.
.
قال الرسول (صلى الله عليه وآله)
{ من فرق بين الوالدة وولدها فرق بينه وبين احبته يوم القيامة }
هذا البارت مو بس حتى نحزن أو ناخذ موقف لشخصية معينة بالقصة لا
حتى نعرف اعداد المطلقات الي تمر سنين وهمة مشايفين أطفالهم قسراً
قصة حور تشابه كومة قصص نساء عراقيات أو عربيات
حور. جانت الساعة 2 بالليل لمن حسيت بألم قوي
اليوم 23/4/2015
حطيت أيدي ع بطني بألم الغرفة ضلمة مديت أيدي صارت ع زند آصف حركتة بضعف
حور.اكعد آصف راح اموووت
طفر من مكانة مخترع راح شغل الضوة وأجة كدامي
آصف.شبيج حبيبتي شبيج
حور.رااااح أولد يااربي
آصف.يلا هاي گمنة خلص لاتبجين
طلع من الغرفة وراح لغرفة غلا اجت ورا
غلا.يلا حضري نفسج كوومي
حور.ماااكدررر
اجة آصف لبسني شال والصاية فوك التراك
ونعالي الأسود ابو الأصبع حطة برجلي
آصف.هاي اني اشيلج يلا حبيبة
تقرب يمي جنطة الملابس على كتفة
راد يشيلني دفعتة
حور.ماريدك تشيلنييي أريد ماما
ااااي راح اموووت
غلا.ماتموتيين هي ولادة
آصف.لاتحجين وياها هجي تخاف
روحي لبسي وتعااي
غلا.هاي خابرت ام حسين تجي يم حور
وين اخليها وحدها مشتملها براس الفرع هسة تجي
راحت غلا تلبس واني مثل الطير المذبوح
الألم موتني وآصف گاعد يدلك بأيدية
لحد ماندكت الباب ودخلت المرية للبيت
حطت أيدها ع راسي ودعتلي
ركبنة بالسيارة واني اصرخ أحس روحي راح تطلع
غلا بالطريق وخابرتهم وصلنة جانو مجهزين الكرسي المتحرك كعدوني بي واخذوني لغرفة العمليات
فحصتني الدكتورة وغلا حطولي مغذي
الدكتور.ماكو ولادة هسة أبقي تمشي
نص ساعة وارجع افحصج لتخافين
بقيت افتر بصالة العمليات لأزمة ستاند المغذي المتحرك
وغلا تروح وترجع وياية واني ساعة اصرخ ساعة اكعد
صارت الساعة 3 رجعنة للفحص كلتلي بعد امشي
تعبت واحس نفس تبنجت
حور.الله يخليج دكتورة دا أولد
راح اموووت من الألم
الدكتور.اخر خيار اولدج قيصري
لأن بالشهر السابع وافتح بطنج تنتهين
رجعت افتر وآصف باقي ويانة مقاطع الخط
راحت غلا جابتلي عصائر احس نفسي عطشانة
شربت شوية وماكدرت من الألم مالي نفس
الساعة 4 فحصتني الدكتورة مرة ثانية
وگالت يلا دخلي لغرفة العمليات
اني اريد أولد واخلص من سمعتها گالت هيج
متت خوف بقيت أبجي
أباوع بالوجوه ماكو وجه حنين
ماكو الي تجي تبوس راسي وتحضني وتكول متانيتج
الوجوه غربة
رفعت راسي شكيت لرب العالمين حالي
والنار الذبني بيها آصف
حجيتلة شكد اني خايفة وگلبي معصور
رحت للغرفة جانت الولادة أشبه بخروج الروح من الجسد
وبيها تخرج روح من روح الألم ماينطاق
وشكثر رددت ياعلي لحد ما طلع الطفل وسمعت صوتة يبجي انتعش گلبي وغمضت عيني من التعب والجهد
فتحت عيني والغرفة هدوء
باوعت آصف نايم ع الكرسي لازم أيدي
باوعت للجانب عبالي الكة ابني بحاضنة يمي
هيج مثل المسلسلات ماكو
حور.آصف
كعد وباوعلي ابتسم
آصف.الحمد لله على السلامه
حور.ابني وين
آصف.بالخدج
حور.شبي
عبست ملامحي والدمعة غرغرت بعيني
عبالي مثل حور ماجنت اعرف الي ينولد بالسابع يدخلو بالخدج
آصف. هااا هااا مابي شي بس هو الينولد بالسابع
