لك لا يجيك
نعال طاير على وجهك ..

غيث : اي وعلي خل اسكت لا يجيني شي..

حبوبتي حجت : اي والله يمه جيبوها اريد اشوفها
صارلي سنين ماشفته اريد اشوف بيها ابني فاضل
هواي لحيت عليكم خل تجي تعيش يمنه بس انتم
قافلين ..

أبوي : يمه يرحم والديج احنه شكو
لو علينه من وفاة اخوي تجي يمنه و تعيش
بس هاي جانت وصية المرحوم و مانكدر
ما نمشي بوصيتة ..

باوع على شاهر و كال :
بوية بعد يومين تعوف كلشي و تروح للكوت
تجيب بنت عمك و تجي حتى لو عندك شغل
تعوفه و تروح فهمت بوية ..

هز راسه شاهر و كال :
ان شاءالله اجيبه ميخالف ..

رجع باوعلنه اني و أمي وفاتن :
الغرفة الفوك مال الغراض عدلنه و نظفنه
زين و الغراض طلعنهن و نزلنهن جووه
بلغرفة الثانية المخزن ..
وباجر راح نجيب غرفة الها و رتبنه ..

كام يوصي بينه و كال :
هالله هالله ابنت عمكم ماريده
تستحي من يمنه اريدها تعتبر هذا بيت أبوها
وانتم اخوانها ماريدها تتحسس من شي ..

وكال لأمي:
وانتي ام محمد ديري بالج على البنية
ترى بنت أخوي يعني بنتي ماريد احد يسمعه حجاية
تغثه و انتي ديري بالج عليها حالها من حال جوري..

ابتسمت اله امي :
هلا بيها البيت بيتها احنه الطالعين و هيا
الطابة ..

: والنعم منج اصيلة دومج ..

غيث بشقة :جا بكيفكم تقررون غير بيتنه
شنو يمه تكلليه احنه نطلع و هيا اطب
جا اني وين اروح انشمر وين ..

ضحكنه عليه و جدي ابتسم  و كال:
ولك أنت ماتوب ..

خلصنة سوالف وكل واحد راح لغرفتة
صعدت اني فوك قريت شوي و اجه ابالي
البستان صارلي شكد مراحية و شايفته ..

كلت خل اروح و شنو يعني خايفة
واذا شفتة البستان للكل مو بس اله
و يمكن اني من وحدي احجي ..

يمكن ما يجي اصلاً للبستان و مايروحله
و اني وحدي احجي ويوصله ..

قررت اروح و صدك وره ساعة
لبست عباتي و نزلت شفت امي وابوي كاعدين
كتله : بوية راح اروح افتر بلبستان ضايجة
هم اكو احد هناك ..

هز راسه و هيا ملت مني : الف مره اكلج
كبرتي شعندج ولج بلستان مايصير ..

: يمه هو هذا البستان شوي من اضوج
ارفه عن نفسي لا تحرميني منه ..

حجه أبوي :
شبيج وياها خل تروح خطية وبعدين
ترى ماكو غريب بيها هيا بيوتنه بنص البستان

باوعلي و كال:
بوية روحي بس لا تتأخرين و الفلاليح
مشوو محد بيه ..

هزيت راسي و طلعت من البيت و اتجهت
للبستان ..

رحت واني افكر خاف اشوفه
وابعد التفكير من بالي و شنو يعني..

رحت للنفس المكان الي شهد على حبي وعلى انكساري ماعفته و لا لحظه ..

وهسه اجيته لان بحاجته رحت للبستان وكفت وشفت شجرة التكي ابتسمت بألم

اتقدمت اله خليت ايدي على الشجرة وظليت ايدي تتلمس جذعها الخشن

واكفه بشمووخ عكس الي بداخلي النار الي مشتعله بصدري .

عيوني الي حركتني وموتتني مغوركه من الدموع..

حجيت بخنكه وقهر : ليش اجيت هسه
وشجابك شهاب شرجعك
اتذكرتنه بعد هاي السنين كله لو شنو

حجيت وي الشجره : انتي مثلي هم تسئلين
ليش رجع لو فرحانه بجيته ..

حجيت بغضب وي الشجره تخيلته
بشر كدامي واحجي وياها:
دير بالج تفرحين بجيته هذا كسرنه وعافنه

ظليت واكفه بمكاني واحجي بين نفسي
واعاتب لحد ماسمعت صوت وراي
بهمس وسمعته : جوري

شهكت بصوت مسموع ودموعي نزلت
هذا صوته والله كلشي تبخر من كلام
كلبي يدك ظل حسيت نفسي
رجعت لأيام صغري وياه ..

غمضت عيني قويت نفسي
ومسحت دمعتي الي نزلت..

درت وجهي اله شفته اي هو
هذا شهاب يالله شلون متغير
مو شهاب نفسه الي اعرفه ..