يودو للخدج اسبوع عشر أيام ويطلعو
حور.سميتة علي أريد اشوفة
آصف.لا سيف وهو بالخدج متكدرين تشوفي
حور.ليش سميتةةة سيف مو گولتلك علي
بعدين ليش مااكدر اشوفة حتلو من بعيد
آصف.نامي وارتاحي هسة
حور.ماما وين هسة
آصف.شافتج وراحت صارلج 7 ساعات نايمة
حور.جذاااااب الله لاينطيك يا آصف
عساك بشوغة گلبي بحق رب العالمين
ليش هجي سويت بية بهذلتني وديتني من مكان لمكان
لييييش مو كافي انتقامك
حط أيدة ع حلگي يكتم صوتي
تعبت وهواي انضحك علية
أخذ ابني وأشرد بس خل يصير وضعة
دفعت أيدة وتكورت بفراشي غطيت راسي
وصافنة
آصف.گتلج اجت وراحت كعدي عدل لاتتأذين
يلا حبابة كعدي عدل
مد أيدة يريد ينيمني مثل قبل
حور.وخررر ايدك لا افضحك هنا
واخلي المايشتري يتفرج
آصف.طبج مرض يا أدب سز
خلي تنفتح الخياطات وشوفي شيصير بيج
دفعت أيدة ورجعت لصفنتي
انفتحت الباب رفعت راسي عبالي جابو الطفل
دخلت غلا وياها دكتورة اجت يمي باركتلي
غلا.سيوفي يخبل هيج نسخة منج
العيون لون الشعر الملامح عبالك انتي
حور بلهفة.اي عفية خلي اشوفة
غلا.مو هسة ميصير بالخدج
هسة اجينة ناخذ حليب من عندج للطفل
حور.شلون يعني اروح ارضعة موو
اي عادي نزليني اخذيني الة
غلا.لا مو هيج
حور.شنو
غلا.خلي دكتورة زمن تشرحلج
الدكتور.الحمد الله ع السلامة حبيبتي
يتربى بعزج ودلالج إن شاء الله
حور.شكراً تسلمين
الدكتورة.المهم ، ماما نسحب حليب من صدرج بهذي الجذابة ونخلي ببرونة للطفل لأن حليبج بمثابة دوة ألة
خصوصاً هو بالسابع ولازم حليب طبيعي
حور.ليش مو اني اروح ارضعة
الدكتورة.ميصير حبيبتي الخدج معقم والطاقم البي خاص ومجهز الجو بي فايروسات لمن تدخلين راح تتنقل ويتأذون الأطفال وهمة مناعتهم ضعيفة
حور.ماشي ، بس هية توجع
الدكتورة.لا ، بس بالبداية تأذيج على ما تنزل المادة الصمغية الصفراء يعني اول كم يوم تتألمين بعدين عادي
حور.ماشي اهم شي يصير زين
اني عادي اتحمل بس كون يطلع واشوفة
الدكتورة.تماام ، هسة نسحب حليب
حور. اي ، بس هاي الممة صغيرة خاف ميشبع خطية
شربو هواي وسحبو شكد متردون عادي
الدكتورة.لا هو بعدة صغير هاي كافية علي
باوعت لآصف أشرتلة يطلع
طلع وفتحت الدكم سحبو حليب حييل يوجع
متت ألم وصدري ورم بس مابجيت اهم شي الطفل يصير زين ويكبر
ملت الممة ورجعت سحبت لأن بين رضاعة ورضاعة 3 ساعات سحبت كمية جبيرة وطلعت
خليت أيدي ع صدري الي يوجعني
حور.مو مهم الألم يروح
دخل آصف جايبلي اكل وعصائر
خلاهن ع الطبلة ويسويلي لفات صغار
جايب ويا تكة وكباب قدملي لفة درت وجهي
آصف.يلا اكلي
حور.ماريد
آصف.يعني ماتردين تاكلين حتى يصير عندج حليب للطفل
حور.والحليب شعلي بالأكل
آصف.اذا ماتاكلين يخلص الحليب بصدرج
حور.منو گال
فتحلي التلفون وطلع تقرير ع اليوتيوب
يثبت صحة كلامة خلص طفة تلفونة وقدملي لفة اكلتها
بقة يسويلي لفات واني اكل
حور.شبعت
آصف.هاي الأخيرة اكليها
اخذتها منة اكلتها
حور.افتحلي سورة البقرة حتى انام
هزلي راسة طلع الموبايل فتحلي سورة البقرة
نمت من التعب العشتة أمس والراحة الماشفتها
بقيت وحدي بس آصف يم انام واكعد
لمن احتاج أروح للحمام هو يوديني
والممرضة تساعدني
ثاني يوم هم سحبو حليب الصبح
وشكد حاولت اروح محد قبل حتى الدكتورات سونها ضلمة علية يتأذة الطفل ومتگدرين ومامسموح
باليوم الثالث الساعة 9 سحبو من عندي حليب
وسمحو بالخروج عاندت ماريد أروح ماكدر اعوف ابني
حور.آصف اني ابقة هنا انتضر ابني
آصف.لا تتلوثين المستشفى متروسة امراض وفايروسات
نطلع هسة وهو اسبوع ونجيب سيف للبيت
حور.لا لا خطية ماعوفة وحدة صغير
خاف يصير شي الممرضات يأذنة
حباب آصف خليني يمة
آصف.يلا حور لبسي حجابج والصاية ونطلع
نرجع للبيت ترتاحين حتى بعد يومية اجيبج ترضعينة
حور.الله يخليك صدوك
يعني مجذب علية
آصف.اي ، راح اجيب كرسي وأجي لبسي شالج والصاية
ضمي شعرج عدل
حور.خلي نمر علي قبل لانطلع
تركني وراح لبست شالي والصاية
اجة هو كعدني ع الكرسي عينة ع رجلية لأن طالعات
آصف.اوكفي أجيبلج جواريب واجي
حور ماالة داعي منو راح ينتبه
خزرني بقييت اباوعلة
آصف.نزلللي عليهن الصاية
دخلتهن جوة الصاية وحاجيتة
حور.خلي نمر علي بس اشوفة من بعيد
آصف.مو هسة
طلعنة وماخلاني اشوف الطفل
وصلت للبيت وغلا موجودة
أريد ادخل للحمام فتحت الجنطة الي نطتنياها عمة دعاء
بيها فستان شيفون باف طولة محير مبطن لونة نيلي فاتح
فصالة حيل مريح وفظفاظ ساعدتني غلا ودتني للحمام
دخلت بالبانيو مجهزتلي مي حار ارتاحيت
غسلت علكيف أحس بألم بس مو قوي مثل الوغزات
خلصت نشفت جسمي وطلعت
لگيت مربية حور منتضرتني بالباب ابتسمتلها
ام حسين.لو گايلتلي جان دخلت وياج ساعدتج
حور.لا خالة شكراً زينة مااحتاج ممنونة منج
دخلتني للغرفة مشطت شعري وعدها ماشات رفعتة عن عيني جابتلي غدة سوب لحم وبقت يمي حيل حبابة وگلبها طيب
بقيت اسبوع كامل ببغداد يومية يسحبون حليب للطفل هو بالخدج وآصف بالليل يبات يمة وبالنهار يبقة يمي يعتني بية وام حسين ممقصرة
لحد ما مرت ع فترة ولادتي عشر ايام
تحسنت صحتي وأكدر اكوم واتحرك براحتي
دخل آصف للبيت ومثل كل مرة استقبلة اسألة عن ابني وشوكت اكدر اشوفة بس اليوم جوابة جان مختلف
حور.هاا آصف شوكت اشوفة ، شوكت تاخذني
آصف.اجو اليوم امي والحجية جايبهم قصي
وسمحولة بالخروج أخذو وياهم وگالو جيب حور ورجعو للبصرة
حور.مين جبت هذا الحجي شو مجاي يدخل بدماغي
ابني بي شي شنووو السالفة
صيحت واضرب ع صدرة لزم أيدي
آصف.من الأخير الطفل بالبصرة صحتة تمام وخرجو
تردين ترجعين أو تردين تبقين هنا براحتج ابقي يم غلا
اني راجع للبصرة
حور.لا لا اني اريد اشوف ابني أروح وياك
ممصدكة بس مثل الغرگان اليتعلگ بگشاية
لميت ملابسي وطلعنة للبصرة
جان يومية يشربني حبوبي
واليوم قبل لانطلع آصر اتغدة رغم الساعة 11 الصبح
نطاني الحباية شربتها الا حرك السيارة
ساعات الطريق علية نااار نااار
اسابق الوقت بس أريد اشوف ابني
اريد اعرف موجود لو لا
6 ساعات أو ماعرف شكد بالظبط ماهدأت
ولاغمضلي جفن ريگي يبس