باوعت على شكله المتغير
ولطوله ولضخامته ماجان هيج قبل ..

صارت عيني بعينه حسيت الزمن توقف
بهاي اللحظه خليت عيوني تحجي
كل الي بكلبي من عتاب وقهر السنين
والكسر الي كسرني اياه ..

وعيونه احس بيهن برود مو حب كبل
لو لهفة كبل اثاري مو بس شكلك تغير حتى كلبك ..

ابتسم برود وكال : شلونج يابنت عمي

رفعت حاجبي اله وكتله : بخير .. نحمد الله على الصحة

:ايي الحمدلله

يباوعلي برود و كلبي حاقد عليه كلش ..

كتله بحقد : شجابك شهاب ليش اجيت

:ليش يعني ممنوع اجي لهنا
لو شنو كلت بعد كافي غربه واتغرب
خل ارجع واعيش بين اهلي وناس
غلط لو مسوي جريمة ...

كتله بقهر : ااييي غلط وجريمة
لان أنت اختاريت هذا البعد
وانت الي ردت تغرب نفسك ..

: ايي وبعد كلت كفايه لهنا
وبس خل ارجع  وهذا من حقي طبعا ..

:شهاب ارجع من وين ما اجيت 
أنت وأبنك سوي شي زين بحياتك..

: ليش بويه ترديني ارجع
وأبني ماريده يتغرب مثلي أريده
يعيش يم اهله وعمامه وبحضن جده..

كتله :  ..
ليش رجعت بعد ماتزوجت !؟

قاطعني و كال:  ليش تسئلين شنو بعدج

كتله بغضب مقاطعته : بعدني شنوو هاا
ا لا تحسب نفسك اني بعدني عاشكتك
لا انسه و لا تظل تتوهم جوري الصغيره
ماتت بعد وذكرياته ماتت وياها
انه وحده ثانيه..

انه هسه جوري الي منتظره فرصه وحده
حتى بس تكسر كلبك وتحول النار
الي بكلبه بكلبك وانت ردت تبقه ..

ابتسمت اله : هلا بيك لعد وانتظر الي يجيك يا شهاب ..

مشيت و وصلت يمه ظل هو واكف بنفس مكانه نفس شموخه وبثقه يباوعلي بطرف عينه ..

درت وجهي عنه وعبرت من يمه ومشيت وكلبي مشتعل نار ...

..........

زينب/

مرت الأيام و اني ماروح لبيت عمي ابو محمد
بس بلعزيمة و غصب عني اخوي فارس ظل يحجي
عليه يكلي شكو شعندج ماترحين تصرفاتج ماعجبتني..

بس اليوم طلبت مني جوري اجي
كالت مشتاقتلج واريدج تجين علينه ..

طلعت من بيتنه و وصلت يم بيتهم

كاعد امشي و اني مدنكة راسي و افكر
ماريد اجي بس لحت عليه جوري اجيهم

وصلت يم باب المطبخ و ماحس غير
انلطخت بشيي راسي وجعني كلش ..

رجعت ليوره ماحس غير احد لزمني من ايدي
ورجعني عليه باوعت لكيته ليث ..

توترت من قربه عليه و كلبي انخبص ماعرفت شسوي
باوعت عليه عيونه حمر و وجهه مايكصه الطبر..

ردت ابتعد عنه بس هو لازمني حيل
وعاصر على ايدي بقووه حتى توجعت ..
كتله بوجع  و مصدومه منه: ليث هد ايدي شبيك..

بس هو ابد مو وياي اريد اوخر منه مايفيد..

كال و هو راص على سنونة :
ليش جدي يلح عليه و يريدج الي
فهميني شنو  البيج وجدي مخبوص عليج ..

كتله بعدم فهم : شقصدك ..

ماحس غير جرني من أيدي و طلعني
بره للحديقة و عيونه كلهن غضب ....

بقه لازم ايدي و يباوعلي بده يفترسني
لو يمحيني من هذا الوجود خفت كلش منه
اول مره  بحياتي اشوفه هيج لان وقته
كله هادئ ..

بس اليوم  شخص ثاني ليث
شخص كله غضب و حقد..

اريد اسحب أيدي منه ماكدر
كتله : ليث ايدي شبيك هدني ..

هو باوع على ايدي و رجع باوعلي
دفع ايده من أيدي  وضل يروح ويرجع
بلحديقة و مخلي ايده على راسه..

رجع باوعلي و كال :
بس فهميني انتي ليش  جدي هيج
مصر عليج و يكلي لو هيا لو لا ..

: مافهمت عليك ليث ..

صيح بوجهي كمزت اني من يمي :
اييي مو غبية و ماتفهمين لا كلش
زين تعرفين عليش احجي اني بس
اذا تردين افهمج عادي عندي ليش لا ..