دخلنة لمنطقتنة وصلنة للبيت قبل لايدك هورن حتى يفتحولة الباب فتحت باب السيارة ونزلت ادك ع الباب حيل فتحتلي شمة الباب دفعتها ودخلت ادور ع الطفل
البيت هدووء مابي صوت احاول اجمع اصوات
بلكي اسمع صوت طفل يبجي واروح اركظلة احضنة
واشبع روحي بعطرة واخلي يتغلغل بروحي وارتوي
اني عطشانة من جبتة لسا ميرويني شي
فتحت باب غرفة عمة دعاء ملگيتة
رحت ع غرفة بيبي ماكو كعدت بالصالة بضياع
جانو كولهم واكفين ملتمين علية حتى آصف حاجيتة بهدوء وأيدي ترجف
حور . وين ابني
مارد علية
حور.لك آصف ووووين ابني
بجيت ولزمتة من زيگة أحاجي بشراسة
آصف.يا أبن
حور.ااابني سيف وين
سحبتني بيبي فاطمة حضنتني دفعتها
حور.وخرري ياعجوز البين ياجذابة
محد حجة بقو يشوفون حرگتي ويستلذون بيها
كعدت ع الكاع ادگ عليها بقوة حسيت ايدي انكسرت
حور.ولكم ااااابني ويييين
ابنيييي وين يمةةةة أريدة كلبي راح يوكف
آصف.شوكت تزوجتي حتى صار عندج طفل
دعاء.كاافي آصف
حور.ليش ياسافل ياخسيس ياعار ع الزلم
لك جنت جثةةة مشوهة وتجي تنهش بلحمي
فتح عيونة خزرني اجة حط أيدة ع حلگي دفعتة
رجع لزمني يريد يسكتني
حور.وخرررر ياقندرة ياكلب
امداك امدة شواربك روح زينهن ميلوگنلك يامرة
طللللللع ابني طلعة
آصف.هوااي سكتت اششش لا انفجر بيج
حور.الا اشتكي عليك واكول أخذوو ابني
الا اكول خطفو
طلعلي الجنسية مالتي لوح بيها كدامي
آصف. منين ابنج وانتي بعدج عزباء
اتذكرت اني معاقدة محكمة
كعدت وادك والطم شلعت شعرري
خرمشت خدودي ضلن يصبن دم
حور.ولج يمةةة ابني أخذو مني ماشوووفة بعد
تعبت بي تعبت والله تعبت وجرعت المر
اجت عمة دعاء تبعد أيدي عن وجهي دفعتها
شگيت فالينتي وآصف ضربني راشدي ذب العباة علية
قصي دنك بس بقة واكف
آصف.أصحي بت الكلب
رفعت أيدي لرب العالمين
حور.يااارب أريد اشوف عدلك بيهم
يارب انتقملي منهم شر انتقام
يبس أرحام بناتها ياربي كون طول عمرهن يحلمن بريحة الطفل وهذا قصي أريدة كون طول عمرة مايشوف البزر
أريد هذا البيت ينمحي ذكرة وينطفي نورة
اريدهم يصفون تراب وينمسحون وي الگاع مسح
لادمعتهم تنشف ولاگلوبهم تبرد
شمة.ياحقيرة ياجلبة ع هذا الدعاء المسموم
دعاء.عوفيها محروك گلبها
حور.خوفج من المحروك گلبة هذا يم رب العالمين ماينسي ولايضيع حقة ربج بالمرصاد
ولاتسوين نفسج شريفة كلجن بهذا البيت من الجبيرة لأصغر وحدة گ.. حط آصف أيدة ع حلگي يمنعني اكمل الغلط صعدني بالغرفة وسد الباب
مثل المخبلة رحت ادور ع شي انتحر بي
لكيت المكص خليتة ع ايدي اريد اكص شرايني
فتح آصف باب الغرفة وأجة يركض
آصف.خرة بعقلج عرفتج راح تسوينها
راد ياخذ المكص نبتة بزندة رجع ليورة بوجع
ضغط ع فكة وشلعة أيدة تصب دم
جرني من أيدي دخلني لغرفتي القديمة كولشي مابيها قفل الباب كسر الجام مال الشباك خاف انتحر بي طاح بالحديقة خلاني وحدي وقفل الباب
صدري يدر حليب
وأيدي تأذيني
راسي يوجعني حطيت راسي ع الكاع وابجي
واردد اغنية جنت اذكر بيها بابا بس هسة لأبني
باقي غلا وإلا الغـلا شحت يديــه
صار الزمان أقصر من اللحضة معك
باخذ من الدنيا جفا واندم عليه
اصعب خيارات الهوى بودعك
يتبع..........