باوعلي و كال :
اهلي فارضيج عليه أبوي و جدي
يكلولي لو زينب لو ماتزوج
و أبوي يتبرى مني ..

انصدمت من انفعاله هذا كله علمود
اهله يكلوله اخذ  زينب لعد شكد تكرهني ..

كتله  و الغصه ابلعومي :
و أني  شكو تجي تصيح عليه
روح حاجيهم اني معليه ..

باوع عليه و يخزر بيه :
ولج صارلي شكم سنة احجي وياهم
ماعدهم كل تفاهم حطي نفسج بمكاني
ويفرضون عليج شخص ماترديه ..

كتله : شنو ماتريدني !؟

باوع عليه و حجه بغضب و نسه نفسه
نسه انو اني بنية و انجرح بكلامه هذا:
ايي ماريدج و لا اريد تكونين زوجتي
بس اهلي جابريني عليج ولج من وراهم
كمت ماريد حتى اشوفج و لا التقي بيج
خاف جنتي تستغربين ليش هيج اتعامل وياج
من دون كل البنات هسه  اكلج بسبب هذا الشي ..

طلع ليث كارهني و ماطايقني علمود هذا الشي
دمعة نزلت من عيني و هو من شافني هيج
يمكن حس على نفسه  غمض عينه و ظل
يفرك بوجهه كال :
استغفر الله شحجيت ..

باوع عليه بهدوء و كال :
زينب اني اسف صدكيني بس اسمعي ..

ابتعدت عنه و كتله بخنكة :
اشش ليث لا تحجي شي انت من حقك
تختار شريكة حياتك و الي تكون زوجتك
من حقك تختار الي تناسبك ..

كتله واني امسح دموعي حجيت بغصة :
بس مو من حقك هيج تجرحني
ترى اني بنية و عندي كرامه و مشاعر
و بهذا كلامك جرحتني كلش ..

هو ظل يباوع عليه و يريد يحجي وياي
: اسمعي زينب اني مو قصدي ..

: شووف ليث قصدك او مو قصدك
بس انت حجيت الي بكلبك و هاهيه..

باوعتله و كلت اني اريد ابرر لنفسي يلا اله
جذبت عليه و حاولت اصدك هاي الجذبة :
شووف اني اصلاً ما مقتنعة بكلام اهلنه
وماريد هذا الارتباط لان احسك ماتناسبني ..

هو انصدم من ردي و كلامي شحسبالك
اترجى بيك حتى تأخذني حتى لو احبك
بس كرامتي اهم و ادوس على الحب ..

كتله: اني ماريدك و لا اريد هذا الزواج
اعتبرك اخويه لا اكثر بس ماسويت الي سويته
و كرهتك او حقدت عليك و تعاملت وياك غير عن
ولدنه بس انت كرهتني بسبب كلام اهلي
واني مالي دخل
نسيت اني بنية و مالي كلام هنا
و لازم انت الي تحجي ..

كتلة و كلبي مكسور :
اذا يجي يوم و يكلولي على هذا الموضوع
او يتقدمون الي راح انطيهم الرفض
ما اوافق عليك بس انت سووي شي
حتى يرفضون لان ما تحمل هيج ..

حجيت هيج و درت وجهي و عفته
طلعت من بيتهم و اني اجر حسرات
وخيبتات و حبي الي انتهى هنا ..

دخلت للبيت و شافني فارس
كال بتفاجئ : شرجعج ولج مو على اساس
ترحين لجوري ليش رجعتي ..

كتله و عيوني مغوركة :
شفت جوري بس حسيت نفسي تعبانه
واجيت ..

هو اقترب مني و تفاجئ بوجهي :
ولج شبيج احجي ليش وجهج احمر
وليش عيونج مغوركة فهميني منو وياج..

هزيت راسي بلنفي :
مابيه شي بس لان راسي يوجعني ..

عفته ماريد احجي لان اذا اظل دقيقة
يمه يمكن انفضح و ابجي كدامه ..

صعدت فوك لغرفتي سديت الباب و قفلته
رحت شمرت نفسي على الجرباية و غطيت
وجهي بلمخدة اكتم صوتي و ابجي ..

ظليت ابجي و اشهك كلامه كله جرحني
و موتني سجاجين تطعن بكلبي
ادري بيه يكرهني بس مو هيج يحجي وياي
اثاري كرهك كله بس علمود هذا الموضوع ..

ظليت ابجي لحد ماتعبت و عيوني حركتني
وظليت فووك نمت من التعب و البجي ..

يتبع ..

noorhaidar18

انتهى البارت اتمنى يعجبكم 🌸💜
لا تنسون الايك + التعليق ✔

حبايبي هذا البارت كلش طويل لعيونكم ٣٥٦٥كلمة
مو تكولون قصير و اذا شفت تفاعل كلش قوي
وتصويت قووي راح اسوي النشر يومي 🌿..